1 ဝါယ် ဟဲ့ မှေတ့် ဟာဝ် အီ ဒီ ယေ ဟဲ့ နုဝ့် ဒိမ် ဆီနမ်၊ ဒေါ ဇမ် မာဂျီန် ဂိုဝ်၊ ဆီငဲ ဂိုဝ်၊ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ ဒဲမ် အုန် ဆီငဲ အာတိုဝ် နီ။ ဆီငဲ အာတိုဝ် နီ မုး ဆီငဲ ဒီ တး ခုန်ဒီခမ် မိူင် ဘာဘဲ ဝဲင် ရူပ် မိူင် ယေရူဆာလဲမ်။

3 တဲး မဲ ကာလာင် ဒီ ဂေ ဒူအီ အီ အွန် ဒီ ဘူင် ကာဘး ဒီ အုဝ် တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ တဲး မဲ ဒိုဝ်း ကာလုဝ့် မာခါင်၊ ဒင် ဒဲင် ဂဲန့်၊ ပီ ဝီ ဒိုဝ်း အိုမ်၊ ဟပ် နာ ခဲင်။

4 တဲး မဲ ဝီ ဒိုဝ်း ယင် အီ မုး ယင် အီ မွှိုမ် ကာဆဝ် ဘော ယင် ဒီ ယ အန်၊ ယင် ဂိုမ် အာတ့် ဘော ဂိုမ် ပန် အန်။ တဲး မဲ ရဝ်း ဘော ကာအာင် အီ ဆီချာ လွှိုမ် အီ ဟဝ်၊ ဝီ ဟပ် ခဲင် ကာလုဝ့် တီ၊ တဲး န့ ကော နုဝ့်။

5 တဲး မဲ ရဝ်း မာဘူ အီ မွှိုမ် လွှိုမ် ဒုဝ် ဟဝ်။ ဟဲ့ ဟွတ့်၊ မဲ ဘော ဝီ ဘုတ် ငဝ်၊ ကာဒိုင် ငဝ် ခြိုမ် ကာလုဝ့် တီ၊ တဲး န့ ကော ဒါတ် ကော ဆီနမ်။ ကွင့် ယင် ဂေ ကာအာင် တီ၊ တဲး န့ ကော ဆိန်။’”

6 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဒူအီ အီ ကွယ် ခဲင် မိူင် အီ ဟဲ့ ဒွိုမ် ငဝ်း ယမ် အာဆာက် အီ ဟဝ်၊ ဂေ ဒီ ကာဒုး ဒုက် တာင်။ ဂေ ပီ ကာလုဝ့် မာခါင် ပဲ့ ဟဲ့ ဟူမ် အျီင် ရျီး။ အျီင် ရျီး တီ တူ ပွိုန် ခုတ် လေး။ တဲး ဘေ ဒိုဝ်း လေး ယင် ဘဲန် ဆိ ဘဲန် ဆိ၊ ယီ တူ ကာတာမ် လွင် အန်။

7 ဒူအီ ခဲင် မိူင် တီ၊ ဂေ ဟဲ့ ဒွိုမ် ငဝ်း ယမ် ဒူအီ။ မာလဲ၊ နှာမ် ဒူအီ ယမ် ဂေ တီ၊ ဂေ တူ ဝဲန် ဒဲင် ကာဒါယ် အီ ဝီ ပွိုန် ပုန် တာ ကာပုး။ ဂေ ယီ ဝီ ဟုး ဝဲန် ဒဲင် မာဝ် အီ ဟဲ့ ဂ့လျီတ် ဟဲ့ လိူမ်။

8 အုဝ် ဟဲ့ ဝီ ဒိုဝ်း နှာမ် တီ၊ ဝီ အုန် ဒူင် တူ ပွိုန် ပုန် အန်၊ တဲး န့ ဘဲန် နဝ်း ရူ နဝ်း စာဝ် ဒီ အုဝ်၊ တဲး အုဝ် ဝီ ပွိုန် ဒီ ဘူင် ဝျီ့ ဒီ ဂေ။”

9 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ဒူအီ အီ ကွယ် ခဲင် မိူင် အီ အွန် ဒီ ငဝ်း ယမ် အီ ဟဝ်၊ ဂေ ဒီ ကာဒုး ဒုက် တာင်။ အုဝ် ဒီ ဘော ဘဲန် အီ ကာနူမ် ဟေ၊ အီ ကာဒိုင် ငဝ်။

10 ကူပ် န့ ပါယ် တီ တဲး မဲ ဒိုဝ်း ဟေ၊ ပီဒဝ့် ငဝ်၊ တဲး ငဝ် ကော ကုး ဟဲန့်၊ တဲး ယင် တီ ကော န့စမ်၊ ကွဲ့ တဲး န့ ဆီ မိုဝ်း အိုမ်၊ တဲး ကာအာင် ကော ကာဆိုမ်။

11 ဝါယ် အန် တီ ဘော ဝီ ဒိုဝ်း ကာလုဝ့် မာခါင် အီ တူ မိုဝ်း အိုမ်၊ ဝီ ဘ့လေး ဒဲင် ဂဲန့်။ တဲး ကာလုဝ့် တီ ကော ဒီငေန့် ရေန့်။ ပါယ် တီ ကာလုဝ့် တီ ဒီ ဝီ ဆီငါ၊ တဲး အျီင် ရျီး အန် ကာဆိုမ် တူတ့်။

12 မဲ ပီ ဘော ဟဲ့ ဘူင် ပါယ် တီ မိူဝ်၊ န့ ယီ တူ မိုဝ်း အာဂျိုဝ် မာဆေ။ ခုဝ်၊ အျီင် ရျီး အီ ဟဲ့ ဟေတ့် ကာဆဝ်၊ အန် ယီ တူ လေး ငှိုယ် ငှိုယ်။ ငဝ် ပီ ဘော ဟဲ့ ကာဆိုမ် ခဲ့ မှဝ် မိူဝ်၊ အန် တူ နပ် ဒီ ကာဆိုမ် တူတ့်။

13 အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ်၊ အျီင် ရျီး ခဲင် ကာလုဝ့် တီ န့ ပီ နဝ်း ကာဝါတ့် ဘေ။ အုဝ် ပီ ဘော ဟဲ့ ဂျုဝ်ဂျာ ဒီ ဖွတ်ဖ တဲး ဘေ ဆီငါ မိူဝ်၊ ဘေ ယီ ဆီ နဲ့ ဘူင် အီ ကာဒါတ့်။ ဘေ အာဝ် ဟူ ဆီငါ၊ တဲး န့ ကော ဇမ် ပန် ဒီ ယူမ် နဝ်း ရူ ကာဆဝ် အုဝ် ဒီ ဘေ။

14 အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဟွတ့် ကာလာင် လွင် အန် တီ၊ အာခြာဝ် ဒီ ဒမ် အုဝ် မှာပ် ဒီ ဘေ ဟဲ့ ဟွတ့် ဇမ်။ အုဝ် အာဝ် ဟူ ပဲ ဒီ ယိူန်၊ အာဝ် ဟူ ကာဝေ ဘေ။ အုဝ် မိူဝ် တူ ဝဲန် မှာပ် ဘေ၊ အုဝ် ဒီ ဒမ် မှာပ် ဒီ ဘေ တဲး န့ ဒူပ် ခဲ့ ပီ ဒွိုမ် ဘူင် ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

15 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 16 “အိုယ် ဂွန် ဒူအီ၊ အုဝ် ဒီ ဒိုဝ်း ဝဲန် ဒူအီ ပီ ရွက့် မဲ အူ ဇေန့်။ မဲ ယီ တူ ပွိုန် က့လိုဝ် ငှုန်၊ တူ ပွိုန် ယာမ် ပီရး အိုမ် ငါယ် မဲ ဒေါ မှဝ်။ 17 ပီ က့လိုဝ် ပီ ငှုန် မဲ တီ မဲ တူ ပွိုန် တဲး ဟမ် အန် လေး။ မဲ တူ ပွိုန် ယာမ် အာဒါ ဒူအီ ယမ်။ မဲ လုဝ် ဘြဝ့် ကာမဲ့ မဲ၊ စှိုပ် ဘော ခူဒိန့် မဲ။ မဲ ကွဲ့ ကာဘိတ် ဒီမုဝ်း မဲ၊ ကွဲ့ ဟူမ် ခါမုန် ပီ ဟူမ် ဂေ ဒူအီ အီ က့လိုဝ် အီ ငှဝ်။”

18 ဆီငဲ တီ၊ အုဝ် မိူဝ် ကာလာင် ဒီ ဂေ ဒူအီ ကိူန် ဒေါ ဆီ မုး စေဝ် ညှာ။ န့ ဘော ဇမ် ဘာ ဒီ အပ်၊ အီဘိုန့် အုဝ် ဘော ယမ်။ ပါ ခဲညှာ အုဝ် မိူဝ် ဘူင် ဒူပ် ပဲ့ ဟဲ့ ကာလာင် အုန် အန် ဇဝ် ဒီ အုဝ်။

19 ဂေ ဒူအီ ကိူန် မိူဝ် ဝီ ဒီမွှတ် အုဝ် တဝ်း၊ “ကူပ် မာဆေ မဲ ဘူင် ပါယ် တီ။း”

20 အုဝ် မိူဝ် ဝီ ကာလာင် ဒီ ဂေ တဝ်း၊ “ဇဝ်ဖြာ ဟဲ့ ကာလာင် ဂြုဝ်း ဒီ အုဝ် တဝ်း၊ 21 တဲး အုဝ် ဝီ ကာလာင် ဒီ ဘေ ဒူအီ အီဆာရေလ ပါယ် နီ။ ‘ဘေ မိုဝ်း နဝ်း ဆီ ပီဖုင် ဘေ ကူပ် ဟုဝ် ဇဝ်ဖြာ။ ခဲင် နဝ်း ဘေ၊ ဘေ ဟဲ့ ဆီ ဟာဝ် လဲပ် ဒီ ယွတ် ခဲ့ စှိတ် အန်။ ဘေ ဘော ရွက့် ဟုဝ် တီ။ မာလဲ၊ အုဝ် ဇဝ်ဖြာ ဒီ ဝီ ဘူင် တဲး အန် ကာဒါတ့်။ ပါယ် တီ ဂွန် ဘေ အီ ဆီ ဂိတ် ဆီ ကွယ် ခဲင် မိူင် ယေရူဆာလဲမ်၊ ဂေ ဒီ ဘော ယမ် ဒီ မာပွါ့ လာင်။ 22 ပန် အန် တီ ဘေ ဒီ ဘူင် ပီ ပဲ့ ဟဲ့ ဘူင် အုဝ် တွိုန်။ ဘေ တူ ကာဘိတ် ဒီမုဝ်း ဘေ၊ တူ ဟူမ် ပီ ဒီ ဟူမ် ဂေ ဒူအီ အီ ဟဲ့ က့လိုဝ် ဟဲ့ ငှဝ်။ 23 ဘေ မိူဝ် လုဝ် ဘြဝ့် ကာမဲ့ ဒီ ဂိန့် ဘေ၊ စှိုပ် ဘော ခူဒိန့် ဒီ ပ့လဝ် ဘေ။ ဘေ ယီ တူ ပွိုန် ယာမ်၊ တူ ပွိုန် ငှုန်။ ဘေ ဒီ ဘော ကြဲ ဒီ ဟျီ့ ကာဟဝ်း ကူပ် မှာပ် ပီ ဘူင် ဘေ။ ဘေ ဒီ ဘော က့လိုဝ် ဘော ငှုန် ကာတဲ ဘေ။ 24 အာအေဆေခေန် ဟဲ့ ဟွတ့် ဘျ ဒီ ဘေ၊ တဲး ဘေ ဒူပ် ပဲ့ ဟဲ့ ဘူင် အန်။ ဆေ ဟီ ဘဲန် တူတ့် ဇိုဝ် တီ၊ ဘေ ဒီ ဘော နပ် လွင် မုး အုဝ် ဇဝ်ဖြာ အီ အိုပ် တူတ့် ဒွန် မျုဝ်။’”

25 ဇဝ်ဖြာ ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ ဆေ အုဝ် ဟီ ဟွတ့် ဒိုဝ်း ဝဲန် ဟုဝ် ဇဝ်ဖြာ အီ တဲး ဂေ ဒူအီ ဘဲန် နဝ်း ဒါခိုယ် ဘော တဲး ဂေ မိုဝ်း နဝ်း ဆီ ယွတ် ခဲ့ စှိတ် အန်၊ အုဝ် ဒီ ဒိုဝ်း ဝဲန် ဘော ဂွန် အီဘိုန့် ဘော ဂွန် အီမာယ် ဂေ။ 26 ဆီငဲ အန် တီ ဒူအီ အူ ဝီ အီ ဟဲ့ လွတ် လိုဝ် စှိုမ် ဒူင် တီ၊ အန် ဒီ ဘော ဝီ တး ကာလာင် ဒီ မဲ လွင် အန် တီ။ 27 ဆီငဲ တီ မဲ ဒီ ဝီ ပွိုန် ကာလာင် ဂြုဝ်း။ မဲ ဒီ ကာလာင် ဒီ ဒူအီ အီ ဟဲ့ တဝ် တး ဒူင် ကွယ် မဲ။ ပါယ် တီ မဲ ဒီ ဘျ ဒီ ဂေ၊ တဲး ဂေ နပ် အုဝ် မုး ဇဝ်ဖြာ။”