1 အာယေရေမီ ဟဲ့ ဟွတ့် ကာလာင် တူတ့် ဂြုဝ်း ဇဝ်ဖြာ ဒီ ဂေ ဒူအီ ဘောကာဂ့လျီတ် ခဲ့ ပီ ကာလာင် ဇဝ်ဖြာ ဒီ အန်။ 2 ဒေါ အန် တီ အာဇာရီယာ အီ မုး ဂွန် အာဟောဆာယာ ဘော အာယောဟာနန် အီ မုး ဂွန် အာကာရေအာ ဘော ဂေ အီ မိုဝ်း နဝ်း ပီခိုက် ဘောကာဂ့လျီတ်၊ ဂေ ဝီ ကာဖြူမ် ဒီ ကာလာင် ဒီ အာယေရေမီ တဝ်း၊ “မဲ ကာလာင် ဂြုဝ်း တူ မှာန်။ ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ အန် တူ မိုဝ်း ဒီ ကာလာင် ဒီ မဲ တဝ်း၊ ‘ဘေ တူ ကာအာပ် ဟာဝ် ခဲင် မိူင် အဲဂိုပ်၊ ဟာဝ် ကွယ် ဒီ တီ။’ 3 မာလဲ၊ အာဘာရုက် အီ မုး ဂွန် အာနေရီ တွိုန်၊ အန် ကာဆုး မဲ၊ တဲး မဲ ဝီ ကာဘး ဒီ ယေ၊ တဲး မဲ ပွိုန် ဒီ အာပ် ယေ ဒီ ဒူအီ ဘာဘဲ၊ တဲး ဂေ ငဝ်း ယမ် ယေ။ ဆေ အာဝ် ပါယ် တီ မိူဝ်၊ ဂေ ဒီ ဒိုဝ်း ဟာဝ် ယေ ခဲင် မိူင် ဘာဘဲ။”

4 ပါယ် တီ အာယောဟာနန် အီ မုး ဂွန် အာကာရေအာ ဘော ဒါ ဘုဝ် အီ အိုပ် ဒါ ဆိုက် ဘော ဂေ ဒူအီ ဘောကာဂ့လျီတ် တူ ထူမ် ဂြုဝ်း ဇဝ်ဖြာ အီ စ်ု တဲး ဂေ ကွယ် ခဲင် မိူင် ယူဒါ။ 5 ပါယ် တီ အာယောဟာနန် ဘော ဂေ ဒါ ဘုဝ် အီ အိုပ် ဒါ ဆိုက်၊ ဂေ ဘော ဝီ ယဲတ့် ဂေ ဒူအီ အီ ဆီ ဂိတ် ဆီ ကွယ် ခဲင် မိူင် ယူဒါ၊ တဲး ဂေ ဘောကာဂ့လျီတ် ဝီ ဟာဝ် မိူင် အဲဂိုပ်။ ဒူအီ ဂေ တီ ဘော မုး ဒူအီ အီ ဟဲ့ ဝီ တး ခဲင် မိူင် ဒူင် ပဲ့ ဟဲ့ ဟုဝ် ရန်ဆူ ဂေ တဲး ဂေ ကာယဝ်း။ ဂေ ယီ ဟဲ့ ဝီ တး တဲး ဂေ ကွယ် ခဲင် မိူင် ယူဒါ။ 6 န့ ဘော မိုဝ်း ဘော အီဘိုန့် ဘော အီမာယ် ဘော ဂွန် ဒီရွယ် ဘော ဂေ ဂွန် အီဘိုန့် ခုန်ဒီခမ် ဘော အာယေရေမီ အီ မုး ဒါ အီ ဘျာန် ဂြုဝ်း ဇဝ်ဖြာ ဂါယ် အာဘာရုက် အီ မုး ဂွန် အာနေရီ ဘော ဂေ ဒါ ဘုဝ် အီ အိုပ် ဒါ ဆိုက် ယူဒါ ပဲ့ ဟဲ့ အာပ် အာနေဘူဆာရဒါန် ဒီ အာကေတာလီ တွိုန်။ 7 ဂေ မိူဝ် တူ ထူမ် ဂြုဝ်း ဇဝ်ဖြာ ဘော ဝီ ဟာဝ် ဒီ မိူင် တာပါနိတ်။

8 ဒေါ ကွယ် ဂေ ဒီ မိူင် တာပါနိတ် တီ၊ ဇဝ်ဖြာ ဘော ဝီ ကာလာင် ဂြုဝ်း ဒီ အာယေရေမီ တဝ်း၊ 9 “တဲး မဲ ဒိုဝ်း မာဝ် ဒီ တာင်၊ ဝီ ဒိပ် အုန် ခဲင် ကာဒါယ် ခဲင် ဝဲင် ဟုဝ် ခုန်ဒီခမ် အီ ကွယ် ခဲင် မိူင် တာပါနိတ် တီ။ ပီ ဘူင် မဲ တီ တဲး ဂေ ဒူအီ အီဆာရေလ ဘော ယိုဝ်။ 10 ဝါယ် အန် တီ၊ မဲ လုဝ် ဝီ ကာလာင် ဒီ ဂေ တဝ်း၊ ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ။ အန် ဟဲ့ တဝ်း၊ ‘အုဝ် ဒီ စ်ု ဒဲစေန့် အုဝ် အီ စိူဝ် အာနေဘူခတ်နေစာ အီ မုး ခုန်ဒီခမ် မိူင် ဘာဘဲ၊ တဲး အန် တး ဘ့လေး အုန် မာလာင် အန် ဒဲင် မာဝ် ပီ ဒိပ် အုန် မဲ နီ။ အန် ဒီ ဘော ဘ့လး ထိုပ် ဘိက် အန် ဒဲင် မာဝ် ဂေ နီ။ 11 အန် ဒီ တး ဒမ် မှာပ် ဒီ ဒူအီ ခဲင် မိူင် အဲဂိုပ်။ ဂေ အီ ကာအာပ် ယမ် ဒီ ဆဝ် ရောဂါ၊ ဂေ ဒီ ဘော ယမ် ဒီ ဆဝ် ရောဂါ။ ဂေ အီ လုဝ် ခမ် တဲး အီ ဟဝ် မှေတ့် ဟာဝ် ဂေ၊ ဂေ ဒီ ခမ် တဲး အီ ဟဝ် မှေတ့် ဟာဝ် ဂေ။ ဂေ အီ လုဝ် ခမ် တဲး အီ ဒဲပ် ယမ် ဂေ တာ မာပွါ့ လာင်၊ ဂေ ဒီ ဘော ယမ် ဒီ မာပွါ့ လာင်။ 12 အန် ဒီ ဒိုဝ်း ငဝ် ဒုဝ့် ဝဲန် အာရိုပ် ပီ ကြိုပ် ဂေ ခဲင် မိူင် အဲဂိုပ်။ ခုန်ဒီခမ် အီ အိုပ် မိူင် ဘာဘဲ ဒီ ဘော ဒိုဝ်း ငဝ်၊ ဒုဝ့် ကာဆိုမ် ဟုဝ် ပီ ကြိုပ် ဂေ အာရိုပ် တီ။ အန် ဒီ ဘော မှေတ့် ဟာဝ် ဂေ အီ ကြိုပ် အာရိုပ် တီ။ အန် ဒီ ဘူင် ခဲင် မိူင် အဲဂိုပ် တဲး န့ ပီ ဒါ အီ ဟျီင် မာဘူ ကန် ဟိုပ် အန်။ ဟဲ့ ဟွတ့် အန် ဒီ ဝီ လေး ဟာဝ် ဒါခိုယ် ဒါခိုယ်။ 13 အန် ဒီ ကာဘက် ဝဲန် ဘော မာဝ် အီ ကွယ် ခဲင် ဟုဝ် ပီ ကြိုပ် ဂေ ဆီငဲ ခဲင် မိူင် အဲဂိုပ် တီ။ အန် ဒီ ဒုဝ့် ကာဆိုမ် ဘော ဟုဝ် ဘဲန် မျုဝ် ဘဲန် မျုဝ် အီ မုး ဒူင် ကြိုပ် ဂေ ဇဝ် ဘဲန် မျုဝ် ဘဲန် မျုဝ် ခဲင် မိူင် အဲဂိုပ်။’”