1 ခုန်ဒီခမ် အာယောယာခိမ် အီ မုး ဂွန် ခုန်ဒီခမ် အာယုဝ်ဆီယာ အီ အိုပ် မိူင် ယူဒါ အန် ဟဲ့ ဘဲန် ခုန်ဒီခမ် အာဒါ ဖွုန် ဆီနမ်။ ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အာယေရေမီ တဝ်း၊ 2 “တဲး မဲ ဒိုဝ်း ဆီလွယ် ပဲ့၊ ဝီ ဒဲမ် အုန် ပဲ့ ဟဲ့ ကာလာင် အုဝ် လွင် မိူင် အီဆာရေလ ဘော မိူင် ယူဒါ ဘော ဒွန် မာန် ဒွန် မိူင်။ စုး ဆိန့် ဆီငဲ ဒေါ ကာလာင် အုဝ် ဒီ မဲ ဒေါ မုး စုဝ် ဘာန် ခုန်ဒီခမ် အာယုဝ်ဆီယာ ကော ဇမ် အာတိုဝ် နီ၊ တဲး မဲ ဒဲမ် တူတ့်။ 3 ဆေ ဂေ ဒူအီ အာယူဒါ ယိုဝ် လွင် အာဖေ အာရေ ပီ ဒီ ဘူင် အုဝ် ဒီ ဂေ တီ၊ ယုဝ် ဂေ ဆော ဝီ ဝး ဝီ ဝဲန် နာ ဟာယ် နာ မိူက် ပီ ဘူင် ဂေ၊ တဲး အုဝ် ဝီ ပွိုန် ဒီ ဂဝ်း ဝဲန် မှာပ် ဂေ တီ။”

4 ဒေါ အန် တီ အာယေရေမီ ဝီ ဒဲ့ တး အာဘာရုက် အီ မုး ဂွန် အာနေရီ။ အန် မိူဝ် ကာလာင် ဒီ မူတ့် အန် ခဲ့ ပီ ကာလာင် ဇဝ်ဖြာ ဒီ အန်၊ တဲး အာဘာရုက် ဝီ ဒဲမ် အုန် ခဲင် ဆီလွယ် ပဲ့ တွိုန်။ 5 အာယေရေမီ ဝီ တဝ်း ဒီ အာဘာရုက်၊ “အုဝ် တူ ပွိုန် ဒီ ဟာဝ် လိုပ် ခဲင် ဟုဝ် ဇဝ်ဖြာ။ 6 ခုဝ်၊ တဲး မဲ ဝီ ဟာဝ် ကာလာင် ဂြုဝ်း ဇဝ်ဖြာ ပီ ဒဲမ် အုန် မဲ၊ ပဲ့ ဟဲ့ ကာလာင် အုဝ် ဒီ မဲ တီ။ တဲး ဂေ အီ ကွယ် ခဲင် ဟုဝ် ဇဝ်ဖြာ ပွိုန် ဒီ ထူမ် ဒေါ မုး ဆီငဲ ယိူန် ဂေ ပီ ဒီ ဟူမ်။ ကာလာင် တဲး ဘော ဂေ ဒူအီ အာယူဒါ အီ တး ဒွန် မာန် ဒွန် မိူင် ထူမ်။ 7 ယုဝ် ဂေ ဆော ဝီ မုတ် ဂိုပ် ဝီ ဆာခိုဝ် ဒီ ဇဝ်ဖြာ၊ ဝီ ဝး ဝီ ဝဲန် ဘော န့တေန့် ဟာယ် န့တေန့် တူ မွှိုမ် ပီ ဒူပ် ဂေ။ ကူပ် ဘူင် ဂေ ပါယ် တီ ဇဝ်ဖြာ ဟဲ့ ရူ ဟဲ့ စာဝ် ကာဆဝ် ဒီ ဂေ။”

8 ပါယ် တီ အာဘာရုက် အီ မုး ဂွန် အာနေရီ မိူဝ် ဘူင် ဒူပ် ပီ ကာလာင် အာယေရေမီ အီ မုး ဒူအီ ဘျာန် ဂြုဝ်း ဇဝ်ဖြာ။ အန် မိူဝ် ဒိုဝ်း ဆီလွယ် ပဲ့ ပဲ့ ဟဲ့ ဒဲမ် အုန် အန် ဂြုဝ်း ဇဝ်ဖြာ၊ ဝီ ဟာဝ် တိး ခဲင် ဟုဝ် ဇဝ်ဖြာ။ 9 အာယောယာခိမ် အီ မုး ဂွန် အာယုဝ်ဆီယာ အီ မုး ခုန်ဒီခမ် မိူင် ယူဒါ၊ အန် ဟဲ့ အိုပ် မာန် မိူင် အာဒါ ဖန် ဆီနမ်။ ဒေါ မုး မာဂျီန် န့ဒိမ်၊ ဂေ ဒူအီ အီ ကွယ် ခဲင် မိူင် ယေရူဆာလဲမ် ဘောကာဂ့လျီတ် ဘော ဂေ ဒူအီ အီ တး ခဲင် ရဝ် ခဲင် မိူင် ယူဒါ၊ ဂေ ဝီ တး ကာဇု ခဲင် မိူင် ယေရူဆာလဲမ်။ ဂေ မိူဝ် ဝီ လာယ် ဒဲ့ လာယ် ကာလာင်၊ တဲး ဂေ ဒွန် အီ ကမ် ရိတ် လွင် ယိူန် ပီ ဒီ ဟူမ်၊ တဲး ဘော ဇဝ်ဖြာ ယိုဝ်။ 10 ပါယ် တီ အာဘာရုက် ဘော ဟာဝ် ဟုဝ် ဒါရာ ပီ ကာလာင် အာယေရေမီ အီ ဟဲ့ ဒဲမ် အုန် ခဲင် ဆီလွယ် ပဲ့ တွိုန်။ ဒေါ အန် တီ အန် ကွယ် ခဲင် ဟုဝ် ဇဝ်ဖြာ၊ တဲး ဂေ ဒူအီ ဘောကာဂ့လျီတ် ပွိုန် ဒီ ထူမ်။ အန် ဘော ကွယ် ခဲင် ဟူင် အာဂေမာရီ အီ မုး ဂွန် အာဆာဖာန် အီ ဘဲန် ဒါ စာရေ တာင်။ ဟူင် တီ၊ န့ ကွယ် ခြိုမ် ခြွင့် ဒဲင် အီ ကွယ် ဘာင် မာလုဝ်း ကာမာယ်၊ ဒူင် ဒီ လိုပ် ခဲင် ဟုဝ် ဇဝ်ဖြာ။

11 အာမီခါယာ အီ မုး ဂွန် အာဂေမာရီ အီ မုး ဂွန် အာဆာဖာန်၊ ဒေါ ယိုဝ် အန် ဂြုဝ်း ဇဝ်ဖြာ အီ ဟဲ့ ဒဲမ် ခဲင် ဆီလွယ် ပဲ့ တီ၊ 12 အန် ဘော လူင် ဒူင် ကွယ် ဟုဝ် ခုန်ဒီခမ် ဘော တး လိုပ် ခဲင် ဟူင် ဒါ စာရေ တာင် တွိုန်။ ဂေ အီ မုး အာမူ အာမာတ် ခုန်ဒီခမ် မိူဝ် ဟဲ့ ကွယ် ဒီ တီ။ န့ ဘော မုး ဒါ စာရေ အီ စိူဝ် အာအေလီဆာမာ၊ အာဒေလာယာ အီ မုး ဂွန် အာဆေမာယာ၊ အာအေလာနာထာန် အီ မုး ဂွန် အာဆာဘူတ်၊ အာဂေမာရီ အီ မုး ဂွန် အာဆာဖာန်၊ အာဇေဒေကီ အီ မုး ဂွန် အာဟာနာနီယာ ဘော ဂေ အီ မုး အာမူ အာမာတ် ဘောကာဂ့လျီတ်။ 13 အာမီခါယာ မိူဝ် ဝီ ကာလာင် တဲး ဂေ ဒွန် အီ ထူမ် ခဲ့ ပီ ယိုဝ် အန် ဒေါ ဟဲ့ တိး အာဘာရုက် ဒီ ပဲ့ တွိုန်။ 14 ဂေ အာမူ အာမာတ် အီ ကွယ် ဒီ တီ၊ ဂေ ဘော ဝီ စ်ု အာယေဟူတ် အီ မုး ဂွန် အာနေထာနီ၊ အီ မုး လှာန် အာဆေလာမီ။ အာဆေလာမီ ဘော မုး ဂွန် ဒူအီ အီ ကွယ် ခဲင် ကာဒါယ် ဒူအီ အာမျုဝ် ကူဆီ။ ဂေ စ်ု အာယေဟူတ် တီ၊ တဲး အန် ဟာဝ် ဒူင် ကွယ် အာဘာရုက်။ ဂေ မိူဝ် စ်ု အန် ဟာဝ် ကာလာင် ဒီ အာဘာရုက် တဝ်း၊ “တဲး မဲ ဒိုဝ်း တး ဘော ဆီလွယ် ပဲ့ ပဲ့ ဟဲ့ တိး မဲ တဲး ဂေ ဒူအီ ကိူန် ထူမ်။” ပါယ် တီ အာဘာရုက် အီ မုး ဂွန် အာနေရီ တွိုန် မိူဝ် ဂူင့် ဆီလွယ် ပဲ့ တီ တး ဒူင် ကွယ် ဂေ။ 15 ဂေ ဝီ တဝ်း ဒီ အန်၊ “တုတ့် တုတ့်၊ တဲး မဲ တိး တဲး ယေ ထူမ်။” ပါယ် တီ အာဘာရုက် မိူဝ် တိး တဲး ဂေ ထူမ်။ 16 ဒေါ ဟဲ့ ဟွတ့် ဂေ ထူမ်၊ ဂေ ဟဲ့ ယိုဝ် တူတ့် ဂြုဝ်း ပဲ့ ဟဲ့ ဒဲမ် အာဘာရုက် ခဲင် ပဲ့ တီ၊ ဂေ ဒွန် အီ ဘော ဝီ ယုဝ် ပန် အန် တီ။ ဂေ ဘော ဝီ လာယ် ယွတ်၊ ဝီ ကာလာင် ဒီ အာဘာရုက် တဝ်း၊ “ယေ လုဝ် ဒိုဝ်း တူတ့် ဂြုဝ်း ပီ တဝ်း မဲ တီ၊ ဝီ ဟာဝ် ကာလာင် ဒီ ခုန်ဒီခမ်။” 17 ဂေ ပီ ဝီ ဒီမွှတ် အာဘာရုက် တဝ်း၊ “တဲး မဲ ကာလာင် ဒီ ယေ၊ မှဝ် မဲ ပါယ် ဒီ ဒဲမ် ဂြုဝ်း နီ ဘောကာဂ့လျီတ်။း မဲ ဟဲ့ ဒဲမ် ဒူပ် ပီ ကာလာင် အာယေရေမီ ဒီ မဲ။း”

18 အာဘာရုက် ဝီ ကာလာင် ဒီ ဂေ တဝ်း၊ “အန် ကာလာင် ဒီ မူတ့် အန်။ အုဝ် ဘော ဒိုဝ်း အိုမ် မိုက်၊ ဝီ ဒဲမ် ဟပ် ခဲင် ဆီလွယ် ပဲ့ နီ။”

19 အန် ဟဲ့ ဟွတ့် ကာလာင် ပါယ် တီ ခဲ့ ကွယ် ဂေ အာမူ အာမာတ် တွိုန်၊ ဂေ ဝီ ကာလာင် ဒီ အာဘာရုက် တဝ်း၊ “ဘော မဲ ဘော အာယေရေမီ တီ၊ တဲး ဘာယ် တဝ် ဟာဝ် ချြီင် အူ ပ့လုဝ့် အူ ပ့လုဝ့်။ ကွဲ့ တဲး န့ မိုဝ်း အာဆေ၊ မိုဝ်း ခေါ အူ ဝီ အီ နပ် အီ ယိုဝ် ဒူင် ကွယ် ဘာယ်။”

20 ဂေ အာမူ အာမာတ် တွိုန် မိူဝ် ဝီ ဒိုဝ်း ဆီလွယ် ပဲ့ တွိုန်၊ ဝီ ဟာဝ် ချြီင် ခဲင် ဟူင် ဒါ စာရေ တာင် အီ စိူဝ် အာအေလီဆာမာ။ ဟဲ့ ဟွတ့်၊ ဂေ ဘော ဝီ ဟာဝ် ဒူင် ကွယ် ခုန်ဒီခမ် ခဲင် ဟုဝ် အန်။ ဂေ ဘော ဝီ ကာလာင် တဲး ခုန်ဒီခမ် ထူမ် တူတ့် ဂြုဝ်း တွိုန်။ 21 ခုန်ဒီခမ် ဘော ဝီ စ်ု အာယေဟူတ် ဟာဝ် ဒိုဝ်း ဆီလွယ် ပဲ့ တီ။ အာယေဟူတ် မိူဝ် ဟာဝ် ဒိုဝ်း တး ဆီလွယ် ပဲ့ အီ ကွယ် ခဲင် ဟူင် ဒါ စာရေ တာင် အီ စိူဝ် အာအေလီဆာမာ တွိုန်၊ ဝီ တိး တဲး ဘော ခုန်ဒီခမ် ဘော ဂေ အာမူ အာမာတ် အီ ဟဲ့ စွင့် ခူပ် ခုန်ဒီခမ် တွိုန် ထူမ်။ 22 ဒေါ အန် တီ န့ မုး မာဂျီန် န့ဒိမ်။ ခုန်ဒီခမ် ကွယ် ခဲင် ဟုဝ် အန်၊ ဒေါ မုး အာခြာဝ် ဂတ်။ နာ အာတ့် အန် တီ၊ န့ ဘော မိုဝ်း ဖာန် ပီ ဘ့လေး ဂေ န့ကိုဝ် ငဝ်။ 23 အာယေဟူတ် ဆီလွ့ တိး ဟာဝ် အာ အူယ် ကာဘက်၊ ခုန်ဒီခမ် ဘော ဒိုဝ်း မာပွါ့၊ ကာဒဲပ် ပဲ့ တွိုန်၊ ဝီ ဒီဘူမ် ဒုဝ့် ခဲင် ငဝ် အီ ကွယ် ခဲင် ဖာန် တွိုန်၊ တဲး ဆီလွယ် ပဲ့ တီ ကာဆိုမ် တူတ့် ခဲင် ငဝ်။ 24 ခုန်ဒီခမ် ဂေ ဒဲစေန့် အန် အီ ဟဲ့ ယိုဝ် ဂြုဝ်း ပီ တိး ဂေ ခဲင် ဆီလွယ် ပဲ့ တီ၊ ဂေ ယီ တူ ယုဝ်၊ တူ ကာယာတ့် ခြိုင် တာ ဂေ။ 25 အာအေလာနာထာန်၊ အာဒေလာယာ ဘော အာဂေမာရီ၊ ဂေ ပီ ဘော ဟဲ့ ဒွင်ဘာန် ခုန်ဒီခမ်၊ ကွဲ့ တဲး အန် ဒုဝ့် ပဲ့ တွိုန် မိူဝ်၊ ခုန်ဒီခမ် ယီ တူ ထူမ် ဂြုဝ်း ဂေ။ 26 ခုန်ဒီခမ် ဘော ဝီ စ်ု အာယေရာမေအေန် အီ မုး ဂွန် ခုန်ဒီခမ် ဘော အာဆေရာယာ အီ မုး ဂွန် အာစာရေလ၊ တဲး ဂါယ် ဟာဝ် ဟြေတ့် ဒီ မှေတ့် အာဘာရုက် ဘော အာယေရေမီ အီ မုး ဒူအီ အီ ဘျာန် ဂြုဝ်း ဇဝ်ဖြာ တွိုန်။ မာလဲ၊ ဇဝ်ဖြာ ဟဲ့ ဟွတ့် ဒိုဝ်း ချြီင် ဂါယ် အာ ဝီ တီ။

27 ဝါယ် ဟဲ့ ဟွတ့် ဒုဝ့် ဝဲန် ခုန်ဒီခမ် ဆီလွယ် ပဲ့ ပဲ့ ဟဲ့ ကာလာင် အာယေရေမီ၊ တဲး အာဘာရုက် ဒဲမ် အုန် တွိုန်၊ ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ တဝ်း၊ 28 “တဲး မဲ ဝီ ဒိုဝ်း ဆီလွယ် ပဲ့ ပေါ အူ ဖိူန်၊ ဝီ ဒဲမ် ဟပ် ဂြုဝ်း အီ ကွယ် ခဲင် ဆီလွယ် ပဲ့ ပီ ဒုဝ့် ဝဲန် အာယောယာခိမ် အီ မုး ခုန်ဒီခမ် အီ အိုပ် မိူင် ယူဒါ။ တဲး မဲ ဒဲမ် တူတ့် ပေါ အူ ဇေန့်။ 29 တဲး မဲ ဝီ ကာလာင် ဘော လွင် အာယောယာခိမ် အီ မုး ခုန်ဒီခမ် အီ အိုပ် ဒူအီ အာယူဒါ တဝ်း၊ ‘ဇဝ်ဖြာ ဟဲ့ ဝီ ကာလာင် ပါယ် နီ။ မဲ ဟဲ့ ဒိုဝ်း ဆီလွယ် ပဲ့ တွိုန် ဒုဝ့် ကာဆိုမ် ခဲင် ငဝ်။ မဲ ဟဲ့ ဝီ ကာလာင် ဘော ဒီ အာယေရေမီ တဝ်း၊ မှဝ် န့ ပါယ် ပီ ဒဲမ် ဟပ် မဲ ခဲင် ဆီလွယ် ပဲ့ နီ တဝ်း၊ ခုန်ဒီခမ် ခဲင် မိူင် ဘာဘဲ ဒီ တး ငဝ်း ဒူအီ ဘော ဒုဝ် ဆတ်ဒါဝါ အာခ်ု မှာန်။း’ 30 ခုဝ်၊ ဇဝ်ဖြာ ဟဲ့ ဟွတ့် ဆုင်ဖျာတ် အုန် လွင် အာယောယာခိမ် အီ မုး ခုန်ဒီခမ် အီ အိုပ် မိူင် ယူဒါ။ ဂေ လှုက်လှာန် အန်၊ ဂေ တူ ပွိုန် ဒီ အိုပ် မိူင် ပဲ့ ဟဲ့ ဒွိုမ် အိုပ် ခုန်ဒီခမ် အာဒါဝိတ်။ ဒုဝ် ယမ် အန်၊ ဂေ ဒီ ဘော ဝဲန်။ ဒေါ ကာတဲ ဆီငဲ၊ န့ ဒီ ဘော ရာယ် ဒီ ဆောဒါတ်။ ခဲင် မှိုဝ် န့ ဒီ ဘော ဒီဘြ ဒီ အိုမ် ဒီငါန်။ 31 အုဝ် ဒီ ဒမ် မှာပ် အန် ဘော မှာပ် လှုက်လှာန် အန်။ အုဝ် ဒီ ဒမ် မှာပ် ဘော ဒီ ဂေ ဒဲစေန့် အန် ဘော ဒူအီ အန်၊ တဲး န့ ဒူပ် မှာပ် ပီ ဘူင် ဒွန် အီ။ အုဝ် ဒီ တဲး ဂေ ခမ် အာဖေ အာရေ ပဲ့ ဟဲ့ ဒွိုမ် ကာလာင် အုန် အုဝ် အာတ့် နီ၊ တဲး ဘော ခုန်ဒီခမ် ဘော ဂေ ဒူအီ ခဲင် မိူင် ယေရူဆာလဲမ် ဘော ဒူအီ ခဲင် မိူင် ယူဒါ ခမ် ကူပ် တူ ထူမ် ဂေ ဂြုဝ်း ပီ ကာလာင် အုဝ်။”

32 ဝါယ် အန် တီ အာယေရေမီ ဘော ဝီ ဒိုဝ်း ဆီလွယ် ပဲ့ ပေါ အူ ဖိူန်၊ ဝီ ဒွါ ဒီ ဒါ စာရေ တာင် အီ စိူဝ် အာဘာရုက် အီ မုး ဂွန် အာနေရီ တွိုန်။ အန် မိူဝ် ဝီ ဒဲမ် ပေါ အူ ဇေန့် ဂြုဝ်း ပီ ကာလာင် အာယေရေမီ ပဲ့ ဟဲ့ ဒဲမ် အုန် ခဲင် ဆီလွယ် ပဲ့ ပဲ့ ဟဲ့ ဒုဝ့် ကာဆိုမ် အာယောယာခိမ် အီ မုး ခုန်ဒီခမ် အီ အိုပ် ဒူအီ အာယူဒါ။ ဂြုဝ်း အာမျုဝ် အီ ငှိုယ် ငှိုယ် အီ ပီ ဂြုဝ်း တွိုန် မိူဝ်၊ အန် ဘော ဝီ ဒဲမ် ဟပ် ပေါ န့ ပွါ။