1 ဝါယ် ဟဲ့ မှေတ့် ဟာဝ် ရန်ဆူ ဒီ ဒူအီ အီဆာရေလ၊ ဟဲ့ နုဝ့် ဘူ ဆီနမ်၊ မာဂျီန် မ့ဖန်၊ ဆီငဲ ဂိုဝ်၊ ဂေ အီ မုး ဒါ တာင် ခဲင် ဖိုင် ဒူအီ အီဆာရေလ မင် အီ၊ ဂေ ဘော တး ဒူင် ကွယ် အုဝ်၊ တဲး အုဝ် ဒီမွှတ် ဇဝ်ဖြာ။ ဂေ တး တုတ့် နာ အာတ့် အုဝ်။

2 ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 3 “အိုယ် ဂွန် ဒူအီ၊ တဲး မဲ ကာလာင် ဒီ ဒါ တာင် ဂေ ဒူအီ အီဆာရေလ ဘော တဝ်း၊ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ မှဝ် န့ ပါယ် ပီ လုဝ် တး ဒီမွှတ် ဘေ ဒီ အုဝ်။း အုဝ် တဝ်း အာခ်ု ဒီ ဘေ၊ အုဝ် တူ တဲး ဘေ တး ဒီမွှတ် အုဝ် ခေါ အူ မျုဝ်။’ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

4 အိုယ် ဂွန် ဒူအီ၊ ဆေ မဲ ဆီ ဆုင်ဖျာတ် အာမူ ဂေ၊ တဲး မဲ ဘျ ဒီ ဂေ၊ တဲး ဂေ နပ် လွင် အီ မွှိုမ် ကာအိး ပဲ့ ဟဲ့ ဒွိုမ် ဘူင် ဂုန့် ဒင် ဂေ။ 5 တဲး မဲ ကာလာင် ဒီ ဂေ တဝ်း၊ ‘ဒေါ ဟဲ့ ရဝ်း အုဝ် ဒီ ဂေ ဒူအီ အီဆာရေလ၊ အုဝ် မိူဝ် ဟဲ့ ဒွါ ကာဒိက် ဆတ်ဇာ ဘော ဒိူင် ဒီ ဂေ။ အုဝ် မိူဝ် ဟဲ့ တဲး ဂေ နပ် ဆီချာ လွင် အုဝ်။ ခဲင် မိူင် အဲဂိုပ် အုဝ် ဘော ကာလာင် ဒီ ဂေ တဝ်း၊ အုဝ် မုး ဇဝ်ဖြာ ပီ ကြိုပ် ဘေ။’ 6 အုဝ် မိူဝ် ဟဲ့ ကာဆဲန့် ဒီ ဂေ ဒီ ဒိုဝ်း လေး ဂေ ခဲင် မိူင် အဲဂိုပ်၊ ဝီ တိုယ် ဂေ ခဲင် မိူင် ပီ ရဝ်း အုန် အုဝ် အာဒါ ဂေ။ န့ မုး မိူင် ဘွတ်၊ မိူင် မွှိုမ်။ ကာဒါယ် ခဲင် မိူင် တီ ဟဲ့ ဆီချာ။ မိူင် တီ ဘော မွှိုမ် လွှိုမ် မာန် မိူင် အီ ဟဝ် ဘောကာဂ့လျီတ်။ 7 အုဝ် မိူဝ် ဟဲ့ ကာလာင် ဒီ ဂေ၊ တဲး ဂေ ဝဲန် အာရိုပ် ရာင် အီ မွှိုမ် ကာအိး၊ အီ မုး ပီ အိုင် ပီ ဝုဝ် ဘေ။ ကွဲ့ ဘူင် တဲး ဒုဝ် ဘေ ကာဒါတ့် ကူပ် ကြိုပ် ဘေ အာရိုပ် ရာင် အီ ကွယ် ခဲင် မိူင် အဲဂိုပ် တီ။ ခုဝ်၊ အုဝ် မုး ဇဝ်ဖြာ ပီ ကြိုပ် ဘေ။

8 မာလဲ၊ ဂေ ယီ ဝီ ကာခဲန့် ဒီ အုဝ်၊ တူ ဝီ ထူမ် ဂြုဝ်း ပီ ကာလာင် အုဝ်။ ဂေ မိူဝ် တူ ဝဲန် အာရိုပ် ရာင် အီ မွှိုမ် ကာအိး တီ။ ဂေ မိူဝ် တူ ဝး ဇဝ် ပီ ကြိုပ် ဂေ ဒူအီ ခဲင် မိူင် အဲဂိုပ် တွိုန်။ ကူပ် န့ ပါယ် တီ န့ တဲး အုဝ် ရူ ကာဆဝ် ဒီ ဂေ။ အုဝ် မိူဝ် ဟဲ့ တဝ်း၊ အုဝ် ဒီ ဒမ် မှာပ် ဒီ ဂေ ဒေါ ကွယ် ဂေ ခဲင် မိူင် အဲဂိုပ်၊ တဲး န့ ကော ဘြေ့ ဒီ နဝ်း အုဝ်။ 9 မာလဲ၊ အုဝ် ယီ တူ ဝီ ဘူင် ပါယ် တီ။ ခုဝ်၊ အုဝ် တူ ဆီ တဲး ဂေ လုက်တာယ် အုဝ် ဘော တူ ဆီ တဲး ဆာရေ အုဝ် စှိုမ် နာ အာတ့် ဂေ ဒူအီ ကိူန် အီ ကွယ် ရိုမ် ဒူပ် ဂေ။ အုဝ် မိူဝ် ဟဲ့ ဒွိုမ် ကာလာင် ဒီ ဂေ ဒူအီ အီဆာရေလ တဝ်း၊ ‘အုဝ် ဒီ ယဲတ့် လေး ဘေ ခဲင် မိူင် အဲဂိုပ်။ 10 ပါယ် တီ အုဝ် ဟဲ့ ယဲတ့် လေး ဂေ ခဲင် မိူင် အဲဂိုပ်၊ ဝီ တိုယ် ဂေ ဟာဝ် ခဲင် ပြဲ ကာဟဝ်း။ 11 အုဝ် မိူဝ် ဒွါ တူတ့် ဒါရာ အုဝ် ဒီ ဂေ ဘော မာနုဝ် ဂေ၊ တဲး ဂေ နပ် ပီ ပါယ် ဒါရာ အုဝ်။ ခုဝ်၊ ဒွန် အီ အီ ဘူင် ဒူပ် ဒါရာ အုဝ် တီ၊ အန် ဒီ ပွိုန် ကွယ် ဒါခိုယ်၊ တူ ယမ်။ 12 ဒဲင် တီ အုဝ် မိူဝ် တဲး ဂေ မိုဝ်း ဘော ဆီငဲ ဒီလှဝ်၊ တဲး ဂေ လှုဝ်း ကာဒိက် ဆတ်ဇာ ပီ ဒွါ အုဝ် ဒီ ဂေ၊ တဲး ဂေ လှုဝ်း ဘော လွင် အုဝ် ဇဝ်ဖြာ ဟဲ့ တဲး ဂေ ဘဲန် ဒူအီ အီ ဆီငါ ဘွတ်။

13 ပီ ဘော ဟဲ့ ပါယ် တီ မိူဝ်၊ ဂေ ဒူအီ ပီ အိုပ် အုဝ် ဟဲ့ ဘူင် ကာဘး ဒီ အုဝ် ဒေါ ကွယ် ဂေ ခဲင် ပြဲ ကာဟဝ်း တွိုန်။ ဂေ ဝီ ဝဲန် ဒါရာ ပီ ဒမ် အုန် အုဝ် ဒီ ဂေ။ ဂေ ဘော ဝဲန် ဘော ဒါရာ ပဲ့ ဟဲ့ မာနုဝ် အုဝ် ဒီ ဂေ တဝ်း၊ အာဆေ ဘူင် ဒူပ်၊ အန် ဒီ ပွိုန် ကွယ် ဒါခိုယ်၊ တူ ယမ်။ ဆီငဲ ဒီလှဝ် တီ၊ ဂေ ဝီ ဘူင် တဲး န့ ကာဒါတ့်။ အုဝ် မိူဝ် ဟဲ့ ခြာမ် ဒီ ပျာတ့် ဝဲန် တူတ့် ဂေ ခဲင် ပြဲ ကာဟဝ်း တီ ကူပ် ဟဲ့ ရူ ကာဆဝ် အုဝ် ဒီ ဂေ။ 14 မာလဲ၊ အုဝ် ယီ တူ ဝီ ဘူင် ကူပ် တူ ဆီ တဲး အုဝ် အီ ဟဝ် လုက်တာယ် အုဝ် ဘော တူ ဆီ တဲး ဆာရေ အုဝ် စှိုမ် နာ အာတ့် ဂေ ဒူအီ ကိူန် အီ ဟဲ့ ယိုဝ် ဒေါ ဟဲ့ ယဲတ့် လေး အုဝ် ဒီ ဂေ ဒူအီ အီဆာရေလ ခဲင် မိူင် အဲဂိုပ် တွိုန်။ 15 အုဝ် ဘော ဝီ ဒိူင် တဝ်း၊ အုဝ် အာဝ် ဟူ တိုယ် ဟာဝ် ဂေ၊ တဲး ဂေ ဇမ် ခဲင် မိူင် ပဲ့ ဟဲ့ တဝ်း အုဝ် ဒီ ဒွါ ဒီ ဂေ အီ မုး မိူင် ဘွတ် မိူင် မွှိုမ်၊ ကာဒါယ် ဆီချာ။ န့ မုး ဘော မိူင် အီ ဟဲ့ မွှိုမ် လွှိုမ် မိူင် အီ ဟဝ် ဘောကာဂ့လျီတ်။ 16 အုဝ် ဟဲ့ ဒွါ ကာဒိက် ဆတ်ဇာ ဒီ ဂေ ပါယ် တီ။ ဂေ မိူဝ် တူ ဘူင် ဒူပ် ပီ စ်ု အုဝ် ဂေ ဘူင်။ ခုဝ်၊ ဂေ ဟဲ့ ဝဲန် ဒါရာ ပီ ဒမ် အုန် အုဝ် ဒီ ဂေ။ ဆီငဲ ဒီလှဝ် မိူဝ်၊ ဂေ ဝီ ဘူင် တဲး န့ ဘဲန် ဆီငဲ ကာဒါတ့် ကူပ် ဝီ ကာဒိုက် ကာဒဝ့် နဝ်း ဂေ ဒီ အာရိုပ် ရာင်။ 17 ဂေ ပီ ဘော ဟဲ့ ဘူင် ပါယ် တီ မိူဝ်၊ အုဝ် ယီ ဝီ မိုဝ်း နဝ်း ကာဝေ ဂေ။ အုဝ် မိူဝ် တူ ဝဲန် ဂေ ခဲင် ပြဲ ကာဟဝ်း တွိုန်။ 18 အုဝ် ယီ ဝီ ဒမ် အုန် ဒီ လှုက်လှာန် ဂေ အီ ကွယ် ခဲင် ပြဲ ကာဟဝ်း တီ တဝ်း၊ ကွဲ့ တဲး ဘေ ဝီ ဘူင် ဒူပ် ဒါရာ ပဲ့ ဟဲ့ ဘူင် ဂေ ဂုန့် ဒင် ဘေ တွိုန်။ ကွဲ့ တဲး ဘေ ဝီ ဒူပ် ထုင်ဂျာမ် ဂေ တီ။ ကွဲ့ ဘူင် တဲး ဒုဝ် ဘေ ကာဒါတ့် ကူပ် ကြိုပ် ဘေ အာရိုပ် ရာင်။ 19 တဲး ဘေ ထူမ် ဒါရာ အုဝ် အီ မုး ဇဝ်ဖြာ ပီ ကြိုပ် ဘေ။ တဲး ဘေ ဘော ဘူင် ဒူပ် ဒါရာ ပီ ဒမ် အုန် အုဝ် ဒီ ဘေ။ 20 တဲး ဆီငဲ ဒီလှဝ် ဘဲန် ဆီငဲ ဘွတ်။ ပါယ် တီ န့ ဘျ လွင် ကာဒိက် ဆတ်ဇာ ပဲ့ ဟဲ့ လာယ် ဒွါ ဘေ ဂါယ် အုဝ်။ ဆေ ဘေ ဘူင် ပါယ် တီ ဘေ ဘော နပ်၊ အုဝ် မုး ဇဝ်ဖြာ ပီ ကြိုပ် ဘေ။

21 မာလဲ၊ လှုက်လှာန် ဂေ တီ မိူဝ်၊ ဂေ ဝီ ဘူင် ကာဘး ဒီ အုဝ်။ ဂေ ဝီ ဝဲန် ဒါရာ အုဝ်၊ တူ ဝီ ဘူင် ဒူပ် ဒါရာ ပဲ့ ဟဲ့ မာနုဝ် အုဝ် ဒီ ဂေ အီ တဝ်း၊ အာဆေ ဘူင် ဒူပ် ဒါရာ တီ၊ အန် ဒီ ပွိုန် ကွယ် ဒါခိုယ်၊ တူ ယမ်။ ဂေ ဝီ ဘူင် တဲး ဆီငဲ ဒီလှဝ် ကာဒါတ့်။ အုဝ် မိူဝ် ဟဲ့ ခြာမ် ဒီ ပျာတ့် ဝဲန် တူတ့် ဂေ ခဲင် ပြဲ ကာဟဝ်း တီ ကူပ် ဟဲ့ ရူ ကာဆဝ် အုဝ် ဒီ ဂေ။ 22 မာလဲ၊ အုဝ် တူ ဝီ ဘူင် ပါယ် တီ ကူပ် တူ ဆီ တဲး အုဝ် ဂေ လုက်တာယ် အုဝ် ဘော တူ ဆီ တဲး အုဝ် ဆာရေ အုဝ် စှိုမ် နာ အာတ့် ဂေ ဒူအီ ကိူန် အီ ဟဲ့ ယိုဝ် ဒေါ ဟဲ့ ယဲတ့် လေး အုဝ် ဒီ ဂေ ဒူအီ အီဆာရေလ ခဲင် မိူင် အဲဂိုပ် တွိုန်။ 23 အုဝ် မိူဝ် ဝီ ဒွါ ကာဒိက် ဆတ်ဇာ ပေါ န့ ပွါ ဒီ ဂေ ခဲင် ပြဲ ကာဟဝ်း တီ။ အုဝ် မိူဝ် ဒိူင် တဝ်း၊ အုဝ် ဒီ ဘူင် တဲး ဘေ ကာယဝ်း ဒဲင် ကာဒါယ် နီ၊ တဲး ဘေ ကွယ် ကာလတ့် ခဲင် မိူင် အီ ဟဝ် ဒွန် မိူင် ဒွန် ပ့လုဝ့်။ 24 အုဝ် ဘူင် ပါယ် တီ ကူပ် ဟဲ့ ဝဲန် ဂေ ဒါရာ ပီ ဒမ် အုန် အုဝ် ဒီ ဂေ။ ဂေ ဟဲ့ ဝဲန် ဒါရာ ပီ မာနုဝ် အုဝ် ဒီ ဂေ။ ဂေ ဘော ဝီ ဘူင် တဲး ဆီငဲ ဒီလှဝ် တူ ဘွတ်၊ ဝီ အိုင် ဒီ ကြိုပ် အာရိုပ် ရာင် ပီ ဒွိုမ် ကြိုပ် ဂုန့် ဒင် ဂေ အာတ့် နီ။ 25 ကူပ် န့ ပါယ် တီ အုဝ် ဝီ တဲး ဂေ ဒူပ် ဒါရာ အီ တူ မွှိုမ် ဘော ဒါရာ အီ တူ တဲး ဂေ မိုဝ်း အာဆာက်။ 26 အုဝ် မိူဝ် တဲး ဂေ ကာဒါတ့် ကူပ် ပီ ဒီ လှူ ဂေ။ အုဝ် တဲး ဂေ ဒိုဝ်း ဂွန် ဂိန့် ဂေ ဒွန် အီ၊ လှူ ဂေ။ လွင် အန် တီ၊ အုဝ် ပီ ဆ စ်ု ဂေ ဘူင် ပါယ် တီ အုဝ် ယီ တဲး ဂေ ဘူင်၊ တဲး ဂေ ဝီ ဇွင့် ပီ ဘူင် ဂေ၊ တဲး ဂေ နပ် အုဝ် မုး ဇဝ်ဖြာ ပီ ကြိုပ် ဂေ။”

27 ဇဝ်ဖြာ ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ကာလာင် ဒီ ဂေ ဒူအီ အီဆာရေလ ပါယ် နီ။ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ တဲး န့ လိုဝ်း ခဲ့ တူ ရီမာတ် ဂေ ဂုန့် ဒင် ဘေ ဒီ အုဝ် ဘော လွင် ဟဲ့ ဝဲန် ဂေ ဒီ အုဝ်။ 28 အုဝ် ယီ ဟဲ့ တဲး ဂေ ဟာဝ် ကွယ် ခဲင် မိူင် ပဲ့ ဟဲ့ ကာဆဲန့် အုဝ် ဒီ ဒွါ ဒီ ဂေ။ ဒေါ ဝီ ယိုဝ် ဂေ နွန် အီ တာင် အီ စာ ဘော ဟေ အီ ဆီ ငျီန် န့စမ်၊ ဂေ ဘော ဝီ လှူ ပီ ဒီ လှူ ဂေ ဒဲင် နွန် ဂေ တီ ဘော ဒီ ဒင် ဟေ ဂေ တီ။ ဂေ ဘူင် ပါယ် တီ တဲး န့ ကာဆုး အုဝ်၊ တဲး အုဝ် ရူ ကာဆဝ် ဒီ ဂေ ကူပ် ပီ လှူ ဂေ အီ ဒုဝ့် ခဲင် ငဝ် ဘော လှုဝ် အိုမ် မာငုန်၊ တဲး န့ ဘဲန် ပီ ဒီ လှူ ဂေ။’ 29 အုဝ် မိူဝ် ဒီမွှတ် ဂေ တဝ်း၊ ‘ဒူင် ဟာဝ် ဘေ တီ၊ ဘေ ထာင် အန် မုး မာဆေ။း’ ဂေ ဘော တဲး ဒူင် တီ စိူဝ်၊ ‘ဒူင် စာ’ ကော ဇမ် အာတိုဝ် နီ။

30 ဒေါ တီ နီ တဲး မဲ ကာလာင် ဒီ ဂေ ဒူအီ အီဆာရေလ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ မှဝ် န့ ပါယ် ပီ ဝီ ဘူင် ဘေ နာ တူ မွှိုမ် အီ ပီ ပဲ့ ဟဲ့ ဘူင် ဂေ ဂုန့် ဒင် ဘေ။ မှဝ် န့ ပါယ် ပီ ဝီ ဟာဝ် ကြိုပ် ဘေ အာရိုပ် ရာင် အီ မွှိုမ် ကာအိး။း 31 ဒေါ လှူ ဘေ ပီ ဒီ လှူ အီ မုး ဂွန် ဘေ ဒုဝ့် ခဲင် ငဝ်၊ န့ ဟဲ့ တဲး ဒုဝ် ဘေ ကာဒါတ့် ကူပ် ကြိုပ် ဘေ အာရိုပ် ရာင် ဂေ တီ။ ဘေ ယီ ဆီ ဘူင် ပါယ် တီ ကော ဇမ် ဒေါ တီ နီ။ ဘေ ဟဲ့ ဟွတ့် ဘူင် ပါယ် တီ၊ ဘေ ပီ ဝီ တး ဒီမွှတ် အုဝ်။ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် တဝ်း အာခ်ု ဒီ ဘေ၊ အုဝ် တူ ခ့ဝါင် ဘေ ဒီမွှတ် အုဝ် ခေါ အူ မျုဝ်။

32 ဘေ နပ် ဒီ တဝ်း၊ ဘေ ဆီ ဘူင် ပီ ဒူအီ အာမျုဝ် ဟဝ်၊ ဘေ ဆီ ညိုင် ဂေ ဒူအီ အီ ကွယ် မိူင် တေတ့် မိူင် တ ဘော ကြိုပ် အာရိုပ် အီ မုး ဟေ ဂေ မာဝ် ပီ ဂေ။ မာလဲ၊ အာဂျိုဝ် ပီ ဆီ ပွိုန် ဘေ၊ ဘေ ယီ တူ ပွိုန် ဒေါ မှဝ်။ 33 အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် တဝ်း အာခ်ု ဒီ ဘေ၊ အုဝ် ဒီ ဒိုဝ်း အာဖုင် ဒင်ခုဝ် အုဝ် ဘော ဒဲ အုဝ် အီ မိုဝ်း ဟဲန့် ကိူန် ကာဆဝ်။ အုဝ် ဒီ ဘော အိုပ် ဘေ တဲး န့ ကာဒါန် နဝ်း ရူ အုဝ် တီ။ 34 အုဝ် ဒီ ဝီ ဒိုဝ်း လေး ဘေ ခဲင် မိူင် ဒွန် မိူင် ဒူင် ဟဲ့ ကွယ် ကာယဝ်း ကာရေး ဘေ၊ ဝီ တဲး ဘေ ဝီ တး ကွယ် ကာဇု ကာဒိုမ်။ ပန် အန် တီ အုဝ် ဒီ ဒိုဝ်း အာဖုင် ဒင်ခုဝ် အုဝ် ဘော ဒဲ အုဝ် အီ မိုဝ်း ဟဲန့် အီ ကိူန် ကာဆဝ်။ အုဝ် ဒီ ဘော အိုပ် ဘေ တဲး န့ ကာဒါန် နဝ်း ရူ အုဝ်။ 35 အုဝ် ဒီ တဲး ဘေ ကွယ် ကာတဲ အာမျုဝ် ဒူအီ ဘောကာဂ့လျီတ် အီ ကွယ် ခဲင် ပြဲ ကာဟဝ်း။ ဒူင် တီ၊ အုဝ် ဒီ ဒမ် မှာပ် ဒီ ဘေ နာ ဒုဝ် နာ ဘော အူ ဝီ ဒုဝ် အူ ဝီ။ 36 ဒေါ မွိုန် အုဝ် ဟဲ့ ဒမ် မှာပ် ဒီ ဂေ ဂုန့် ဒင် ဘေ ဒေါ ကွယ် ဂေ ခဲင် ပြဲ ကာဟဝ်း ခူပ် မိူင် အဲဂိုပ် တွိုန်။ ပါယ် တီ အုဝ် ဒီ ဒမ် မှာပ် ဘော ဒီ ဘေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။ 37 အုဝ် ဒီ ဘူင် ပီ ဒါ အီ ဟျီင် မာဘူ ဒေါ ကာယဝ်း အန် ဒုဝ် အီ မွှိုမ် ဂါယ် ဒုဝ် အီ တူ မွှိုမ်၊ ဒေါ တဲး အန် ဟာဝ် ဒွန် ဒုဝ် ခြိုမ် န့ကြွုန် အန်။ အုဝ် ဒီ တဲး ဘေ ဘူင် ဒူပ် ပီ လာယ် ကာဆဲန့် ဘေ ဒီ အုဝ်။ 38 အုဝ် ဒီ ဘော ဒိုဝ်း လေး ဂေ အီ ကွယ် ကာတဲ ဘေ အီ ဘူင် ကာဘး ဒီ အုဝ် ဘော ဂေ အီ ဘူင် နာ တူ မွှိုမ်။ အုဝ် ဒီ ဒိုဝ်း လေး ဂေ ခဲင် မိူင် အီ ဟဝ် ဒူင် ကွယ် ဂေ ဒေါ တီ နီ။ မာလဲ၊ အုဝ် ယီ တူ တဲး ဂေ ဝီ တး လိုပ် ခဲင် မိူင် အီဆာရေလ။ ပန် အန် တီ ဂေ ဒီ ဘော နပ် အုဝ် မုး ဇဝ်ဖြာ။

39 အိုယ် ဘေ ဒူအီ အီဆာရေလ ဘောကာဂ့လျီတ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် တဝ်း၊ တဲး ဘေ ဘူင် ဒူပ် ပီ အိုင် ဘေ၊ တဲး ဘေ ဝိန် ဒီ ကြိုပ် အာရိုပ် ရာင် ဂေ တီ။ ဘေ ပီ ဘော ဟဲ့ ဘူင် ပါယ် တီ မိူဝ်၊ အုဝ် ယီ တဝ်း အာခ်ု ဒီ ဘေ။ ဝါယ် နီ ဘေ ဒီ ဝီ ထူမ် ဂြုဝ်း အုဝ်။ ဘေ အာဝ် ဟူ တဲး အုဝ် ဝီ ရူ ကူပ် ကြိုပ် ဘေ အာရိုပ် ရာင် ဘော လှူ ဘေ ပီ ဒီ လှူ ဘေ တီ။ 40 ခုဝ်၊ ခဲင် မိူင် ပီ အိုပ် အုဝ်၊ ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ ဂေ ဒီ ဘော ကြိုပ် အုဝ် ဒဲင် နွန် အီ ဆီငါ ဘွတ်၊ အီ မုး နွန် စာ အီ ကွယ် ခဲင် မိူင် အီဆာရေလ တွိုန်။ အုဝ် ဒီ ဘော ဝီ လာယ် ကာလဝ့် ဒီ ဂေ ဘော ဝီ မှာန့်၊ တဲး ဂေ တး လှူ ပီ ဒီ လှူ ဂေ ဒီ အုဝ်။ န့ ဘော မုး ပီ ဒီ လှူ အီ ဘွတ် အီ မွှိုမ် လွှိုမ် ပီ ဒီ လှူ အီ ဟဝ်။ န့ မုး ဘော ပီ ဒီ လှူ အီ ဆီငါ ဘွတ်၊ တဲး ဘေ ဝီ တး လှူ ဒီ အုဝ်။ 41 ဝါယ် ဟဲ့ ဟွတ့် အုဝ် ဒိုဝ်း လေး ဘေ ခဲင် မိူင် ဒူင် ဟဲ့ တဲး အုဝ် ဘေ ကွယ် ကာယဝ်း ကာရေး တွိုန်၊ အုဝ် ဒီ ဝီ တဲး ဘေ ဝီ ကွယ် ဒါခိုယ်။ အုဝ် ဒီ တဲး ဘေ ပီ ဆီနမ် အုး ငှုန် အီ ဟဲ့ ဒုဝ့် ခဲင် ငဝ်၊ အီ ဟဲ့ လဝ့် နဝ်း အုဝ်။ ပါယ် တီ ဂေ ဒူအီ ဒွန် မျုဝ် အီ ကွယ် ခူပ် ဒူအီ အီဆာရေလ၊ ဂေ ပွိုန် ဒီ ယိုဝ် လွင် မုး အုဝ် ဇဝ်ဖြာ အီ ဆီငါ ဘွတ်။ 42 ပန် ဟဲ့ ဟွတ့် အုဝ် တဲး ဘေ ကွယ် ခဲင် မိူင် အီဆာရေလ အီ မုး မိူင် ပဲ့ ဟဲ့ ကာဆဲန့် အုဝ် ဒီ ဒွါ ဒီ ဂေ ဂုန့် ဒင် ဘေ၊ ဘေ ဒီ ဘော ဝီ နပ် အုဝ် မုး ဇဝ်ဖြာ။ 43 ခဲင် မိူင် တီ ဘေ ဒီ ဘော ဝီ လှုဝ်း ပဲ့ ဟဲ့ ဘူင် ဘေ အီ မွှိုမ် ဆာယ် ကာဆဝ် ဘော အီ ဟဲ့ တဲး ဘေ မွှိုမ် ကာအိး မွှိုမ် ကာဒါတ့်။ ဘေ ဒီ ဝီ ကာအိး ဒုဝ် ဘြိမ် ဘေ ကူပ် လှုဝ်း ဘေ နာ တူ မွှိုမ် ဘဲန် မျုဝ် ဘဲန် မျုဝ် ပဲ့ ဟဲ့ ဘူင် ဘေ။ 44 ဆေ အုဝ် တူ ဘူင် ဒီ ဘေ နာ တူ မွှိုမ် ခဲ့ ကာအာပ် ဘေ ခမ် ကူပ် တူ ဆီ တဲး အုဝ် စှိုမ် အာဖုင် ဒင်ခုဝ် ဘော ဆာရေ အုဝ်၊ ဘေ ဒီ ဘော နပ် အုဝ် မုး ဇဝ်ဖြာ။ အုဝ် မိူဝ် ဒမ် မှာပ် ဒီ ဘေ ဒူပ် နာ ဟာယ် နာ မိူက် ဘော နာ တူ မွှိုမ် ပီ ဘူင် ဘေ။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

45 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 46 “အိုယ် မဲ ဂွန် ဒူအီ၊ တဲး မဲ ယွတ် နာ တေတ့်၊ တဲး မဲ ဒမ် မှာပ် ဒီ ပြဲ ကာဟဝ်း အီ ကွယ် နာ တေတ့် တီ။ 47 တဲး မဲ ကာလာင် ဒီ ပြဲ ကာဟဝ်း အီ ကွယ် ဘ့လာက် နာ တေတ့် တီ တဝ်း၊ ‘တဲး ဘေ ထူမ် ဂြုဝ်း ပီ ကာလာင် ဇဝ်ဖြာ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ အုဝ် ဒီ ဒိုဝ်း ငဝ် ဒုဝ့် ဘေ။ ငဝ် တီ ဒီ ဘော ကာဆိုမ် ဟေ အီ ဆီ အိမ် ဂေ အီ ဆီ ငျီန် ဘော အီ ဟဲ့ ဟျီ့ ကာဟဝ်း၊ အီ ကွယ် ဒူင် ကွယ် ဘေ တီ။ န့ မိူဝ် တူ မိုဝ်း အီ ပဲ ဒီ ဘျတ် ငဝ် တီ။ န့ ဒီ ဘော ဘြဲ ဟာဝ် ဘ့လာက် နာ တေတ့် ကော ဇမ် ဘ့လာက် နာ ကွာ။ ဒူအီ ဒွန် အီ ဒီ ဘော ယိုဝ် ကာဟွာ့ ကူပ် ငဝ် တီ။ 48 ဂေ ဘောကာဂ့လျီတ် ဒီ ဘော ယိုဝ် န့ မုး အုဝ် ဇဝ်ဖြာ အီ ဟဲ့ ဒုဝ့် ငဝ် တီ။ န့ ယီ တူ မိုဝ်း အာဆေ အီ ပဲ ဒီ ဘျတ်။’”

49 အုဝ် ယီ ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ ကွဲ့ တဲး မဲ စ်ု အုဝ် ဘူင် လွင် အန် တီ။ ခုဝ်၊ ဂေ ဒူအီ ကိူန် ဒီ ဘော တဝ်း၊ ‘ဒူအီ ဝီ နီ၊ အန် နပ် မီ ဒီ ကာလာင် အာဘိုမ် ဒီ ယေ။’”