1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ ဒီ ဂေ ဒူအီ အီ ပီ ဒါ အီ ဟျီင် မာဘူ ခဲင် မိူင် အီဆာရေလ။ တဲး မဲ တဝ်း၊ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အိုယ် ဘေ အီ ယွတ် မဲန် ဒူအီ အီဆာရေလ၊ အီ ပီ ဒါ အီ ဟျီင် မာဘူ။ ဘေ ဒီ ဇမ် ဒုက် တာင်။ ခုဝ်၊ ဘေ ဟျီင် မီ ဒုဝ် ဘြိမ် ဘေ၊ ဘေ တူ ဝီ ယွတ် လိုမ်လာ ဖိုင် မာဘူ ဘေ။ 3 ဘေ ဟဲ့ နပ် ဒီ ဒိုဝ်း ဟူမ် အိုမ် ပူ ပြာင် ဘော ဒိုဝ်း ဟိုက် အန် ဘူင် ဘဲန် ခြိုင် တာ ဘေ။ ဘေ ဘော ငဝ်း ဒုဝ် အီ ဟဲ့ ဂ့လန့် ဆီချာ တဲး န့ ဘဲန် ဟာပ် ဘေ။ မာလဲ၊ ဘေ ယီ တူ ယွတ် လိုမ်လာ ဆီချာ ဖိုင် မာဘူ ဂေ တီ။ 4 ဘေ မိူဝ် တူ ယွတ် လိုမ်လာ ဒုဝ် အီ တူ မိုဝ်း ပ့လူမ် ဂေ ဟဲန့်။ ဘေ တူ ဆီနမ် ဒုဝ် အီ ဟဲ့ မိုဝ်း ဆဝ် ရောဂါ ဘော တူ ဒိုဝ်း ဒူန့်၊ ကာဘန် ဒုဝ် အီ ဟဲ့ မိုဝ်း ဒိမ် မိုဝ်း ဆဝ်။ ဘေ မိူဝ် တူ ဝီ ဟာဝ် ဝဲတ် တး ဒုဝ် အီ ဟဲ့ ကာလိုပ် န့တေန့်၊ အီ ဟဲ့ ဝး န့တေန့်။ ဘေ မိူဝ် တူ ဝီ ဟာဝ် ဟြေတ့် ဒုဝ် အီ ဟဲ့ ဘျုဝ်း ဟဲ့ ဟြာယ်။ ဘေ ယီ ဝီ ဘူင် နာ ဟာယ် နာ စီစိဝ် ဒီ ဂေ။ 5 ကူပ် အာဝ် မိုဝ်း ဒါ အီ ယွတ် လိုမ်လာ အီ ဟျီင် ဖိုင် မာဘူ ဂေ တီ၊ ဂေ ဟဲ့ တဝ် ကာယဝ်း ကာရေး ဟာဝ် ဒွန် ဘ့လာက်၊ ဝီ တဲး မာဒုဝ် ပြဲ ပွိုန် ဒီ ကဝ့် ယမ် ဂေ။ 6 ပါယ် တီ မာဘူ အုဝ် ဂေ ဘော ဟာဝ် ဝိဝ် ဟာဝ် ဝေန့် ဒူပ် နွန် ဒွန် ပ့လုဝ့်။ ဂေ ဘော ကာယဝ်း ကာရေး ဟာဝ် ဒွန် နာ ဒွန် ပ့လုဝ့် ဒဲင် ကာဒါယ်။ န့ ယီ တူ မိုဝ်း အာဆေ အီ ဟြေတ့် အီ လိုမ်လာ ဂေ။

7 ကူပ် န့ ပါယ် တီ ဘေ ဒါ အီ ဟျီင် မာဘူ၊ တဲး ဘေ ထူမ် ဂြုဝ်း ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်။ 8 အုဝ် တဝ်း အာခ်ု မှာန် ဒီ ဘေ။ ဒူအီ ပီ အိုပ် အုဝ် အီ ပီ မာဘူ၊ ဂေ တူ မိုဝ်း အီ ဟျီင် ဂေ။ ကူပ် န့ ပါယ် တီ ဂေ ဟဲ့ ဘဲန် ပီ ဒီ ဟူမ် မာဒုဝ် ပြဲ ဒွန် မျုဝ် ဘော ကူပ် တူ ဟြေတ့် ဂေ ဒါ အီ ဟျီင် မာဘူ၊ ယီ လိုမ်လာ ဒုဝ် ဘြိမ် ဂေ၊ တူ လိုမ်လာ မာဘူ။ 9 ဘေ ဒါ အီ ဟျီင် မာဘူ၊ ဘေ လုဝ် ထူမ် ဂြုဝ်း ဇဝ်ဖြာ။ 10 အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အုဝ် ဒီ ဘဲန် ရန်ဆူ ဘေ။ အုဝ် ဒီ တဲး ဘေ ဘျ ဒီ အုဝ် ဒွန် မျုဝ် ပဲ့ ဟဲ့ အာပ် အုန် အုဝ် ဒီ ဘေ။ အုဝ် မိူဝ် ဒီ ဒိုဝ်း တဝ် မာဘူ ဂေ တီ၊ ကွဲ့ တဲး ဘေ ဆီ ပွိုန် ဒီ ဟျီင် မာဘူ ဒေါ မှဝ်။ အုဝ် မိူဝ် တူ တဲး ဘေ ပွိုန် ဒီ ဝီ ဟျီင် မီ ဒုဝ် ဘြိမ် ဘေ ဒေါ မှဝ်။ အုဝ် ဒီ ဒိုဝ်း လေး မာဘူ အုဝ် ဒီ ဘေ၊ ကွဲ့ တဲး ဘေ ဆီ ပွိုန် ဒီ ဟာပ် ယင် အန်။

11 ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် တဝ်း၊ အုဝ် ဒီ ဝီ ဟာဝ် ဟြေတ့် မာဘူ အုဝ် ဘော ဟျီင် ဘော ယွတ် မဲန် ဂေ။ 12 အုဝ် ဒီ ယွတ် မဲန် မာဘူ အုဝ်၊ တဲး န့ ပီ ဒါ အီ ဟျီင် မာဘူ၊ ဟြေတ့် မာဘူ အန် ဒူင် ဟဲ့ လာယ် ကာယဝ်း ကာရေး ဂေ တွိုန်။ အုဝ် ဒီ ဝီ ဒိုဝ်း တး ဂေ၊ တဲး ဂေ ပွိုန် ဒီ ကွယ် ကာဇု ကာဒိုမ်။ အုဝ် မိူဝ် ဒီ ဝီ ဒိုဝ်း တး မာဘူ အုဝ် ဒူင် ဟဲ့ လာယ် ကာယဝ်း ကာရေး ဂေ ဘော ဒူင် ဟဲ့ အပ် ဝွင့် ကူပ် မိုဝ်း န့အု။ 13 အုဝ် ဒီ ဟာဝ် ဒဲ့ လေး ဂေ ခဲင် မိူင် တေတ့် မိူင် တ၊ ဝီ တဲး ဂေ တး ကွယ် ကာဇု ကာဒိုမ်၊ တဲး ဂေ တး ကွယ် ခဲင် မိူင် ဒူင် ကွယ် ဘြိမ် ဂေ။ အုဝ် ဒီ ဝီ တိုယ် ဂေ ဟုဝ့် ဒီ နွန် ဘော ဒူပ် ဒီလယ့်၊ ဒူပ် ဘ့လဲင် ခဲင် မိူင် အီဆာရေလ ဒူင် မိုဝ်း ပေတ့် အီ ဆီ ငျီန် န့စမ်။ 14 အုဝ် ဒီ ဝီ ဟျီင် ဂေ ဒူင် ဆီချာ၊ ဒူင် ဒွိုမ် ကွယ် ဘြိမ် ဂေ။ န့ ဒီ ဘော ကွယ် ဒဲင် နွန် စာ ခဲင် မိူင် အီဆာရေလ။ ဂေ ဒီ ဘော ပွိုန် ဒီ ကွယ် အိတ် ဒူင် ဆီချာ၊ ဒူင် မွှိုမ် ဘော ပွိုန် ဒီ ဟူမ် ပေတ့် ခဲင် ဂ့လင် ဒူင် ဆီ ငျီန် ဆီ လိုင် ဒဲင် နွန် ခဲင် မိူင် အီဆာရေလ။ 15 အုဝ် အီ ဒီ ဟျီင် မာဘူ အုဝ်။ အုဝ် ဘော တဲး ဂေ ပွိုန် ဒီ အိတ် ဆီချာ။ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 16 အုဝ် ဒီ ဝီ ဟာဝ် ဟြေတ့် တး မာဘူ အုဝ် အီ ဟဲ့ ကာလိုပ် န့တေန့် ဘော ဝး န့တေန့်။ အုဝ် ဒီ ဘော ဝီ ဆီနမ် ဒုဝ် အီ တူ ပ့လူမ် ခ။ ဒုဝ် အီ ဟဲ့ မိုဝ်း ဒူင် ဒိမ် ဒူင် ဆဝ်၊ အုဝ် ဒီ ကာဘန် ဒိမ် အန် တီ။ မာဘူ ဒုဝ် အီ ဟဲ့ ဂ့လန့် ဆီချာ အီ မိုဝ်း ပ့လူမ် မိုဝ်း ဟဲန့်၊ အုဝ် ဒီ ဘော ငဝ်း ယမ်။ ခုဝ်၊ အုဝ် ဒီ ယွတ် မဲန် မဲ၊ တဲး န့ ဒူပ် နာ မုး နာ မှာန်။

17 ဇဝ်ဖြာ ပီ ဝီ တဝ်း၊ အိုယ် ဘေ ဒူအီ ပီ အိုပ် အုဝ် အီ ပီ ဖိုင် မာဘူ အုဝ်၊ အုဝ် ဒီ ကာယဝ်း လေး ဒုဝ် အီ မွှိုမ် ဘော ဒုဝ် အီ တူ မွှိုမ်။ ဒုဝ် အီ မုး မာဘူ အုဝ် ဒီ ကာယဝ်း လေး ဒီ ဒုဝ် အီ မုး မာပဲ။ 18 ဘေ ဟဲ့ ပွိုန် ဒီ ဟူမ် ပေတ့် အီ ဘွတ် အီ ဆီငဲး။ န့ ယီ တူ ဘြေ့ ဒီ နဝ်း ဘေ။ ဘေ ဘော ဝီ ညဲတ့် ပေတ့် ပီ တူ ဟူမ် ဘေ။ ဘေ မိူဝ် ဟဲ့ ဒျီင် အိုမ် အီ ဟဲ့ ဆီငါ။ ပီ တူ ဒျီင် ဘေ၊ ဘေ ဘော ဝီ ဝ်ု တဲး န့ ကာတုန်။ 19 ဘေ ဆီ တဲး မာဘူ အုဝ် ဝီ ဟူမ် ပေတ့် ပဲ့ ဟဲ့ ညဲတ့် ဘေ တီ၊ ဝီ ဒျီင် ဘော အိုမ် ပဲ့ ဟဲ့ ဝ်ု ဘေ တဲး န့ ကာတုန်။ အာဝ် ကာအာပ် ဘေ ဘူင် ပါယ် တီ။

20 ခုဝ် အန် တီ၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ အုဝ် ဒီ ကာယဝ်း ဂေ မာဘူ အီ ဟဲ့ မိုဝ်း ပ့လူမ် မိုဝ်း ဟဲန့် ဘော ဒုဝ် အီ ဟဲ့ ဒီလှး၊ တူ မိုဝ်း ပ့လူမ် ဂေ ဟဲန့်။ 21 ဘေ ဘော နပ် ဒီ တာ ဘြေတ့် ဘေ၊ တာ ယ ဘေ၊ ဂ့လိင် ဂေ မာဘူ ဒုဝ် အီ ဟဲ့ ဒီလှး န့စမ်။ ဘေ ဘော တာ နိုင် ဘတ့် ဘေ၊ တုး ဂေ ဒုဝ် အီ တူ မိုဝ်း ပ့လူမ် ဂေ ဟဲန့်၊ တဲး ဂေ ကော ကာဒုး ဒီ လေး တဝ် တ ဖိုင် ဘေ။ 22 မာလဲ၊ အုဝ် ယီ ဒီ ဝီ ဟြေတ့် တး မာဘူ အုဝ် ဂေ တီ။ ဝါယ် နီ၊ အာဝ် မိုဝ်း အာဆေ အီ ပွိုန် ပျာတ့်၊ ပွိုန် ဆီဂဲ့ ဂေ ဒေါ မှဝ်။ အုဝ် ဒီ ဆုင်ဖျာတ် အာမူ ဒီ မာဘူ အုဝ်။ အုဝ် ဒီ ကာယဝ်း လေး ဒုဝ် အီ ဘွတ် အီ မွှိုမ် ဒီ ဒုဝ် အီ ဟာယ် အီ တူ မွှိုမ်။ 23 အုဝ် မိူဝ် ဒီ ဒါင် တဲး န့ မိုဝ်း ဒါ အီ ဟျီင် မာဘူ တီ အူ ကာဒင် ကာတဲ ဂေ။ န့ ဘော မုး ဒဲစေန့် အုဝ် အီ ပီ အာဒါဝိတ် တွိုန်၊ အန် ဒီ ဘဲန် ဒါ အီ ဟျီင် မာဘူ အီ ယွတ် မဲန် ဂေ။ အန် ဒီ ဘော ဘဲန် အီ ယွတ် လိုမ်လာ ဂေ။ 24 အုဝ် အီ မုး ဇဝ်ဖြာ ဒီ ဘော ဘဲန် ဇဝ်ဖြာ ပီ ကြိုပ် ဂေ။ ဒဲစေန့် အုဝ် အီ ပီ ခုန်ဒီခမ် အာဒါဝိတ်၊ အန် ဒီ ဘော ဘဲန် အီ အိုပ် ဂေ။” အုဝ် အီ မုး ဇဝ်ဖြာ ဟဲ့ ကာလာင် အုန် ပါယ် တီ။

25 ဇဝ်ဖြာ ပီ ဝီ တဝ်း၊ “အုဝ် ဒီ တဲး ကာဒိက် ဆတ်ဇာ အီ ဒီ တဲး ဂေ ဘဲန် နဝ်း ဒါခိုယ်၊ နဝ်း ဂတ် ဂျီတ်။ အုဝ် မိူဝ် ဒီ ဟုဝ် တဝ်၊ ညွန် တဝ် ဂေ မာဒုဝ် ပြဲ အီ ကွယ် ခဲင် မိူင် ပီ အိုပ် အုဝ်၊ တဲး ဂေ မာဘူ အုဝ် ဘော ပွိုန် ဒီ ကွယ် ဒါခိုယ် ခဲင် ဂ့လင်။ ဂေ ဘော ပွိုန် ဒီ အိတ် ဆီချာ ခဲင် ယွုန် ဘော ခဲင် ပြဲ။ 26 အုဝ် ဒီ ဘော မွင့်ကာရာ ဒွါ နာ မွှိုမ် ဒီ ဂေ၊ ဘော ခ့ဝါင် တဲး ဂေ ပွိုန် ဒီ ကွယ် ရူပ် နွန် အုဝ် အီ ဆီငါ ဘွတ်။ အုဝ် ဒီ မွင့်ကာရာ တဲး န့ မိုဝ်း အိုမ် ဒီငါန် ဘော တဲး န့ မိုဝ်း အိုမ် ဂ့လာယ် ဒေါ လုဝ် ဂေ အိုမ် ဂ့လာယ်။ 27 ဟေ ဘ့လေ ပီ ဆမ် ဂေ မိူဝ် န့ ဒီ ဘော မိုဝ်း ဘ့လေ အန်။ ဒူင် နာ ဂေ မာန် ငှုဝ် မိူဝ် ဒီ ဘော မိုဝ်း ကာယူင့် အန်။ ဂေ မိူဝ် ဒီ ဘော ပွိုန် ဒီ ကွယ် နှိမ်၊ ကွယ် ဒါခိုယ် ခဲင် မိူင် ဂေ တီ ဒွန် အီ ရာင် အာဆေ ရာင် အန်။ အုဝ် ဒီ တဲး ဂေ လွတ် ဘဲန် မှာယ် အီ၊ တဲး န့ ပီ အုဝ် ဟဲ့ ဒဲပ် ကာဒတ် ဝန် ဟိန် အီ ပက် ဒီ ဂေ ဒူအီ ပီ အိုပ် အုဝ်။ ပန် တီ ဂေ ဒီ ဘော နပ်၊ အုဝ် မုး ဇဝ်ဖြာ။ 28 ဝါယ် အန် တီ ဂေ ဒူအီ အာမျုဝ် ဟဝ် မိူဝ်၊ အာဝ် ဟူ ပွိုန် ဒီ ဖာတ် ကြုဝ်ကြာမ် ဂေ။ မာဒုဝ် ပြဲ မိူဝ်၊ အာဝ် ဟူ ပွိုန် ဒီ ကဝ့် ယမ် ဂေ။ ဂေ ဒီ ဘော ပွိုန် ဒီ ကွယ် ထင်ဟာင်၊ အာဝ် မိုဝ်း အာဆေ အီ ဒီ ပွိုန် ဘူင် တဲး ဂေ ကာစွာ ဘော ယုဝ် ဒေါ မှဝ်။ 29 အုဝ် ဒီ ဘူင် တဲး ကာဒါယ် ဒူင် ကွယ် ဂေ ဘဲန် ကာဒါယ် ဘွတ် ကာဒါယ် မွှိုမ်။ ဝါယ် အန် တီ ဂေ မိူဝ် တူ လုဝ် အေတ့် မာဆေ ဒေါ ကွယ် ဂေ ခဲင် မိူင် တီ။ ဒူအီ အာမျုဝ် ဟဝ် မိူဝ်၊ အာဝ် ဟူ ပွိုန် ဒီ နဲန ဂေ။ 30 ဒူအီ ဒွန် အီ ဒီ ဘော နပ်၊ န့ မုး အုဝ် အီ ဂွင့် ရဲ ဒူအီ အာမျုဝ် အီဆာရေလ။ ဂေ ဘော မုး ဒူအီ ပီ အိုပ် အုဝ်။ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။’ 31 ဘေ အီ ပီ မာဘူ အုဝ် ဘော ဖိုင် မာဘူ ပီ ယွတ် မဲန် အုဝ်၊ ဘေ မုး ဒူအီ ပီ အိုပ် အုဝ်။ အုဝ် ဘော မုး ဇဝ်ဖြာ ပီ ကြိုပ် ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။