1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် မဲ ဂွန် ဒူအီ၊ တဲး မဲ ကာလာင် ဂြုဝ်း အီ ဒမ် မှာပ် ဒီ ဒူအီ အမ်မူန်။ 3 တဲး မဲ ကာလာင် ဒီ ဂေ ဒူအီ အမ်မူန် တဝ်း၊ ‘တဲး ဘေ ထူမ် ဂြုဝ်း ပီ ကာလာင် ဇဝ်ဖြာ အီ အိုပ် တူတ့် ဒွန် မျုဝ်။ အန် ဇဝ် ဟဲ့ တဝ်း၊ ဘေ ဟဲ့ ဘဲန် နဝ်း ဒါခိုယ် ကူပ် ဟဲ့ ကာဒါတ့် ဘေ ဟုဝ် ဇဝ်ဖြာ ဘော ဟဲ့ ကာပျာတ့် မိူင် အီဆာရေလ ဘော ဟဲ့ မှေတ့် ရန်ဆူ ဂေ ဒူအီ အာယူဒါ။ 4 ကူပ် ဟဲ့ ဘူင် ဘေ ပါယ် တီ အုဝ် ဒီ တဲး ဂေ ဒူအီ အီ ကွယ် နာ လေး ဆီငဲ အိုပ် ဘေ။ ဂေ ဒီ ဘော တး ကွယ် ခဲင် ရဝ် ခဲင် မိူင် ဘေ။ ဂေ ဒီ ဘော ဒိုဝ်း ဟူမ် ဘ့လေ အီ လေး ခဲင် မိူင် ဘေ ဘော ဒျီင် အိုမ် ပူ မက် ပီ ဟျီင် ဘေ။ 5 အုဝ် ဒီ တဲး မိူင် ရာဘာ ဘဲန် ကာပိုမ် မင်ပြွင့် ကာဟာတ့်။ မိူင် အမ်မူန် အုဝ် ဒီ တဲး န့ ဘဲန် ဒူင် ဟျီင် အီ မာဘူ။ ပန် တီ ဂေ ဒီ ဘော နပ် လွင် မုး အုဝ် ဇဝ်ဖြာ။ 6 ဇဝ်ဖြာ ဝီ တဝ်း ကူပ် ဟဲ့ ဒါခိုယ် ဘေ ပါယ် တီ။ ဘေ မိူဝ် ဟဲ့ ကာထ ဒဲ ဘေ ဘော ဂါ ဘော ခူယ် ကာဆဝ်။ ဘေ မိူဝ် တူ ရီမာတ် မိူင် ဒူအီ အီဆာရေလ။ ဘေ ယီ ခူယ် ကာဆဝ်။ ခုဝ် မိူင် တီ ဟဲ့ ဇမ် ဒုက်။ 7 ကူပ် ဟဲ့ ဘူင် ဘေ ပါယ် တီ အုဝ် ဒီ ဝီ အာပ် ဘေ ဒီ ဒူအီ အာမျုဝ် ဟဝ်၊ တဲး ဂေ ဝီ တး ဇူန် ဘေ ဘော ဖာတ် ဒိုဝ်း ကြုဝ်ကြာမ် ဘေ။ အုဝ် ဒီ ဘော ပျာတ့် ဝဲန် တူတ့် ဘေ၊ ကွဲ့ တဲး န့ ဆီ မိုဝ်း အာမျုဝ် ဒူအီ ဘေ၊ ကွဲ့ တဲး ဘေ ဆီ မိုဝ်း မိူင် ဒူင် ဒီ ကွယ်။ ပန် တီ ဘေ ဒီ ဘော ဝီ နပ် အုဝ် မုး ဇဝ်ဖြာ။’”

8 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ဒူအီ မုဝ်အာပ် ဟဲ့ တဝ်း၊ ‘ဒူအီ ခြိုဝ် ယူဒါ တွိုန်၊ ဂေ ပီ ဒူအီ ခြိုဝ် အာမျုဝ် ဟဝ်။’ 9 ကူပ် န့ ပါယ် တီ အုဝ် ဒီ တဲး န့ မိုဝ်း အီ တး ကာဂုဝ်း၊ တး ပျာတ့် ဝဲန် တူတ့် ဂေ။ အုဝ် ဒီ တဲး ရန်ဆူ ဂေ စုး ဒီ ကာဂုဝ်း ဒီ မိူင် အီ ကွယ် ခူပ် ကာအုန် ကာဒါယ် မိူင် မုဝ်အာပ်။ န့ မုး မိူင် အီ ဟဲ့ ဘွတ် ဟဲ့ မွှိုမ်၊ အီ မုး မိူင် ဘီယေဆီမာတ်၊ မိူင် ဘာလမွင် ဘော မိူင် ကီရီယာဆိမ်။ 10 အုဝ် ဒီ တဲး ဂေ ဒူအီ အီ ကွယ် ခဲင် မိူင် နာ လေး ဆီငဲ ပဲ ဂေ ဒူအီ မုဝ်အာပ် ဘော ဂေ ဒူအီ အမ်မူန်။ ဂေ ဒူအီ အာမျုဝ် ဟဝ် တူ ဝီ နမ်လှုဝ်း ဂေ ဒူအီ အမ်မူန်။ 11 အုဝ် ဒီ ဘော ဒမ် မှာပ် ဒီ ဂေ ဒူအီ မုဝ်အာပ်။ ပန် အန် တီ ဂေ ဒီ ဘော နပ် အုဝ် မုး ဇဝ်ဖြာ။’”

12 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ဒူအီ ခဲင် မိူင် အေဒူမ် ဟဲ့ ဘူင် ဝျီ့ ဒီ ဒူအီ အာယူဒါ။ ဂေ ဟဲ့ ဝီ ဘူင် ဝျီ့ အီ ဟဲန့် ကာဆဝ် ဒီ ဒူအီ အာယူဒါ။ 13 ကူပ် န့ ပါယ် တီ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ‘အုဝ် ဒီ ဒမ် မှာပ် ဒီ ဂေ ဒူအီ ခဲင် မိူင် အေဒူမ် ဘော ငဝ်း ယမ် ဂေ ဒူအီ ဘော ဒုဝ် ဆတ်ဒါဝါ ဂေ။ အုဝ် ဒီ ဘူင် တဲး ဒူအီ ကော ယေန် ကော ငွင့် ခဲင် မိူင် တီ၊ စုး ဒီ မိူင် ထေမာန် ကော ဇမ် မိူင် ဒေဒါန်။ ဂေ ဒူအီ ဘောကာဂ့လျီတ် ဒီ ယမ် ဒီ မာပွါ့ လာင်။ 14 အုဝ် ဒီ စ်ု ဂေ ဒူအီ အီဆာရေလ၊ တဲး ဂေ ဘူင် ဝျီ့ ဒီ ဒူအီ အေဒူမ် ဒါင် အုဝ်။ ဂေ ဒီ ဘော တဲး ဒူအီ အေဒူမ် ခမ် ခဲ့ ဟဲ့ ရူ အုဝ် ဒီ ဂေ။ ပါယ် တီ ဂေ ဒီ ဝီ နပ် ခဲ့ ကိူန် မှာပ် ဂေ ပီ ဒီ ဘူင် ဝျီ့ အုဝ် ဒီ ဂေ။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

15 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ဒူအီ ဖီလီထီ ဟဲ့ အုန် နဝ်း ရူ လှေန့် ကာဆဝ် ကူပ် ပဲ့ ဟဲ့ ဘူင် ဂေ ဒူအီ အာယူဒါ ဒီ ဂေ။ ခုဝ်၊ ဂေ ဘူင် ဝျီ့ ဒီ ဂေ ဒူအီ အာယူဒါ ဘော ဝီ ပျာတ့် ဂေ။ 16 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ ‘အုဝ် ဒီ ဝီ ကာဂုဝ်း ဒီ ဒူအီ ဖီလီထီ။ အုဝ် ဒီ ဒိုဝ်း ဝဲန် ဒူအီ အာမျုဝ် ခေရေဆီ ဘော ဂေ ဒူအီ အီ ဆီ ဂိတ် ဆီ ကွယ် ခူပ် အိုမ် နမ်မုက်ဆာရာ။ 17 အုဝ် ဒီ ဘူင် ဝျီ့ ဒီ ဂေ၊ တဲး န့ ကော ဘြေ့ ဒီ နဝ်း အုဝ်။ ဂေ လုဝ် ခမ် အာဖေ အာရေ ကူပ် ဟဲ့ ရူ ကာဆဝ် ဇဝ်ဖြာ ဒီ ဂေ။ ဒေါ အန် တီ ဂေ ဒီ နပ် အုဝ် မုး ဇဝ်ဖြာ။’”