1 ဇဝ်ဖြာ ပီ ဝီ ကာလာင် ဒီ အုဝ် ပေါ န့ ပွါ တဝ်း၊ 2 “ဂြုဝ်း ထုင် ပီ အွန် ဂေ ဒူအီ အီဆာရေလ ဒီ ကာလာင်၊ န့ မိုဝ်း ဆီဖဝ် ပါယ် မှဝ်။း ဂေ တဝ်း၊ ‘ဂုန့် မာ ဂေ ဒျီင် အိုမ် မာငုန် အီ ပြာင်၊ န့ ဘော ဝီ ဘဲန် ဟြာင် ကာဟိဝ် ဒီ ဂွန် ဂေ။’”

3 ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ “အုဝ် တဝ်း အာခ်ု ဒီ ဘေ။ ဝါယ် နီ၊ ဘေ အာဝ် ဟူ လုဝ် ကာလာင် ဂြုဝ်း ထုင် တီ ခဲင် မိူင် အီဆာရေလ။ 4 ခုဝ်၊ အုဝ် အိုပ် အာဆာက် ဘော နဝ်း ဖွိုမ် ဒူအီ ဒွန် အီ၊ ဘော အာဆာက် ဂုန့် မာ ဘော အာဆာက် ဂွန် ဂေ ဘောကာဂ့လျီတ်။ ဝီ အီ ဘူင် မှာပ် ဒွန် အီ လုဝ် ယမ်။

5 ဆေ န့ မိုဝ်း ဒူအီ အူ ဝီ အီ မိုဝ်း နဝ်း ဆိူဝ် နဝ်း မှာန်၊ အန် မိူဝ် ဘူင် ဒူပ် ဒါရာ။

6 အန် တူ ကြိုပ် အာရိုပ် ရာင် ပီ ကြိုပ် ဂေ ဒူအီ အီဆာရေလ။ အန် မိူဝ် တူ ဟူမ် ပီ လှူ ဂေ ဒဲင် ကာစှူင့် လှူ ဂေ။ အန် မိူဝ် တူ ဝီ လုတ့် အီဘိုန့် အီ ဟဝ် ဘော တူ အိတ် ရိုမ် ဒူပ် အီဘိုန့် အီ မိုဝ်း ခြိုင် ကာပ့လု။

7 အန် မိူဝ် တူ ခါနှာပ် အာဆေ။ အန် ဘော နပ် ဒီ ဝျီ့ ဒွါ ဒုဝ် မှာန် ဒီ ဒူအီ အီ ထုက် အန်။ အန် တူ ပြာ အာဆေ၊ ယီ နပ် ဒီ လိုမ်လာ ဂေ အီ အေတ့်၊ တူ မိုဝ်း ပီ ဒီ ဟူမ်။ အန် ဘော နပ် ဒီ ဒွါ ခြိုင် တာ ဒီ ဂေ အီ တူ မိုဝ်း၊ အီ ဟဲ့ ဂ့လ။

8 အန် ဘော ဒွါ အီ ကာရဝ်း ကာဝါယ် ဒီ အန်၊ တူ ဒိုဝ်း အျီင် ကိူန်။ အန် ဘော နပ် ဒီ ဝး မျုဝ် အီ ဟာယ် အီ စီစိဝ်။ ဘော နပ် ဒီ ဆုင်ဖျာတ် ဒူပ် ဒါရာ ဒီ ဂေ အီ လာယ် ကာလုတ့် လာယ် ကာထဲန့်။

9 ဝီ အီ ဘူင် ပါယ် တီ ဟဲ့ မုး ဒူအီ အီ ထူမ် အီ ဘူင် ဒူပ် ဒါရာ အုဝ်။ အန် ဟဲ့ မုး ဒူအီ အီ မိုဝ်း နဝ်း ဆိူဝ် နဝ်း မှာန်။ အန် ဒီ ဘော ပွိုန် ကွယ် ဆီချာ၊ တူ စှိုမ် အာဆာက် အန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

10 ဆေ ဒူအီ ဝီ တီ ဝီ မိုဝ်း ဂွန် အီမာယ် အီ ဝီ ဘဲန် ဒါ ဇူန် ဘော ငဝ်း ယမ် ဒူအီ ဟဝ်၊ ဝီ ဘူင် ဒွန် မျုဝ် ပီ တူ ဒွိုမ် ဘူင် ဂုန့် အန်၊

11 ဆေ အန် ဝီ ဟူမ် ပီ လှူ အီ ဒဲင် ကာစှူင့် လှူ ပီ ခြဲ ဇဝ်ဖြာ ကွဲ့ ဟူမ်၊ ဝီ လုတ့် အီဘိုန့် အီ ဟဝ်၊ 12 ဆေ အန် ဝီ ခါနှာပ် ဒူအီ ဂိန် ဒူအီ ဖ့လာန် ဘော ဇူန် အီ ဟဝ်၊ အန် မိူဝ် တူ ဝီ ဒွါ ဝိဝ် ကြုဝ် ပီ တး ကမ် တး ငါမ် အီ ဟဝ် ဒီ အန်၊ ဆေ အန် ဘော အိုင် ဒီ ယွတ် အာရိုပ် ရာင် အီ မွှိုမ် ကာအိး၊ မွှိုမ် ကာဒါတ့်၊ 13 ဆေ အန် မိူဝ် နပ် ဒီ ဒွါ အီ ဟဝ် ကာရဝ်း ကာဝါယ် ဒီ အန်၊ အန် ယီ ဒိုဝ်း ကိူန် အျီင် အန်၊ ဒူအီ အီ ဘူင် ပါယ် တီ အာဆာက် အန် ဒီ စှိုမ်။ ခုဝ်၊ အန် ဟဲ့ ဘူင် အီ မွှိုမ် ကာအိး ဒွန် မျုဝ်။ ဂေ ဒီ ငဝ်း ယမ် အန် အာခ်ု မှာန်။ အန် လုဝ် ခမ် ဒီ ယမ် ကူပ် မှာပ် ပီ ဘူင် အန် တီ။

14 မာလဲ၊ ဆေ ဒူအီ ဝီ တီ ယီ ဝီ မိုဝ်း ဂွန် အီမာယ်၊ ဆေ ဂွန် အီမာယ် အန် တီ ယီ ဝီ ယိုဝ် အီ တူ မွှိုမ် ပီ ဘူင် ဂုန့် အန် တီ၊ အန် ဝီ နပ် ဒီ ကာဒွါ့ ကာဖာ၊ တူ ဝီ ဘူင် ပီ ပီ ဘူင် ဂုန့် အန်။

15 အန် မိူဝ် တူ ဟူမ် ပီ လှူ ဂေ ဒဲင် နွန်၊ တူ ကြိုပ် အာရိုပ် ရာင် ပီ ကြိုပ် ဂေ ဒူအီ အီဆာရေလ၊ တူ ဘူင် တဲး အီဘိုန့် အီ ဟဝ် စှိုမ် ဆာရေ။

16 အန် မိူဝ် တူ ခါနှာပ် အာဆေ၊ တူ ဒိုဝ်း ကြုဝ်ကြာမ် ပီ တး ကမ် တး ငါမ် အီ ဟဝ် ဒီ အန်။ အန် တူ ဖာတ် တူ ဒိုဝ်း ကြုဝ် အီ ဟဝ်၊ အန် ဘော ဟျီင် ဒူအီ အေတ့် ဒူအီ အီ ကာပြာန့် ဘော ဒွါ ခြိုင် တာ ဒီ ဒူအီ အီ တူ မိုဝ်း။

17 အန် ဘော နပ် ဒီ ဝး အီ ဟာယ် အီ မိူက်။ အန် မိူဝ် တူ ဒိုဝ်း အျီင် ဒီ ဂေ အီ ကာရဝ်း ကာဝါယ် ဒီ အန်။ အန် ဘော ဘူင် ဒူပ် ဒါရာ အုဝ် ဒွန် မျုဝ် ဘော ထူမ် ဂြုဝ်း ပီ ကာလာင် အုဝ်။ ဒူအီ တီ၊ အန် မိူဝ် တူ လုဝ် ယမ်၊ ဟဲ့ ပွိုန် ကွယ် ဒါခိုယ်၊ ကွယ် ဂျာမ်ဆာ။

18 အီ မုး ဂုန့် အန်၊ ကူပ် ဟဲ့ ခါနှာပ် အန် ဘီနွင် ဝေါဝဲ အန် ဆေဆေ ဘော ဖာတ် ဒိုဝ်း ကြုဝ်ကြာမ် ဂေ၊ ဟဲ့ ဘူင် အီ ဟာယ် အီ မိူက် ကာတဲ ဂေ ဒူအီ အာမျုဝ် အန်၊ အန် လုဝ် ခမ် ဒီ ယမ် ကူပ် မှာပ် အန် တီ။

19 မာလဲ၊ ဘေ ယီ နပ် ဒီ ဝီ ဒီမွှတ် အုဝ် တဝ်း၊ ‘မှဝ် န့ ပါယ် ပီ တူ လုဝ် ခမ် ဂွန် အန် မှာပ် ဒူပ် ဂုန့် အန် တီ။း’ အုဝ် ယီ တဝ်း၊ ဂွန် အန် ယီ ဟဲ့ ဘူင် ဒူပ် ဒါရာ၊ ဘူင် နာ မုး နာ မှာန်၊ ဘူင် ဒူပ် ပီ ကာလာင် အုဝ် ဒွန် မျုဝ် ဘော ဒူပ် ဆီချာ ဒါရာ အုဝ်၊ အာဆာက် အန် တူ စှိုမ်။ 20 ဒူအီ အီ ဘူင် ကာလိုပ်၊ ဘူင် မှာပ်၊ အန် လုဝ် ခမ် ဒီ ယမ်။ ဂွန် တူ လုဝ် ခမ် မှာပ် ဂုန့်။ ဂုန့် မိူဝ် တူ လုဝ် ခမ် မှာပ် ဂွန်။ ဒူအီ ဘွတ် ဒူအီ မွှိုမ်၊ အန် ဒီ ပွိုန် အာဂျိုဝ် ပီ ဘူင် အန် နာ ဘွတ် နာ မွှိုမ်။ ဒူအီ ဟာယ် ဒူအီ မိူက် အန် လုဝ် ခမ် မှာပ် ပီ ဘူင် အန် အီ ဟာယ် အီ မိူက် တီ။

21 မာလဲ၊ ဆေ ဒူအီ ဟာယ် ဒူအီ မိူက် ယီ ဝီ ဝဲန် အီ တူ မွှိုမ်၊ ဝီ ဘူင် ဒူပ် ဒါရာ ဒွန် မျုဝ်၊ ဝီ ဘူင် နာ ဆိူဝ် နာ မှာန်၊ ဘူင် နာ ဘွတ် နာ မွှိုမ်၊ အန် တူ လုဝ် ယမ်၊ အန် ဒီ ဝီ ပွိုန် ကွယ် ဒါခိုယ်၊ ကွယ် ဂျာမ်ဆာ အာခ်ု မှာန်။ 22 အုဝ် ဇဝ်ဖြာ ဒီ ဂဝ်း ဝဲန် မှာပ် ပဲ့ ဟဲ့ ဘူင် အန် ဒွန် မျုဝ်။ ကူပ် ဟဲ့ ဝီ ဘူင် အန် နာ ဘွတ် နာ မွှိုမ်၊ အာဆာက် အန် မိူဝ် တူ စှိုမ်။ 23 ဆေ အုဝ် ယိုဝ် ဒူအီ ဟာယ် ဒူအီ မိူက် ယမ်၊ ဘေ ထာင် နဝ်း အုဝ် ဟဲ့ ဒါခိုယ်။း အာဝ် မုး ပါယ် တီ။ အုဝ် ယီ ဆီ တဲး အန် လှုဝ်း ဘော ဝဲန် မှာပ် အန်၊ ဝီ တဲး အန် ပွိုန် ကွယ် ဒါခိုယ်၊ ကွယ် ဂျာမ်ဆာ။’ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် တီ။

24 မာလဲ၊ ဆေ ဒူအီ အီ မိုဝ်း နဝ်း ဆိူဝ် နဝ်း မှာန် ဝီ ဝဲန် နာ ဘွတ် နာ မွှိုမ်၊ ဝီ ဘူင် အီ တူ မွှိုမ်၊ ဘူင် အီ မွှိုမ် ကာအိး ပီ ပီ ဘူင် ဒူအီ ဟာယ်၊ ဘေ ထာင် အန် ဒီ ပွိုန် ဒီ ကွယ် ဒါခိုယ်၊ ကွယ် ဂျာမ်ဆာ ဆေဆေ။း အာဝ် မုး ပါယ် တီ။ ခဲ့ ပီ ဘူင် အန် နာ မွှိုမ်၊ အာဝ် မိုဝ်း ဒီခုဝ်။ အန် လုဝ် ယမ် ကူပ် တူ မိုဝ်း အန် နဝ်း ဆိူဝ် ဘော ကူပ် မှာပ် ပဲ့ ဟဲ့ ဘူင် အန်။

25 မာလဲ၊ ဘေ ယီ နပ် ဒီ ဝီ တဝ်း၊ ‘ပီ ဆုင်ဖျာတ် ဇဝ်ဖြာ တီ၊ အာဝ် ကာဆိူဝ်၊ အာဝ် ကာရမ်။’ အိုယ် ဘေ ဒူအီ အာမျုဝ် အီဆာရေလ၊ တဲး ဘေ ထူမ်။ ဘေ ထာင်၊ လွင် ပီ ဆုင်ဖျာတ် အုဝ် တီ အာဝ် ကာဆိူဝ်၊ အာဝ် ကာရမ်။း န့ ယီ မုး ပီ ဘူင် ဘေ အီ ဂုဝ့် ဂဲ့။ 26 ဆေ ဒူအီ နဝ်း ဆိူဝ် နဝ်း မှာန် ဝီ ဝဲန် နာ ဆိူဝ် နာ မှာန်၊ ဝီ ဘူင် အီ တူ ဘွတ် အီ တူ မွှိုမ်၊ အန် လုဝ် ယမ်။ အန် လုဝ် ယမ် ကူပ် ဘူင် အန် အီ ဟာယ် အီ မိူက် တီ။ 27 ဆေ ဒူအီ ဟာယ် ဒူအီ မိူက် ယီ ဝဲန် အီ တူ မွှိုမ်၊ ဝီ ဘူင် အီ ဘွတ် အီ မွှိုမ်၊ ဟဲ့ ဟွတ့် ချွတ် အာဆာက် အန်။ 28 ခုဝ်၊ အန် ဟဲ့ ဝီ လှုဝ်း မှာပ် အန်၊ ဟဲ့ ဝီ ဝဲန် အီ တူ မွှိုမ်။ အန် အာဝ် ဟူ လုဝ် ယမ်၊ အန် ဒီ ဝီ ပွိုန် ကွယ် ဒါခိုယ် အာခ်ု မှာန်။ 29 မာလဲ၊ ဂေ ဒူအီ အာမျုဝ် အီဆာရေလ ယီ ဝီ တဝ်း၊ ‘လွင် ပီ ဆုင်ဖျာတ် ဇဝ်ဖြာ၊ န့ တူ ကာဆိူဝ်၊ န့ တူ ကာရမ်၊’ ဘေ ထာင် ပီ ဆုင်ဖျာတ် အုဝ် တီ၊ န့ တူ ကာဆိူဝ်၊ တူ ကာရမ်။း န့ ယီ မုး ပီ ဘူင် ဘေ အီ ဂုဝ့် ဂဲ့။

30 ပါယ် တီ အိုယ် ဘေ ဒူအီ အာမျုဝ် အီဆာရေလ၊ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဒီ ဆုင်ဖျာတ် အာမူ ဘေ ဒူပ် ခဲ့ ပီ ဘူင် ဘေ ရာင် အာဆေ ရာင် အန်။ ဇဝ်ဖြာ ဟဲ့ ကာလာင် ပါယ် နီ။ တဲး ဘေ ဝဲန် အီ ဟာယ် အီ မိူက်၊ ကွဲ့ ဘူင် တဲး မှာပ် ပွိုန် ဒီ အိုပ် ဘေ၊ တဲး ဘေ လိုဝ် စှိုမ်။ 31 တဲး ဘေ ဝဲန် ပီ ဘူင် ဘေ အီ ဟာယ် အီ မိူက် ဒွန် မျုဝ်၊ တဲး ဇဝ်ဖြာ ဝီ မ့ပြာယ် နဝ်း ဖွိုမ် ဘေ၊ တဲး န့ ဘဲန် အီ ကာမာယ်။ အိုယ် ဘေ ဒူအီ အာမျုဝ် အီဆာရေလ၊ မှဝ် န့ ပါယ် ပီ ဆီ ယမ် ဘေ ပါယ် တီ။း 32 အုဝ် တူ ဆီ တဲး ဘေ ယမ် ခေါ အူ ဝီ။ ခုဝ်၊ တဲး ဘေ ဝဲန် အီ တူ မွှိုမ်၊ ကွဲ့ တဲး ဘေ ယမ်၊ တဲး ဘေ ဝီ ပွိုန် ကွယ် ဒါခိုယ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။