1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ အီ ဒမ် မှာပ် ဒီ ဂေ ဒူအီ မိူင် အေဒူမ်။ 3 တဲး မဲ ကာလာင် ဒီ ဂေ တဝ်း၊ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အိုယ် ဘေ အီ ကွယ် ဒီ နွန် ဆေအီ၊ အုဝ် ဟဲ့ ဘဲန် ရန်ဆူ ဘေ။ အုဝ် ဒီ ဘူင် တဲး ဒူင် ကွယ် ဘေ ယေန်၊ တဲး န့ ရာမ် လိုဝ် တူတ့်။ 4 အုဝ် ဒီ ဘူင် တဲး ဒူင် ကွယ် ဘေ ဒွန် မိူင် ကာပျာတ့် လိုဝ် တူတ့်။ မိူင် ဘေ ဒီ ဘော ဘဲန် ဒူင် ယေန် ဒူင် ငွင့် ဒူအီ။ ဆေ ဟီ ပါယ် တီ ဘေ ဒီ ဘော နပ်၊ အုဝ် မုး ဇဝ်ဖြာ။

5 ခုဝ်၊ ဘေ ဟဲ့ ဒွိုမ် ဘဲန် ရန်ဆူ ဒူအီ အာမျုဝ် အီဆာရေလ။ ဘေ ဟဲ့ ဘူင် တဲး ဒူအီ ဂေ ယမ် ဒီ မာပွါ့ လာင် ဒေါ ဟဲ့ ခမ် ဂေ ဒုက် တာင် ဘော ဒေါ ဟဲ့ ခမ် ဂေ အီ ဒုက် အီ ညှာပ် လွှိုမ် ခါ အာတ့်။ 6 ကူပ် ဟဲ့ ဘူင် ဘေ ပါယ် တီ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဒီ တဲး ဘေ ယမ် အာခ်ု မှာန်။ ကူပ် ဟဲ့ ငဝ်း ယမ် ဘေ အာဆာက် အီ ဟဝ် ဘော ဘေ လုဝ် ခမ် အီ ဟဝ် ဝီ ငဝ်း ယမ် ဘေ။ န့ ပီ ပီ လုဝ် ခမ် ဘေ ကူပ် မှာပ် ငဝ်း ယမ် ဘေ အာဆာက် အီ ဟဝ် တီ၊ န့ ဒီ ဝီ ခုင်ခြး ဒူပ် ဒီ ပန် ဘေ။ 7 အုဝ် ဒီ ဘူင် နွန် ဆေအီ တဲး န့ ဘဲန် ဒူင် လိုဝ် ဒူင် ရာမ်၊ တဲး ဒူအီ ကော ယေန် ကော ငွင့်။ အုဝ် တူ တဲး ဒူအီ ကာလုဝ်း ဝိဝ် ကာလုဝ်း ဝေန့် ဒူင် တီ။ 8 အုဝ် ဒီ တဲး ဒုဝ် ယမ် ဒူအီ ဂေ တီ ကော ကာလတ့် ဒဲင် နွန် တီ ဘော တဲး ဂေ ကွယ် ကာလတ့် ဒူပ် ဒီလယ့် နွန် ဂေ တီ။ 9 အုဝ် ဒီ ဘူင် တဲး မိူင် ဘေ ဘဲန် ဒူင် ယေန် ဒူင် ငွင့် ဒူအီ၊ ကွဲ့ တဲး န့ ဆီ မိုဝ်း ဒူအီ ခေါ အူ ဝီ ခဲင် မိူင် ဘေ တီ။ ပါယ် တီ ဘေ ဒီ ဘော နပ်၊ အုဝ် မုး ဇဝ်ဖြာ။’

10 ဘေ မိူဝ် ဟဲ့ တဝ်း၊ ‘ဒူအီ အီဆာရေလ ဘော ဒူအီ အာယူဒါ အာ မျုဝ် တီ ဒီ ဘဲန် မိူင် ပီ အိုပ် အေ။ ဇဝ်ဖြာ ပီ ဘော ဟဲ့ မုး ဇဝ်ဖြာ ပီ ကြိုပ် ဂေ မိူဝ်၊ အေ ပွိုန် ဒီ ဒိုဝ်း တူတ့်။’” 11 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် တဝ်း အာခ်ု ဒီ ဘေ၊ အုဝ် ဒီ ဝီ ဘူင် ဝျီ့ ဒီ ဘေ ဒူပ် ပီ ပါယ် ဘေ ဒီ ရူ ဒီ စာဝ် ဘော ပီ ပါယ် ဘေ ဒီ ဇွင့် ဂေ ဒူအီ ပီ အိုပ် အုဝ်။ န့ တဲး ဂေ ကော ဝီ နပ်၊ အုဝ် မုး အီ ဒမ် မှာပ် ဒီ ဘေ ကူပ် ပီ ဘူင် ဘေ ဒီ ဂေ ဒူအီ ပီ အိုပ် အုဝ်။ 12 ပန် တီ ဘေ ဒီ ဘော နပ်၊ အုဝ် မုး ဇဝ်ဖြာ အီ ဟဲ့ ထူမ် ဂြုဝ်း ပီ ကာလာင် ဘေ ဒွန် မျုဝ်။” ဘေ မိူဝ် ဟဲ့ နဲန တဝ်း၊ “နွန် အီဆာရေလ ဒီ ဘော ရာမ် ဘဲန် ဒူင် ယေန် ဒူင် ငွင့် ဒူအီ။ ခုဝ်၊ ဇဝ်ဖြာ ဟဲ့ တဲး ယေ ပွိုန် ဒီ ဘူင် ပါယ် တီ။” 13 အုဝ် မိူဝ် ဟဲ့ ယိုဝ် ဂြုဝ်း အီ တူ မွှိုမ် ပီ ကာလာင် ဘေ ဘော ဂြုဝ်း ပီ ဝီ အိူပ် ဘေ ဒုဝ် ဘြိမ် ဘေ။ ဘေ မိူဝ် ဟဲ့ ကာလာင် ဂြုဝ်း အီ လာယ် ကာဘး ဒီ အုဝ်။ 14 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ “အုဝ် ဒီ ဘူင် တဲး မိူင် ဘေ ဝီ ယေန် ဝီ ငွင့် ကာဆဝ်။ တဲး ဒူအီ ဒဲင် ကာဒါယ် နီ ခူယ် ကူပ် ဟဲ့ လိုဝ် စှိုမ် ဘေ။ 15 ကူပ် ဟဲ့ ခူယ် ဘေ ဒေါ ဟဲ့ လိုဝ် စှိုမ် ဒူအီ အီဆာရေလ ကာဒါယ် အီ မုး ခါဂုန် ဂေ၊ အုဝ် ဒီ ဘူင် ပါယ် တီ ဒီ ဘေ။ အိုယ် ဘေ အီ ကွယ် ဒီ နွန် ဆေအီ ဘော ဘေ အီ ကွယ် ခဲင် မိူင် အေဒူမ် ဘော မိူင်၊ ဒူင် ကွယ် ဘေ ဒီ ကာပျာတ့် လိုဝ် တူတ့်။ ပါယ် တီ ဘေ ဒီ ဘော နပ်၊ အုဝ် မုး ဇဝ်ဖြာ။”