1 ဝါယ် ဟဲ့ မှေတ့် ဟာဝ် အီ ဟဝ် ဒီ ယေ ဘော ပွိုန် ဂိုဝ် ဆီနမ်၊ ဒေါ မုး မာဂျီန် ဂိုဝ်၊ ဆီငဲ ဂိုဝ် ဒီ ဟာအာ၊ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ အီ ဒမ် မှာပ် ဒီ ခုန်ဒီခမ် ခဲင် မိူင် အဲဂိုပ် ဘော ဒီ ဂေ ဒူအီ ဘောကာဂ့လျီတ် အီ ကွယ် ခဲင် မိူင် အဲဂိုပ်။

3 တဲး မဲ ကာလာင် ဒီ ခုန်ဒီခမ် တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ “အိုယ် မဲ ခုန်ဒီခမ် မဲ ပီ မာကြာယ် တာင် အီ ကွယ် ခဲင် ဘ့လဲင် အိုမ်၊” အုဝ် ဟဲ့ ဘဲန် ရန်ဆူ မဲ။ မဲ ဟဲ့ တဝ်း၊ ဘ့လဲင် အိုမ် နီလာ နီ၊ အုဝ် ဟဲ့ ဘူင် တဲး ဘဲန် ဒူင် ကွယ် အုဝ်။’

4 အုဝ် ဒီ ဒိုဝ်း မ့ပဲတ် ဝဲ့ ကုင်ကာပ် မဲ၊ တဲး ဘော မာဂါ အီ ကွယ် ခဲင် ဘ့လဲင် အိုမ် တီ ဒိုက် ဒီ ဂဲတ် မဲ။ အုဝ် ဒီ ဘော လာက် လေး မဲ ခဲင် ဘ့လဲင် အိုမ် တီ၊ တဲး ဘော မာဂါ အီ ဟဲ့ ဒိုက် ဒီ ဂဲတ် မဲ တီ လေး ဒူပ်။

5 အုဝ် ဒီ ဒိုဝ်း မဲ ဘော မာဂါ ဂေ တီ ဘောကာဂ့လျီတ်၊ ဝီ ဟာဝ် ဘ့လေး ခဲင် ပြဲ ကာဟဝ်း။ မဲ ဒီ ဘော ကေး ဒဲင် ကာဒါယ်၊ ကွဲ့ တဲး န့ မိုဝ်း အီ ဒိပ် ဒုဝ် မဲ၊ အုဝ် ဒီ ဝီ တဲး န့ ဘဲန် ပီ ဒီ ဟူမ် မာဆိမ် ဂေ မာဒုဝ် ပြဲ ဟာယ်။

6 ပါယ် တီ ခဲ့ ကွယ် ဒူအီ ခဲင် မိူင် အဲဂိုပ်၊ ဂေ ဘောကာဂ့လျီတ် ဒီ ဘော နပ် လွင် အုဝ် မုး ဇဝ်ဖြာ။ ဂေ ဒူအီ အီဆာရေလ ပီ ဘော ဟဲ့ ဒွိုမ် ဘိုင် ဘေ ဒူအီ ခဲင် မိူင် အဲဂိုပ် မိူဝ်၊ ဘေ ယီ ပီ န့ကြွုန် ဂ့လူင့် အီ တူ ပွိုန် ဘိုင် ဆီချာ။ 7 ဒေါ ဘိုင် ဂေ ဒီ မဲ မဲ ဘော ကာဘက်၊ ဘူင် တဲး ယ ဂေ ကော လာယ် လုတ်၊ တဲး ညွယ် ဂေ ကော ကာလေတ့်။

8 ကူပ် ဟဲ့ ဘူင် မဲ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ အုဝ် ဒီ စ်ု ဂေ အီ ဂူင့် မာပွါ့ လာင်၊ တဲး ဂေ တး ကာဂုဝ်း ဒီ မဲ။ ဂေ ဒီ ဘော ငဝ်း ယမ် ဒူအီ ခဲင် မိူင် မဲ ဘော ဒုဝ် ဆတ်ဒါဝါ ပီ ဟျီင် မဲ ဘောကာဂ့လျီတ်။ 9 မိူင် အဲဂိုပ် ဒီ ဘော ဘဲန် မိူင် ရာမ်။ ပန် တီ ဘေ ဒီ ဘော နပ်၊ အုဝ် မုး ဇဝ်ဖြာ။ ကူပ် ဟဲ့ တဝ်း မဲ၊ ‘ဘ့လဲင် အိုမ် နီလာ နီ၊ အုဝ် ဟဲ့ ဘူင် တဲး ဘဲန် ကြုဝ် အုဝ်၊’ 10 အုဝ် ဟဲ့ ဘဲန် ရန်ဆူ မဲ၊ တဲး ဘော မဲ ဘော ဘ့လဲင် အိုမ် ခဲင် မိူင် မဲ ဇမ် ဒုက်။ အုဝ် ဒီ ဘူင် တဲး မိူင် အဲဂိုပ် ကာပျာတ့် လိုဝ် တူတ့်၊ တဲး န့ ကော ရာမ်၊ စုး ဒီ မိူင် မိက်ဒူန် အီ ကွယ် ဘ့လာက် နာ ကွာ၊ တဲး န့ ကော ဝီ ဇမ် ဒီ မိူင် ဆူနိမ် ဘ့လာက် နာ တေတ့်။ ဘော ဒီ ဆိူတ် ကာအုန် ကာဒါယ် မိူင် ကူဆာ 11 ဒူပ် န့တေန့် ဘော ဒူအီ ဘော ဒုဝ် ဆတ်ဒါဝါ အာဝ် ဟူ မိုဝ်း အီ ဟာဝ်။ န့ မိူဝ် တူ မိုဝ်း အီ ကွယ် ဒူင် တီ အာဒါ ဖွုန် ဂိုဝ် ဆီနမ်။ 12 အုဝ် ဒီ ဘူင် တဲး မိူင် အဲဂိုပ် ကော ယေန် ကော ငွင့် လွှိုမ် ဒွန် မိူင် အီ ကာပျာတ့် လိုဝ် ဒဲင် ကာဒါယ် နီ။ အာဒါ ဖွုန် ဂိုဝ် ဆီနမ် မိူင် အဲဂိုပ် ဒီ ကွယ် ကာပျာတ့် လိုဝ်။ အုဝ် ဒီ ဘော တဲး ဂေ ဒူအီ ခဲင် မိူင် အဲဂိုပ် ကွယ် ကာယဝ်း ကာတဲ ဒူအီ အာမျုဝ် ဟဝ် ဘော ကွယ် ကာယဝ်း ဘဲန် ပ့လုဝ့် ဘဲန် ပ့လုဝ့်။’”

13 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဆေ ဟီ နုဝ့် ဖွုန် ဂိုဝ် ဆီနမ် တီ၊ အုဝ် ဒီ ဝီ ဒိုဝ်း တး ဂေ ဒူအီ အဲဂိုပ် ဒူင် ဟဲ့ ကွယ် ကာယဝ်း ဂေ ကာတဲ ဒူအီ ဒွန် မျုဝ်။ 14 အုဝ် ဒီ တဲး ဂေ ဝီ တး ကွယ် နာ တေတ့် မိူင် အဲဂိုပ် အီ မုး မိူင် ဘြိမ် ဂေ အီ ဟဲ့ ဒွိုမ် ကာပျာတ့် လိုဝ်။ ဒူင် ကွယ် ဂေ တီ၊ ဂေ ယီ တူ မိုဝ်း အာဖုင် ဒင်ခုဝ်၊ အာဝ် မိုဝ်း ပ့လူမ် ဂေ ဟဲန့် ပီ ဘြိမ်။ 15 မာန် မိူင် ဂေ တီ၊ န့ ဒီ ဘော ဘဲန် မာန် မိူင် အီ ဟဲ့ ချဝ့် လွှိုမ် မိူင် အီ ဟဝ်။ ဂေ မိူဝ် အာဝ် ဟူ ပွိုန် ပီဖုင် ဂေ ဒီ အီ ဟဝ် ဒေါ မှဝ်။ အုဝ် ဒီ ဘူင် တဲး ဂေ ဘဲန် ဒူအီ အီ တူ မိုဝ်း ဒီခုဝ် မာဆေ၊ တူ တဲး ဂေ ပွိုန် ဒီ အိုပ် အီ ဟဝ် ဒေါ မှဝ်။ 16 ဝါယ် အန် တီ ဂေ ဒူအီ အီဆာရေလ အာဝ် ဟူ လုဝ် ဘိုင် ဂေ ဒေါ မှဝ်။ ဂေ ဒူအီ အီဆာရေလ ဒီ ဘော ဝီ လှုဝ်း မှာပ် ဂေ ဒေါ ကာလိုပ် ဂေ ဒီ ဘိုင် ဒူအီ ခဲင် မိူင် အဲဂိုပ် တီ။ ပါယ် တီ ဂေ ဒူအီ အီဆာရေလ ဒီ ဘော နပ် လွင် မုး အုဝ် ဇဝ်ဖြာ အီ အိုပ် တူတ့် ဒွန် မျုဝ်။”

17 ဝါယ် ဟဲ့ မှေတ့် ဟာဝ် အီ ဟဝ် ဒီ ယေ အာဒါ အာ ဂိုဝ် ဒီ ဘူ ဆီနမ်၊ ဒေါ မုး မာဂျီန် ဒေါ ဂုဝ်၊ ဆီငဲ ဒေါ ဂုဝ်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 18 “အိုယ် ဂွန် ဒူအီ၊ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ တွိုန်၊ အန် ဟဲ့ ခါနှာပ် ဒါ ဆိုက် အန်၊ တဲး ဂေ ကာဂုဝ်း ဒီ မိူင် ထူရုဝ်။ န့ ဘော တဲး ဂိန့် ဂေ ဒွန် အီ ကော ဂ့လ တူတ့်၊ တဲး ဘော ယ ဂေ န့လျီ့ ဒွန် အီ။ မာလဲ၊ ဘော ခုန်ဒီခမ် ဘော ဂေ ဒါ ဆိုက် အန် ယီ တူ ပွိုန် ရုး မာဆေ။ 19 ကူပ် န့ ပါယ် တီ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ အုဝ် ဒီ ဝီ ဒိုဝ်း မိူင် အဲဂိုပ်၊ ဝီ အာပ် ဒွါ ဒီ ခုန်ဒီခမ် အာနေဘူခတ်နေစာ။ အန် မိူဝ် ဒီ ဖာတ် ဒိုဝ်း ဟာဝ် ခဲ့ ကွယ် ကြုဝ်ကြာမ် ခဲင် မိူင် အဲဂိုပ်၊ တဲး အန် ဘော ဝီ ကာဆာင် ဒီ ဂေ ဒါ ဆိုက် အန်၊ တဲး န့ ဘဲန် ရုး ကာဂုဝ်း ဂေ။ 20 ခုဝ်၊ ဒါ ဆိုက် အန် ဟဲ့ ဘူင် ဂါန် အုဝ်။ အုဝ် ဝီ ဒိုဝ်း မိူင် အဲဂိုပ်၊ တဲး န့ ဘဲန် အာဒါ ဘူင် ဂေ ဂါန် အုဝ် တီ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

21 ဆီငဲ တီ၊ အုဝ် ဒီ ဝီ ဒွါ ပ့လူမ် ဂေ ဟဲန့် ဒီ ဒူအီ အီဆာရေလ။ အုဝ် ဒီ ဘော စ်ု မဲ အာအေဆေခေန်၊ တဲး မဲ ကာလာင် ဒီ ဂေ လွင် အုဝ်၊ တဲး ဂေ ဘောကာဂ့လျီတ် နပ်၊ အုဝ် မုး ဇဝ်ဖြာ။”