1 ခုန်ဒီခမ် အာဇေဒေကီ ဟဲ့ အိုပ် မိူင် ယူဒါ အာဒါ ဒိမ် ဆီနမ်၊ ဒေါ ဟဲ့ ဇမ် မာဂျီန် ဂိုဝ်၊ အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ တွိုန်၊ အန် ဘော ယဲတ့် ဒါ ဆိုက် အန် ဘောကာဂ့လျီတ်၊ တဲး ဂေ တး ဝဲင် ရူပ် မိူင် ယေရူဆာလဲမ်။ 2 အာဇေဒေကီ ဘော ဝီ အိုပ် မိူင် အာဒါ ဂိုဝ် ဒီ အူ ဆီနမ်။ ဒေါ ဇမ် မာဂျီန် မ့ဖွုန်၊ ဆီငဲ န့ဒိမ်၊ ဂေ ဟဲ့ ပျာတ့် ရဲင် မိူင် တဲး န့ လှုး၊ တဲး န့ ကာပျာတ့်။ 3 ဒေါ ဟဲ့ ဟွတ့် ပွိုန် ဂေ မိူင် ယေရူဆာလဲမ် တီ၊ ဂေ အီ မုး အာမူ အာမာတ် ခုန်ဒီခမ် အီ အိုပ် မိူင် ဘာဘဲ၊ ဂေ တး တုတ့် ဒီ မာလုဝ်း မိူင်။ န့ ဘော မုး အာနေရကာဆာရေစာ ဘော အာကာနီဘုဝ်စာ၊ အာဆာခိမ် အီ မုး ဒါ အီ အိုပ် ဂေ ဒူအီ အီ အိုပ် ဇိူင် နာင် ဘော အာနေရကာဆာရေစာ အီ ဟဲ့ ဘဲန် ဒါ အီ အိုပ် ဂေ ဒူအီ အီ မိုဝ်း အာငျာန် ဘော ဂေ အာမူ အာမာတ် ခုန်ဒီခမ် ဘောကာဂ့လျီတ်။ ဂေ ဘော ဝီ လိုပ် တး ခဲင် မိူင်၊ ဝီ တး တုတ့် ဘ်ု ဒီ မာလုဝ်း အီ မုး မာလုဝ်း ကာတဲ။ 4 ခုန်ဒီခမ် အာဇေဒေကီ ဘော ဂေ ဒါ ဆိုက် အန်၊ ဒေါ ယိုဝ် ဂေ ဒူအီ ဂေ တီ၊ ဂေ ဘော ပြာ ဒီ လေး တဝ် ခဲင် မှိုဝ်။ ဂေ ဘော တဝ် ဟာဝ် ဒူပ် န့တေန့် အီ ဟာဝ် ဒီ မာန် ခုန်ဒီခမ်။ ဂေ ဘော လေး ဒီ မာလုဝ်း အီ ကွယ် ဒီ ကာတဲ ရဲင် အာ ဘ့လာက် တွိုန်။ ဂေ ဘော ဟာဝ် ဒူပ် န့တေန့် အီ ဟာဝ် ဒီ ဂ့လင် အောရာဖ။

5 မာလဲ၊ ဒါ ဆိုက် ဂေ ဒူအီ ဘာဘဲ ဘော ခုင်ခြး ဒူပ် ဒီ ပန် ဂေ။ ဂေ ဘော ဟာဝ် ခြပ် ခုန်ဒီခမ် အာဇေဒေကီ ဒီ ဂ့လင် နာ ရေတ့် မိူင် ယေရီခုဝ် တွိုန်။ ဂေ ဘော မှေတ့် အန်၊ ဝီ ဒိုဝ်း ဟာဝ် အန် ဒီ မိူင် ရီဘာလာ အီ ကွယ် ခဲင် ကာဒါယ် မိူင် ဟာမာတ် အီ မုး ဒူင် ကွယ် ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ။ ခုန်ဒီခမ် တီ ဘော ဇဲတ် ဒီ ယွတ် ဘော ဆုင်ဖျာတ် အာမူ ဂေ။ 6 အန် ဘော ငဝ်း ယမ် ဂွန် အီမာယ် အာဇေဒေကီ ဒီ အာတ့် အန် ဒေါ ကွယ် ဂေ ခဲင် မိူင် ရီဘာလာ တွိုန်။ ခုန်ဒီခမ် မိူင် ဘာဘဲ တီ ဘော ငဝ်း ဝဲန် တူတ့် ခဲ့ ကွယ် ဂေ အာမူ အာမာတ် ခုန်ဒီခမ် မိူင် ယူဒါ။ 7 ခုန်ဒီခမ် ဘော ဂွယ့် လေး ခေါ ငါယ် အာဇေဒေကီ၊ ဝီ ဒိုဝ်း ဝန် ဘွင့်၊ ပက် အန်၊ ဝီ ဒိုဝ်း ဟာဝ် အန် ဒီ မိူင် ဘာဘဲ။

8 ဒူအီ ဘာဘဲ ဘော ဒိုဝ်း ငဝ်၊ ဒုဝ့် ကာဆိုမ် ဟုဝ် ခုန်ဒီခမ် ဘော ကာင် ဂေ အီ ကွယ် ခဲင် မိူင် တီ။ ဂေ ဘော ပျာတ့် ဝဲန် ဘော ရဲင် မိူင် ယေရူဆာလဲမ် တွိုန်။ 9 ဒေါ အန် တီ အာနေဘူဆာရဒါန် အီ မုး ဒါ တာင် အီ အိုပ် ဒါ အီ ဘ်ု မာလုဝ်း၊ အန် ဘော ဒိုဝ်း ဂေ ဒူအီ အီ ဆီ ဂိတ် ဆီ ကွယ် ခဲင် မိူင် ယေရူဆာလဲမ် ဘော ဂေ ဒူအီ အီ ဟဲ့ တဝ် ဟာဝ် ကွယ် ဘ့လာက် ဒူအီ ဘာဘဲ၊ ဝီ ဒိုဝ်း ဟာဝ် ဂေ ခဲင် မိူင် ဘာဘဲ။ 10 မာလဲ၊ အာနေဘူဆာရဒါန် ဘော ဝီ ဒိုဝ်း ဂေ ဒူအီ အီ ဒုက် အီ ဂိန်၊ အီ တူ မိုဝ်း မာဆေ ဘော ဂေ ဒူအီ အီ ဆီ ဂိတ် ဆီ ကွယ် ခဲင် မိူင် ယူဒါ တွိုန်၊ ဝီ အာပ် ဒွါ ဘော မာန် မာငုန် ဘော မာန် ဂေ ဒူင် နာ ဒီ ဂေ၊ တဲး ဂေ ပွိုန် ဒီ ရန့်။

11 အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ၊ အန် ဘော ဝီ ကာလာင် လွင် အာယေရေမီ ဒီ ဒါ တာင် အီ အိုပ် ဒါ အီ ဘ်ု မာလုဝ်း အီ စိူဝ် အာနေဘူဆာရဒါန်။ အန် တဝ်း၊ 12 “တဲး ဘေ ယွတ် မဲန် ဘော လိုမ်လာ ဆီချာ အန်။ ဘေ ကွဲ့ ခါနှာပ် အန်၊ တဲး ဘေ ဘူင် ဒူပ် ပီ စ်ု အန်။” 13 အာနေဘူဆာရဒါန် အီ မုး ဒါ အီ အိုပ် ဒူအီ အီ ဘ်ု မာလုဝ်း ဘော ဒါ ဘုဝ် တာင် အီ စိူဝ် အာနေဘူဆာလပါန်၊ အီ မုး ဒါ အီ အိုပ် ဂေ ဒူအီ အီ ယွတ် မဲန် ဇိူင် နာင်၊ အာနေရကာဆာရေစာ အီ အိုပ် ဒူအီ အီ မိုဝ်း အာငျာန် ဘော ဂေ အာမူ အာမာတ် ခုန်ဒီခမ် အီ အိုပ် မိူင် ဘာဘဲ ဘောကာဂ့လျီတ်၊ 14 ဂေ ဘော စ်ု ဒူအီ၊ တဲး ဂေ ဟာဝ် ဒိုဝ်း လေး အာယေရေမီ ခဲင် ဝဲင် တွိုန်၊ တဲး ဂေ ဘော ဝီ အာပ် အန် ဒီ အာကေတာလီ အီ မုး ဂွန် အာဟီကမ် ဘော မုး လှာန် အာဆာဖာန်၊ တဲး အန် ဝီ ဟာဝ် တိုယ် အာယေရေမီ ဒီ ကာင် အန်။ ပါယ် တီ အာယေရေမီ ဘော ဝီ ပွိုန် ဒီ ကွယ် ရိုမ် ဒူပ် ဂေ ဒူအီ အာမျုဝ် အန်။

15 ဇဝ်ဖြာ ဝီ ကာလာင် ဂြုဝ်း ဒီ အာယေရေမီ ဒေါ ကွယ် အန် ခဲင် ဝဲင် တွိုန် တဝ်း၊ 16 “တဲး မဲ ဟာဝ် ကာလာင် ဒီ အာအေဘေတာမေလေက် အီ မုး ဒူအီ အာမျုဝ် အေထီအူပ် တဝ်း၊ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ကာလာင် ပါယ် နီ။ အန် တဝ်း၊ အုဝ် ဒီ ဘူင် ဒီ ဒူအီ အီ ကွယ် ခဲင် မိူင် နီ ဒူပ် ခဲ့ ပီ ကာလာင် အုဝ်။ န့ ဒီ ဘဲန် အာဖေ အာရေ၊ အာဝ် မုး န့ ဒီ ဘဲန် အာဂျိုဝ် အာဒါ ဂေ။ မဲ ဒီ ယိုဝ်၊ န့ ဒီ ဇေ့ဇုင် တူတ့် ခဲ့ ပီ တဝ်း အုဝ်။ 17 ပီ ဘော ဟဲ့ ပါယ် တီ မိူဝ်၊ အုဝ် ဒီ ချွတ် မဲ။ မဲ မိူဝ် တူ လုဝ် ဇမ် ဒူင် ကွယ် ဂေ ဒူအီ ပီ ယုဝ် မဲ။ 18 အုဝ် ဒီ ချွတ် မဲ အာခ်ု မှာန်။ မဲ မိူဝ် တူ ကာဒုး ဒီ ယမ် ဒီ မာပွါ့ လာင်။ မဲ ဒီ မိုဝ်း အာဆာက်။ ခုဝ်၊ မဲ ဟဲ့ ညှိုမ် ဘိုင် အုဝ်။” ဇဝ်ဖြာ ဟဲ့ ကာလာင် ပါယ် တီ။