1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “တဲး မဲ ဟြေတ့် ဂြုဝ်း အူဖာမာ ဘော ဂြုဝ်း မာကာထ၊ ဝီ ကာလာင် ဒီ ဂေ ဒူအီ အီဆာရေလ။ 3 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ‘န့ ဒွိုမ် မိုဝ်း မာဂ့လာင် တာင်။ အန် ဘော မိုဝ်း ဟိုက် အီ စှိတ် ကာဆဝ် အီ မိုဝ်း အာရူင် ဘဲန် မျုဝ် ဘဲန် မျုဝ် ဒီ ဖျီင် အန်။ ဖျီင် အန် တီ ဘော ဟဲ့ တာင် ဟဲ့ တူင့် ဘော မ့ဘ့လး တာင် ကာဆဝ်။ အန် ဘော ဘိုန့် ဟာဝ် ဒီ နွန် လေဘာနုန်။ အန် စုး ဒီ ကာဒဲ့ ဟေ အာရိတ်။ 4 အန် ဘော ကာပ် ကာဒဲ့ ရာ ဟေ အီ စာ လွှိုမ် အီ ဟဝ်၊ ဝီ ဟာဝ် ဒီ မိူင် ဒူင် ကွယ် ဂေ ဒူအီ အီ ကာစိုဝ်း ကာယွင့် ဘဲန် မျုဝ် ဘဲန် မျုဝ်။ အန် ဘော ဆမ် ရာ ဟေ တီ ခဲင် မိူင် ဂေ အီ ကာစိုဝ်း ကာယွင့် ကြုဝ် ဂေ တီ။

5 အန် ပီ ဝီ ဒိုဝ်း တး ကာအာင် ဆီမာ ဟေ အီ ကွယ် ခဲင် မိူင် အီဆာရေလ၊ ဝီ ဆမ် ခဲင် ကာဒါယ် မွှိုမ် ဒူင် မိုဝ်း အိုမ် ကိူန်၊ တဲး န့ ကော ပီ ဟေ မျုဝ် အီ ကွယ် ခူပ် အိုမ်။ 6 ဆီမာ ပီ ဆမ် အန် တီ၊ န့ ဘော လတ့် ဘော ကြဲ ဒီ တာင်၊ ဘဲန် ဟေ မာငုန် ဒီတဲတ် ဒီတျီမ် အူ ကာဒင်။ ဟေ တီ ယီ မ့ဘ့လး တာင်။ ရာ အန် ဝီ ဟာဝ် နာ ကွယ် မာဂ့လာင် တွိုန်။ ရျီး အန် မိူဝ် လူင် လိုက်၊ ရာ အန် မိူဝ် ကိူန် ကာဆဝ်။ ကာဒဲ့ အန် ဂေ ကာပ့လုယ် အန် မိူဝ် ဂ့လမ် ကာဆဝ်။

7 မာလဲ၊ န့ ပီ ဝီ မိုဝ်း မာဂ့လာင် တာင် ပေါ အူ ဒုဝ်။ ဖျီင် အန် မိူဝ် တာင် ကာဆဝ်။ ဘော ဟိုက် အန် မိူဝ် ကာဒန် ကာဆဝ်။ ရျီး ဟေ မာငုန် တွိုန် ဘော ရာ အန် ယီ ဝီ ဂုဝ့် ဟာဝ် ဒူင် ကွယ် မာဂ့လာင် တီ။ တဲး မာဂ့လာင် တီ ပွိုန် ဒီ ဒိုဝ်း အိုမ်၊ ရိုက် ဟေ မာငုန် ခဲင် မာန် ဒူင် ကွယ် မာဂ့လာင် တီ။ 8 ဟေ မာငုန် တီ၊ ဟဲ့ ဒွိုမ် ကွယ် ဒူင် မုး ကာဒါယ် ဘွတ်၊ ဒူင် မိုဝ်း အိုမ် ကိူန်၊ တဲး ရာ အန် ဂေ ဘ့လေ အန် ဝဲ လေး ကိူန်၊ တဲး အန် ဘဲန် ဟေ မာငုန် အီ ဘွတ် အီ မွှိုမ် ကာဆဝ်။

9 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဒီ ဝီ ဒီမွှတ် ဘေ လွင် ဟေ မာငုန် တီ။ ဘေ ထာင် အန် ဒီ ဘွတ် ဒီ မွှိုမ်။း မာဂ့လာင် ဒုဝ် တွိုန် ဒီ ရိုတ့် ဝဲန် ရျီး အန်၊ ဘေတ့် ဝဲန် ဘ့လေ အန်၊ ဘက် ဝဲန် ဘော ရာ အန်၊ တဲး န့ ဟျီ့ ကာဟဝ်း ယမ်။ န့ မိူဝ် တူ လုဝ် ဒိုဝ်း ဟဲန့် ကိူန် ဘော ဟဲန့် ဒူအီ ဘဲန် ဝီ ဘဲန် ဝီ၊ တဲး န့ ပွိုန် ရိုတ့် ရျီး အန်။ 10 ပီ ဘော မိုဝ်း အီ ဝီ ဆမ် ဟေ တီ၊ ဘေ ထာင် အန် ဒီ ဘွတ် ဒီ မွှိုမ်။း ဆေ ခုန် ဟီ တး နာ လေး ဆီငဲ၊ တး ဘုတ် အန်၊ အန် ဒီ ဘော ဟျီ့ ကာဟဝ်း ဒဲင် ကာဒါယ် ဒူင် ဟဲ့ ဆမ် အီ ဒီ အန်။’”

11 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ န့ ပွါ တဝ်း၊ 12 “တဲး မဲ ဝီ ကာလာင် ဒီ ဂေ ဒူအီ အီ အိုင် ဒီ ဘူင် ကာဘး ဒီ အုဝ် တဝ်း၊ ‘ဘေ နပ် ဂြုဝ်း တီ အီ ကာလာင် လွင် မာဆေ။း’ ဟဲ့ ဟွတ့်၊ မဲ ဘော ဝီ ကာလာင် ဒီ ဂေ တဝ်း၊ ‘ခုန်ဒီခမ် အီ အိုပ် မိူင် ဘာဘဲ ဟဲ့ တး ဒီ မိူင် ယေရူဆာလဲမ်။ အန် ဘော တး မှေတ့် ဟာဝ် ခုန်ဒီခမ် ဂေ ဘော ဂေ အာမူ အာမာတ် အန် ဘောကာဂ့လျီတ် ခဲင် မိူင် ဘာဘဲ။ 13 အန် ဒီ ဘော ဒိုဝ်း ဒူအီ အူ ဝီ ခဲင် ခြိုဝ် ခုန်ဒီခမ် တီ၊ ဝီ လာယ် ကာဆဲန့် ဒွါ ကာဒိက် ဆတ်ဇာ ဒီ အန်။ အန် ဘော မှေတ့် ဟာဝ် ဂေ ဒါ တာင် အီ ယဲတ့် ဂေ အီ ကွယ် ခဲင် ကာဒါယ် မိူင် ဂေ။ 14 အန် ဘူင် ပါယ် တီ တဲး မာန် မိူင် ဂေ တီ ဇမ် ဒုက်၊ ကွဲ့ တဲး န့ ဆီ ပွိုန် ဒီ ဝီ ဘဲန် ပီ ဘြိမ်။ မာလဲ၊ ဆေ ဂေ ဒူပ် ပီ ကာဆဲန့် ဂေ၊ ဂေ တူ လုဝ် ယမ်။ 15 ခုန်ဒီခမ် အီ အိုပ် မိူင် ယူဒါ ယီ ဝီ ဘူင် ကာဘး ဒီ ခုန်ဒီခမ် ဘာဘဲ။ အန် ဟဲ့ ဝီ စ်ု ဒါလာမ် အန် ဟာဝ် ဒီ မိူင် အဲဂိုပ်၊ တဲး အန် ဟာဝ် မှာန့် မင်ပြွင့် ဂေ ဒါ ဆိုက် အီ မိုဝ်း ပ့လူမ် တာင် အီ ကျ ဒီ ကာဂုဝ်း။ ဘေ ထာင် ဒူအီ အီ ဘူင် ပါယ် တီ ဘော ဒူအီ အီ ပျာတ့် ကာဒိက် ဆတ်ဇာ၊ အန် ဒီ ပွိုန် ဒီ လွတ်။း’”

16 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဇဝ်ဖြာ ကာလာင် ဂြုဝ်း မှာန် အာခါခ်ု။ ခုန်ဒီခမ် တီ၊ အန် ဒီ ယမ် ခဲင် မိူင် ဘာဘဲ။ ခုဝ်၊ အန် ဟဲ့ ဝဲန် ကာဒိက် ဆတ်ဇာ ပီ လာယ် ကာဆဲန့် အန် ဒီ ခုန်ဒီခမ် မိူင် ဘာဘဲ အီ ဟဲ့ တဲး အန် ဘဲန် ခုန်ဒီခမ်။ 17 ဒါ ဆိုက် ခုန်ဒီခမ် မိူင် အဲဂိုပ် ပီ ဘော ဟဲ့ ကိူန် ကာဆဝ်၊ မိုဝ်း ပ့လူမ် မိုဝ်း ဟဲန့် ကိူန် မိူဝ်၊ ဂေ တူ ပွိုန် စွယ် မိူင် ယေရူဆာလဲမ် ဒေါ ဟဲ့ ဂုဝ် ဂေ ဒူအီ မိူင် ဘာဘဲ ဘ့လဝ့် န့တဲင်၊ တဲး န့ ကော စာ ကော ရူပ် မိူင်၊ တဲး ဂေ ပွိုန် ဒီ ငဝ်း ယမ် ကိူန် ဒူအီ။ 18 ခုန်ဒီခမ် ခဲင် မိူင် ယေရူဆာလဲမ်၊ ကူပ် ဟဲ့ ဝဲန် တူ ရုဝ်ဆေ အန် ကာဒိက် ဆတ်ဇာ ပီ ဒွါ အန်၊ ဝါယ် ဟဲ့ ဟွတ့် ဒိူင် အန်၊ န့ တူ တဲး အန် လွတ် အာဖေ အာရေ။

19 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ ‘အုဝ် အီ မုး ဇဝ်ဖြာ ဟဲ့ ကာလာင် ဂြုဝ်း မှာန် အာခါခ်ု။ အုဝ် ဒီ ဒမ် မှာပ် ဒီ ခုန်ဒီခမ် တီ ကူပ် ဟဲ့ ပျာတ့် ဝဲန် အန် ကာဒိက် ဆတ်ဇာ ဘော ကူပ် ဟဲ့ ပျာတ့် အန် ပဲ့ ဟဲ့ ဟွတ့် ဒိူင် အန် ဒီ အုဝ်။ 20 န့ ပီ အုဝ် ဒီ ဘ့လး န့ရပ် အုဝ်၊ တဲး န့ ပ့လိုက် အန်၊ တဲး အုဝ် ပွိုန် ဒီ မှေတ့် အန် ခဲင် ပီ ဒိန့် အုဝ်။ အုဝ် ဒီ ဝီ တိုယ် အန် ခဲင် မိူင် ဘာဘဲ ဘော ဒမ် မှာပ် ဒီ အန် ခဲင် မိူင် တီ ကူပ် တူ ဘူင် ကာဆိူဝ် အန် ဒီ အုဝ်။ 21 ဂေ ဒါ ဆိုက် အန် အီ တဝ် ဟာဝ်၊ ဂေ ဒီ ဘော ယမ် ဒီ မာပွါ့ လာင်။ ဂေ အီ ဆီ ဂိတ် အီ တူ ယမ် ဂေ ဒီ ဝီ ကာယဝ်း ဟာဝ် ဒွန် နာ ဒွန် ဘ့လာက်။’ ပါယ် တီ အုဝ် အီ မုး ဇဝ်ဖြာ ဟဲ့ ဟွတ့် ကာလာင်။”

22 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ဘော ဒိုဝ်း ရာ ဟေ ဒီ ကာဒဲ့ ဟေ အာရိတ် အီ စာ ကာဆဝ်။ အုဝ် ဒီ ဆာကတ် ကာဒဲ့ အန် အီ မွှိုမ် အီ န့စမ်။ ဟဲ့ ဟွတ့်၊ အုဝ် ဒီ ဝီ ဟာဝ် ဆမ် ဒဲင် နွန် စာ။ 23 အုဝ် ဒီ ဆမ် ဒဲင် နွန် စာ အီ ကွယ် ခဲင် မိူင် အီဆာရေလ။ အန် ဒီ ဘော ဝီ န့လုဝ်း၊ မိုဝ်း ရာ၊ မိုဝ်း ဘ့လေ၊ ဝီ ဘဲန် ဟေ အာရိတ် အီ ဘွတ် အီ မွှိုမ်။ ဂေ မာဆိမ် ဒွန် မျုဝ် ဒီ ဘော တး ဘူင် ကာဟုန် ဂေ ခဲင် အပ် ခြိုမ် ရာ ဟေ တီ။ 24 ခဲ့ ကွယ် ဟေ ခဲင် မိူင် တီ ဒီ ဘော နပ်၊ အုဝ် အီ မုး ဇဝ်ဖြာ၊ အုဝ် ဒီ ဝီ ဂ်ု ဟေ အီ ဒီ စာ တဲး န့ ဝီ ဒီတျီမ်၊ ဘော ဟေ အီ ဒီတျီမ်၊ အုဝ် ဒီ ဝီ ဘူင် တဲး အန် စာ။ ဟေ အီ ဆီ ငျီန်၊ န့ ဒီ ဘော ဝီ ဟျီ့ ကာဟဝ်း။ ဟေ အီ ဟဲ့ ဟျီ့ ကာဟဝ်း၊ န့ ဒီ ဘော ဝီ ငျီန် ဝီ အိမ်။ အုဝ် ဇဝ်ဖြာ ဟဲ့ ကာလာင် ပါယ် တီ၊ အုဝ် ဒီ ဘော ဘူင် တဲး န့ ဘဲန် ပါယ် တီ။”