1 အာဆေဖာဒီ အီ မုး ဂွန် အာမာထာန် ဘော အာကေတာလီ အီ မုး ဂွန် အာဘာဆူရာ ဘော အာယေဟူကာလာ အီ မုး ဂွန် အာဆေလာမီ ဘော အာဘာဆူရာ အီ မုး ဂွန် အာမာလာခီယာ၊ ဂေ ဟဲ့ ယိုဝ် ဂြုဝ်း ပီ ကာလာင် အာယေရေမီ ဒီ ဂေ ဒူအီ ကိူန်။ အန် ဟဲ့ တဝ်း၊ 2 “ဇဝ်ဖြာ ဟဲ့ ကာလာင်၊ ဒူအီ အီ ကွယ် ခဲင် မိူင် နီ၊ ဂေ ဒီ ဘော ကာဒုး ဒီ ယမ် ဒီ မာပွါ့ လာင်၊ ယမ် ဒီ အေတ့် ပီ ဒီ ဟူမ် ဘော ခမ် ဆဝ် ရောဂါ။ အာဆေ ယီ ဝီ တဝ် ဟာဝ် ကွယ် ဒူပ် ဒူအီ ဘာဘဲ၊ အန် ဒီ လွတ် ယမ်။ အန် ဒီ ဝီ ပွိုန် အာဆာက် အန်၊ တဲး န့ ပီ အန် ဟဲ့ ပွိုန် ရုး အန် ဒီ ဘာင် ကာဂုဝ်း၊ အန် ယီ တူ လုဝ် ယမ်။ 3 ဇဝ်ဖြာ ဟဲ့ ကာလာင်၊ မိူင် နီ အန် ဇဝ် ဒီ အာပ် ဒီ ခုန်ဒီခမ် အီ အိုပ် မိူင် ဘာဘဲ၊ တဲး အန် အိုပ် တူတ့်။” 4 ဂေ အာမူ အာမာတ် ဟဲ့ ဟွတ့် ယိုဝ် ဂြုဝ်း တီ၊ ဂေ ဝီ ကာလာင် ဒီ ခုန်ဒီခမ် တဝ်း၊ “ဒူအီ ဝီ နီ၊ ဟဲ့ ကာအာပ် ငဝ်း ဝဲန် အန်။ ခုဝ်၊ အန် ဟဲ့ ကာလာင် ဂြုဝ်း အီ တဲး နဝ်း ဂေ ဒါ ဆိုက် ဘော ဂေ ဒူအီ အီ ကွယ် ဒီ နီ ဒီလှး န့စမ်။ အန် မိူဝ် တူ နပ် ဒီ ယွတ် မဲန် ဒူအီ ဂေ နီ။ အန် နပ် မီ ဒီ ပျာတ့် တဲး ဂေ လိုဝ်။”

5 ခုန်ဒီခမ် အာဇေဒေကီ ဝီ တဝ်း ဒီ ဂေ အာမူ အာမာတ် အန်၊ “ဘေ ပွိုန် ဘူင် ပီ အိုင် ဘေ။ အုဝ် ခုန်ဒီခမ် တူ ပွိုန် ခြဲ ပီ ဆီ ဘူင် ဘေ။”

6 ပန် အန် တီ ဂေ ဘော ဒိုဝ်း ဝန်၊ ပက် အာယေရေမီ၊ ဝီ ဟာဝ် ဘျွာ အန် ခဲင် အိုမ် ခိုမ် အီ မုး အိုမ် ခိုမ် အာမာလာခီယာ အီ မုး ဂွန် ခုန်ဒီခမ်။ အိုမ် ခိုမ် တီ ကွယ် ခဲင် ဝဲင် ဂေ ဒူအီ အီ ဘ်ု ဟုဝ်။ န့ ယီ တူ မိုဝ်း အိုမ် နာ ခဲင်၊ န့ မိုဝ်း မီ ညုဝ့် ဒီလူယ်။ ဂေ တဲး အာယေရေမီ ကွယ် ခဲင် ညုဝ့် တီ။

7 မာလဲ၊ အာအေဘေတာမေလေက် အီ မုး ဒူအီ အာမျုဝ် ကူဆာ အီ အိုပ် ဂေ ဇိူင် နာင် အီ ကွယ် ခဲင် ဟုဝ် ခုန်ဒီခမ် တွိုန်၊ အန် ဘော ယိုဝ် လွင် ဟဲ့ ဒိုဝ်း ဘျွာ ဂေ အာယေရေမီ ခဲင် အိုမ် ခိုမ် တွိုန်။ ဒေါ အန် တီ ခုန်ဒီခမ် ပဲ့ ဟဲ့ ငျာ ဟာဝ် ကွယ် အန် ဒီ ဘာင် မာလုဝ်း အီ စိူဝ် မာလုဝ်း အာဘေန်ယာမ်။ 8 ပါယ် တီ အာအေဘေတာမေလေက် ဘော လေး ခဲင် ဟုဝ် ခုန်ဒီခမ်၊ ဝီ ဟာဝ် ဒူင် ကွယ် ခုန်ဒီခမ်၊ ဝီ ကာလာင် ဒီ အန် တဝ်း၊ 9 “အိုယ် မဲ ဇဝ်၊ မဲ မုး ခုန်ဒီခမ် တာင်၊ ပီ ဘူင် ဂေ တီ ဒီ အာယေရေမီ ဟဲ့ ဟွတ့် ကာလိုပ်။ ဂေ ဟဲ့ ဒိုဝ်း ဒူအီ အီ ဘျာန် ဂြုဝ်း ဇဝ်ဖြာ၊ ဘျွာ လူင် ခဲင် အိုမ် ခိုမ်။ အန် ဒီ ဘော ယမ် ဒီ တီ ကူပ် တူ ပွိုန် အန် ဒီ ဟူမ် မာဆေ။ ခုဝ်၊ ခဲင် မိူင် နီ မိူဝ်၊ အာဝ် ဟူ မိုဝ်း ခါမုန်။”

10 ဟဲ့ ဟွတ့်၊ ခုန်ဒီခမ် ဘော ဝီ ကာလာင် ဒီ အာအေဘေတာမေလေက် အီ မုး ဒူအီ အာမျုဝ် ကူဆာ တီ တဝ်း၊ “တဲး မဲ ဒဲ့ ဒူအီ အူယ် ဂိုဝ် ဝီ ဟာဝ် ဒူပ် မဲ၊ တဲး ဘေ ဟာဝ် ဒိုဝ်း လေး အာယေရေမီ ခဲင် အိုမ် ခိုမ် တီ၊ အာတ့် ယမ် အန်။”

11 ပါယ် တီ အာအေဘေတာမေလေက် ဘော ဟာဝ် ဒဲ့ ဒူအီ၊ တဲး ဂေ ဝီ ဝေန့် လိုပ် ခဲင် ဟုဝ် ခုန်ဒီခမ်၊ ဝီ ယွတ် ခဲင် ဇီဒိူက်၊ ဝီ ဒိုဝ်း ခြိုင် ဘြိမ်၊ ခြိုင် ကာပျာတ့် ဘော ဝန်၊ ဝီ ဟာဝ် ဘျွာ လူင် ဒူင် ကွယ် အာယေရေမီ ခဲင် အိုမ် ခိုမ် တွိုန်။ 12 အာအေဘေတာမေလေက် အီ မုး ဒူအီ အာမျုဝ် ကူဆာ တွိုန်၊ အန် ဘော ဒဲ့ ဒီ ကာလာင် ဒီ အာယေရေမီ တဝ်း၊ “တဲး မဲ ဒိုဝ်း ခြိုင် ဘြိမ်၊ ခြိုင် ကာပျာတ့် ဂေ တီ၊ ဝီ ကာဘန် ဝန်၊ တဲး န့ လှဲင် ဒင် ကာလဲဝ် မဲ။” 13 ဟဲ့ ဟွတ့် ပါယ် တီ ဂေ ဘော ဒိူတ် လေး အာယေရေမီ ခဲင် အိုမ် ခိုမ် တွိုန်။ ဝါယ် အန် တီ အာယေရေမီ ဘော ဝီ ပွိုန် ဒီ ကွယ် ခဲင် ဝဲင် တွိုန်။

14 ခုန်ဒီခမ် အာဇေဒေကီ ဘော ဝီ ဒဲ့ အာယေရေမီ တး ဒူင် ကွယ် အန် ဒူပ် န့တေန့် ညွင့် ဟာအူယ် အီ ဟာဝ် လိုပ် ဒီ ဟုဝ် ဇဝ်ဖြာ။ ခုန်ဒီခမ် ဝီ တဝ်း ဒီ အာယေရေမီ၊ “အုဝ် ဒီ ဒီမွှတ် မဲ အူ မျုဝ် အာမျုဝ်။ မဲ ကွဲ့ ချြီင် မာဆေ ဒီ အုဝ်။”

15 အာယေရေမီ ဝီ ကာလာင် ဒီ ခုန်ဒီခမ် အာဇေဒေကီ တဝ်း၊ “ဆေ အုဝ် ကာလာင် ဆိူဝ် ဒီ မဲ၊ အုဝ် ထာင် မဲ ဒီ ဘော ငဝ်း ယမ် အုဝ် အာခါခ်ု မှာန်။ ဆေ အုဝ် ဟီ ကာလာင် ဒွါ အာကျာမ် အာငျာန် ဒီ မဲ၊ မဲ တူ ဒီ ထူမ်။”

16 ခုန်ဒီခမ် အာဇေဒေကီ ဘော ဝီ ဒိူင် ကာဆဲန့် ဒီ အာယေရေမီ တဝ်း၊ “ဟဲ့ မုး ဟဲ့ မှာန် ဇဝ်ဖြာ ဟဲ့ အိမ် ဘော ဟဲ့ ဟပ် နဝ်း ဖွိုမ် ခဲင် နဝ်း အေ။ ပါယ် တီ ဘော ဂြုဝ်း အုဝ် နီ ဟဲ့ မုး ဟဲ့ မှာန်။ အုဝ် တူ ငဝ်း ယမ် မဲ။ အုဝ် မိူဝ် တူ အာပ် မဲ ဒီ ဂေ ဒူအီ အီ ဟြေတ့် ဒီ ငဝ်း ယမ် မဲ။”

17 ဟဲ့ ဟွတ့်၊ အာယေရေမီ ဘော ကာလာင် ဒီ အာဇေဒေကီ တဝ်း၊ “ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ။ ဆေ မဲ ကော ဝီ မိုဝ်း နဝ်း ဂူမ်၊ ဝီ ဟာဝ် ခြုတ် ဒီ ဂေ အာမူ အာမာတ် ခုန်ဒီခမ် မိူင် ဘာဘဲ၊ မဲ ခုန်ဒီခမ် ဒီ လွတ် ယမ်။ အာဆာက် မဲ မိူဝ် ဒီ ဂတ် ဂျီတ်။ မိူင် နီ မိူဝ် ဒီ လွတ် ကာဆိုမ် ခဲင် ငဝ်။ မဲ ခုန်ဒီခမ် ဘော ဘီနွင် ဝေါဝဲ မဲ ဘော ခြိုဝ် မဲ မိူဝ် ဒီ လွတ် ယမ်။ 18 ဆေ မဲ တူ ပီတျီမ် နဝ်း မဲ ဒီ ဂေ ခုန်ဒီခမ် ခဲင် မိူင် ဘာဘဲ တီ၊ ဂေ ဒူအီ ဘာဘဲ ဒီ အိုပ် မိူင် နီ။ ဂေ ဒီ ဘော ဒိုဝ်း ငဝ် ဒုဝ့်၊ တဲး န့ ကာဆိုမ် တူတ့်။ မဲ ခုန်ဒီခမ် မိူဝ် တူ လွတ် ဂေ အိုပ် မဲ။”

19 ခုန်ဒီခမ် အာဇေဒေကီ ဝီ တဝ်း ဒီ အာယေရေမီ၊ “အုဝ် ယုဝ် ဂေ ဒူအီ အာယူဒါ အီ ဟဲ့ ဟာဝ် ကွယ် ဒူပ် ဒူအီ ဘာဘဲ။ အုဝ် ယုဝ် ဂေ ဒီ ဝီ အာပ် အုဝ် ဒီ ဂေ၊ တဲး ဂေ ဝီ ဘူင် နာ တူ မွှိုမ် ဒီ အုဝ်။”

20 အာယေရေမီ ဝီ တဝ်း၊ “ဂေ တူ ပွိုန် အာပ် မဲ ပါယ် တီ။ တဲး မဲ ထူမ် လဲ ဂြုဝ်း ဇဝ်ဖြာ ပီ ကာလာင် အုဝ် ဒီ မဲ နီ။ ဆေ မဲ ဘူင် ပါယ် တီ၊ မဲ ဒီ ပွိုန် ဒီ ကွယ် ဂတ် ဂျီတ်။ မဲ မိူဝ် တူ လုဝ် ယမ်။ 21 ဆေ မဲ တူ ဘူင် ပါယ် တီ၊ ဆေ မဲ တူ ထူမ် ဘော တူ ပီတျီမ် နဝ်း မဲ ပါယ် တီ၊ ဂြုဝ်း ဇဝ်ဖြာ ပဲ့ ဟဲ့ ကာလာင် ဇဝ်ဖြာ ဒီ အုဝ်၊ န့ ပါယ် နီ။ 22 ဂေ အီဘိုန့် အီ ဆီ ဂိတ် ဆီ ကွယ် ခဲင် ဟုဝ် ခုန်ဒီခမ် မိူင် ယူဒါ၊ ဂေ ဟဲ့ ကာဒုး ဒီ ဝီ လေး၊ ဟာဝ် ကွယ် ဒူင် ကွယ် ဂေ အာမူ အာမာတ် ခုန်ဒီခမ် ခဲင် မိူင် ဘာဘဲ။ အီဘိုန့် ဂေ တီ၊ ဂေ ဒီ ဘော ဝီ ကာလာင် ဒီ မဲ တဝ်း၊ ‘ဂေ ဂိုက် ကာလဝ့် မဲ ဂေ တွိုန်၊ ဂေ ဟဲ့ ပဲ ဒီ ကာဆုး မဲ။ ဒေါ တီ နီ မဲ ဟဲ့ ပီ ဟဲ့ စုဝ်း ဟဝ့် ခဲင် ညုဝ့်။ ဂေ မိူဝ် ဟဲ့ ဟွတ့် ဝီ တဝ်၊ ဝဲန် မဲ။’

23 ဂေ ဒီ ဘော ဒိုဝ်း အီဘိုန့် မဲ ဂေ ဂွန် မဲ၊ ဝီ ဟာဝ် ဒူင် ကွယ် ဒူအီ ဘာဘဲ။ မဲ ခုန်ဒီခမ် မိူဝ် တူ ပွိုန် ဒီ လွတ် ဒေါ မှဝ်။ မဲ လုဝ် ခမ် တဲး ခုန်ဒီခမ် မိူင် ဘာဘဲ အိုပ် မဲ။ မိူင် နီ မိူဝ် ဂေ ဒီ ဘော ဒိုဝ်း ငဝ် ဒုဝ့်၊ တဲး န့ ကာဆိုမ် တူတ့်။”

24 အာဇေဒေကီ ပီ ဝီ တဝ်း ဒီ အာယေရေမီ၊ “ကွဲ့ တဲး န့ မိုဝ်း ခေါ အူ ဝီ အီ နပ် လွင် ပီ လာယ် ကာလာင် အာယ် နီ။ ဆေ အာဝ် ပါယ် တီ မဲ လုဝ် ယမ်။ 25 ဆေ ဂေ အာမူ အာမာတ် အုဝ် ဟီ ယိုဝ် လွင် ကာမွုန် အုဝ် ဒီ မဲ၊ ဆေ ဂေ ဒီ ဘော တး ဒူင် မဲ ဘော ဒီမွှတ် မဲ တဝ်း၊ ‘တဲး မဲ ကာလာင် လွင် မာဆေ ပဲ့ ဟဲ့ ကာလာင် မဲ ဒီ ခုန်ဒီခမ်။ ဘော ခုန်ဒီခမ် အန် ဟဲ့ ကာလာင် မာဆေ ဒီ မဲ၊ တဲး မဲ ဝီ ကာလာင် ဒီ ယေ၊ အာဝ် ပွိုန် ချြီင် ခေါ အူ မျုဝ်။ ဆေ မဲ တူ ကာလာင်၊ ယေ မိူဝ် ဒီ ငဝ်း ယမ် မဲ။’ 26 ဆေ ဂေ ဘော တဝ်း ပါယ် တီ ဒီ မဲ၊ တဲး မဲ ဝီ ကာလာင် ဒီ ဂေ ပါယ် နီ။ တဲး မဲ တဝ်း၊ ‘အုဝ် ဟာဝ် ဒူင် ကွယ် ခုန်ဒီခမ်၊ အုဝ် မှာန့် ဒီ အန်၊ ကွဲ့ တဲး အုဝ် လုဝ် ဝီ ဝေန့် ဒူင် ကွယ် အာယုဝ်နာထာန်၊ ကွဲ့ တဲး အုဝ် လုဝ် ဝေန့် ယမ် ဒီ တီ။’”

27 ပါယ် တီ ဂေ အာမူ အာမာတ် ဘော တး ဒူင် ကွယ် အာယေရေမီ။ ဂေ ဘော ဒီမွှတ် ဇဲတ် အန်။ အန် မိူဝ် ကာလာင် ဒီ ဂေ ဒူပ် ပီ ကာလာင် အုန် ခုန်ဒီခမ် ဒီ အန်။ ဂေ မိူဝ် တူ ဝီ ဒီမွှတ် အန် ပေါ န့ ပွါ။ ခုဝ်၊ အာဝ် မိုဝ်း အာဆေ အီ ဟဲ့ ထူမ် ပဲ့ ဟဲ့ ကာလာင် အာယေရေမီ ဂါယ် ခုန်ဒီခမ်။

28 ပါယ် တီ အာယေရေမီ ဘော ဝီ ကွယ် ခဲင် ဝဲင် တွိုန်၊ တဲး န့ ကော ဇမ် ဆီငဲ ဒီ လိုပ် ဂေ ဒူအီ ဘာဘဲ ခဲင် မိူင် ယေရူဆာလဲမ်။