1 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ လွင် ဂေ ဒူအီ အာယူဒါ အီ တဝ် ဟာဝ် မိူင် အဲဂိုပ်၊ အီ ကွယ် ခဲင် မိူင် အဲဂိုပ် ဘ့လာက် နာ ကွာ။ န့ ဘော မုး မိူင် မိက်ဒူန်၊ မိူင် တာပါနိတ် ဘော မိူင် မဲမ်ဖီ။ အန် ကာလာင် ဘော လွင် ဂေ ဒူအီ အီ ကွယ် ဘ့လာက် နာ တေတ့်။ အန် တဝ်း၊ 2 “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ။ ‘ဘေ ဟဲ့ ဟွတ့် ဒွိုမ် ယိုဝ် အာဖေ အာရေ ပီ ခမ် ဂေ ဒူအီ ခဲင် မိူင် ယေရူဆာလဲမ် ဘော ခဲင် ကာဒါယ် မိူင် ယူဒါ။ ဘေ ယွတ်၊ မာန် မိူင် ဂေ တီ ဟဲ့ ဟွတ့် ရာမ် တူတ့် ဒေါ တီ နီ။ အာဝ် ဟူ မိုဝ်း ဒူအီ အီ ကွယ်။ 3 န့ ဘဲန် ပါယ် တီ ကူပ် မှာပ် ပီ ဘူင် ဂေ ဒူအီ ခဲင် မိူင် တီ။ န့ ဟဲ့ ကာဆုး နဝ်း အုဝ်၊ တဲး အုဝ် ရူ ကာဆဝ် ဒီ ဂေ။ ဂေ ဟဲ့ ဝီ ဒိုဝ်း ဆီနမ် အုး ငှုန်၊ ဝီ ဒုဝ့် လှူ ဒီ ဇဝ် အာရိုပ် ပီ တူ နပ် ဂေ၊ အီ မုး ဇဝ် ပီ ကြိုပ် ဒူအီ အာမျုဝ် ဟဝ်။ ဘော ဘေ ဘော ဂေ ဂုန့် ဒင် ဘေ တူ ဒွိုမ် နပ် လွင် ဇဝ် ပီ ကြိုပ် ဂေ တီ။ 4 ဘဲန် ဇေန့် ဘဲန် ဇေန့် အုဝ် ဟဲ့ တိုယ် ဂေ ဒဲစေန့် အုဝ် အီ မုး ဒူအီ ဘျာန် ဂြုဝ်း ဇဝ်ဖြာ၊ တဲး ဂေ တး ဒူင် ကွယ် ဘေ၊ ကာလာင် ဒီ ဘေ ဆေဆေ တဝ်း၊ ကွဲ့ တဲး ဘေ ဘူင် ပီ ကာအိး ဘော ပီ ဇွင့် အုဝ်။ 5 ဂေ ပီ ဘော ဟဲ့ တဝ်း ပါယ် တီ မိူဝ်၊ ဂေ ယီ တူ ထူမ်၊ တူ တဲး န့ လိုပ် ဟျုဝ့် ဂေ။ န့ မိူဝ် တူ တဲး ဂေ ဝဲန် မှာပ် ပီ ဘူင် ဂေ။ ဂေ ယီ ဝီ ဒိုဝ်း ဆီနမ် အုး ငှုန်၊ ဝီ ဒုဝ့် လှူ ဒီ ဇဝ် ပီ ကြိုပ် အီ ဟဝ်။ 6 ကူပ် န့ ပါယ် တီ အုဝ် ဘော ရူ ကာဆဝ်။ အုဝ် မိူဝ် ဒိုဝ်း ငဝ် ဒုဝ့် ကာဆိုမ် ရဝ် ဂေ ဘော မိူင် ဂေ အီ ကွယ် ခဲင် ကာဒါယ် မိူင် ယူဒါ။ အုဝ် ဘော ပျာတ့် ဒူပ် န့တေန့် ခဲင် မိူင် ယေရူဆာလဲမ်။ မိူင် ဂေ တီ အုဝ် ဟဲ့ ဝဲန် တဲး န့ ဘဲန် မိူင် ရာမ် ပီ ပီ ယိုဝ် ဘေ ဒေါ တီ နီ။’”

7 ဒေါ တီ နီ၊ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် တဝ်း၊ “မှဝ် န့ ပါယ် ပီ ဝီ ဘူင် ဘေ၊ တဲး ဘေ ဝီ ခမ် အာဖေ အာရေ အီ မွှိုမ် ယုဝ် ခဲ့ တီ။း န့ ပီ ဘေ ဒီ ဒဲပ် ဝဲန် ဘော အီဘိုန့် ဘော အီမာယ် ဘော ဂွန် ဘော ဂွန် င ခဲင် မိူင် ယူဒါ၊ ကွဲ့ တဲး န့ ဆီ မိုဝ်း ခေါ အူ ဝီ။ 8 မှဝ် န့ ပါယ် ပီ ကာဆုး ဘေ ဒီ အုဝ်၊ တဲး အုဝ် ရူ ကာဆဝ်။း ကူပ် ကြိုပ် ဘေ ခဲ့ ပီ ဘူင် ဘေ ရာင် ဘေ။ ဘေ ဟဲ့ ဒိုဝ်း ဆီနမ် အုး ငှုန်၊ ဒုဝ့် လှူ ဒီ ဇဝ် ပီ ကြိုပ် အီ ဟဝ်၊ အီ ကွယ် ခဲင် မိူင် အဲဂိုပ်၊ ဒူင် ဟဲ့ ဟာဝ် ကွယ် ဘေ တီ။ ဘေ ဒီ ဘော လုဝ် ဘဲန် ဒူအီ ပီ ဘ့လေး ဝဲန် အီ ဟဝ်၊ ဘဲန် ဘော ဒူအီ ပီ ဒိူင် ပီ နဲန ဒူအီ ဒွန် ခြိုဝ် ဒွန် မျုဝ် ဒဲင် ကာဒါယ် နီ။ 9 ဘေ မိူဝ် ဟဲ့ ဝီ ပိဝ် နာ တူ မွှိုမ် ပဲ့ ဟဲ့ ဘူင် ဂေ ဂုန့် ဒင် ဘေ ဘော နာ တူ မွှိုမ် ပဲ့ ဟဲ့ ဘူင် ဂေ ခုန်ဒီခမ် ခဲင် မိူင် ယူဒါ ဘော နာ တူ မွှိုမ် ပဲ့ ဟဲ့ ဘူင် နာင် ဟောခမ်၊ နာ တူ မွှိုမ် ပဲ့ ဟဲ့ ဘူင် ဒုဝ် ဘေ ဘော ပဲ့ ဟဲ့ ဘူင် အီဘိုန့် ဘေ အီ မုး နာ တူ မွှိုမ် ပဲ့ ဟဲ့ ဘူင် ဘေ ဘောကာဂ့လျီတ် ခဲင် မိူင် ယူဒါ ဘော ဒူပ် န့တေန့် ခဲင် မိူင် ယေရူဆာလဲမ်။ 10 ဒူအီ ဂေ တီ၊ ဂေ တူ ပီတျီမ် နဝ်း ဂေ ကော ဇမ် ဒေါ တီ နီ။ ဂေ မိူဝ် တူ မိုဝ်း နဝ်း ရုဝ်ဆေ အုဝ် ဘော တူ ဒူပ် ဒါရာ အုဝ်၊ တူ ဘူင် ဒူပ် ပီ ဒမ် အုန် အုဝ် ဒီ ဂေ ဒေါ ဟဲ့ ဒွါ အုဝ် ကာဒိက် ဆတ်ဇာ ဒီ ဂေ ဘော ဒီ ဂုန့် ဒင် ဂေ။”

11 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ကာလာင် တဝ်း၊ “အုဝ် ဒီ ဒမ် မှာပ် ဒီ ဘေ ဘော ဝဲန် ဘေ။ အုဝ် ဒီ ဒိုဝ်း ဝဲန် ဘော ပျာတ့် ဝဲန် ဘေ ဒူအီ အာယူဒါ ဘောကာဂ့လျီတ်။ 12 အုဝ် ဒီ ဒိုဝ်း ဒူအီ အာယူဒါ အီ ဆီ ဂိတ် ဆီ ကွယ်၊ အီ ဟာဝ် ဘိုင် ဟာဝ် ကွယ် ခဲင် မိူင် အဲဂိုပ်၊ တဲး ဂေ ဘောကာဂ့လျီတ် လိုဝ် စှိုမ် ခဲင် မိူင် အဲဂိုပ် တီ။ ဂေ ဒီ ဘော လိုဝ် စှိုမ် ဒီ အာဖေ အာရေ အီ တဲး ဂေ ယမ် ဒီ မာပွါ့ လာင် ဘော အာဖေ အာရေ အီ တဲး ဂေ အေတ့် ပီ ဒီ ဟူမ်။ န့ ဒီ ဘော စုး ဒီ ဒူအီ အီ တူ မိုဝ်း အာရေ မာဆေ ကော ဝီ ဇမ် ဒီ ဒူအီ အီ အာရေ တာင် လွှိုမ် အီ ဟဝ်။ ဂေ ဒီ ဘော ယမ် တူတ့် ဒီ မာပွါ့ လာင် ဘော အေတ့် ပီ ဒီ ဟူမ်။ ဂေ ဒီ ဘော ဘဲန် ဒူအီ ပီ အေး ပီ ဒိူင် အီ ဟဝ်၊ ဘဲန် ပီ ကာစွာ အီ ဟဝ် ဘော ပီ နဲန အီ ဟဝ်။ 13 အုဝ် ဒီ ဒမ် မှာပ် ဒီ ဒူအီ အီ ကွယ် ခဲင် မိူင် အဲဂိုပ်၊ တဲး န့ ပီ ဒေါ ဟဲ့ တဲး အုဝ် ဂေ ဒူအီ ခဲင် မိူင် ယေရူဆာလဲမ် ခမ် အာဖေ အာရေ၊ တဲး ဂေ ယမ် ဒီ မာပွါ့ လာင် ဘော တဲး ဂေ အေတ့် ပီ ဒီ ဟူမ် ဘော မိုဝ်း ဆဝ် ရောဂါ။ 14 ဂေ ဒူအီ အာယူဒါ အီ ဆီ ဂိတ် ဆီ ကွယ်၊ အီ ဟဲ့ ဟာဝ် ကွယ် ဟာဝ် ဘိုင် မိူင် အဲဂိုပ်၊ ဂေ တူ ပွိုန် လွတ် အာဖေ အာရေ တီ။ ဂေ မိူဝ် အာဝ် ဟူ မိုဝ်း ခေါ အူ ဝီ အီ ပွိုန် ဒီ ဝီ တး ခဲင် မိူင် ယူဒါ။ ဂေ ပီ ဘော မိုဝ်း နဝ်း ဆီ ဝီ တး မိူဝ်၊ ဂေ တူ ပွိုန် တး။ န့ မိုဝ်း မီ မင် အီ အီ လွတ် အာဖေ အာရေ တီ။ ခုဝ်၊ ဂေ အီ ဟဲ့ တဝ် ဟာဝ် ဒီ အာတ့်၊ ဂေ ပွိုန် ဝီ တး။”

15 ဂေ အီမာယ် ဒူအီ အီ ဟဲ့ နပ် လွင် အီဘိုန့် ဂေ ဟဲ့ ဒွိုမ် ဒိုဝ်း ဆီနမ် အုး ငှုန်၊ ဒုဝ့် လှူ ဒီ ဇဝ် ပီ ကြိုပ် အီ ဟဝ် ဘော ဂေ အီဘိုန့် အီ ကွယ် ကာတတ် ဒူင် တီ ဘော ဂေ ဒူအီ ကိူန် အီ ကွယ် နာ ကွာ ဘော နာ တေတ့် မိူင် အဲဂိုပ်၊ ဂေ ဘောကာဂ့လျီတ် ဘော ဝီ တး ဒူင် ကွယ် အာယေရေမီ ဘော ကာလာင် ဒီ အန် တဝ်း၊ 16 “ဂြုဝ်း ပဲ့ ဟဲ့ ဂါဝ် မဲ ပွုန် ဇဝ်ဖြာ ဘော ပီ ကာလာင် မဲ ဒီ ယေ၊ ယေ တူ ဒိုဝ်း၊ ယေ တူ ထူမ်။ 17 ယေ ဒီ ဘူင် ခဲ့ ပီ ဒွိုမ် ကာလာင် ယေ။ ယေ ဒီ ဒိုဝ်း ဆီနမ် အုး ငှုန်၊ ဒုဝ့် လှူ ဒီ နာင် ဟောခမ် အီ အိုပ် ဂါင်ဟြာဝ်။ ယေ ဒီ လှူ ဘော ပီ ဒီ ဒျီင် ဒီ နာင် တီ၊ တဲး န့ ပီ ပဲ့ ဟဲ့ ဒွိုမ် ဘူင် ယေ ဘော ဂေ ဂုန့် ဒင် ယေ ဘော ဂေ ခုန်ဒီခမ် ယေ ဘော ဂေ အာမူ အာမာတ် ယေ။ ဂေ ဟဲ့ ဘူင် ဇိုဝ် တီ ခဲင် ကာဒါယ် မိူင် ယူဒါ ဘော ဒူပ် န့တေန့် ခဲင် မိူင် ယေရူဆာလဲမ်။ ဒေါ အန် တီ ယေ ဟဲ့ ပွိုန် ဒီ ဟူမ် ဖဲ ဟူမ် လိုင်။ ယေ မိူဝ် တူ ယိုဝ် အာဖေ အာရေ ဘော ပွိုန် ဒီ ကွယ် ဒါခိုယ်၊ ကွယ် ဂျာမ်ဆာ။ 18 ဒေါ တူ ဝီ ဒိုဝ်း ယေ ဆီနမ် အုး ငှုန်၊ ဒုဝ့် လှူ ဒီ နာင် ဟောခမ် အီ အိုပ် ဂါင်ဟြာဝ် တီ ဘော ဒေါ တူ ဝီ လှူ ယေ ပီ ဒီ ဒျီင် ဒီ အန်၊ ယေ ဘော ဝီ ဂိန် ဘော အေတ့် ဒွန် မျုဝ်၊ ဝီ ခမ် ဘော အာဖေ အာရေ အီ တဲး ယေ ယမ် ဒီ မာပွါ့ လာင် ဘော အာဖေ အာရေ အီ တဲး ယေ အေတ့် ပီ ဒီ ဟူမ်။”

19 အီဘိုန့် ဂေ တွိုန် ပီ ဝီ တဝ်း၊ “ဒေါ ဘူင် ယေ ခါမုန် တဲး န့ ပီ အာရိုပ် နာင် ဟောခမ် အီ အိုပ် ဂါင်ဟြာဝ် တီ ဘော ဝီ လှူ ဒီ အန်၊ လှူ ဘော ပီ ဒီ ဒျီင် အီ မုး အိုမ် မာငုန်၊ အီမာယ် ယေ တူ မိုဝ်း ဒီ ခြဲ ယေ၊ ဂေ ဘော ခ့ဝါင် တဲး ယေ ဘူင် ဒါခိုယ် ဒါခိုယ်။”

20 အာယေရေမီ ဘော ဝီ ကာလာင် ဒီ ဂေ ဒူအီ ကိူန် ဘော အီဘိုန့် ဘော အီမာယ် အီ ကာလာင် ဂြုဝ်း ဒီ အန်။ အန် တဝ်း၊ 21 “ဘော ဘေ ဘော ဂေ ဂုန့် ဒင် ဘေ ဘော ဂေ ခုန်ဒီခမ် ဘေ ဘော ဂေ အာမူ အာမာတ် ခုန်ဒီခမ် ဒူအီ အီ ကွယ် ခဲင် ရဝ် ခဲင် မိူင် ယူဒါ ဘော ဂေ အီ ကွယ် ဒူပ် န့တေန့် ခဲင် မိူင် ယေရူဆာလဲမ်၊ ဘေ ထာင် ဇဝ်ဖြာ တူ လှုဝ်း၊ တူ နပ် လွင် အန် တီ။း 22 ကူပ် ပီ ဘူင် ဘေ တီ၊ ဇဝ်ဖြာ ကော ဟူ ပွိုန် ယိူန် ဟာဝ် ပေါ န့ ပွါ။ ကူပ် ဟဲ့ ဘူင် ဘေ အီ တူ မွှိုမ် ဘော အီ မွှိုမ် ကာအိး၊ မွှိုမ် ကာဒါတ့်၊ မိူင် ဘေ ကော ဘဲန် မိူင် လိုဝ် မိူင် ရာမ်၊ ဘဲန် အီ မွှိုမ် ယုဝ် ကာဆဝ် ဘော ဘဲန် ပီ အေး ပီ ဒိူင် အီ။ န့ ဘော ဘဲန် ဒူင် တူ မိုဝ်း ဒူအီ အီ ကွယ် ပီ ပဲ့ ဟဲ့ ယိုဝ် ဘေ ဒေါ တီ နီ။ 23 ကူပ် ဟဲ့ ဒိုဝ်း ဘေ ဆီနမ် အုး ငှုန်၊ ဒုဝ့် လှူ ဒီ ဇဝ် ပီ ကြိုပ် အီ ဟဝ် တီ၊ ဘေ ဟဲ့ လုတ့် ဇဝ်ဖြာ။ ဘေ မိူဝ် တူ ထူမ် ဂြုဝ်း ဇဝ်ဖြာ ဘော ပီ ကာလာင် အန် ဒီ ဘေ။ ဘေ မိူဝ် တူ ဘူင် ဒူပ် ပီ ဒမ် အုန် အန် ဘော ဒါရာ အန်။ ခုဝ်၊ ဘေ လုဝ် ခမ် အာဖေ အာရေ ပီ ခမ် ဘေ ဒေါ တီ နီ။”

24 အာယေရေမီ ပီ ဝီ ကာလာင် ပေါ န့ ပွါ ဒီ ဂေ ဒူအီ ဘောကာဂ့လျီတ် ဘော ဒီ အီဘိုန့် ဘော ဒီ ဂေ အီမာယ် တဝ်း၊ “အိုယ် ဘေ ဒူအီ အာယူဒါ အီ ကွယ် ခဲင် မိူင် အဲဂိုပ် ဘောကာဂ့လျီတ်၊ တဲး ဘေ ထူမ် ဂြုဝ်း ပီ ကာလာင် ဇဝ်ဖြာ။ 25 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ။ ဘော ဘေ ဘော ဂေ အီဘိုန့် ဘေ ဟဲ့ ဟွတ့် ဒွါ ကာဒိက် ဆတ်ဇာ ဒီ နာင် ဟောခမ် အီ အိုပ် ဂါင်ဟြာဝ်။ ဘေ မိူဝ် ဟဲ့ ဝီ ဘူင် ဒူပ် ပီ ကာဆဲန့် ဘေ ဒီ အန် တဝ်း၊ ‘ယေ ဒီ ဒိုဝ်း ဆီနမ် အုး ငှုန်၊ ဒုဝ့် လှူ ဒီ နာင် ဟောခမ် အီ အိုပ် ဂါင်ဟြာဝ် တီ။ ယေ ဒီ လှူ ဘော ပီ ဒီ ဒျီင် ဒီ အန် အာခ်ု မှာန်။’ ပါယ် တီ တဲး ဘေ မိူဝ် ဘူင် ဒူပ် တဲး န့ ဒူပ် ခဲ့ ပီ ဒွိုမ် ကာဆဲန့် ဘေ။ 26 အိုယ် ဘေ ဒူအီ အာယူဒါ အီ ဟာဝ် ကွယ် ဟာဝ် ဘိုင် မိူင် အဲဂိုပ်၊ တဲး ဘေ ထူမ် ဂြုဝ်း ဇဝ်ဖြာ၊ ဇဝ်ဖြာ အီ ဟဲ့ တဝ်း၊ အုဝ် ဒီ ဂါဝ် ပွုန် အုဝ်၊ ဒိူင် ကာဆဲန့် တဝ်း၊ ဂေ ဒူအီ အာယူဒါ အီ ဟာဝ် ကွယ် ခဲင် မိူင် အဲဂိုပ် ဒွန် ပ့လုဝ့် ဒွန် နာ၊ အုဝ် တူ တဲး ဂေ ပွိုန် ဒီ ဂါဝ် ပွုန် အုဝ် တဝ်း၊ ‘ဟဲ့ မုး ဟဲ့ မှာန်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကွယ် ဟဲ့ အိမ်။’ အုဝ် တူ ခ့ဝါင် တဲး ဂေ ဝီ ကာလာင် ပါယ် တီ ခေါ အူ ဝီ။ 27 အုဝ် ဟဲ့ ဘ်ု ဒီ ယွတ် ဂေ။ အုဝ် ယီ တူ ဘူင် နာ ဘွတ် နာ မွှိုမ် ဒီ ဂေ။ အုဝ် ဘူင် နာ ဟာယ် နာ မိူက် ဒီ ဂေ။ ခဲ့ ကွယ် ဂေ ဒူအီ အာယူဒါ အီ ဟာဝ် ကွယ် ဟာဝ် ဘိုင် မိူင် အဲဂိုပ်၊ ဂေ ဒီ လိုဝ် စှိုမ် ဒီ မာပွါ့ လာင်၊ ဒီ အေတ့် ပီ ဒီ ဟူမ် ဘော မိုဝ်း ဆဝ် ရောဂါ။ ဂေ ဘောကာဂ့လျီတ် မိူဝ် ဒီ လိုဝ် စှိုမ်၊ ကွဲ့ တဲး န့ ဆီ ဂိတ် ခေါ အူ ဝီ။” 28 ပါယ် တီ ဂေ ဒူအီ အီ လွတ် အာဖေ အာရေ ဒီ မာပွါ့ လာင် တီ၊ ဂေ ဒီ ပြေတ့် ကာဆဝ်။ ဂေ ဒီ ဝီ တဝ် လေး ခဲင် မိူင် အဲဂိုပ်၊ ဝီ တး ခဲင် မိူင် ယူဒါ။ ဂေ ဒူအီ အီ ဟာဝ် ကွယ် ဟာဝ် ဘိုင် မိူင် အဲဂိုပ် တီ၊ ဂေ ဒီ နပ် ဂြုဝ်း အာဆေ ဟဲ့ မှာန်၊ ယုဝ် န့ မုး ဂြုဝ်း ပီ ကာလာင် အုဝ်၊ ယုဝ် န့ ဂြုဝ်း ပီ ကာလာင် ဂေ။

29 ဇဝ်ဖြာ တဝ်း၊ အုဝ် ဟဲ့ ဘျ တဲး န့ ဘဲန် လက်ဆာနာ ဒီ ဘေ။ အုဝ် ဒီ မာနုဝ် ဘေ ဒီ နီ၊ တဲး ဘေ နပ်၊ ဂြုဝ်း အုဝ် အီ လာယ် ကာဘး ဒီ ဘေ၊ န့ ဒီ မှာန် အာခါခ်ု။ 30 အုဝ် ဒီ ဒိုဝ်း ခုန်ဒီခမ် ဖာရုဝ် အာဟောဖာရာ အီ မုး ခုန်ဒီခမ် အီ အိုပ် မိူင် အဲဂိုပ် ဒွါ ဒီ ဂေ ရန်ဆူ အန်၊ အီ ဟြေတ့် ဒီ ငဝ်း ယမ် အာဆာက် အန်။ အုဝ် ဒီ ဘူင် ဒီ အန်၊ တဲး န့ ပီ ပဲ့ ဟဲ့ အာပ် အုဝ် အာဇေဒေကီ အီ မုး ခုန်ဒီခမ် မိူင် ယူဒါ ဒီ အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ။ အီ မုး ရန်ဆူ အန် အီ ဟြေတ့် ဒီ ငဝ်း ယမ် အာဆာက် အန်။