ဒေါ ဇမ် မာဂျီန် မ့ဘူ အာဆာမာန် အီ မုး ဂွန် အာနေထာနီ ဘော လှာန် အာအေလီဆာမာ အီ မုး အာမျုဝ် ဂေ ခုန်ဒီခမ် တာင်၊ အန် ဟဲ့ ဒဲ့ ဒူအီ ဂိုဝ် ဝီ တး ဒူပ် အန်။ အန် ဘော မုး အာမူ အာမာတ် ခုန်ဒီခမ် အီ တာင်။ အန် တဲး ဂေ ဟာဝ် ဒူင် ကွယ် အာကေတာလီ ဒီ မိူင် မီဇာဖာ တွိုန်။ ဒေါ ဟူမ် ရိုမ် ဂေ ဘူမ် ဒီ မိူင် မီဇာဖာ တီ၊ 2 အာဆာမာန် ဘော ဂေ ဒူအီ ဂိုဝ် ဝီ အီ ဒူပ် အန်၊ ဂေ ဘော ယိတ့် ဒိုဝ်း မာပွါ့ လာင် ဂေ၊ ငဝ်း ယမ် အာကေတာလီ အီ မုး ဂွန် အာဟီကမ် ဘော လှာန် အာဆာဖာန် အီ မုး ဝီ ပဲ့ ဟဲ့ ဒါင် ခုန်ဒီခမ် ခဲင် မိူင် ဘာဘဲ၊ တဲး အန် ဘဲန် ဒါ ကာညာ အီ အိုပ် မိူင် ယူဒါ။ 3 အာဆာမာန် ဘော ငဝ်း ဝဲန် တူတ့် ဒူအီ အာယူဒါ အီ ကွယ် ရိုမ် ဒူပ် အာကေတာလီ ဒီ မိူင် မီဇာဖာ တွိုန်။ အန် ငဝ်း ဝဲန် ဘော ဂေ ဒါ ဆိုက် ဒူအီ ဘာဘဲ အီ ကွယ် ရိုမ် ဒူပ် အာကေတာလီ။

4 ဆီငဲ ဝါယ် ဟဲ့ ဟွတ့် ငဝ်း ယမ် ဂေ အာကေတာလီ၊ ဒေါ ညှမ် မိုဝ်း အာဆေ အီ နပ် လွင် အန် တီ၊ 5 န့ မိုဝ်း ဂေ ဒါ ဂိုဝ် ဝီ အီ ဟဲ့ လေး တး ခဲင် မိူင် ဆေခေမ် ဘော ခဲင် မိူင် ဆီလုဝ် ဘော မိူင် ဆာမာရီ။ ဂေ ဟဲ့ ဂါ့ ဝဲန် ဘော ဒီမုဝ်း ဒီ ကုင်ကာပ် ဂေ၊ ဟဲ့ စှိုပ် ခြိုင် ဘြိမ် ဘော ခြိုင် ကာပျာတ့်။ ဒုဝ် ဘူင့် ဂေ မိူဝ်၊ ဂေ ဟဲ့ ဘူင် တဲး န့ ဂ့လျီတ်၊ တဲး န့ ဂ့လာ့။ ဂေ ဟဲ့ ဂူင့် ဘော ပီ ဒီ လှူ ငှုဝ် ဒီဂါဝ် ဘော ဆီနမ် အုး ငှုန်၊ တဝ်း ဒီ လှူ ဒီ ဟုဝ် ဇဝ်ဖြာ။ 6 အာဆာမာန် အီ မုး ဂွန် အာနေထာနီ ဘော လေး ဒီ မိူင် မီဇာဖာ တွိုန်၊ ဝီ ဟာဝ် ရွုး ဂေ ဘော ယာမ် ဟာဝ် ဒူပ် န့တေန့်။ အန် ဘော ကာတုန့် ဂေ ဘော ကာလာင် ဒီ ဂေ တဝ်း၊ “တဲး ဘေ တး ဒူင် ကွယ် အာကေတာလီ အီ မုး ဂွန် အာဟီကမ် တွိုန်။” 7 ဂေ ဟဲ့ ဟွတ့် တး ဇမ် ခဲင် မိူင်၊ အာဆာမာန် အီ မုး ဂွန် အာနေထာနီ ဘော ဂေ ဒူအီ အီ ဒူပ် အန်၊ ဂေ ဘော ကာဖြူမ် ဒီ ငဝ်း ဒူအီ ဂေ တွိုန်။ ဟဲ့ ဟွတ့် ဂေ ဘော ဝီ ဟာဝ် ဘျွာ ဝဲန် ဒူအီ ပီ ငဝ်း ဂေ တီ ခဲင် အိုမ် ခိုမ်။ 8 ကာန်ု ဒူအီ ဂေ တွိုန်၊ န့ ဘော မိုဝ်း အာဒါ ဂိုဝ် ဝီ၊ ဂေ ဘော ကာလာင် ဒီ အာဆာမာန် တဝ်း၊ “ယေ မှာန့်၊ ကွဲ့ တဲး မဲ ငဝ်း ယမ် ယေ။ ယေ မိုဝ်း ဒီ ချြီင် ခဝ်ချုင် ဂေ ဆီဂူင့်ရာ ဘော နာမန် ဂေ ငါမ် မာဖျီန် ခဲင် ဒူင် နာ။” ပါယ် တီ အန် အာဝ် ဟူ ငဝ်း ယမ် ဒူအီ ဂေ တီ ဒူပ် အီ ဟဝ်။ 9 အိုမ် ခိုမ် ပီ ဘျွာ လူင် အာဆာမာန် ဒီ ဒူအီ ယမ် ဂေ တွိုန်၊ န့ ဘော မုး အိုမ် ခိုမ် ပီ ဘူင် အုန် ခုန်ဒီခမ် အာဆာ၊ တဲး န့ ဂွင့် ရဲ အာဖေ အာရေ ဒီ ခုန်ဒီခမ် အာဘာဆာ အီ အိုပ် မိူင် ဒူအီ အီဆာရေလ။ ခဲင် ကာဒဝ် တီ၊ အာဆာမာန် ဘော ဘျွာ လူင် ဒူအီ ယမ် ကော နုဝ့် နာ ခဲင်။

10 အာဆာမာန် ဘော မှေတ့် ဂေ ဒူအီ အီ ဆီ ဂိတ် ဆီ ကွယ် ခဲင် မိူင် မီဇာဖာ။ န့ ဘော မုး ဂွန် ဒီဘျာ ခုန်ဒီခမ် ဘော ဂေ အီ ဆီ ကွယ် ခဲင် မိူင် မီဇာဖာ ဘော ဂေ ဒါ တာင် အီ အိုပ် ဒါ ဆိုက် အီ ဘ်ု ဟုဝ် ခုန်ဒီခမ် ပဲ့ ဟဲ့ အာပ် အာနေဘူဆာရဒါန် ဒီ အာကေတာလီ အီ မုး ဂွန် အာဟီကမ် တွိုန်။ အာဆာမာန် ဘော မှေတ့် ဟာဝ် ဂေ ဒူင် ကွယ် ဒူအီ အမ်မူန်။

11 န့ ဘော မုး အာယောဟာနန် အီ မုး ဂွန် အာကာရေအာ ဘော ဂေ ဒါ ဘုဝ် တာင် အီ အိုပ် ဒါ ဆိုက် အီ ကွယ် ရိုမ် ဒူပ် အန်၊ ဒေါ ဝီ ယိုဝ် ဂေ လွင် နာ ဟာယ် နာ စီစိဝ် ပဲ့ ဟဲ့ ဘူင် အာဆာမာန် တီ၊ 12 ဂေ ဘော ဒဲ့ ခဲ့ ကွယ် ဒူအီ ဘောကာဂ့လျီတ်၊ တဲး ဂေ ဟာဝ် ကာဂုဝ်း ဒီ အာဆာမာန် အီ မုး ဂွန် အာနေထာနီ တွိုန်။ ဂေ ဘော ဟာဝ် ကာတုန့် အန် ဒီ ခူပ် အိုမ် ဒိုင် တာင် အီ ကွယ် ခဲင် မိူင် ကီပွင် တွိုန်။ 13 ဒေါ ဝီ ယိုဝ် ဂေ ဒူအီ အီ ဒူပ် အာဆာမာန် ဒီ အာယောဟာနန် ဘော ဂေ ဒါ ဘုဝ် တာင် အီ ဒူပ် အန်၊ ဂေ ဘော ခူယ် ကာဆဝ်။ 14 ပါယ် တီ ခဲ့ ကွယ် ဂေ ဒူအီ ပီ မှေတ့် အာဆာမာန် ဒီ မိူင် မီဇာဖာ တွိုန်၊ ဂေ ဘော တဝ် လေး ဒီ အန်၊ ဝီ ဟာဝ် ဒူင် ကွယ် အာယောဟာနန် အီ မုး ဂွန် အာကာရေအာ တွိုန်။ 15 မာလဲ၊ အီ မုး အာဆာမာန် ဘော ဂေ ဒူအီ အီ ဒူပ် အန် ဂေ ဒါ ဝီ ဘော လွတ် ဒီ အာယောဟာနန်၊ ဝီ တဝ် ဟာဝ် ဒူင် ကွယ် ဒူအီ အမ်မူန်။

16 ပါယ် တီ အာယောဟာနန် အီ မုး ဂွန် အာကာရေအာ ဘော ဂေ ဒါ ဘုဝ် တာင် အီ ဒူပ် အန်၊ ဂေ ဘော ဝီ ဒိုဝ်း ဒူအီ အီ ဆီ ဂိတ် ဆီ ကွယ် ပဲ့ ဟဲ့ မှေတ့် အာဆာမာန် ဒီ မိူင် မီဇာဖာ ဝါယ် ဟဲ့ ငဝ်း ယမ် အန် အာကေတာလီ တွိုန်။ ဂေ ဘောကာဂ့လျီတ် ဝီ ဟာဝ် ဒီ မိူင် ကီပွင်။ ဒူအီ ပီ ဒိုဝ်း ဟာဝ် အာယောဟာနန် ဘော ဂေ ဒါ ဘုဝ် အန်၊ န့ ဘော မုး ဂေ ဒါ ဆိုက် ဘော အီဘိုန့် ဂေ ဂွန် ဒီရွယ်၊ ဘော ဂေ ဒူအီ အီ အိုပ် ဇိူင် နာင်။ 17 ဂေ ဘော လေး ဟာဝ် ဒူပ် န့တေန့် အီ ဟာဝ် ဒီ မိူင် အဲဂိုပ်။ ဂေ ဘော ဝီ ဟာဝ် ဂိူတ် ဒီ ရဝ် အီ စိူဝ် ခီမာဟာမ် အီ ကွယ် ကာတတ် မိူင် ဘေတ်လဲမ်၊ ဂေ တဝ် ဟာဝ် တဲး န့ ကာတူင့် ဒီ ဒူအီ ဘာဘဲ တွိုန်။ ဂေ တဝ်း ဒီ ဟာဝ် ဒီ မိူင် အဲဂိုပ်။ 18 ခုဝ်၊ ဂေ ယုဝ် ဒူအီ မိူင် ဘာဘဲ ကူပ် ဟဲ့ ငဝ်း ယမ် အာဆာမာန် ဒီ အာကေတာလီ အီ မုး ဂွန် အာဟီကမ် အီ မုး ဒူအီ ပဲ့ ဟဲ့ ဒါင် ခုန်ဒီခမ် ခဲင် မိူင် ဘာဘဲ၊ တဲး အန် ဘဲန် ဒါ ကာညာ အီ အိုပ် ဒူအီ ခဲင် မိူင် တီ။