1 ဇဝ်ဖြာ ဝီ ကာလာင် ဂြုဝ်း ဒီ အာယေရေမီ ဒေါ ဘဲန် အာယောယာခိမ် ခုန်ဒီခမ် အီ အိုပ် မိူင် ယူဒါ။ အန် ဘော မုး ဂွန် ခုန်ဒီခမ် အာယုဝ်ဆီယာ။ 2 ဇဝ်ဖြာ တဝ်း၊ “တဲး မဲ ဟာဝ် ဒီ ကာင် ဂေ ဒူအီ အာမျုဝ် အာရေခါပ် ဘော ကာလာင် ဒီ ဂေ၊ ဝီ ဒဲ့ လိုပ် ဂေ ခဲင် ဟူင် အီ ကွယ် ခဲင် ဟုဝ် ဇဝ်ဖြာ အာဒါ အူ ပ့လုဝ့်။ ဟဲ့ ဟွတ့်၊ တဲး မဲ ဝီ ဒိုဝ်း အိုမ် မာငုန်၊ ဒွါ ဂေ ဒျီင်။”

3 ပါယ် တီ အုဝ် မိူဝ် စုး ဒီ ဒဲ့ အာစာရာယာ အီ မုး ဂွန် အာယေရေမီ။ အာယေရေမီ ဘော မုး ဂွန် အာဟာဘာစီယာ။ အုဝ် ဘော ဒဲ့ ဘော ဂေ ဘီနွင် ဝေါဝဲ အန် ဘော ဂွန် အီမာယ် အန် ဘောကာဂ့လျီတ် အီ မုး တူတ့် ဒူအီ အာမျုဝ် အာရေခါပ်။ 4 အုဝ် မိူဝ် ယဲတ့် ဟာဝ် လိုပ် ဂေ ခဲင် ဟုဝ် ဇဝ်ဖြာ ခဲင် ဟူင် ဂွန် အာဟာနန် အီ မုး ဂွန် အာအီကာတာလီ။ အန် ဘော မုး ဒူအီ ပီ အိုပ် ဇဝ်ဖြာ။ ဟူင် တီ၊ န့ ဘော ကွယ် ခူပ် ဟူင် ဂေ အာမူ အာမာတ် ဒူင် တး ကာဇု ကာမွုန် ဂေ။ န့ ဘော ကွယ် နာ ဒဲင် ဟူင် အာမာအာဆေယာ အီ မုး ဂွန် အာဆာလူမ် အီ ဘ်ု မာလုဝ်း။ 5 အုဝ် မိူဝ် ဒိုဝ်း ကာလုဝ့် ဒိုဝ်း ဘော ဆီလယ့် အိုမ် မာငုန်၊ ဘ့လေး ဒီ အာတ့် ဒူအီ အာမျုဝ် အာရေခါပ် ဂေ တီ။ အုဝ် ဝီ တဝ်း ဒီ ဂေ၊ “အိုဝ်၊ တဲး ဘေ ဒျီင် အိုမ် မာငုန် တီ။”

6 မာလဲ၊ ဂေ ယီ ဝီ တဝ်း၊ “ယေ တူ ဒျီင် အိုမ် မာငုန် တီ။ ခုဝ်၊ ဂုန့် ဒင် ယေ အီ စိူဝ် အာယောနာဒါပ် အီ မုး ဂွန် အာရေခါပ်၊ အန် ဟဲ့ ဒမ် အုန် ယေ တဝ်း၊ ‘စုဝ် ဘေ ဘော စုဝ် လှုက်လှာန် ဘေ၊ အာဝ် ပွိုန် ဒျီင် အိုမ် မာငုန် ဒေါ မှဝ်။ 7 ကာင် မိူဝ် ဘေ တူ ပွိုန် ဘူင်။ ခြိုင် ဆီမာ မိူဝ်၊ ဘေ တူ ပွိုန် ဘြတ်။ ဟေ မာငုန် မိူဝ် ဘေ တူ ပွိုန် ဆမ်၊ တူ ပွိုန် မိုဝ်း မာန် မာငုန် ဒေါ မှဝ်။ ဘေ လုဝ် ကွယ် ခဲင် ထိုပ် ဘော စုဝ် ဘေ။ န့ ဒီ ဘော တဲး အာဆာက် ဘေ တူင့် ဒေါ ကွယ် ဘေ ဒဲင် ကာဒါယ်၊ တဲး န့ ပီ ဘေ မုး ခဲတ့်။” အန် ဟဲ့ ကာလာင် ပါယ် တီ ဒီ ယေ။’ 8 ပါယ် တီ ယေ မိူဝ် ထူမ် ဂြုဝ်း အာယောနာဒါပ် အီ မုး ဂွန် အာရေခါပ် အီ မုး ဂုန့် ယေ တီ။ အန် ဟဲ့ ကာလာင် အုန် ဒီ ယေ ဘောကာဂ့လျီတ်။ ဘော အီဘိုန့် ယေ ဘော ဂွန် အီဘိုန့်၊ ဂွန် အီမာယ် ယေ၊ စုဝ် အာဆာက် ယေ ယေ တူ ဒွိုမ် ဒျီင် အိုမ် မာငုန်။ 9 ယေ မိူဝ် တူ ဆမ် ကာင် အီ မုး ဒူင် ဒီ ကွယ် ယေ၊ တူ ဆမ် ဟေ မာငုန်၊ တူ မိုဝ်း မာန် မာငုန်၊ တူ မိုဝ်း မာန် ဂေ ဒူင် နာ၊ တူ မိုဝ်း ခြိုင် ဆီမာ မာဆေ။ 10 ယေ လုဝ် ကွယ် မီ ခဲင် ထိုပ် ဘိက်။ ယေ ထူမ် ဂြုဝ်း ပီ ကာလာင် အုန် အာယောနာဒါပ် အီ မုး ဂုန့် ယေ တီ။ 11 ဒေါ ဟဲ့ တး ခုန်ဒီခမ် အာနေဘူခတ်နေစာ ဒီ မိူင် နီ၊ ယေ ဘော ဝီ လာယ် ကာလာင် တဝ်း၊ ‘တဲး အေ ဝီ ဝေန့် ခဲင် မိူင် ယေရူဆာလဲမ်။ ကွဲ့ တဲး အေ လုဝ် ယုဝ် ဒူအီ ဘာဘဲ ဘော ဂေ ဒါ ဆိုက် အာရာမ်။’ ယေ ဟဲ့ ဟွတ့် ကာလာင် ပါယ် တီ၊ ယေ ဆီ ကွယ် ခဲင် မိူင် ယေရူဆာလဲမ် တီ။”

12 ဒေါ အန် တီ ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ တဝ်း၊ 13 “ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ စ်ု မဲ၊ တဲး မဲ ဟာဝ် ကာလာင် ဒီ ဒူအီ အာယူဒါ ဘော ဒီ ဂေ ဒူအီ အီ ကွယ် ခဲင် မိူင် ယေရူဆာလဲမ် တဝ်း၊ ‘ဘေ တူ ဒိုဝ်း ပီ မာနုဝ် အုဝ် ဒီ ဘေ။ ဘေ တူ ဆီ ထူမ် ဂြုဝ်း အုဝ်။’” ဇဝ်ဖြာ ဟဲ့ ကာလာင် ပါယ် တီ။ 14 အာယောနာဒါပ် အီ မုး ဂွန် အာရေခါပ် တွိုန်၊ အန် ဟဲ့ ကာလာင် အုန် ဒီ ဂွန် အန် ဂေ လှုက်လှာန် အန်၊ ကွဲ့ တဲး ဂေ ဒျီင် အိုမ် မာငုန်။ ဂေ မိူဝ် ဟဲ့ ထူမ်၊ ဟဲ့ ဘူင် ဒူပ် ဂြုဝ်း ပီ ကာလာင် ဂုန့် ဒင် ဂေ တီ ကော ဇမ် ဒေါ တီ နီ။ အီ မုး အုဝ်၊ အုဝ် ပီ ဘော ဟဲ့ ကာလာင် ဒီ ဘေ ဆေဆေ မိူဝ်၊ ဘေ ယီ တူ ထူမ် ဂြုဝ်း အုဝ်။ 15 အုဝ် မိူဝ် ဟဲ့ စ်ု ဂေ ဒဲစေန့် အုဝ် အီ မုး ဒူအီ အီ ဘျာန် ဂြုဝ်း ဇဝ်ဖြာ တး ဒူင် ကွယ် ဘေ ဆေဆေ။ အုဝ် ဟဲ့ စ်ု ဂေ ကာလာင် ဒီ ဘေ တဝ်း၊ “တဲး ဘေ ဝး န့တေန့် ပီ ဒူပ် ဘေ။ တဲး ဘေ ဒွန် အီ ဝဲန် ပဲ့ ဟဲ့ ဘူင် ဘေ အီ တူ မွှိုမ်။ တဲး ဘေ ဝီ မ့ပြာယ် ပီ ဘူင် ဘေ၊ ကွဲ့ တဲး ဘေ လှူ ဘော ကြိုပ် ဇဝ် ပီ ကြိုပ် အီ ဟဝ်။ ဆေ ဘေ ဘူင် ဒူပ် ဂြုဝ်း အုဝ် တီ၊ ဘေ ဒီ ပွိုန် ဒီ ကွယ် ခဲင် မိူင် ပဲ့ ဟဲ့ ဒွါ အုဝ် ဒီ ဘေ ဘော ဒီ ဂေ ဂုန့် ဒင် ဘေ။” အုဝ် ပီ ဘော ဟဲ့ တဝ်း ပါယ် တီ မိူဝ်၊ ဘေ ယီ တူ ထူမ် ဂြုဝ်း အုဝ်၊ တူ တဲး န့ လိုပ် ဟျုဝ့် ဘေ။ 16 ဂေ လှုက်လှာန် အာယောနာဒါပ် အီ မုး ဂွန် အာရေခါပ် တွိုန်၊ ဂေ ဟဲ့ ထူမ် ဂြုဝ်း ပီ ကာလာင် ဂုန့် ဒင် ဂေ။ ယီ မုး ဒူအီ ဂေ နီ၊ ဂေ တူ ထူမ် ဂြုဝ်း ပီ ကာလာင် အုဝ် ဒီ ဂေ။

17 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် တဝ်း၊ ‘အုဝ် ဒီ တဲး ဒူအီ မိူင် ယူဒါ ဘော ဒူအီ ခဲင် မိူင် ယေရူဆာလဲမ် ခမ် အာဖေ အာရေ ပဲ့ ဟဲ့ ဒွိုမ် ကာလာင် အုဝ်။ ခုဝ်၊ အုဝ် ဟဲ့ မာနုဝ် ဂေ၊ ဂေ ယီ တူ ထူမ် ဂြုဝ်း အုဝ်။ အုဝ် ဟဲ့ ဒဲ့ ဂေ၊ ဂေ ယီ တူ ဝျီ့ ဂြုဝ်း အုဝ်။’”

18 အာယေရေမီ ဝီ ကာလာင် ဒီ ဒူအီ အာမျုဝ် အာရေခါပ် တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ အန် တဝ်း၊ ‘ဘေ ဟဲ့ ထူမ် ဂြုဝ်း ပီ ဒမ် အုန် ဂုန့် ဒင် ဘေ အီ စိူဝ် အာယောနာဒါပ်။ ဘေ မိူဝ် ဟဲ့ ဘူင် ဒူပ် ပီ ကာလာင် အုန် အန် ဒီ ဘေ။ 19 ကူပ် န့ ပါယ် တီ ခဲင် လှုက်လှာန် အာယောနာဒါပ် အီ မုး ဂွန် အာရေခါပ် တီ၊ န့ ဒီ မိုဝ်း ဒူအီ အီ ပွိုန် ကွယ် ဒီ အာတ့် အုဝ် ဆေဆေ၊ အာဝ် ကာဒတ် ဒေါ မှဝ်။’” ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ ဟဲ့ ကာလာင် ပါယ် တီ။