1 ဂေ ဒါ တာင် အီ အိုပ် အီ ယဲတ့် ဒူအီ အီဆာရေလ ဂေ ဘော တး ကွယ် နာ အာတ့် အုဝ် ကာမွုန် ဒီ အုဝ်။ 2 ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 3 “အိုယ် ဂွန် ဒူအီ၊ ဒူအီ ဂေ တီ ဂေ ဟဲ့ ဟွတ့် တဲး အာရိုပ် ရာင် အိုပ် နဝ်း ဖွိုမ် ဂေ။ အာရိုပ် ရာင် တီ ဟဲ့ ဟွတ့် ကာဆုး နဝ်း ဂေ၊ တဲး ဂေ ဘူင် အီ တူ မွှိုမ်။ အာဝ် ကာအာပ် အုဝ် ဝျီ့ ဂြုဝ်း ပီ ဒီမွှတ် ဂေ ဒီ အုဝ်။ 4 ကူပ် န့ ပါယ် တီ တဲး မဲ ကာလာင် ဒီ ဂေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဂေ ဒူအီ အီဆာရေလ ဒွန် အီ အီ ဟဲ့ တဲး အာရိုပ် ရာင် အိုပ် နဝ်း ဖွိုမ် ဂေ၊ အီ ဟဲ့ တဲး အာရိုပ် ဂေ တီ ကာဆုး တဲး ဂေ ဘူင် နာ တူ မွှိုမ်၊ ဆေ ဂေ ဒီ ဝီ တး ဒီမွှတ် ဒါ အီ ဘျာန် ဂြုဝ်း ဇဝ်ဖြာ၊ အုဝ် ဇဝ်ဖြာ ဒီ ဝီ ဝျီ့ ဒီ ဂေ၊ တဲး န့ ကာဒါန် ဒူပ် အာရိုပ် ရာင် ဂေ တီ။ 5 ခုဝ်၊ အာရိုပ် ရာင် တီ ဟဲ့ ယဲတ့် ဒူအီ အီဆာရေလ၊ တဲး ဂေ လာယ် ကာဂဝ်း ကာယာန် တူင့် ဒီ အုဝ်။ မာလဲ၊ အုဝ် ယီ ဝီ တဲး ဂြုဝ်း ပီ ဒီ ဝျီ့ အုဝ် တီ ဝီ ပဲ ဒီ အိုပ် နဝ်း ဂေ။’

6 ကူပ် န့ ပါယ် တီ တဲး မဲ ကာလာင် ဒီ ဒူအီ အီဆာရေလ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ဒေါ တီ နီ တဲး ဘေ လှုဝ်း မှာပ် ဘေ။ တဲး ဘေ ဝဲန် အာရိုပ် ရာင် အီ မွှိုမ် ကာအိး ကာဆဝ်၊ ဝဲန် ဘော အီ တူ မွှိုမ် ဒွန် မျုဝ်။

7 ဘော မုး ဒူအီ အီဆာရေလ၊ ဘော မုး ဒူအီ အာမျုဝ် ဟဝ် အာဝ် တဝ်း၊ အီ ကွယ် ခဲင် မိူင် အီဆာရေလ၊ ဂေ အီ ဟဲ့ ဝး အုဝ်၊ ဝီ ဟာဝ် ကြိုပ် အာရိုပ် ရာင်၊ ပီ ဝီ တး ဒီမွှတ် ဒီ ဒါ အီ ဘျာန် ဂြုဝ်း ဇဝ်ဖြာ၊ အုဝ် ဇဝ်ဖြာ ဒီ ကာလာင် ဒီ ဒူအီ ဝီ တီ။ 8 အုဝ် ဒီ ဘူင် ကာဘး ဒီ အန်၊ တဲး အန် ဘဲန် ပီ နဲန အီ ဟဝ်။ ဟဲ့ ဟွတ့်၊ အုဝ် ဒီ ဒိုဝ်း ဝဲန် အန် ကာတဲ ဂေ ဒူအီ ပီ အိုပ် အုဝ်။ ပန် အန် တီ ဘေ ဒီ ဘော နပ်၊ အုဝ် မုး ဇဝ်ဖြာ။

9 ဆေ ဒါ အီ ဘျာန် ဂြုဝ်း ဇဝ်ဖြာ ဒူပ် ပီ ကာလုဝ် အီ ဘော ဘျာန် ကာလိုပ် ဘော ဘျာန် အီ တူ မုး ဂြုဝ်း ဇဝ်ဖြာ၊ အုဝ် ဇဝ်ဖြာ ဟဲ့ တဲး ဒါ အီ ဘျာန် ဂြုဝ်း ဇဝ်ဖြာ ကာလာင် အီ တူ မှာန် ဇိုဝ် တီ။ ပါယ် တီ အုဝ် ဒီ တဲး အန် စှိုမ်၊ တူ တဲး အန် ကွယ် ကာတဲ ဂေ ဒူအီ ပီ အိုပ် အုဝ်။ 10 ဘော ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ အီ တး ဒီမွှတ် ဂေ၊ ဂေ ဒီ လုဝ် ခမ် မှာပ် ဂေ။ 11 ဝါယ် နီ ဂေ ဒူအီ အီဆာရေလ အာဝ် ဟူ ဝး ဟူ ဝဲန် အုဝ်၊ တူ တဲး မှာပ် ပီ ကာလိုပ် ဂေ တီ ဝီ ဘူင် တဲး ဂေ ကာဒါတ့်။ ဂေ ဒီ ဝီ ဘဲန် ဒူအီ ပီ အိုပ် အုဝ်။ အုဝ် ဒီ ဘော ဘဲန် ဇဝ်ဖြာ ပီ ကြိုပ် ဂေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။’”

12 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 13 “အိုယ် ဂွန် ဒူအီ၊ ဆေ ဒူအီ ခဲင် မိူင် အူ မိူင် ဘူင် မှာပ် ဘော တူ ဘူင် နာ ဆိူဝ် နာ မှာန် ဒီ အုဝ်၊ အုဝ် ဒီ ဘော ပျာတ့် ဝဲန် ငှုဝ် ဒီဂါဝ် ဒီ ဒူအီ ခဲင် မိူင် တီ။ အုဝ် ဒီ ဘူင် တဲး န့ မိုဝ်း အာဖေ အာရေ အီ ဒီ အေတ့် ပီ ဒီ ဟူမ်၊ တဲး ဘော ဒူအီ ဘော ဒုဝ် ဆတ်ဒါဝါ ယမ်။ 14 ဆေ အာနုဝ်၊ အာဒါနေလ ဘော အာယုဝ်ဘာ ကွယ် ခဲင် မိူင် တီ၊ ကူပ် မိုဝ်း ဂေ နဝ်း ဆိူဝ် နဝ်း မှာန်၊ ဂေ ဒီ ဘော လွတ် ယမ် ဘော ပွိုန် ချွတ် မီ အာဆာက် ဒုဝ် ဘြိမ် ဂေ။ ဂေ ယီ တူ ပွိုန် စွယ် အီ ဟဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

15 ဆေ အာဝ် ပါယ် တီ မိူဝ်၊ ဆေ အုဝ် ဒီ စ်ု မာဒုဝ် ပြဲ ဟာယ် တး ကဝ့် ယမ် တူတ့် ဒူအီ တဲး မိူင် တီ ကော ဘဲန် မိူင် ရာမ်၊ ဘဲန် ဒူင် ငွင့် ဒူင် ယေန် ဒူအီ၊ 16 အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ကာလာင် ဂြုဝ်း မှာန် အာခါခ်ု၊ န့ ဒီ ဘဲန် ပါယ် တီ။ ဆေ ဂေ ဒူအီ အူယ် ဝီ တီ ပီ ဘော ဟဲ့ ကွယ် ဒီ တီ မိူဝ်၊ ဂေ ယီ တူ ပွိုန် ချွတ် အာဆာက် ဂွန် အီဘိုန့် ဘော ဂွန် အီမာယ် ဂေ။ ဂေ ပွိုန် ချွတ် မီ အာဆာက် ဒုဝ် ဘြိမ် ဂေ။ မိူင် တီ၊ န့ ယီ ဘဲန် ဒူင် ယေန် ဒူင် ငွင့် ဒူအီ အာခ်ု မှာန်။

17 ဆေ အာဝ် ပါယ် တီ မိူဝ်၊ ဆေ အုဝ် ဒီ စ်ု ဒါ ဆိုက် တး ခဲင် မိူင် တီ တဲး ဂေ စ်ု ခြိုင် ကာဂုဝ်း ဂေ ဘော ပျာတ့် တူတ့် ဒူအီ ဘော ဒုဝ် ဆတ်ဒါဝါ ခဲင် မိူင် တီ၊ 18 အုဝ် ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် တဝ်း အာခါခ်ု။ ဆေ ဒူအီ အူယ် ဝီ တွိုန် ဟဲ့ ကွယ် ဒူင် တီ မိူဝ်၊ ဂေ ယီ တူ ပွိုန် ချွတ် အာဆာက် ဂွန် အီဘိုန့် ဘော ဂွန် အီမာယ် ဂေ။ ဂေ ပွိုန် ချွတ် မီ အာဆာက် ဒုဝ် ဘြိမ် ဂေ။ 19 ဆေ အာဝ် ပါယ် တီ မိူဝ်၊ ဆေ အုဝ် ဒီ စ်ု အာဖေ အာရေ အီ ဘဲန် ဆဝ် ရောဂါ၊ တဲး န့ တး ခဲင် မိူင် တီ၊ အုဝ် မိူဝ် ဒီ ပီရူ ကာဆဝ် အုဝ်၊ တဲး ဘော ဒူအီ ဘော ဒုဝ် ဆတ်ဒါဝါ ယမ် ကိူန် ကာဆဝ်။ 20 ဆေ အာနုဝ် ဘော အာဒါနေလ ဘော အာယုဝ်ဘာ ဟဲ့ ကွယ် ဒီ မိူင် တီ၊ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် တဝ်း အာခါခ်ု ဒီ ဘေ၊ ဂေ တူ ပွိုန် ချွတ် အာဆာက် ဂွန် အီဘိုန့် ဘော ဂွန် အီမာယ် ဂေ။ ဂေ ပွိုန် ချွတ် မီ အာဆာက် ဒုဝ် ဘြိမ် ဂေ ကူပ် မိုဝ်း ဂေ နဝ်း ဆိူဝ် နဝ်း မှာန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

21 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “န့ ဒီ ဝဲ ဒုက် ကာဆဝ် ပန် ဒီ စ်ု အုဝ် အာဖေ အာရေ ဖွုန် မျုဝ် ဒီ တး ခဲင် မိူင် ယေရူဆာလဲမ်။ န့ ဘော မုး အာဖေ အာရေ ဒီ ဒါ ဆိုက်၊ အာဖေ အာရေ အေတ့် ပီ ဒီ ဟူမ်၊ အာဖေ အာရေ ဒီ မာဒုဝ် ပြဲ ဟာယ်၊ အာဖေ အာရေ ဒီ ဆဝ် ရောဂါ၊ အာဖေ အာရေ ဒီ ဘော ပျာတ့် ဘော ဒူအီ ဘော ဒုဝ် ဆတ်ဒါဝါ။ 22 န့ ယီ ဒီ မိုဝ်း ဒူအီ မင် အီ အီ လွတ် ယမ်၊ ဂေ မုး ဂွန် အီဘိုန့် ဂေ ဂွန် အီမာယ် အီ တး ကွယ် ဒီ ဘေ။ ဘေ ဒီ ဘော ယိုဝ် ပီ ဘူင် ဂေ။ ဘေ ဒီ ဘော ဝီ မိုဝ်း နဝ်း ဒါခိုယ်၊ အာဝ် ဟူ က့လိုဝ် ကူပ် ဟဲ့ ယိုဝ် ဘေ အုဝ် ဒမ် မှာပ် ဒီ မိူင် ယေရူဆာလဲမ်။ ဒုက် ပီ လုဝ် ခမ် ဂေ ဒွန် မျုဝ်၊ န့ မုး အုဝ် အီ ဟဲ့ ဒွါ။ 23 ပါယ် တီ ဘေ ဒီ ဘော နပ် ဘော ယိုဝ် ဘော လွင် ပီ ဆုင်ဖျာတ် အုဝ်၊ န့ ဟဲ့ မုး ဟဲ့ မွှိုမ် တူတ့် ဒွန် မျုဝ်။ အာဝ် မိုဝ်း မာဆေ အီ တူ မိုဝ်း ဒီခုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။