1 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ကာလာင် ဒီ ခုန်ဒီခမ် အာကုဝ်က အီ အိုပ် ဂေ ဒူအီ အာမျုဝ် မဲဆိတ် ဘော အာမျုဝ် ထူဘာ။ တဲး မဲ ကာလာင် လွင် ဒီ ဘဲန် အုဝ် ရန်ဆူ အန်။ တဲး မဲ တဝ်း၊ 2 ‘အုဝ် ဒီ ဘူင် တဲး မဲ ဝီ ကာဘတ် ဝိဝ်။ အုဝ် ဒီ ဒိုဝ်း လေး မဲ ဘ့လာက် နာ ကွာ၊ ဝီ တိုယ် မဲ ဇမ် ဒဲင် နွန် ခဲင် မိူင် အီဆာရေလ။ 3 ပန် တီ န့ ပီ အုဝ် ဒီ မး စုဝ်း အ ပီ ဂူင့် မဲ ဒီ ဒဲ မဲ ဘ့လာက် အာဂ။ အုဝ် ဒီ မး စုဝ်း ဘော ဘ့လာ ပီ ဂူင့် မဲ ဒီ ဒဲ မဲ ဘ့လာက် အာအး။ 4 မဲ ခုန်ဒီခမ် အာကုဝ်က ဘော ဂေ ဒါ ဆိုက် မဲ ဘော ဂေ အာမျုဝ် ဒူအီ အီ ကွယ် ဘ့လာက် မဲ၊ ဂေ ဒီ ဘော ကေး ယမ် ဒဲင် နွန် ခဲင် မိူင် အီဆာရေလ။ ဒုဝ် ယမ် ဂေ တီ၊ အုဝ် ဒီ တဲး န့ ဘဲန် ပီ ဒီ ဟူမ် မာဆိမ် ဟာယ် ဘော မာဒုဝ် ပြဲ ဟာယ်။ 5 ဂေ ဒီ ဘော ကေး ယမ် ခဲင် ဂ့လင်။’ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။ 6 အုဝ် ဒီ ဝီ ဒိုဝ်း ငဝ် ဒုဝ့် ဘော မိူင် မာကုဝ်က ဘော ဂေ ဒူအီ အီ ကွယ် ဒါခိုယ်၊ ခူပ် အိုမ် နမ်မုက်ဆာရာ။ ပါယ် တီ ဒွန် အီ ဒီ ဘော နပ်၊ အုဝ် မုး ဇဝ်ဖြာ။

7 အုဝ် ဒီ ဘူင် တဲး န့ လိုဝ်း ဆီချာ ဒီ ဒူအီ အီဆာရေလ လွင် မိုဝ်း အုဝ် နာ မွှိုမ် နာ ဘွတ်။ ဝါယ် အန် တီ အုဝ် မိူဝ် အာဝ် ဟူ တဲး ဂေ လုက်တာယ် အုဝ် ဒေါ မှဝ်။ ပါယ် တီ ခဲ့ ကွယ် ဒူအီ ဒွန် ဇိုဝ် ဒွန် မျုဝ်၊ ဂေ ဘောကာဂ့လျီတ် ဒီ ဘော နပ် လွင် မုး အုဝ် ဇဝ်ဖြာ အီ ဆီငါ ဘွတ် ဘော ဇဝ်ဖြာ ပီ ကြိုပ် ဂေ ဒူအီ အီဆာရေလ။ 8 ဘ်ု ဘေ ယွတ်၊ ဆီငဲ ပီ ကာလာင် အုဝ် တီ၊ န့ ဒီ ဘော တး အာခ်ု မှာန်။

9 ဒေါ အန် တီ ဒူအီ ခဲင် မိူင် အီဆာရေလ ဂေ ဝီ ဟာဝ် ဂဲပ် ဟာဝ် ဒိုဝ်း ခြိုင် ကာဂုဝ်း ဂေ ရန်ဆူ အီ ဟဲ့ ကိူန် ကာဆဝ်၊ တဲး န့ ဝီ ဘဲန် ဟေ ပီ ဒုဝ့် ဂေ ဒီ ငဝ်။ ဂေ ဘော ဟာဝ် ဒိုဝ်း မင် ဂွင့်၊ ဒိုဝ်း အ၊ ဒိုဝ်း ဘ့လာ ဘော ဘ့လာ လျီး ဘော မီဒဲ၊ ဝီ တး ဒုဝ့် ခဲင် ငဝ်။ ငဝ် တီ ဂေ ဘော နပ် ဒီ ဒင် ဟာပ် ဘော ဝါတ် အာဒါ ဘူ ဆီနမ်။ 10 အာခြာဝ် ဒေါ အန် တီ ဂေ မိူဝ် အာဝ် ဟူ လုဝ် ဝိန် ဒီ ဟြေတ့် ဟေ ခဲင် မာန် ဂေ ခဲင် ဒီဂ့လဝ်း။ ဂေ မိူဝ် အာဝ် ဟူ လုဝ် ဝိန် ဒီ ဂ်ု ဟေ ခဲင် ပြဲ ဂေ ခဲင် နင်။ ခုဝ်၊ ဂေ ဟဲ့ မိုဝ်း ခြိုင် ကာဂုဝ်း အီ ဟဲ့ ကိူန် ကာဆဝ် တဲး န့ ဘဲန် ဟေ ဒုဝ့် ဂေ ခဲင် ငဝ်။ ဂေ ဒီ ဘော ဝီ ပျာတ့် ဂေ ဒူအီ အီ ဟဲ့ ဒွိုမ် ပျာတ့် ဂေ။ ဂေ ဒီ ဘော ဝီ ဖာတ် ဒိုဝ်း ကြုဝ်ကြာမ် ဂေ အီ ဟဲ့ ဒွိုမ် ဖာတ် ဒိုဝ်း ကြုဝ်ကြာမ် ဂေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

11 ဇဝ်ဖြာ ပီ ဝီ တဝ်း၊ “ဆေ န့ ဒီ ဘုဝ် ဘဲန် လွင် အန် တီ၊ အုဝ် ဒီ ဝီ ဒွါ ကာဒါယ် ဒူင် ဒီ ဒိပ် ဂေ ဒုဝ် ယမ် ခုန်ဒီခမ် အာကုဝ်က ခဲင် မိူင် အီဆာရေလ၊ တဲး ဂေ ဒိပ် ဒုဝ် အန် ဒူပ် ဒီလယ့် အီ ကွယ် ဘ့လာက် နာ လေး ဆီငဲ အိုမ် ဒိုင် ဆဲ့ ဆွင့် အီ မုး ဒူင် ဟာဝ် ဝိဝ် ဟာဝ် ဝေန့် အီ။ ခုန်ဒီခမ် အာကုဝ်က ဂေ ဒါ ဆိုက် အန် ဘောကာဂ့လျီတ်၊ ဂေ ဒီ ဒိပ် တူတ့် ဒုဝ် ဂေ ဒူပ် ဒီလယ့် တီ။ ဒီလယ့် တီ ဂေ ဘော တဲး အန် စိူဝ်၊ ‘ဒီလယ့် ဒါ ဆိုက် ခုန်ဒီခမ် အာကုဝ်က။’

12 ဂေ ဒူအီ အီဆာရေလ ဒီ ဘော ဒိပ် ဒုဝ် ယမ် ဂေ တီ အာဒါ ဘူ မာဂျီန်။ ဟဲ့ ဟွတ့် ပါယ် တီ မိူင် တီ ဘော ဝီ ဆီငါ။ 13 ဂေ ဒူအီ ခဲင် ရဝ် ခဲင် မိူင် တီ ဘော လာယ် စွယ် ဘော ကာဖြူမ် ဒီ ဒိပ် ဒုဝ် ယမ် ဂေ တွိုန်။ ဒူအီ ခဲင် ရဝ် ခဲင် မိူင် တီ၊ ဂေ ဒီ ဘော မိုဝ်း ဆာရေ ဒေါ ဇမ် ဆီငဲ ဒီ ဘျ အုဝ် အာဖုင် ဒင်ခုဝ် အုဝ်။” အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

14 အန် ဇဝ် ဝီ တဝ်း၊ “ဆေ ဟဲ့ ဟွတ့် ပွုန် ဘူ မာဂျီန် တီ၊ ဂေ ဒီ ဘော ဝီ စ်ု ဒူအီ မင် အီ၊ တဲး ဂေ ဟာဝ် ခဲင် မိူင် ဒွန် နာ ဒွန် ပ့လုဝ့်၊ တဲး ဂေ ဝိန် ဒီ ဟြေတ့် ဒုဝ် ယမ် အီ ဆီ ဂိတ် ဆီ ကွယ် ဒဲင် ကာဒါယ်၊ တဲး ဂေ ဒိပ် ဒုဝ် ယမ် ဂေ တီ၊ တဲး မိူင် ဂေ ဝီ ဆီငါ။ 15 ဂေ မိူဝ် ဟုဝ့် ဟုဝ့်၊ လူင် လူင် ခဲင် မိူင် ဘော မိူင်။ ဆေ ဂေ ဝီ ယိုဝ် ကာအာင် ဒူအီ ယမ်၊ ဂေ ဝီ ဆမ် လွှက့် ခူပ် ကာအာင် တီ တဲး ဂေ နုဝ်၊ တဲး ဂေ အီ ဂိုဝ်း ကာဒဝ် ဘာရေဝ်၊ ဝီ တး ဒိုဝ်း ကာအာင် တီ၊ ဝီ ဟာဝ် ဒိပ် ဒူပ် ဒီလယ့် အီ စိူဝ် ဒါ ဆိုက် အာကုဝ်က တွိုန်။ 16 မိူင် အီ စိူဝ် ဟာမူန် မိူဝ် ကွယ် ဒီ တီ။ ဂေ ဘူင် ပါယ် တီ တဲး မိူင် ဂေ ဝီ ဆီငါ။

17 အိုယ် ဂွန် ဒူအီ၊ ဇဝ်ဖြာ ဟဲ့ ကာလာင် ပါယ် နီ။ တဲး မဲ ဒဲ့ ဂေ မာဆိမ် ဘော ဂေ ဒုဝ် ဆတ်ဒါဝါ ခဲင် ပြဲ ဒွန် မျုဝ် အီ ကွယ် ကာတတ် ဒူင် တီ၊ တဲး ဂေ တး ဟူမ် ပဲ့ ဟဲ့ ရဲန် အုဝ် ဒီ လှူ ဒီ ဂေ။ န့ ဒီ ဘော ဘဲန် ဘ့လွယ် လှူ တာင် တဲး ဂေ ဘော ပွိုန် ဒီ ဟူမ် ဖဲ ဒဲင် နွန် မိူင် အီဆာရေလ၊ တဲး ဂေ ဘော ပွိုန် ဒီ ဟူမ် ယင် ဂေ နှာမ်။ 18 ဂေ ဒီ ဘော ဟူမ် ယင် ဂေ ဒါ ဆိုက်၊ ဒျီင် ဘော နှာမ် ဂေ ဂွန် ခုန်ဒီခမ် အီ ဟဲ့ ယမ်၊ အီ ဟဲ့ ပီ မာဘူ အာလူင့်၊ ပီ ဂွန် မာဘူ ဘော မာပဲ။ ဆေ အာဝ် ပါယ် တီ မိူဝ်၊ ဂေ ဘော ပီ ဘော မက် ဒီဆုဝ် အီ ဟဲ့ ဂ့လန့် အီ ဟဲ့ ဘျြီင် ကာဆဝ် အီ ကွယ် ဒီ မိူင် ဘာဆန်။ 19 ဒေါ ဘူင် အုဝ် ဘ့လွယ် လှူ ပါယ် တီ ဂေ မာဆိမ် ဘော မာဒုဝ် ပြဲ ဘော ပွိုန် ဒီ ဟူမ် ယင် ဂေ ဘျြီင် တဲး ဂေ ကော ဖဲ။ ဂေ ဘော ပွိုန် ဒီ ဟြိုပ် နှာမ် တဲး ဂေ ကော ယိုတ့်။ 20 ဒီ ဘ့လွယ် အုဝ် တီ၊ ဂေ ဒီ ပွိုန် ဒီ ဟူမ် ဖဲ ယင် မင်ပြွင့် ဘော ယင် ဒူအီ အီ ပဝ့် မင်ပြွင့် ဘော ယင် ဂေ ဒါ ဆိုက် အီ ဟဲ့ ကျ ဒီ ကာဂုဝ်း။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

21 ဇဝ်ဖြာ ပီ ဝီ တဝ်း၊ “အုဝ် ဒီ ဘော ဘျ အာဖုင် ဒင်ခုဝ် အုဝ်၊ တဲး ဒူအီ ဒွန် မျုဝ် ကော ယိုဝ်။ ဂေ ဒီ ဘော ယိုဝ် ပီ ဒီ ပါယ် အုဝ် ဒီ တဲး အီ ဟဝ် ခမ် မှာပ် ဂေ။ 22 ပါယ် တီ ဂေ ဒူအီ အီဆာရေလ ဒီ ဘော နပ် လွင် မုး အုဝ် ဇဝ်ဖြာ ပီ ကြိုပ် ဂေ။ 23 ဂေ ဒူအီ ဒွန် ဇိုဝ် ဒွန် မျုဝ် ဒီ ဘော နပ် လွင် ကာဒုး ဂေ ဒူအီ အီဆာရေလ ဒီ မှေတ့် ကူပ် မှာပ် ပီ ဘူင် ဂေ။ အုဝ် မိူဝ် တူ တဲး ဂေ ယွတ် အုဝ် ကူပ် ပီ လုတ့် ပီ လှိုဝ် ဂေ ဒီ အုဝ်။ အုဝ် ဟဲ့ ဝီ အာပ် ဂေ ဒီ ရန်ဆူ ဂေ၊ တဲး ဂေ ယမ် ဒီ မာပွါ့ လာင်။ 24 အုဝ် ဟဲ့ ဘူင် ဒီ ဂေ၊ တဲး န့ ဒူပ် ခဲ့ ပီ ဘူင် ဂေ အီ ကာဒါတ့် ဘော ပဲ့ ဟဲ့ လုတ့် ဂေ ဒီ အုဝ်။ အုဝ် မိူဝ် ဝဲန် ဂေ၊ တူ တဲး ဂေ ယိုဝ် အုဝ်။”

25 ပါယ် တီ ဇဝ်ဖြာ တဝ်း၊ “ဒေါ တီ နီ အုဝ် ယီ ဝီ ကာဝေ ဂေ လှုက်လှာန် အာကူပ် အီ မုး ဒူအီ အီဆာရေလ၊ တဲး ဂေ ဝီ မိုဝ်း ဝီ ဘြဲ ကိူန်။ တဲး ဂေ နပ် ဘော ခဲ့ ဘွတ် ပွုန် အုဝ်။ 26 ဒေါ ဟဲ့ ဟွတ့် ဝီ ပွိုန် ဂေ ဒီ ကွယ် ဒါခိုယ် ခဲင် မိူင် ဒူင် ကွယ် ဂေ၊ ဂေ မိူဝ် အာဝ် ဟူ မိုဝ်း ဒီ လုဝ် ယုဝ် အာဆေ။ ဂေ ယီ ဝီ ပိဝ် လွင် ဟဲ့ စှိုမ် ဂေ ဆာရေ ကူပ် တူ ဘိုင် ဂေ ဒီ အုဝ်။ 27 အုဝ် ဒီ တဲး ဒူအီ အာမျုဝ် ဟဝ် ဘောကာဂ့လျီတ် နပ် ခဲ့ ဆီငါ ဘွတ် အုဝ် ဘော နာ ဆိူဝ် နာ မှာန် အုဝ်၊ တဲး ဂေ ယွတ် ပီ ဘူင် အုဝ် ဒီ ဒူအီ အီဆာရေလ ဒေါ တဲး အုဝ် ဂေ လေး ခဲင် မိူင် ဒူင် ကွယ် ရန်ဆူ ဂေ။ 28 ပန် တီ ဂေ ဒူအီ ပီ အိုပ် အုဝ် ဒီ ဘော ဝီ နပ်၊ အုဝ် မုး ဇဝ်ဖြာ ပီ ကြိုပ် ဂေ။ အုဝ် ပီ ဘော ဟဲ့ တဲး ရန်ဆူ မှေတ့် ဟာဝ် ဂေ၊ ဘဲန် မှာယ် အီ ဟဝ်။ ဒေါ တီ နီ၊ အုဝ် ယီ ဝီ ဒဲ့ တး တူတ့် ဂေ၊ တဲး ဂေ ဝီ တး ကွယ် ကာဇု ခဲင် မိူင် ဒူင် ကွယ် ဘြိမ် ဂေ။ အုဝ် မိူဝ် တူ တဲး ခေါ အူ ဝီ ကွယ် နာ ပန် ခဲင် မိူင် အီ ဟဝ်။ 29 အုဝ် ဝီ ဟပ် နဝ်း ဖွိုမ် အုဝ် ခဲင် ဒုဝ် ဘူင့် ဂေ ဒူအီ အီဆာရေလ ဘောကာဂ့လျီတ်။ ဝါယ် အန် တီ အုဝ် မိူဝ် အာဝ် ဟူ ဝဲန် ဂေ ဒေါ မှဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။