1 အာနေဘူဆာရဒါန် အီ မုး ဒါ တာင် အီ အိုပ် ဂေ ဒါ အီ ဘ်ု မာလုဝ်း၊ အန် ဟဲ့ ယိုဝ် အာယေရေမီ ကွယ် ကာတဲ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ် ပဲ့ ဟဲ့ မှေတ့် ဂေ၊ တဝ်း ဒီ တိုယ် ဟာဝ် မိူင် ဘာဘဲ။ အန် ဘော ဘ့လေး အာယေရေမီ ဒေါ ကွယ် ဂေ ဒီ မိူင် ရာမာ။ ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အာယေရေမီ။ 2 အာနေဘူဆာရဒါန် မိူဝ် ကာလာင် ဒီ အန် တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ အန် ဟဲ့ ဟွတ့် ကာလာင် အုန် ဒီ အာတ့် လွင် မှာပ် ပီ လုဝ် ခမ် ဘေ ဒူအီ ခဲင် မိူင် နီ။ 3 ဒေါ တီ နီ ဇဝ်ဖြာ ဟဲ့ ဘူင် ဒူပ် ခဲ့ ပီ ကာလာင် အုန် အန် တီ။ ခုဝ်၊ ဘေ ဘောကာဂ့လျီတ် တူ ထူမ် ဂြုဝ်း ဇဝ်ဖြာ။ ဘေ မိူဝ် ဟဲ့ ဟွတ့် လုတ့် ဇဝ်ဖြာ။ ဇဝ်ဖြာ ဝီ တဲး ဘေ ခမ် လွင် အန် တီ။ 4 ဒေါ တီ နီ အုဝ် ဟဲ့ ဂဝ်း ဝဲန် ဝန် ဟိန် ပီ ပက် ဂေ ဒီ ဒဲ မဲ။ ဆေ မဲ ဆီ ဟာဝ် ဒူပ် အုဝ် ဒီ မိူင် ဘာဘဲ၊ ဟဲ့ ပွိုန်။ အုဝ် ဒီ ယွတ် မဲန် ဘော လိုမ်လာ ဆီချာ မဲ။ ဆေ မဲ ယီ တူ ဆီ ဟာဝ် ဒီ မိူင် ဘာဘဲ၊ ဟဲ့ ပွိုန်။ မိူင် ယူဒါ နီ ဘော မိူင် ကွယ် နာ အာတ့် မဲ။ တဲး မဲ ဟာဝ် ဒူင် ပီ အိုင် မဲ။” 5 အာတ့် လေး ဟာဝ် အာယေရေမီ ဒူင် ကွယ် အန် တီ၊ အာနေဘူဆာရဒါန် ပီ ဝီ ကာလာင် ပေါ န့ ပွါ တဝ်း၊ “တဲး မဲ ဝီ ဝေန့် ဒူင် ကွယ် အာကေတာလီ အီ မုး ဂွန် အာဟီကမ် ဘော မုး လှာန် အာဆာဖာန်၊ ဝီ ပဲ့ ဟဲ့ ဒါင် ခုန်ဒီခမ် အီ အိုပ် မိူင် ဘာဘဲ၊ တဲး အန် ဘဲန် ဒါ တာင် အီ အိုပ် မိူင် ဒွန် မိူင် အီ ကွယ် ခဲင် ကာဒါယ် မိူင် ယူဒါ။ တဲး မဲ ဝီ ကွယ် ရိုမ် ဒူပ် အန် ကာတဲ ဂေ ဒူအီ ကိူန်။ ဆေ အာဝ် ပါယ် တီ မိူဝ်၊ တဲး မဲ ဟာဝ် ကွယ် ဒူင် ပီ ထာင် မဲ ဟဲ့ ကာအာပ် ကွယ်။” အာနေဘူဆာရဒါန် ဟဲ့ ဟွတ့် ကာလာင် ပါယ် တီ၊ အန် ဘော ဒွါ စာရိ ပီ ဒီ ဟူမ် ဘော လက်ဆွင် ဒီ အာယေရေမီ ဘော ဘ့လေး တဲး အန် ဟာဝ်။ 6 ဟဲ့ ဟွတ့် ပါယ် တီ အာယေရေမီ ဘော ဝီ ဟာဝ် ဒူင် ကွယ် အာကေတာလီ အီ မုး ဂွန် အာဟီကမ် အီ ကွယ် ခဲင် မိူင် မီဇာဖာ။ အန် ဘော ကွယ် ရိုမ် ဒူပ် ဂေ ဒူအီ အီ ဆီ ဂိတ် ဆီ ကွယ် ခဲင် မိူင် တီ။

7 ဒေါ အန် တီ ဒါ တာင် အီ အိုပ် ဒါ ဆိုက် ဘော ဒါ ဆိုက် အီ ကွယ် ခဲင် ပြဲ မင် အီ၊ ဂေ ဘော ယိုဝ် လွင် ခုန်ဒီခမ် အီ အိုပ် မိူင် ဘာဘဲ ဟဲ့ တဲး အာကေတာလီ အီ မုး ဂွန် အာဟီကမ် ဘဲန် ဒါ တာင် အီ အိုပ် မိူင်။ ဂေ ဘော ယိုဝ် လွင် အန် ဟဲ့ ဒိုဝ်း ဘော အီဘိုန့် ဘော အီမာယ် ဘော ဂွန် အီ ဒုက် အီ ဂိန် ကာဆဝ်၊ အီ မုး ဒူအီ ပီ တူ မှေတ့် ဟာဝ် ဂေ ဒီ မိူင် ဘာဘဲ တွိုန်၊ တဲး အာကေတာလီ အိုပ် တူတ့်။ 8 ပါယ် တီ အာအီဆာမာန် အီ မုး ဂွန် အာနေထာနီ ဘော အာယောဟာနန် အီ မုး ဂွန် အာကာရေအာ ဘော အာဆေရာယာ အီ မုး ဂွန် အာနူမိတ် ဘော ဂွန် အာအေဖဲ အီ မုး ဒူအီ အီ တး မိူင် နေတောဖာ ဘော အာစာရာယာ အီ မုး ဂွန် ဒူအီ အာမျုဝ် မာခါထိတ် ဘော ဂေ ဒူအီ ကိူန် ဘောကာဂ့လျီတ်၊ ဂေ ဝီ တး ဒူင် ကွယ် အာကေတာလီ ဒီ မိူင် မီဇာဖာ တွိုန်။ 9 အာကေတာလီ အီ မုး ဂွန် အာဟီကမ် ဘော လှာန် အာဆာဖာန် ဘော ဒိူင် ကာဆဲန့် ဒီ ဂေ ဒါ တာင် ဘော ဒီ ဒူအီ ကိူန် တဝ်း၊ “ကွဲ့ တဲး ဘေ ယုဝ် ဒူအီ ဘာဘဲ၊ တဲး ဘေ ယီ ဘူင် ပီ စ်ု ခုန်ဒီခမ် ခဲင် မိူင် ဘာဘဲ ဒီ ဘေ။ ဆေ ဘေ ဘူင် ပါယ် တီ၊ ဘေ ဒီ ပွိုန် ကွယ် ဒါခိုယ်။ 10 အီ မုး အုဝ်၊ အုဝ် ယီ ဒီ ကွယ် ဒီ မိူင် မီဇာဖာ နီ၊ တဲး အုဝ် ပွိုန် ဒီ ခမ် ဂြုဝ်း ပီ ကာလာင် ဂေ ဒူအီ ဘာဘဲ အီ ဒီ တး ဒူင် ကွယ် အေ။ အီ မုး ဘေ၊ တဲး ဘေ ဟာဝ် ဂဲပ် အုန် အိုမ် မာငုန် ဘော ဘ့လေ အီ ဟဲ့ လေး အာခြာဝ် ဒီယာင် ဘော အာခြာဝ် ဒီရဝ်။ တဲး ဘေ ဂဲပ် အုန် ဘော နာမန် ခဲင် ကာလုဝ့် ဘော ခဲင် ပြဲန့် ဘေ။ တဲး ဘေ ဝီ ကွယ် ခဲင် မိူင် ဒူင် ဟဲ့ လိုပ် ကွယ် ဘေ ဒေါ တီ နီ။”

11 ဂေ ဒူအီ အာယူဒါ အီ ကွယ် ခဲင် မိူင် မုဝ်အာပ်၊ ခဲင် မိူင် အမ်မူန်၊ မိူင် အေဒူမ် ဘော ခဲင် မိူင် ဟဝ် ဒွန် မိူင်၊ ဂေ ဘော ယိုဝ် လွင် ခုန်ဒီခမ် မိူင် ဘာဘဲ ဟဲ့ တဲး န့ မိုဝ်း ဒူအီ မင် ကာလဝ့် အီ ဆီ ဂိတ် ဆီ ကွယ် ခဲင် မိူင် ယူဒါ၊ ဂေ ဘော ယိုဝ် လွင် ခုန်ဒီခမ် ဟဲ့ ဒါင် ဘော အာကေတာလီ အီ မုး ဂွန် အာဟီကမ် ဘော လှာန် အာဆာဖာန်၊ တဲး အန် ဘဲန် ဒါ တာင် အီ အိုပ် ဂေ။ 12 ဒေါ အန် တီ ဂေ ဒူအီ အာယူဒါ ပဲ့ ဟဲ့ ဟုဝ် တဝ် ဂေ တွိုန် ဘောကာဂ့လျီတ် ဘော ဝီ တး ဒီ မိူင် ယူဒါ ဒူင် အိုပ် အာကေတာလီ ဘော ကွယ် ခဲင် မိူင် မီဇာဖာ။ ဂေ ဘော ဝီ တး ဒိုဝ်း အုန် အိုမ် မာငုန် ဘော ဘ့လေ အီ ဟဲ့ လေး ဒေါ အာခြာဝ် ဒီယာင်၊ အီ ဟဲ့ ကိူန် ကာဆဝ်။

13 ဝါယ် အန် တီ အာယောဟာနန် အီ မုး ဂွန် အာကာရေအာ ဘော ဂေ ဒါ ဘုဝ် အီ အိုပ် ဒါ ဆိုက် အီ ဆီ ကွယ် ခဲင် ပြဲ၊ ဂေ ဘော ဝီ တး ဒူင် ကွယ် အာကေတာလီ ဒီ မိူင် မီဇာဖာ တွိုန်။ 14 ဂေ ဘော ဒီမွှတ် အန် တဝ်း၊ “မဲ နပ် လွင် အာဘာလီ အီ မုး ခုန်ဒီခမ် ဒူအီ အမ်မူန် တွိုန်၊ အန် ဟဲ့ စ်ု အာဆာမာန် အီ မုး ဂွန် အာနေထာနီ၊ တဲး အန် တး ငဝ်း ယမ် မဲ။း” မာလဲ၊ အာကေတာလီ ယီ တူ ညှိုမ် ဂြုဝ်း ဂေ။

15 ပါယ် တီ အာယောဟာနန် အီ မုး ဂွန် အာကာရေအာ ဘော ဝီ ပြာ ဒီ ကာလာင် ဒီ အာကေတာလီ ဒီ မိူင် မီဇာဖာ တဝ်း၊ “တဲး မဲ ခ့ဝါင် အုဝ်၊ တဲး အုဝ် ပွိုန် ဒီ လိုပ် ဟာဝ် ငဝ်း ယမ် အာဆာမာန် အီ မုး ဂွန် အာနေထာနီ တီ။ ကွဲ့ တဲး အာဆေ နပ် လွင် အန် တီ။ အာဝ် ကာအာပ် အန် ခြာမ် ဒီ ငဝ်း ယမ် မဲ၊ ဘူင် တဲး ဂေ ဒူအီ အာယူဒါ အီ ကွယ် ဒူပ် မဲ ဝီ ကာစှူတ့် တဝ် ဟာဝ် ဒွန် ဘ့လာက်၊ တဲး ဘော ဂေ ဒူအီ အီ ဆီ ဂိတ် ခဲင် မိူင် ယူဒါ နီ လိုဝ် စှိုမ်။”

16 မာလဲ၊ အာကေတာလီ အီ မုး ဂွန် အာဟီကမ် ဝီ ကာလာင် ဒီ အာယောဟာနန် အီ မုး ဂွန် အာကာရေအာ တဝ်း၊ “မဲ ကွဲ့ ဘူင် ပါယ် တီ။ ပီ ကာလာင် မဲ လွင် အာဆာမာန်၊ အာဝ် မှာန် မာဆေ။”