1 ဆေ ဘေ မိုဝ်း နဝ်း က့လိုဝ် နဝ်း ဆီ ယာမ် ကူပ် ဟဲ့ ယမ် ဂေ ခုန်ဒီခမ် အီ အိုပ် ဒူအီ အီဆာရေလ၊ တဲး ဘေ တဝ်း မှုဝ် ပါယ် နီ။

2 အိုယ် မဲ ဒါ ကာညာ၊ မာ မဲ ဟဲ့ ပီ မာခြင်ဆီ ဒုဝ် မာ။ အန် ဟဲ့ အိတ် ကာတဲ ဂေ မာခြင်ဆီ နှိုမ် ဘော လိုမ်လာ ဂွန် အန်။

3 အန် ဘော ယွတ် လိုမ်လာ ဂွန် အန် အူ ဒုဝ်။ ဒုဝ် တီ၊ အန် ဘော ကြဲ ဒီ တာင်၊ မိုဝ်း ပ့လူမ် ကိူန်။ အန် မိူဝ် ဟေန် တဲး အန် နပ် ဒီ မှေတ့် မာဒုဝ် ပြဲ။ အန် ဘော ဘဲန် မာခြင်ဆီ အီ နပ် ဒီ ဝီ ကဝ့် ဒူအီ။

4 ဒူအီ ဒွန် မျုဝ် ဘော ယိုဝ် လွင် အန် တီ။ ဂေ ဘော မှေတ့် အန် ခဲင် ကာဒဝ် ကာဒါယ် ပဲ့ ဟဲ့ ဂိုဝ်း ဂေ။ ဂေ ဘော ဒိုဝ်း ဝန် ဟိန်၊ ပက် အန် ဘော ဝီ တိုယ် ဟာဝ် အန် ဒီ မိူင် အဲဂိုပ်။

5 ဒေါ ဟဲ့ ဟွတ့် ဘ်ု လှေန့် မာ အန်၊ ဒေါ ဟဲ့ နပ် အန် ပီ နှဝ့် န့ဒဝ့် အန် ဟဲ့ တူတ့်၊ အန် ဘော ဝီ ဟျီင် ယွတ် လိုမ်လာ ဂွန် အန် ပေါ အူ ဒုဝ်၊ တဲး န့ ဝီ ဘဲန် မာခြင်ဆီ အီ မိုဝ်း ပ့လူမ် မိုဝ်း ဟဲန့်။

6 ဒေါ ဟဲ့ ကြဲ ဒီ တာင် ဒုဝ် တီ၊ အန် ဘော ဟာဝ် ဟာဝ် တး တး ဒူပ် ဂေ မာခြင်ဆီ ဒုဝ် ဟဝ်။ အန် ဘော ဟေန် တဲး အန် နပ် ဒီ မှေတ့် မာဒုဝ် ပြဲ ဘော ဘဲန် မာခြင်ဆီ အီ နပ် ဒီ ကဝ့် ဒူအီ။

7 အန် ဘော နပ် ဒီ ပျာတ့် ဒူင် ချြီင် ဂေ ဒါ ဆိုက်၊ ဘူင် တဲး မိူင် ဂေ ရာမ်။ ဒူအီ ခဲင် မာန် မိူင် တွိုန် မိူဝ် ယုဝ် ကာဆဝ် ဒေါ ယိုဝ် ဂေ ဟမ် ဒတ် ရျီင် မာခြင်ဆီ တီ။

8 ပါယ် တီ ဂေ ဒူအီ ဘဲန် မျုဝ် ဘဲန် မျုဝ် ဘော တး ကာဇု၊ ဝီ ကာဂုဝ်း ဒီ အန်။ ဂေ မိူဝ် ဟဲ့ တး ဒွန် မာန် ဒွန် မိူင်၊ ဂေ မိူဝ် ဘ့လး န့ရပ် ဂေ ဒီ အန်။ ဟဲ့ ဟွတ့်၊ ဂေ ဘော ပွိုန် ဒီ မှေတ့် အန် ခဲင် ကာဒဝ် ကာဒါယ် ဒူင် ဂိုဝ်း ဂေ အာဒါ အန်။

9 ဂေ မိူဝ် ဝီ ဒိုဝ်း ကန်ဒါင်၊ ဟပ် အန် ခဲင် ဇီဒိူက်၊ ဝီ တိုယ် ဟာဝ် အန် ဒူင် ကွယ် ခုန်ဒီခမ် ခဲင် မိူင် ဘာဘဲ။ ဂေ မိူဝ် ဝီ ခြွင့် အုန် အန် ခဲင် ကာပိုမ် အီ ဟဲ့ မန် ဆီချာ။ ပါယ် တီ ဂေ ဒူအီ ခဲင် မိူင် အီဆာရေလ အာဝ် ဟူ ပွိုန် ယိုဝ် ဟမ် ရျီင် အန်။

10 မာ မဲ ပီ ဘော ဟေ မာငုန် အီ ဟဲ့ ဆမ် ခူပ် ဘ့လဲင် အိုမ်။ ကူပ် ဟဲ့ မိုဝ်း ကိူန် အိုမ်၊ ဘ့လေ အန် မိူဝ် မိုက်။ ရာ အန် မိူဝ် ကိူန်။

11 ရာ အန် အီ ပ့လူမ် လွှိုမ် အီ ဟဝ် တွိုန်၊ ဂေ ဘော ပွိုန် ဒိုဝ်း အန်၊ ဘဲန် ဘ့လာ လျီး ပီ တာ ခုန်ဒီခမ်။ ဟေ မာငုန် တီ မိူဝ် စာ။ ဒူအီ ဂေ မိူဝ် ဟဲ့ ယိုဝ် ခဲ့ မိုက် လှာ အန် ဘော ခဲ့ မိုက် ရာ အန် ဘော ခဲ့ စာ ဟေ အန်။

12 မာလဲ၊ ဟေ မာငုန် တီ ယီ ဟဲ့ ဝီ ကာဒုး ဒီ ခမ် အီ ဝီ ရိုတ့် ဝဲန် အန် ကူပ် ဟဲ့ ရူ ကာဆဝ် ဇဝ်ဖြာ ဒီ အန်။ ဇဝ်ဖြာ ဟဲ့ ဝီ ဝဲန် ဟေ မာငုန် တီ ဒဲင် ကာဒါယ်၊ တဲး ခုန် အီ တး နာ လေး ဆီငဲ ဝီ တး ဘုတ် အန်၊ တဲး အန် ဟျီ့ ကာဟဝ်း ဘော ယမ်။ ရာ အန် အီ ဟဲ့ ပ့လူမ် တွိုန် မိူဝ် ဟဲ့ ဟွတ့် ဟျီ့ ကာဟဝ်း၊ ဝီ ကာဆိုမ် ခဲင် ငဝ်။

13 ဒေါ တီ နီ၊ ဂေ ဟဲ့ ဝီ ဟာဝ် ဆမ် ဟေ မာငုန် တီ ခဲင် ပြဲ ကာဟဝ်း၊ ဒူင် တူ မိုဝ်း အိုမ်၊ ဒူင် မုး ကာဒါယ် ဟေန့်။

14 ငဝ် မိူဝ် ဟဲ့ လေး ခဲင် ရာ အီ တာင်၊ ဝီ ကာဆိုမ် ဘော ဘ့လေ အန်။ ရာ အန် တီ မိူဝ်၊ အာဝ် ဟူ မိုဝ်း ရာ အီ ပ့လူမ် အီ စှိတ်၊ အာဝ် ဟူ ပွိုန် ဝီ ဘဲန် ဘ့လာ လျီး ပီ တာ ခုန်ဒီခမ်။

အာတီ မုး မှုဝ် အီ တဝ်း ဒေါ က့လိုဝ် ဒေါ ငှဝ်။ န့ ဘော ပွိုန် တဝ်း ဘဲန် ဇေန့် ဘဲန် ဇေန့်။