1 ပန် အန် တီ ခဲ့ ကွယ် ဂေ ဒါ ဘုဝ် အီ အိုပ် ဒါ ဆိုက် ဘော အာယောဟာနန် အီ မုး ဂွန် အာကာရေအာ ဘော အာယေစာနီ အီ မုး ဂွန် အာဟောဆာယာ ဘော ဂေ ဒူအီ ကိူန် စုး ဒီ ဂေ အီ တူ မိုဝ်း အာရေ မာဆေ ကော ဝီ ဇမ် ဒီ ဒူအီ အီ အာရေ တာင် လွှိုမ် အီ ဟဝ်၊ ဂေ ဘောကာဂ့လျီတ် ဘော တး ဒူင် ကွယ် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ။ ဂေ ဘော ကာလာင် ဒီ အန် တဝ်း၊ 2 “တဲး မဲ ထူမ် ခဲ့ ပီ မှာန့် ယေ ဒီ မဲ။ ယေ မှာန့် တဲး မဲ ဘူင် ဒွါ ဒီ ယေ၊ တဲး မဲ ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် မဲ။ တဲး မဲ ဆာခိုဝ် အာဒါ ယေ ဒူအီ အီ ဆီ ဂိတ် ဆီ ကွယ် နီ။ အာတ့် နီ ယေ ဟဲ့ မုး ဒူအီ အီ ကိူန် ကာဆဝ်။ မာလဲ၊ ဒေါ တီ နီ ဟဲ့ ဂိတ် ခဲ့ ပီ ယိုဝ် မဲ နီ။ ယေ ဟဲ့ ဝီ ပြေတ့် ကာဆဝ်။ 3 ယေ မှာန့် ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ တဲး အန် ဘျ နှဲ န့တေန့် ဒီ လုဝ် ဟာဝ် ယေ ဘော ဘျ ပီ ဒီ လုဝ် ဘူင် ယေ။”

4 အာယေရေမီ ဘော ဝီ ကာလာင် ဒီ ဂေ တဝ်း၊ “အုဝ် ဟဲ့ ဟွတ့် ယိုဝ် ဂြုဝ်း ဘေ၊ အုဝ် ဒီ ဆာခိုဝ် ဒီ ဇဝ်ဖြာ ပီ ကြိုပ် အုဝ် တီ အာဒါ ဘေ။ ဟဲ့ ဟွတ့်၊ အုဝ် ဒီ ဝီ ကာလာင် ဒီ ဘေ ခဲ့ ပီ စ်ု ဇဝ်ဖြာ အုဝ် ကာလာင်။ အုဝ် မိူဝ် တူ ချြီင် ခေါ အူ မျုဝ် ဒီ ဘေ။”

5 ပါယ် တီ ဂေ ပီ ဝီ တဝ်း ဒီ အာယေရေမီ၊ “အီ မုး ဇဝ်ဖြာ ပီ ကြိုပ် မဲ၊ အန် ဘူင် နာ မုး နာ မှာန် ဘော ဘူင် ဆိူဝ် ဆိူဝ် မှာန် မှာန် ဆေဆေ။ ဆေ ယေ တူ ဘူင် ဒူပ် ခဲ့ ပီ ကာလာင် ဇဝ်ဖြာ ဒီ ယေ၊ တဲး အန် ဘဲန် ဆက်ဆေ၊ တဲး အန် ဒမ် မှာပ် ဒီ ယေ။ 6 ယေ မှာန့် ဒီ ဘိုင် မဲ၊ တဲး မဲ ဆာခိုဝ် ဒီ ဇဝ်ဖြာ ကာဒါင် ယေ။ န့ ဘော မုး လွင် နာ မွှိုမ် ဘော မုး လွင် နာ စီစိဝ်၊ ယေ ဒီ ထူမ် ဒီ ဘူင် ဒူပ် ပီ စ်ု ဇဝ်ဖြာ မဲ ကာလာင် ဒီ ယေ။ ဆေ ယေ ဘူင် ပါယ် တီ၊ န့ ဒီ တဲး ယေ ကွယ် ဒါခိုယ်၊ ကွယ် ဂျာမ်ဆာ။”

7 ဝါယ် အန် တီ ဘော ပွိုန် ဂိုဝ် ဆီငဲ၊ ဇဝ်ဖြာ ဘော ဝီ ကာလာင် ဂြုဝ်း ဒီ အာယေရေမီ။ 8 အာယေရေမီ ဘော ဝီ ဒဲ့ အာယောဟာနန် အီ မုး ဂွန် အာကာရေအာ ဘော ဂေ ဒါ ဘုဝ် အီ အိုပ် ဒါ ဆိုက် အီ တး ဒူပ် အာယောဟာနန်။ အန် ဒဲ့ ဘော ဂေ ဒူအီ ဘောကာဂ့လျီတ်၊ စုး ဒီ ဂေ အီ တူ မိုဝ်း အာရေ မာဆေ ကော ဝီ ဇမ် ဒီ ဒူအီ အီ အာရေ တာင် လွှိုမ် အီ ဟဝ်။ အန် ဝီ ကာလာင် ဒီ ဂေ တဝ်း၊ 9 “ဘေ ဟဲ့ စ်ု အုဝ် ဟာဝ် ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ အန် ဇဝ် မိူဝ် ဟဲ့ ကာလာင် ပါယ် နီ။ 10 ဆေ ဘေ ကွယ် အာခ်ု မှာန် ခဲင် မိူင် နီ၊ အုဝ် ဒီ တဲး ဘေ ကွယ် မန် ဆီချာ၊ တူ ပျာတ့် ဘေ။ အုဝ် ဒီ ဝီ မ့ပြာယ် ဘေ၊ တူ ဝဲန် ဘေ၊ တဲး န့ ပီ အီ ရိုတ့် ဝဲန် ပေတ့်။ နဝ်း အုဝ် မိူဝ် အာဝ် ဒါခိုယ် ကူပ် ဒုက် ပဲ့ ဟဲ့ တဲး အုဝ် ဘေ ခမ်။ 11 ကွဲ့ တဲး ဘေ ယုဝ် ခုန်ဒီခမ် မိူင် ဘာဘဲ ပီ ပီ ယုဝ် ဘေ ဒေါ တီ နီ။ ဇဝ်ဖြာ ဟဲ့ ကာလာင်၊ ‘ကွဲ့ တဲး ဘေ ယုဝ် အန်။ အုဝ် ဒီ ကွယ် ရိုမ် ဒူပ် ဘေ၊ ဘ်ု ဒီ ချွတ် ဘေ၊ တဲး ဘေ ပွိုန် ဒီ လွတ် ဒီ အန်။ 12 အုဝ် ဒီ ဝီ ကာဝေ ဘေ ဘော ချွတ် ဘေ၊ စွယ် ဘေ။ အုဝ် ဒီ ဘူင် တဲး ခုန်ဒီခမ် ခဲင် မိူင် ဘာဘဲ ဝီ မိုဝ်း နဝ်း ကာဝေ ဘေ၊ ခ့ဝါင် ဘေ ဝေန့် ခဲင် မိူင် ဒူင် ကွယ် ဘြိမ် ဘေ။’

13 မာလဲ၊ ဆေ ဘေ ယီ တဝ်း၊ ‘ယေ တူ ကွယ် ခဲင် မိူင် နီ။’ ဘေ တူ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အီ ဟဲ့ ကာလာင် ဒီ ဘေ ဒေါ တီ နီ။ 14 ဆေ ဘေ ဘော တဝ်း၊ ‘ယေ တူ ဒူပ် ပီ တဝ်း မဲ ဒီ ယေ တီ၊ ယေ ဒီ ဟာဝ် ခဲင် မိူင် အဲဂိုပ်။ န့ မုး ဒူင် တူ မိုဝ်း ဒါ ဆိုက် အီ လာယ် ကာဂုဝ်း၊ အီ ဘုတ် ဝဝ် အာတ့် လာယ် ကာဂုဝ်း။ န့ မိူဝ် တူ မိုဝ်း ဒီ အေတ့် မာဆေ။ 15 ယေ ဒီ ဟာဝ် ကွယ် ဒီ တီ။’ ဆေ ဘေ တဝ်း ပါယ် တီ ဘေ ဒူအီ အာယူဒါ အီ ဆီ ဂိတ် ဆီ ကွယ်၊ တဲး ဘေ ထူမ် ဂြုဝ်း ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ ဘော မုး ဇဝ်ဖြာ ပီ ကြိုပ် ဒူအီ အီဆာရေလ။ ဆေ ဘေ ဆုင်ဖျာတ် ဒီ ဟာဝ် ကွယ် ဟာဝ် ဘိုင် မိူင် အဲဂိုပ် တီ အာခ်ု မှာန်၊ 16 ဒူအီ အီ ဂူင့် မာပွါ့ လာင် ပီ ယုဝ် ဘေ တွိုန်၊ ဂေ ဒီ ဘော ဒူပ် ဘေ ဟာဝ် ခြပ် ဘေ ခဲင် မိူင် အဲဂိုပ် တီ။ အာဖေ အာရေ အီ တဲး ဘေ အေတ့် ပီ ဒီ ဟူမ် မိူဝ်၊ န့ ဒီ ဒူပ် ဟာဝ် ဘေ ခဲင် မိူင် အဲဂိုပ် တီ။ ဘေ ဒီ ဘော ဟာဝ် ယမ် တူတ့် ခဲင် မိူင် တီ။ 17 ဂေ ဒူအီ အီ ဆုင်ဖျာတ် ဒီ ဟာဝ် ဒီ မိူင် အဲဂိုပ်၊ ဂေ ဘောကာဂ့လျီတ် ဒီ ဘော ကာဒုး ဒီ ခမ် ဒီ ယမ် ဒီ မာပွါ့ လာင်၊ ယမ် ဒီ အေတ့် ပီ ဒီ ဟူမ် ဘော ဒီ ဆဝ် ရောဂါ။ အူ ဝီ မိူဝ် တူ ပွိုန် လွတ် အာဖေ အာရေ ပီ ဒီ တဲး အုဝ် ဂေ ကာဒုး တီ။ ဂေ မိူဝ် တူ ဂိတ် တူ ကာလူယ် ခေါ အူ ဝီ။ 18 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ ဟဲ့ ကာလာင် ပါယ် နီ။ ‘အုဝ် ဟဲ့ ရူ ကာဆဝ် ဒီ ဒူအီ ခဲင် မိူင် ယေရူဆာလဲမ်။ အုဝ် ဒီ ရူ ကာဆဝ် ပါယ် တီ ဒီ ဂေ ဒူအီ အီ ဟာဝ် ကွယ် ခဲင် မိူင် အဲဂိုပ်။ ဘေ ဒီ ဘော ဘဲန် ပီ အေး အီ၊ ဘဲန် ပီ ယုဝ် အီ ဟဝ်။ ဘေ ဒီ ဘဲန် ဘော ပီ ဒိူင် ပီ နဲန အီ ဟဝ်။ ဝါယ် အန် တီ ဘေ မိူဝ် အာဝ် ဟူ ပွိုန် ဒီ ဝီ တး ယိုဝ် ဒူင် နီ ပေါ အူ ဇေန့်။’

19 အိုယ် ဘေ ဒူအီ အာယူဒါ အီ ဆီ ဂိတ် ဆီ ကွယ်၊ ဇဝ်ဖြာ ဟဲ့ ဟွတ့် ကာလာင် ဒီ ဘေ တဝ်း၊ ‘ကွဲ့ တဲး ဘေ ဟာဝ် ဒီ မိူင် အဲဂိုပ်။’ တဲး ဘေ ယီ နုဝ် ဂြုဝ်း ပီ ဒမ် အုဝ် ဆာဒိက် ဒီ ဘေ အာတိုဝ် နီ။ 20 ဘေ ဟဲ့ ဘူင် ကာလိုပ် အီ တာင် ကာဆဝ်။ ခုဝ်၊ ဘေ ဟဲ့ စ်ု အုဝ် ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဘေ မိူဝ် ဟဲ့ တဝ်း၊ ‘ဆာခိုဝ် ဒီ ဇဝ်ဖြာ အီ မုး ဇဝ်ဖြာ ပီ ကြိုပ် မဲ အာဒါ ယေ။ ဟဲ့ ဟွတ့်၊ တဲး မဲ ဝီ ကာလာင် ဒီ ယေ ခဲ့ ပီ ကာလာင် ဇဝ်ဖြာ ဒီ မဲ။ ယေ မိူဝ် ဒီ ထူမ် ဘော ခမ် ဒီ ဘူင် ဒူပ်။’ ဘေ ဟဲ့ တဝ်း ပါယ် တီ။ 21 အာတိုဝ် နီ အုဝ် ဟဲ့ ဝီ ကာလာင် ဂြုဝ်း ဇဝ်ဖြာ ဒီ ဘေ။ မာလဲ၊ ဘေ ယီ တူ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ပီ ကာလာင် အုဝ် ခေါ အူ မျုဝ် မိူဝ် ဘေ တူ ဒူပ်။ 22 ကူပ် ပါယ် တီ တဲး ဘေ နုဝ်၊ ဒူင် ဒီ ဟာဝ် ဘိုင် ဘေ၊ ဘေ ဒီ ဘော လုဝ် ခမ် အာဖေ အာရေ အီ တဲး ဘေ ယမ် ဒီ မာပွါ့ လာင်၊ ယမ် ဘော ဒီ အေတ့် ပီ ဒီ ဟူမ် ဘော ဒီ ဆဝ် ရောဂါ။”