1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ်။ အန် တဝ်း၊ 2 “အိုယ် မဲ ဂွန် ဒူအီ၊ မဲ ကွယ် ကာတဲ ဂေ ဒူအီ အီ နပ် မီ ဒီ ဘူင် ကာဘး ဒီ အုဝ်။ ဂေ မိုဝ်း ငါယ်၊ ဂေ ယီ တူ ယိုဝ်။ ဂေ မိူဝ် မိုဝ်း ဟျုဝ့် ၊ ယီ တူ နပ် ဒီ ထူမ် ကူပ် မုး ဂေ ဒူအီ အီ အွန် ဒီ ဘူင် ကာဘး။

3 ကူပ် န့ ပါယ် တီ မဲ ဂွန် ဒူအီ၊ တဲး မဲ ဒီဂျြီပ် ကြုဝ် မဲ ဒေါ တီ နီ၊ တဲး န့ ပီ အီ ဟဝ် ဒီ တး မှေတ့် ဟာဝ် မဲ ပေါ အူ ပ့လုဝ့်။ တဲး မဲ ဘူင် ပါယ် တီ ဒေါ ကာတဲ ဆီငဲ၊ တဲး ဒူအီ ဘောကာဂ့လျီတ် ပွိုန် ဒီ ယိုဝ်။ ဂေ ပီ ဘော မုး ဒူအီ အီ ဆီမာ ဘူင် ကာဘး မိူဝ်၊ ဆေ ဂေ ယိုဝ် မဲ ဟာဝ်၊ ယုဝ် န့ ဘော ကာလှုး ဒီ နဝ်း။ 4 မဲ လုဝ် ဒီဂျြီပ် ကြုဝ် မဲ ဘော ဘ့လေး အုန် နာ ရေတ့် ကာင် ဒေါ ကာတဲ ဆီငဲ၊ တဲး န့ ပီ ပီ ဘူင် ဒူအီ ပဲ့ ဟဲ့ မှေတ့် ဟာဝ် အီ။ မဲ လုဝ် လေး ဟာဝ် ဒေါ ဘာ ဒီ အပ်၊ တဲး မဲ ပီ ဒူအီ ပဲ့ ဟဲ့ မှေတ့် ဟာဝ် အီ။ 5 ဒေါ ဆီငျာ ယွတ် ဂေ ဒီ မဲ တီ၊ တဲး မဲ ဘ့လုး ရဲင် ကာင် မဲ တဲး န့ ကာဒဝ်၊ တဲး မဲ ပး ကြုဝ် မဲ လေး ဟာဝ် ဒီ တီ။ 6 တဲး မဲ ဒိုဝ်း ကာဘျာဝ် ကြုဝ် မဲ တီ၊ ဂွတ် ဒဲင် ယ မဲ၊ ဝီ လေး ဟာဝ် ဒီ အာတ့် ဂေ ဒေါ ဘာ ဒီ အပ်။ မဲ လုဝ် ဒိုဝ်း ဘိက်၊ ကာမှုဝ့် ဂိန့် မဲ ဘော နာ မဲ၊ ကွဲ့ တဲး မဲ ဝီ ယိုဝ် မိူင် ဒူင် ဟဲ့ လေး ဟာဝ် မဲ တီ။ ပီ ဘူင် မဲ တီ၊ န့ ဒီ ဘော ဘဲန် အီ ဒမ် ဆာဒိက် ဒီ ဒူအီ အီဆာရေလ။”

7 ပါယ် တီ အုဝ် မိူဝ် ဘူင် ဒူပ် ခဲ့ ပီ ကာလာင် ဇဝ်ဖြာ တီ ဒီ အုဝ်။ ဆီငဲ တီ အုဝ် မိူဝ် ရဲန် ပး ကြုဝ် အုဝ်၊ တဲး န့ ပီ ကြုဝ်ကြာမ် ဒူအီ အီ ဒီ တဝ်။ ဒေါ ဘာ ဒီ အပ် တီ၊ အုဝ် မိူဝ် ဘ့လုး ကာဒဝ် ရဲင် ကာင် အုဝ်၊ ဝီ ပး ကာဘျာဝ် ကြုဝ် အုဝ် တီ၊ လေး ဟာဝ် ဒေါ ယွတ် ဂေ ဒီ အုဝ်။

8 ဘော ဇမ် ပန် ခဲညှာ ဇဝ်ဖြာ ပီ ဝီ ကာလာင် ဒီ အုဝ် တဝ်း၊ 9 “အိုယ် မဲ ဂွန် ဒူအီ၊ ဒေါ တီ နီ ဂေ ဒူအီ အီဆာရေလ အီ အွန် ဒီ ဘူင် ကာဘး တွိုန်၊ ဂေ ဒီ ဘော ဒီမွှတ် မဲ တဝ်း၊ ‘မာဆေ ပီ ဘူင် မဲ။း’

10 တဲး မဲ ဝီ တဝ်း ဒီ ဂေ၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ပီ ဘျ အန် ဇဝ် တီ၊ န့ ဘော လာယ် ဘာ့ ဒီ ခုန်ဒီခမ် အီ အိုပ် မိူင် ယေရူဆာလဲမ် ဘော ဂေ ဒူအီ အီဆာရေလ အီ ကွယ် ခဲင် မိူင် တီ။ 11 တဲး မဲ ကာလာင် ဘော လွင် ပီ ဘူင် မဲ တီ၊ န့ မုး လွင် အီ ဘျ အီ ဒီ ဘုဝ် ဘဲန် ဒီ ဂေ။ ဂေ ဒီ ဘော ကာဒုး အီ မှေတ့် ဟာဝ် ဂေ ပါယ် တီ။

12 ခုန်ဒီခမ် အီ အိုပ် ဂေ တီ အန် ဒီ ဘော ဒိုဝ်း ကာဘျာဝ် ကြုဝ် အန်၊ ဂွတ် ဒဲင် ယ အန်၊ လေး ဟာဝ် ဒေါ ဘာ ဒီ အပ်။ အန် ဒီ ဘော တဝ် လေး ခဲင် ကာဒဝ် ဒီ ရဲင် ဒူင် ဘ့လုး ဒွါ ဂေ ဒီ အန်။ အန် ဒီ ဘော ဒိုဝ်း ဘိက်၊ ကာမှုဝ့် နာ အန်၊ ကွဲ့ တဲး အန် ဆီ ဝီ ယိုဝ် မိူင် ဒူင် လေး တဝ် အန် တီ။ 13 န့ မိူဝ် ပီ အုဝ် ဒီ ဝီ ဘ့လး န့ရပ် အုဝ်၊ တဲး အန် လိုပ် ခဲင် န့ရပ် အုဝ် တီ။ အုဝ် မိူဝ် ဒီ ဝီ ဒိုဝ်း ဟာဝ် အန် ခဲင် မိူင် ဘာဘဲ။ အန် ပီ ဘော ဒီ ဟာဝ် ယမ် ဒူင် တီ မိူဝ်၊ အန် ယီ တူ ပွိုန် ယိုဝ် မိူင် တီ။ 14 အုဝ် ဒီ ဒိုဝ်း ဘော ဂေ ဒါ တာင် အီ ကွယ် ခူပ် အန် ဘော ဂေ ဒူအီ အီ ဒွါ အာကျာမ် အာငျာန် ဒီ အန် ဘော ဂေ ဒါ ဆိုက် အီ ဘ်ု အာဆာက် အန် ဘောကာဂ့လျီတ်၊ တဲး ဂေ တဝ်၊ ကာယဝ်း ဟာဝ် ဒွန် ဘ့လာက်။ အုဝ် မိူဝ် ဒီ ဘော ဝီ ဟြေတ့် ဂေ၊ တဲး ဂေ ယမ် ဒီ မာပွါ့ လာင် ဂေ။

15 ဆေ အုဝ် ဟီ ဘူင် တဲး ဂေ ကွယ် ကာယဝ်း ကာတဲ ဒူအီ ဒွန် ဇိုဝ် ဒွန် မျုဝ် ဘော ဒွန် မာန် ဒွန် မိူင်။ ပန် အန် တီ ဂေ ဒီ ဘော ဝီ နပ်၊ အုဝ် မုး ဇဝ်ဖြာ။ 16 အုဝ် ဒီ ဘူင် တဲး ဒူအီ မင် အီ လွတ် ယမ် ဒီ မာပွါ့ လာင် ဘော ဒီ အေတ့် ပီ ဒီ ဟူမ် ဘော ဒီ ဆဝ် ရောဂါ၊ တဲး ဂေ ဝီ လှုဝ်း လွင် အန် တီ ဘော ကာလာင် လွင် အီ ဟဲ့ မွှိုမ် ကာအိး ကာဆဝ် တီ ကာတဲ ဒူအီ ကိူန်။ တဲး ဂေ နပ် အုဝ် မုး ဇဝ်ဖြာ။’”

17 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ န့ ပွါ တဝ်း၊ 18 “အိုယ် ဂွန် ဒူအီ၊ တဲး မဲ ဟူမ် ပီ ဒီ ဟူမ် ဘော ဒီယုး ဒီယေန့်။ တဲး မဲ ဒျီင် အိုမ် ဘော ယုဝ် ဘော ကာပိုန့်။ 19 တဲး မဲ ကာလာင် ဒီ ဂေ ဒူအီ အီ ကွယ် ခဲင် မာန် မိူင် နီ လွင် ပီ ဘျ ဇဝ်ဖြာ အီ အိုပ် တူတ့် ဒွန် မျုဝ် ဒီ ဒူအီ အီ ကွယ် ခဲင် မိူင် ယေရူဆာလဲမ် ဘော ဂေ အီ ဆီ ကွယ် ခဲင် မိူင် အီဆာရေလ တဝ်း၊ ဒေါ ဟူမ် ဂေ ပီ ဒီ ဟူမ်၊ ဂေ ဒီ ဘော ယုဝ် ဒီယုး ဒီယေန့်။ ဒေါ ဒျီင် ဂေ အိုမ်၊ ဂေ ဒီ ဘော ယုဝ် ဘော ကာပိုန့် ကာဆဝ်။ ခုဝ်၊ ခဲ့ ကွယ် ဒူအီ အီ ကွယ် ခဲင် မိူင် ယေရူဆာလဲမ် ဘော ခဲင် ကာဒါယ် မိူင် နီ၊ ဂေ ဒီ ကာဒုး အီ ဖာတ် ဝဲန် ကြုဝ်ကြာမ် ဂေ ဒွန် မျုဝ် ကူပ် တူ ဘူင် ဂေ အီ မွှိုမ်။ 20 ဒွန် မိူင် အီ ဟဲ့ မိုဝ်း ဒူအီ ကွယ် နာ ခဲင် ဂေ ဒီ ဘော လိုဝ် စှိုမ် တူတ့်။ မိူင် တီ ဒီ ဘော ရာမ်၊ ဘဲန် ဒူင် ယေန် ဒူင် ငွင့် ဒူအီ။ ပန် အန် တီ ဂေ ဒီ ဝီ နပ် အုဝ် မုး ဇဝ်ဖြာ။”

21 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 22 “အိုယ် ဂွန် ဒူအီ၊ ဂြုဝ်း မာကာထ ပီ ဒွိုမ် ကာလာင် ဘေ ခဲင် မိူင် အီဆာရေလ အီ တဝ်း၊ ‘အာခြာဝ် အန် ကြဲ ဒီ ပွုန် ဟာဝ်။ အီ မွှိုမ် အာမ် ကာဆဝ် ပီ ဘျ ဇဝ်ဖြာ ဒီ အီ မိူဝ် ဟဲ့ ဟြာယ်၊’ လွင် အန် တီ န့ မိုဝ်း ဆီဖဝ် မာဆေ။း 23 ဒေါ တီ နီ၊ အုဝ် ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် ဒီ မဲ၊ တဲး မဲ ကာလာင် ဒီ ဂေ ဒူအီ အီဆာရေလ တဝ်း၊ ‘အုဝ် ဒီ ဘူင် တဲး ဂြုဝ်း မာကာထ တီ ဟြာယ်။ ဝါယ် နီ ဂေ မိူဝ် အာဝ် ဟူ ကာလာင် ဂြုဝ်း မာကာထ တီ ခဲင် မိူင် အီဆာရေလ ဒေါ မှဝ်။’ မာလဲ၊ မဲ လုဝ် တဝ်း ဒီ ဂေ၊ ‘အာခြာဝ် အန် ဟဲ့ ဟွတ့် ဇမ်။ ပဲ့ ဟဲ့ ဒွိုမ် ဘျ ဇဝ်ဖြာ ဒီ ဂေ မိူဝ်၊ ဟဲ့ ဟွတ့် ဇေ့ဇုင်။’ 24 ခုဝ် ဝါယ် နီ၊ ကာတဲ ဂေ ဒူအီ အီဆာရေလ အာဝ် မိုဝ်း အီ ညိုင်ရာင် ဒီ ကာလာင် ပီ ဘျ ဇဝ်ဖြာ ဘော အာဝ် မိုဝ်း ဒါ အီ ဘျာန် ဂြုဝ်း ဇဝ်ဖြာ အီ ဒီ မာနုဝ် ကာလိုပ်၊ မာနုဝ် ဘ့လိူင် ဒေါ မှဝ်။ 25 အုဝ် ဇဝ်ဖြာ အီ ဒီ ကာလာင် ဂြုဝ်း ပီ အိုင် အုဝ် ဒီ ဂေ။ ဂြုဝ်း ပီ ကာလာင် အုဝ် တီ၊ န့ ဒီ ဘော ဇေ့ဇုင် တူတ့် ဒွန် မျုဝ်။ အိုယ် ဘေ ဒူအီ အီ အွန် ဒီ ကာဘး ဒီ အုဝ်၊ ဂြုဝ်း ပဲ့ ဟဲ့ ဒမ် အုဝ် ဆာဒိက်၊ ပဲ့ ဟဲ့ တဝ်း အုဝ် ဒီ ဘူင်၊ အုဝ် ဒီ ဘော ဘူင် တဲး န့ ဘဲန် ဒေါ မုး စုဝ် ဘာန် ဘေ။” 26 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ န့ ပွါ တဝ်း၊ 27 “အိုယ် ဂွန် ဒူအီ၊ ဂေ ဒူအီ အီဆာရေလ၊ ဂေ ဘော ထာင် ဂြုဝ်း ပီ ကာလာင် မဲ လွင် ပီ ဘျ ဇဝ်ဖြာ တီ၊ ဆီငဲ အန် ဘော အာခြာဝ် အန်၊ န့ ဆီ ဒီ တူင့် ကာဆဝ်။

28 ကူပ် န့ ပါယ် တီ တဲး မဲ ကာလာင် ဒီ ဂေ တဝ်း၊ ‘အုဝ် ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဟွတ့် ကာလာင်။ န့ တူ ထိူင် တူ လှေန့် ခဲ့ မှဝ်။ ခဲ့ ပီ ကာလာင် အုဝ် တီ၊ န့ ဒီ ဘော ဘဲန် တူတ့် ဒွန် မျုဝ်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် အုန် ပါယ် တီ။’”