1 ဇဝ်ဖြာ ပီ ဝီ ကာလာင် ဂြုဝ်း ပေါ န့ ပွါ ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင်၊ တဲး ဂေ ဒူအီ အီ ကွယ် ခဲင် မိူင် ယေရူဆာလဲမ် ဝီ နပ် လွင် ပီ ဘူင် ဂေ ဟဲ့ မွှိုမ် ကာအိး ကာဆဝ်။ 3 တဲး မဲ ကာလာင် ဒီ ဒူအီ မိူင် ယေရူဆာလဲမ် ပါယ် နီ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘ဒူင် ဂွိုတ် တး ဘေ၊ န့ မုး မိူင် ကာနန့်။ ဂုန့် ဘေ မုး ဒူအီ အာမျုဝ် အာမုဝ်ရိတ်။ မာ ဘေ မုး ဒူအီ ဟေထိတ်။ 4 ဒေါ ဂွိုတ် ဘေ၊ ဂေ တူ ဆွာ့ ဝဲန် ဝန် ကာတိန့် ဘေ။ ဂေ တူ ဟပ် ဘေ တာ အိုမ် တဲး ဘေ ဆီငါ။ ဂေ မိူဝ် တူ ဒိုဝ်း ဆယ့် ဖဝ်း ဒီ ဘေ၊ တူ ဒိုဝ်း ဒူန့်၊ ကာဘန် ဒီ ဒုဝ် ဘေ။ 5 ဆီငဲ ဂွိုတ် ဘေ တီ၊ အာဝ် မိုဝ်း အာဆေ အီ ကာဝေ ဘေ၊ အီ မိုဝ်း နဝ်း ဆီ လိုမ်လာ ဘေ။ န့ မိူဝ် တူ မိုဝ်း ခေါ အူ ဝီ အီ ရွက့် ဘေ။ ဂေ ဘော ဘ့လေး ဝဲန် ဘေ ကာတဲ ဂ့လ။ ခုဝ်၊ ဆိန့် ဒေါ ဂွိုတ် တး ဘေ၊ အီ ဟဲ့ ကာအိး ဘေ။

6 ဒေါ အန် တီ အုဝ် ဘော တး ဝဝ့် ဟာဝ် ခူပ် ဘေ။ ဘေ ဆီ ဘဲ နှာမ်။ ဘေ ဆီ အိတ် ကာလွှယ် ခဲင် နှာမ် အီ တး ဒေါ ဂွိုတ် ဘေ။ မာလဲ၊ အုဝ် ယီ တူ တဲး ဘေ ယမ်။ အုဝ် ဝီ တဝ်း ဒီ ဘေ၊ တဲး ဘေ အိမ်။ 7 အုဝ် မိူဝ် ဘူင် တဲး ဘေ ဟြေး၊ ဘေ တာင် ပီ ပေတ့် ခဲင် ပြဲ။ ဘေ မိူဝ် ကြဲ ဒီ တာင်၊ ကြဲ ဒီ စာ ဘော ဘဲန် ဒီဘျာ တျီ့ အီ ဟဲ့ စှိတ် ကာဆဝ်။ ဘ့လေ ပူ ဘေ ဘော ကြဲ ဒီ ခိူန်၊ ကြဲ ဒီ တာင်။ ဟိုက် ဘေ ဘော လေး ဒီ ဒုဝ် ဘေ အီ မုး ဒူအီ အီ တူ ဒွိုမ် မိုဝ်း ဒီ တာ ခြိုင်။ ဘေ ဘော ဒွိုမ် ကွယ် အာဂ့လ။

8 ဒေါ ဝီ တး ဝဝ့် ဟာဝ် အုဝ် ပေါ အူ ဇေန့်၊ အုဝ် ဝီ ယိုဝ် ဘေ ဟဲ့ ကြဲ ဒီ တာင် ဘော နပ် ဒီ လာယ် လာယ်။ အုဝ် ဘော ဒိုဝ်း ဆီတုဝ် တုန် အုဝ်၊ ဝီ စှိုပ် ဒီ ဘေ၊ တဲး န့ ကာဘိတ် ဒုဝ် ဂ့လ ဘေ။ ဟဲ့ ဟွတ့်၊ အုဝ် ဘော ကာဆဲန့် ဒီ ရွက့် ဒီ အိုင် ဘေ။ ဟဲ့ မုး ဟဲ့ မှာန် အာခါခ်ု၊ အုဝ် ဟဲ့ ကာဆဲန့်၊ ဟဲ့ ဒွါ ကာဒိက် ဆတ်ဇာ ဒီ ခတ် ဒိုဝ်း ဘေ၊ တဲး ဘေ ပီ အီဘိုန့် အုဝ်။’ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

9 အုဝ် မိူဝ် ဒိုဝ်း ဘေ ဘော ဘာယ် ဝဲန် နှာမ် အီ ဟဲ့ ဒိုက် ဟဲ့ ဘဲ ဒီ ဘေ။ အုဝ် ဒီ ဝီ ဒိုဝ်း နာမန်၊ ဖဝ်း ဒီ ဒုဝ် ဘူင့် ဘေ။ 10 အုဝ် ဝီ ဒိုဝ်း ခြိုင် အီ မုး ဘိက် ပီ ဒဝ့် အီ၊ ဝီ စှိုပ် ဒီ ဘေ။ အုဝ် ဒိုဝ်း ဘော ဆွက့် ဟုန် အီ မုး အာဇ ဘွတ် ကာဆဝ်၊ ဝီ စှိုပ် တဲး ဘေ တာ။ အုဝ် ဝီ ဒိုဝ်း ဘိက် ကာတမ် လုယ်၊ ဝီ ဘြဝ့် တဲး ဘေ တာ။ အုဝ် ဒီ ဝီ ဒိုဝ်း ခြိုင် အီ မုး ဖြဲ ဂေ လာယ်၊ ဝီ စှိုပ် ဒီ ဘေ။ 11 အုဝ် ဝီ ဒိုဝ်း ဆဲန့် ဂေ ခြိဝ်၊ ဝီ ပီစှိတ် ဘေ။ အုဝ် ဝီ ဒိုဝ်း ဂန်ဒဲ၊ စှိုပ် ဒီ ဒဲ ဘေ၊ အုဝ် ဟဲ့ ဒိုဝ်း ဘော မာကာဝဲ့ ဆာယ်ဂျုဝ်၊ ဝီ ဟွယ် ဒီ မဲင် ဘေ။ 12 အုဝ် မိူဝ် ဒိုဝ်း ခ့ဝင် ပီ ဟွယ် အီ ဒီ ဂုင်မုး ဘော ဘီဟျဝ့်၊ ဝီ စှိုပ် တဲး ဘေ တာ။ ဟဲ့ ဟွတ့်၊ အုဝ် ဝီ ဒိုဝ်း မင်ဂိုမ် အီ ဟဲ့ စှိတ် ကာဆဝ်၊ ဝီ စှိုပ် ဒီ ဘေ။ 13 ပါယ် တီ ဘေ မိူဝ် ဟဲ့ ပွိုန် ဒီ တာ ခြိဝ် ဂေ ရွိုန်။ ခြိုင် တာ ဘေ မိူဝ် ဟဲ့ မုး ဘိက် ကာတမ် လုယ် အီ ဟဲ့ စှိတ် ကာဆဝ်။ ဘေ မိူဝ် ဟဲ့ ပွိုန် ဒီ ဟူမ် ခါမုန် အီ ဘူင် တာ ကာပဲ့ အီ ဟဲ့ မွှိုမ် ကာဆဝ်၊ ဟဲ့ ပွိုန် ဒီ ဟူမ် ဘော ငါမ် မာဖျီန် ဘော နာမန်။ ဘေ ဟဲ့ ကြဲ ဒီ စှိတ်၊ ကြဲ ဒီ ဘဲန် နာင် ဟောခမ်။ 14 န့ ဘော လိုဝ်း ဒွန် နာ ဒွန် ပ့လုဝ့် လွင် ဟဲ့ စှိတ် ကာဆဝ် ဘေ တီ။ ခုဝ်၊ ဆာရေ ပဲ့ ဟဲ့ ဒွါ အုဝ် ဒီ ဘေ၊ န့ ဟဲ့ တဲး ဘေ စှိတ်၊ ဟဲ့ ဇေ့ဇုင် တူတ့် ဒွန် မျုဝ်။

15 ပီ ဘော ဟဲ့ ပါယ် တီ မိူဝ်၊ ဘေ ယီ ဝီ ပီဖုင် ဘေ ကူပ် ဟဲ့ စှိတ် ကာဆဝ် ဘေ ဘော ဟဲ့ မိုဝ်း ဘေ ဆာရေ ကိူန်။ ဘေ ဘော ဝီ ဒဲ့ အီမာယ် ဒွန် အီ အီ တး ဝဝ့် ခူပ် ဘေ၊ တဲး ဂေ တး ကွယ် ဒူပ် ဘေ။ န့ ပီ ဘေ ဝီ ဒွါ စှိတ် ဘေ ဒီ အီမာယ် ဂေ တီ။ 16 ဘေ ဘော ဒိုဝ်း ခြိုင် တာ ဘေ မင် ကာလဝ့်၊ ဝီ ပီစှိတ် ဒူင် ဒီ ကြိုပ် ဘေ ကာနမ်။ ပီ ဘူင် ဘေ၊ န့ ပီ ပီ ဘူင် ယာ မာလမ်။ န့ တူ မိုဝ်း အီ ဒွိုမ် ဘူင် ပါယ် တီ။ ဘော နာ အာတ့် နီ ဟာဝ်၊ န့ တူ ဝီ မိုဝ်း ဒူအီ အီ ဘူင် ပါယ် တီ။ 17 ဘေ ဘော ဝီ ဒိုဝ်း ရွိုန် ဂေ ခြိဝ် ပဲ့ ဟဲ့ ဒွါ အုဝ် ဒီ ဘေ၊ ဝီ ဘူင် အာရိုပ် အီမာယ်။ ဟဲ့ ဟွတ့်၊ ဘေ ဘော ဝီ လာယ် လုတ့် လာယ် လာယ် ဒီ အာရိုပ် အီမာယ် ဂေ တီ။ 18 ဘေ ဘော ဝီ ဒိုဝ်း ဘိက် ပဲ့ ဟဲ့ ဒွါ အုဝ် ဒီ ဘေ၊ ဝီ ဒွါ အာရိုပ် ရာင် ဂေ တီ ကန်။ ဘေ ဝီ ဒိုဝ်း ဘော နာမန် ဘော ဆီနမ် အုး ငှုန် ပဲ့ ဟဲ့ ဒွါ အုဝ် ဒီ ဘေ၊ ဝီ လှူ ဒီ အာရိုပ် ဂေ တီ။ 19 ပီ ဒီ ဟူမ် အီ မုး ကာပဲ့ အီ ဟဲ့ မွှိုမ် ကာဆဝ် ဘော နာမန် ဘော ငါမ် မာဖျီန် ပဲ့ ဟဲ့ ဒွိုမ် ဟျီင် အုဝ် ဘေ ဟူမ်၊ ဘေ ဘော ဝီ လှူ ဒီ အာရိုပ် ရာင် ဂေ တီ၊ တဲး န့ ဘဲန် အီ အုး ငှုန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

20 ဇဝ်ဖြာ ပီ ဝီ တဝ်း၊ “ဒဲင် တီ ဘော ဂွန် ပဲ့ ဟဲ့ ဒွါ အုဝ် ဒီ ဘေ၊ ဘေ ဝီ လှူ ဒီ အာရိုပ် ရာင်၊ တဲး န့ ဘဲန် ပီ ဒီ ဟူမ် ဂေ။ ဘေ ဟဲ့ လာယ် လုတ့် လာယ် လာယ် ခဲ့ တီ၊ ဘေ ယီ ထာင်၊ ညှမ် ကာအာပ် အုဝ် ဒမ် မှာပ် ဒီ ဘေ။ 21 ဘေ ဘော ငဝ်း ယမ် ဂွန် အုဝ်၊ ဝီ လှူ ဒီ အာရိုပ် ရာင် ဂေ တီ။ 22 စုဝ် ဘူင် ဘေ အီ မွှိုမ် ကာအိး မွှိုမ် ကာဒါတ့် တီ၊ ဘေ တူ ဝီ လှုဝ်း ဒေါ ဒီတဲတ် ဘေ၊ ဒေါ ဂွိုတ် အာဂ့လ ဘေ ဘော ဒေါ ကွယ် ရ်ု ဘေ ခဲင် နှာမ် ဆိန့် ဂွိုတ် ဘေ။”

23 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဘေ ဟဲ့ ဘူင် နာ စီစိဝ် ဒွန် မျုဝ်။ ခုဝ်၊ ဘေ ယီ ဒီ ဝီ ဇမ် ဒုက် တာင်။ 24 ဘေ ဟဲ့ ဘူင် ဒူင် ဒီ ကြိုပ် ဘေ အာရိုပ် ခဲင် ဒူင် ဂ့လင် ဒွန် ပ့လုဝ့်။ 25 ဘေ ဘော ဘူင် ကာစှူင့် စာ ဒီ ကာယဝ်း န့တေန့် ဘော ဒီ ဂိန့် န့တေန့် ဒွန် ပ့လုဝ့်။ ဘေ ဘူင် တဲး န့ စှိတ်။ ဘေ ယီ ဝီ ဘဲန် အီ မွှိုမ် ကာအိး မွှိုမ် ကာဒါတ့်။ ဘေ ဘော ဝီ အာပ် ဒုဝ် ဘူင့် ဘေ ဒီ ဒူအီ ဒွန် အီ အီ တး ဝဝ့် ဟာဝ် ခူပ် ဘေ။ ဘေ ဘော ဘူင် ဂါန် ယာ မာလမ်၊ တဲး န့ ဝဲ ကိူန် ဒွန် ဆီငဲ။ 26 ဘေ ဟဲ့ ဘူင် ဒီ ဒူအီ အဲဂိုပ် အီ ကွယ် ကာတတ် ဘေ အီ ဟဲ့ မိုဝ်း နဝ်း ကာဝါတ့် ကာဆဝ်၊ တဲး ဂေ တး လာယ် လုတ့် လာယ် လာယ် ဒီ ဘေ။ ဘေ ဘူင် တဲး န့ ပျာတ့် ဒေါဆ အုဝ်။ 27 ပါယ် တီ န့ ပီ အုဝ် ဟဲ့ ဆူင့် ဒဲ အုဝ် ဒီ ဒမ် မှာပ် ဒီ ဘေ ဘော ဝီ ဒိုဝ်း ဝိဝ် နာ ဘွတ် နာ မွှိုမ် ပဲ့ ဟဲ့ ဒွိုမ် မွင့်ကာရာ ဒွါ အုဝ် ဒီ ဘေ။ အုဝ် ဒီ ဝီ အာပ် ဘေ ဒီ ရန်ဆူ ဘေ အီ မုး ဒူအီ ဖီလီထီ၊ အီ ဇွင့် ဘေ ဘော ကာအိး ပဲ့ ဟဲ့ ဘူင် ဘေ အီ တူ မွှိုမ် တီ။ 28 ကူပ် န့ တူ ဘြေ့ ဒီ နဝ်း ကာဝါတ့် ဘေ၊ ဘေ ဘော ဝီ ဒူပ် ဒူအီ အာဆူရီယာ ဘော ဝီ လာယ် လုတ့် လာယ် လာယ် ဒီ ဂေ။ ဘေ ပီ ဘော ဟဲ့ ဘဲန် ပီ ယာ မာလမ် ဒီ ဂေ မိူဝ်၊ န့ ယီ ညှမ် ဘြေ့ ဒီ နဝ်း ဘေ။ 29 ဘေ ဘော ဟာဝ် လာယ် လုတ့် လာယ် လာယ် ခဲင် မိူင် ဘာဘဲ အီ မုး ဒူအီ အီ ကာစိုဝ်း ကာယွင့် ကြုဝ်။ န့ ယီ ညှမ် ဘြေ့ ဒီ နဝ်း ဘေ။”

30 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဘေ ပီ ဘော ဟဲ့ နပ် ဒီ ဘူင် အီ မွှိုမ် ကာအိး မွှိုမ် ကာဒါတ့် ဒွန် မျုဝ်၊ ဘေ ယီ တူ နပ် ဒီ ဆာယ် အီ။ 31 ဘေ ဘော ဘူင် ဒူင် ဒီ ကြိုပ် ဘေ အာရိုပ် ရာင် ဒီ ဂိန့် န့တေန့် ဘော ဒီ မူတ့် န့တေန့် ဒွန် ပ့လုဝ့်။ ဟဲ့ ဟွတ့် ပီ ဘူင် ဘေ တီ၊ ယီ တူ ပီ ယာ မာလမ် အီ ဟဝ်။ ခုဝ်၊ ဘေ တူ ဒိုဝ်း ငဝ်း အန်။

32 ဘေ ဟဲ့ ပီ အီဘိုန့် အီ မိုဝ်း နဝ်း ကိူန်၊ အီ ဒူပ် အီမာယ် ဒွန် အီ ပီ တူ နပ် ဘေ၊ တဲး ဂေ ပီ အီမာယ် ဘေ။ 33 ယာ မာလမ် ဒွန် အီ ဒီ ဒိုဝ်း ရွိုန် ဒီ အီမာယ် အီ ကွယ် ရိုမ် ဒူပ် အန်။ မာလဲ၊ အီ မုး ဘေ၊ ဘေ ယီ ဝီ ဒွါ လက်ဆွင် ဒီ အီမာယ် အီ ကွယ် ရိုမ် ဒူပ် ဘေ။ ဘေ ဘော ကာဆုး ဂေ တး ဒွန် နာ ဒွန် ပ့လုဝ့်၊ တး လာယ် လုတ့် လာယ် လာယ် ဒီ ဘေ။ 34 ဘေ ပီ ဘော ဟဲ့ ဘူင် ပီ ယာ မာလမ် မိူဝ်၊ ဘေ ယီ တူ ဘူင် ပီ ယာ မာလမ် အီ ဟဝ်။ အာဝ် မိုဝ်း အီ ဒူပ် ဘေ၊ မှာန့် တဲး ဘေ ခ့ဝါင် ဂေ ကွယ် ရိုမ် ဒူပ် ဘေ။ ယီ မုး ဘေ၊ ဘေ ဒွါ ရွိုန် ဒီ အီမာယ်။ ဘေ ယီ တူ ပွိုန် မာဆေ။

35 ကူပ် န့ ပါယ် တီ ဘေ ဒူအီ မိူင် ယေရူဆာလဲမ် အီ ဟဲ့ ပီ ယာ မာလမ်၊ တဲး ဘေ ထူမ် ဂြုဝ်း ဇဝ်ဖြာ။ 36 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘ဘေ ဟဲ့ ဒူပ် နဝ်း ကာဝါတ့် ဘေ၊ ဟဲ့ ဘုတ့် ဝဲန် ခြိုင် တာ ဘေ၊ ဘူင် ပီ ယာ မာလမ်။ ဘေ ဘော အာပ် ဒွါ ဒုဝ် ဘူင့် ဘေ ဒီ အီ ဟဝ် ဘော ဒီ အာရိုပ် ရာင် အီ မွှိုမ် ကာအိး။ ဘေ ဟဲ့ ငဝ်း ယမ် ဘော ဂွန် ဘေ၊ လှူ ဒီ အာရိုပ် ရာင် ဂေ တီ။ 37 ကူပ် န့ ပါယ် တီ အုဝ် ဒီ ဝီ ဒဲ့ အီမာယ် ဒွန် အီ အီ ဟဲ့ ကွယ် ရိုမ် ဒူပ် ဘေ၊ အီ မုး ဒူအီ ပီ ရွက့် ဘေ ဘော ဒူအီ ပီ ဇွင့် ဘေ၊ တဲး ဂေ ဝီ တး ကွယ် ကာဇု တူတ့် ခူပ် ဘေ။ အုဝ် ဒီ တဲး ဂေ ကွယ် ရူပ် ဘေ။ အုဝ် ဒီ ဘော ဘုတ့် လေး ခြိုင် တာ ဘေ ဒီ အာတ့် ဂေ၊ တဲး ဂေ ယိုဝ် ဒုဝ် ဂ့လ ဘေ။ 38 အုဝ် ဒီ ဒမ် မှာပ် ဒီ ဘေ ကူပ် ဟဲ့ ဒူပ် ဘေ အီမာယ် အီ ဟဲ့ ငဝ်း ယမ် အာဆာက် အီ ဟဝ်။ အုဝ် ဒီ ဘော ရူ ကာဆဝ် ဘော ဒမ် မှာပ် အီ တဲး ဘေ ယမ်။ 39 အုဝ် ဒီ ဝီ အာပ် ဒွါ ဘေ ဒီ ဂေ အီ ဟဲ့ ဒွိုမ် လာယ် လုတ့် လာယ် လာယ် ဒီ ဘေ။ ဂေ ဒီ ဘော ပျာတ့် ဝဲန် ဘော ဒူင် ကြိုပ် ဘေ အာရိုပ် ရာင် ဘောကာဂ့လျီတ်။ ဂေ ဒီ ဘော ဖာတ် ဒိုဝ်း ခြိုင် တာ ဘေ၊ ဒိုဝ်း ဘော ရွိုန် ခြိဝ် ဘေ၊ ဝီ ဘ့လေး ဝဲန်၊ တဲး ဘေ ကွယ် ဒုဝ် ဂ့လ။ 40 ဂေ ဒီ ဝီ ကာဆုး ဒူအီ ဟာယ်၊ တဲး ဂေ ဒိုဝ်း မာဝ် ဝိုန့်၊ တဲး ဘေ ယမ်။ ဂေ ဒီ ဝီ ဒိုဝ်း မာပွါ့ လာင်၊ ကာဒဲပ် ဘေ၊ ဘဲန် ဒီဂ်ု ဘဲန် ဒီဂ်ု။ 41 ဂေ ဒီ ဘော ဒိုဝ်း ငဝ် ဒုဝ့် ကာဆိုမ် ကာင် ဘေ၊ တဲး အီဘိုန့် ကိူန် ပွိုန် ဒီ ယိုဝ် ဒေါ ဒမ် အုဝ် မှာပ် ဘေ။ အုဝ် ဒီ ဘူင် တဲး ဘေ စူ ဒီ ဘူင် ပီ ယာ မာလမ်၊ တဲး ဘေ စူ ဒီ ဝီ ဒွါ လက်ဆွင် ဒီ အီမာယ် ဂေ တီ။ 42 ပန် တီ နဝ်း ရူ အုဝ် မိူဝ် ဒီ ဘော ဘြေ့၊ ဘော ဝီ ယေန်။ အုဝ် မိူဝ် ဒီ ဝီ ကွယ် နှိမ် နှိမ်၊ အာဝ် ဟူ ပီရူ ပေါ မ့ပွါ။

43 ဘေ မိူဝ် ဟဲ့ ပိဝ် ဒေါ ဟဲ့ လိုမ်လာ အုဝ် ဒီ ဘေ ဒေါ ဆီ ဒီတဲတ် ဘေ။ ဘေ ဟဲ့ ဘူင် တဲး အုဝ် ရူ ကာဆဝ်။ ခုဝ်၊ အုဝ် ဒီ ဘူင် တဲး ဘေ ဝီ ခမ် တူတ့် ခဲ့ ပဲ့ ဟဲ့ ဘူင် ဘေ တီ။ ဘေ ဟဲ့ ဘူင် မှာပ် ဘဲန် မျုဝ် ဘဲန် မျုဝ်၊ တဲး န့ ဝီ ပွါ ခဲင် နဝ်း ကာဝါတ့် ဘေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။’”

44 ဇဝ်ဖြာ ဝီ တဝ်း၊ “အိုယ် ဘေ ဒူအီ ခဲင် မိူင် ယေရူဆာလဲမ်၊ ဒွန် အီ အီ အွန် ဒီ ကာလာင် ဂြုဝ်း မာကာထ၊ ဂေ ဒီ ဝီ ကာလာင် လွင် ဘေ တဝ်း၊ ‘ဂွန် ဒီဘျာ ဘော ပီ မာ အန်။’ 45 ပါယ် တီ ဘေ ဟဲ့ ပီ မာ ဘေ အီ ကာအိး အီမာယ် ဘြိမ် ဂေ ဘော ဂွန် အာရာင် ဂေ။ ဘေ ဘော ပီ အီကတ် ဘေ ဂေ ဝါ ဘေ အီ ကာအိး အီမာယ် ဂေ ဘော ဂွန် ဂေ။ မာ ဘေ ဘော မုး ဒူအီ အာမျုဝ် ဟေထိတ်။ ဘော ဂုန့် ဘေ မုး ဒူအီ အာမျုဝ် အာမုဝ်ရိတ်။ 46 အီကတ် ဘေ ဘော ကွယ် မိူင် ဆာမာရီ အီ ကွယ် ဘ့လာက် နာ ကွာ။ ဝါ ဘေ ဘော ကွယ် မိူင် ဆုဝ်ဒူမ် အီ ကွယ် ဘ့လာက် နာ တေတ့်။ 47 အာဝ် မုး မီ ဘေ ဘူင် ညိုင် ဂေ ဘော ဘူင် ဒူပ် ပီ ပါယ် ဂေ ဒီ ဘူင် အီ မွှိုမ် ကာအိး တီ။ ဘေ ဟဲ့ ခြန် ဒီ ဘူင် အီ ဟာယ် အီ မိူက် လွှိုမ် ပီ ဘူင် ဂေ။” 48 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် တဝ်း အာခ်ု ဒီ ဘေ၊ ဝါ ဘေ အီ ပီ မိူင် ဆုဝ်ဒူမ်၊ ဂေ တူ ဒွိုမ် ဘူင် အီ ဟာယ် အီ မိူက် အီ ပီ ပီ ဘူင် ဘေ။

49 ဝါ ဘေ တီ ဘော ဂွန် ဂေ၊ ဂေ ဘော ဟဲ့ မိုဝ်း နဝ်း ပီခိုက်။ ဂေ ဘော မိုဝ်း ပီ ဒီ ဟူမ် တဲး ဝတ့် ဂေ ဂိုဝ်း။ ဂေ မိူဝ် တူ ရွက့် တူ ဇွင့် အာဆေ။ ဂေ တူ မိုဝ်း နဝ်း ဆီ စွယ် ဂေ ဒူအီ အေတ့်၊ ဒူအီ ဂိန် ဘော ဂေ အီ ဖ့လာန် အီ တူ မိုဝ်း မာဆေ။ 50 ဂေ ဘော ပီခိုက် ဂေ၊ ဝီ ဘူင် ပီ ဇွင့် အုဝ်။ အုဝ် မိူဝ် ဒိုဝ်း ဝဲန် ဂေ ပီ ပဲ့ ဟဲ့ ဒွိုမ် ယိုဝ် ဘေ။ 51 နာ တူ မွှိုမ် ပီ ဘူင် ဂေ ဒူအီ မိူင် ဆာမာရီ၊ အူ ကာတဲ ဘေ မိူဝ် အာဝ် မုး။ အီ မုး ဘေ၊ ဘေ ဟဲ့ ဘူင် အီ မွှိုမ် ကာအိး အီ ကိူန် ကာဆဝ်၊ ဟဲ့ လွှိုမ် ပီ ဘူင် ဂေ။ နာ တူ ဘွတ်၊ နာ တူ မွှိုမ် ပဲ့ ဟဲ့ ဘူင် ဘေ၊ ဆေ န့ လာယ် ကာဂဝ် ဒီ အီကတ် ဘေ ဂေ ဝါ ဘေ တီ၊ ဂေ ဟဲ့ ဝီ ပီ ဒူအီ အီ မိုဝ်း နဝ်း ဆိူဝ် နဝ်း မှာန်။ 52 ပါယ် တီ ဘေ လုဝ် အူတ် နဝ်း ဘော ခမ် အီ မွှိုမ် ဆာယ်။ နာ စီစိဝ် ပီ ဘူင် ဘေ ဟဲ့ ဟာယ် ကာဆဝ်၊ ဟဲ့ လွှိုမ် ဝါ ဘေ ဂေ တီ။ ဆေ အီ ဝီ လာယ် ကာဂဝ် ဘေ ဂါယ် ဂေ၊ ဂေ ဟဲ့ ပီ ဒူအီ မွှိုမ်။ ခုဝ်၊ တဲး ဘေ ခမ် ဒီ စှိုမ် ဆာရေ ဘော ဆာယ် အီ ကူပ် ဟဲ့ ဘူင် ဘေ တဲး အီကတ် ဘေ ဂေ ဝါ ဘေ ဝီ ပီ ဒူအီ အီ မိုဝ်း နဝ်း ဆိူဝ် နဝ်း မှာန်။”

53 ဇဝ်ဖြာ ဝီ ကာလာင် ဒီ ဂေ ဒူအီ ခဲင် မိူင် ယေရူဆာလဲမ် တဝ်း၊ “အုဝ် ဒီ ဝီ ဘူင် တဲး ဒူအီ ခဲင် မိူင် ဆုဝ်ဒူမ် ဘော မိူင် ဆာမာရီ ပွိုန် ဒီ ကွယ် ဂျာမ်ဆာ ပီ ဘြိမ်။ အုဝ် ဒီ ဘူင် တဲး ဘော ဘေ ဝီ ကွယ် ဂျာမ်ဆာ။ 54 ပန် တီ ဘေ ဒီ ဘော ဆာယ် အီ ကူပ် ဟဲ့ စှိုမ် ဘေ ဆာရေ၊ ကူပ် ဟဲ့ ဘူင် ဘေ ဘဲန် မျုဝ် ဘဲန် မျုဝ်၊ တဲး အီကတ် ဘေ ဂေ ဝါ ဘေ ထာင် ဂေ ဟဲ့ မွှိုမ် လွှိုမ် ဘေ။ 55 အီကတ် ဘေ ဂေ ဝါ ဘေ အီ မုး ဒူအီ ခဲင် မိူင် ဆုဝ်ဒူမ် ဘော ဂွန် အီဘိုန့် ဂေ ဘော ဒူအီ ခဲင် မိူင် ဆာမာရီ ဘော ဂွန် အီဘိုန့် ဂေ၊ ဂေ ဒီ ဝီ ပီ ဘြိမ်။ ဘော ဘေ ဘော ဂွန် ဘေ ဒီ ဝီ ပီ ဘြိမ်။ 56 အာတ့် နီ ဒေါ မိုဝ်း ဘေ နဝ်း ပီခိုက်၊ ဘေ တူ ဒွိုမ် ကာလာင် မာဆေ လွင် မိူင် ဆုဝ်ဒူမ်။ 57 ဒေါ အန် တီ မှာပ် ဘေ အီ ဟာယ် ကာဆဝ် ယီ ညှမ် လိုဝ်း ဆီချာ။ ဒေါ တီ နီ၊ ဘေ ဟဲ့ ဝီ ဘဲန် ပီ နဲန ပီ ဖျာက် အီ ဟဝ် အီ ပီ ဒူအီ ခဲင် မိူင် ဆုဝ်ဒူမ် တီ။ ဘော ဂေ ဒူအီ အာမျုဝ် အေဒူမ်၊ ဂေ ဒူအီ ဖီလီထီ ဘော ဂေ အီ ကွယ် ခူပ် ဘေ၊ အီ ကွယ် ရူပ် ဘေ၊ ဂေ ဘောကာဂ့လျီတ် ဟဲ့ ဝီ ဇွင့် ဘေ။ 58 ပါယ် တီ ဘေ ဒီ ဘော လုဝ် ဝီ ခမ် မှာပ် ကူပ် ဟဲ့ ဘူင် ဘေ အီ မွှိုမ် ကာအိး ဒွန် မျုဝ်။” ဇဝ်ဖြာ ဟဲ့ ကာလာင် အုန် ပါယ် တီ။

59 ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ “အုဝ် ဒီ ဘူင် ဒီ ဘေ ခဲ့ ကာအာပ် အုဝ် ဘူင်။ ခုဝ်၊ ဘေ ဟဲ့ ဝဲန် ကာဒိက် ဆတ်ဇာ ပီ ဒွါ အုဝ် ဒီ ဘေ ဘော ပျာတ့် ဝဲန် ပီ ကာဆဲန့် ဘေ ဒီ အုဝ်။ 60 ပီ ဘော ဟဲ့ ပါယ် တီ မိူဝ်၊ အုဝ် ယီ ဒီ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဘူင် အုဝ် ဒူပ် ဘေ ဆိန့် ဒေါ နှိုမ် ဘေ။ ဟဲ့ ဟွတ့် အုဝ် ပီ ဝီ ကာဆဲန့် ဒီ ဘေ အီ တူ လိုဝ် ဒေါ မှဝ်။ 61 ဒေါ အန် တီ ဘေ ဒီ ဝီ လှုဝ်း လွင် ပီ ဒွိုမ် ဘူင် ဘေ။ ဘေ ဒီ ဘော ဝီ ဆာယ် အီ ဟဝ် ဒေါ ဝီ ရွုး ဘေ အီကတ် ဘေ ဘော ဝါ ဘေ။ အုဝ် ဒီ အာပ် ဒူအီ ဂေ တီ ဒီ ဘေ၊ တဲး ဂေ ဘဲန် ဂွန် ဒီဘျာ ဘေ။ မာလဲ၊ အာဝ် မုး အုဝ် ဒွါ ဂေ ဒီ ဘေ ကူပ် ပီ လာယ် ကာဆဲန့် အေ။ 62 ဝါယ် တီ အုဝ် ဒီ ဝီ ဘူင် ကာဒိက် ဆတ်ဇာ ရိုမ် ဒူပ် ဘေ။ ဘေ မိူဝ် ဒီ နပ်၊ အုဝ် မုး ဇဝ်ဖြာ။ 63 ဒေါ အန် တီ အုဝ် ဒီ ဂဝ်း ဝဲန် ပဲ့ ဟဲ့ ကာလိုပ် ဘေ ဒွန် မျုဝ်။ မာလဲ၊ ဘေ လုဝ် လှုဝ်း ပဲ့ ဟဲ့ ဘူင် ကာလိုပ် ဘေ ဒွန် မျုဝ်၊ တဲး ဘေ ကော ဝီ ဆာယ် ကာဆဝ် အီ ဟဝ်၊ ကွဲ့ တဲး ဘေ ဆီ ယ ကာလာင် ဂြုဝ်း မာဆေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။