1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဂြုဝ်း အီ ဒမ် မှာပ် ဒီ ဒူအီ ခဲင် မိူင် ယေရူဆာလဲမ်၊ ကာလာင် လွင် ဟုဝ် ဇဝ်ဖြာ ဒီ ဇမ် ဒုက်။ တဲး မဲ ကာလာင် ဒီ ဂေ ဒူအီ အီဆာရေလ ပါယ် နီ။ 3 ‘ဇဝ်ဖြာ ဝီ တဝ်း၊ အုဝ် ဒီ ဘဲန် ရန်ဆူ ဘေ။ အုဝ် ဒီ ထွတ် လေး မာပွါ့ လာင် အုဝ် ခဲင် ဘြာမ် အန်။ အုဝ် ဒီ ဒဲပ် ဘော ဒူအီ မွှိုမ် ဘော ဒူအီ ဟာယ် ဘောကာဂ့လျီတ် အီ ကွယ် ကာတဲ ဘေ။ 4 ပါယ် တီ အုဝ် ဒီ တာ မာပွါ့ လာင် အုဝ် တီ၊ ဒဲပ် ယမ် တူတ့် ဒူအီ အီ ကွယ် ဘ့လာက် နာ တေတ့်၊ တဲး န့ ကော ဇမ် ဘ့လာက် နာ ကွာ။ 5 ခဲ့ ကွယ် ဂေ ဒူအီ ဘောကာဂ့လျီတ်၊ ဂေ ဒီ ဘော နပ်၊ ဆေ အုဝ် အီ မုး ဇဝ်ဖြာ ဟီ ထွတ် လေး မာပွါ့ လာင် ခဲင် ဘြာမ် အန်၊ အုဝ် တူ ဝီ စျှီပ် အုန် အန် အာတ့် ဟဲ့ ဘူင် ဟွတ့် တူတ့်။

6 အိုယ် ဂွန် ဒူအီ၊ ကူပ် န့ ဒီ ဘဲန် ပါယ် တီ တဲး မဲ ပီ ကာပျာတ့် နဝ်း မဲ။ တဲး မဲ က့လိုဝ် ငှဝ် ဘော ငှုန် ဒေါ ကွယ် မဲ နာ အာတ့် ဂေ ဒူအီ ကိူန်။ 7 ဆေ ဂေ ဘော ဒီမွှတ် မဲ တဝ်း၊ မှဝ် န့ ပါယ် ပီ ငှုန် မဲ။း တဲး မဲ ဝီ ကာလာင် ဒီ ဂေ တဝ်း၊ အုဝ် ငှုန် ကူပ် ဒုက် တာင် အီ ဒီ တး။ ဆေ ဒုက် တာင် တီ ဟီ တး ဇမ်၊ န့ ဒီ မွှိုမ် ယုဝ် ကာဆဝ်။ န့ ဒီ ဘော ဘဲန် ဒီလှး န့စမ် ဒီ ဂေ။ နဝ်း ယ ဂေ မိူဝ် ဒီ ဟြာယ် တူတ့်။ န့ ဒီ ဘော ဘဲန် ကိန့်ကြူင့် ဒီယုး ဒီယေန့် ဒီ ဂေ။ အာခြာဝ် တီ၊ န့ ဒီ ဘော တး ဇမ် အာခ်ု မှာန်။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

8 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 9 “အိုယ် မဲ ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ ဒီ ဂေ ဒူအီ ကိူန် တဝ်း၊ ဇဝ်ဖြာ ဟဲ့ ကာလာင် ပါယ် နီ။

‘န့ ပီ အန် ဇဝ် ဟဲ့ လာ့ အုန် မာပွါ့ လာင် အန်၊ တဲး န့ လမ် ကာဆဝ်။ အန် မိူဝ် ဟဲ့ ဖ တဲး န့ ကော ကာလ မာဘြိဝ်။

10 အန် ဟဲ့ လာ့ အုန် တဲး န့ လမ် ကာဆဝ်၊ တဲး အန် ပွိုန် ဒီ ငဝ်း ယမ် အီ ဟဝ်။ အန် မိူဝ် ဟဲ့ ဖ အုန်၊ တဲး န့ ကော ကာလ မာဘြိဝ် ပီ ပ့လ မ့ပ့လေတ့်။ ဆေ ဟီ ပါယ် တီ အေ အာဝ် ဟူ ပွိုန် ခူယ်။ ခဲင် မိူင် ယူဒါ အုဝ် ဒီ ဘော ပွိုန် လုက်တာယ် ဘ့လာ လျီး ပီ ဂူင့် ဂွန် ကာညူမ်။

11 မာပွါ့ လာင် တီ၊ ဟဲ့ လာ့ အုန် ဘော ဖ အုန်၊ တဲး န့ ပွိုန် ဒီ ဒိုဝ်း စ်ု။ န့ ဘော ဟဲ့ လာ့ အုန် တဲး န့ လမ် ကာဆဝ်၊ တဲး ဒါ အီ ဂူင့် မာပွါ့ လာင် တီ ပွိုန် ဒီ ဒဲပ် ယမ် အီ ဟဝ်။

12 အိုယ် ဂွန် ဒူအီ၊ တဲး မဲ က့လိုဝ် ငှဝ် ဘော ယာမ် တာင်။ မာပွါ့ လာင် တီ န့ ဒီ ဘော ဒဲပ် ဂေ ဒူအီ ပီ အိုပ် အုဝ် ဘော ဂေ ဒါ တာင် အီ အိုပ် ဂေ ဒူအီ အီဆာရေလ။ ဂေ ဒီ ကာဒုး ဒီ ယမ် ဒူပ် ဂေ ဒူအီ ပီ အိုပ် အုဝ် ဘောကာဂ့လျီတ်။ ခုဝ် အန် တီ၊ တဲး မဲ ဝီ က့လိုဝ် ဝီ ကာထ ဘင်နဝ်း မဲ။

13 အုဝ် မိူဝ် ထေဝ် ဒီ ယွတ် ဂေ ဒူအီ ပီ အိုပ် အုဝ်။ ဟဲ့ မှာန် အာခါခ်ု၊ ဆေ ဂေ တူ လှုဝ်း မှာပ် ဂေ၊ တူ ကာပ့လု နဝ်း ဂေ၊ ဂေ လုဝ် ခမ် ဇိုဝ် တီ ဒွန် မျုဝ်။

14 အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ၊ တဲး မဲ ကာထ ဒဲ မဲ၊ တဲး အီ ထူမ်။ ခုဝ်၊ မာပွါ့ လာင် တီ ဘော ဒဲပ် ဆေဆေ။ န့ ဘော မုး မာပွါ့ လာင် အီ ဒီ ဒဲပ် ယမ် ကိူန် ကာဆဝ်။ မာပွါ့ လာင် တီ၊ န့ ဒီ ဘော ရူပ် ဂေ။

15 မာပွါ့ လာင် တီ ဒီ ဘော ဘူင် တဲး ဂေ ဒူအီ ပီ အိုပ် အုဝ် ဒီလှး၊ တူ မိုဝ်း ပ့လူမ် ဂေ ဟဲန့်။ န့ ဘော တဲး ဂေ ကိူန် ဒီပ့လာတ် ကေး။ အုဝ် ဟဲ့ တဲး ဂေ ဂူင့် မာပွါ့ လာင် ကွယ် ဒီ မာလုဝ်း မိူင်။ အုဝ် ဟဲ့ လာ့ အုန် မာပွါ့ လာင် တီ၊ ဟဲ့ ရာဝ် ပီ ပ့လ မ့ပ့လေတ့်။ ဂေ ဘော ဘ်ု ဒီ ဒဲပ် ယမ် အီ ဟဝ် ခဲင် မိူင် ဂေ။

16 အိုယ် မဲ ဒါ အီ ဂူင့် မာပွါ့ လာင် အီ ဟဲ့ လမ် ကာဆဝ်၊ တဲး မဲ ဒဲပ် ဘော နာ အာဂ ဘော နာ အာအး။ တဲး မဲ ဒဲပ် ဘော ဒွန် ဘ့လာက် ပီ မာငး ဟာဝ် မဲ။

17 အုဝ် မိူဝ် ကာထ ဒဲ အုဝ်၊ တဲး နဝ်း ရူ အုဝ် ဝီ ယေန်။” အုဝ် ဇဝ်ဖြာ ဟဲ့ ကာလာင် အုန် ပါယ် တီ။

18 ဇဝ်ဖြာ ပီ ဝီ ကာလာင် ဒီ အုဝ် တဝ်း၊ 19 “အိုယ် ဂွန် ဒူအီ၊ တဲး မဲ မှာယ် အုန် န့တေန့် အာ ညွင့် အာဒါ ခုန်ဒီခမ် အီ အိုပ် မိူင် ဘာဘဲ။ ဒါ ဆိုက် အန် ဒီ ဘော ဂူင့် တး မာပွါ့ လာင် ဂေ။ န့တေန့် အာ ညွင့် တီ တဲး ဂါယ် ဘော လေး တး ခဲင် မိူင် အူ မိူင်။ ဒီ ကာယဝ်း န့တေန့် ဘူင် တဲး န့ မိုဝ်း လွှက့် အီ နှဲ န့တေန့် အီ ဟာဝ် နာ ကွယ် မိူင် အူ မိူင်။ 20 ဘော န့တေန့် ပေါ အူ ဘ့လာက် ဘူင် တဲး န့ နှဲ တဲး ခုန်ဒီခမ် ဟာဝ် ဒီ မိူင် ရာဘာ အီ မုး ဒူင် ကွယ် ဒူအီ အာမုဝ်ရိတ်။ န့တေန့် ပေါ အူ ဘ့လာက် တဲး န့ ဟာဝ် နာ မိူင် ယေရူဆာလဲမ် အီ ဟဲ့ မိုဝ်း ရဲင် အီ ကွယ် ခဲင် ကာဒါယ် မိူင် ယူဒါ။ 21 ခုန်ဒီခမ် အီ အိုပ် မိူင် ဘာဘဲ အန် ဒီ ဘော တး စွင့် ဒီ ကာယဝ်း န့တေန့် တီ၊ နှဝ့် တဲး အန် နပ် န့တေန့် ညွင့် ဒီ ဟာဝ် အန်။ အန် ဒီ ဘော ကာတာမ် တာ ဘ့လာ အ အန် ဘော ဒီမွှတ် အာရိုပ် ရာင် ဘော ယွတ် ဒီ ကာဒူမ် ဒုဝ် ဆတ်ဒါဝါ ပီ လှူ ဂေ။ 22 ပါယ် တီ ခဲင် ဒဲ အန် ဘ့လာက် အာအး၊ အန် ဘော ဂူင့် ဘ့လာ အ ပီ ကာတာမ် အန်။ အန် ဝီ ဆီကူ နာ မိူင် ယေရူဆာလဲမ်။ အာတီ၊ အန် ဘျ တဲး အန် ဟာဝ် နာ တီ။ ဇဝ်ဖြာ တဲး အန် ဘော ဒိုဝ်း န့ဂူင့် ဟေ၊ ဒုး မာလုဝ်း မိူင် တဲး န့ ကာပျာတ့် ဘော တဲး အန် ဒွါ အာမိင်၊ တဲး ဒါ ဆိုက် အန် ငဝ်း ယမ် အီ ဟဝ်။ ပါယ် တီ ဂေ ဘော ဒိုဝ်း န့ဂူင့် ဟေ တာင် ဒုး မာလုဝ်း တဲး န့ ကာပျာတ့်၊ တဲး ဂေ ဘူင် ဘ့လဝ့် န့တဲင် ဘော ကွယ် ရူပ် မိူင်။ 23 ဂေ ဒူအီ အီဆာရေလ ယီ တူ ညှိုမ် လွင် အန် တီ ကူပ် ဟဲ့ ဟွတ့် ဒွါ ဂေ ကာဒိက် ဆတ်ဇာ ဒီ ခုန်ဒီခမ် အီ အိုပ် မိူင် ဘာဘဲ။ မာလဲ၊ ခုန်ဒီခမ် တီ ဒီ တဲး ဂေ ဝီ လှုဝ်း ပီ ကာလိုပ် ဂေ ဘော မှေတ့် ဟာဝ် ဂေ။

24 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ ‘မှာပ် ပဲ့ ဟဲ့ ဘူင် ဘေ၊ ဟဲ့ ဟွတ့် လိုဝ်း ဆီချာ။ အီ ဟဝ် ဟဲ့ ဟွတ့် နပ် ခဲ့ ကာဘး ဘေ ဒီ အုဝ်။ ဘော ခဲ့ ပီ ဘူင် ဘေ ဒွန် မျုဝ် ဟဲ့ ဟွတ့် ဘျ တူတ့် မှာပ် ဘေ။ ခုဝ်၊ ဘေ ဘော လုဝ် ခမ် မှာပ် ဘေ၊ တဲး အုဝ် ဘော အာပ် ဘေ ဒီ ရန်ဆူ ဘေ။

25 အိုယ် မဲ ဒါ တာင် အီ အိုပ် ဒူအီ အာမျုဝ် အီဆာရေလ အီ မုး ဒူအီ ဟာယ် ဒူအီ မိူက်၊ ဆီငဲ ဒီ ဒမ် အုဝ် မှာပ် ဒီ မဲ ဟဲ့ ဟွတ့် ဇမ်။ 26 အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ တဲး မဲ ဘုတ့် ဝဲန် ကာမဲ့ မဲ ဘော မင်ဂိုမ် မဲ။ ဒွန် မျုဝ် အာဝ် ဟူ ပီ ဘြိမ် ဒေါ မှဝ်။ အုဝ် ဒီ ဝီ စုဝ့် မျုက် ဒူအီ ဒုက် ဒူအီ ဂိန်၊ တဲး ဂေ ဝီ မိုဝ်း အာဖုင်၊ မိုဝ်း ဆာရေ။ ဂေ အီ ဒွိုမ် အိုပ် အီ ဟဝ်၊ တဲး ဂေ ဝီ စုဝ်း တျီမ်။ 27 အုဝ် ဒီ ဘူင် တဲး မိူင် ကာပျာတ့် လိုဝ် အာခါခ်ု၊ ကာပျာတ့် လိုဝ် ဒွန် မျုဝ်။ ဝါယ် အန် တီ အာဝ် ဟူ ဂုဝ် မိူင်၊ တဲး န့ ကော ဇမ် ပန် ဒီ တး ဝီ အီ ဒီ ကာအာပ် အိုပ် တူတ့်။ အုဝ် ဒီ ဝီ အာပ် ဒွါ မိူင် တီ ဒီ ဝီ တီ။’”

28 ဇဝ်ဖြာ ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ကာလာင် ဂြုဝ်း ဇဝ်ဖြာ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ဒီ ဒူအီ အာမုဝ်ရိတ် အီ ဟဲ့ နဲန ဒူအီ အီဆာရေလ။ ပီ လုဝ် ကာလာင် မဲ န့ ပါယ် နီ။ ဇဝ်ဖြာ ဟဲ့ ရဲန် အုန် မာပွါ့ လာင်၊ တဲး န့ ငဝ်း ဒူအီ ဂေ တီ။ ဂေ ဟဲ့ ဖ မာပွါ့ လာင် တီ၊ တဲး န့ ရာဝ် ပီ ပ့လ မ့ပ့လေတ့်၊ တဲး န့ ပွိုန် ဒီ ငဝ်း ဆီချာ အီ။

29 လွင် ပီ ပါယ် ဘေ၊ န့ ပီ ဘော မိုဝ်း ပီ ဘျ ကာနမ်၊ န့ ယီ တူ မှာန်။ ဘော ဒူအီ အီ ကာလုဝ် လွင် ဘေ၊ မာပွါ့ လာင် တီ ဒီ ကွယ် ဒီ မဲင် ဂေ။ ပန် ဒီ ဇမ် ဆီငဲ အန်၊ ဇဝ်ဖြာ ဘော ငဝ်း ဒူအီ ဟာယ် ဒူအီ မိူက် ကာတဲ ဘေ။

30 တဲး ဘေ ဒိုဝ်း မာပွါ့ လာင် ဘေ၊ ဝီ စျှီပ် အုန် ခဲင် ဘြာမ် အန်။ အုဝ် ဒီ ဝီ ဒမ် မှာပ် ဒီ ဘေ ဒူင် ဖာန် ဘ့လေး အုဝ် ဒီ ဘေ၊ ဒူင် ဂွိုတ် တး ဘေ။

31 အုဝ် မိူဝ် ဟဲ့ ရူ ကာဆဝ် ဒီ ဘေ။ နဝ်း ရူ အုဝ် ဟဲ့ လေး ပီ ငဝ် ပီ ဘုတ် အုဝ်၊ တဲး န့ ကာဆိုမ် ဘေ။ အုဝ် ဒီ ဘော အာပ် ဒွါ ဘေ ဒီ ဂေ ဒူအီ အီ ဟာယ် ကာဆဝ်၊ တဲး ဂေ ဒိုဝ်း ဝဲန် ဘေ။

32 ဂေ ဒီ ဒိုဝ်း ငဝ် ပျာတ့် ဘေ။ ဂေ ဒီ ဘော ငဝ်း ဘေ ခဲင် မိူင် ဒူင် ကွယ် ဘြိမ် ဘေ။ ဝါယ် အန် တီ အာဝ် ဟူ မိုဝ်း အာဆေ အီ နမ်လှုဝ်း ဘေ ဒေါ မှဝ်။ အုဝ် ဇဝ်ဖြာ ဟဲ့ ကာလာင် အုန် ပါယ် တီ။’”