1 ဇဝ်ဖြာ ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ဘျာန် ဂြုဝ်း အုဝ်၊ ကာလာင် ဒီ နွန် ခဲင် မိူင် အီဆာရေလ၊ တဲး ဂေ ထူမ် ဂြုဝ်း ဇဝ်ဖြာ။ 2 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘ဂေ အီ မုး ရန်ဆူ ဒူအီ အီဆာရေလ၊ ဂေ ဟဲ့ တဝ်း၊ အေ ဟဲ့ ဒါခိုယ် ကာဆဝ်၊ နွန် အီ ကွယ် ဆိန့် ဒေါ မွိုန် ဟဲ့ ဟွတ့် ဘဲန် ဒူင် အိုပ် အေ။ 3 ကူပ် ဟဲ့ တဝ်း ဂေ ပါယ် တီ တဲး မဲ ကာလာင် ဒီ ဂေ တဝ်း၊ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဂေ ဒူအီ အာမျုဝ် ဟဝ် အီ ကွယ် ခူပ် ဂေ ဒူအီ အီဆာရေလ တွိုန် ဟဲ့ တး ဒွန် နာ ဒွန် ပ့လုဝ့်၊ ဂေ ဟဲ့ ကာစွှာ့ ဘော တဲး ဒူအီ အီဆာရေလ ဘဲန် မှာယ် ဂေ၊ တဲး ဂေ ဘော ခမ် ပီ နဲန ဂေ။ 4 ခုဝ်၊ တဲး ဘေ ထူမ် ဂြုဝ်း ဇဝ်ဖြာ အီ အိုပ် တူတ့် ဒွန် မျုဝ်။ အန် ဇဝ် ဟဲ့ ကာလာင် လွင် ဘေ အီ ကွယ် ဒဲင် နွန် တာင် နွန် တျီ့၊ ကာလာင် ဘော လွင် ဂ့လင် ဘော လွင် ဒီလယ့် ဘော လွင် ဂေ အီ ကွယ် ဒူင် ဟဲ့ ကာပျာတ့် လိုဝ် ဘော ခဲင် မိူင် ဒူင် ယေန် ဒူင် ငွင့် ဘော လွင် ဂေ ဒူအီ အာမျုဝ် ဟဝ် အီ ကွယ် ခူပ် ဒူင် ကွယ် ဘေ တီ။ 5 အန် ဟဲ့ တဝ်း၊ အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဟဲ့ ရူ ကာဆဝ် ပီ အုဝ် ဟဲ့ ဂူင့် ငဝ်။ အုဝ် ဟဲ့ ရူ ဒီ ဂေ ဒူအီ ဒွန် မျုဝ် ဘော ဒီ ဂေ ဒူအီ အာမျုဝ် အေဒူမ်။ ခုဝ်၊ ဂေ ဟဲ့ ခူယ်၊ ဟဲ့ ဘြေ့ ဒီ နဝ်း ဒီ ဖွိုမ် ဂေ ဘော တူ ရုဝ်ဆေ အုဝ် ဒေါ ကာဂုဝ်း ဂေ ဘော ဖာတ် ဒိုဝ်း မိူင် ပီ အိုပ် အုဝ်။ 6 ပါယ် တီ တဲး မဲ ကာလာင် ဂြုဝ်း ဇဝ်ဖြာ ဒီ ဂေ ဒူအီ အီဆာရေလ အီ ကွယ် ဒဲင် နွန် တာင် ဘော နွန် တျီ့။ ကာလာင် ဘော ဒီ ဂေ အီ ကွယ် ဒူပ် ဘ့လဲင် ဂေ ဒူပ် ဒီလယ့် ဘော ဒူပ် နွန် ဒွန် ပ့လုဝ့် တဝ်း၊ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ရူ ကာဆဝ်။ အုဝ် ဒီ ဘော ဘူင် ဝျီ့ ဒီ ဂေ ဒူအီ အီ ဟဲ့ နဲန ဘေ။ 7 ခုဝ်၊ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ အုဝ် ဟဲ့ စုဝ့် ဒဲ အုဝ် ဘော ကာဆဲန့် တဝ်း၊ အုဝ် ဒီ ဘူင် တဲး ဂေ ဒူအီ ဘောကာဂ့လျီတ် အီ ကွယ် ရူပ် ဘေ ဝီ မွှိုမ် ဆာယ် ဘော စုဝ်း တျီမ်။

8 အိုယ် ဘေ အီ ကွယ် ဒဲင် နွန် မိူင် အီဆာရေလ၊ ခဲ့ ကွယ် ဟေ ဂေ ဒီ ဘော ဝီ မိုဝ်း န့လုဝ်း၊ ဝီ မိုဝ်း ဘ့လေ အန် အာဒါ ဂေ ဒူအီ အီဆာရေလ အီ မုး ဒူအီ ပီ အိုပ် အုဝ်။ အာဝ် ဘော လှေန့် ဘေ ဒီ ပွိုန် ဒီ ဝီ တး ဒီ ကာင် ဒူင် ကွယ် ဘြိမ် ဘေ။ 9 အုဝ် ဒီ ဝီ ကွယ် ဘ့လာက် ဘေ၊ တဲး န့ ဝီ ပွိုန် ဒီ ထဲ ကာဒါယ် ဒူင် ကွယ် ဘေ၊ ဝီ ပွိုန် ဒီ ဘြတ် ဘော ဆီမာ ပီ ပိတ် ပီ ဆမ် ဘေ။ 10 အုဝ် ဒီ တဲး ဘေ ဝီ ဘြဲ ကိူန်၊ တဲး ဘေ ဝီ ပွိုန် ဒီ ကွယ် ခဲင် မိူင် ဘေ၊ တဲး ဘေ ဘော ဝီ ဂုဝ်၊ ဝီ မ့ပြာယ် အီ ဟဲ့ ကာပျာတ့် လိုဝ် ဒွန် ပ့လုဝ့်။ 11 အုဝ် ဒီ တဲး ဘော ဒူအီ ဘော ဒုဝ် ဆတ် ပီ ဟျီင် ဘေ ဝီ ဘြဲ ကိူန်။ ဘေ ဒီ ဘော ဝီ ဘြဲ ကိူန် လွှိုမ် အာတ့် နီ။ ဘေ ဒီ ဘော မိုဝ်း ဂွန်၊ မိုဝ်း လှုက်လှာန် ကိူန် ကာဆဝ်။ အုဝ် ဒီ တဲး ဘေ ကွယ်၊ တဲး န့ ပီ ဒေါ ဟဲ့ ဒွိုမ် ကွယ် ဘေ အာတ့် နီ။ အုဝ် ဒီ ဘူင် တဲး ဘေ ဝီ ဆီကဲန်၊ ဝီ ကျ လွှိုမ် ဘြိမ်။ ပန် တီ ဘေ ဒီ ဘော နပ်၊ အုဝ် မုး ဇဝ်ဖြာ။ 12 အုဝ် ဒီ ဒိုဝ်း ဘေ အီ မုး ဒူအီ အာမျုဝ် အီဆာရေလ၊ တဲး ဘေ ဝီ တး ကွယ် ခဲင် မိူင် ဘေ။ မိူင် တီ၊ န့ ဒီ ဘဲန် ခါဂုန် ဘေ။ ဝါယ် နီ ခဲင် မိူင် တီ ဂွန် ဘေ အာဝ် ဟူ လုဝ် ယမ် ဒီ အေတ့် ပီ ဒီ ဟူမ်။’”

13 ဇဝ်ဖြာ ပီ ဝီ တဝ်း၊ “ဟဲ့ မှာန်၊ ဂြုဝ်း ထုင် အီ တဝ်း၊ ‘ကာဒါယ် နပ် ဒီ ဝီ ဟူမ် ဒူအီ၊ နပ် ဘော ဒီ ဝီ ဇူန် ဝီ ဖာတ် ဒိုဝ်း ဒူအီ အီ မုး လှုက်လှာန် အန်။’ 14 ကူပ် န့ ပါယ် တီ နာ အာတ့် နီ ဟာဝ်၊ ကာဒါယ် အာဝ် ဟူ ပွိုန် ဝီ ဟူမ် ဒူအီ။ အာဝ် ဟူ ပွိုန် ဝီ ဖာတ် ဝီ ဒိုဝ်း ဂွန် ဘေ ဒေါ မှဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 15 ဝါယ် နီ ကာဒါယ် တီ အာဝ် ဟူ နပ် ဒီ ထူမ် ဂြုဝ်း ပီ နဲန ဂေ ဒူအီ အာမျုဝ် ဟဝ်။ ဝါယ် နီ ကာဒါယ် တီ အာဝ် ဟူ နပ် ဒီ ဝီ ဇူန် ဝီ ဖာတ် ဒီ လှုက်လှာန် အာမျုဝ် ဒူအီ ဒေါ မှဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

16 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ န့ ပွါ တဝ်း၊ 17 “အိုယ် ဂွန် ဒူအီ၊ ဒေါ ကွယ် ဂေ ဒူအီ အီဆာရေလ ခဲင် မိူင် ဂေ၊ ဂေ ဟဲ့ ဘူင် တဲး မာန် မိူင် တီ ကာဒါတ့် ကူပ် ပဲ့ ဟဲ့ ဘူင် ဂေ ဒွန် မျုဝ် ခဲင် မိူင် တီ။ အုဝ် ဟဲ့ မာတ် ပီ ဘူင် ဂေ တီ ဟဲ့ မွှိုမ် ကာအိး ကာဆဝ်၊ ပီ အီဘိုန့် အီ မိုဝ်း ခြိုင် ကာပ့လု။ 18 အုဝ် ဟဲ့ ရူ ကာဆဝ် ဒီ ဂေ ကူပ် ဟဲ့ ငဝ်း ယမ် ဂေ အာဆာက် အီ ခဲင် မိူင် တီ ဘော ကူပ် ကြိုပ် ဂေ အာရိုပ် ရာင် ဂေ ဘူင် တဲး မိူင် ကာဒါတ့်။ 19 အုဝ် ဟဲ့ ဝီ ဒမ် မှာပ် ဒီ ဂေ၊ တဲး ဂေ ကွယ် ကာယဝ်း ဒူပ် ဒူအီ အာမျုဝ် ဟဝ်၊ တဲး ဂေ ကွယ် ဒွန် မာန် ဒွန် မိူင်။ 20 ဂေ ဘော ကွယ် ဒီ မှဝ် အာဝ် တဝ်း၊ ဂေ ဘော ဘူင် တဲး အုဝ် အီ ဟဲ့ ဆီငါ ဘွတ် ကာဆဝ် စှိုမ် ဆာရေ။ ခုဝ်၊ ဂေ ဒူအီ ဟဝ် ဘော ဝီ လာယ် ကာလာင် တဝ်း၊ ‘ဒူအီ ဂေ နီ၊ ဂေ မုး ဒူအီ ပီ အိုပ် ဇဝ်ဖြာ။ မာလဲ၊ ဇဝ်ဖြာ ဟဲ့ တဲး ဂေ လေး ခဲင် မိူင် ပီ အိုပ် အန် ဇဝ်။’ 21 ကူပ် န့ ပါယ် တီ န့ တဲး အုဝ် ဝီ လှယ့် ပွုန် အုဝ် အီ ဟဲ့ ဆီငါ ဘွတ်။ ဂေ ဒူအီ အီဆာရေလ ယီ ဟဲ့ ဘူင် တဲး အုဝ် စှိုမ် ဆာရေ ဒီ အာတ့် ဂေ ဒူအီ ဒွန် ဇိုဝ် ဒွန် ခြိုဝ်၊ ဒွန် နာ ဒွန် ပ့လုဝ့် ပဲ့ ဟဲ့ ဟာဝ် ဇမ် ဂေ။”

22 ပါယ် တီ တဲး မဲ ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ‘အိုယ် ဘေ ဒူအီ အီဆာရေလ၊ အုဝ် ဘူင် ပါယ် တီ ဒွန် မျုဝ်၊ အာဝ် မုး ကူပ် ကာဝေ အုဝ် ဒီ ဘေ။ အုဝ် ဘူင် ပါယ် တီ ကူပ် ဆီ တဲး အုဝ် အီ ဟဝ် နပ် အုဝ် မုး ဇဝ်ဖြာ အီ ဆီငါ ဘွတ်။ ဘေ ယီ ဟဲ့ ဘူင် တဲး အီ ဟဝ် တူ ရုဝ်ဆေ အုဝ်။ 23 ဂေ ဒူအီ အာမျုဝ် ဟဝ် တူ ရုဝ်ဆေ အုဝ်။ ခုဝ်၊ အုဝ် ဒီ တဲး ဂေ နပ် ခဲ့ ဘွတ် အုဝ် ဘော ခဲ့ တာင် ပွုန် အုဝ်။ ပန် တီ ဂေ ဒူအီ ဒွန် မျုဝ် ဒီ ဘော နပ် အုဝ် မုး ဒါ ကာညာ အီ အိုပ် တူတ့် ဒွန် မျုဝ်။ အုဝ် ဒီ ဘျ ဒီ ဂေ တဲး န့ လိုဝ်း ဆီချာ လွင် မုး အုဝ် ဇဝ်ဖြာ အီ ဘွတ် ကာဆဝ်။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

24 ဇဝ် ဖြာ ဝီ တဝ်း၊ “ခုဝ်၊ အုဝ် ဒီ ဒိုဝ်း လေး ဘေ ခဲင် ဒူအီ ဒွန် ဇိုဝ် ဒွန် ခြိုဝ် အီ ကွယ် ဒွန် မာန် ဒွန် မိူင်၊ အုဝ် ဒီ ဝီ တိုယ် ဝိဝ် ဘေ ခဲင် မိူင် ဒူင် ကွယ် ဘြိမ် ဘေ။ 25 အုဝ် ဒီ ဝီ ဒိုဝ်း အိုမ် အီ ဆီငါ၊ ဝီ ခြဝ်း နာ ဒဲင် ဘေ၊ ဘူင် တဲး ဘေ ဝီ ဆီငါ။ အုဝ် ဒီ တဲး ဘေ လေး တ အာမျုဝ် ဒူအီ အီ မွှိုမ် ကာအိး မွှိုမ် ကာဒါတ့်။ အုဝ် ဒီ တဲး ဘေ ဆီငါ ဘော ဝဲန် အာရိုပ် ရာင် ဘောကာဂ့လျီတ်။ 26 အုဝ် ဒီ တဲး ဘေ ဝီ မိုဝ်း နဝ်း ကာမာယ်၊ ဝီ အာပ် အာဂျာင် အီ ကာမာယ် ဒီ ဘေ။ အုဝ် ဒီ ဒိုဝ်း ဝဲန် နဝ်း ဘေ အီ ဒိူဝ် ကာဆဝ် အီ ပ့လူမ် နှဲန် မာဝ်။ အုဝ် ဒီ ဝီ ဒွါ နဝ်း အီ ပီ ယင် အီ န့စု န့စမ်၊ အီ တဲး ဘေ ထူမ် ဂြုဝ်း။ 27 အုဝ် ဒီ ဒိုဝ်း နဝ်း ဖွိုမ် အုဝ်၊ ဝီ ဟပ် ခဲင် ဒုဝ် ဘူင့် ဘေ၊ တဲး ဘေ ဘော ဝီ မိုဝ်း နဝ်း ဆီ ဘူင် ဒူပ် ပီ စ်ု အုဝ် ဘေ ဘူင်၊ ဘော ဘူင် ဒူပ် ဒါရာ ပီ ဒမ် အုန် အုဝ် ဒီ ဘေ။ 28 ပါယ် တီ ဘေ မိူဝ် ဒီ ပွိုန် ဒီ ကွယ် ခဲင် မိူင် ပီ ဒွါ အုဝ် ဒီ ဂေ ဂုန့် ဒင် ဘေ။ ဘေ မိူဝ် ဒီ ဘဲန် ဒူအီ ပီ အိုပ် အုဝ်၊ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဘေ။ 29 အုဝ် ဒီ ချွတ် တဲး ဘေ လေး ခဲင် အီ မွှိုမ် ကာအိး မွှိုမ် ကာဒါတ့် ဒွန် မျုဝ်။ အုဝ် ဒီ ဘော ကာလာင် တဲး ငှုဝ် ဘေ မိုဝ်း ကာယူင့် ဘွတ် ကာယူင့် မွှိုမ်။ အုဝ် မိူဝ် ဟူ တဲး ဘေ လုဝ် ခမ် ဒုက် ကူပ် အေတ့် ပီ ဒီ ဟူမ်။ 30 အုဝ် ဒီ ဘူင် တဲး ဟေ အီ မိုဝ်း ဘ့လေ ဘော ပီ ပိတ် ပီ ဆမ် ဘေ ဝီ လေး ကိူန်။ ကွဲ့ တဲး ဂေ ဒူအီ အာမျုဝ် ဟဝ် ဆီ ပွိုန် ဒီ နဲန ဘေ ကူပ် ခမ် ဘေ အေတ့် ပီ ဒီ ဟူမ်။ 31 ဘေ ဒီ ဘော ဝီ လှုဝ်း လွင် နာ ဟာယ် နာ မိူက် ပဲ့ ဟဲ့ ဒွိုမ် ဘူင် ဘေ ဘော ပဲ့ ဟဲ့ ဒွိုမ် ကာလိုပ် ဘေ။ ဒုဝ် ဘြိမ် ဘေ ဒီ ဘော ဝီ ကာအိး မှာပ် ဘေ ဘော အီ တူ မွှိုမ် ဘော အီ မွှိုမ် ကာအိး မွှိုမ် ကာဒါတ့် ပဲ့ ဟဲ့ ဘူင် ဘေ။ 32 အိုယ် ဘေ ဒူအီ အီဆာရေလ၊ အုဝ် တူ ဘူင် ပါယ် တီ ဒွန် မျုဝ် ကူပ် ပီ ဘူင် ဘေ ဟဲ့ လဝ့် နဝ်း အုဝ်။ တဲး ဘေ မွှိုမ် ဆာယ် ကာဆဝ် ကူပ် ပဲ့ ဟဲ့ ဘူင် ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

33 ဇဝ်ဖြာ ပီ ဝီ ကာလာင် ပေါ မ့ပွါ တဝ်း၊ “ဆီငဲ ဒီ ဂဝ်း ဝဲန် အုဝ် မှာပ် ဘေ အုဝ် ပီ ဝီ တဲး ဘေ ဘဲန် အီ ဆီငါ ဘွတ်။ အုဝ် ဆီ တဲး ဘေ ပွိုန် ဒီ ဝီ တး ကွယ် ခဲင် မိူင် ဘေ၊ တဲး ဘေ ဝီ မ့ပြာယ် ဒူင် ဟဲ့ ကာပျာတ့် လိုဝ် ဂေ တွိုန်။ 34 ဒူင် ယေန် ဒူင် ငွင့် ဒူအီ၊ အုဝ် ဝီ ဘူင် တဲး ဘေ ဝီ ပွိုန် ဒီ ရန့် မာန် ဂေ ဒူင် နာ၊ တဲး ဒူအီ အီ ကာလုဝ်း ဝိဝ် ကာလုဝ်း ဝေန့် ပွိုန် ဒီ ယိုဝ်။ 35 ပန် တီ ဂေ ဒူအီ ကိူန် ဒီ ဘော ဝီ တဝ်း၊ မိူင် အီ မုး ပြဲ ကာဟဝ်း ဟဲ့ ဝီ ပီ ကာပိုမ် အေဒေန်။ မိူင် ဒီ တူင့် ဒီ တာင် အီ ဟဲ့ ကာပျာတ့် လိုဝ်၊ အီ ဟဲ့ ယေန် ဟဲ့ ရာမ် တူတ့် ဘော နပ် ဒီ ဝီ မိုဝ်း ဒူအီ ကိူန်။ ဂေ ဘော ဝီ ဘဲန် မိူင် အီ ဟဲ့ မန် ဆီချာ။ 36 ပန် တီ ဂေ ဒူအီ အီ ဆီ ဂိတ် ဆီ ကွယ်၊ ဂေ အီ ကွယ် ရူပ် ဘေ၊ ဂေ ဒီ ဘော နပ်၊ န့ မုး အုဝ် ဇဝ်ဖြာ အီ ဟဲ့ ဝီ ဂုဝ် ဝီ မ့ပြာယ် မိူင် တီ။ အုဝ် မိူဝ် ဟဲ့ ဝီ ဆမ်၊ ဝီ မ့ပြာယ် ဘော ကာဒါယ် ကာဆိူဝ် ဟဲ့ လိုဝ်။ အုဝ် ဇဝ်ဖြာ ဟဲ့ ဟွတ့် ကာလာင် ပါယ် တီ။ အုဝ် ဒီ ဘော ဘူင် ဒူပ်။”

37 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ဘူင် ပေါ အူ ဇေန့် တဲး ဂေ ဒူအီ အီဆာရေလ ဝီ မှာန့် ဒီ အုဝ်၊ တဲး အုဝ် ဝီ စွယ် ဂေ။ အုဝ် ဒီ ဘူင် တဲး ဂေ ဝီ ဘြဲ ကိူန်၊ တဲး န့ ကော ပီ ဖိုင် မာဘူ။ 38 မိူင် အီ ဟဲ့ လိုဝ်၊ ဂေ ဒီ ဘော ဝီ မိုဝ်း ဒူအီ ကော နုဝ့် နာ ခဲင်၊ တဲး န့ ပီ ခဲင် မိူင် ယေရူဆာလဲမ် အီ ဟဲ့ မိုဝ်း ဖိုင် မာဘူ ကိူန် ကာဆဝ် အာဒါ ပီ ဒိုဝ်း လှူ ဂေ ဒေါ ဘူင် ဂေ ဘ့လွယ်။ ပါယ် တီ ဂေ ဒီ ဘော နပ်၊ အုဝ် မုး ဇဝ်ဖြာ။”