1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ ဒီ ခုန်ဒီခမ် အီ စိူဝ် အာကုဝ်က အီ အိုပ် ဒူအီ ခဲင် မိူင် မာကုဝ်က။ အန် အိုပ် ဘော ဒူအီ အာမျုဝ် မဲဆိတ် ဘော ဒူအီ အာမျုဝ် ထူဘာ။ 3 တဲး မဲ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အိုယ် မဲ ခုန်ဒီခမ် အာကုဝ်က၊ အုဝ် ဟဲ့ ဘဲန် ရန်ဆူ မဲ။ မဲ မုး ခုန်ဒီခမ် အာကုဝ်က အီ အိုပ် ဒူအီ အာမျုဝ် မဲဆိတ် ဘော ဒူအီ အာမျုဝ် ထူဘာ။ 4 အုဝ် ဒီ ဒိုဝ်း ဟိန် ဂုဝ့်၊ ဝဲ့ ကုင်ကာပ် မဲ၊ ဝီ ဒိူတ် လာက် မဲ ဘော ဂေ ဒါ ဆိုက် မဲ ဘောကာဂ့လျီတ်။ ဂေ ဒါ တာင် အီ အိုပ် ဒါ ဆိုက် မဲ ဘော ဂေ ဒါ ဆိုက် အီ ပဝ့် မင်ပြွင့်၊ ဂေ ဒီ ကိူန် ကာဆဝ်။ ခဲ့ ကွယ် ဂေ ဒါ ဆိုက် ဒွန် အီ ဟဲ့ ဂူင့် ခြိုင် ကာဂုဝ်း ဂေ ဘော မာပွါ့ လာင်။ 5 ဂေ ဒူအီ မိူင် ဘီရာဆီ၊ မိူင် ကူဆာ ဘော ဒူအီ ခဲင် မိူင် ဖုတ် အီ ဟဲ့ ဂူင့် မင် ဂွင့် ဂေ ဘော မာဂိန့် ဟိန်၊ ဂေ မိူဝ် ကွယ် ဘ့လာက် ဘေ။ 6 ခဲ့ ကွယ် ဒါ ဆိုက် ခဲင် မိူင် ဂူမ် ဘော ခဲင် မိူင် ဘေတောကာမာ အီ တး နာ ကွာ၊ ဂေ ဘောကာဂ့လျီတ် ကွယ် ဘ့လာက် ဘေ။ ဒဲင် တီ ဘော ဂေ ဒူအီ အာမျုဝ် ဟဝ် ဟဲ့ ကိူန် ကာဆဝ် ဘော ဂေ ဒီ ကွယ် ဘ့လာက် ဘေ။

7 ဘော မဲ ဘော ဂေ ဒါ ဆိုက် မဲ ဘောကာဂ့လျီတ်၊ တဲး ဘေ ရဲန် ဆိုက်။ မဲ ခုန်ဒီခမ်၊ တဲး မဲ ယဲတ့် ဘော ဒွါ အာမိင် ဒီ ဒါ ဆိုက် ဂေ အီ ဟဲ့ ကိူန် ကာဆဝ်။ 8 ဝါယ် အန် တီ ဟီ ပွုန် ဟာဝ် ရာမ် လှေန့်၊ မဲ လုဝ် ဝီ ဟာဝ် ကာဂုဝ်း ဒီ ဂေ ဒူအီ အီဆာရေလ အီ ဟဲ့ ဒွိုမ် ကာဂုဝ်း ဒီ အီ ဟဝ် ဘော စှိုမ် ဒီ ဂေ။ ဝါယ် ဟဲ့ ကွယ် ဂေ ခဲင် မိူင် အီ ဟဝ်၊ ဂေ ဟဲ့ ပွိုန် ဒီ တး ကွယ် ဒါခိုယ် ဒီ နွန် ခဲင် မိူင် အီဆာရေလ အီ မုး မိူင် အီ ဟဲ့ ဒွိုမ် ယေန် ဒွိုမ် ငွင့် ဘော ရာမ် ဟဲ့ လှေန့် ကာဆဝ်။ 9 ဘော မဲ ဘော ဂေ ဒါ ဆိုက် မဲ ဘော ဂေ ဒူအီ အာမျုဝ် ကိူန် အီ ကွယ် ဘ့လာက် မဲ၊ ဘေ လုဝ် ကာဂုဝ်း ဒီ ရန်ဆူ ဘေ၊ တဲး န့ ပီ ခုန် တာင် ဟဲ့ တး၊ တဲး န့ ပီ န့အု တာင် တး ပ့လိုက် မိူင် တီ။”

10 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဆေ ဟီ ဇမ် ဆီငဲ တီ၊ မဲ ဒီ မိုဝ်း အာကျာမ် အာငျာန် အီ တူ မွှိုမ် ခဲင် နဝ်း မဲ။ 11 မဲ ဒီ ဘော တဝ်း၊ ‘အုဝ် ဒီ ယဲတ့် ဒါ ဆိုက် အုဝ်၊ ဟာဝ် ကာဂုဝ်း ဒီ ဂေ အီ ကွယ် ခဲင် ရဝ် နာ ရေတ့် မိူင်၊ ရဝ် အီ တူ မိုဝ်း ရဲင်။ အုဝ် ဒီ ဟာဝ် ကာဂုဝ်း ဒီ ဂေ ဒူအီ အီ ဟဲ့ ပွိုန် ဒီ ကွယ် နှိမ်၊ ကွယ် ခဲင် ရဝ် အီ တူ မိုဝ်း ရဲင် ဂေ မာလုဝ်း ဘော ဆဲ အန်။’ 12 အုဝ် ဒီ ဖာတ် ဒိုဝ်း ကြုဝ်ကြာမ် ဂေ ဒူအီ အီ ကွယ် ခဲင် မိူင် အီ ဟဲ့ ဒွိုမ် ကာပျာတ့် လိုဝ်။ ဒူအီ ဂေ တီ၊ ဂေ ဟဲ့ လေး ခဲင် ဒူအီ ဘဲန် မျုဝ် ဘဲန် မျုဝ်၊ ကွယ် ကာဇု ဒူပ် ဂေ ဒူအီ အီ ဟဲ့ ကိူန် ကာဆဝ်။ ဒေါ တီ နီ ဂေ ဟဲ့ ဝီ မိုဝ်း ကြုဝ်ကြာမ် ဂေ ဒုဝ် ဆတ်ဒါဝါ ကိူန် ကာဆဝ်။ ဂေ မိူဝ် ဟဲ့ ကွယ် ကာတဲ မိူင် ဘြိမ် ဂေ။ 13 ဒူအီ ခဲင် မိူင် ဆေဘာ ဘော ဒူအီ မိူင် ဒေဒါန် ဘော ဂေ ဒူအီ အီ ကာစိုဝ်း ကာယွင့် ခဲင် မိူင် ထာဆိတ် ဘော ဂေ ဒူအီ ခဲင် ရဝ် ဒွန် ရဝ်၊ ဂေ ဒီ ဘော ကာဖြူမ် ဒီ ဒီမွှတ် မဲ တဝ်း၊ ‘ဟဲ့ မှာန်၊ ဘေ ဟဲ့ တး၊ တဲး ဘေ ဖာတ် ဒိုဝ်း ကြုဝ်ကြာမ် ယေ။း ဘေ ဒီ ဇူန် ဒိုဝ်း ဘော ရွိုန် ခြိဝ် ယေ၊ ဒိုဝ်း ဘော ကြုဝ်ကြာမ် ဘော ဒုဝ် ဆတ်ဒါဝါ ယေ အီ ဟဲ့ ကိူန် ကာဆဝ် နီ။း’

14 ခုဝ် အန် တီ၊ အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ ဒီ ခုန်ဒီခမ် အာကုဝ်က၊ တဲး မဲ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဆေ ဟီ ဇမ် ဆီငဲ ဂေ ဒူအီ အီဆာရေလ အီ မုး ဒူအီ ပီ အိုပ် အုဝ် ဟဲ့ ကွယ် ဒါခိုယ်၊ မဲ ဒီ ဘော နပ် လွင် အန် တီ။ 15 မဲ ဒီ ဘော ယိတ့် ဒူင် ကွယ် မဲ အီ မုး မိူင် နာ ကွာ။ မဲ ဒီ ဘော ယဲတ့် တး ဂေ ဒါ ဆိုက် အီ မုး ဒူအီ ဘဲန် မျုဝ် ဘဲန် မျုဝ် အီ ဟဲ့ ကိူန် ကာဆဝ်၊ ဘော ဂေ အီ ဟဲ့ မိုဝ်း အာဖုင် ဒင်ခုဝ် ဘော ဂေ ဒါ ဆိုက် အီ ဟဲ့ ပဝ့် မ့ပြွင့်။ 16 မဲ ဒီ တး ကာဂုဝ်း ဒီ ဂေ ဒူအီ အီဆာရေလ အီ မုး ဒူအီ ပီ အိုပ် အုဝ်၊ တဲး န့ ကော ပီ န့အု တာင် ဟဲ့ ပ့လိုက် ကာဒါယ်။ ဟီ ဇမ် အာခြာဝ် ပန် အန် တီ၊ အုဝ် ဒီ စ်ု မဲ တး ကာဂုဝ်း ဒီ ဂေ ဒူအီ ခဲင် မိူင် ပီ အိုပ် အုဝ်၊ တဲး ဂေ ဒူအီ ကိူန် ကော နပ် အုဝ် မုး အာဆေ ဘော နပ် ခဲ့ ဆီငါ ဘွတ် အုဝ် ကူပ် ပီ စ်ု အုဝ် မဲ ဘူင်။’”

17 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဟဲ့ လှေန့် ကာဆဝ် အုဝ် ဟဲ့ စ်ု ဒဲစေန့် အုဝ် အီ မုး ဒူအီ ဘျာန် ဂြုဝ်း ဇဝ်ဖြာ ခဲင် မိူင် အီဆာရေလ၊ တဲး ဂေ ကာလာင် လွင် မဲ။ အုဝ် ဟဲ့ ဟွတ့် တဝ်း၊ ဆေ ဟီ ဇမ် ဆီငဲ တီ၊ အုဝ် ဒီ စ်ု ဒူအီ အူ ဝီ၊ တဲး အန် တး ကာဂုဝ်း ဒီ ဂေ ဒူအီ အီဆာရေလ။” 18 မာလဲ၊ ဇဝ်ဖြာ ပီ ဝီ တဝ်း၊ “ဆီငဲ ဒီ တး ကာဂုဝ်း ခုန်ဒီခမ် အာကုဝ်က ဒီ မိူင် ဒူအီ အီဆာရေလ တီ၊ အုဝ် ဒီ ဘော ရူ ကာဆဝ်။ 19 အုဝ် ကာလာင် ဒီ ဘေ ပီ ပါယ် နဝ်း အုဝ် ဒီ ကာဟွာ့ ဘော ပီ ပါယ် အုဝ် ဒီ ရူ ကာဆဝ်။ ဆီငဲ တီ၊ န့ ဒီ ဘော ဘဲန် မာအိမ် ယေန့် ကာဆဝ် ခဲင် မိူင် အီဆာရေလ။ 20 ခဲ့ ကွယ် ဂေ မာဂါ ခဲင် အိုမ် ဘော မာဆိမ် ခဲင် ဘ့လေန့် ဘော ခဲ့ ကွယ် ဒုဝ် ဆတ် ခဲင် ပြဲ ဘော ဒုဝ် အီ ဟာဝ် ဒဲင် ကာဒါယ် ဘော ဂေ ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ ဂေ ဒီ ဘော ယုဝ် ဒီယုး ဒီယေန့် ကူပ် ပီ ဘူင် အုဝ်။ ဂေ နွန် ဒီ ဘော ဒီဂ့လဝ်း။ ဒါအာင် မာဝ် ဒီ ဘော ကာလွှယ် စုဝ်း။ ရဲင် မိူင် မိူဝ် ဒီ ဘော ကေး တူတ့်။ 21 အုဝ် ဒီ ဝီ ကာလာင် ဒီ ဂေ အီ ဂူင့် မာပွါ့ လာင်၊ တဲး ဂေ ဝီ တး ကာဂုဝ်း ဒီ ခုန်ဒီခမ် အာကုဝ်က အီ ကွယ် ဒဲင် နွန် ခဲင် မိူင် ပီ အိုပ် အုဝ်။” အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် နီ။ အုဝ် ဒီ တဲး ဒွန် အီ အီ မိုဝ်း မာပွါ့ လာင် ကာဂုဝ်း ဒီ ဘီနွင် ဝေါဝဲ အန်။ 22 အုဝ် ဒီ ဘူင် တဲး အန် ခမ် ဒုက် တာင်၊ တဲး အန် ခမ် ဆဝ် ရောဂါ ဘော ခမ် အီ လာယ် ကာငဝ်း ယမ်။ အုဝ် ဒီ တဲး ဂ့လာယ် စုဝ်း တာင် ကာဆဝ်၊ တဲး ဘော ဘျြီ ဘော ငဝ် ဘော ဂန်ဒိူက် စုဝ်း ဒဲင် အန် ဘော ဒဲင် ဒါ ဆိုက် အန် ဘော ဒဲင် ဂေ အီ ကွယ် ဘ့လာက် အန် ဘောကာဂ့လျီတ်။ 23 ပါယ် တီ အုဝ် ဒီ ဘျ ဒီ ဂေ ဒူအီ ဘောကာဂ့လျီတ် ခဲ့ တာင် ပွုန် အုဝ် ဘော ခဲ့ ဆီငါ ဘွတ် အုဝ်။ ပန် အန် တီ ဂေ ဒီ ဘော နပ်၊ အုဝ် မုး ဇဝ်ဖြာ။”