1 ဒေါ ဟဲ့ ပွိုန် ဂိုဝ် ဒီ အာ ဆီနမ်၊ မာဂျီန် ဂိုဝ် ဒီ ဟာအာ၊ ဆီငဲ ဒေါ ဂုဝ်၊ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် မှုဝ် အီ က့လိုဝ် လွင် ခုန်ဒီခမ် ဖာရုဝ် အီ အိုပ် မိူင် အဲဂိုပ်။ တဲး မဲ ကာလာင် ဒီ အန် ပါယ် နီ။ ပီ ဘူင် ပီ ပါယ် မဲ ကာတဲ ဂေ ဒူအီ အာမျုဝ် ကိူန်၊ န့ ဟဲ့ ပီ မာခြင်ဆီ။ ဒဲင် တီ၊ မဲ ဟဲ့ ပီ ဘော မာကြာယ် အီ ကွယ် ခဲင် အိုမ် နမ်မုက်ဆာရာ။ မဲ မိူဝ် ဟဲ့ ဝ်ု ဘူင် တဲး အိုမ် ဘ့လဲင် ကာတုန် ဘောကာဂ့လျီတ်။

3 ဇဝ်ဖြာ အီ အိုပ် တူတ့် ဒွန် မျုဝ် ဘော တဝ်း၊ ဆေ ဂေ ဒူအီ ကိူန် ဟီ တး ကာဇု၊ အုဝ် ဒီ တဲး ဂေ ဒိုဝ်း န့ရပ် အုဝ် ပ ဒီ မဲ။ အုဝ် ဝီ တဲး ဂေ လာက် ဟာဝ် မဲ ခဲင် န့ရပ် တီ၊ တဲး မဲ လေး ခဲင် အိုမ်။

4 အုဝ် ဒီ ဝီ ဘ့လေး ဝဲန် မဲ ဒဲင် ကာဒါယ် တဲး မဲ ကွယ် ဒူင် ဂ့လင်၊ တဲး မာဆိမ် ဂေ မာဒုဝ် ပြဲ အီ ကွယ် ဒဲင် ကာဒါယ် နီ ဝီ တး ဟူမ် ယင် မဲ။

5 အုဝ် ဒီ ဒိုဝ်း ဒုဝ် ယမ် မဲ တီ၊ ဘ့လေး ဟာဝ် ဒီ နွန် ဘော ဒူပ် ဒီလယ့် ဒွန် နာ ဒွန် ပ့လုဝ့်။

6 အုဝ် ဒီ ဒိုဝ်း နှာမ် မဲ၊ ဟုး ဒဲင် ကာဒါယ် ကော ဇမ် ဒီ နွန်၊ တဲး န့ ကော နုဝ့် ဒွန် ဒီလယ့်။

7 ပန် ဒီ ဘူင် အုဝ် တဲး မဲ လိုဝ် စှိုမ် တီ၊ န့ ပီ အုဝ် ဒီ ဘော ဆာဘ့လိုက် ဂါင်ဟြာဝ်၊ တဲး ဂေ ဆီမန့် ဘောကာဂ့လျီတ် အပ် ဝွင့်။ အုဝ် ဒီ ဒိုဝ်း န့အု ကာဒး ဆီငဲ။ မာဂျီန် မိူဝ် တူ မိုဝ်း ဘ့လာင် အန်။

8 ခဲ့ ကွယ် အာမျုဝ် အီ ဘ့လာင် ခဲင် ဂါင်ဟြာဝ် နာ ဒဲင် ဒူင် ကွယ် မဲ၊ အုဝ် ဒီ တဲး ဂေ အပ် ဝွင့်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

9 ပန် ဒီ ဘူင် အုဝ် တဲး မဲ လိုဝ် စှိုမ်၊ ဂေ ဒူအီ ဒွန် မျုဝ် ပီ တူ ဒွိုမ် နပ် ဘေ၊ ဂေ ဝီ မိုဝ်း ဒုက် ဒီ နဝ်း ဂေ။

10 ခဲ့ ပီ ဒီ ဘူင် အုဝ် ဒီ မဲ တီ၊ န့ ဒီ ဘော တဲး ဒူအီ ကိူန် ကာစွာ။ ပန် ဒီ ဒိုဝ်း အုဝ် မာပွါ့ လာင် အုဝ် ငှာ ဒီ မဲ တီ၊ ခဲ့ ကွယ် ဂေ ခုန်ဒီခမ် ဒီ ဘော ယုဝ် ဒီယုး ဒီယေန့်။ ဆီငဲ ဒီ လိုဝ် စှိုမ် မဲ တီ၊ ခဲ့ ကွယ် ဂေ အာမျုဝ် ဒူအီ ကိူန် ဒီ ယုဝ် ကာဆဝ်၊ ယုဝ် ဒုဝ် ဘြိမ် ဂေ ဒီ ဘော စှိုမ်။

11 ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဟွတ့် ကာလာင် ပါယ် တီ။ မဲ ဒီ ကာဒုး ဒီ ခမ် အာဖေ အာရေ ပီ ဒီ ဘူင် ခုန်ဒီခမ် အီ အိုပ် မိူင် ဘာဘဲ ဒီ မဲ။ အန် ဒီ ဂူင့် မာပွါ့ လာင် အန်၊ တး ကာဂုဝ်း ဒီ မဲ အာခ်ု မှာန်။

12 အုဝ် ဒီ ဘော စ်ု ဒါ ဆိုက် ဂေ အီ ဟာယ် ကာဆဝ်၊ တဲး ဂေ ဒိုဝ်း မာပွါ့ လာင် ဂေ၊ ဒဲပ် ယမ် ဒူအီ ဘောကာဂ့လျီတ် ခဲင် မိူင် မဲ။ ဒူအီ ပီ အိုပ် မဲ ဘောကာဂ့လျီတ် ဘော ကြုဝ်ကြာမ် မဲ ပဲ့ ဟဲ့ ပီဖုင် မဲ ဒီ မဲ၊ န့ ဒီ လိုဝ် ကာပျာတ့် တူတ့်။

13 အုဝ် ဒီ ပျာတ့် ဝဲန် ဘော ဒုဝ် ဆတ်ဒါဝါ ခဲင် မိူင် အဲဂိုပ် အီ ကွယ် ခူပ် ဘ့လဲင် အိုမ် အီ ကိူန်။ ဝါယ် အန် တီ ဘော ဒူအီ ဘော ဒုဝ် ဆတ်ဒါဝါ အာဝ် ဟူ ညဲတ့် ခဲင် အိုမ်၊ ဘူင် တဲး အိုမ် ကာတုန်။

14 ပန် တီ အုဝ် ဒီ ဘူင် တဲး အိုမ် ခဲင် မိူင် မဲ တီ ဒွန် ဘ့လဲင် ဝီ ဆီငါ၊ တဲး န့ ဘော ဟာဝ် နှိမ် နှိမ်၊ ဟာဝ် ဒါခိုယ် ဒါခိုယ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

15 အန် ဇဝ် ဝီ တဝ်း၊ “ဆေ အုဝ် ဟဲ့ ဟွတ့် ဘူင် တဲး မိူင် အဲဂိုပ် ယေန် ဘော ပျာတ့် ဝဲန် တူတ့် အီ ကွယ် ခဲင် မိူင် ဂေ၊ ဆေ အုဝ် ဟီ ငဝ်း အီ ကွယ် ခဲင် မိူင် ဂေ တီ၊ ဂေ ဒီ ဘော ဝီ နပ်၊ အုဝ် မုး ဇဝ်ဖြာ။”

16 ခဲ့ နီ မှုဝ် လွင် ဒူအီ ယမ် ခဲင် မိူင် အဲဂိုပ်။ ဂေ အီဘိုန့် အာမျုဝ် ဒူအီ ဒွန် မျုဝ်၊ ဂေ ဒီ တဝ်း မှုဝ် တီ အာဒါ ဂေ ဒူအီ အဲဂိုပ် အီ ဟဲ့ ကွယ် ခဲင် ရဝ် ခဲင် မိူင် ဘောကာဂ့လျီတ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

17 ဒေါ ဟဲ့ ဇမ် ဆီနမ် ဂိုဝ် ဒီ ဟာအာ၊ မာဂျီန် ဒေါ ဂုဝ်၊ ဆီငဲ ဂိုဝ် ဒီ မ့ဖန်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 18 “အိုယ် ဂွန် ဒူအီ၊ တဲး မဲ က့လိုဝ် ဘော ငှုန် အာဒါ ဂေ ဒူအီ ခဲင် မိူင် အဲဂိုပ် အီ ဟဲ့ ကိူန် ကာဆဝ်။ ဒူအီ ဂေ တီ ဒီ စုဝ်း တူတ့် ခဲင် မိူင် မာရာန ဒူပ် ဂေ ဒူအီ ဒွန် မျုဝ် အီ ဟဲ့ မိုဝ်း အာဖုင် ဒင်ခုဝ်။ 19 တဲး မဲ ကာလာင် ဒီ ဂေ ပါယ် နီ။ ‘ဘေ ထာင် ဘေ ဟဲ့ မွှိုမ် ရွက့် လွှိုမ် အီ ဟဝ်။း ဘော ဘေ ဒီ စုဝ်း မိူင် မာရာန ဘော ကွယ် ကာတဲ ဂေ ဒူအီ အီ တူ နပ် ဇဝ်ဖြာ။ 20 ဂေ ဒူအီ အာမျုဝ် အဲဂိုပ် ဘောကာဂ့လျီတ်၊ ဂေ ဒီ ဘော ယမ် ရိုမ် ဒူပ် ဂေ အီ ဟဲ့ ဟွတ့် ယမ် ဒီ မာပွါ့ လာင်။ မာပွါ့ လာင် ရန်ဆူ ဂေ ဟဲ့ ဟွတ့် ရဲန် အုန်၊ တဲး န့ ဒိူတ် ဟာဝ် ဒူအီ ယမ် ဘောကာဂ့လျီတ်။ 21 ဂေ ဒါ တာင် အီ မိုဝ်း အာဖုင် ဒင်ခုဝ် ဘော ဂေ အီ ဟဲ့ ဒွိုမ် စွယ် ဒူအီ ခဲင် မိူင် အဲဂိုပ်၊ ဂေ ဟဲ့ ဟွတ့် ကွယ် ခဲင် မိူင် မာရာန။ ဂေ ဒီ ဘ်ု ဒီ ရွုး ဒူအီ အဲဂိုပ်၊ ဂေ တီ ဇမ် ခဲင် မိူင် မာရာန။ ဂေ မိူဝ် ကာဖြူမ် ဒီ ဒတ် တဝ်း၊ “ဂေ အီ တူ ရုဝ်ဆေ ဇဝ်ဖြာ အီ ဟဲ့ ယမ် ဒီ ဒါ ဆိုက်၊ ဂေ တး တူတ့် ဒီ နီ။ တဲး ဘေ ယွတ်၊ ဂေ ဟဲ့ တး ကွယ် ဒီ နီ။”

22 ဒူအီ အာဆူရီယာ မိူဝ် ဟဲ့ ကွယ် ဒီ တီ။ ကာဒဝ် ဘာရေဝ် ဒါ ဆိုက် ဂေ မိူဝ် ဟဲ့ ကွယ် ရူပ် ဂေ ဒွန် နာ ဒွန် ပ့လုဝ့်။ ဂေ ဟဲ့ ယမ် ဒီ မာပွါ့ လာင်။ 23 ကာဒဝ် ဘာရေဝ် ဂေ တီ ဟဲ့ ကွယ် လိုက် ခဲင် မိူင် မာရာန။ ဂေ ဒါ ဆိုက် ဒွန် မျုဝ် အီ ဟဲ့ စွယ် ဂေ ကာဂုဝ်း ကွယ် ရိုမ် ဒူပ် ဂေ။ ဒါ ဆိုက် ဂေ တီ ဒေါ ဆီ အိမ် ဂေ၊ ဂေ ဟဲ့ ဘူင် အီ မွှိုမ် ယုဝ် ကာဆဝ်၊ ယီ ဟဲ့ ဟွတ့် ယမ် ဒေါ တီ နီ။

24 ဂေ ဒူအီ အေလမ် မိူဝ် ကွယ် ဒီ တီ။ ကာဒဝ် ဘာရေဝ် ဒါ ဆိုက် ဂေ တီ မိူဝ် ဟဲ့ ကွယ် ရူပ် ဂေ ဒွန် နာ ဒွန် ပ့လုဝ့်။ ဂေ ဘောကာဂ့လျီတ် ဟဲ့ ယမ် ဒီ မာပွါ့ လာင်။ ဂေ ဒူအီ အီ တူ ခမ် ဒီ ဆွာ့ ဝဲန် ဟုန် လခါနာ အီမာယ်၊ ဂေ ဒူအီ အီ တူ နပ် ဇဝ်ဖြာ၊ ဂေ ဟဲ့ လူင် လိုက် ကာဆဝ် ခဲင် မိူင် မာရာန တီ။ ဒေါ အိမ် ဂေ၊ ဂေ ပီ ဘော ဟဲ့ ဒွိုမ် ဘူင် တဲး အီ ယုဝ် ကာဆဝ် ဂေ၊ ဒေါ တီ နီ ဂေ ဟဲ့ ဝီ ယမ် ဘော စှိုမ် ဆာရေ။ 25 ဂေ ဒူအီ အေလမ် ဘော ကွယ် ဒူပ် ဂေ အီ ဟဲ့ ယမ်။ ဘာရေဝ် ဒါ ဆိုက် အန် မိူဝ် ဟဲ့ ကွယ် ရူပ် အန်။ ဒူအီ ဂေ တီ ဘော မုး တူတ့် ဒူအီ အီ တူ ဒွိုမ် ဆွာ့ ဝဲန် ဟုန် လခါနာ အီမာယ်။ ဂေ မိူဝ် ယမ် ဒေါ ကာဂုဝ်း ဂေ ဒီ ဒါ ဆိုက်။ ဂေ ပီ ဘော ဟဲ့ မုး ဒူအီ အီ ဒွိုမ် ဘူင် အီ မွှိုမ် ယုဝ် ကာဆဝ် မိူဝ်၊ ဒေါ တီ နီ ဂေ ဟဲ့ ဝီ ယမ် ဘော မွှိုမ် ဆာယ် ကာဆဝ်။ ဂေ မိူဝ် လုဝ် ခမ် အီ တူ မွှိုမ် ပီ ဂေ အီ ဟဲ့ ယမ် ဒီ အာတ့်။

26 ဒူအီ အာမျုဝ် မဲဆိတ် ဘော အာမျုဝ် ထူဘာ မိူဝ် ကွယ် ဒီ တီ။ ဂေ ဒူအီ ကိူန် ဘော ကွယ် ခဲင် ဘာရေဝ် ဂေ။ ဒူအီ ဂေ တီ ဘော မုး တူတ့် ဒူအီ အီ တူ ဒွိုမ် ဆွာ့ ဝဲန် ဟုန် လခါနာ အီမာယ်။ ဂေ မိူဝ် ဟဲ့ ယမ် ဒီ မာပွါ့ လာင် ကူပ် ဘူင် ဂေ တဲး ဒူအီ အီ ဆီ ကွယ် ဆီ အိမ် ကော ယုဝ် ကာဆဝ်။ 27 ဂေ ကွယ် ဒူပ် ဒါ ဆိုက် အာမျုဝ် ဟဝ် အီ တူ ဆွာ့ ဝဲန် ဟုန် လခါနာ အီမာယ် အီ ဟဲ့ ဂူင့် ဘော ခြိုင် ကာဂုဝ်း ဂေ၊ ကွယ် ခဲင် ဘာရေဝ်။ အီ ဟဝ် ဘော ဒိုဝ်း မာပွါ့ လာင် ဂေ၊ ဝီ မာကွိုမ် ဘဲန် မွှန် ဂေ။ မင် ဂွင့် ဂေ ဘော ဝီ ကွယ် ဒဲင် ကာအာင် ဂေ။ ဒါ ဆိုက် ဂေ တီ၊ ဟဲ့ ဒွိုမ် တဲး ဒွန် အီ ကာစွာ ဘော ယုဝ် ကာဆဝ်။

28 ဘော မဲ ခုန်ဒီခမ် ဖာရုဝ်၊ မဲ ဒီ လိုဝ် စှိုမ် ဘော ယမ် ရိုမ် ဒူပ် ဂေ အီ တူ ခမ် ဒီ ဆွာ့ ဝဲန် ဟုန် လခါနာ အီမာယ် ဘော ယမ် ဒီ မာပွါ့ လာင်။

29 ဒူအီ မိူင် အေဒူမ် မိူဝ် ကွယ် ဒီ တီ။ န့ ဘော မုး ဘော ခုန်ဒီခမ် ဘော ဂွန် အန် ဘောကာဂ့လျီတ်။ ဒူအီ ဂေ တီ၊ ဂေ ပီ ဘော ဟဲ့ ဒွိုမ် မုး ဒူအီ အီ မိုဝ်း အာဖုင် ဒင်ခုဝ် မိူဝ်၊ ဒေါ တီ နီ ဂေ ဟဲ့ ဝီ ယမ် ရိုမ် ဒူပ် ဂေ အီ တူ ခမ် ဒီ ဆွာ့ ဝဲန် ဟုန် လခါနာ အီမာယ်။ ဂေ မိူဝ် ယမ် ဘော လူင် ခဲင် မိူင် မာရာန။

30 ဂေ ဂွန် ခုန်ဒီခမ် အီ ကွယ် မိူင် နာ ကွာ မိူဝ်၊ ဟဲ့ ကွယ် ရိုမ် ဒူပ် ဒူအီ မိူင် ဆီဒူန် ဒူင် တီ။ ပွုန် ဂေ ဘော အာဖုင် ဒင်ခုဝ် ဂေ ပီ ဘော ဟဲ့ ဒွိုမ် ဘူင် တဲး အီ ဟဝ် ယုဝ် ကာဆဝ် မိူဝ်၊ ဒေါ တီ နီ ဂေ အီ တူ ခမ် ဒီ ဆွာ့ ဝဲန် ဟုန် လခါနာ အီမာယ်၊ ဂေ မိူဝ် လုဝ် ခမ် ဒီ ကွယ် ဒူင် မွှိုမ် ဆာယ် ဘော ကွယ် ရိုမ် ဒူပ် ဂေ အီ ဟဲ့ ယမ် ဒီ မာပွါ့ လာင် ဘော လူင် ခဲင် မိူင် မာရာန။

31 ခုန်ဒီခမ် ဖာရုဝ် မိူဝ် ယိုဝ် ဒူအီ အန် အီ ဟဲ့ ယမ် ဘော လှဝ် နဝ်း အန် ကူပ် ဟဲ့ ယမ် ဒါ ဆိုက် အန် ဒီ မာပွါ့ လာင်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 32 အန် ဝီ တဝ်း၊ “ဇဝ်ဖြာ ပီ ဘော တဲး ခုန်ဒီခမ် ဖာရုဝ် ဘူင် အီ မွှိုမ် ယုဝ် ကာဆဝ် ဒီ ဒူအီ ဒဲင် ကာဒါယ် မိူဝ်၊ ဘော အန် ဘော ဒူအီ အန် ဘောကာဂ့လျီတ်၊ ဂေ ယီ ယမ် ဒီ မာပွါ့ လာင် ဘော ကွယ် ရိုမ် ဒူပ် ဂေ အီ တူ ခမ် ဒီ ဆွာ့ ဝဲန် ဟုန် လခါနာ အီမာယ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။