1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “တဲး မဲ ကာလာင် ဒီ ဂေ ဒူအီ အီ မုး အာမျုဝ် မဲ ပါယ် နီ၊ ‘ဆေ အုဝ် ဟီ ဘူင် တဲး န့ မိုဝ်း ရန်ဆူ အီ တး လာယ် ကာငဝ်း ခဲင် မိူင် အူ မိူင်၊ ဂေ ဒူအီ ခဲင် မိူင် တီ ဒီ ရဝ်း ဒူအီ အူ ဝီ၊ တဲး အန် ဘဲန် ဒူအီ အီ ဘ်ု မိူင်။ 3 ဆေ အန် ဟီ ယိုဝ် ရန်ဆူ ဟဲ့ တး၊ အန် ဒီ ဘုတ် ဝဝ်၊ တဲး န့ ဒမ် ဆာဒိက် ဒီ ဒူအီ ဘောကာဂ့လျီတ်။ 4 ဆေ ဒူအီ ဟဲ့ ဟွတ့် ယိုဝ် ဟမ် ဝဝ် တီ ယီ တူ ဆာဒိက်၊ ဆေ ရန်ဆူ ဒီ တး ငဝ်း ယမ် အန်၊ န့ မုး မှာပ် ဒုဝ် ဘြိမ် အန် တီ။ 5 ကူပ် ဟဲ့ ယိုဝ် အန် ဟမ် ဝဝ် တီ ယီ တူ ဆာဒိက်၊ အန် မိူဝ် လုဝ် ခမ် မှာပ် အန် တီ။ ဆေ အန် ယီ ဆာဒိက်၊ အန် ဒီ လွတ် ယမ်။ 6 မာလဲ၊ ဆေ န့ မုး ဒူအီ အီ ဘ်ု မိူင်၊ အန် ပီ ဘော ဟဲ့ ယိုဝ် ရန်ဆူ ဟဲ့ တး၊ အန် ယီ တူ ဘုတ် ဝဝ်၊ တဲး ရန်ဆူ ကော ပွိုန် ဒီ တး ငဝ်း ယမ် ဒူအီ ကိူန်၊ ဂေ ပီ ဘော ဟဲ့ ယမ် ကူပ် မှာပ် ဂေ မိူဝ်၊ အုဝ် ယီ ဒီ ဝီ ဒမ် မှာပ် ဒီ ဒူအီ အီ ဘ်ု မိူင် တီ၊ တဲး န့ ပီ အန် ဟဲ့ ငဝ်း ယမ် ဒူအီ ဂေ တီ။

7 အိုယ် ဂွန် ဒူအီ၊ အုဝ် ဟဲ့ ဟွတ့် တဲး မဲ ဘဲန် ဒူအီ အီ ဘ်ု ဂေ ဒူအီ အီဆာရေလ။ မဲ လုဝ် ဒိုဝ်း ဂြုဝ်း ပဲ့ ဟဲ့ ဒမ် အုဝ် ဆာဒိက်၊ ဝီ ကာလာင် ဒီ ဂေ။ 8 ဆေ အုဝ် တဝ်း ဒီ ဒူအီ အီ ဟာယ် ကာဆဝ်၊ “အိုယ် မဲ ဒူအီ အီ ဟာယ် အီ မိူက်၊ မဲ ဒီ လုဝ် ယမ် အာခ်ု မှာန်။” ဆေ မဲ ယီ တူ ဒမ် ဆာဒိက် ဒီ အန်၊ တဲး အန် လှုဝ်း မှာပ် အန်၊ ဒူအီ ဟာယ် ဒူအီ မိူက် တီ ဒီ ယမ် ကူပ် မှာပ် ပီ ဘူင် အန်။ အန် ပီ ဘော ဟဲ့ ယမ် ပါယ် တီ မိူဝ်၊ အုဝ် ဒီ ဝီ ဒမ် မှာပ် ဒီ မဲ ကူပ် ဟဲ့ ယမ် အန် တီ။ 9 ဆေ မဲ ယီ ဟဲ့ ဟွတ့် ဒမ် ဆာဒိက် ဒီ ဒူအီ ဟာယ် ဒူအီ မိူက် တီ၊ အန် ဆီ နဲ့ ဘူင် ဟာဝ် မှာပ်၊ အန် ဒီ ဘော ယမ် ကူပ် မှာပ် ပီ ဘူင် အန်။ အီ မုး မဲ၊ မဲ ဟဲ့ ဟွတ့် ချွတ် အာဆာက် မဲ။’”

10 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ န့ ပွါ တဝ်း၊ “တဲး မဲ ကာလာင် ဒီ ဂေ ဒူအီ အီဆာရေလ တဝ်း၊ ‘မှာပ် ပဲ့ ဟဲ့ ဒွိုမ် ဘူင် အေ၊ ဟဲ့ ဝီ ဘဲန် ဝူတ်၊ ဘဲန် မှာပ် အီ စန် ကာဆဝ် ဒီ အေ။ အေ မိူဝ် ဟဲ့ ကြဲ ဒီ ယူမ် လူင်။ ဆေ ဟီ ပါယ် တီ၊ အေ တူ ပွိုန် ဒီ ကွယ် ပေါ မ့ပွါ။’ 11 တဲး မဲ ကာလာင် ဒီ ဂေ ပါယ် နီ။ ‘ဇဝ်ဖြာ အီ အိုပ် တူတ့် ဒွန် မျုဝ်၊ အန် တဝ်း အာခ်ု ဒီ ဘေ၊ အုဝ် တူ ဆီ တဲး ဒူအီ ဟာယ် ဒူအီ မိူက် ယမ်။ အုဝ် ဆီ တဲး ဂေ ဝဲန် အီ တူ မွှိုမ် အီ ဟာယ် အီ မိူက်၊ တဲး ဂေ ပွိုန် ဒီ ကွယ် ဆီချာ။ အိုယ် ဘေ ဒူအီ အီဆာရေလ၊ ကူပ် န့ ပါယ် တီ တဲး ဘေ ဘျွင် နဝ်း ဘေ ဘော ဝဲန် နာ ဟာယ် နာ မိူက် ပီ ဘူင် ဘေ၊ ကွဲ့ တဲး ဘေ လုဝ် ယမ် ဘော ဝး လွင် အန် တီ။

12 အိုယ် ဂွန် ဒူအီ၊ တဲး မဲ ကာလာင် ဒီ ဂေ ဒူအီ အီဆာရေလ တဝ်း၊ ဆေ ဒူအီ အီ မိုဝ်း နဝ်း ဆိူဝ် နဝ်း မှာန် ဟဲ့ ဘူင် နာ တူ မွှိုမ်၊ ပီ ဘူင် အန် နာ ဆိူဝ် နာ မှာန်၊ န့ တူ ပဲ ဒီ ချွတ် အန်။ ဆေ ဒူအီ ဟာယ် ဒူအီ မိူက် ယီ ဝဲန် နာ ဟာယ် နာ မိူက် ပီ ဘူင် အန်၊ အန် တူ လုဝ် ခမ် မှာပ် ပီ ဘူင် အန်။ ပါယ် တီ ဆေ ဒူအီ နဝ်း ဆိူဝ် နဝ်း မှာန် ကာလိုပ် ဒီ ဘူင် အီ တူ မွှိုမ်၊ အန် တူ ပွိုန် ချွတ် အာဆာက် အန်။ 13 ဆေ အုဝ် တဝ်း ဒီ ဒူအီ အီ မိုဝ်း နဝ်း ဆိူဝ် နဝ်း မှာန်၊ အန် တူ လုဝ် ယမ်၊ ဆေ အန် ဝီ ဘိုင် နဝ်း ဆိူဝ် နဝ်း မှာန် အန်၊ ဝီ ဘူင် နာ တူ မွှိုမ်၊ အုဝ် မိူဝ် တူ လှုဝ်း နာ ဆိူဝ် နာ မှာန် ပီ ဒွိုမ် ဘူင် အန်။ အန် ဒီ ဘော ယမ် ကူပ် အီ တူ မွှိုမ် ပီ ဘူင် အန်။ 14 ဆေ အုဝ် ဝီ ကာလာင် ဒီ ဒူအီ ဟာယ် ဒူအီ မိူက်၊ မဲ ဒီ ယမ် အာခ်ု မှာန်။ ဆေ အန် ယီ ဝီ စူ ဘူင် အီ တူ မွှိုမ် ဘော ဝီ ဘူင် ဒူပ် ဒါရာ၊ ဘူင် ဆိူဝ် ဆိူဝ် မှာန် မှာန် ဘော ဘူင် နာ မွှိုမ်၊ န့ ဒီ ဘော ချွတ် အန်။ 15 ဆေ အန် ဝီ ဒွါ ကြုဝ်ကြာမ် ပီ ငါမ် အီ ဒီ အန်၊ ဝီ ဒွါ ဝိဝ် ဘော ကြုဝ် ပီ ဒိုဝ်း တး ပီ ဖာတ် တး အန်၊ ဝီ စူ ဘူင် အီ တူ မွှိုမ် ဘော ဝီ ဘူင် ဒူပ် ဒါရာ အန် ဇဝ်၊ န့ ဒီ တဲး အန် ကွယ်။ အန် မိူဝ် တူ လုဝ် ယမ် အာခ်ု မှာန်။ 16 အုဝ် မိူဝ် ဒီ ဂဝ်း ဝဲန် မှာပ် ခဲ့ ပီ ဘူင် အန် ဒွန် မျုဝ်။ ကူပ် ဟဲ့ ဝီ ဘူင် ဒူပ် အန် ဒါရာ ဘော ဘူင် နာ ဆိူဝ် နာ မှာန်၊ နာ ဘွတ် နာ မွှိုမ်၊ အန် ဒီ ဝီ မိုဝ်း အာဆာက်။

17 မာလဲ၊ ဒူအီ အာမျုဝ် မဲ ယီ နပ် ဒီ တဝ်း၊ ‘ပီ ဆုင်ဖျာတ် ဇဝ်ဖြာ တီ၊ န့ တူ ဒူပ် ဒါရာ။’ န့ တူ မုး ပါယ် တီ။ န့ ယီ မုး ပီ ဘူင် ဂေ ဒူအီ အီ တူ ဒူပ် ဒါရာ။ 18 ဆေ ဒူအီ အီ မိုဝ်း နဝ်း ဆိူဝ် နဝ်း မှာန်၊ ဝီ ဘူင် နာ ဟာယ် နာ မိူက်၊ အန် ဒီ ဘော ယမ် ကူပ် မှာပ် ပီ ဘူင် အန် တီ။ 19 ဆေ ဒူအီ ဟာယ် ဒူအီ မိူက် တီ ဝီ ဝး နာ ဟာယ် နာ မိူက်၊ ဝီ ဘူင် ဒူပ် ဒါရာ ဆိူဝ် ဆိူဝ် မှာန် မှာန် ဘော ဘူင် နာ ဘွတ် နာ မွှိုမ်၊ အန် ဟဲ့ ချွတ် အာဆာက် အန်။ 20 ပီ ဘော ပါယ် တီ မိူဝ်၊ ဘေ ဒူအီ အီဆာရေလ ယီ ဝီ တဝ်း၊ ‘ပီ ဆုင်ဖျာတ် ဇဝ်ဖြာ န့ တူ ကာဆိူဝ်။’ ခုဝ်၊ အုဝ် ဒီ ဝီ ဆုင်ဖျာတ် ဒွန် အီ ဒူပ် ခဲ့ ပီ ဘူင် ဝီ မှဝ် ဝီ အန်။”

21 ဝါယ် ဟဲ့ မှေတ့် ဟာဝ် အီ ဟဝ် ဒီ ယေ ပွိုန် ဂိုဝ် ဒီ အာ ဆီနမ်၊ မာဂျီန် ဂိုဝ်၊ ဆီငဲ မ့ဖန်၊ န့ မိုဝ်း ဒူအီ အူ ဝီ အီ ဟဲ့ တဝ် တး ခဲင် မိူင် ယေရူဆာလဲမ်၊ ဝီ တး ဒူင် ကွယ် အုဝ်။ အန် ဝီ တဝ်း၊ မိူင် ယေရူဆာလဲမ် ဟဲ့ ဟွတ့် စှိုမ် တူတ့်။ 22 ဘာ ဒီ အပ် ခဲင် မှိုဝ် အာတ့် တး ဇမ် ဒူအီ ဝီ တီ၊ အာဖုင် ဒင်ခုဝ် ဇဝ်ဖြာ ဟဲ့ ပ့လိုက် အုဝ် ဘော တဲး အုဝ် အာင် မူတ့် အုဝ်၊ တဲး အုဝ် ပွိုန် ဝီ ကာလာင် ဂြုဝ်း။

23 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 24 “အိုယ် ဂွန် ဒူအီ၊ ဂေ ဒူအီ အီ ကွယ် ခဲင် မိူင် အီဆာရေလ အီ ဟဲ့ ကာပျာတ့် လိုဝ်၊ ဂေ ဟဲ့ တဝ်း၊ ‘အာဘြာဟမ် အူ ဝီ ဟဲ့ ပွိုန် ဒီ ဘိုင် ခါဂုန် ခဲင် မိူင် နီ ဘော မိူင်။ အေ နီ ယီ ဟဲ့ ကိူန် ကာဆဝ်။ ဒေါ တီ နီ န့ ယီ ဟဲ့ ဝီ ဘဲန် မိူင် အေ။’ 25 တဲး မဲ ဝီ ဟာဝ် ကာလာင် ဒီ ဂေ ပါယ် နီ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘ဘေ ဟဲ့ ဟူမ် ယင် အီ ဆီ မိုဝ်း နှာမ်။ ဘေ မိူဝ် ဟဲ့ ကြိုပ် အာရိုပ် ရာင် ဘော ဟဲ့ ငဝ်း ယမ် အာဆာက် အီ။ ဟဲ့ ဟွတ့်၊ ဘေ အာဝ် ဟူ ကာအာပ် ပွိုန် ကာဒါယ် မိူင် နီ ဘဲန် ခါဂုန် ဘေ။ 26 ဘေ ဟဲ့ ဘိုင် မာပွါ့ လာင် ဘေ ဘော ဘူင် အီ မွှိုမ် ကာအိး။ ဘေ မိူဝ် ဟဲ့ ဘူင် ဒီ လာယ် လုတ့် လာယ် လာယ်။ ဘေ ယီ ဆီ ပွိုန် မိူင် နီ တဲး န့ ဘဲန် ခါဂုန် ဘေ။ ဘေ ယီ တူ ပွိုန် ပါယ် တီ ဒေါ မှဝ်။’

27 တဲး မဲ ကာလာင် ဒီ ဂေ ပါယ် နီ။ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် တဝ်း ဒီ ဂေ၊ ဂေ အီ ကွယ် ခဲင် မိူင် အီ ဟဲ့ ဟွတ့် ကာပျာတ့် လိုဝ်၊ ဂေ ဒီ ယမ် ဒီ မာပွါ့ လာင် အာခ်ု မှာန်။ ဂေ အီ ကွယ် ခဲင် ရဝ် ခဲင် ကာင် နာ ရေတ့် မိူင် အီ မိုဝ်း ရဲင်၊ အုဝ် ဒီ တဲး မာဒုဝ် ပြဲ တး ဟူမ် တူတ့် ဂေ။ ဂေ အီ ဝိန် ဒီ တဝ် ချြီင် ဂေ ဒဲင် နွန် ဘော ခဲင် ကာဒဝ် မာဝ်၊ ဂေ ဒီ ဘော ယမ် ဒီ ဆဝ် ရောဂါ။ 28 အုဝ် ဒီ တဲး မိူင် နီ ကော ယေန် ကော ငွင့်၊ တဲး န့ ဘဲန် အီ တူ မွှိုမ်။ အာဖုင် ဒင်ခုဝ် ပဲ့ ဟဲ့ မိုဝ်း ဂေ ဒီ ပီဖုင် ဂေ၊ န့ ဒီ ဘော ဟြာယ် တူတ့်။ ဒဲင် နွန် ခဲင် မိူင် အီဆာရေလ၊ န့ ဒီ ဘော ယေန် ဘော ငွင့်၊ အာဝ် မိုဝ်း အာဆေ အီ ဟာဝ် ဟာဝ် တး တး ဒဲင် နွန် တီ။ 29 ပန် တီ အုဝ် ဒီ ဒမ် မှာပ် ဒီ ဂေ ဒူအီ တီ ကူပ် မှာပ် ပီ ဘူင် ဂေ။ ဆေ မိူင် နီ ဟဲ့ ရာမ် တူတ့်၊ ဂေ ဒီ ဘော နပ်၊ အုဝ် မုး ဇဝ်ဖြာ။’”

30 ဇဝ်ဖြာ ပီ ဝီ တဝ်း၊ “အိုယ် ဂွန် ဒူအီ၊ ဒူအီ အာမျုဝ် မဲ နီ ဂေ ဘော နပ် ဒီ ကာမွုန် လွင် မဲ ခူပ် ရဲင် မိူင် ဘော ခူပ် မာလုဝ်း ကာင် ဂေ။ ဂေ ဘော လာယ် ကာမွုန် တဝ်း၊ ‘ဟာဝ် အေ၊ တဲး အေ ထူမ် ပီ ဒီ ကာလာင် ဇဝ်ဖြာ ဒီ အေ။’ 31 ပါယ် တီ ဒူအီ ပီ အိုပ် အုဝ် ဒူပ် ထုင်ဂျာမ် ဂေ ဘော တး ဒူင် ကွယ် မဲ၊ တဲး ဂေ ပွိုန် ဒီ ထူမ် ပီ ဒီ ကာလာင် မဲ။ မာလဲ၊ ဂေ ယီ တူ ဘူင် ဒူပ် ပီ စ်ု မဲ ဂေ ဘူင်။ မူတ့် ဟဲ့ တဝ်း ဂေ ရွက့် ဇဝ်ဖြာ။ နဝ်း ဂေ ယီ ဝီ ကာဒိုက် ကာဒဝ့် မီ ဒီ ကြုဝ်ကြာမ် ပီ ဆီ ပွိုန် ဂေ။ 32 ဒူအီ ဂေ တီ၊ ဂေ မာတ် မဲ ပီ ဒူအီ အီ တဝ်း မှုဝ် လွင် နဝ်း ရွက့် ကာဝေ အီ ဟဲ့ မွှိုမ် ထူမ် ကာဆဝ် ဘော ဘး ဒိင်။ ဂေ ပီ ဘော ဟဲ့ ထူမ် ဂြုဝ်း ပီ ကာလာင် မဲ ဒွန် ဒဲ မိူဝ်၊ ဂေ ယီ တူ ဘူင် ဒူပ် မာဆေ။

33 မာလဲ၊ ဂြုဝ်း ပီ ကာလာင် မဲ၊ န့ ယီ ဒီ ဘုဝ် ဘဲန် ဒွန် ဒဲ။ ဆေ န့ ဟဲ့ ဟွတ့် ဘဲန် ပါယ် တီ ဂေ ဒီ ဘော နပ် ဒူအီ ဘျာန် ဂြုဝ်း ဇဝ်ဖြာ ဟဲ့ ကွယ် ကာတဲ ဂေ။”