1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ တဝ်း မှုဝ် လွင် ဒူအီ ယမ် ခဲင် မိူင် ထူရုဝ် အီ ကွယ် ခူပ် အိုမ် နမ်မုက်ဆာရာ။” 3 ဂေ ဟဲ့ ဒွိုမ် ယွင့် ကြုဝ် ခူပ် အိုမ် နမ်မုက်ဆာရာ။ မဲ ကာလာင် ဒီ ဂေ ပါယ် နီ၊ “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘အိုယ် ဘေ ဒူအီ အီ ကွယ် ခဲင် မိူင် ထူရုဝ်၊ ဘေ ဟဲ့ ပီဖုင် ဘေ ခုဝ်၊ မိူင် ဘေ ဟဲ့ စှိတ် ကာဆဝ်။’

4 ကာအုန် ကာဒါယ် မိူင် ဟဲ့ ကွယ် ခဲင် အိုမ် နမ်မုက်ဆာရာ။ ဂေ အီ ဟဲ့ ဂုဝ် မိူင်၊ ဂေ ဟဲ့ တဲး န့ စှိတ်၊ တဲး န့ ဇေ့ဇုင်။

5 ဂေ ဟဲ့ ဒိုဝ်း ဟေ န့ကေ အီ ကွယ် ဒီ နွန် ဆေနီရာ။ ဂေ ဘော ဒိုဝ်း ဟေ အာရိတ် အီ ကွယ် ဒီ နွန် လေဘာနုန်၊ ဝီ ဘူင် ဘဲန် ရွင့်။

6 ဂေ ဒိုဝ်း ဟေ ထေရေပ် အီ ကွယ် ဒီ မိူင် ဘာဆန်၊ ဝီ ဘူင် ဘဲန် လ ရိုဝ် ဂေ။ ဂေ ဘော ဒိုဝ်း ဟေ န့ကေ အီ အုး ငှုန်၊ အီ ကွယ် ဒီ ဂုန် အိုမ် အီ စိူဝ် ခူဖြုဝ်၊ ဝီ ဘူင် ဘဲန် မ့ဘေ၀် ဒ၊ ဝီ ဟပ် ဘော ပ့လဲ့ မာဆာင်၊ တဲး န့ စှိတ်။

7 ခဲင် ရိုဝ် ဆင်ဖုဝ် ဘေ၊ န့ ဘော မုး ကာတမ် လုယ် အီ ဟဲ့ တး ခဲင် မိူင် အဲဂိုပ်။ ဂေ ဟဲ့ စိန့် ဟပ် ရာင် ဘုဝ်း။ ဘိက် တီ ဘော ဘဲန် အာလာမ် ဘေ။ ဘိက် အီ ဂွင့် ဆောဒါတ် ခဲင် ရိုဝ် ဆင်ဖုဝ် ဘေ ဟဲ့ မုး ဘိက် အီ ခွင် ဂါယ် ဘိက် အီ ငျီန် အီ တး ဒီ ဂုန် အိုမ် ဒူင် ကွယ် ဂေ ဒူအီ အာလီဆာ။

8 ဂေ ဒူအီ အီ ဝါယ် ရိုဝ် ဘေ မိူဝ် ဘော မုး ဒူအီ ခဲင် မိူင် ဆီဒူန် ဘော ဒူအီ ခဲင် မိူင် အာဝတ်။ ဒူအီ အီ ကွယ် ဒီ ဆီပူင့် ရိုဝ် ဘေ ဘော မုး ဒူအီ အီ ဟဲ့ ကျ၊ ဟဲ့ လှဲဝ် ဒီလူယ်။

9 ဒူအီ အီ နပ် ဒီ လိုဝ် ဟေ ဘော ဂေ အီ လှဲဝ် ဒီ ဘူင် ဘဲန် မျုဝ် ဘဲန် မျုဝ် အီ တး ဒီ မိူင် ကေပါလာ၊ ဂေ ဟဲ့ တး ကွယ် ခဲင် ရိုဝ် ဘေ ဘော ကာပါင် ကာဒဝ်၊ ကွဲ့ တဲး န့ လှုး။ ဒူအီ အီ ကွယ် ဒီ ဆီပူင့် ရိုဝ် အီ ဘတ် ရိုဝ် ဘေ၊ န့ ဘော မုး တူတ့် ဒူအီ အီ ဟဲ့ ဒွိုမ် ကာလုဝ်း အိုမ် နမ်မုက်ဆာရာ။ ဂေ ဘူင် တဲး ဂေ ပွိုန် ဒီ ကာစိုဝ်း ကာယွင့် ကြုဝ် ဒီ ဘေ။

10 ဒါ တာင် အီ အိုပ် ဒါ ဆိုက် ခဲင် မိူင် ဘီရာဆီ၊ မိူင် လူဒီ ဘော မိူင် ဖုတ် မိူဝ်၊ ဂေ ဟဲ့ ဘဲန် ဒါ ဆိုက် ဒူပ် ဘေ။ ဂေ ဟဲ့ ဒိုဝ်း မင် ဂွင့် ဘော မာဂိန့် ဟိန် ဂေ၊ ဝီ ဟွယ် အုန် ဒီ ဒူင် ကွယ် ဘေ၊ ဘူင် တဲး ဘေ မိုဝ်း ဆာရေ။

11 ‘ဂေ ဒါ ဆိုက် မိူင် အာဝတ် ဘော မိူင် ဟေလေတ် မိူဝ်၊ ဟဲ့ ဘ်ု ရဲင် မိူင် ဒူပ် ဘေ။ ဂေ ဒူအီ ခဲင် မိူင် ကာမာတ် မိူဝ် ဟဲ့ ဘဲန် အီ ဘ်ု ခဲင် ဟုဝ် စာ။ ဂေ ဘော ဒိုဝ်း မင် ဂွင့် မင် ရဲ ဂေ၊ ဝီ ဟွယ် အုန် ဒီ ရဲင် ဒူင် ကွယ် ဘေ၊ ဘူင် တဲး န့ စှိတ် တဲး န့ မွှိုမ် ယွတ်။

12 ဂေ ဒူအီ ခဲင် မိူင် ထာဆိတ် မိူဝ် ဟဲ့ တး ကာစိုဝ်း ကာယွင့် ကြုဝ် ဒူပ် ဘေ။ ဂေ ဘော ဒိုဝ်း တး ရွိုန်၊ ဟိန်၊ ဟိန် လုယ် ဘော မီစေတ့်၊ တး ကာရဝ်း ကြုဝ်ကြာမ် ဘေ။ ခုဝ်၊ ခဲင် မိူင် ဘေ၊ ဟဲ့ မိုဝ်း ကြုဝ် ဘဲန် မျုဝ် ဘဲန် မျုဝ်။

13 ဂေ ဒူအီ မိူင် ဂြိက်၊ မိူင် ထူဘာ ဘော မိူင် မဲဆိတ်၊ ဂေ မိူဝ် ဟဲ့ တး ကာစိုဝ်း ကာယွင့် ကြုဝ် ဒီ ဘေ။ ဂေ ဘော ဒိုဝ်း တး မှာယ် ဂေ ဘော ဘွင့် ဒေန့် ခဲင် မိူင် ဂေ၊ ဝီ ကာရဝ်း ကြုဝ် ဘေ။

14 ဂေ ဒူအီ ခဲင် မိူင် ဘေတောကာမာ၊ ဂေ မိူဝ် ဟဲ့ ဒိုဝ်း တး မင်ပြွင့်၊ ဒိုဝ်း တး မ့ပြွင့် ပီ ပဝ့် ဒါ ဆိုက် ဘော မာလုဝ်၊ ဝီ လာယ် ကာရဝ်း ကြုဝ် ဘေ။

15 ဂေ ဒူအီ အီ ကွယ် ဒဲင် ဂုန် အိုမ် အီ စိူဝ် အာမျုဝ် ရုဝ်ဒူ၊ ဂေ မိူဝ် ဟဲ့ တး ကာစိုဝ်း ကာယွင့် ဒီ ဘေ။ ဂေ ဒူအီ အီ ကွယ် ခဲင် မိူင် ဘဲန် မိူင် ဘဲန် မိူင်၊ အီ ကွယ် ခူပ် အိုမ် နမ်မုက်ဆာရာ မိူဝ်၊ ဂေ ဟဲ့ ကိူန် ကာဆဝ်၊ ဟဲ့ တး ကာစိုဝ်း ကာယွင့် ကြုဝ်ကြာမ် ဘေ ဒီ။ ဂေ ဘော ဒိုဝ်း တး ပ့လဲ့ မာဆာင် ဘော ဟေ ယင် ဝွင့်၊ ဝီ တး ကာရဝ်း ကြုဝ် ဘေ။

16 ဘော ဂေ ဒူအီ မိူင် အာရာမ် မိူဝ် ဟဲ့ တး စိုဝ်း ကြုဝ် ဘေ။ ခုဝ်၊ ဘေ ဟဲ့ မိုဝ်း ဘဲန် မျုဝ် ဘဲန် မျုဝ် အီ ဟဲ့ ကိူန် ကာဆဝ်။ ဂေ မိူဝ် ဝီ ဒိုဝ်း တး ဆဲန့် ငျီန် ခွင်၊ ဘိက် ခွင် ဘော ဘိက် အီ ဟဲ့ ဟပ် ရာင် ဘုဝ်း ဘော ဘိက် ကာတမ် လုယ် ဘော မာဝ် ဆဲန့် ဘုဝ်း အီ ကွယ် ခဲင် အိုမ် ဘော ဆဲန့် ရေန့်။ ဂေ ဝီ ဒိုဝ်း တး ကာရဝ်း ကြုဝ် ပီ ယွင့် ဘေ။

17 ဂေ ဒူအီ အာယူဒါ ဘော ဒူအီ အီဆာရေလ၊ ဂေ မိူဝ် ဝီ ဒိုဝ်း တး ခဝ်ချုင်၊ ငါမ် မာဖျီန်၊ နာမန် ဘော ဆီနမ် အုး ငှုန်၊ ဝီ ကာရဝ်း ကြုဝ် ပီ ယွင့် ဘေ။

18 ဂေ ဒူအီ ခဲင် မိူင် ဒါမာခူ မိူဝ်၊ ဂေ မုး ဒူအီ အီ စိုဝ်း ကြုဝ်ကြာမ် ဘေ ဘော ကြုဝ်ကြာမ် ပီ ဘူင် လေး ဘေ အီ ဟဲ့ ကိူန် ကာဆဝ်။ ဂေ ဘော ဝီ ဒိုဝ်း တး အိုမ် မာငုန် အီ တး ဒူင် စိူဝ် ဟေလာပူန် ဘော ဟိုက် မာဘူ အီ လုယ် အီ တး ဒူင် စိူဝ် ဇာဟာ။ ဂေ ဟဲ့ ဒိုဝ်း ကြုဝ် တီ၊ ဝီ တး ကာရဝ်း ကြုဝ် ပီ ယွင့် ဘေ။

19 ဂေ ဒူအီ ဂြိက် အီ ကွယ် ခဲင် မိူင် အူဆာန်၊ ဂေ ဟဲ့ ကာစိုဝ်း ကာယွင့် ကြုဝ်ကြာမ် ဒီ ဘေ။ ဂေ ဟဲ့ ဒိုဝ်း တး ဟိန် ပဲ့ ဟဲ့ လှုဝ် ဂေ အီ ဟဲ့ လိူမ် ဆီချာ၊ ဘော ဒဝ် ခီဒါ၊ ဘော ဒီမှာယ်၊ ဝီ တး ကာရဝ်း ကြုဝ်ကြာမ် ပီ ယွင့် ဘေ။

20 ဂေ ဒူအီ ခဲင် မိူင် ဒေဒါန်၊ ဂေ မိူဝ် ဒိုဝ်း တး ကွပ် မ့ပြွင့်၊ ကာရဝ်း ကြုဝ် ပီ ယွင့် ဘေ။

21 ဂေ ဒူအီ ခဲင် မိူင် အာရာပ် ဘော ဂေ ဂွန် ခုန်ဒီခမ် အီ အိုပ် မိူင် ကေတာ၊ ဂေ ဒိုဝ်း တး ဂွန် မာဘူ ဘော မာဘူ အာလူင့် ဘော မာပဲ၊ ဂေ ဝီ တး ကာစိုဝ်း ကာယွင့် ကြုဝ် ဒီ ဘေ။

22 ဂေ အီ ကာစိုဝ်း ကာယွင့် ခဲင် မိူင် ဆေဘာ ဘော ခဲင် မိူင် အာရမာ၊ ဂေ မိူဝ် ဒိုဝ်း တး ဆဲန့် ငျီန်၊ ခြိဝ်၊ ဘော အာမျုဝ် န့ကြိုဝ်း အုး ငှုန် အီ မွှိုမ် လွှိုမ် န့ကြိုဝ်း အုး ငှုန် အီ ဟဝ်၊ ဝီ တး ဒီ ကာလး ဘေ၊ ဝီ ကာရဝ်း ကြုဝ်ကြာမ် ပီ ယွင့် ဘေ။

23 ဂေ ဒူအီ ခဲင် မိူင် ဟာရာန်၊ မိူင် ကာနေ ဘော မိူင် အေဒေန် ဘော ဂေ ဒူအီ အီ ကာစိုဝ်း ကာယွင့် ခဲင် မိူင် ဆေဘာ၊ မိူင် အာဆူရီယာ ဘော မိူင် ခီလာမာတ်၊ ဂေ မိူဝ် ဟဲ့ တး ကာစိုဝ်း ကာယွင့် ကြုဝ် ဒီ ဘေ။ 24 ဂေ ဘော ဒိုဝ်း တး ခြိုင် တာ အီ ဘွတ် ကာဆဝ်။ န့ ဘော မုး ခြိုင် အီ ငျီန်၊ ခြိုင် အီ ဟဲ့ စိန့် ရာင် ဘုဝ်း ဘော ဟပ် မိုဝ်း ပဲ့ အီ ကာဇဝ်။ ဂေ မိူဝ် ဟဲ့ ဘူင် မ့ဘေ၀် အီ စှိတ် ကာဆဝ်။ ဂေ မိူဝ် ဝီ ဒိုဝ်း ဝန်၊ ပက် တဲး န့ ကော ဆီချာ။ ဟဲ့ ဟွတ့်၊ ဂေ ဟဲ့ ဝီ ယွင့် ကြုဝ် တီ ခဲင် ကာလး ဘေ။

25 ဂေ ရိုဝ် ဆင်ဖုဝ် အီ တး ခဲင် မိူင် ထာဆိတ် အီ ဟဲ့ တာင် ကာဆဝ်၊ ဂေ ဟဲ့ ဒါင် ကြုဝ်ကြာမ် ဘေ။ ပါယ် တီ ဘေ မိူဝ် ဟဲ့ ဘဲန် ဒူအီ ခြမ် ဘော ပွိုန် အာဖုင် ဒင်ခုဝ် တာင် ပီ ရိုဝ် ဆင်ဖုဝ် တာင် အီ ကွယ် ခဲင် အိုမ် နမ်မုက်ဆာရာ။

26 ဂေ ဒူအီ အီ ဝါယ် ရိုဝ် ဘေ၊ ဂေ မိူဝ် ဟဲ့ တိုယ် ဘေ လိုပ် ခဲင် အိုမ် နမ်မုက်ဆာရာ အီ ဟဲ့ လိုက် ကာဆဝ်။ န့ ယီ မိုဝ်း ခုန် အီ တး နာ လေး ဆီငဲ အီ တး ဘုတ် တဲး ရိုဝ် တာင် ဘေ ကာဘက် လိုဝ် တူတ့် ခဲင် အိုမ် တီ။

27 ခဲ့ ကွယ် ကြုဝ်ကြာမ် ဘော ခြိုင် တာ ဘေ ဘော ဂေ ဒူအီ အီ ဘတ် ရိုဝ် ဆင်ဖုဝ် ဘေ ဘော ဒူအီ အီ နပ် ဒီ မ့ပြာယ် ရိုဝ် ဆင်ဖုဝ် ဘေ ဘော ဂေ အီ မုး ဒူအီ ကာစိုဝ်း ကာယွင့် ကြုဝ် ဒီ ဘေ ဘော ဂေ ဒါ ဆိုက် ဘေ အီ ကွယ် ခဲင် ရိုဝ် ဆင်ဖုဝ်၊ ဂေ ဘောကာဂ့လျီတ် ဒီ ဘော စုဝ်း ဟြာယ် တူတ့် ခဲင် အိုမ် နမ်မုက်ဆာရာ ပန် ဒီ ကာဘက် လိုဝ် ရိုဝ် ဆင်ဖုဝ် ဘေ တီ။

28 ဂေ ဒူအီ အီ ဘတ် ရိုဝ် ဆင်ဖုဝ် ဘေ တီ၊ ဂေ ဒီ ဒတ် ရျီင် တာင် ကာဆဝ်၊ တဲး ကာဒါယ် ခူပ် အိုမ် ကော ဒီယုး ဒီယေန့်။

29 ခဲ့ ကွယ် ဂေ ဒူအီ အီ ပဝ့် ရိုဝ် ဆင်ဖုဝ် ပေါ အူ လှာင်၊ ဂေ ဒီ ဝဲန် ရိုဝ် ဂေ၊ ဝီ လေး တး ခဲင် အိုမ် တီ။ ဂေ ဒူအီ အီ ဘတ် ရိုဝ် အီ ကွယ် ဒီ ဆီပူင့် ရိုဝ် မိူဝ်၊ ဂေ ဒွန် အီ ဒီ လေး ဟာဝ်၊ တဲး ဂေ ဇမ် ဒီ ခူပ် အိုမ်။

30 ဂေ ဒီ ယာမ် တာင်၊ ဒတ် တာင် ကူပ် ဟဲ့ ယိုဝ် ဂေ ဒီ ဘေ တီ။ ဂေ ဒီ ဘော ဝီ ဒိုဝ်း ကာပုး၊ ဝီ ဘြတ် ဒဲင် ဂိန့် ဂေ ဘော ဝီ အိတ် ကာလွှယ် ခဲင် ကာဝှါင်။

31 ဂေ ဒီ ဘော ဂါ့ ဂ့လ ဂိန့် ဂေ ဘော စှိုပ် ဒီ တာ ခြိုင် စာန် ကူပ် ဟဲ့ ဇမ် ဘေ ဒုက်။ န့ ဒီ ဘော ဆွင့် ကာဆဝ် ဒီ နဝ်း၊ တဲး ဂေ ဘော က့လိုဝ် ဘော ငှုန်။

32 ဂေ ဒီ ဘော တဝ်း မှုဝ် အာဒါ ဘေ လွင် ဒူအီ ယမ်။ ဂေ ဒီ ဘော တဝ်း၊ ‘န့ တူ ဒွိုမ် မိုဝ်း မိူင် အီ ပီ မိူင် ထူရုဝ် အီ ဟဲ့ စေတ့် ဟြာယ် ခဲင် အိုမ်။

33 ဒေါ ဒိုဝ်း ဘေ ကြုဝ်ကြာမ် ဘော ခြိုင် တာ ဘေ၊ ကာလုဝ်း အိုမ် နမ်မုက်ဆာရာ၊ န့ ဘော တဲး ဒူအီ ကိူန် ကော ဖဲ ဒွန် အီ။ န့ ဘော တဲး ဂေ ခုန်ဒီခမ် ကိူန် ခြမ် ကူပ် ကြုဝ်ကြာမ် ဂေ ခြိုင် တာ ဘေ။

34 ဒေါ တီ နီ န့ ဟဲ့ ဝီ ဟွတ့် ကာဘက် လိုဝ် တူတ့် ခဲင် အိုမ် နမ်မုက်ဆာရာ။ ဘေ ယီ ဟဲ့ ဝီ စေတ့် ယမ် ဟြာယ် တူတ့် ခဲင် အိုမ် နမ်မုက်ဆာရာ အီ ဟဲ့ လိုက် ကာဆဝ်။ ကြုဝ်ကြာမ် ခြိုင် တာ ပီ ကာစိုဝ်း ကာယွင့် ဘေ ဘော ဂေ ဒူအီ အီ ဘူင် ဂါန် ဘေ ဘောကာဂ့လျီတ်၊ ဂေ ဟဲ့ ဟွတ့် လိုဝ် စှိုမ်၊ ယမ် ဟာဝ် ဒူပ် ဘေ။’

35 ဂေ ဒူအီ ဟဝ် အီ ကွယ် ခူပ် အိုမ် နမ်မုက်ဆာရာ တီ၊ ဂေ ဟဲ့ ကာစွာ ကူပ် ဘေ။ ခုန်ဒီခမ် ဂေ ဘဲန် ကာပိုန့် ဘော ဒီယုး ဒီယေန့် ကူပ် ယုဝ် ကာဆဝ် ဂေ။

36 ခဲ့ ကွယ် ဂေ ဒူအီ အီ ကာစိုဝ်း ကာယွင့် ကာတဲ ဂေ ဒူအီ အာမျုဝ် ဟဝ်၊ ဂေ ဒီ ဘော အေး ဘေ။ အီ မုး ဘေ၊ ဘေ ယီ ဟဲ့ ဟွတ့် စှိုမ် ဟြာယ် တူတ့်။ ဘေ ယီ ဟဲ့ ဟွတ့် စှိုမ် ဟြာယ် ဘောကာဂ့လျီတ်။ ခုဝ်၊ အာဆာက် ဘေ ဒီ တူတ့် တဲး န့ မွှိုမ် ယုဝ် ကာဆဝ်။ ဘေ မိူဝ် တူ ဝီ တး ဒေါ မှဝ်။’”