1 ဇဝ်ဖြာ ဝီ ကာလာင် ဂြုဝ်း ဒီ အာယေရေမီ အီ မုး ဒူအီ အီ ဘျာန် ဂြုဝ်း ဇဝ်ဖြာ။ အန် ကာလာင် လွင် ဂေ ဒူအီ ဒွန် မျုဝ်။

2 အီ ကာလာင် လွင် ဂေ ဒူအီ ခဲင် မိူင် အဲဂိုပ်။ ဒါ ဆိုက် အာနေခေါ အီ မုး ခုန်ဒီခမ် အီ အိုပ် မိူင် အဲဂိုပ်၊ အန် မိူဝ် ဟဲ့ တး ချ ခူပ် ဘ့လဲင် အိုမ် အူဖာရာတ် အီ မုး ဒူင် စိူဝ် ခါဆေမိတ်။ အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ ဟဲ့ တး ဒီ တီ၊ ကာဂုဝ်း ဘော ပျာတ့် ဂေ ဒေါ မုး စုဝ် ဘာန် ခုန်ဒီခမ် အာယောယာခိမ် အီ မုး ဂွန် အာယုဝ်ဆီယာ ဒေါ ဟဲ့ အိုပ် အန် မိူင် ယူဒါ အာဒါ ဖွုန် ဆီနမ်။ ဇဝ်ဖြာ ဟဲ့ တဝ်း၊

3 “တဲး ဘေ မ့ပြာယ် မင် ဂွင့် ဘေ ဘော ခြိုင် ကာဂုဝ်း ဘေ၊ တဲး ဘေ တး ကာတတ် ဒူင် ဒီ လာယ် ကာဂုဝ်း ဘေ။

4 တဲး ဘေ ရဲန် အုန် မင်ပြွင့် ဘေ ဘော တး ကာဂုဝ်း။ တဲး ဘေ စှိုပ် ဘော မာဂိန့် ဟိန်၊ တဲး ဘေ လေး ဟာဝ်။ တဲး ဘေ လာ့ အုန် မာပွါ့ လာင် ဘေ၊ စှိုပ် ဘော ဆီတုဝ် ဟိန် ဘေ။ 5 မာလဲ၊ ဆေ န့ ပီ ပီ ယိုဝ် အုဝ်၊ အုဝ် ယိုဝ် ဂေ ဒီ ဘော ယုဝ် ကာဆဝ် ဘော ဝီ ထိူတ် ဝိဝ် နာ ပန်။ ဒါ ဆိုက် ဂေ အီ မိုဝ်း ပ့လူမ် တာင် ဟဲ့ ဟွတ့် စှိုမ်၊ ဂေ ဟဲ့ ဝီ တဝ်။ ဂေ မိူဝ် အာဝ် ဟူ ယ ဝီ မာငး ယွတ် နာ ပန်။ အာဖေ အာရေ အီ မွှိုမ် ယုဝ် ကာဆဝ် မိူဝ် ဟဲ့ ရူပ် ဂေ ဘော ဒွန် ဘ့လာက်။” ဇဝ်ဖြာ ဟဲ့ ကာလာင် ပါယ် တီ။

6 “ဂေ ဒူအီ အီ ခြန် ဒီ ကာဘ့လဲပ် တဝ်၊ ဂေ မိူဝ် တူ လွတ် တူ ပွုန်။ ဂေ အီ မိုဝ်း ပ့လူမ် တာင် ပ့လူမ် ကိူန်၊ ဂေ မိူဝ် တူ လွတ် ဒေါ မှဝ်။ ဂေ ဘော ဒီပ့လာတ် ကေး တူတ့် ခူပ် ဘ့လဲင် အိုမ် အူဖာရာတ် ဘ့လာက် နာ ကွာ။

7 အာဆေ အီ ဟဲ့ ဝီ ယိတ့် ပီ ဘ့လဲင် အိုမ် နီလာ၊ အီ ဟဲ့ မိုဝ်း အိုမ် ကော နုဝ့် ခဲင် ရူင် အန် ကော ဇမ် ခူပ် ဇမ် ဘာင် အန်။

8 ဂေ ဒူအီ ခဲင် မိူင် အဲဂိုပ် ဟဲ့ ယိတ့် ပါယ် တီ။ ဂေ ဟဲ့ ပီ ဘ့လဲင် အိုမ် နီလာ အီ ဟဲ့ မိုဝ်း အိုမ် တာင် တး၊ တဲး န့ ကော နုဝ့် ဇမ် ခူပ် ဇမ် ဘာင် အန်။ ဘ့လဲင် အိုမ် တီ ဟဲ့ မ့ပုန် တူတ့်။ ဒူအီ ခဲင် မိူင် အဲဂိုပ် မိူဝ် ဟဲ့ တဝ်း၊ ‘အုဝ် နီ အီ ဒီ ယိတ့်၊ တဲး န့ ကော ပီ အိုမ် ဟဲ့ မ့ပုန် ဘော ကာဒါယ်။ ယေ ဒီ ပျာတ့် ဝဲန် မိူင် ဒွန် မျုဝ် တီ ဘော ဒူအီ အီ ကွယ် ခဲင် မိူင် ဂေ တီ ဘောကာဂ့လျီတ်။’”

9 “အိုယ် ဘေ ဒူအီ အီ ပဝ့် မ့ပြွင့်၊ တဲး ဘေ ပီခြန် ဘေ။ အိုယ် ဘေ ဒါ ဆိုက် အီ ပဝ့် လက်လဝ် မ့ပြွင့်၊ တဲး ဘေ ဝဲတ် ဟာဝ် ဟဲ ဟဲ။ ဘေ ဒါ ဆိုက် အီ မိုဝ်း ပ့လူမ် တာင်၊ တဲး ဘေ ဟာဝ် တူင့် တူင့်။ ဘေ အီ မုး အာမျုဝ် အာကူဆာ ဘော ဒူအီ အာမျုဝ် ဖုတ် အီ ဟဲ့ ဂူင့် မင် ဂွင့် ဘော ဒူအီ အာမျုဝ် လီဒီယာ အီ ဘန့် အ။ 10 ဆီငဲ တီ၊ ဇဝ်ဖြာ အီ အိုပ် တူတ့် ဒွန် မျုဝ် ဒီ ဘူင် ဝျီ့ ဒီ ရန်ဆူ အန်၊ အန် ဒီ ဒမ် မှာပ် ဒီ ဂေ။ န့ ပီ မာပွါ့ လာင် အန် ဇဝ် ဒီ ဘော ဟူမ် ယင် ဂေ ဘော ဟြိုပ် နှာမ် ဂေ၊ တဲး န့ ကော ဖဲ။ ခုဝ်၊ န့ ပီ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ လှူ ပီ ဒီ လှူ ဘ့လာက် နာ ကွာ အီ ကွယ် ခူပ် ဘ့လဲင် အိုမ် အူဖာရာတ်။

11 အိုယ် ဘေ အီ ပီ ဒီဘျာ ဇဲတ် ခဲင် မိူင် အဲဂိုပ်၊ တဲး ဘေ ဟာဝ် ဒီ မိူင် ဂီလေအာတ်၊ တဲး ဘေ ဟာဝ် ဟြေတ့် ဆီနမ် ဖဝ်း ဒီ ဒိမ် ဘေ။ ဘေ ဘော နပ် ဒီ စ်ု ဆီနမ် ကိူန် ကာဆဝ်။ န့ ယီ တူ မိုဝ်း ဒီခုဝ် မာဆေ။ န့ ယီ တူ တဲး ဒူင် ဆဝ် ဒူင် ဒိမ် ဘေ ကဲန်။

12 ဒူအီ ဒွန် မျုဝ် ဒီ ဘော နပ် ဘော ယိုဝ် လွင် ဟဲ့ စှိုမ် ဘေ ဆာရေ။ လွင် ပီ ငှုန် ပီ က့လိုဝ် ဘေ မိူဝ်၊ ဟဲ့ ဟွတ့် ကာလတ့် ဘော မိူင်။ ဂေ ဒါ ဆိုက် အီ လာယ် ကာဂုဝ်း ဘော အာ ဘ့လာက်၊ ဂေ ဘော လာယ် ကာထိတ့် ဟဲ့ ဟွတ့် ဝီ ကေး အိတ် တူတ့် ဒဲင် ကာဒါယ်။”

13 ဟဲ့ ဟွတ့် ဝါယ် အန် တီ၊ ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ လွင် ဒီ တး အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ။ အန် ဒီ တး ကာဂုဝ်း၊ တး ပျာတ့် မိူင် အဲဂိုပ်။

14 ဇဝ်ဖြာ တဝ်း၊ “တဲး မဲ ကာလာင် ခဲင် ကာဒါယ် မိူင် အဲဂိုပ်၊ ခဲင် မိူင် မိက်ဒူန်၊ မိူင် မဲမ်ဖီ ဘော ခဲင် မိူင် တာပါနိတ် တဝ်း၊ ‘တဲး ဘေ လေး တး၊ တဲး ဘေ ရဲန် အုန် ဒုဝ် ဘေ။ ခုဝ်၊ န့ ပီ မာပွါ့ လာင် ဇဝ်ဖြာ ဒီ ဟူမ် ယင် ဒူအီ အီ ကွယ် ရူပ် ဒူင် ကွယ် ဘေ တီ။’

15 မှဝ် န့ ပါယ် ဒါ ဆိုက် ဘေ ပီ ဆော ကေး။း န့ မုး ဇဝ်ဖြာ အီ တူ တဲး ဂေ စွင့် ဆီချာ၊ တဲး ဂေ ကေး။

16 အန် ဟဲ့ ဘူင် တဲး ဒူအီ ကိူန် ဝီ ကာဂုဝ်း လာယ် ဒိုဝ် လာယ် ကေး ထိပ် ဘဲန် ဇေန့် ဘဲန် ဇေန့်။ အူ ဝီ ဘော ဝီ ကာလာင် ဒီ ပေါ အူ ဝီ တဝ်း၊ ‘တဲး အေ ယိတ့်၊ တဲး အေ ဝီ ဝေန့် ခဲင် မိူင် ဒူင် ဂွိုတ် တး အေ။ တဲး အေ ကွယ် ကာတူင့် ဒီ မာပွါ့ လာင် အီ ဟဝ်။’

17 ဒူင် ကွယ် ဂေ တီ ဂေ ဒီ တဝ်း၊ ‘ခုန်ဒီခမ် ဖာရုဝ် အီ အိုပ် မိူင် အဲဂိုပ် အာဝ် မိုဝ်း ဒီခုဝ်။ အန် ဟဲ့ တဲး အာခြာဝ် နာ မွှိုမ် ပွုန် ဟာဝ် ပီယေန့်။’

18 ခုန်ဒီခမ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် မုး ဇဝ်ဖြာ အီ အိမ်။ ရန်ဆူ အီ ဒီ တး စှုး ဘေ၊ အန် ဒီ ဘော ပီ နွန် ထာဘော ဘော နွန် ဂါမေလ အီ ဟဲ့ စာ ကာဆဝ်၊ အီ ကွယ် ခူပ် အိုမ် နမ်မုက်ဆာရာ။

19 အိုယ် ဘေ ဒူအီ ခဲင် မိူင် အဲဂိုပ်၊ တဲး ဘေ ရဲန် အုန် ကြုဝ်ကြာမ် ဘေ။ ဘေ လုဝ် ခမ် အီ တး မှေတ့် ဟာဝ် ဘေ။ မိူင် မဲမ်ဖီ ဒီ ဘဲန် မိူင် ရာမ် ဘော လိုဝ် ကာပျာတ့် တူတ့်၊ အာဝ် ဟူ မိုဝ်း ဒူအီ အီ ကွယ်။

20 မိူင် အဲဂိုပ် ပီ ဂွန် မက် ဆိူဝ် အီ စှိတ် ကာဆဝ်။ မာလဲ၊ ဝီ အီ ဒီ တး ပျာတ့် အန် ဒီ တး ဘ့လာက် နာ ကွာ ပီ မာဂူပ် တး ကဝ့် အန်။

21 ဂေ ဒါ ဆိုက် အီ ဇာင် ခဲင် မိူင် တီ၊ ဂေ ဒီ ဘော ပီ ဖိုင် မာမက် ပဲ့ ဟဲ့ ဟျီင် အီ တဲး ဂေ ဂ့လန့် ဆီချာ။ ဂေ မိူဝ် တူ ပွိုန် ကွယ် တူ ပွိုန် ခမ်။ ဂေ ဒီ ဘော ကာဒုး ဒီ တဝ် လေး ဟာဝ်။ ခုဝ်၊ ဂေ ဒီ လိုဝ် စှိုမ် ဒီ ရန်ဆူ ဂေ၊ အာခြာဝ် ဒီ လုဝ် ခမ် ဂေ ဒုက် ဟဲ့ ဟွတ့် ဇမ်။

22 ဒေါ တး ဇမ် ရန်ဆူ ဂေ တီ ဂေ ဒူအီ မိူင် အဲဂိုပ် ဒီ ဘော ဟမ် ပီ ဟမ် မာဟန့် ဘော လှန် လေး ဟာဝ်။ ရန်ဆူ ဂေ ဒီ တး ကာဂုဝ်း ဒီ ဂေ၊ တဲး န့ ပီ အီ ဒိုဝ်း မိုယ်၊ ဂ်ု ဟေ။

23 အီ ဒီ တး ကာဂုဝ်း ဒီ ဂေ ဒီ ဘော ပီ အီ ဂ်ု ကေး တူတ့် ဟေ ခဲင် ပြဲ။ ဇဝ်ဖြာ ဟဲ့ တဝ်း၊ ဒူအီ ဂေ ယီ ဟဲ့ ကိူန် ကာဆဝ် ကော ဟူ နပ် ဒီ တိး။ ဒါ တာင် အီ အိုပ် ဒါ ဆိုက် ဂေ မိူဝ် ဟဲ့ ကိူန် ကာဆဝ် ကော ဟူ နပ် ဒီ တိး။ ဂေ မိူဝ် ကိူန် လွှိုမ် မာ အာမူင့်။

24 ဂေ ဒူအီ ခဲင် မိူင် အဲဂိုပ်၊ ဂေ လုဝ် ခမ် အီ မွှိုမ် ဆာယ်၊ ဂေ လုဝ် ဘဲန် ပီ အိုပ် ဂေ ဒူအီ အီ ကွယ် ဘ့လာက် နာ ကွာ တွိုန်။”

25 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ပီ ဝီ တဝ်း၊ “ဘ်ု ဘေ ယွတ်၊ အုဝ် ဒီ ဒမ် မှာပ် ဒီ ဇဝ် အာမူန် အီ ကွယ် ခဲင် မိူင် ဆေဘီ။ အုဝ် ဒီ ဒမ် မှာပ် ဘော ဒီ ခုန်ဒီခမ် အီ အိုပ် မိူင် အဲဂိုပ်။ ဘော ဒီ ဇဝ် ပီ ကြိုပ် အန် ဘော ဒီ ဂေ ဒူအီ ဘောကာဂ့လျီတ် အီ ညှိုမ် ဘိုင် ဇဝ် တီ။ 26 အုဝ် ဒီ ဝီ အာပ် ဂေ ဒီ ဒူအီ အီ ဟြေတ့် ဒီ ငဝ်း အာဆာက် ဂေ။ န့ မုး ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဘော ဒီ ဂေ ဒါ ဘုဝ် အန်။ မာလဲ၊ ခဲင် မိူင် အဲဂိုပ်၊ န့ ဒီ မိုဝ်း ဒူအီ အီ ကွယ် ပီ အာတ့် နီ။” ဇဝ်ဖြာ ဟဲ့ ကာလာင် ပါယ် တီ။

27 “အိုယ် မဲ ဒဲစေန့် အုဝ် အီ စိူဝ် အာကူပ်၊ ကွဲ့ ယုဝ်။ အိုယ် ဘေ ဒူအီ အီဆာရေလ၊ ကွဲ့ တဲး နဝ်း ဘေ လိုဝ်။ အုဝ် ဒီ ချွတ် ဘေ ဘော ဘီနွင် ဝေါဝဲ ဘေ ဘော န့ကြိုဝ်း ခြိုဝ် ဘေ ဘောကာဂ့လျီတ်၊ တဲး ဘေ ဝီ လေး ခဲင် မိူင် ပဲ့ ဟဲ့ မှေတ့် ဟာဝ် အီ ဒီ ဘေ။ ဂေ ဒူအီ အာမျုဝ် အာကူပ် ဒီ ပွိုန် ဒီ ဝီ တး၊ တဲး ဂေ ပွိုန် ကွယ် နှိမ် နှိမ် ကွယ် ဒါခိုယ် ဂျာမ်ဆာ။ အာဝ် ဟူ မိုဝ်း အာဆေ အီ တး ကာဘျုဝ် တး ကာစွှာ့ ဂေ။

28 အိုယ် ဒဲစေန့် အုဝ် အီ မုး အာမျုဝ် အာကူပ်၊ ကွဲ့ တဲး ဘေ က့လိုဝ်။ အုဝ် ဒီ ကွယ် ရိုမ် ဒူပ် ဘေ။ အုဝ် ဒီ ဟုဝ် လေး ဘေ တဲး ဘေ ကွယ် ကာတဲ ဒူအီ ဘဲန် မျုဝ် ဘဲန် မျုဝ်၊ အုဝ် ပီ ဘော ဟဲ့ တဲး ဒူအီ ဇိုဝ် တီ ဒွန် မျုဝ် လိုဝ် စှိုမ် တူတ့် မိူဝ်၊ အုဝ် ယီ တူ တဲး ဘေ လိုဝ် စှိုမ်။ ဘေ ယီ တူ ပွိုန် လွတ် အုဝ် ဒမ် မှာပ် ဒီ ဘေ။ အုဝ် ယီ ဒီ မာနုဝ် ဘေ၊ တဲး န့ ဒူပ် ဒါရာ။”