1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ်။ အန် တဝ်း၊ 2 “အိုယ် ဂွန် ဒူအီ၊ တဲး မဲ ကာလာင် ဂြုဝ်း အီ ဒမ် မှာပ် ဒီ ဒူအီ အီ ဘျာန် ဂြုဝ်း ဇဝ်ဖြာ၊ အီ မုး အာမျုဝ် အီဆာရေလ။ တဲး မဲ ကာလာင် ဒီ ဂေ အီ ဒူပ် နဝ်း ဘြိမ် ဂေ။” 3 တဲး မဲ တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ‘ဂေ ဒါ အီ ဘျာန် ဂြုဝ်း ဇဝ်ဖြာ အီ ရိုဝ် ဂေ တီ၊ ဂေ ဒီ ဇမ် ဒုက် တာင်။ ခုဝ်၊ ဂေ ဟဲ့ ဘူင် ဒူပ် ပီ အိုင် ဒုဝ် ဘြိမ် ဂေ။ ဂေ ယီ တူ ယိုဝ် မာဆေ ပီ ဘျ ဇဝ်ဖြာ ဒီ ဂေ။ 4 အိုယ် ဘေ ဒူအီ အီဆာရေလ၊ ဒါ အီ ဘျာန် ဂြုဝ်း ဇဝ်ဖြာ ဇိုဝ် တီ၊ ဂေ ပီ မာဆုဝ် ပြဲ အီ ကွယ် ခဲင် မိူင် အီ ဟဲ့ ရာမ် ဟဲ့ ကာပျာတ့် လိုဝ်။ 5 ဘေ ယီ တူ ဘ်ု ဒီ ရဲင် မိူင် အီ ဟဲ့ ကာပျာတ့်။ ဘေ မိူဝ် တူ မ့ပြာယ် ရဲင် မိူင် အာဒါ ဒူအီ အီဆာရေလ၊ တဲး ဂေ ပွိုန် ဒီ ရဲ ဒါ ဆိုက် ဒေါ ဇမ် ဆီငဲ ဒမ် ဇဝ်ဖြာ မှာပ် ဂေ။ 6 ပီ တဝ်း ဂေ လွင် ပီ ဘျ ဇဝ်ဖြာ ဒီ ဂေ၊ န့ ယီ မုး တူတ့် အီ တူ မှာန်။ ဆေ ဂေ ယီ တဝ်း ဇဝ်ဖြာ ကာလာင်၊ န့ မုး တူတ့် အီ ကာလုဝ်။ ဇဝ်ဖြာ တူ မိုဝ်း ဒီ စ်ု ဂေ။ ပီ ဘော ဟဲ့ ပါယ် တီ မိူဝ်၊ ဂေ ဝီ နှဝ့် န့ဒဝ့် န့ ဒီ ဘုဝ် ဘဲန် ဒူပ် ဂြုဝ်း ပီ ကာလာင် ဂေ တီ။ 7 အုဝ် တူ ကာလာင် ဂြုဝ်း ဒီ ဘေ။ ဘေ ယီ တဝ်း၊ ဇဝ်ဖြာ ဟဲ့ ကာလာင်။ ဘေ မိူဝ် တူ ယိုဝ် ပီ တဝ်း ဘေ လွင် ဇဝ်ဖြာ ဟဲ့ ဘျ ဒီ ဘေ။ ဂြုဝ်း ဘေ မုး ဂြုဝ်း ကာလုဝ် ဒီလူယ်။”

8 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ “ဂြုဝ်း ဘေ ဘော မုး အီ ဟဲ့ ကာလိုပ်၊ အီ ဟဲ့ ဘ့လိူင်။ ပီ ယိုဝ် ဘေ မိူဝ်၊ န့ ဘော မုး အီ ကာလုဝ် အီ တူ မှာန်။ ခုဝ် အန် တီ၊ အုဝ် ဒီ ဘော ဘဲန် ရန်ဆူ ဘေ။ 9 အုဝ် ဒီ ဘော ဒမ် မှာပ် ဒီ ဘေ ဒူအီ အီ နပ် ဒီ ညိုင်ရာင် ဒီ ဘျာန် ဂြုဝ်း ဇဝ်ဖြာ ဘော ညိုင်ရာင် ဒီ ယိုဝ် ပီ ဘျ ဇဝ်ဖြာ။ ဘေ မိူဝ် တူ ပွိုန် ဒီ တး လိုပ် ခဲင် ဖိုင် ဂေ ဒူအီ ပီ အိုပ် အုဝ်။ စိူဝ် ဘေ မိူဝ် တူ ဒဲမ် ဟပ် ခဲင် ဇာရာင် စိူဝ် ဂေ ဒူအီ အီဆာရေလ၊ ကွဲ့ တဲး ဘေ ပွိုန် ဒီ ဝိဝ် ဒီ မိူင် ဘြိမ် ဘေ ဒေါ မှဝ်။ ပန် အန် တီ ဘေ ဒီ ဘော နပ်၊ အုဝ် မုး ဇဝ်ဖြာ အီ အိုပ် တူတ့် ဒွန် မျုဝ်။

10 ခုဝ်၊ ဂေ ဟဲ့ ယဲတ့် တဲး ဂေ ဒူအီ ပီ အိုပ် အုဝ် ဘူင် ကာလိုပ်။ ဂေ ဘော တဝ်း၊ ‘ဟဲ့ ဘျုဝ် ဒါခိုယ်။’ န့ ယီ တူ မိုဝ်း နာ ဒါခိုယ် ဘော နာ မွှိုမ်။ ဘော ဆေ ဂေ ဒူအီ ကိူန် ဒိုဝ်း မာဝ်၊ ဂုဝ် ရဲင် မိူင် အီ တူ မန် ဆီချာ၊ ဂေ ဒါ အီ ဘျာန် ဂြုဝ်း ဇဝ်ဖြာ၊ ဂေ ဘော ဝီ ဒိုဝ်း ထုန် လုယ်၊ ဖဝ်း နာ ရေတ့်၊ ညိုင်ရာင် ဟဲ့ မွှိုမ်။ 11 တဲး မဲ ကာလာင် ဒီ ဒူအီ အီ ဘျာန် ဂြုဝ်း ဇဝ်ဖြာ ဂေ တီ လွင် ရဲင် မိူင် တီ ဒီ ဘော ကေး လိုဝ် ကာပျာတ့် တူတ့်။ အုဝ် ဒီ ဘူင် တဲး န့ မိုဝ်း ဂ့လာယ် တာင် တး။ ဘော ဘျြီ ဒီ စုဝ်း။ ဘော ခုန် တာင် ဒီ ဘော ဘုတ် ကာပျာတ့် လိုဝ် တူတ့် ရဲင် မိူင် တီ။ 12 ဆေ ရဲင် မိူင် ဟီ ဒီဂြပ် ကေး၊ န့ ဒီ လိုဝ်း လွင် ဘေ ညိုင်ရာင်။ ဂေ အီ ဟဝ် ဒီ ဝီ ဒီမွှတ် ဘေ တဝ်း၊ ‘ထုန် လုယ် ပီ ဖဝ်း ဘေ တွိုန်၊ န့ ဘော ဝီ ကွယ် ဒီ မှဝ်။း’”

13 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ “အုဝ် ဒီ စ်ု ဂ့လာယ် တာင် ဘော ခုန် တာင် ဘော ဘျြီ တး ပျာတ့် ရဲင် မိူင် တီ ကူပ် နဝ်း အုဝ် ဟဲ့ ရူ ကာဆဝ်။ 14 အုဝ် ဒီ ပျာတ့် ရဲင် မိူင် ပဲ့ ဟဲ့ ဖဝ်း ဘေ ထုန် တီ၊ တဲး န့ ကော လိုဝ် ကာပျာတ့် တူတ့်၊ တဲး န့ ကော လိုဝ်း ဒင် အန်။ ရဲင် တီ၊ န့ ဒီ ဘော ဝီ ကေး ထိပ် ယမ် ဘေ ဘောကာဂ့လျီတ်။ ပန် တီ ဘေ ဒီ ဘော ဝီ နပ်၊ အုဝ် မုး ဇဝ်ဖြာ။ 15 အုဝ် ဒီ ဘော ပီရူ အုဝ် ဒီ ရဲင် မိူင် တီ ဘော ဒီ ဂေ အီ ဟဲ့ ဒိုဝ်း ထုန် လုယ်၊ ဖဝ်း တဲး န့ စှိတ်။ အုဝ် ဒီ ဘော ဝီ တဝ်း ဒီ ဂေ၊ ‘ရဲင် မိူင် အာဝ် ဟူ မိုဝ်း။ ဂေ ဒူအီ အီ ဖဝ်း ထုန် လုယ် တွိုန် မိူဝ် အာဝ် ဟူ မိုဝ်း။’ 16 ဂေ ဒူအီ အီ ဒိုဝ်း ထုန် လုယ် ဖဝ်း တီ၊ ဂေ ဘော မုး ဒါ အီ ဘျာန် ဂြုဝ်း ဇဝ်ဖြာ ခဲင် မိူင် အီဆာရေလ။ ဂေ ဘော ကာလာင် လွင် မိူင် ယေရူဆာလဲမ်၊ န့ ဒီ ဘျုဝ် ဒါခိုယ် ဒေါ တူ မိုဝ်း နာ ဘွတ် နာ ဒါခိုယ် မာဆေ။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။”

17 ဝါယ် အန် တီ ဇဝ်ဖြာ ဝီ တဝ်း၊ “အိုယ် ဂွန် ဒူအီ၊ ခါ နီ တဲး မဲ ဝီ ကာလာင် လွင် ဂေ အီဘိုန့် အီ မုး ဒူအီ အီဆာရေလ၊ အီ ဟဲ့ ဘျာန် ဂြုဝ်း ဇဝ်ဖြာ ဘော ကာလာင် ဒူပ် ပီ အိုင် ဒုဝ် ဘြိမ် ဂေ။ တဲး မဲ ကာလာင် ဒီ ဂေ ဂြုဝ်း ဇဝ်ဖြာ အီ ဒမ် မှာပ် ဒီ ဂေ။ 18 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ‘အိုယ် ဘေ အီဘိုန့် အီ ဟဲ့ မှေတ့် ကာပြဝ် အီ ဟဝ်။ ဘေ ဘော ဒိုဝ်း လာဘ့လွယ် ပက် ဒိုက် ဒီ ကာဆွင့် ဒဲ အီ ဟဝ်၊ ဒိုဝ်း ဘော ကာမဲ့ ဘြဝ့် ဒီ ဂိန့် အီ ဟဝ်၊ တဲး န့ မိုဝ်း ပွုန် အီ ပွိုန် ဒီ မှေတ့် ကာပြဝ် ဂေ ဒူအီ ပီ အိုပ် အုဝ်။ ဘေ ဒီ ဇမ် ဒုက် တာင်။ ဘေ ဘော ဘူင် တဲး ကာနမ် အိုပ် ဒူအီ ဟဝ်၊ ဘေ ယီ ထာင် ဂေ တူ အိုပ် ဘေ။ 19 ဘေ မိူဝ် အာဝ် ဟူ ရုဝ်ဆေ အုဝ် ကာတဲ ဂေ ဒူအီ ပီ အိုပ် အုဝ် ကူပ် ဝီ ဆီ ပွိုန် ဘေ ကာပဲ့ ဆီဂူင့်ရာ အာဒါ အာ အူယ် ကာနျီမ် ဘော ခါမုန် အူ ဆိ။ ဒူအီ အီ တူ ကာအာပ် ယမ်၊ ဘေ မိူဝ် ဟဲ့ ဘူင် တဲး ဂေ ယမ် ကူပ် ကာလာင် ဘေ ဂြုဝ်း ကာလုဝ် ဒီ ဒူအီ အီ အိုင် ဒီ ထူမ် ဂြုဝ်း ဘေ။ ဒူအီ အီ တူ ကာအာပ် ကွယ်၊ ဘေ ဘော အုန်၊ ကွဲ့ တဲး ဂေ ယမ်။’”

20 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဇွင့် ကာဆဝ် ဝန် လာဘ့လွယ် ပီ စ်ု ဘေ တဲး ကာနမ် အိုပ် ဒူအီ။ အုဝ် ဒီ ဘော ဂဝ်း လေး ဂေ ဒီ ဒဲ ဘေ၊ ဝီ ဘ့လေး လွတ် ကာပြဝ် ဂေ ပဲ့ ဟဲ့ မှေတ့် တး ဘေ ပီ မှေတ့် ဘေ မာဆိမ်။ 21 အုဝ် ဒီ ဘော ကာယာတ့် ဝဲန် ကာမဲ့ ဘေ။ အုဝ် ဒီ ဘော ချွတ် လေး ဂေ ဒူအီ ပီ အိုပ် အုဝ်၊ ကွဲ့ တဲး ပွုန် ပီ စ်ု ဘေ တီ ဆီ ပွိုန် ဒီ ဝီ အိုပ် ဂေ ဒေါ မှဝ်။ ပန် အန် တီ ဘေ ဒီ ဘော ဝီ နပ် လွင် မုး အုဝ် ဇဝ်ဖြာ။ 22 ဘေ ဟဲ့ ကာလာင် ဂြုဝ်း ကာလုဝ်၊ ဘူင် တဲး ဒူအီ နဝ်း ဆိူဝ် ဘဲန် နဝ်း ဒီတဲတ် ဒေါ ညှမ် မိုဝ်း အုဝ် ဒီ ဘူင် မာဆေ၊ တဲး န့ ဆဝ် ဒီ နဝ်း ဂေ။ ဘေ မိူဝ် ဟဲ့ ကာဆုး ဒူအီ အီ တူ မွှိုမ် ကွဲ့ တဲး ဂေ ဘျွင် နဝ်း ဘော လွတ် ယမ်။ 23 ပါယ် တီ ဘေ အာဝ် ဟူ ယိုဝ် အီ မွှိုမ် အာမ် ပီ တူ ဘျ အုဝ် ဒီ ဘေ။ ဘေ မိူဝ် တူ ပွိုန် ကာလာင် ဂြုဝ်း ကာလုဝ်။ အုဝ် ဒီ ဝီ ထုတ် လေး ဂေ ဒူအီ ပီ အိုပ် အုဝ်၊ တဲး ဂေ လွတ် ဒီ ပွုန် ပဲ့ ဟဲ့ တဲး ဘေ ပ့လိုက် ဂေ။ ပါယ် တီ ဘေ ဒီ ဘော ဝီ နပ် အုဝ် မုး ဇဝ်ဖြာ။”