1 ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ၊ အန် ဟဲ့ ဒါင် အာဇေဒေကီ အီ မုး ဂွန် ခုန်ဒီခမ် အာယုဝ်ဆီယာ၊ တဲး အန် ဘဲန် ခုန်ဒီခမ် အီ အိုပ် မိူင် ယူဒါ ကာဒါင် အာယေခေါနီ အီ မုး ဂွန် ခုန်ဒီခမ် အာယောယာခိမ်။ 2 ခုန်ဒီခမ် အာဇေဒေကီ ဘော ဂေ ဒဲစေန့် အန် ဘော ဂေ ဒူအီ ခဲင် ရဝ် ခဲင် မိူင် အန်၊ ဂေ ဘောကာဂ့လျီတ် တူ ထူမ် ဂြုဝ်း ဇဝ်ဖြာ ပီ ကာလာင် အန် ဒီ အာယေရေမီ အီ မုး ဒါ အီ ဘျာန် ဂြုဝ်း ဇဝ်ဖြာ။

3 ဒေါ အန် တီ ခုန်ဒီခမ် အာဇေဒေကီ ဝီ စ်ု အာယေဟူကာလာ အီ မုး ဂွန် အာဆေလာမီ ဘော ဒါ အီ လှူ ဒီ ဇဝ်ဖြာ အီ စိူဝ် အာစေဖာနီ အီ မုး ဂွန် အာမာအာဆေယာ၊ တဲး ဂါယ် ဟာဝ် ဒူင် ကွယ် အာယေရေမီ အီ မုး ဒူအီ အီ ဘျာန် ဂြုဝ်း ဇဝ်ဖြာ၊ တဲး ဂါယ် ကာလာင် ဒီ အန် တဝ်း၊ “မှာန့်၊ တဲး မဲ ဆာခိုဝ် အာဒါ ယေ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အေ။”

4 ဒေါ အန် တီ ဒါ အီ ဘျာန် ဂြုဝ်း ဇဝ်ဖြာ အာယေရေမီ ဆီ ပွိုန် လိုပ် လိုပ် လေး လေး ဒူပ် ဂေ ဒူအီ ကိူန်။ ခုဝ်၊ ဂေ ညှမ် ခြွင့် အန် ခဲင် ကာပိုမ်။ 5 ဂေ ဒါ ဆိုက် ခုန်ဒီခမ် မိူင် အဲဂိုပ် ဟဲ့ လေး ခဲင် မိူင် အဲဂိုပ်။ ဂေ ဝီ ယိုဝ် ဒူအီ ဘာဘဲ ဟဲ့ ဘ်ု ရူပ် မိူင် ယေရူဆာလဲမ်၊ ဂေ ဘော ဝီ ဝေန့် မိူင် ဘြိမ် ဂေ။

6 ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အာယေရေမီ အီ မုး ဒါ အီ ဘျာန် ဂြုဝ်း ဇဝ်ဖြာ။ အန် တဝ်း၊ 7 “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ ဟဲ့ ကာလာင် ပါယ် နီ။ ‘တဲး မဲ ကာလာင် ဒီ ခုန်ဒီခမ် အီ အိုပ် မိူင် ယူဒါ အီ ဟဲ့ စ်ု မဲ တး ဒီမွှတ် အုဝ် တဝ်း၊ မဲ ယွတ်၊ ဂေ ဒါ ဆိုက် ခုန်ဒီခမ် မိူင် အဲဂိုပ် အီ တဝ်း ဒီ တး စွယ် ဘေ၊ ဂေ ဟဲ့ ဟွတ့် ဝီ ဝေန့် ခဲင် မိူင် အဲဂိုပ် ဒူင် ကွယ် ဂေ။ 8 ဂေ ဒူအီ ဘာဘဲ တွိုန် ပီ ဒီ ဝီ တး ကာဂုဝ်း ဒီ ဘေ၊ တဲး ဂေ ကော ပွိုန် မိူင် ဘေ။ ဟဲ့ ဟွတ့်၊ ဂေ ဒီ ဘော ဝီ ဒိုဝ်း ငဝ် ဒုဝ့် ကာဆိုမ် တူတ့်။’

9 ဇဝ်ဖြာ တဝ်း၊ ‘ကွဲ့ တဲး ဘေ ကာလုဝ် ဒုဝ် ဘြိမ် ဘေ တဝ်း၊ ‘ဒူအီ ဘာဘဲ ဒီ တဝ် ဒူင် ကွယ် ယေ။’ ဂေ တူ တဝ် ဒေါ မှဝ်။’ 10 ဆေ ဘေ ဘော ကာဂုဝ်း ဘော ပွိုန် တူတ့် ဒါ ဆိုက် ဒူအီ ဘာဘဲ ဂေ တီ၊ ဆေ န့ ဘော ဂိတ် မီ ဒူအီ ဟဲ့ ပါ့ ဟဲ့ ဒိမ် မိူဝ်၊ ဂေ ယီ ဒီ ဝီ တး ခဲင် ထိုပ် ဒူင် ကွယ် ဂေ ရာင် အာဆေ ရာင် အန်၊ ဝီ တး ဒုဝ့် ဝဲန် မိူင် နီ။”

11 ဒေါ တး ကာတတ် ဂေ ဒါ ဆိုက် ခုန်ဒီခမ် မိူင် အဲဂိုပ် ဒီ ဂေ ဒါ ဆိုက် ဒူအီ ဘာဘဲ၊ ဂေ ဒါ ဆိုက် ဘာဘဲ ဝီ လေး ခဲင် မိူင် ယေရူဆာလဲမ်။ 12 ဒေါ အန် တီ အာယေရေမီ ဝီ လေး ခဲင် မိူင် ယေရူဆာလဲမ်၊ ဝီ ဟာဝ် ဒီ မိူင် အာဘေန်ယာမ်၊ တဲး အန် ပွိုန် ခါဂုန် အန် အီ ကွယ် ကာတဲ ဂေ ဒူအီ အာမျုဝ် အန်။ 13 ဒေါ ဝီ တး ဇမ် အန် ဒီ ဘာင် မာလုဝ်း မိူင် အာဘေန်ယာမ် တွိုန်၊ ဒါ အီ ဘ်ု ဒီ တီ အီ စိူဝ် အာအီရီယာ အီ မုး ဂွန် အာဆေလာမီ ဘော လှာန် အာဟာနာနီယာ၊ အန် ဘော မှေတ့် အာယေရေမီ တဝ်း ဒီ အန်၊ “မဲ ဝီ တဝ် ဟာဝ် ဒူင် ကွယ် ဒူအီ ဘာဘဲ။”

14 အာယေရေမီ ဝီ တဝ်း ဒီ အန်၊ “အာဝ် မုး၊ အုဝ် တူ တဝ် ဟာဝ် ဒူင် ကွယ် ဒူအီ ဘာဘဲ။” အန် ပီ ဘော ဟဲ့ တဝ်း ပါယ် တီ မိူဝ်၊ အာအီရီယာ ယီ တူ ထူမ် ဂြုဝ်း အန်။ အန် ဘော မှေတ့် အာယေရေမီ၊ ဝီ ဟာဝ် တိုယ် ဒီ ဂေ အာမူ အာမာတ် ခုန်ဒီခမ်။ 15 ဂေ အာမူ အာမာတ် ခုန်ဒီခမ် ဘော ပီရူ ဂေ ဒီ အာယေရေမီ ဘော မး အန်။ ဟဲ့ ဟွတ့်၊ ဂေ ဘော ဝီ ဟာဝ် ခြွင့် အန် ခဲင် ကာင် ဒါ စာရေ တာင် အီ စိူဝ် အာယုဝ်နာထာန်။ ကာင် တီ၊ ဂေ ဟဲ့ တဲး န့ ဘဲန် ကာပိုမ်။

16 အာယေရေမီ ဘော ကွယ် ခဲင် ကာပိုမ် အီ ကွယ် ခြိုမ် ကာင် တွိုန်။ အန် ဘော ကွယ် လှေန့် ကာဆဝ်။ 17 ဝါယ် အန် တီ ခုန်ဒီခမ် အာဇေဒေကီ ဝီ ဒမ် တဲး ဂေ ပြာ ဒီ ဒိုဝ်း လေး အာယေရေမီ၊ တဲး အာယေရေမီ တး ခဲင် ဟုဝ် အန်။ အန် ဝီ ဒီမွှတ် အာယေရေမီ တဝ်း၊ “န့ မိုဝ်း ဂြုဝ်း ဇဝ်ဖြာ အီ ကာလာင် လွင် အုဝ်။း” အာယေရေမီ ဝီ တဝ်း ဒီ အန်၊ “ဟဲ့ မိုဝ်း။ ခုန်ဒီခမ် အီ အိုပ် မိူင် ဘာဘဲ၊ အန် ဒီ ပဲ မဲ။”

18 အာယေရေမီ ပီ ဝီ ကာလာင် ဒီ အန် ပေါ န့ ပွါ တဝ်း၊ “မာဆေ ပီ လုတ့် အုဝ် ဒီ မဲ ခုန်ဒီခမ် တာင် ဘော ဒီ ဂေ ဒဲစေန့် မဲ ဘော ဒီ ဂေ ဒူအီ ရဝ် ဒူအီ ကာင် မဲ။း မာဆေ ပီ လုတ့် အုဝ်၊ တဲး အုဝ် ကော လုဝ် ကွယ် ခဲင် ကာပိုမ် နီ။း 19 ဂေ ဒါ အီ ဘျာန် ဂြုဝ်း ဇဝ်ဖြာ အီ ဟဲ့ ကာလာင် တဲး မဲ ခုန်ဒီခမ် ထူမ် တဝ်း၊ ‘ခုန်ဒီခမ် မိူင် ဘာဘဲ တူ တး ကာဂုဝ်း ဒီ ဘေ ဘော ဒီ မိူင် ဘေ နီ၊’ ဒေါ တီ နီ၊ ဂေ ဘော ဝီ ကွယ် ဒီ မှဝ်။း 20 ဒေါ တီ နီ အုဝ် မှာန့်၊ တဲး မဲ ခုန်ဒီခမ် တာင် ထူမ် ဂြုဝ်း အုဝ်။ အုဝ် မှာန့်၊ ကွဲ့ တဲး အုဝ် လုဝ် ဝီ ဟာဝ် ဒီ ကာင် ဒါ စာရေ တာင် အီ စိူဝ် အာယုဝ်နာထာန်။ ကွဲ့ တဲး အုဝ် ဝီ ဟာဝ် ယမ် ဒီ တီ။”

21 ပန် အန် တီ ခုန်ဒီခမ် ဝီ စ်ု ဂေ၊ တဲး ဂေ ဝီ ဟာဝ် အုန် အာယေရေမီ ခဲင် ဝဲင် ဟုဝ် အန်၊ တဲး အန် ကွယ် ဒူပ် ဂေ ဒူအီ အီ ဘ်ု ဟုဝ်။ ဂေ ဝီ ဒိုဝ်း ခါမုန် ဒီ ဒါ အီ ဘူင် ခါမုန်၊ ဒွါ အန် ဟူမ် အူ ဆီငဲ အူ ဘူင့် အူ ဘူင့်၊ တဲး န့ ကော ဇမ် ပန် ဒီ တူတ့် ခါမုန် ခဲင် မိူင် တွိုန်။ အာယေရေမီ ဘော ကာဒုး ဒီ ကွယ် ခဲင် ဝဲင် တီ။