1 ဝါယ် ဟဲ့ ပွိုန် ဂိုဝ် ဒီ အူ ဆီနမ်၊ ဆီငဲ လှေး၊ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ ဂေ ဒူအီ ခဲင် မိူင် ထူရုဝ် ဟဲ့ ခူယ် ကာဆဝ်။ ခုဝ်၊ မိူင် ယေရူဆာလဲမ် ဟဲ့ ဇမ် ဒုက်။ ဂေ မိူဝ် ဟဲ့ တဝ်း၊ ‘မိူင် ယေရူဆာလဲမ် အီ ဟဲ့ ကာစိုဝ်း ကာယွင့် ဒီ ဒူအီ ဘဲန် မျုဝ် ဘဲန် မျုဝ် ဟဲ့ ဟွတ့် ကာပျာတ့် လိုဝ် တူတ့်။ ဂေ အာဝ် ဟူ ပွိုန် ကာခဲန့် ဒီ ယေ ဒေါ မှဝ်။ တဲး ယေ ပွိုန် ကွယ် ဒါခိုယ်။’ 3 ခုဝ် အန် တီ၊ ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ ‘အိုယ် ဘေ ဒူအီ မိူင် ထူရုဝ်၊ အုဝ် ဟဲ့ ဟွတ့် ဘဲန် ရန်ဆူ ဘေ။ ဂေ ဒူအီ ကိူန် ဒီ ဘော တး ကာဂုဝ်း ဒီ ဘေ။ ဂေ ဒီ ဘော ယဲတ့် တး ဒါ ဆိုက် ဂေ၊ တဲး န့ ပီ ဆီလွယ် အိုမ် နမ်မုက်ဆာရာ။ 4 ဂေ ဒီ ဘော ပျာတ့် ဝဲန် ရဲင် မိူင် ဘေ၊ ဂ်ု ကေး ဘော ဟုဝ် စာ အီ ကွယ် ခဲင် မိူင် ဘေ ဒွန် ပ့လုဝ့်။ အုဝ် ဒီ ဂ့ဝါ ဝဲန် တူတ့် အီ ကာပျာတ့် လိုဝ် တီ၊ တဲး န့ ဝီ ဂိတ် မီ မာဝ် အီ ဟဲ့ ဂ့လျီတ် မာလျီ့။ 5 ဂေ ဒူအီ မှေတ့် ဂါ၊ ဂေ ဒီ ဘော ဝီ ရာယ် န့ရပ် ဂေ ဒဲင် မာဝ် အီ ကွယ် ကာတဲ အိုမ် နမ်မုက်ဆာရာ တီ။ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။’ ဂေ ဒူအီ ဒွန် မျုဝ် ဒီ တး ပျာတ့် မိူင် ထူရုဝ် တီ။ 6 ဂေ ဒီ ဘော ဒိုဝ်း မာပွါ့ လာင် ဂေ၊ ဒဲပ် ယမ် ဒူအီ အီ ကွယ် ခဲင် ရဝ် ဘေ ဘော ဂေ အီ ကွယ် ခူပ် အိုမ် နမ်မုက်ဆာရာ။ ပန် အန် တီ ဒူအီ မိူင် ထူရုဝ် ဒီ ဘော နပ် လွင် မုး အုဝ် ဇဝ်ဖြာ။”

7 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ဒိုဝ်း ခုန်ဒီခမ် အီ တာင် လွှိုမ် ဒွန် ကာဒင် အီ မုး ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ တွိုန်၊ တဲး အန် တး ကာဂုဝ်း ဒီ ဘေ ဒူအီ ခဲင် မိူင် ထူရုဝ်။ ခုန်ဒီခမ် တီ ဒီ တး မိူင် နာ ကွာ၊ လူင် ဒူပ် ဂေ ဒါ ဆိုက် အန် အီ ဟဲ့ ကိူန် ကာဆဝ်။ ဂေ ဘော ပဝ့် ဘော မင်ပြွင့် လက်လဝ်။ န့ ဘော ဘာ ဒါ ဆိုက် အီ ပဝ့် လက်လဝ် ကိူန်။ 8 ဒူအီ အီ ကွယ် ခဲင် ရဝ် ခူပ် အိုမ် နမ်မုက်ဆာရာ၊ ဂေ ဒီ ဘော ယမ် ဒေါ ကာဂုဝ်း ဂေ ဒီ ဒါ ဆိုက်။ ရန်ဆူ ဂေ ဒီ ဘော ဂိုဝ်း ကာဒါယ်၊ ဘူင် တဲး န့ ဘဲန် ဘ့လဝ့် န့တဲင်၊ ဝီ ဇမ် ဒီ ရဲင် မိူင် ဘော ဒိုဝ်း မင် ဂွင့် ဂေ၊ ဝီ ကာဂုဝ်း ဒီ ဘေ ဒူအီ ထူရုဝ် တီ။ 9 ခုန်ဒီခမ် ခဲင် မိူင် ဘာဘဲ ဒီ ဒိုဝ်း န့ဂူင့် ဟေ၊ ဒုး ရဲင် မိူင် ဘေ ဘော ဂ်ု ကေး ဟုဝ် စာ ဘေ တာ ခြိုင် ကာဂုဝ်း ဂေ။ 10 ခုန်ဒီခမ် ဟဲ့ ဒိုဝ်း ဟာဝ် မင်ပြွင့် အန်၊ တဲး ကာဟိုင် ကာပုး ပ့လိုက် တူတ့် ဘေ။ ဂြန့် မင်ပြွင့် ပီ ပဝ့် ဂေ ဒါ ဆိုက် ဘော ဂြန့် မင်ပြွင့် အီ လာက် ခြိုင် ကာဂုဝ်း ဂေ ဘော ဂြန့် လက်လဝ် ပီ ပဝ့် ဂေ ဒါ ဆိုက်၊ န့ ဒီ ဘော တာင် ကာဆဝ်။ န့ ဒီ တဲး ရဲင် မိူင် ဘေ ဒီယုး ဒီယေန့် ဒေါ တး လိုပ် ဂေ ဒီ ဘာင် မာလုဝ်း အီ ဟဲ့ ဟွတ့် ကာပျာတ့် လိုဝ်။ 11 ပ့လဝ် မင်ပြွင့် တီ၊ ဂေ ဒီ ဟာဝ် ဒူပ် န့တေန့်၊ တဲး န့ ကာပျာတ့် လိုဝ် တူတ့်။ ခုန်ဒီခမ် မိူဝ် ငဝ်း ဒူအီ ဘေ၊ တာ မာပွါ့ လာင် အန် ဘော ပျာတ့် ရွင့် အီ မန် ဆီချာ အီ ကွယ် ခဲင် မိူင် ဘေ။ 12 ရန်ဆူ ဘေ တီ၊ ဂေ ဒီ ဘော ဖာတ် ဒိုဝ်း ဟာဝ် ကြုဝ်ကြာမ် ဘေ၊ ဒိုဝ်း ဟာဝ် ဘော ခါဂုန် ဘေ။ ဂေ ဒီ ပျာတ့် ဝဲန် မိူင် ဘေ၊ ပျာတ့် ဝဲန် ဘော ကာင် ဘေ အီ ဟဲ့ စှိတ် ဆီချာ။ အီ ကာပျာတ့် ဒွန် မျုဝ် ဂေ ဒီ ဒိုဝ်း ဝီ ဝဲန် ခဲင် အိုမ် နမ်မုက်ဆာရာ။ 13 ဟမ် မှုဝ် ဘော ဒိင် အာဝ် ဟူ ပွိုန် ယိုဝ်။ 14 အုဝ် ဒီ ဘ့လေး ဘေ၊ တဲး ဘေ ပီ မာဝ် အီ ဟဲ့ ဂ့လျီတ် မာလျီ့၊ တဲး န့ ဘဲန် ဒူင် ပီ ရာယ် ဂေ ဒူအီ မှေတ့် ဂါ န့ရပ် ဂေ။ ဝါယ် အန် တီ အာဝ် မိုဝ်း အာဆေ အီ ပွိုန် ဝီ ဒဲ ဝီ ဘူင် မိူင် ဘေ တီ။ အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဟဲ့ ကာလာင် အုန် ပါယ် တီ။”

15 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် ဒီ ဒူအီ ခဲင် မိူင် ထူရုဝ် ပေါ န့ ပွါ။ အန် တဝ်း၊ “ဆီငဲ ဒီ ခမ် ဘေ ဒုက် တာင် တီ၊ ဂေ ဒူအီ အီ ကွယ် ခူပ် အိုမ် နမ်မုက်ဆာရာ ဂေ ဒီ ဘော ဒီယုး ဒီယေန့် ကူပ် ဟဲ့ ငှုန် ဂေ ဒူအီ ဘေ အီ ဟဲ့ ဒိမ် ဟဲ့ ပါ့ ဘော ယမ်။ 16 ဂေ ခုန်ဒီခမ် အီ ကွယ် ခဲင် မိူင် ခူပ် အိုမ် နမ်မုက်ဆာရာ တီ၊ ဂေ ဒီ ဘော လူင် ဒဲင် မာလာင် ဂေ။ ဂေ ဒီ ဘုတ့် လေး ဆီတုဝ် တုန် ပီ တာ ဂေ၊ ဘုတ့် လေး ဘော ခြိုင် ပီ တာ ဂေ အီ ဟဲ့ စိန့် ဟပ် ရာင် ဘုဝ်း။ ဂေ ဒီ ဘော ယုဝ် ဒီယုး ဒီယေန့်၊ ဝီ တုတ့် ဒဲင် ကာဒါယ်။ ဂေ ဒီ ဘော ယုဝ် ဒီယုး ဒီယေန့် ပါယ် တီ ဆေဆေ။ ဂေ ဒီ ဘော ယုဝ် ဘော ကာစွာ ကူပ် ဒုက် တာင် အီ ဟဲ့ ဘုဝ် ဘဲန် ဒီ ဘေ။

17 ဂေ ဒီ ဘော ဝီ တဝ်း မှုဝ် အာဒါ ဘေ။ ဂေ ဒီ ဘော တဝ်း၊ ‘အိုယ် ဘေ အီ ကွယ် ခဲင် မိူင် တာင်၊ မိူင် ပဲ့ ဟဲ့ ဒွိုမ် အိူပ် မျုက် အီ ဟဝ်။ ဒေါ တီ နီ ဘေ ဟဲ့ ဟွတ့် ဝီ လိုဝ် ဝီ ကာပျာတ့်။ ဒူအီ အီ ကွယ် ခဲင် မိူင် ဘေ မုး ဒူအီ အီ နပ် ဒီ ပဝ့် ရိုဝ် ဆင်ဖုဝ်၊ ဂေ ဟဲ့ ဒွိုမ် အိုပ် အိုမ် နမ်မုက်ဆာရာ။ ခဲ့ ကွယ် ဂေ ဒူအီ ဘဲန် မျုဝ် ဘဲန် မျုဝ် အီ ကွယ် ခူပ် ဘာင် အိုမ် နမ်မုက်ဆာရာ၊ ဂေ ဟဲ့ ဒွိုမ် ယုဝ် ကာဆဝ် ဘေ။

18 ဒေါ တီ နီ ဒူအီ အီ ကွယ် ဒီ ဂုန် အိုမ် ဒီ ဘော ဒီယုး ဒီယေန့် ဆီငဲ ဒီ ကေး ဘေ တီ။ ဂေ ဒူအီ အီ ကွယ် ခူပ် အိုမ် နမ်မုက်ဆာရာ၊ ဂေ ဒီ ဘော ဝီ ကာစွာ ကူပ် ဟဲ့ လိုဝ် စှိုမ် ဘေ။’”

19 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ဘူင် တဲး မိူင် ဘေ ကော ယေန် ကော ငွင့်၊ တဲး န့ ပီ မိူင် အီ ဟဲ့ ရာမ်၊ အီ တူ မိုဝ်း ဒူအီ ခေါ အူ ဝီ။ အုဝ် ဒီ တဲး အိုမ် နမ်မုက်ဆာရာ အီ ဟဲ့ လိုက် ကာဆဝ် ဝီ တး မ့ပုန် ဘေ။ 20 အုဝ် ဒီ တဲး ဘေ စုဝ်း မိူင် မာရာန၊ တဲး ဘေ ကွယ် ဒူပ် ဂေ ဒူအီ အီ ဟဲ့ ဒွိုမ် ကွယ် ဒေါ မွိုန်။ အုဝ် ဒီ တဲး ဘေ ကွယ် ဆေဆေ ခြိုမ် ကာဒါယ်။ တဲး ဘေ ကွယ် ရိုမ် ဒူပ် ဂေ ဒူအီ ယမ်။ ပန် တီ ဘေ မိူဝ် အာဝ် ဟူ ပွိုန် ဝီ တး ခဲင် မိူင် ဒူင် ကွယ် ဂေ ဒူအီ အိမ်။ 21 အုဝ် ဒီ ဘူင် တဲး ဘေ ယမ် တဲး န့ မွှိုမ် ယုဝ် ကာဆဝ်။ ဝါယ် အန် တီ ဘေ အာဝ် ဟူ မိုဝ်း ပေါ မ့ပွါ။ ဒူအီ ပီ ဘော ဝီ ဟြေတ့် ဘေ မိူဝ်၊ ဂေ ယီ တူ ယိုဝ် ဘေ ဒေါ မှဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။