1 ရန်ဆူ ဟဲ့ မှေတ့် ဟာဝ် ယေ၊ ဟဲ့ ပွိုန် အာ ဂိုဝ် ဒီ ဖန် ဆီနမ်၊ မာဂျီန် လှေး၊ ဆီငဲ ဂိုဝ်၊ မိူင် ယေရူဆာလဲမ် ဟဲ့ ကာပျာတ့် လိုဝ် အာဒါ ဂိုဝ် ဒီ ဖွုန် ဆီနမ်။ ဒေါ အန် တီ ပွုန် ဇဝ်ဖြာ ဟဲ့ ပ့လိုက် အုဝ် ဘော ဒိုဝ်း ဟာဝ် အုဝ် ဇမ် မိူင် ယေရူဆာလဲမ်။ 2 အန် တဲး အုဝ် ယိုဝ် အီ မွှိုမ် အာမ် ဘော ဒိုဝ်း ဟာဝ် အုဝ် ဒီ မိူင် အီဆာရေလ။ အန် ဘ့လေး အုဝ် ဒဲင် နွန် စာ ကာဆဝ်။ ဘ့လာက် နာ တေတ့် နွန် တီ၊ န့ မိုဝ်း ကာင် နှဲန် မိူင် တာင်။ 3 အန် ဇဝ် ဘော တဲး အုဝ် ဟာဝ် ကွယ် ဒီ တီ။ အုဝ် ဘော ယိုဝ် ဒူအီ အူ ဝီ၊ အာရိုပ် အန် မာဘြိဝ် ပီ ဘွင့် ဒေန့်။ အန် ဂူင့် ဝန် ကာတမ် လုယ် ဘော မင် ဂဝ်၊ ဝီ စွင့် ဒီ ဘာင် မာလုဝ်း မိူင်။ 4 အန် ဝီ ကာလာင် ဒီ အုဝ် တဝ်း၊ “အိုယ် ဂွန် ဒူအီ၊ တဲး မဲ ယွတ် ဆီချာ ဆီချာ ဘော ထူမ် ဆီချာ ဆီချာ။ ခဲ့ ပီ ဘျ အုဝ် ဒီ မဲ တီ ဒွန် မျုဝ်၊ တဲး မဲ နုဝ် ခဲင် နဝ်း မဲ။ န့ ဘော မုး ကူပ် အန် တီ၊ မဲ ဟဲ့ ကာဒုး ဒီ တး ဒီ နီ။ တဲး မဲ နုဝ် ခဲ့ ပီ ယိုဝ် မဲ၊ ဝီ ကာလာင် ဒီ ဂေ ဒူအီ အီဆာရေလ။”

5 အုဝ် ဝီ ယိုဝ် ဟုဝ် ဇဝ်ဖြာ ဟဲ့ မိုဝ်း ဘော လူင့် ဘော ဝဲင် အီ ရူပ်။ ဒူအီ ဝီ တွိုန် အန် ဘော ဂူင့် မင် ဂဝ် အန် အီ တူင့် ဒဝ် ကာနိး။ ကာနိး ပီ တာ အန် တီ ဘော လွှိုမ် အူ ကာဘာ ဒဲ။ အန် ဘော ဂဝ် ဟာဝ် ဒူပ် ရဲင် လူင့် တွိုန်။ ရဲင် လူင့် တွိုန် နာ စာ အန် အူ မင် ဂဝ်။ နာ ဟေတ့် အန် အူ မင် ဂဝ်။

6 ဟဲ့ ဟွတ့်၊ အန် ဘော ဝီ ဟာဝ် ဒီ မာလုဝ်း အီ ကွယ် နာ လေး ဆီငဲ။ အန် ဘော ဟာဝ် ဟုဝ့် ဒီ န့တဲင်၊ ဇမ် ခူပ် မာလုဝ်း တွိုန်။ အန် ဘော ဂဝ် ဒီ ဘန်ဒူက် မာလုဝ်း၊ န့ ဘော တူင့် အူ မင် ဂဝ်။ 7 ဘော မိုဝ်း ဟူင် ဒူင် ကွယ် ဂေ အီ ဘ်ု မာလုဝ်း အူယ် ဟူင် ဘော အာ ဘ့လာက်။ ဟူင် ဂေ တီ ဒွန် ဟူင် ဘော ကာတုဝ့် မုး အူ မျုဝ်။ အူ ဘ့လာက် ပီ ဝီ ကွယ် အူ မင် ဂဝ်။ ဒီ ကာတဲ ဟူင် တီ ဘော လာယ် ကာဟာင် ဖန် ကာနိး။ ဟဲ့ ပွုန် ဟူင် ဒူင် ဘ်ု ဂေ တီ၊ န့ ပီ ဝီ မိုဝ်း အီ ခန် ဒီ ကာတဲ အန် တီ၊ န့ ဘော တူင့် အူ မင် ဂဝ်။ န့ ဘော ဟာဝ် ဆိူဝ် ဒူင် ကွယ် ဂြး ခဲင် အီ လာယ် ကာဆိူဝ် ဒီ ဟုဝ် ဇဝ်ဖြာ တွိုန်။

8 အန် ဘော ဂဝ် နာ ခဲင် ဂြး ခဲင် တီ၊ န့ ကွယ် ဒါ ကာနိး။ 9 ရွင့် အန် မိူဝ် အန် ဂဝ် အာ ကာနိး။ ဂြး ခဲင် တီ ဘော ကွယ် နာ ဟုဝ် တာင်။

10 ဟူင် ဒူင် ဘ်ု ဂေ မာလုဝ်း အီ ကွယ် အာ ဘ့လာက် န့တေန့် တွိုန် နာ တာင် အန် ဘော နာ ကာဝဝ်း အန် န့ ဘော မုး အူ မျုဝ်။ အီ ခန် ဒီ ကာတဲ ဟူင် ဂေ တီ မိူဝ်၊ နာ ဟေတ့် အန် ဘော မုး အူ မျုဝ် ဒွန် ဘ့လာက်။ 11 အန် ပီ ဝီ ဂဝ် ခဲ့ ကာဝဝ်း န့တေန့် အီ ကာလုဝ်း ဟာဝ် ဒီ ကာတဲ မာလုဝ်း တီ န့ ကွယ် ဂိုဝ် ကာနိး ဘော နာ တူင့် ကွယ် ဂိုဝ် ဒီ အူယ် ကာနိး။ 12 နာ အာတ့် ဟူင် ဒူင် ဘ်ု ဂေ မာလုဝ်း၊ န့ ဘော ဝီ မိုဝ်း ရဲင် ဒီတဲတ်၊ နာ စာ အန် အူ ကာနိး။ ဘော ဟူင် ဂေ တီ ဒွန် ဟူင် ကွယ် ဒဝ် ကာနိး ဘော ဖွုန် ကာတုဝ့်။ 13 ဝါယ် အန် တီ အန် ဘော ဂဝ် စုး ဒီ ရဲင် ခဲင် ဟူင် အူ ဘ့လာက်၊ ဇမ် ဒီ ရဲင် ခဲင် ဟူင် အီ ကာဆိူဝ် ပေါ ဘ့လာက်။ န့ ဘော ကာဝဝ်း အာ ဂိုဝ် ဒီ ဖန် ကာနိး။ 14 အန် ပီ ဝီ ဂဝ် ရူပ် ဟူင် ဘော အာ ဘ့လာက်၊ န့ ကွယ် ဒဝ် ဂိုဝ် ကာနိး ဘော ကွယ် ကာဒိုက် ဒီ ဂြး ခဲင် ဘော လာယ် ကာဆိူဝ် ဒီ ဝဲင် ဟုဝ် ဇဝ်ဖြာ။ 15 စုး ဒီ ဘာင် မာလုဝ်း အီ ကွယ် နာ ရေတ့် တွိုန်၊ ကော ဝီ ဇမ် ဒီ ဂြး ခဲင် အီ လာယ် ကာဆိူဝ် ဒီ ဝဲင် ဟုဝ် ဇဝ်ဖြာ န့ ကွယ် ဖန် ဂိုဝ် ကာနိး။ 16 ဒီ ဂြး ခဲင် ဂေ တီ န့ ဘော မိုဝ်း ကာဒဝ် ပါတဲင် ဒီတဲတ်။ ဒီ ရဲင် အီ ကွယ် နာ ခဲင် ဘော ခူပ် ရွင့် ဘော ဒီ ကာတဲ ရဲင် တီ ဂေ ဟဲ့ မိုဝ်း ရာင် ဟေ စိုက်။

17 ဒူအီ ဝီ တွိုန် ဘော ယဲတ့် ဟာဝ် အုဝ် ဒူပ် န့တေန့် ဒီ မာလုဝ်း၊ ဇမ် ခဲင် ဝဲင် ဟုဝ် ဇဝ်ဖြာ အီ ကွယ် နာ ရေတ့်၊ ဂေ ဘော ဘူင် အုန် ဟူင် အူယ် ဂိုဝ် ဟူင်။ ဘ့လာက် နာ အာတ့် ဟူင် ဂေ တီ၊ န့ ဘော မိုဝ်း န့တေန့် အီ ဟဲ့ ဒ မာဝ်။ 18 န့တေန့် တီ ဘော ကွယ် ခူပ် မာလုဝ်း။ န့ ဘော ကာဝဝ်း ခဲ့ တူင့် မာလုဝ်း တီ။ န့ ဘော မုး န့တေန့် နာ ရေတ့် ဝဲင် ဟုဝ် ဇဝ်ဖြာ။ 19 ဒူအီ ဝီ တွိုန် ဘော ဂဝ်၊ စုး ဒီ မာလုဝ်း တွိုန်၊ ကော ဇမ် ဒီ ဝဲင် နာ ခဲင်၊ န့ ကွယ် အူ မာယဝ်း ကာနိး ဒီ ဘ့လာက် နာ လေး ဆီငဲ ဘော အူ မာယဝ်း ကာနိး ဒီ ဘ့လာက် နာ ကွာ။

20 ဒူအီ ဝီ တွိုန် ပီ ဝီ ဂဝ် မာလုဝ်း အီ ကွယ် ဘ့လာက် နာ ကွာ အီ ဝီ လေး ညိူဝ် ဝဲင် ဟုဝ် ဇဝ်ဖြာ အီ ကွယ် ဘ့လာက် နာ ရေတ့် တွိုန်။ 21 န့ ဘော မိုဝ်း ဟူင် ဒီ န့တေန့် အာ ဘ့လာက် အီ ကာလုဝ်း ဟာဝ် ဒီ ကာတဲ တွိုန်၊ အူ ဘ့လာက် အူယ် ဟူင်။ ဘော ရဲင် ဒီ ကာတဲ ဟူင် တီ ဘော ဟူင် တာင် တွိုန်၊ နာ တာင် ဘော နာ ကာဝဝ်း အန်၊ န့ ဘော မုး အူ မျုဝ်။ န့ ပီ အီ ကွယ် ဒီ မာလုဝ်း အီ ကွယ် ဘ့လာက် နာ လေး ဆီငဲ တွိုန်။ နာ တူင့် မာလုဝ်း တီ၊ န့ ကွယ် ဖန် ဂိုဝ် ကာနိး။ နာ ကာဝဝ်း အန် အာ ဂိုဝ် ဒီ ဖန် ကာနိး။ 22 ဒီ ဂြး ခဲင် ဘော ကာဒဝ် ပါတဲင် တွိုန် ဘော ရာင် ဟေ စိုက် အီ ကွယ် ဒီ ရဲင်၊ န့ ဘော ပီ အီ ကွယ် ဒီ ဘာင် မာလုဝ်း ဘ့လာက် နာ လေး ဆီငဲ တွိုန်။ ဒူင် တီ၊ န့ ဘော မိုဝ်း န့တဲင် ဘူ ဘ့လဝ့် အီ ဟုဝ့် ဒီ မာလုဝ်း တီ။ ဟူင် တာင် ဘော ကွယ် လာယ် ကာဆိူဝ် ဒီ ဝဲင် ဟုဝ် ဇဝ်ဖြာ။ 23 န့ ဘော ပွုန် မာလုဝ်း ဟုဝ် ဇဝ်ဖြာ အီ ကွယ် ဘ့လာက် နာ ကွာ၊ အီ ဝီ ကာလုဝ်း ဇမ် ဝဲင် အီ ကွယ် နာ ခဲင်။ န့ ပီ ဝီ မိုဝ်း မာလုဝ်း ပေါ အူ ဘူင့်၊ အီ လိုပ် ခဲင် ဝဲင် တီ။ န့ ဘော ပီ အီ ကွယ် ဘ့လာက် နာ လေး ဆီငဲ တွိုန်။ ဒူအီ ဝီ တွိုန် ဘော ဂဝ် ဒီ ကာတဲ မာလုဝ်း အာ ဘူင့် တီ၊ န့ ဘော လာယ် ကာယာန် အူ မာယဝ်း ကာနိး။

24 ဝါယ် အန် တီ ဒူအီ ဝီ တွိုန် ယဲတ့် ဟာဝ် အုဝ် ဘ့လာက် နာ တေတ့်။ နာ တေတ့် တီ အုဝ် ဝီ ယိုဝ်၊ န့ မိုဝ်း မာလုဝ်း ပေါ အူ ဘ့လာက်။ အန် ဂဝ် မာလုဝ်း တီ၊ န့ ဘော မုး အူ မျုဝ် ပီ မာလုဝ်း အာ မျုဝ် တွိုန်။ 25 ကာဒဝ် ပါတဲင် အီ ကွယ် ဒီ ဂြး ခဲင် ဘော အီ ကွယ် ဒီ န့တေန့် အီ ကာလုဝ်း မာလုဝ်း၊ န့ ဘော မုး အူ မျုဝ် ပီ ကာဆိူဝ် အာ ပ့လုဝ့် တွိုန်။ နာ တူင့် အန် ဖန် ဂိုဝ် ကာနိး၊ နာ ကာဝဝ်း အန် အာ ဂိုဝ် ဒီ ဖန် ကာနိး။ 26 န့ ဘော မိုဝ်း န့တဲင် အီ မိုဝ်း ဘ့လဝ့် ဘူ ဘ့လဝ့် ဟုဝ့် လိုပ် ဒီ ဂြး ခဲင်။ ဟူင် အီ ကွယ် အူ ဘ့လာက် န့ ဘော လာယ် ကာဆိူဝ် ဒီ ဟူင် အီ ကွယ် ပေါ အူ ဘ့လာက်။ ရာင် ဟေ စိုက် ဘော ကွယ် ဒဲင် ရဲင် ဟူင် အီ ကွယ် ဘော အာ ဘ့လာက်။ 27 ဝဲင် ဟုဝ် ဇဝ်ဖြာ အီ ကွယ် နာ ခဲင်၊ အန် ဘော ဂဝ် ဒီ ကာတဲ မာလုဝ်း အာ ဘူင့် တီ။ န့ ကွယ် အူ မာယဝ်း ကာနိး။

28 ဟဲ့ ဟွတ့်၊ အန် ပီ ဝီ ယဲတ့် ဟာဝ် အုဝ် ဒီ မာလုဝ်း အီ ကွယ် ဘ့လာက် နာ တေတ့် ဘော ဝီ လိုပ် တး ခဲင် ဝဲင် ဟုဝ် ဇဝ်ဖြာ အီ ကွယ် နာ ခဲင်။ အန် ဘော ဝီ ဂဝ် မာလုဝ်း တွိုန်။ နာ တာင် ဘော နာ ကာဝဝ်း မာလုဝ်း တီ၊ န့ ဘော မုး အူ မျုဝ်၊ န့ ဘော ပီ မာလုဝ်း အီ ဟဲ့ ဟွတ့် ဂဝ် တွိုန်။ 29 ဒီ ဂြး ခဲင် ဘော ဒူင် ကွယ် ဂေ ဒူအီ အီ ဘ်ု မာလုဝ်း၊ နာ တာင် အန် ဘော နာ ကာဝဝ်း အန် န့ ဘော မုး အူ မျုဝ် ပီ မာလုဝ်း ကာဆိူဝ် ဟဝ် တွိုန်။ ကာဒဝ် ပါတဲင် အီ ကွယ် ဒီ ဂြး ခဲင် မိူဝ် ဟဲ့ မိုဝ်း။ အန် ဘော ဂဝ် ရူပ်၊ နာ တူင့် အန် ဖန် ဂိုဝ် ကာနိး၊ နာ ကာဝဝ်း အန် အာ ဂိုဝ် ဒီ ဖန် ကာနိး။ 30 ကာဒဝ် ပါတဲင် ဒီ ရဲင် ဒူင် ကာခန် မာလုဝ်း တွိုန် မိူဝ် ဟဲ့ မိုဝ်း။ န့ရဲပ် မာလုဝ်း မိူဝ်၊ ဟဲ့ မိုဝ်း ကော ရူပ် လဲပ် ဒွန် ဘ့လာက်။ နာ တူင့် အန် အာ ဂိုဝ် ဒီ ဖန် ကာနိး။ နာ ကာဝဝ်း အန် ဖန် ကာနိး။ 31 ဒီ ဂြး ခဲင် အီ ကွယ် ဒီ မာလုဝ်း တီ၊ န့ ဘော ဝီ မာငး လာယ် ကာဆိူဝ် ဒီ ဝဲင် ဟုဝ် ဇဝ်ဖြာ အီ ကွယ် နာ ရေတ့်။ ရာင် ဟေ စိုက် ဂေ တွိုန် ဘော ကွယ် ဒဲင် ရဲင် ဒူင် မိုဝ်း န့တေန့် အီ ကာလုဝ်း ဟာဝ် ဒီ ကာတဲ အန်။ န့ ဘော မိုဝ်း န့တဲင် အီ မိုဝ်း ဘ့လဝ့် ဒါ ဘ့လဝ့် အီ ဟုဝ့် ဒီ မာလုဝ်း တီ။

32 ဒူအီ ဝီ တွိုန်၊ ပီ ဝီ ယဲတ့် အုဝ် ကာလုဝ်း မာလုဝ်း တွိုန်၊ ဝီ ဟာဝ် ဇမ် ဘ့လာက် နာ လေး ဆီငဲ ဘော ဝီ လိုပ် ဟာဝ် ခဲင် ဝဲင် ဟုဝ် ဇဝ်ဖြာ ဘ့လာက် နာ ခဲင်။ အန် ဘော ဂဝ် မာလုဝ်း တွိုန် အီ မုး အူ မျုဝ် ပီ မာလုဝ်း ပဲ့ ဟဲ့ ဟွတ့် ဂဝ် အန်။ 33 ဒီ ဂြး ခဲင် ဘော ဒူင် ကွယ် ဂေ ဒူအီ အီ ဘ်ု မာလုဝ်း တီ၊ နာ တာင် ဘော နာ ကာဝဝ်း အန်၊ န့ မုး အူ မျုဝ် ပီ မာလုဝ်း ဟဝ်။ ဒီ ဂြး ခဲင် တီ ဘော မိုဝ်း ကာဒဝ် ဟူပါတဲင် ရူပ် ဒွန် ဘ့လာက် ဘော ခဲင် ဟူင် တာင် တွိုန်။ နာ တူင့် အန် ဖန် ဂိုဝ် ကာနိး။ နာ ကာဝဝ်း အန် အာ ဂိုဝ် ဒီ ဖန် ကာနိး။ 34 ဒီ ဂြး ခဲင် ဒီ မာလုဝ်း ဟုဝ် ဇဝ်ဖြာ တီ၊ န့ ဘော ဝီ မာငး လာယ် ကာဆိူဝ် ဒီ ဝဲင် ဟုဝ် ဇဝ်ဖြာ အီ ကွယ် နာ ရေတ့်။ ရာင် ဟေ စိုက် မိူဝ် ဟဲ့ ကွယ် ဒီ ရဲင် တီ။ န့ ဘော မိုဝ်း န့တဲင် အီ ကွယ် ဒါ ဘ့လဝ့် ဘော ဟုဝ့် ညိူဝ် ဒီ မာလုဝ်း တီ။

35 ဒူအီ ဝီ တွိုန် ပီ ဝီ ယဲတ့် ဟာဝ် အုဝ် ဒီ မာလုဝ်း ဘ့လာက် နာ ကွာ။ အန် ဘော ဂဝ် မာလုဝ်း တီ။ နာ တာင် အန် ဘော နာ ကာဝဝ်း အန် ဘော ပီ မာလုဝ်း ပဲ့ ဟဲ့ ဟွတ့် အန် ဂဝ် တွိုန်။ 36 ဒီ ဘာင် မာလုဝ်း ဘော ဒီ ဂြး ခဲင် တီ ဘော မိုဝ်း ဟူင် ဒူင် ကွယ် ဂေ ဒူအီ အီ ဘ်ု မာလုဝ်း။ န့ မိုဝ်း ဘော ရွင့် အန် ဘော န့ရဲပ် အန်။ ကာဒဝ် ပါတဲင် မိူဝ် ဟဲ့ ရူပ် အန်။ နာ တူင့် အန် ဖန် ဂိုဝ် ကာနိး၊ နာ ကာဝဝ်း အန် အာ ဂိုဝ် ဒီ ဖန် ကာနိး။ 37 ဒီ ဂြး ခဲင် တွိုန်၊ န့ ဘော လာယ် ကာဆိူဝ် ဒီ ဝဲင် ဟုဝ် အီ ကွယ် ဘ့လာက် နာ ရေတ့်။ ရာင် ဟေ စိုက် မိူဝ် ဟဲ့ ကွယ် ဒီ ရဲင်။ န့ ဘော မိုဝ်း န့တဲင် အီ မိုဝ်း ဒါ ဘ့လဝ့် ဝီ ဟုဝ့် ညိူဝ် မာလုဝ်း တွိုန်။

38 န့ မိုဝ်း ဟူင် အီ မိုဝ်း မာလုဝ်း အီ ကွယ် လာယ် ကာဒိုက် ဒီ ဂြး ခဲင် ဒီ မာလုဝ်း အီ ကွယ် ဘ့လာက် နာ ခဲင်။ ဒူင် တီ ဘော မုး ဒူင် ဘာယ် ဂေ ပီ ဒီ လှူ အီ ဒုဝ့် ဒီ ငဝ်။ 39 ခဲင် ဂြး ခဲင် တီ န့ ဘော မိုဝ်း ကာစှူင့် လှူ ဖွုန် ဘူင့် အီ ဘ့လေး အုန် အူ ဘ့လာက် အာ ဘူင့်။ ဒဲင် ကာစှူင့် တီ ဂေ ဘော ငဝ်း ဒုဝ် ပီ ဒီ လှူ၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်၊ ပီ ဒီ လှူ အီ ဂဝ်း ဝဲန် မှာပ် ဘော ပီ ဒီ လှူ အီ တဲး ဒူအီ ဝီ ကာလဝ့် ဒီ ဇဝ်ဖြာ။ 40 နာ လေး ဆီငဲ ဒီ ဂြး ခဲင် တီ၊ န့ ဘော မိုဝ်း ကာစှူင့် ဖွုန် ဘူင့်။ န့ ကွယ် အူ ဘ့လာက် အာ ဘူင့် ပေါ ဘ့လာက် အီ ကွယ် ကာဆိူဝ် အာ ဘူင့်။ 41 ကာစှူင့် ဂေ တီ ဘောကာဂ့လျီတ် ဟဲ့ ကွယ် ဒါ ဘူင့်။ ခဲင် ဟူင် တွိုန် အူ ဘ့လာက် ဖွုန် ဘူင့်။ ဂေ ဘော ငဝ်း ဒုဝ် ပီ လှူ ဂေ ဒဲင် ကာစှူင့် တီ။ 42 ကာစှူင့် ဘော ဖွုန် ဘူင့် အီ ကွယ် ခဲင် ဟူင် တွိုန်၊ ဂေ ဟဲ့ ဘူင် ဒိုဝ်း မာဝ် ပဲ့ ဟဲ့ ဒဝ်း အီ။ န့ ဘော မုး ဒူင် ပီ ဒီ လှူ အီ ဒီ ဒုဝ့် ခဲင် ငဝ်။ ကာစှူင့် ဂေ တီ နာ စာ အန် အူ ကာနိး။ နာ တာင် အန် အူ ကာနိး ဒီ အူ ကာဆာန်၊ ဘော နာ ကာဝဝ်း အန် အူ ကာနိး ဒီ အူ ကာဆာန်။ ခြိုင် တာ ပီ ဒီ လုဝ် စ်ု လုဝ် တာ ဒေါ ငဝ်း ဂေ ဒုဝ် ပီ ဒီ လှူ ဂေ၊ ဂေ ဘော ဘ့လေး အုန် ဒဲင် ကာစှူင့် ဂေ တီ။ 43 ဒီ ဘာင် ကာစှူင့် တီ၊ န့ ဘော မိုဝ်း မ့ဘာ့ အန် အီ တာင် မွက် အူ ကာဘာ ဒဲ ဘော ကွယ် ရူပ် ဘာင် အန်။ ခဲ့ ကွယ် ယင် ပီ ဒီ လှူ ဂေ၊ ဂေ ယီ ဘ့လေး အုန် တူတ့် ဒဲင် ကာစှူင့် ဒါ ဘူင့် တီ။

44 ဝါယ် အန် တီ ဒူအီ တွိုန် ပီ ဝီ ယဲတ့် ဟာဝ် အုဝ် ခဲင် ဝဲင် ဟုဝ် အီ ကွယ် ဘ့လာက် နာ ခဲင်။ ဒူင် တီ၊ န့ ဘော မိုဝ်း ဟူင် အာ ဟူင်။ ဟူင် အူ ဟူင် န့ ဘော ကွယ် ခူပ် မာလုဝ်း ဘ့လာက် နာ ကွာ၊ ဝီ မာငး လေး ဘ့လာက် နာ တေတ့်။ ပေါ အူ ဟူင်၊ န့ ဘော ကွယ် ဘ့လာက် နာ တေတ့်၊ ဝီ မာငး လေး ဘ့လာက် နာ ကွာ။ 45 ဒူအီ ဝီ တွိုန် တဝ်း ဒီ အုဝ်၊ “ဟူင် အီ မာငး လေး နာ တေတ့် နီ၊ န့ မုး ဒူင် ဒီ ကွယ် ဂေ ဒါ အီ လှူ ဒီ ဇဝ်ဖြာ အီ ဘူင် ဂါန် ခဲင် ဟုဝ် ဇဝ်ဖြာ။ 46 ဟူင် အီ မာငး လေး ဘ့လာက် နာ ကွာ ဘော မုး ဒူင် ဒီ ကွယ် ဂေ ဒါ အီ လှူ ဒီ ဇဝ်ဖြာ အီ ဘူင် ဂါန် ဒီ ကာစှူင့် လှူ။ ဂေ ဒါ အီ လှူ ဒီ ဇဝ်ဖြာ တီ၊ ဂေ ဘော မုး တူတ့် လှုက်လှာန် အာဇာဒူက်။ န့ မိုဝ်း မီ ဂေ ဒူအီ အီ မုး ခြိုဝ် အာလေဝီ အီ ပွိုန် လိုပ် ဇမ် ဒီ အာတ့် ဇဝ်ဖြာ ဘော ဘူင် ဂါန် အန် ဇဝ်။”

47 ဝါယ် အန် တီ ဒူအီ ဝီ တွိုန် ပီ ဝီ ဂဝ် ဝဲင် နာ ခဲင် အီ ကွယ် ရူပ် ဟုဝ် ဇဝ်ဖြာ။ အူ ဘ့လာက် န့ ကွယ် အူ မာယဝ်း ကာနိး။ ဘော ဖွုန် ဘ့လာက် ဟဲ့ ကာရမ်။ ဟုဝ် ဇဝ်ဖြာ ဘော ကွယ် ဘ့လာက် နာ ဂေတ့် ဆီငဲ၊ ကာစှူင့် လှူ ဘော ကွယ် နာ အာတ့် ဟုဝ် ဇဝ်ဖြာ တီ။ 48 ပါယ် တီ အန် ပီ ဝီ ယဲတ့် ဟာဝ် အုဝ် ဒီ ဂြး ခဲင် ဘာင် မာလုဝ်း ဟုဝ် ဇဝ်ဖြာ။ အန် ဘော ဂဝ် မာ မာလုဝ်း အီ ကွယ် ဒီ ဂြး ခဲင် တီ။ နာ လိုက် အန် ဖန် ကာနိး၊ နာ ကာဝဝ်း အန် ဂိုဝ် ဒီ ဖွုန် ကာနိး။ နာ ဟေတ့် ရဲင် အူယ် ကာနိး၊ န့ ဘော မုး အူ မျုဝ် ဘော အာ ဘ့လာက်။ 49 နာ တူင့် ဂြး ခဲင် အီ ကွယ် ဒီ မာလုဝ်း ဟုဝ် ဇဝ်ဖြာ၊ န့ ဘော ကွယ် အာ ဂိုဝ် ကာနိး။ နာ ကာဝဝ်း အန် ပီ ဝီ ကွယ် ဂိုဝ် ဒီ အာ ကာနိး။ န့ ဘော လုဝ် ဟုဝ့် ဒီ န့တဲင် ဂိုဝ် ဘ့လဝ့်၊ လိုပ် ဒီ မာလုဝ်း ဟုဝ် ဇဝ်ဖြာ။ နာ အာတ့် မာလုဝ်း ဟုဝ် ဇဝ်ဖြာ တီ၊ န့ ဘော မိုဝ်း ရွင့် အာ ညွင့် အီ ကွယ် အူ ဘ့လာက် အူ ညွင့်။