1 ဝါယ် အန် တီ နဝ်း ဖွိုမ် ဇဝ်ဖြာ ဝီ စုဝ့် ဟာဝ် အုဝ် ဒီ ဘာင် မာလုဝ်း အီ ကွယ် ဘ့လာက် နာ လေး ဆီငဲ ဒီ ဟုဝ် ဇဝ်ဖြာ။ ဒီ ဘာင် မာလုဝ်း တီ အုဝ် ဝီ ယိုဝ် အီမာယ် အာ ဂိုဝ် ဒီ ဖန် ဝီ။ န့ ဟဲ့ ဘာ ဘော အာစာရာယာ အီ မုး ဂွန် အာစူရာ။ န့ ဘာ ဘော အာဘ့လဝ်ထီယာ အီ မုး ဂွန် အာဘီနာယာ။ ဂါယ် အာ ဝီ တီ မုး ဒါ အီ အိုပ် အီ ယဲတ့် ဂေ ဒူအီ တီ။ 2 ဇဝ်ဖြာ ဝီ ကာလာင် ဒီ အုဝ် တဝ်း၊ “အိုယ် ဂွန် ဒူအီ၊ ဒူအီ ဂေ တီ၊ ဂေ ခြာမ် ဒီ ဘူင် မီ အီ ဟာယ် အီ မိူက်။ ဂေ ဘော ဒွါ အာကျာမ် အာငျာန် အီ တူ ဒူပ် ဒါရာ၊ တဲး ဒူအီ ခဲင် မိူင် နီ ထူမ်။ 3 ဂေ ဘော နပ် ဒီ တဝ်း၊ ‘အာခြာဝ် ဒီ လုဝ် ဆမ် ကာင်၊ န့ ဟဲ့ ဇမ်။ မိူင် နီ၊ န့ ဟဲ့ ပီ ကာလုဝ့် ဟိန်။ အေ ဟဲ့ ပီ ယင် အီ ကွယ် ဆီချာ ခဲင် ကာလုဝ့် တီ။’ 4 ခုဝ်၊ မဲ ဂွန် ဒူအီ၊ တဲး မဲ ကာလာင် ပီ တူ အိုင် အုဝ် လွင် ပဲ့ ဟဲ့ ဘူင် ဂေ။”

5 နဝ်း ဖွိုမ် ဇဝ်ဖြာ ဟဲ့ ပ့လိုက် အုဝ်။ ဇဝ်ဖြာ မိူဝ် စ်ု အုဝ် ကာလာင် ဒီ ဂေ ဒူအီ ကိူန် တဝ်း၊ “အိုယ် ဘေ ဒူအီ အာမျုဝ် အီဆာရေလ၊ ဇဝ်ဖြာ တဝ်း၊ ‘အာနီ မုး ဂြုဝ်း ပီ ကာလာင် ဘေ။ အုဝ် ယီ နပ် ပီ ကာဖာ ဘေ။ 6 ဘေ ဟဲ့ ငဝ်း ယမ် ဒူအီ ကိူန် ကာဆဝ် ခဲင် မိူင် နီ။ ဒူပ် န့တေန့် ဟဲ့ မိုဝ်း ဒုဝ် ယမ် ဒူအီ ဒီလူယ်။

7 ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် တဝ်း ဒီ ဘေ၊ ဒုဝ် ယမ် ဒူအီ ဂေ တီ၊ ဟဲ့ ပီ ယင် အီ ကွယ် ခဲင် ကာလုဝ့်။ မိူင် တီ ဟဲ့ ပီ ကာလုဝ့်။ မာလဲ၊ အုဝ် ယီ ဒီ ဝီ ဟုဝ် လေး ဘေ ခဲင် မိူင် နီ။ ဘေ တူ ပွိုန် ဒီ ကွယ် ဒီ နီ။ 8 ဘေ မိူဝ် ယုဝ် ဂေ အီ ဂူင့် မာပွါ့ လာင်။ အုဝ် ယီ ဒီ ဝီ တဲး ဂေ တး ဇမ် ဒူင် ကွယ် ဘေ။’ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 9 ‘အုဝ် ဒီ ဒိုဝ်း လေး ဘေ ခဲင် မိူင် နီ၊ ဝီ အာပ် ဒွါ ဒီ ဒူအီ ပေါ အူ မိူင်။ အုဝ် ဟဲ့ ဟွတ့် ဆုင်ဖျာတ် ဒီ ဘူင် တဲး ဘေ ယမ်။ 10 အုဝ် ဒီ ဘော ဒမ် မှာပ် ဒီ ဘေ၊ တဲး ဘေ ဘော ယမ် ဒီ ခူပ် ကာအုန် မိူင် အီဆာရေလ။ ဘေ ဒွန် အီ ဒီ ဘော ဝီ နပ်၊ အုဝ် မုး ဇဝ်ဖြာ။ 11 မိူင် နီ မိူဝ် တူ ပွိုန် ရဲ ဂွင့် ဘေ၊ တဲး န့ ပီ ကာလုဝ့် အီ ရဲ ဂွင့် ယင် အီ ကွယ် နာ ခဲင်။ ဘေ မိူဝ် တူ ပီ ယင် အီ ကွယ် ခဲင် ကာလုဝ့် တီ။ အုဝ် ဒီ ဒမ် မှာပ် ဒီ ဘေ ဒီ ကာအုန် ကာဒါယ် ဘေ ဒူအီ အီဆာရေလ။ 12 ဘေ ဒီ ဝီ နပ်၊ အုဝ် မုး ဇဝ်ဖြာ။ ဘေ ဒီ ဘော နပ်၊ ဒေါ ထူမ် ဒေါ ဒူပ် ဘေ ဒါရာ ဂေ ဒူအီ အာမျုဝ် ဟဝ် အီ ကွယ် ရူပ် ဘေ၊ ဘေ ဟဲ့ ဘဲန် ဒူအီ အီ လှိုဝ် အီ ဘ့လိူင် ဒါရာ အုဝ်။ ဘေ မိူဝ် တူ ထူမ် ပဲ့ ဟဲ့ ဟွတ့် ကာလာင် အုန် အုဝ် ဒီ ဘေ။’”

13 ဒေါ ဆီငျာ ကာလာင် အုဝ် လွင် ပီ ဘျ ဇဝ်ဖြာ တီ၊ အာဘ့လဝ်ထီယာ အီ မုး ဂွန် အာဘီနာယာ ဘော ကေး ယမ် ဒီ တီ။ အုဝ် မိူဝ် ဝီ ခြိုပ်ခြဝ်၊ ဝီ ဒတ် တာင် တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ ဂေ ဒူအီ အီဆာရေလ အီ ဆီ ဂိတ် ဆီ ကွယ်၊ ဟဲ့ မှာန် မဲ ဇဝ်ဖြာ ဒီ တဲး ဂေ ယမ် တူတ့် ဒွန် အီ။း”

14 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 15 “အိုယ် ဂွန် ဒူအီ၊ ဂေ ဒူအီ အီ ကွယ် ခဲင် မိူင် ယေရူဆာလဲမ်၊ ဂေ ဟဲ့ ကာလာင် နာ တူ မွှိုမ် လွင် ဝေါဝဲ မဲ ဘော လွင် ဂေ ဒူအီ အာမျုဝ် အီဆာရေလ ပဲ့ ဟဲ့ မှေတ့် ဟာဝ် အီ ဟဝ်။ ဂေ မိူဝ် ဟဲ့ တဝ်း၊ ‘ဒူအီ ပဲ့ ဟဲ့ မှေတ့် ဟာဝ် ဂေ တီ၊ ဂေ ဟဲ့ လာယ် ကာတူင့် ဒီ ဇဝ်ဖြာ ပီ ကြိုပ် ဂေ။ ဇဝ်ဖြာ ဒီ ဝီ အာပ် မိူင် နီ ဒီ အေ၊ တဲး န့ ဘဲန် ခါဂုန် ပီ ဒီ ဘိုင် အေ။’

16 ဒေါ တီ နီ၊ တဲး မဲ ဝီ ကာလာင် လွင် ဂေ ဒူအီ ပဲ့ ဟဲ့ မှေတ့် ဟာဝ် အီ ဟဝ် တီ တဝ်း၊ ‘ဇဝ်ဖြာ ဟဲ့ တဝ်း၊ အုဝ် အီ မုး ဒါ ကာညာ အီ စ်ု တဲး ဂေ ဟာဝ် ကွယ် ခဲင် မိူင် အီ တူင့် ကာဆဝ် ဘော တဲး ဂေ ကွယ် ကာလတ့် ဒွန် မာန် ဒွန် မိူင်။ ပီ ဘော ဟဲ့ ပါယ် တီ မိူဝ်၊ အုဝ် ယီ ဒီ ကွယ် ရိုမ် ဒူပ် ဂေ ခဲင် မိူင် ဒူင် ဟာဝ် ကွယ် ဂေ အာဒါ မီ အူ ကာစန်။’

17 ကူပ် န့ ပါယ် တီ တဲး မဲ ကာလာင် ဒီ ဂေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ အုဝ် ဟီ ဟွတ့် ဝီ ဒိုဝ်း တး ကာဇု ဘေ ခဲင် မိူင် ဒူင် ဟဲ့ ဒွိုမ် ကွယ် ကာယဝ်း ကာရေး ဘေ တွိုန်၊ အုဝ် ဒီ ဝီ ဒိုဝ်း မာန် မိူင် ဒူအီ အီဆာရေလ၊ ဝီ ဒွါ ဒီ ဘေ။’

18 ပန် ဒီ ဝီ တး ဘေ တီ၊ ဘေ ဒီ ဘော ဒိုဝ်း ဝဲန် တူတ့် အာမျုဝ် အီ မွှိုမ် ကာဒါတ့် ဘော အာရိုပ် ရာင် အီ မွှိုမ် ကာအိး။ 19 အုဝ် ဒီ ဘော တဲး ဘေ မိုဝ်း အူ နဝ်း အူ ဖွိုမ်၊ ဝီ ဟပ် ဘော နဝ်း ကာမာယ် အီ ဒီ ဒူပ် မီ ဒုဝ် ခဲင် ဒုဝ် ဘေ။ အုဝ် ဒီ ဒိုဝ်း ဝဲန် နဝ်း ဘေ အီ ပ့လူမ် ဒီဂတ့် နှဲန် မာဝ်၊ ဝီ ဒွါ နဝ်း န့စု န့စမ် အီ ပီ ယင် ဒီ ဘေ။ 20 ဝါယ် အန် တီ ဂေ ဒီ ဘော ဒူပ် ဒါရာ အုဝ်။ ဂေ ဒီ ဘော မိုဝ်း နဝ်း ဆိူဝ် ဒီ ဘူင် ဒူပ် ခဲ့ ပီ ကာလာင် အုန် အုဝ် ဒီ ဂေ။ ဂေ ဒီ ဝီ ဘဲန် ဒူအီ ပီ အိုပ် အုဝ်။ အုဝ် ဒီ ဝီ ဘဲန် ဇဝ်ဖြာ ပီ ကြိုပ် ဂေ။ 21 ဂေ အီ ဝုဝ် အီ အိုင် ဒီ ဝိန် ဒီ ကြိုပ် အီ မွှိုမ် ကာဒါတ့် ဘော ဂေ အီ အိုင် ဒီ ကြိုပ် အာရိုပ် ရာင် အီ မွှိုမ် ကာအိး ကာဆဝ်၊ အုဝ် ဒီ ဘော ဒမ် မှာပ် ဒီ ဂေ။ အုဝ် ဒီ ဒမ် မှာပ် ဒီ ဂေ၊ တဲး န့ ဒူပ် ခဲ့ ပီ ဘူင် ဂေ တီ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။ 22 ဒေါ အန် တီ အာမူ အာမာတ် ဇဝ်ဖြာ အီ စိူဝ် ခေရုပ် ဂေ ဘော ဘ့လး ဖျီင် ဂေ၊ ကာလေန့် ဂေ တွိုန် မိူဝ် ဒိုက် ဟာဝ် ခူပ် ဂေ။ အာဖုင် ဒင်ခုဝ် ဇဝ်ဖြာ ပီ ကြိုပ် ဒူအီ အီဆာရေလ ဘော ကွယ် နာ ဒဲင် ဂေ တီ။ 23 ဒေါ အန် တီ အာဖုင် ဒင်ခုဝ် ဇဝ်ဖြာ ဘော လေး ခဲင် မိူင် တွိုန်၊ ဝီ ဂိူတ် ကွယ် ဒဲင် နွန် အီ ကွယ် နာ လေး ဆီငဲ ခူပ် မိူင် တွိုန်။ 24 ဇဝ်ဖြာ ဘော ဝီ ဘျ ပေါ အူ မျုဝ် ဒီ အုဝ်။ နဝ်း ဖွိုမ် ဇဝ်ဖြာ ဘော တး စုဝ့် ဟုဝ့် အုဝ်၊ ဘော ဝီ ဘ့လေး အုဝ် ဒီ မိူင် ဘာဘဲ၊ ဒူင် ကွယ် ဂေ ဒူအီ ပဲ့ ဟဲ့ မှေတ့် ဟာဝ် ဂေ၊ တဲး ဂေ ဘဲန် မှာယ် အီ ဟဝ် တွိုန်။ ဝါယ် အန် တီ ပီ ဘျ ဇဝ်ဖြာ တီ ဘော ဝီ ဟြာယ် အူ ဇေန့်။

25 အုဝ် မိူဝ် လှုဝ်း လွင် ခဲ့ ပီ ဘျ ဇဝ်ဖြာ တဲး အုဝ် ယိုဝ် တွိုန်၊ ဝီ ကာလာင် ဒီ ဂေ အီ ဟဲ့ ခမ် ဒီ ဟာဝ် ဘဲန် မှာယ် အီ ဟဝ်။