1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ မ့ပွါ တဝ်း၊ 2 “အိုယ် ဂွန် ဒူအီ၊ န့ ဒွိုမ် မိုဝ်း ဂွန် အီဘိုန့် အာ ဝီ။ ဂါယ် မုး အူကတ် အူဝါ။ မာ ဂါယ် မုး အူ ဝီ။ 3 ဆိန့် မုး ဂါယ် ဒီဘျာ၊ ဂါယ် ကွယ် ခဲင် မိူင် အဲဂိုပ်။ ဂါယ် ဟဲ့ ဘူင် လာယ် လုတ့် လာယ် လာယ် ဒီ အီ ဟဝ်။ ဂါယ် တဲး အီ ဟဝ် ပါ ပူ ဂါယ်။ ဂါယ် ဘော တဲး န့ စှိုမ် မုး ဂါယ် ဒီဘျာ ဇဲတ်။ 4 ဝီ အီကတ် ဘော စိူဝ် နာင် အောဟောလာ။ န့ မုး ဒူအီ ခဲင် မိူင် ဆာမာရီ။ ဝါ အန် ဘော စိူဝ် နာင် အောဟောလီဘာ။ န့ မုး ဒူအီ ခဲင် မိူင် ယေရူဆာလဲမ်။ အုဝ် မိူဝ် တဲး ဂါယ် ဘော အာ ဝီ ဘဲန် အီဘိုန့် အုဝ်။ ဂါယ် မိူဝ် ဟဲ့ မိုဝ်း ဂွန် အီဘိုန့် ဘော ဂွန် အီမာယ်။

5 နာင် အောဟောလာ တွိုန်၊ အန် ပီ ဘော ဟဲ့ မုး အီဘိုန့် အုဝ် မိူဝ်၊ အန် ယီ ဝီ နမ်လှုဝ်း ဒီ ပါဝ် အန် အီ မုး ဂေ ဒါ ဆိုက် ဒူအီ အာဆူရီယာ။ 6 ဂေ ဘော မုး ဒါ တာင် အီ စှိုပ် ခြိုင် ခွင်၊ အီ အိုပ် ဒါ ဆိုက် ဘောကာဂ့လျီတ်။ ဂေ ဘော မုး တူတ့် ဂိန့် ဆိုက် အီ ဟဲ့ မိုဝ်း ပွုန်။ ဂေ ဘော မုး တူတ့် ဒူအီ အီ အိုပ် ဘော ဒါ ကာညာ အီ ပဝ့် မင်ပြွင့်။ ဂေ ဘော မုး ဒူအီ အီ ဆီ နှိုမ်၊ အီ မွှိုမ် ရွက့်။ 7 နာင် အောဟောလာ ဘော လာယ် လုတ့် လာယ် လာယ် ဒီ ဒူအီ အာဆူရီယာ အီ မုး ဒါ ကာညာ အီ ဟဲ့ မိုဝ်း ပွုန် တီ။ အန် ဘော ဘူင် တဲး ဒုဝ် အန် ကာဒါတ့် ဘော ကြိုပ် အာရိုပ် ရာင် ပီ ကြိုပ် ဂေ။ 8 အန် ဘော ဘဲန် ယာ မာလမ်၊ ဘူင် ပီ ပီ ဒွိုမ် ဘဲန် အန် ခဲင် မိူင် အဲဂိုပ် ဒေါ ဆီ မုး အန် ဒီဘျာ။ ဂေ အီမာယ် ဟဲ့ တး အိတ် ဒူပ် အန် ဘော လာယ် လာယ် ဒီ အန်၊ တဲး ဂေ ဒူပ် နဝ်း ကာဝါတ့် ဂေ။

9 ကူပ် ဟဲ့ ဘူင် အန် ပါယ် တီ အုဝ် မိူဝ် အာပ် ဒွါ အန် ဒီ ပါဝ် အန် အီ မုး ဒူအီ အာဆူရီယာ ပဲ့ ဟဲ့ အိုင် ကာဆဝ် အန်။ 10 ဒူအီ အာဆူရီယာ ဂေ တီ ဘော ဘုတ့် လေး ခြိုင် တာ အန်၊ တဲး အန် ဂ့လ။ ဂေ ဘော မှေတ့် ဟာဝ် ဂွန် အီဘိုန့် ဘော ဂွန် အီမာယ် အန်၊ ငဝ်း ယမ် ဘော အန်၊ တာ မာပွါ့ လာင် ဂေ။ ပါယ် တီ ခဲ့ ကွယ် ဂေ အီဘိုန့် ဒွန် ပ့လုဝ့် ဒွန် နာ၊ ဂေ ဘော ခဲ စာဝ် အန် လွင် ပဲ့ ဟဲ့ ဘူင် အန် ဆိန့် ဒေါ မွိုန်။

11 ဝါ အန် အီ စိူဝ် နာင် အောဟောလီဘာ တွိုန် ပီ ဘော ဟဲ့ ယိုဝ် ပဲ့ ဟဲ့ ဘူင် အီကတ် အန်၊ ဘော အန် မိုဝ်း နဝ်း ဆီ ဘဲန် ယာ မာလမ်၊ တဲး အန် ဘူင် လွှိုမ် ပဲ့ ဟဲ့ ဒွိုမ် ဘူင် အီကတ် အန် အီ မုး နာင် အောဟောလာ တွိုန်။ 12 အန် မိူဝ် မိုဝ်း နဝ်း ဝီ အိုင် ဂေ ဒူအီ တာင် အီ မုး ဒါ ကာညာ အီ အိုပ် ဂေ ဒူအီ အာမျုဝ် အာဆူရီယာ၊ အီ မုး ဒါ တာင် အီ အိုပ် ဒါ ဆိုက် အီ ဟဲ့ စှိုပ် ဒီ တာ ခြိုင် စှိတ်။ အန် အိုင် ဘော ဂေ ဒါ တာင် အီ အိုပ် ဒါ ဆိုက် အီ ပဝ့် မင်ပြွင့်။ ဂေ ဘောကာဂ့လျီတ် မုး ဒူအီ အီ ဆီ နှိုမ် အီ မွှိုမ် ရွက့်။ 13 အုဝ် ဟဲ့ ယိုဝ် ဂါယ် အူ ဝေါဝဲ တီ ဟဲ့ ဘူင် အီ ဟာယ် ကာဆဝ်။ ပဲ့ ဟဲ့ လာယ် လုတ့် လာယ် လာယ် ဂါယ် မုး အူ မျုဝ်။

14 နဝ်း ကာဝါတ့် အန် ယီ ဝဲ ဟဲန့် ကာဆဝ်။ အန် ဘော ယိုဝ် အာရိုပ် အီမာယ် အီ မုး ဒါ တာင် အီ ကွယ် ခဲင် မိူင် ဘာဘဲ။ ဂေ ဟဲ့ ဒဲမ် အာရိုပ် တီ တာ အိုမ် မိုက် အီ ရေန့်၊ ဒိုက် ဒီ ရဲင် အူ ပ့လုဝ့်။ 15 ဂေ ဟဲ့ ရိတ် ဘော ဆဲ့ ဒီ ညွယ် ဂေ။ ဘော ဒီ ဂိန့် ဂေ ဂေ ဟဲ့ ဘြဝ့် ကာမယ့် အီ ဟဲ့ မိုဝ်း ရာင် ဘုဝ်း။ အာရိုပ် ဂေ ပီ အာရိုပ် ဒူအီ ဘာဘဲ အီ ယဲတ့် ဒါ ဆိုက် အီ ပဝ့် လက်လဝ်။ 16 နာင် အောဟောလီဘာ ယိုဝ် အာရိုပ် ဂေ တီ၊ နဝ်း အန် ဘော ဘဲန် နဝ်း ကာဝါတ့် ကာဆဝ်။ အန် ဘော စ်ု ဒါလာမ် အန် ဟာဝ် ဒူင် ကွယ် ဂေ ခဲင် မိူင် ဘာဘဲ။ 17 ဝါယ် အန် တီ ဂေ ဒူအီ အာမျုဝ် ဘာဘဲ တွိုန်၊ ဂေ ဘော တး ဒူင် ကွယ် အန်။ ဂေ မိူဝ် တး လာယ် လုတ့် လာယ် လာယ် ဒဲင် ကာစှူင့် အိတ် အန်၊ ဘူင် တဲး ဒုဝ် အန် ကာဒါတ့်။ အန် ဟဲ့ ခမ် ဂေ ဘူင် ပါယ် တီ၊ အန် ဘော ဝီ ဇွင့် ဂေ၊ ဝီ ဝး ဂေ။ 18 အန် မိူဝ် ဘျ ပီ ပါယ် အန် ဒီ လာယ် လုတ့် လာယ် လာယ် ဘော ဘုတ့် ဂ့လ အန်။ အုဝ် မိူဝ် ဇွင့် အန်၊ ဝး ဘော အန်။ အုဝ် ဟဲ့ ဇွင့် ဘော အန် ဘော အီကတ် အန် တွိုန်။ 19 အန် ဝီ လာယ် လုတ့် လာယ် လာယ်၊ တဲး န့ လွှိုမ် ပီ ဒွိုမ် ဘူင် အန်။ အန် ဝီ လှုဝ်း ဒေါ မုး အန် ဒီဘျာ၊ ဒေါ ကွယ် အန် ခဲင် မိူင် အဲဂိုပ် တွိုန်။ 20 အန် မိူဝ် ဟဲ့ နမ်လှုဝ်း ကာဆဝ် ပါဝ် အန်။ နဝ်း ကာဝါတ့် ပါဝ် အန် တီ မိူဝ် ဟဲ့ ဟဲန့် ကာဆဝ်၊ ဟဲ့ ပီ မင်ပြွင့်။ အိုမ် ကြုဝ် အန် မိူဝ် ဟဲ့ ပီ အိုမ် ကြုဝ် မင်ပြွင့်။ 21 အိုယ် နာင် အောဟောလီဘာ၊ မဲ ယီ ဆီ နဲ့ မိုဝ်း နဝ်း ဆီ လာယ် လုတ့် လာယ် လာယ် ပီ မှာပ် ပီ ဘူင် မဲ ခဲင် မိူင် အဲဂိုပ် ဒေါ ဆီ နှိုမ် မဲ။ မဲ ဘော တဲး ဂေ အီမာယ် ဘဲန် ဝီ ဘဲန် ဝီ လာယ် ကာပ့လု အိတ် ဒူပ် မဲ၊ တဲး ဂေ ဘော ဆီနျီ့ ကာလိတ့် ပူ မဲ ဘော ဘ့လာတ့် ဘ့လေ ပူ မဲ။

22 အိုယ် နာင် အောဟောလီဘာ အုဝ် ဇဝ်ဖြာ အီ အိုပ် တူတ့် ဒွန် မျုဝ် အုဝ် ကာလာင် ဒီ မဲ လွင် ပါဝ် မဲ ဂေ တီ၊ ဂေ ဒီ ဝီ ဇွင့် မဲ။ အုဝ် မိူဝ် ဒီ ဝီ တဲး ဂေ ရူ ကာဆဝ် ဒီ မဲ။ အုဝ် ဒီ တဲး ဂေ တး ဒွန် နာ ဒွန် ပ့လုဝ့်၊ ဘူင် ကာဘး ဒီ မဲ။ 23 အုဝ် ဒီ တဲး ဂေ ဒူအီ ခဲင် မိူင် ဘာဘဲ ဘောကာဂ့လျီတ် တး ကာဇု ဒူင် ကွယ် မဲ။ န့ ဘော မုး ဒူအီ ခါလာဒေ အီ ကွယ် ခဲင် မိူင် ဘီဂွတ်၊ ခဲင် မိူင် ဆုဝ်အာ၊ မိူင် ဂုဝ်အာ ဘော ဒူအီ အာဆူရီယာ ဘောကာဂ့လျီတ်။ ဒူအီ ဂေ တီ ဘော မုး ဒါ တာင်၊ မုး ဒါ ကာညာ အီ အိုပ် မိူင်။ ဂေ ဘော မုး ဒူအီ အီ ဆီ နှိုမ် အီ ဆီ စှိတ်၊ အီ ဆီ မွှိုမ် ရွက့်။ ဂေ ဘော မုး ဒါ တာင် အီ အိုပ် ဒါ ဆိုက် ဘော ဒါ တာင် အီ အိုပ် ဒါ ဆိုက် အီ ပဝ့် မင်ပြွင့်။ 24 ဒူအီ ဂေ တီ၊ ဂေ ဒီ ဒိုဝ်း တး ဒါ ဆိုက် ကိူန် အီ မိုဝ်း ခြိုင် ကာဂုဝ်း ဘော လက်လဝ် မ့ပြွင့်၊ တး ကာဂုဝ်း ဒီ မဲ။ ဂေ ဒီ ဂူင့် မင် ဂွင့် ဘော မာပွါ့ လာင် ဘော မာဂိန့် ဟိန်၊ တး ကွယ် ရူပ် မဲ။ အုဝ် မိူဝ် ဒီ အာပ် မဲ ဒီ ဂေ။ တဲး ဂေ ဒမ် မှာပ် ဒီ မဲ၊ တဲး န့ ဒူပ် ဒါရာ ဂေ၊ ဟိတ် ဂေ။ 25 ကူပ် ဟဲ့ ရူ ကာဆဝ် အုဝ် ဒီ မဲ၊ အုဝ် ဒီ စ်ု ဂေ ဘူင် တဲး န့ ကော ကာဆဝ် ဒီ မဲ။ အုဝ် ဒီ တဲး ဂေ ဆွာ့ လေး ဂုင်မုး မဲ ဘော အာဟျဝ့် မဲ။ ဂေ ဒီ ဘော မှေတ့် ဟာဝ် ဘော ဂွန် မဲ။ အုဝ် ဒီ ဘူင် ပါယ် တီ အာခ်ု မှာန်။ ဂေ ဂွန် အီဘိုန့်၊ ဂွန် အီမာယ် မဲ အီ ဆီ ဂိတ် ဆီ ကွယ်၊ ဂေ ဒီ ဘော ဒိုဝ်း ဟာဝ် ဒုဝ့် ခဲင် ငဝ်။ 26 ဂေ ဒီ ဘော ဘုတ့် လေး ခြိုင် ပီ တာ မဲ ဘော ဒိုဝ်း ဟာဝ် ဘော ကြုဝ်ကြာမ် မဲ အီ မုး ရွိုန် ဂေ ခြိဝ် မဲ။ 27 ပါယ် တီ အုဝ် ဒီ ဘူင် တဲး မဲ စူ ဒီ ဘူင် နာ ဟာယ် နာ မိူက် ဘော ပီ လာယ် လုတ့် လာယ် လာယ် ပီ ဒိုဝ်း တး မဲ ခဲင် မိူင် အဲဂိုပ် တွိုန်။ ဝါယ် အန် တီ မဲ အာဝ် ဟူ ဆီ ယိုဝ် အာရိုပ် ရာင် ဘော အာဝ် ဟူ ဝီ နမ်လှုဝ်း မိူင် အဲဂိုပ်။”

28 ဝါယ် အန် တီ၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ အာပ် မဲ ဒီ ဂေ ဒူအီ ပီ ဇွင့် မဲ၊ ပီ ကာအိး မဲ။ 29 ဂေ မိူဝ် ဒီ ဝီ ဇွင့် မဲ ဘော ဖာတ် ဒိုဝ်း ဟာဝ် ဘော ကြုဝ်ကြာမ် ပဲ့ ဟဲ့ ဂျုဝ်ဂျာ မဲ ဒီ ဟြေတ့် အုန်။ ဂေ ဒီ တဲး မဲ ကွယ် ဒုဝ် ဂ့လ၊ တဲး န့ ကော လိုဝ်း ဆီချာ လွင် ဘဲန် မဲ ယာ မာလမ်။ 30 မဲ လုဝ် ခမ် ဒုက် ဇိုဝ် တီ ဒွန် မျုဝ် ကူပ် ဟဲ့ ဆီ ဘဲန် မဲ ပီ ဒူအီ အာမျုဝ် ဟဝ်။ ခုဝ်၊ မဲ ဟဲ့ ဘူင် တဲး ဒုဝ် မဲ ကာဒါတ့် ဒေါ ကြိုပ် မဲ အာရိုပ် ရာင် ပီ ကြိုပ် ဂေ။ 31 ကူပ် ဟဲ့ ဘူင် မဲ တဲး န့ ပီ ပီ ဘူင် အီကတ် မဲ၊ မဲ ဘော လုဝ် ခမ် ပီ ခမ် အီကတ် မဲ။

32 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ၊ “မဲ လုဝ် ခမ် အီ ပီ မဲ လုဝ် ဒျီင် ဆီလယ့် အီကတ် မဲ အီ ဟဲ့ တာင် ဘော လိုက် ကာဆဝ်။ အီ ဟဝ် ဒီ ဘော ပီ ဝါညာက် ဒီ မဲ ဘော နဲန မဲ။ ခုဝ်၊ အီ တူ မွှိုမ် ဟဲ့ နုဝ့် ခဲင် ဆီလယ့် တီ။

33 ခဲင် နဝ်း မဲ ဟဲ့ နုဝ့် အီ ဒုက် အီ ညှာပ်၊ တဲး န့ ကော ပီ မဲ ဟဲ့ ယိုတ့် ပဝ်း။ န့ ပီ ဆီလယ့် ပီ ဒီ ဒျီင် မဲ တီ၊ န့ ဒီ တဲး ကာပျာတ့် လိုဝ် တူတ့်။ န့ ဘော ပီ ဆီလယ့် ပဲ့ ဟဲ့ ဒျီင် အီကတ် မဲ အီ မုး မိူင် ဆာမာရီ တွိုန်။

34 မဲ လုဝ် ဒျီင် တဲး န့ ကော တူတ့်။ ဟဲ့ ဟွတ့်၊ မဲ ဒီ ဝီ ဒိုဝ်း ဆီလယ့် တီ၊ ဘူင် တဲး န့ ကာလာတ့်။ မဲ ဒီ ဝီ မး ဘင်နဝ်း မဲ။ အုဝ် ဟဲ့ ဟွတ့် တဝ်း ပါယ် တီ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။

35 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “မဲ လုဝ် ခမ် ဒုက် ကူပ် ဟဲ့ ဝဲန် ဟဲ့ ပိဝ် မဲ ဒီ အုဝ်။ ကူပ် မိုဝ်း မဲ နဝ်း ကာဝါတ့် အီ ဟဲ့ ဟဲန့် ကာဆဝ်၊ မဲ မိူဝ် ဟဲ့ ဘဲန် ပီ ယာ မာလမ်။ မဲ ဘော လုဝ် ခမ် မှာပ် မဲ တီ။”

36 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ “အိုယ် မဲ ဂွန် ဒူအီ၊ မဲ ဒီ ဆုင်ဖျာတ် အာမူ နာင် အောဟောလာ ဂါယ် နာင် အောဟောလီဘာ။း တဲး မဲ ကာလာင် တဲး ဂါယ် နပ် လွင် အီ မွှိုမ် ကာအိး၊ မွှိုမ် ကာဒါတ့် ပဲ့ ဟဲ့ ဘူင် ဂါယ်။ 37 ဂါယ် ဟဲ့ ဘူင် အီ လုတ့် ရဝ် ဘော ငဝ်း ယမ် အာဆာက် အီ ဟဝ်။ ပီ ဘူင် ဂါယ် ဟဲ့ ပီ ဂါယ် လာယ် လုတ့် လာယ် လာယ် ဒီ အာရိုပ် ရာင် ပီ ကြိုပ် အီ ဟဝ်။ ဂွန် အီမာယ် ဂါယ် ပဲ့ ဟဲ့ ဒွါ ဂါယ် ဒီ အုဝ် မိူဝ်၊ ဂါယ် ဟဲ့ ဝီ ငဝ်း ယမ် တဲး န့ ဝီ ဘဲန် ပီ ဒီ လှူ ဒီ အာရိုပ် ရာင် တီ။ 38 ဂါယ် ဟဲ့ ဘူင် ပေါ အူ မျုဝ် ဒီ အုဝ်။ ဂါယ် ဟဲ့ ဘူင် တဲး ဟုဝ် ဇဝ်ဖြာ ကာဒါတ့် ဘော ပျာတ့် ဝဲန် ဆီငဲ ဒီလှဝ် ပီ ဘ့လေး အုန် အုဝ်။ 39 ဒေါ ဟဲ့ ငဝ်း ယမ် ဂါယ် ဂွန် အုဝ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်၊ ပီ လှူ ဂေ ဒီ အာရိုပ် ရာင် တီ၊ ဂါယ် ဘော ဝီ တး လိုပ် ခဲင် ဟုဝ် ဇဝ်ဖြာ၊ ဝီ ဘူင် တဲး န့ ကာဒါတ့်။ ခဲ့ တီ ဂါယ် ဘူင် ခဲင် ကာင် ဒူင် ကွယ် အုဝ်။

40 ဘဲန် ဇေန့် ဘဲန် ဇေန့် ဂါယ် ဘော စ်ု ဒါလာမ် ဂါယ် ဟာဝ် ဒဲ့ ဂေ အီမာယ် အီ ကွယ် ကာတူင့်။ ဒူအီ ဂေ တီ မိူဝ် တး အူ ဇေန့်။ ဂါယ် မိူဝ် တာ အိုမ်၊ ဘာယ် ဒုဝ် ဂါယ် ဘော ဒဲမ် ဟိုက် ငါယ် ဂါယ် ဘော ပီစှိတ် ဂါယ်။ ဂါယ် ဘော စှိုပ် ခြိဝ် ဂေ ဆဲန့်။ 41 ဟဲ့ ဟွတ့်၊ ဂါယ် မိူဝ် ဝီ တုတ့် ဒဲင် ကာစှူင့် အီ ဟဲ့ စှိတ် ကာဆဝ်။ နာ အာတ့် ဂါယ် တီ၊ န့ ဘော မိုဝ်း မာတိန့် အူ ဘူင့်။ ဂါယ် ဘော ဒိုဝ်း န့ကြိုဝ်း အုး ငှုန် ဘော နာမန် ပီ ဒွါ အုဝ် ဒီ ဂါယ်၊ တဲး ဂါယ် ကြိုပ် အုဝ်။ ဂါယ် ယီ ဝီ ဘ့လေး ဇိုဝ် တီ ဒွန် မျုဝ် ဒဲင် မာတိန့် တီ။

42 ပါယ် တီ န့ ဘော မိုဝ်း ဖိုင် ဂေ ဒူအီ ကိူန် အီ ဟဲ့ ယိုတ့် ပဝ်း၊ တး နာ ခဲင် ပြဲ ကာဟဝ်း ဘော ဆီနန် ဆီနိူင်၊ တး ဘျုဝ်၊ တး ကျဝ် ဒူပ် ဂါယ်။ အီမာယ် ဂေ တီ မိူဝ် ဒိုဝ်း ဂန်ဒဲ၊ စှိုပ် ဒီ ဒဲ ဂါယ်။ ဂေ ဒိုဝ်း ဘော မင်ဂိုမ် စှိုပ် ဒီ ဂိန့် ဂါယ်။ 43 အုဝ် မိူဝ် ဝီ တဝ်း လွင် အီဘိုန့် အီ ဟဲ့ ပိုဝ် ဒီ လာယ် လုတ့် လာယ် လာယ် ကိူန် ကာဆဝ်။ အန် ပီ ဘော ဟဲ့ ကတ် မိူဝ်၊ တဲး အန် ဘူင် ဟာဝ် ဂါန် ယာ မာလမ် တီ။ ခုဝ်၊ ဒဲင် တီ အန် တူ မိုဝ်း ပီ နပ် ဒီ ဘူင်။ 44 အီမာယ် ဂေ တွိုန် ဘော ဟာဝ် ဒူင် ကွယ် ယာ မာလမ်။ ဂေ ဘော အိတ် ဒူပ် နာင် အောဟောလာ ဂါယ် နာင် အောဟောလီဘာ အီ ဟဲ့ မွှိုမ် ကာအိး ကာဆဝ်၊ တဲး န့ ပီ အီမာယ် အိတ် ဒူပ် ယာ မာလမ်။ 45 ဆေ န့ ယီ မုး ဒူအီ အီ မိုဝ်း နဝ်း ဆိူဝ် နဝ်း မှာန်၊ ဂေ ဒီ ဒမ် မှာပ် ဒီ ဂါယ် ဘော ဆုင်ဖျာတ် အာမူ ဂါယ် ပီ အီ ဆုင်ဖျာတ် အာမူ ဒူအီ လုတ့် ရဝ် ဘော အာမူ ဒူအီ အီ ဟဲ့ ငဝ်း ယမ် အာဆာက် အီ။ ခုဝ်၊ ဂါယ် ဟဲ့ လုတ့် ရဝ် ဘော ဟဲ့ ငဝ်း ယမ် အာဆာက် အီ။”

46 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ တဲး ဖိုင် ဒူအီ ကိူန် ဝီ တး ဇူန် ဂါယ်၊ တဲး ဂါယ် ကော ယုဝ် ကာဆဝ်။ 47 ဖိုင် ဒူအီ ကိူန် ဂေ တီ ဒီ ဘော ဒိုဝ်း မာဝ် ဝိုန့် ဂါယ် ဘော ဒိုဝ်း မာပွါ့ လာင်၊ ဒဲပ် ယမ် ဂါယ်။ ဂေ ဒီ ဘော ငဝ်း ယမ် ဘော ဂွန် ဂါယ်၊ ဝီ ဒုဝ့် ကာဆိုမ် ကာင် ဂါယ်။

48 ပါယ် တီ အုဝ် ဒီ ဘူင် တဲး န့ တူတ့် လွင် လုတ့် ရဝ် ခဲင် ကာဒါယ် မိူင် ဘော မိူင်။ တဲး ဂေ အီ ဟဝ် ဘောကာဂ့လျီတ် ဘော နုဝ် ပီ ပါယ် ဂေ တီ၊ ကွဲ့ တဲး န့ ဆီ မိုဝ်း အီ ယ လုတ့် ရဝ်။ 49 အီ မုး ဂါယ် အူကတ် အူဝါ တီ၊ အုဝ် ဒီ ဒမ် မှာပ် ဒီ ဂါယ် ကူပ် ဟဲ့ လုတ့် ဂါယ် ရဝ် ဘော ကူပ် ကြိုပ် ဂါယ် အာရိုပ် ရာင်။ ပန် အန် တီ ဂါယ် ဒီ ဘော နပ်၊ အုဝ် မုး ဇဝ်ဖြာ အီ အိုပ် တူတ့် ဒွန် မျုဝ်။”