1 အာဖုင် ဒင်ခုဝ် ဇဝ်ဖြာ ဟဲ့ ပ့လိုက် အုဝ်။ နဝ်း ဖွိုမ် ဇဝ်ဖြာ ဘော ဒိုဝ်း ဟာဝ် ဘ့လေး အုဝ် ဒီ ဒီလယ့် ဒူင် မုး ကာအာင် ဒီလူယ်။ 2 အန် ဇဝ် မိူဝ် တဲး အုဝ် ဟာဝ် ဝိဝ် ဟာဝ် ဝေန့် ဒီ ဒီလယ့် တီ။ အုဝ် ဘော ယိုဝ် ကာအာင် ကိူန် ကာဆဝ်။ ကာအာင် ဂေ တီ ဟဲ့ ဟွတ့် ကာဟဝ်း တူတ့်။ 3 ဇဝ်ဖြာ ဝီ ဒီမွှတ် အုဝ် တဝ်း၊ “အိုယ် ဂွန် ဒူအီ၊ မဲ ထာင် ကာအာင် ဂေ တီ ဒီ ပွိုန် ဝီ အိမ်။း” အုဝ် မိူဝ် ဝီ တဝ်း ဒီ ဇဝ်ဖြာ အီ အိုပ် တူတ့် ဒွန် မျုဝ်၊ “န့ မိုဝ်း မီ မဲ ဇဝ် အီ နပ် လွင် အန် တီ။”

4 အန် ဇဝ် ပီ ဝီ တဝ်း၊ “တဲး မဲ ကာလာင် ဂြုဝ်း ဇဝ်ဖြာ ဒီ ကာအာင် ဂေ တီ။ တဲး ကာအာင် ကာဟဝ်း ဂေ တီ ထူမ် ဂြုဝ်း ပီ ဒမ် အုန် ဇဝ်ဖြာ။” 5 ပါယ် တီ ဇဝ်ဖြာ ဝီ ကာလာင် ဒီ ကာအာင် တဝ်း၊ “အုဝ် ဒီ ဝီ ဟပ် ဖွိုမ် ခဲင် ကာအာင် ဘေ၊ တဲး ဘေ ဝီ အိမ် ဝီ မိုဝ်း အာဆာက်။ 6 အုဝ် ဒီ ဝီ တဲး ဘေ မိုဝ်း ဆီန၊ ဝီ မိုဝ်း ဘော ယင် ဒီ ဒုဝ် ဘေ၊ ဝီ ဒိုဝ်း ဘော ဟုန်၊ ဝီ ကာဘိတ် ဆီဘ့လိုက် တူတ့်။ အုဝ် ဒီ ဟပ် တဲး ဘေ ဝီ မိုဝ်း ဖွိုမ် မိုဝ်း အာဆာက်။ ပန် တီ ဘေ ဒီ ဘော ဝီ နပ်၊ အုဝ် မုး ဇဝ်ဖြာ။”

7 ပါယ် တီ အုဝ် မိူဝ် ကာလာင် ဂြုဝ်း ဇဝ်ဖြာ ဒူပ် ပီ စ်ု ဇဝ်ဖြာ။ ဒေါ ဆီငျာ ကာလာင် အုဝ် တီ၊ အုဝ် ဘော ယိုဝ် န့ ဘော မိုဝ်း ဟမ် ကာဒွယ်။ ကာအာင် ဂေ တွိုန် ဘော ကာထုဝ့် လာယ် ညိူဝ် ရာင် အာဆေ ရာင် အန်။ 8 ဒေါ ဆီငျာ ယွတ် အုဝ် တီ၊ ဆီန မိူဝ် ကာပ့လုး တး၊ ယင် မိူဝ် မိုဝ်း အူ ဇေန့်။ ဟုန် မိူဝ် ဝီ ကာဘန် ဝီ ဆီဘ့လိုက် ကာအာင် ဂေ တီ။ မာလဲ၊ န့ ယီ ညှမ် မိုဝ်း ဖွိုမ်။

9 ဟဲ့ ဟွတ့်၊ ဇဝ်ဖြာ ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ ဒီ ဖွိုမ် အီ တဲး အာဆာက် ဒီ ကာအာင် ဂေ တီ။ တဲး မဲ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အိုယ် ဘေ ဖွိုမ် အီ ပီ ခုန် အီ ကွယ် ဖွုန် ဘ့လာက် ဒဲင် ကာဒါယ်၊ တဲး ဘေ တး ဘုတ် လိုပ် ခဲင် ဒုဝ် ယမ် ဂေ နီ၊ တဲး ဂေ ဝီ အိမ်။’” 10 ပါယ် တီ အုဝ် မိူဝ် ကာလာင် ဂြုဝ်း ဇဝ်ဖြာ ဒူပ် ပီ ကာလာင် အုန် အန် ဇဝ် ဒီ အုဝ်။ ခုန် ဘော တး ဘုတ် ဘဲန် ဖွိုမ် အီ လိုပ် ခဲင် ဒုဝ် ယမ် ဂေ တီ။ ဂေ ဘော ဝီ အိမ် အူ ဇေန့်။ ဟဲ့ ဟွတ့်၊ ဂေ ဘော ဝီ ယိတ့် စွင့်၊ ဝီ ဘဲန် ဒါ ဆိုက် ကိူန်။

11 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ “အိုယ် ဂွန် ဒူအီ၊ ဒူအီ အီဆာရေလ ဂေ ဘောကာဂ့လျီတ် ပီ ကာအာင် ဂေ တီ။ ဂေ ဟဲ့ တဝ်း၊ ‘ကာအာင် ယေ ဟဲ့ ဟွတ့် ကာဟဝ်း တူတ့်။ ယေ နီ အာဝ် ဟူ မိုဝ်း ပီ မာင်၊ ပီ ခြာမ် မာဆေ။ ယေ ဟဲ့ ဟွတ့် စှိုမ် တူတ့်။’ 12 ခုဝ်၊ တဲး မဲ ဝီ ကာလာင် ဂြုဝ်း ဇဝ်ဖြာ ဒီ ဂေ ဒူအီ အီဆာရေလ တဝ်း၊ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ‘ဘေ ဒူအီ ပီ အိုပ် အုဝ်၊ အုဝ် ဒီ ဝိုဝ်း တူတ့် ကာဒဝ် ဘာရေဝ် ဘေ၊ ဝီ ဒိုဝ်း လေး ဘေ၊ ဝီ တိုယ် တဲး ဘေ ဟာဝ် ဇမ် ခဲင် မိူင် အီဆာရေလ အီ မုး ဒူင် ကွယ် ဘြိမ် ဘေ။ 13 အိုယ် ဘေ ဒူအီ ပီ အိုပ် အုဝ်၊ ဒေါ ဝိုဝ်း အုဝ် ကာဒဝ် ဘာရေဝ် ဘော ဝီ ဒိုဝ်း လေး ဘေ ခဲင် ကာဒဝ် တီ၊ ဘေ ဒီ ဘော နပ်၊ အုဝ် မုး ဇဝ်ဖြာ။ 14 အုဝ် ဒီ ဝီ ဒိုဝ်း နဝ်း ဖွိုမ် အုဝ်၊ ဝီ ဟပ် ခဲင် ဒုဝ် ဘူင့် ဘေ၊ တဲး ဘေ ဝီ အိမ်၊ ဝီ မိုဝ်း အာဆာက်။ အုဝ် ဒီ တဲး ဘေ ဝီ ပွိုန် ဒီ ကွယ် ခဲင် မိူင် ဒူင် ကွယ် ဘြိမ် ဘေ။ ပါယ် တီ ဘေ ဒီ ဘော နပ်၊ အုဝ် မုး ဇဝ်ဖြာ။ အုဝ် ဟဲ့ ကာဆဲန့် ဒီ ဘူင် ပါယ် တီ။ အုဝ် ဒီ ဘော ဘူင်။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

15 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 16 “အိုယ် ဂွန် ဒူအီ၊ တဲး မဲ ဒိုဝ်း မ့ဖျီ့ အူ ညွင့်၊ တဲး မဲ ဒဲမ် တဝ်း၊ ‘မိူင် ယူဒါ ဘော ဒူအီ အီဆာရေလ အီ ကွယ် ခဲင် မိူင် ယူဒါ။’ ဟဲ့ ဟွတ့်၊ တဲး မဲ ပီ ဝီ ဒိုဝ်း ပေါ အူ ညွင့်၊ တဲး မဲ ဒဲမ် တဝ်း၊ ‘မ့ဖျီ့ အာအေဖာရိမ် အီ မုး လှုက်လှာန် အာယုဝ် ဘော ဒူအီ အီဆာရေလ အီ ကွယ် ခဲင် မိူင် တီ။’ 17 တဲး မဲ ဝီ ဒိုဝ်း မ့ဖျီ့ အာ ညွင့် တီ၊ ဝီ လာယ် ကာဒုတ့် ခဲင် ဒဲ မဲ၊ တဲး န့ ပီ အူ ညွင့်။

18 ဆေ ဂေ ဒူအီ အီ ကွယ် ဒူပ် မဲ ဘော ဒီမွှတ် မဲ တဝ်း၊ ‘အာတီ၊ မုး ဆီဖဝ် မာဆေ။း’ တဲး မဲ ဝီ ကာလာင် ဒီ ဂေ တဝ်း၊ 19 ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အုဝ် ဒီ ဒိုဝ်း မ့ဖျီ့ အီ မုး စိူဝ် အာယုဝ်၊ ပီ ဂူင့် အာအေဖာရိမ် အီ မိုဝ်း ဘော စိူဝ် ခြိုဝ် ဒူအီ အီဆာရေလ အီ ကွယ် ဒူပ် ဂေ။ အုဝ် ဘော ဒိုဝ်း မ့ဖျီ့ ဒူအီ အာယူဒါ၊ ဝီ တဲး အာ ညွင့် တီ ဝီ ဘဲန် အူ ညွင့်။ ဟဲ့ ဟွတ့်၊ တဲး အုဝ် ဝီ ကာနျီမ် အုန် အူ ညွင့် တီ ခဲင် ဒဲ အုဝ်။’ 20 ခုဝ်၊ တဲး မဲ ကာနျီမ် အုန် မ့ဖျီ့ အာ ညွင့် တီ ခဲင် ဒဲ မဲ၊ တဲး ဂေ ဒူအီ ကိူန် ကော ယိုဝ်။ 21 တဲး မဲ ဘော ဝီ ကာလာင် ဒီ ဂေ ပါယ် နီ။ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ အုဝ် ဒီ ဝီ ဒဲ့ တး တူတ့် ခဲ့ ကွယ် ဒူအီ ပီ အိုပ် အုဝ် ဒွန် နာ ဒွန် ပ့လုဝ့်။ ကာတဲ ဂေ ဒူအီ အာမျုဝ် ဟဝ် အုဝ် ဒီ တဲး ဂေ ဝီ ဟာဝ် ဇမ် ခဲင် မိူင် ဘြိမ် ဂေ။ 22 အုဝ် ဒီ တဲး ဂေ ဘဲန် ဒူအီ အာမျုဝ် ခဲင် မိူင် ဂေ၊ တဲး ဂေ ကွယ် ဒဲင် နွန် ခဲင် မိူင် အီဆာရေလ။ ခုန်ဒီခမ် အူ ကာဒင် ဒီ ဘော အိုပ် ဂေ၊ ယွတ် မဲန် ဂေ။ ဝါယ် အန် တီ ဂေ အာဝ် ဟူ ဘဲန် ဒူအီ အာ မျုဝ်၊ အာဝ် ဟူ ဘဲန် အာ ဖိုင် ဘော အာ မိူင် ဒေါ မှဝ်။ 23 ဝါယ် အန် တီ ဂေ အာဝ် ဟူ ဘူင် တဲး ဂေ ကာဒါတ့် ကူပ် ကြိုပ် ဂေ အာရိုပ် ရာင် အီ မွှိုမ် ကာအိး။ ဂေ မိူဝ် အာဝ် ဟူ ဘူင် အီ တူ မွှိုမ် ပေါ န့ ပွါ။ အုဝ် ဒီ တဲး ဂေ လွတ် ခဲ့ ပီ လုတ့် ဂေ ဒီ အုဝ်၊ ဝီ တဲး ဂေ ဆီငါ ဘွတ်။ ဂေ ဒီ ဘော ဘဲန် ဒူအီ ပီ အိုပ် အုဝ်၊ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဂေ။

24 ဒဲစေန့် အုဝ် အီ မုး ခုန်ဒီခမ် အာဒါဝိတ် တွိုန်၊ အန် ဒီ ဘော ဘဲန် ခုန်ဒီခမ် အီ အိုပ် ဂေ။ ဂေ မိူဝ် မိုဝ်း မီ ခုန်ဒီခမ် အူ ကာဒင် တီ အီ အိုပ် ဂေ။ ဂေ မိူဝ် မိုဝ်း နဝ်း ဆိူဝ် နဝ်း မှာန် ဘော ဘူင် ဒူပ် ဒါရာ အုဝ် ဒွန် မျုဝ်။ 25 ဂေ ဒီ ဘော ပွိုန် ဒီ ကွယ် ခဲင် မိူင် ပီ အာပ် အုဝ် ဒီ ဒဲစေန့် အုဝ် အီ မုး အာကူပ်၊ အီ မုး မိူင် ပီ ဒွိုမ် ကွယ် ဂုန့် ဒင် ဂေ။ ဘော ဂေ ဘော လှုက်လှာန် ဂေ ဒွန် စုဝ် ဒွန် ဘာန် ဒီ ကွယ် ခဲင် မိူင် တီ။ ဒဲစေန့် အုဝ် အီ မုး ခုန်ဒီခမ် အာဒါဝိတ်၊ အန် ဒီ ဘော အိုပ် ဂေ ဆေဆေ။ 26 ဒဲင် တီ အုဝ် ဒီ ဒွါ ကာဒိက် ဆတ်ဇာ ဒီ ဂေ၊ တဲး န့ ဘဲန် ကာဒိက် ဆတ်ဇာ အီ မန် ဆီချာ၊ တဲး ဂေ ပွိုန် ဒီ ကွယ် ဒါခိုယ်၊ ကွယ် ထင်ဟာင် ဆေဆေ။ အုဝ် မိူဝ် ဒီ ယွတ် ဒွါ ဒူင် ဒီ ကွယ် ဂေ၊ တဲး ဂေ ဘော ကြဲ ဒီ ဘြဲ ကိူန်။ ဟုဝ် ဇဝ်ဖြာ မိူဝ် ဂေ ဒီ ဘော ဆမ် ကာတဲ ခဲင် မိူင် ဂေ တီ။ န့ ဒီ ဘော ကွယ် ဆေဆေ။ 27 အုဝ် မိူဝ် ဒီ ကွယ် ရိုမ် ဒူပ် ဂေ။ အုဝ် ဒီ ဘဲန် ဇဝ်ဖြာ ပီ ကြိုပ် ဂေ၊ ဂေ မိူဝ် ဒီ ဘဲန် ဒူအီ ပီ အိုပ် အုဝ်။ 28 ဆေ အုဝ် ဟီ တဲး ဟုဝ် ဇဝ်ဖြာ ကွယ် ကာတဲ ဂေ ဆေဆေ၊ ဒူအီ ဒွန် ဇိုဝ် ဒွန် မျုဝ် ဒီ ဘော နပ် လွင် အုဝ် ဇဝ်ဖြာ ဟဲ့ ရဝ်း ဒူအီ အီဆာရေလ၊ တဲး ဂေ ဘဲန် ဒူအီ ဘွတ် ဒူအီ ပီ အိုပ် အုဝ်။’”