1 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ။ ဒေါ အန် တီ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ တွိုန်၊ အန် ဟဲ့ ယူင့် ဘော ဂေ ဒါ ဆိုက် အန် အီ မုး ဒူအီ ဒွန် ဇိုဝ် ဒွန် ခြိုဝ် အီ ကွယ် ခဲင် မာန် မိူင် ပီ အိုပ် အန်၊ တဲး ဂေ တး ကာဂုဝ်း ဒီ မိူင် ယေရူဆာလဲမ် ဘော ဒီ မိူင် ဂေ အီ ကွယ် ခူပ် မိူင် ယေရူဆာလဲမ်။ 2 ဇဝ်ဖြာ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင်၊ တဲး မဲ ဟာဝ် ကာလာင် ဒီ အာဇေဒေကီ အီ မုး ခုန်ဒီခမ် အီ အိုပ် မိူင် ယူဒါ။ ဇဝ်ဖြာ တဝ်း၊ အုဝ် ဒီ အာပ် မိူင် နီ ဒီ ခုန်ဒီခမ် အီ အိုပ် မိူင် ဘာဘဲ။ ခုန်ဒီခမ် တီ ဒီ ဘော ဒိုဝ်း ငဝ် ဒုဝ့် ဝဲန် မိူင် နီ။ 3 မဲ မိူဝ် တူ ပွိုန် လွတ် ဒေါ မှဝ်။ ခုန်ဒီခမ် တီ ဒီ ဘော မှေတ့် ဟာဝ် မဲ။ မဲ ဘော လုဝ် ခမ် တဲး အန် အိုပ် မဲ အာခါခ်ု။ မဲ ဒီ ဘော လာယ် ယိုဝ် လာယ် ကာတုန့် ဒီ ခုန်ဒီခမ် တီ၊ ငါယ် ဒုဝ် ငါယ်။ ဘာယ် ဒီ ဘော လာယ် ဂြုဝ်း မူတ့် ဒုဝ် မူတ့်။ ဟဲ့ ဟွတ့်၊ အန် ဒီ ဝီ ဒိုဝ်း ဟာဝ် မဲ ခဲင် မိူင် ဘာဘဲ။

4 အိုယ် အာဇေဒေကီ အီ မုး ခုန်ဒီခမ် မိူင် ယူဒါ၊ တဲး မဲ ထူမ် ကာဒိက် ဆတ်ဇာ ပီ ဒွါ ဇဝ်ဖြာ ဒီ မဲ။ မဲ တူ ကာဒုး ဒီ ယမ် ဒီ မာပွါ့ လာင်။ 5 မဲ ဒီ ဘော ယမ် ဒါခိုယ်၊ ယမ် ဆီချာ။ ဂေ ဒီ ဘော ဒိုဝ်း ဆီနမ် အုး ငှုန် ဒုဝ့် ခူပ် မဲ၊ တဲး န့ ပီ ပီ ဘူင် ဂေ ဒီ ဂုန့် ဒင် မဲ အီ ဟဲ့ ဒွိုမ် အိုပ် အာတ့် မဲ နီ။ ဂေ ဒီ ဘော တဝ်း၊ ‘အိုယ် မဲ ဇဝ်၊ အိုယ် မဲ ဇဝ်။’ ဂေ ဒီ ဘော က့လိုဝ် ဘော ယာမ် အာဒါ မဲ။ အုဝ် ဟဲ့ ကာလာင် အုန် ပါယ် တီ။”

6 ဝါယ် အန် တီ၊ အာယေရေမီ အီ မုး ဒါ အီ ဘျာန် ဂြုဝ်း ဇဝ်ဖြာ၊ အန် ဟဲ့ ကာလာင် ဂြုဝ်း တီ ဒီ ခုန်ဒီခမ် အာဇေဒေကီ ခဲင် မိူင် ယေရူဆာလဲမ်။ 7 ဒေါ အန် တီ ဂေ ဒါ ဆိုက် ခုန်ဒီခမ် အီ အိုပ် မိူင် ဘာဘဲ၊ ဂေ ဟဲ့ ငျာ ရိုပ် မိူင် ယေရူဆာလဲမ် ဘော မိူင် ယူဒါ အီ ဆီ ဂိတ် ဆီ ကွယ်။ န့ ဘော မုး မီ မိူင် လာခိတ် ဘော မိူင် အာစေကာ အီ မုး မိူင် အီ မန် ဆီချာ ခဲင် ကာဒါယ် မိူင် ယူဒါ။

8 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ ဝါယ် ဟဲ့ ဟွတ့် ဒွါ ခုန်ဒီခမ် အာဇေဒေကီ ကာဒိက် ဆတ်ဇာ ဒီ ဂေ ဒူအီ ကိူန် လွင် ဒါရာ အီ တဲး အီ ကွယ် ထင်ဟာင်။ 9 ဂေ ဒူအီ ကိူန် လုဝ် ဘ့လေး ဝိဝ် မှာယ် ဂေ၊ ဘော မုး မှာယ် အီဘိုန့် မှာယ် အီမာယ် အီ မုး ဒူအီ ဟဲဘြဲ၊ အီ ဟဲ့ ဘဲန် မှာယ် ဒူအီ အာယူဒါ အီ မုး အူ မျုဝ် နင်ဂန်။ ဝါယ် အန် တီ ကွဲ့ တဲး န့ မိုဝ်း ဒူအီ အာယူဒါ အီ လာယ် ဘဲန် မှာယ်။ 10 ပါယ် တီ ခဲ့ ကွယ် ဂေ ဒူအီ ဘောကာဂ့လျီတ်၊ ဂေ မိူဝ် ဝီ ဘ့လေး ဝိဝ် မှာယ် ဂေ ဝီ မှဝ် ဝီ အန်။ ဝါယ် အန် တီ ဂေ မိူဝ် အာဝ် ဟူ ဝီ ဒိုဝ်း တဲး ဂေ ဘဲန် မှာယ် ပေါ အူ ဇေန့်။ ဂေ ဒွန် အီ ဟဲ့ ဘ့လေး ဝိဝ် မှာယ် ဂေ။ 11 မာလဲ၊ ဝါယ် အန် တီ ဂေ ပဲ့ ဟဲ့ ဝီ ဘျွင် နဝ်း ဂေ။ ဂေ ပီ ဝီ ဒဲ့ တး မှာယ် ဂေ ဘော အီဘိုန့် ဘော အီမာယ်၊ တဲး ဂေ ဝီ တး ဘဲန် မှာယ် ပေါ အူ ဇေန့်။

12 ပါယ် တီ ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ တဝ်း၊ 13 “ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ ဟဲ့ ကာလာင် ပါယ် နီ။ အုဝ် ဟဲ့ ဒွါ ကာဒိက် ဆတ်ဇာ ဒီ ဂေ ဂုန့် ဒင် ဘေ ဒေါ လေး ဂေ ခဲင် မိူင် အဲဂိုပ် အီ မုး ဒူင် ဟဲ့ ဒွိုမ် ဘဲန် ဂေ မှာယ် အီ ဟဝ်။ 14 အုဝ် ဟဲ့ တဝ်း ဒီ ဂေ၊ ‘ဆေ ဟီ နုဝ့် ဘူ ဆီနမ်၊ ဘေ လုဝ် ဘ့လေး ဝိဝ် မှာယ် ဘေ အီ မုး ဒူအီ ဟဲဘြဲ နင်ဂန်။ ဘော မုး ဒူအီ ပီ စိုဝ်း ဘေ တဲး န့ ဘဲန် မှာယ် ဘေ ဝါယ် ဟဲ့ ဟွတ့် ဘူင် ဂေ ဂါန် ဘေ အာဒါ ဒဝ် ဆီနမ်။ ဘေ လုဝ် ဘ့လေး ဝိဝ် ဂေ ဝီ မှဝ် ဝီ အန်။’ အုဝ် ပီ ဘော ဟဲ့ တဝ်း ပါယ် တီ မိူဝ်၊ ဂေ ဂုန့် ဒင် ဘေ ယီ တူ ထူမ် ဂြုဝ်း အုဝ်၊ တူ တဲး န့ လိုပ် ဟျုဝ့် ဂေ။ 15 ဒေါ ဟဲ့ ပွုန် တး ညှမ် လှေန့်၊ ဘေ ဟဲ့ ကာပ့လု နဝ်း ဘေ၊ ဟဲ့ ဘူင် အီ လဝ့် နဝ်း အုဝ်။ ဘေ ဘောကာဂ့လျီတ် ဟဲ့ ဘ့လေး ဝိဝ် မှာယ် အီ မုး ဒူအီ ဟဲဘြဲ ဝီ မှဝ် ဝီ အန်။ ဘေ မိူဝ် ဟဲ့ ဒွါ ကာဒိက် ဆတ်ဇာ၊ ဟဲ့ ကာဆဲန့် ဒီ အာတ့် အုဝ် ခဲင် ကာင် ဒူင် ကြိုပ် ဘေ ဒီ အုဝ်။ 16 မာလဲ၊ ဘေ ပဲ့ ဟဲ့ ဝီ ဘျွင် နဝ်း ဘေ ပေါ အူ ဇေန့်။ ဘေ ဟဲ့ ဘူင် ကွဲ့ တဲး အီ ရုဝ်ဆေ အုဝ်။ ဘေ ပီ ဝီ ဒဲ့ တး မှာယ် ဘော အီဘိုန့် ဘော အီမာယ် ဘောကာဂ့လျီတ်၊ တဲး ဂေ ဝီ တး ဘဲန် မှာယ် ဘေ။

17 ကူပ် န့ ပါယ် တီ ဇဝ်ဖြာ တဝ်း၊ ဘေ တူ ထူမ် ဂြုဝ်း အုဝ်။ ဘေ မိူဝ် တူ ခမ် ဒီ ဘ့လေး ဝိဝ် ဘီနွင် ဝေါဝဲ ဘေ ဘော ဂေ အီ ကွယ် ကာတတ် ဘေ၊ တဲး ဂေ ပွိုန် ဒီ ကွယ် ထင်ဟာင်။ ခုဝ်၊ ဇဝ်ဖြာ ဝီ တဝ်း၊ ဘ်ု ဘေ ယွတ်၊ အုဝ် ဟဲ့ ဟွတ့် ဆုင်ဖျာတ် ဒီ တဲး ဘေ ခမ် ဒုက် ဒီ မာပွါ့ လာင် ဘော အေတ့် ပီ ဒီ ဟူမ် ဘော ခမ် ဆဝ် ရောဂါ။ လွင် ပီ ဒီ ဘူင် အုဝ် ဒီ ဘေ တီ၊ န့ ဒီ တဲး ဒူအီ ဒွန် မျုဝ် အီ ကွယ် ဒဲင် ကာဒါယ် နီ ကာပိုန့် ယုဝ် ဒီယုး ဒီယေန့်။ 18 ဂေ အီမာယ် အီ တူ ဒူပ် ပီ ကာဆဲန့် ဂေ ဘော တူ ခမ် ကာဒိက် ဆတ်ဇာ ပဲ့ ဟဲ့ ဒွါ ဂေ၊ ဂေ ဟဲ့ ပီ ဂွန် မာမက် ပဲ့ ဟဲ့ ကာဒဲပ် အီ ဘဲန် အာ ပွတ်၊ ဝီ ဟာဝ် ဒီ ကာတဲ အန်။ 19 ဂေ ဒါ တာင် အီ အိုပ် မိူင် ယူဒါ ဘော မိူင် ယေရူဆာလဲမ်၊ ဂေ ဒါ အီ လှူ ဒီ ဇဝ်ဖြာ ဘော ဒူအီ ရဝ် ဒူအီ ကာင်၊ ဂေ အီ ဟဲ့ ဝဝ့် ဟာဝ် ဒီ ကာတဲ ဂွန် မာမက် ပဲ့ ဟဲ့ ကာဒဲပ် ဂေ ဘဲန် အာ ပွတ်၊ ဂေ ဟဲ့ ဟွတ့် ဒွါ ကာဒိက် ဆတ်ဇာ ဒီ အုဝ်။ မာလဲ၊ ဂေ ယီ တူ ဘူင် ဒူပ် ဂြုဝ်း ပီ ကာလာင် ပီ ကာဆဲန့် ဂေ ဒီ အုဝ် တီ။ ခုဝ်၊ အုဝ် ဒီ ဝီ ဘူင် ဒီ ဂေ၊ တဲး န့ ပီ ပီ ဘူင် ဂေ ဒီ ဂွန် မက် တီ။ 20 ပါယ် တီ အုဝ် ဒီ ဝီ အာပ် ဂေ ဒီ ရန်ဆူ ဂေ ဘော ဒီ ဒူအီ အီ ဟြေတ့် ဒီ ငဝ်း ယမ် ဂေ။ ဒုဝ် ယမ် ဂေ တီ ဒီ ဝီ ဘဲန် ပီ ဒီ ဟူမ် မာဆိမ် အီ ကွယ် ခဲင် ဂါင်ဟြာဝ် ဘော မာဒုဝ် ပြဲ ဟာယ်။

21 အာဇေဒေကီ အီ မုး ခုန်ဒီခမ် အီ အိုပ် မိူင် ယူဒါ ဘော ဂေ အာမူ အာမာတ် အန် အုဝ် ဒီ အာပ် ဒီ ရန်ဆူ ဂေ။ အုဝ် ဒီ အာပ် ဂေ ဒီ ဒူအီ အီ ဟြေတ့် ဒီ ငဝ်း ယမ် ဂေ ဘော ဒီ ဒါ ဆိုက် ခုန်ဒီခမ် မိူင် ဘာဘဲ အီ ဟဲ့ တး ဒူင် ကွယ် ဘေ။ 22 အုဝ် ဒီ ဝီ စ်ု ဂေ တီ ဝီ တး ဒီ မိူင် နီ၊ တဲး ဂေ ဝီ တး ကာဂုဝ်း ဒီ မိူင် နီ၊ တဲး ဂေ ကော ပွိုန်။ ဟဲ့ ဟွတ့်၊ ဂေ ဒီ ဘော ဝီ ဒိုဝ်း ငဝ်၊ ဒုဝ့် ဝဲန် မိူင် နီ။ အုဝ် ဒီ ဘူင် ခဲင် မာန် မိူင် ယူဒါ တဲး န့ ကော လိုဝ် ရာမ် တူတ့်၊ ကွဲ့ တဲး န့ ဆီ မိုဝ်း ဒူအီ အီ ကွယ်။” ဇဝ်ဖြာ ဟဲ့ ကာလာင် ပါယ် တီ။