1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် မဲ ဂွန် ဒူအီ၊ ဆေ မဲ ဒီ ဆုင်ဖျာတ် အာမူ ဂေ ဒူအီ ခဲင် မိူင် ယေရူဆာလဲမ် အီ ဟဲ့ ငဝ်း ယမ် ဒူအီ ကိူန်၊ မဲ လုဝ် တဲး ဂေ ဒူအီ ခဲင် မိူင် တီ ဝီ နပ် တူတ့် ပဲ့ ဟဲ့ ဘူင် ဂေ အီ မွှိုမ် ကာအိး။ 3 တဲး မဲ တဝ်း ဒီ ဂေ၊ ‘ဇဝ်ဖြာ အီ အိုပ် တူတ့် ဒွန် မျုဝ် အန် ဟဲ့ ကာလာင် ပါယ် နီ။ ကူပ် ဟဲ့ ငဝ်း ယမ် ဘေ ဒူအီ ကိူန် ကာဆဝ်၊ ကူပ် ဟဲ့ ဘူင် ဘေ တဲး ဒုဝ် ဘေ ကာဒါတ့် ဒေါ ကြိုပ် ဘေ အာရိုပ် ရာင်၊ ဘေ ဟဲ့ ဘူင် တဲး အုဝ် ဒမ် မှာပ် ဒီ ဘေ၊ တဲး ဘေ ဇမ် ဒုက် တာင်။ 4 ဘေ မိုဝ်း မှာပ် ကူပ် ငဝ်း ဘေ အာဆာက် အီ ဘော ကူပ် ကြိုပ် ဘေ အာရိုပ် ရာင် ပီ ဘူင် ဘေ။ ကူပ် န့ ပါယ် တီ န့ တဲး ဆီငဲ ဒီ ဒမ် အုဝ် မှာပ် ဒီ ဘေ စေဝ် ဇမ်။ အာခြာဝ် အန် ဟဲ့ ဟွတ့် ဇေ့ဇုင် ဒေါ တီ နီ။ ပါယ် တီ အုဝ် တဲး ဒူအီ အာမျုဝ် ဟဝ် နဲန ဘေ။ တဲး ဒူအီ ဒွန် မာန် ဒွန် မိူင် ကာညး ဘေ။ 5 အိုယ် ဘေ ဒူအီ အီ ကွယ် ခဲင် မိူင် ပီ တူ ရုဝ်ဆေ အီ ဟဝ်၊ ဒူအီ အီ ကွယ် ကာတတ် ဂေ ဒူအီ အီ ကွယ် တူင့်၊ ဂေ ဒီ ဘော ကာညး ဘေ၊ ပီ ဝါညာက် ဒီ ဘေ ကူပ် ဟဲ့ ဘူင် လုတ့် ဘေ ဒါရာ တီ။

6 ဂေ ဒူအီ အီ ကွယ် ခဲင် မိူင် တီ အီ အိုပ် ဒူအီ အီဆာရေလ၊ ဂေ ဒိုဝ်း ပွုန် ဂေ၊ ငဝ်း ယမ် ဒူအီ။ 7 ဂေ ဒူအီ ခဲင် မိူင် ယေရူဆာလဲမ် အာဝ် ဟူ ရုဝ်ဆေ ဂုန့် မာ ဂေ။ ဂေ ဘော ခါနှာပ် ဒူအီ အာမျုဝ် ဟဝ် ဘော တူ ဘူင် နာ မုး နာ မှာန် ဒီ ယာ ဆီပြး ဂေ ဂွန် ဆီပြး၊ ဂွန် တူ မိုဝ်း ဂုန့် မာ။ 8 ဒဲင် တီ၊ ဘေ အာဝ် ဟူ ရီမာတ် ဒူင် ဆီငါ ဘွတ်။ ဘေ မိူဝ် တူ ကမ် ဆီငဲ ဒီလှဝ်။ 9 ခဲင် မိူင် ဘေ တီ ဟဲ့ မိုဝ်း မင် အီ အီ ခဲ စာဝ် လွင် အီ ဟဝ်၊ တဲး ဂေ ပွိုန် ဒီ ငဝ်း ယမ် အီ ဟဝ် တီ။ န့ ဘော မိုဝ်း မင် အီ အီ ဟဲ့ ဟူမ် ပီ ဒီ ဟူမ် ပဲ့ ဟဲ့ ဟွတ့် လှူ ဒီ အာရိုပ် ရာင်။ ဘော မင် အီ ဟဲ့ ဘူင် အီ မွှိုမ် ဆာယ်၊ အီ တူ ကာအာပ် ဘူင်။ 10 မင် အီ ဟဲ့ ဝီ လာယ် လုတ့် လာယ် လာယ် ဒီ အီဘိုန့် ဂုန့် ဂေ။ မင် အီ ဟဲ့ အိတ် ဒူပ် အီဘိုန့် အီ မိုဝ်း ခြိုင် ကာပ့လု အီ တူ ဆီငါ မျုဝ် အီ ဒူပ် ဒါရာ။ 11 မင် အီ ဝီ လုတ့် အီဘိုန့် အီ ဟဝ် အီ ကွယ် ကာတတ် ဂေ၊ မင် အီ ဝီ လုတ့် အဝ် ဂေ။ မင် အီ ဝီ လုတ့် ဂွန် အီဘိုန့် ဘ့လာက် ဂုန့် ဂေ။ ဆေ အာဝ် ပါယ် တီ မိူဝ် ဂေ လုတ့် ဂွန် အီဘိုန့် ဘ့လာက် မာ ဂေ။ 12 ဒူအီ အီ ကွယ် ခဲင် မိူင် ဘေ မင် အီ ဇာင် ဒီ ငဝ်း အီ ဟဝ်။ မင် အီ ဘော ဒိုဝ်း ဒီ ဟူမ် အျီင် ရွိုန် ဒီ ဒူအီ အီ မုး ဒူအီ အီဆာရေလ ပီ ဂေ။ မင် အီ ဘော ခါနှာပ် အီ တဲး ဂေ ခြမ်၊ ဝိန် ဒီ ဖာတ် ဒိုဝ်း ကြုဝ်ကြာမ် အီ ဟဝ်။ ဂေ ဟဲ့ ဟွတ့် ပိဝ် အုဝ်။’ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

13 ကူပ် ဟဲ့ ဘူင် ဘေ ပါယ် တီ အုဝ် ဒီ ကာစွှာ့ ဘေ၊ တဲး န့ ပီ အုဝ် ဟဲ့ ငှာ ကာလိုမ် အုဝ် ဒီ ဘေ။ အုဝ် ဒီ ဝီ ဘူင် နာ စီစိဝ် ဒီ ဘေ ကူပ် ဟဲ့ ဖာတ် ဒိုဝ်း ဘေ ကြုဝ်ကြာမ် အီ ဟဝ် ဘော ငဝ်း ယမ် အီ ဟဝ်။ 14 ဆီငဲ ဒီ ဆုင်ဖျာတ် အုဝ် အာမူ ဘေ တီ၊ ဘေ ထာင် ဘေ ဆီ ဒီ မိုဝ်း ပ့လူမ် ဘော နဝ်း ယ။း အုဝ် ဇဝ်ဖြာ ဟဲ့ ကာလာင် ပါယ် တီ၊ အုဝ် မိူဝ် ဒီ ဘူင် ပါယ် တီ။ 15 အုဝ် ဒီ တဲး ဘေ ကာယဝ်း ကွယ် ကာတဲ ဒူအီ ဒွန် မျုဝ်၊ တဲး ဘေ ကွယ် ဒွန် မာန် ဒွန် မိူင်။ အုဝ် ဒီ ဒိုဝ်း ဝဲန် အီ မွှိုမ် ကာအိး၊ မွှိုမ် ကာဒါတ့် အီ ဒိုက် ဒီ ဘေ။ 16 ပါယ် တီ ဂေ ဒူအီ အာမျုဝ် ဟဝ် မိူဝ် ဒီ နပ် ခဲ့ ကာဒါတ့် ဘေ။ ပန် တီ ဘေ မိူဝ် ဒီ နပ်၊ အုဝ် မုး ဇဝ်ဖြာ။”

17 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 18 “အိုယ် မဲ ဂွန် ဒူအီ၊ ဒူအီ အာမျုဝ် အီဆာရေလ အာဝ် မိုဝ်း ဒီခုဝ် မာဆေ ဒီ အုဝ်။ ဂေ ဟဲ့ ပီ အျီင် ဘွင့် ဒေန့် ဂေ အျီင် ဟိန် ဘော မီစေတ့် အီ ဆီ ဂိတ် ဝါယ် ဟဲ့ ဟွတ့် ထာရွင် လေး အီ ဒီ ရွိုန် ဇဲတ် တွိုန်။ 19 အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ကူပ် ဟဲ့ ပီ ဘေ အျီင် ဟိန် ပီ ဝဲန် အီ၊ အုဝ် ဒီ ဒိုဝ်း ကာဇု ဘေ ခဲင် မိူင် ယေရူဆာလဲမ်။ 20 ဒူအီ နပ် ဒီ ကာဇု ရွိုန် ဂေ ဘွင့် ဒေန့်၊ ဟိန် ဂေ မီစေတ့်၊ ဟပ် ခဲင် ကာလုဝ့်၊ တဲး န့ ဒင် ဒဲင် ငဝ်။ ကူပ် ဟဲ့ ရူ ကာဆဝ် အုဝ် ဒီ ဘေ၊ အုဝ် ဒီ ဘူင် တဲး ဘေ ဇွိုမ် လာတ့် ပါယ် တီ။ တဲး န့ ပီ အီ ဒင် ရွိုန် ဂေ ခြိဝ်၊ တဲး န့ လာတ့် ခဲင် ငဝ်။ 21 အုဝ် ဒီ ဒဲ့ ကာဇု ဘေ ခဲင် မိူင် ယေရူဆာလဲမ်။ အုဝ် ဒီ ဘူင် ဒီ ဘေ၊ တဲး န့ ပီ အုဝ် ဘုတ် ငဝ် ခဲင် ကာဝှါင်။ တဲး န့ ပီ ဘေ ဇွိုမ် လာတ့် ခဲင် ကာဝှါင် တီ ကူပ် ဟဲ့ ရူ ကာဆဝ် အုဝ် ဒီ ဘေ။ 22 အီ ဒင် လာတ့် ရွိုန် ခဲင် ငဝ် ပါယ် တီ၊ ဘေ လုဝ် ခမ် အီ ပီ အီ ဟဝ် ဒင် လာတ့် ဘေ ခဲင် ငဝ်။ ဒေါ အန် တီ ဘေ ဒီ နပ် ခဲ့ ဟဲ့ ရူ အုဝ် ဇဝ်ဖြာ ဒီ ဘေ။”

23 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ န့ ပွါ တဝ်း၊ 24 “အိုယ် မဲ ဂွန် ဒူအီ၊ တဲး မဲ ကာလာင် ဒီ ဂေ ဒူအီ အီဆာရေလ တဝ်း၊ ကာဒါယ် မိူင် ဘေ နီ ဟဲ့ ဘဲန် မိူင် အီ တူ ဆီငါ ဘွတ်။ န့ ဟဲ့ ဘဲန် ဘော ကာဒါယ် မိူင် အီ တူ မိုဝ်း အိုမ် ဂ့လာယ် ကူပ် ဟဲ့ ရူ ကာဆဝ် အုဝ်။ 25 ဂေ ဒါ တာင် အီ အိုပ် မိူင်၊ ဂေ ဟဲ့ လာယ် ဖြူမ် ဒီ ဘူင် ပီ မာခြင်ဆီ အီ ဟဲ့ ကဝ့် ဒီ ဟူမ် မာဒုဝ် ပြဲ။ ဂေ ဘော ငဝ်း ယမ် အီ ဟဝ်၊ ဘော ဒိုဝ်း တူတ့် ခဲ့ ကွယ် ကြုဝ်ကြာမ် ဘော ရွိုန် ဂေ ခြိဝ် အီ ဟဝ် ဒီ ဂေ။ ဂေ မိူဝ် ဘူင် တဲး န့ မိုဝ်း ယာ ဆီပြး ကိူန်။ 26 ဂေ ဒါ အီ လှူ ဒီ ဇဝ်ဖြာ မိူဝ် ဟဲ့ ပျာတ့် ဝဲန် ဒါရာ အုဝ်။ ဂေ ဟဲ့ ဘူင် တဲး ဒူင် ဆီငါ ဘွတ် ဒူပ် ပီ ဒမ် ဒါရာ ဝီ ကာဒါတ့်။ လွင် အီ ဆီငါ ဘွတ် ဘော လွင် အီ တူ ဆီငါ ဘွတ်၊ ဂေ အာဝ် ဟူ တဲး န့ လာယ် ဘ့လိူင်။ ဂေ မိူဝ် အာဝ် ဟူ မာနုဝ် တဲး အီ နပ် လွင် အီ ဆီငါ ဘွတ် ဘော လွင် အီ တူ ဆီငါ ဘွတ် အီ ဟဲ့ လာယ် ဘ့လိူင် ခဲ့ မှဝ်။ ဂေ မိူဝ် ဟဲ့ ဝး ဟဲ့ ဝဲန် ဆီငဲ ဒီလှဝ်။ ကူပ် ဘူင် ဂေ ပါယ် တီ ဂေ ဒူအီ အီဆာရေလ မိူဝ် အာဝ် ဟူ ရုဝ်ဆေ အုဝ်။ 27 ဂေ အာမူ အာမာတ် ခဲင် မိူင် တီ၊ ဂေ ဟဲ့ ပီ မာဆုဝ် ပြဲ အီ ဝိန် ဒီ ဟြေတ့် ဒီ ကဝ့် ဟူမ် မာဒုဝ် ပြဲ။ ဂေ ဘော ငဝ်း ယမ် အီ ဟဝ် ဘော ဘူင် အီ တူ မှာန် ဘဲန် မျုဝ် ဘဲန် မျုဝ် ကူပ် ဆီ စေဝ် ခြမ် ဂေ။ 28 ဂေ ဒါ အီ ဘျာန် ဂြုဝ်း ဇဝ်ဖြာ မိူဝ်၊ ဂေ ဘော ချြီင် မှာပ် ဂေ တီ၊ ဘူင် တဲး န့ ပီ အီ ဒိုဝ်း ထုန် လုယ်၊ ဖဝ်း ဒီ ရဲင် မာဝ် အုတ်။ ဂေ တဝ်း၊ ဂေ ဟဲ့ ယိုဝ် ပီ ဘျ ဇဝ်ဖြာ ဒီ ဂေ အီ တူ မှာန်၊ ဂေ ဘော ကာလာင် ဂြုဝ်း ညိုင်ရာင် လွင် ပီ စ်ု ဇဝ်ဖြာ။ ဇဝ်ဖြာ ပီ ဆ မိုဝ်း ဒီ ကာလာင် မိူဝ်၊ ဂေ ဘော နပ် ဒီ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင်။’ 29 ဂေ ဒူအီ ရဝ် ဒူအီ ကာင် မိူဝ် ဘူင် နာ ဟာယ် နာ မိူက်၊ ဘော ခါနှာပ် ဒူအီ ဂိန် ဒူအီ ဖ့လာန်၊ ဘော ဇူန် အီ ဒိုဝ်း ကြုဝ်ကြာမ် ဂေ ဒူအီ အီ ဇုတ် လုတ်။ ဂေ ဘော ဘူင် အီ တူ ကာဆိူဝ် အီ တူ ဒူပ် ဒါရာ ဒီ ဂေ ဒူအီ အာမျုဝ် ဟဝ်။

30 အုဝ် ဟဲ့ ဟြေတ့် ဝီ အီ ဒီ စွယ် အုဝ် ကာလာင် ဒီ ဂေ၊ တဲး ဂေ ဝဲန် မှာပ် ဂေ၊ ကွဲ့ တဲး အုဝ် လုဝ် ပျာတ့် ဝဲန် မိူင် ဂေ တီ။ အုဝ် ယီ တူ ယိုဝ် ခေါ အူ ဝီ။

31 ပါယ် တီ အုဝ် မိူဝ် ပီရူ အုဝ် ဒီ ဂေ၊ တဲး န့ ကော ပီ ငဝ် ဟဲ့ စုဝ်း ဒဲင် ဂိန့် ဂေ ကူပ် မှာပ် ပဲ့ ဟဲ့ ဘူင် ဂေ တီ။ အုဝ် မိူဝ် ပျာတ့် ဝဲန် ဂေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။