1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ဘျာန် ဂြုဝ်း ဇဝ်ဖြာ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ကာလာင် ပါယ် နီ။ တဲး မဲ ယာမ် ဘော ဒတ် တဝ်း၊ ဆီငဲ ဒီ ဇမ် အေ ဒုက် တာင် ဟဲ့ ကာတတ် ဒီ တး။

3 ဆီငဲ ဒီ ဒမ် ဇဝ်ဖြာ မှာပ် ဒီ ဒူအီ ဟဲ့ ကာတတ် ဒီ ဇမ်။ န့ မုး ဆီငဲ ဒီ အပ် ဝွင့် ဘော ဆီငဲ ဒီ တဲး ဇဝ်ဖြာ ဒူအီ အာမျုဝ် ဟဝ် စှိုမ်။

4 န့ ဒီ ဘော မိုဝ်း ဒါ ဆိုက် အီ တး ကာငဝ်း ယမ် ခဲင် မိူင် အဲဂိုပ်။ န့ ဒီ ဘော မိုဝ်း အီ ဒုက် အီ ညှာပ် ဒီ နဝ်း ဒူအီ ခဲင် မိူင် ကူဆာ။ န့ ဒီ ဘော မိုဝ်း ဒူအီ ကိူန် ကာဆဝ် ဒီ ယမ် ခဲင် မိူင် အဲဂိုပ်။ ဂေ ဒူအီ အာမျုဝ် ဟဝ် ဒီ ဘော တး၊ ဖာတ် ဒိုဝ်း ကြုဝ်ကြာမ် ဂေ ခဲင် မိူင် တီ။ မိူင် မိူဝ် ဒီ ကာပျာတ့် လိုဝ် တူတ့်။

5 ဂေ အီ တး မိူင် ကူဆာ၊ မိူင် ဖုတ်၊ မိူင် လူဒီ၊ မိူင် အာရာပ်၊ မိူင် လီဘီ ဘော ဒူအီ ဘဲန် မျုဝ် ဘဲန် မျုဝ် အီ ဟဲ့ ကာဆဲန့် ဒီ လာယ် စွယ်၊ ဂေ ဒီ ဘော ယမ် တူတ့် ဒီ မာပွါ့ လာင် ဒူပ် ဒူအီ မိူင် အဲဂိုပ်။’”

6 ဇဝ်ဖြာ ပီ ဝီ တဝ်း၊ “ဂေ ဒူအီ အီ ကွယ် ခဲင် မိူင် အဲဂိုပ်၊ ဂေ ဒီ ယမ် တူတ့်။ ဂေ အီ မိုဝ်း နဝ်း ပီခိုက်၊ ဂေ ဒီ လိုဝ် စှိုမ်။ စုး ဒီ မိူင် မိက်ဒူန် ကော ဝီ ဇမ် ဒီ မိူင် ဆူနိမ် ဂေ ဒါ ဆိုက် ဒီ ယမ် တူတ့်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

7 ဒူအီ ဒီ ဘော ယေန် ဘော ငွင့် ဒွန် ပ့လုဝ့်။ မိူင် ဂေ တီ ဒီ ပီ မိူင် အီ ဟဝ် အီ ဟဲ့ ယေန် ဟဲ့ ငွင့် တူတ့်။

8 ဆေ အုဝ် ဒီ ဒိုဝ်း ငဝ်၊ ဒုဝ့် မိူင် အဲဂိုပ်၊ ဂေ ဒီ ဘော နပ်၊ အုဝ် မုး ဇဝ်ဖြာ။ ဘော ဂေ ဒူအီ အီ စွယ် မိူင် အဲဂိုပ်၊ ဂေ ဘောကာဂ့လျီတ် ဒီ လိုဝ် စှိုမ်။

9 ဆေ ဟီ ဇမ် ဆီငဲ ဒီ လိုဝ် စှိုမ် မိူင် အဲဂိုပ် တီ၊ အုဝ် ဒီ စ်ု ဂေ အာမူ အာမာတ် အုဝ်၊ တဲး ဂေ ပဝ့် ရိုဝ် ဆင်ဖုဝ်၊ ဟာဝ် ကာစွှာ့ ဂေ ဒူအီ ခဲင် မိူင် ကူဆာ။ ဂေ ဒီ ထာင်၊ ဂေ တူ မိုဝ်း အီ ဒုက် အီ ညှာပ်။ န့ ယီ ဘဲန် အီ ဒုက် အီ ညှာပ် ကာဆဝ် ဒီ ဂေ။ ဘ်ု ဘေ ယွတ်၊ ဆီငဲ တီ ဟဲ့ ဟွတ့် ချြီ့ ဒီ ဇမ်။”

10 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် နီ။ “အုဝ် ဒီ စ်ု ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ၊ တဲး အန် တး ဒိုဝ်း ကြုဝ်ကြာမ်၊ ဒိုဝ်း ခြိုင် တာ အီ ဘွတ် အီ စှိတ် ကာဆဝ် ခဲင် မိူင် အဲဂိုပ် တီ။

11 ဘော အန် ဘော ဂေ ဒါ ဆိုက် အန် အီ ဟာယ် ကာဆဝ် လွှိုမ် ဒူအီ အာမျုဝ် ဟဝ်၊ ဂေ ဒီ ဘော တး ပျာတ့် ဝဲန် တူတ့် မိူင် တီ။ ဂေ ဒီ ဘော တာ မာပွါ့ လာင် ဂေ၊ ငဝ်း ယမ် ဒူအီ မိူင် အဲဂိုပ်၊ တဲး ဒုဝ် ဒူအီ ယမ် ကော နုဝ့် ဘော မာန် ဘော မိူင်။

12 အုဝ် ဒီ ဘူင် တဲး ဘ့လဲင် အိုမ် နီလာ ကော ဟိတ်။ အုဝ် ဒီ ယွင့် ကာဒါယ် မိူင် အဲဂိုပ် ဒီ ဒူအီ ဟာယ်။ အုဝ် ဒီ တဲး ဂေ ဒူအီ မိူင် တေတ့် မိူင် တ ဝီ တး ပျာတ့် မိူင် အဲဂိုပ် ဘော မိူင်။” အုဝ် အီ မုး ဇဝ်ဖြာ၊ အုဝ် ဟဲ့ ကာလာင် ပါယ် တီ။

13 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ပျာတ့် ဝဲန် ဘော အာရိုပ် ရာင် ပီ ကြိုပ် ဂေ၊ ပျာတ့် ဘော ဇဝ် အီ တူ မုး အီ တူ မှာန်၊ တဲး ဂေ ဟြာယ် ခဲင် မိူင် နောဖ။ ဝါယ် အန် တီ အာဝ် ဟူ မိုဝ်း ခုန်ဒီခမ် အီ အိုပ် မိူင် အဲဂိုပ် ဒေါ မှဝ်။ အုဝ် ဒီ ဘူင် အီ မွှိုမ် ယုဝ် ကာဆဝ် ဒီ ဒူအီ ခဲင် မိူင် အဲဂိုပ် ဘော မိူင်။

14 အုဝ် ဒီ ဘူင် တဲး မိူင် အဲဂိုပ် ဘ့လာက် နာ တေတ့် ကော ယေန်။ အုဝ် ဒီ ဒိုဝ်း ငဝ် ဒုဝ့် မိူင် စောနာ အီ ကွယ် ဘ့လာက် နာ ကွာ။ အုဝ် ဒီ ဘော ဒမ် မှာပ် ဒီ ဒူအီ အီ ကွယ် ခဲင် မိူင် တာင် ဆေဘီ။

15 အုဝ် ဒီ တဲး ဂေ ဒူအီ အီ ကွယ် ခဲင် မိူင် ဖီလူဆိမ် ကာဒုး အာဖေ အာရေ ကူပ် ဟဲ့ ရူ အုဝ် ဒီ ဂေ။ ဂေ မုး ဒူအီ ခဲင် မိူင် အဲဂိုပ် အီ ဟဲ့ မိုဝ်း ပ့လူမ် ဂေ ဟဲန့် လွှိုမ် အီ ဟဝ်။ အုဝ် မိူဝ် ဒီ ပျာတ့် ဝဲန် ဘော မိူင် ဆေဘီ။

16 အုဝ် ဒီ ဒိုဝ်း ငဝ်၊ ဒုဝ့် မိူင် အဲဂိုပ်။ ဒူအီ ခဲင် မိူင် ဖီလူဆိမ် ဒီ ကာဒုး ဒီ ခမ် ဒုက် တာင် ကာဆဝ်။ ရဲင် မိူင် ဆေဘီ မိူဝ် ဒီ ကေး ကာပျာတ့် တူတ့်။ ခဲင် မိူင် နောဖ ဂေ ဒီ ဘော တး ကာဂုဝ်း ဆေဆေ။

17 ဂေ ဒူအီ အီ ဆီ နှိုမ်၊ အီ ကွယ် ခဲင် မိူင် အာဝန် ဘော ခဲင် မိူင် ဖီပေဆိတ်၊ ဂေ ဒီ ဘော ယမ် ဒေါ ကာဂုဝ်း ဂေ။ ဂေ ဒူအီ ဘော မိူင် လုဝ် ခမ် အီ ဟဝ် မှေတ့် ဟာဝ် ဂေ။

18 အပ် ဝွင့် ဒီ ဘော တး ပ့လိုက် မိူင် တာပါနိတ် ဒေါ ပျာတ့် ဝဲန် အုဝ် အာဖုင် ဒင်ခုဝ် ဘော ပ့လူမ် ဂေ ဟဲန့် ပဲ့ ဟဲ့ ပီဖုင် ဂေ ဒီ ဂေ။ န့အု တာင် ဒီ ဘော တး ပ့လိုက် မိူင် အဲဂိုပ်။ ဘော ဒူအီ ခဲင် ရဝ် ခဲင် ကာင်၊ ဂေ ဒီ ခမ် အီ ဟဝ် မှေတ့် ဟာဝ် ဂေ။

19 ပါယ် တီ အုဝ် ဒီ ဒမ် မှာပ် ဒီ ဒူအီ ခဲင် မိူင် အဲဂိုပ်။ ဂေ ဒီ ဘော နပ်၊ အုဝ် မုး ဇဝ်ဖြာ။”

20 ဒေါ ဟဲ့ ဇမ် ဆီနမ် ဂိုဝ် ဒီ လှေး၊ မာဂျီန် ဒေါ ဂုဝ်၊ ဆီငဲ မ့ဘူ၊ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 21 “အိုယ် ဂွန် ဒူအီ၊ န့ ပီ အုဝ် ဟဲ့ ဟွတ့် ကာဘက် ဒဲ ခုန်ဒီခမ် မိူင် အဲဂိုပ်။ န့ ယီ တူ ဝီ မိုဝ်း အာဆေ အီ ဒိုဝ်း ဒူန့်၊ ကာဘန် ဒွါ ဒီ အန်။ န့ မိူဝ် တူ မိုဝ်း အာဆေ အီ ဒိုဝ်း ဆီနမ်၊ ဝီ အိုပ် ဒွါ ဒီ အန်၊ တဲး န့ စေဝ် ကဲန်၊ တဲး န့ ဝီ မိုဝ်း ဟဲန့် မိုဝ်း ပ့လူမ်၊ တဲး အန် ဝီ ပွိုန် ဒီ ဂူင့် မာပွါ့ လာင်။ 22 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ အုဝ် ဟဲ့ ဘဲန် ရန်ဆူ ခုန်ဒီခမ် အီ အိုပ် မိူင် အဲဂိုပ်။ အုဝ် ဒီ ဘော ကာဘက် ဒဲ အန် ဘော အာ ဘ့လာက်၊ ဘော အီ ညှမ် ကာဘက် ဘော အီ ဟဲ့ ဟွတ့် ကာဘက် တွိုန်၊ တဲး မာပွါ့ လာင် ကော လုတ် စုဝ်း ဒီ ဒဲ အန်။ 23 အုဝ် ဒီ တဲး ဒူအီ ခဲင် မိူင် အဲဂိုပ် ကာယဝ်း ဒဲင် ကာဒါယ် နီ၊ တဲး ဂေ ကွယ် ဒဲင် ကာဒါယ် မိူင် ဒွန် မိူင်။ 24 ပန် တီ အုဝ် ဒီ ဝီ တဲး ခုန်ဒီခမ် အီ အိုပ် မိူင် ဘာဘဲ ဝီ မိုဝ်း ပ့လူမ် မိုဝ်း ဟဲန့်၊ တဲး န့ ပီ အုဝ် အာပ် ဒွါ မာပွါ့ လာင် အုဝ် ဒီ အန်။ အီ မုး ခုန်ဒီခမ် မိူင် အဲဂိုပ်၊ အုဝ် ဒီ ဘူင် တဲး န့ ပီ အုဝ် ကာဘက် ဒဲ အန်။ အန် ဒီ ဘော ယာမ် ဒတ် နှဲန် ဒူအီ အီ ဟဲ့ ရိန် ဒီ ယမ်။ 25 န့ ဒီ မှာန် အာခါခ်ု။ အုဝ် ဒီ ဘူင် တဲး ဒဲ ခုန်ဒီခမ် အီ အိုပ် မိူင် အဲဂိုပ် ဒီလှး၊ ဝီ တဲး ဒဲ ခုန်ဒီခမ် အီ အိုပ် မိူင် ဘာဘဲ ဝီ မိုဝ်း ပ့လူမ်။ ပန် ဒီ အာပ် ဒွါ အုဝ် မာပွါ့ လာင် အုဝ် ဒီ ခုန်ဒီခမ် အီ အိုပ် မိူင် ဘာဘဲ၊ အန် ဒီ ဘော ဆီကူ ဒီ ဒူအီ မိူင် အဲဂိုပ်။ ပါယ် တီ ဒူအီ ဒွန် အီ ဒီ ဘော နပ်၊ အုဝ် မုး ဇဝ်ဖြာ။ 26 အုဝ် ဒီ တဲး ဒူအီ ခဲင် မိူင် အဲဂိုပ် ကွယ် ကာယဝ်း ဒူပ် ဒူအီ အာမျုဝ် ဟဝ် ဒဲင် ကာဒါယ် နီ။ ပန် အန် တီ ဂေ ဒီ ဘော နပ်၊ အုဝ် မုး ဇဝ်ဖြာ။”