1 ဒေါ ဟဲ့ ဇမ် ဂိုဝ် ဒီ အူ ဆီနမ်၊ မာဂျီန် ဟာအူယ်၊ ဆီငဲ ဒေါ ဂုဝ်၊ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဒီ ခုန်ဒီခမ် အီ အိုပ် မိူင် အဲဂိုပ် ဘော ဒီ ဂေ ဒူအီ ခဲင် မာန် မိူင် အန် ဘောကာဂ့လျီတ်။ တဲး မဲ တဝ်း၊ ‘အာဖုင် ဒင်ခုဝ် မဲ ဟဲ့ တာင် ကာဆဝ်။ အာဝ် မိုဝ်း မာဆေ အီ ပွိုန် လာယ် ကာဂဝ် ဒီ မဲ။

3 တဲး မဲ လှုဝ်း မိူင် အာဆူရီယာ အီ ဟဲ့ ဒွိုမ် ပီ ဟေ အာရိတ် အီ ကွယ် ဒီ နွန် လေဘာနုန်။ ရာ အန် မိူဝ် ဟဲ့ စှိတ် ကာဆဝ်၊ ဟဲ့ စာ လွှိုမ် ဟေ ဒွန် မျုဝ်။ ကာပ့လုယ် အန် ဂေ လှာ အန် မိူဝ် ဟဲ့ ဂ့လမ် ဆီချာ။

4 န့ ဘော မိုဝ်း အိုမ် အီ တဲး န့ လတ့်၊ တဲး န့ တာင်။ အိုမ် အီ ကွယ် လိုက် ခဲင် ကာဒါယ် တီ ဘော တဲး န့ ဟြေး။ အိုမ် ဘ့လဲင် ဘော လှဲ ဒူပ် ဟေ ပီ ဆမ် အုန် ဂေ တီ။ န့ ဘော မိုဝ်း အိုမ် အီ လှဲ ဟာဝ် ဒူင် ကွယ် ပြဲ ဂေ ပေတ့်၊ တဲး န့ ကော ကာလတ့် ဒွန် ကာဒင်။

5 ပါယ် တီ ဟေ တွိုန် ဘော စာ လွှိုမ် ဒွန် ကာဒင်။ ရာ အန် မိူဝ် ကိူန်၊ ကော ကာဒန် လန် ဘော ဒီ တူင့် ဒီ တာင် ဒွန် ရာ ကူပ် မိုဝ်း အိုမ် ကိူန်။

6 ခဲ့ ကွယ် မာဆိမ်၊ ဂေ ဘောကာဂ့လျီတ် ဘော တး ဘူင် ကာဟုန် ဒီ ရာ အန် တီ။ ဂေ မာဒုဝ် ပြဲ ဘော တး မိုဝ်း ဂွန် ခြိုမ် ယာပ် အန် တီ။ ဒူအီ ဒဲင် ကာဒါယ် နီ မိူဝ် တး ဘိုင်၊ တး ကွယ် ခြိုမ် ကာပ့လုယ် အန်။

7 ဟေ တီ မိူဝ် စှိတ် ကာဆဝ် ကူပ် ဟဲ့ စာ အန် ဘော ဟဲ့ တူင့် ရာ အန်။ ရျီး အန် ဘော လိုပ် လူင် ဒူင် မိုဝ်း အိုမ် အီ ကွယ် လိုက် ကာဆဝ်။

8 ဟေ အာရိတ် အီ ကွယ် ခဲင် ကာပိုမ် ဇဝ်ဖြာ၊ န့ တူ ပွိုန် ကာဂဝ် ဒီ ဟေ တီ။ ဟေ န့ကေ မိူဝ် တူ မိုဝ်း ရာ ပါယ် တီ။ ဟေ အာရာမူန် မိူဝ် တူ မိုဝ်း ခေါ အူ ကာဒင် အီ မိုဝ်း ရာ အီ စှိတ် ပီ ဟေ တီ။ ဘော ဟေ ဘောကာဂ့လျီတ် အီ ကွယ် ခဲင် ကာပိုမ် ဇဝ်ဖြာ၊ န့ တူ မိုဝ်း ခေါ အူ ကာဒင် အီ စှိတ် ပီ ဟေ တီ။

9 အုဝ် ဟဲ့ ဘူင် တဲး အန် စှိတ် ကူပ် ဟဲ့ မိုဝ်း ကိူန် ရာ အန်။ ရာ အန် တီ မိူဝ် ဟဲ့ မ့ဘ့လး၊ တဲး ဟေ ဒွန် ကာဒင် အီ ကွယ် ခဲင် ကာပိုမ် အေဒေန် ကော ဝီ လှယ့် အန်။

10 ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ကူပ် ဟဲ့ စာ ကာဆဝ် ဟေ တီ၊ တဲး ကာဒဲ့ အန် ကွယ် ဒဲင် ဟေ ဒွန် မျုဝ်၊ စှိတ် အန် တဲး အန် ဘဲန် နဝ်း ပီခိုက်။ 11 အုဝ် ဟဲ့ တဲး ခုန်ဒီခမ် အီ တာင် လွှိုမ် တူတ့် အိုပ် အန်။ ခုန်ဒီခမ် တီ ဒီ ဘော ဆုင်ဖျာတ် အာမူ အန်၊ တဲး န့ ဒူပ် ခဲ့ ဟာယ် ခဲ့ မိူက် အန်။ အုဝ် ဟဲ့ ဝဲန် အန် ပါယ် တီ။ 12 ဂေ ဒူအီ အီ ကွယ် မိူင် တေတ့် မိူင် တ အီ ဟာယ် လွှိုမ် အီ ဟဝ်၊ ဂေ ဟဲ့ ဂ်ု ကေး အန်။ ရာ အန် ဘော ကာဘက် စုဝ်း ဒွန် နွန် ဒွန် ဒီလယ့်၊ တဲး န့ ကော နုဝ့် ဘော မိူင်။ ဂေ ဒူအီ အီ ဟဲ့ ဒွိုမ် ဘိုင် ဒွိုမ် ကွယ် ယာပ် အန်၊ ဂေ ဟဲ့ လေး တ ဒူင် ကွယ် ဂေ တီ။ 13 ဂေ မာဆိမ် ဟဲ့ တး စုး ဒဲင် ငူယ် အန် တီ။ ဂေ မာဒုဝ် ပြဲ ဟဲ့ တး ကွယ် ကာတဲ ရာ အန်။ 14 ပါယ် တီ နာ အာတ့် နီ ဟာဝ်၊ ပီ ဘော ဟဲ့ ပွိုန် အိုမ် ကိူန်၊ န့ ယီ တူ မိုဝ်း ဟေ ခေါ အူ မျုဝ် အီ စာ လွှိုမ် အန် တီ။ ဂေ ဘောကာဂ့လျီတ် လုဝ် ယမ် ပီ ဒူအီ ဟဲ့ ယမ် စုဝ်း ခဲင် မိူင် မာရာန။”

15 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ဆီငဲ ဒေါ လူင် ဂေ ဒူအီ အီ ပီ ဟေ တီ ခဲင် မိူင် မာရာန၊ အုဝ် ဟဲ့ ဘူင် တဲး အိုမ် အီ ကွယ် နာ ခြိုမ် ကာဒါယ် ကာပိတ်၊ တဲး အီ ဟဝ် ကော က့လိုဝ် ကော ငှဝ် ကူပ် အန် တီ။ အုဝ် ဒီ တဲး အိုမ် ဘ့လဲင် ဒွန် ဘ့လဲင် ဟိတ် တူတ့်။ ခဲ့ ကွယ် ဘ့လဲင်၊ အာဝ် ဟူ မိုဝ်း အီ လှဲ ကူပ် ဟဲ့ ယမ် ဟေ တီ။ အုဝ် ဒီ တဲး အပ် ဝွင့် ပ့လိုက် နွန် လေဘာနုန်၊ တဲး ဟေ ဘောကာဂ့လျီတ် ခဲင် ပြဲ ကော ဟျီ့ ကာဟဝ်း။ 16 အုဝ် ဟဲ့ တဲး ဟေ တီ စုဝ်း ခဲင် မိူင် မာရာန။ ဂြန့် စုဝ်း အန်၊ န့ ဟဲ့ တဲး အာမျုဝ် ဒူအီ ဘောကာဂ့လျီတ် ယုဝ် ဒီယုး ဒီယေန့်။ ဝါယ် အန် တီ ခဲ့ ကွယ် ဟေ ခဲင် ကာပိုမ် ဇဝ်ဖြာ ဘော ဟေ အီ ဟဲ့ မွှိုမ် ဆီချာ အီ ကွယ် ဒဲင် နွန် လေဘာနုန် ဘော ဟေ အီ ဟဲ့ ပွိုန် အိုမ် ဆေဆေ၊ ဂေ ဘောကာဂ့လျီတ် ဟဲ့ ကွယ် ခြိုမ် ကာဒါယ်။ ဂေ ဟဲ့ ခူယ် ကူပ် ဟဲ့ စှိုမ် အန်။ 17 ဂေ ဒူအီ အီ ဒွိုမ် ကွယ် ခြိုမ် ယာပ် အန်၊ ဂေ အာမျုဝ် ဒူအီ အီ ဟဲ့ ဘိုင် အန်၊ ဂေ မိူဝ် ဟဲ့ လူင် ခဲင် မိူင် မာရာန ဒူပ် အန်။ န့ မုး ဒူအီ ဘောကာဂ့လျီတ် အီ ဟဲ့ ယမ် ဒီ မာပွါ့ လာင်။

18 အာဝ် မိုဝ်း ဟေ ပေါ ကာဒင် အီ ပွိုန် ကာဂဝ် ဒီ မဲ။ အာဖုင် ဒင်ခုဝ် မဲ ဟဲ့ တာင် လွှိုမ် ဒွန် မျုဝ်။ မဲ ယီ ဝီ ဒူပ် ဟေ အီ ကွယ် ခဲင် ကာပိုမ် ဇဝ်ဖြာ အီ စိူဝ် အေဒေန်၊ စုဝ်း ခဲင် မိူင် မာရာန။ မဲ ဝီ စှိုမ် ဒူပ် ဒူအီ အီ တူ ဆွာ့ ဝဲန် ဟုန် လခါနာ အီမာယ် ဘော ဒူပ် ဒူအီ အီ ယမ် ဒီ မာပွါ့ လာင်။ ဟေ တီ ဟဲ့ ပီ ခုန်ဒီခမ် ဖာရုဝ် ဘော ဒူအီ အဲဂိုပ် ပီ အိုပ် အန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။