1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဒီ ခုန်ဒီခမ် အီ အိုပ် မိူင် ထူရုဝ် တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ “မဲ ဟဲ့ မိုဝ်း နဝ်း ပီခိုက်။ မဲ ဘော ပီဖုင် ကာဆဝ် ဒုဝ် ဘြိမ် မဲ။ မဲ မိူဝ် ဟဲ့ တဝ်း၊ အုဝ် မုး ဇဝ်ဖြာ။ အုဝ် ဟဲ့ တုတ့် ဒဲင် မာလာင် အီ မုး မာလာင် ဇဝ်ဖြာ အီ ကွယ် ကာတဲ အိုမ် နမ်မုက်ဆာရာ။” မဲ ပီ ဘော ဆီ ဘဲန် ဇဝ်ဖြာ မိူဝ်၊ ဒုဝ် မဲ ယီ ဆီ မုး ဒူအီ။

3 မဲ ဘော ထာင်၊ မဲ ဟဲ့ မိုဝ်း အာငျာန် လွှိုမ် အာဒါနေလ။ မဲ ထာင်၊ ပီ ချြီင် အုန်၊ ပီ တူ တဲး အီ ဟဝ် မဲ နပ်၊ အာဝ် မိုဝ်း ခေါ အူ မျုဝ်။

4 ပါယ် တီ အာငျာန် ဘော ပဲ့ ဟဲ့ နပ် မဲ ဘဲန် မျုဝ် ဘဲန် မျုဝ် ဘော တဲး မဲ မိုဝ်း ကြုဝ်ကြာမ် ကိူန်၊ တဲး မဲ ခြမ်၊ မိုဝ်း ဘော ရွိုန် ဘော ခြိဝ်။

5 မဲ ဟဲ့ ကျ ကာဆဝ် ဒေါ ကာစိုဝ်း ကာယွင့် မဲ၊ တဲး မဲ ခြမ် ကာဆဝ်။ မဲ ဘော နပ် ဒီ ပီခိုက် ဒီ ပီဖုင် မဲ ကူပ် ကြုဝ်ကြာမ် မဲ တီ။

6 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဝီ ဒမ် တဝ်း၊ ကူပ် ဟဲ့ ထာင် မဲ၊ မဲ ဟဲ့ မိုဝ်း အာငျာန် ပီ ဇဝ်ဖြာ၊

7 အုဝ် ဒီ စ်ု ဂေ ဒူအီ အာမျုဝ် ဟဝ် အီ ဟာယ် ကာဆဝ် လွှိုမ် အီ ဟဝ်၊ တဲး ဂေ တး ကာဂုဝ်း ဒီ မဲ။ ဂေ ဒီ ဘော တာ မာပွါ့ လာင် ဂေ၊ ဝီ ပျာတ့် ဝဲန် အာဖုင် ဂေ ဆာရေ မဲ ဘော ဒွန် မျုဝ် အီ ဟဲ့ စှိတ် ကာဆဝ်။

8 ဂေ ဒီ ဘော ငဝ်း ယမ် မဲ၊ တဲး န့ မွှိုမ် ယုဝ် ကာဆဝ် ဒေါ ကွယ် မဲ ခဲင် အိုမ် နမ်မုက်ဆာရာ။

9 ပန် ဒီ တး ငဝ်း ယမ် ဂေ ဒီ မဲ၊ မဲ ဆီ ဒီ တဝ်း ဒီ ဂေ၊ အုဝ် မုး ဇဝ်ဖြာ။း ပန် ဒီ တး ငဝ်း ယမ် ဂေ ဒီ မဲ တီ၊ မဲ ဒီ ဝီ နပ်၊ မဲ မုး ခဲ့ ဒူအီ အီ တူ မိုဝ်း ဒီခုဝ်။ မဲ တူ မုး ဇဝ်ဖြာ။

10 မဲ ဒီ ဘော ယမ် ပီ ဒူအီ ဟာယ် အီ တူ ပွိုန် ကွယ် ကာတဲ ဂေ ဒူအီ အာမျုဝ် အန်။ အုဝ် ဟဲ့ ဟွတ့် ကာလာင် အုန် ခဲ့ တီ။” ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန်။’”

11 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ မ့ပွါ။ အန် တဝ်း၊ 12 “အိုယ် ဂွန် ဒူအီ၊ တဲး မဲ မိုဝ်း နဝ်း က့လိုဝ် ကူပ် အီ တူ မွှိုမ် ပီ ဒီ ခမ် ခုန်ဒီခမ် အီ အိုပ် မိူင် ထူရုဝ် တွိုန်။ တဲး မဲ ကာလာင် ဒီ အန် တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဒေါ မွိုန် မဲ ဟဲ့ ဘျ ဒီ အီ လွင် အီ ဟဲ့ ဇေ့ဇုင်၊ ဟဲ့ မွှိုမ် ဘော မိုဝ်း အာငျာန်။ အာရိုပ် မဲ မိူဝ် ဟဲ့ စှိတ် ဟဲ့ ဆီချာ။

13 မဲ မိူဝ် ဟဲ့ ဒွိုမ် ကွယ် ခဲင် ကာပိုမ် အေဒေန် အီ မုး ကာပိုမ် ပဲ့ ဟဲ့ အုန် ဇဝ်ဖြာ။ မဲ မိူဝ် ဟဲ့ ဒွိုမ် တာ ဆဲန့် ဒွန် မျုဝ်။ န့ ဘော မုး ဆဲန့် ရေန့်၊ ဆဲန့် ဒေန့် ဘ့လာင်၊ ဆဲန့် ငျီန် ဒေန့် ဒီပုန်၊ ဆဲန့် ငျီန် ဘ့လာင်၊ ဆဲန့် ဝွင့် လုယ်၊ ဆဲန့် ငျီန် ဒေန့် ဒီပုန် ပေါ အူ မျုဝ်၊ ဆဲန့် ငျီန် ဘ့လေန့်၊ ဆဲန့် ငျီန် ခွင် ဘော ဆဲန့် ငျီန် ဝွင့်။ ကာင် ဆဲန့် ဂေ တီ ဘော မုး ခြိဝ်။ ဂေ ဘော ဘူင် အုန် ဇိုဝ် တီ ဒွန် မျုဝ် ဆိန့် ဒေါ ကာစုး ဒီ ဖာန် ဘ့လေး ဇဝ်ဖြာ ဒီ မဲ။

14 အုဝ် ဟဲ့ ဖဝ်း နာမန် ဒီ မဲ၊ တဲး မဲ ပီ အာမူ အာမာတ် ဇဝ်ဖြာ အီ စိူဝ် ခေရုပ်၊ တဲး အန် ဘ်ု အာဆာက် မဲ။ မဲ မိူဝ် ဟဲ့ ကွယ် ဒီ နွန် အုဝ် အီ ဆီငါ ဘွတ်။ မဲ မိူဝ် ဟာဝ် ဝိဝ် ဟာဝ် ဝေန့် ဒဲင် မာဝ် အီ မိုဝ်း ငဝ်။

15 ပီ ဘူင် မဲ ဟဲ့ ဟွတ့် ဇေ့ဇုင်။ စုး ဆိန့် ဆီငဲ ဒေါ ဖာန် ဘ့လေး အုဝ် ဒီ မဲ ကော ဝီ ဇမ် ဆီငဲ ဝီ ဘူင် မဲ နာ တူ မွှိုမ် တွိုန်၊ အာဝ် မိုဝ်း အာဆေ ပွိုန် ကာလာင် နာ တူ မွှိုမ် လွင် မဲ။

16 ကူပ် ဟာဝ် မဲ ဒွန် နာ ဒွန် ပ့လုဝ့်၊ ကာစိုဝ်း ကာယွင့် ကြုဝ်ကြာမ်၊ မဲ တဲး နဝ်း မဲ ကြဲ ဒီ မိူက် ကာဆဝ် ဘော ဘူင် မှာပ် ကိူန်။ ကူပ် ဟဲ့ ဘူင် မဲ ပါယ် တီ အုဝ် ဟဲ့ တဲး မဲ စှိုမ် ဆာရေ ဘော ဟုဝ် လေး မဲ ဒီ နွန် အုဝ် အီ ဆီငါ ဘွတ်။ အိုယ် မဲ အာမူ အာမာတ် ဇဝ်ဖြာ၊ အုဝ် ဒီ ဟုဝ် လေး မဲ ဘော ဒီ မာဝ် အီ ဟဲ့ မိုဝ်း ငဝ် တွိုန်။

17 မဲ ဟဲ့ ပီဖုင် မဲ ကူပ် ဟဲ့ စှိတ် ကာဆဝ် အာရိုပ် မဲ ဘော အာဖုင် ဒင်ခုဝ် မဲ ဟဲ့ တဲး အာငျာန် ဘွတ် မဲ ဝီ ဘဲန် အီ ရိုဝ်။ အုဝ် မိူဝ် ဒီ ဘျွာ စုဝ်း မဲ၊ တဲး မဲ ကော ဇမ် ဒဲင် ကာဒါယ်။ တဲး ခုန်ဒီခမ် အီ ဟဝ် ယိုဝ် လွင် အန် တီ ဘော အာမ် ကာဆဝ်။

18 ကူပ် ဟဲ့ ပီလွှက့် မဲ ဒီ အီ ဟဝ် ဒေါ ကာစိုဝ်း ကာယွင့် မဲ ကြုဝ်ကြာမ်၊ န့ ဟဲ့ တဲး ဒူင် ဆီငါ ဘွတ် မဲ ကာဒါတ့်။ ခုဝ်၊ အုဝ် ဟဲ့ တဲး ငဝ် လေး ခဲင် မိူင် မဲ၊ ဒုဝ့် ကာဆိုမ် တူတ့် မိူင် မဲ။ မဲ ဘော ဝီ ပီ ကာဝှါင် ဂေ ဘြဝ် ငဝ် အီ ဆီ ဂိတ် ဆီ ကွယ်၊ တဲး အီ ဟဝ် ဘောကာဂ့လျီတ် ပွိုန် ဒီ ယိုဝ်။

19 ဒူအီ ဒွန် ဇိုဝ် ဒွန် ခြိုဝ် အီ ဟဲ့ ဒွိုမ် နပ် မဲ၊ ဂေ ဒီ ကာစွာ ဘော ယုဝ် ဒေါ ယိုဝ် ဂေ ဒီ မဲ။ ခုဝ်၊ မဲ ဒီ ဇမ် ဒုက် တာင် ဘော ဟြာယ် တူတ့်၊ အာဝ် ဟူ ပွိုန် ဝီ ကာပ့လုး ဒေါ မှဝ်။’”

20 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 21 “တဲး မဲ ဟာဝ် ကာလာင် ဂြုဝ်း ဇဝ်ဖြာ အီ ဒမ် မှာပ် ဒီ ဂေ ဒူအီ ခဲင် မိူင် ဆီဒူန် တဝ်း၊ 22 ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အိုယ် ဘေ ဒူအီ အီ ကွယ် ခဲင် မိူင် ဆီဒူန်၊ အုဝ် ဟဲ့ ဝီ ဘဲန် ရန်ဆူ ဘေ။ ဂေ ဒူအီ ဟဝ် ဒီ ဘော ဝီ အိူပ် မျုက် အုဝ် ကူပ် ပဲ့ ဟဲ့ ဘူင် အုဝ် ဒီ ဘေ။ ဆေ အုဝ် ဆီ ဘျ ခဲ့ ဘွတ် အုဝ် ဘော ဒမ် မှာပ် ဒီ ဘေ၊ ဂေ ဒီ ဘော နပ်၊ အုဝ် မုး ဇဝ်ဖြာ။

23 အုဝ် ဒီ တဲး ဒူအီ ခဲင် မိူင် ဆီဒူန် မိုဝ်း ဆဝ် ရောဂါ။ အုဝ် ဒီ တဲး ရန်ဆူ တး ငဝ်း ဘေ၊ တဲး နှာမ် ကော လှဲ ဒူပ် န့တေန့် ဘေ။ ဂေ အီ ဟဝ် ဒီ တး ကာဂုဝ်း ဒီ ဘေ၊ တဲး ဒူအီ ခဲင် မိူင် ဘေ ဘော ကေး ယမ် တူတ့်။ ပါယ် တီ ဘေ ဒီ ဘော နပ်၊ အုဝ် မုး ဇဝ်ဖြာ။’”

24 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ဂေ ဒူအီ အာမျုဝ် ဟဝ် အီ ကွယ် ရူပ် ဂေ ဒူအီ အီဆာရေလ၊ ဒူအီ အီ ဟဲ့ ဒွိုမ် ခါနှာပ် ဂေ၊ ဂေ အာဝ် ဟူ ပွိုန် ပျာတ့် ဂေ ဒူအီ အီဆာရေလ။ ဂေ အာဝ် ဟူ ပွိုန် ဘူင် တဲး န့ ပီ အီ ဒိုဝ်း မာအာတ့် တး ဘ့လုး၊ တး ဆတ် ဂေ။ ပါယ် တီ ဂေ မိူဝ် ဒီ နပ်၊ အုဝ် မုး ဇဝ်ဖြာ အီ အိုပ် တူတ့် ဒွန် မျုဝ်။”

25 ဇဝ်ဖြာ ပီ ဝီ တဝ်း၊ “ဆေ အုဝ် ဒီ ဝီ ဒိုဝ်း တး ကာဇု ဂေ ဒူအီ အီဆာရေလ အီ ဟဲ့ ကွယ် ကာယဝ်း ဒူပ် ဒူအီ အာမျုဝ် ဟဝ် ဒွန် နာ ဒွန် ပ့လုဝ့်၊ အုဝ် ဒီ ဘျ ဒီ ဂေ လွင် မုး အုဝ် ဇဝ်ဖြာ ဘွတ် ဘော တဲး ဂေ ဒူအီ အာမျုဝ် ဟဝ် ပွိုန် ဒီ ယိုဝ်။ ဂေ ဒူအီ အီဆာရေလ ဒီ ဘော ကွယ် ခဲင် မိူင် ပဲ့ ဟဲ့ အာပ် ဒွါ အုဝ် ဒီ အာကူပ် အီ မုး ဒဲစေန့် အုဝ်။ 26 ဂေ ဒီ ဘော ပွိုန် ကွယ် ဒါခိုယ် ခဲင် မိူင် တီ။ ဂေ မိူဝ် ဒီ ဆမ် ကာင် ဘော ဆမ် ဟေ မာငုန် ဂေ။ ဒေါ ဒမ် အုဝ် မှာပ် ဒီ ဂေ ဒူအီ ဟဝ် အီ ကွယ် ကာတတ် ဂေ၊ ဂေ အီ မုး ဒူအီ အီဆာရေလ၊ ဂေ ဒီ ဘော ပွိုန် ဒီ ကွယ် ဒါခိုယ်၊ တူ ဇမ် ဒုက် မာဆေ။ ပါယ် တီ ဂေ ဒီ နပ်၊ အုဝ် မုး ဇဝ်ဖြာ အီ အိုပ် ဂေ။”