1 ဇဝ်ဖြာ ဝီ ကာလာင် ဂြုဝ်း ဒီ အာယေရေမီ ပေါ အူ ဇေန့်။ ဒေါ အန် တီ၊ အန် ဆီ ကွယ် ခဲင် ကာပိုမ် ဒါ ဆိုက် အီ ဘ်ု ဟုဝ် ခုန်ဒီခမ်။ ဇဝ်ဖြာ တဝ်း၊ 2 “ဇဝ်ဖြာ အီ ဟဲ့ ဖာန် ဘ့လေး ကာဒါယ် အီ ဟဲ့ ဘူင် တဲး န့ ဘဲန် တူတ့် ဒွန် မျုဝ်၊ အန် တဲး အီ ဒဲ့ အန် စိူဝ် ဇဝ်ဖြာ။ ဇဝ်ဖြာ တီ ဟဲ့ တဝ်း၊ 3 တဲး မဲ ဒဲ့ အုဝ်။ အုဝ် မိူဝ် ဒီ အိုဝ် ဂြုဝ်း မဲ။ အုဝ် ဒီ တဲး မဲ ယိုဝ် အီ အာရေ တာင် ကာဆဝ် ဘော အာမျုဝ် ပီ တူ ဒွိုမ် ယိုဝ် ပီ တူ ဒွိုမ် နပ် မဲ။” 4 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ဝီ ကာလာင် တဝ်း၊ “ဟုဝ် ခုန်ဒီခမ် အီ အိုပ် မိူင် ယူဒါ အီ ဟဲ့ လိုဝ် ကာပျာတ့်။ ဂေ ဒူအီ ဘာဘဲ ဘော ဒိုဝ်း ကာင် ကာပျာတ့် တီ၊ ဘဲန် ဘ့လဝ့် န့တဲင် ဘော တာ မာပွါ့ လာင် ဂေ။ 5 ဂေ ဟဲ့ တး တဲး ဂေ ပွိုန် ဒီ ကာဂုဝ်း ဒီ ဒူအီ ဘာဘဲ။ မာလဲ၊ န့ ယီ မိုဝ်း မီ ဒူအီ ပဲ့ ဟဲ့ တဲး အုဝ် ဂေ ယမ် ကူပ် ဟဲ့ ရူ ဟဲ့ စာဝ် ကာဆဝ် အုဝ် ဒီ ဂေ။ ခုဝ်၊ အုဝ် ဟဲ့ ဝဲန် မိူင် နီ။ န့ မုး ကူပ် ဟဲ့ ဘူင် ဂေ ဘောကာဂ့လျီတ် အီ တူ မွှိုမ်။

6 မာလဲ၊ အုဝ် ယီ ဒီ ဝီ တဲး ဂေ ပွိုန် ဒီ ကွယ် ဒါခိုယ်၊ ကွယ် ဂတ် ဂျီတ်၊ တဲး န့ ပီ ဒူအီ အီ မိုဝ်း ဆဝ် ဟဲ့ ဝီ ကဲန်၊ ဝီ ဟြာယ်။ အုဝ် ဒီ တဲး ဂေ ယိုဝ် နာ ဘွတ် နာ မွှိုမ် ဘော တဲး ဂေ ကွယ် ဆီချာ ဆေဆေ။ 7 အုဝ် ဒီ ဝီ ဘူင် တဲး မိူင် ယူဒါ ဘော မိူင် အီဆာရေလ ဝီ ဘဲန် ဒူင် ဘွတ် ဒူင် မွှိုမ်။ အုဝ် ဒီ ဝီ မ့ပြာယ် မိူင် ဂေ တဲး န့ ဝီ ပီ ဘြိမ်၊ ပီ အာတ့် နီ။ 8 အုဝ် ဒီ ဝီ ဂဝ်း ဝဲန် မှာပ် ပဲ့ ဟဲ့ လုတ့် ဂေ ဒီ အုဝ်။ အုဝ် မိူဝ် ဒီ ဘ့လွာ့ ဝဲန် ပဲ့ ဟဲ့ ကာလိုပ် ပဲ့ ဟဲ့ လှိုဝ် ဂေ ဒါရာ အုဝ်။ 9 မိူင် နီ၊ န့ ဒီ ဝီ ဘဲန် အီ တဲး အုဝ် ဘျုဝ် ဒါခိုယ်၊ တဲး အီ ဟဝ် အိူပ် မျုက် အုဝ်၊ တဲး ဆာရေ အုဝ် လိုဝ်း ဒီ ဒူအီ ဒွန် မျုဝ် အီ ကွယ် ဒဲင် ကာဒါယ် နီ။ ဂေ အီ ဟဲ့ ယိုဝ် လွင် ပီ ဂေဇူ အုဝ် ဘော လွင် ပီ ဘူင် အုဝ် ဒီ ဂေ ဘော လွင် နာ ဘွတ် နာ မွှိုမ် ဒွန် မျုဝ် ဘော လွင် ကွယ် ဒါခိုယ် ဂျာမ်ဆာ ဂေ ဘော လွင် ပဲ့ ဟဲ့ ယွတ် လိုမ်လာ အုဝ် မိူင် နီ၊ ဒူအီ ဂေ တီ ဒီ ဘော ယုဝ် ဒီယုး ဒီယေန့် ကူပ် ဒွန် မျုဝ် ပီ ဒီ ဒွါ အုဝ် ဒီ ဂေ။”

10 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ဒူင် နီ ဘေ နပ် ဒီ တဝ်း၊ ‘ဟဲ့ ဘဲန် တူတ့် ဒူင် လိုဝ် ဒူင် ရာမ်၊ အာဝ် မိုဝ်း ဒူအီ ဂေ ဒုဝ် ဆတ်ဒါဝါ အီ ကွယ်။’ ဟဲ့ မှာန်၊ မိူင် ယူဒါ ဘော ဒူပ် န့တေန့် ခဲင် မိူင် ယေရူဆာလဲမ် ဟဲ့ ဘဲန် တူတ့် ဒူင် ဘ့လဝ် ဒူင် ရာမ်၊ အာဝ် မိုဝ်း ဒူအီ ဂေ ဒုဝ် ဆတ်ဒါဝါ အီ ကွယ်။ 11 မာလဲ၊ ဝါယ် နီ ကာဆိူဝ် တီ ဒီ ဝီ မိုဝ်း ဂြုဝ်း အီ ဘျုဝ် ဒါခိုယ်။ ဂြုဝ်း အီ ခူယ် အီ ကျဝ်။ န့ ဒီ မိုဝ်း ဘော ဂြုဝ်း ကာညူမ် အီ ဒီ ခတ် ဘော ဂြုဝ်း ဒီဘျာ အီ ဒီ ခတ် ဘော ဂြုဝ်း ဂေ အီ ဟဲ့ တး ခဲင် ဟုဝ် ဇဝ်ဖြာ၊ ဂူင့် ပီ ဒီ လှူ အီ ဒါင် ဂုင် ဂေဇူ ဒီ ဇဝ်ဖြာ။ ဂေ မိူဝ် ဒီ တဝ်း၊ ‘တဲး အေ အိူပ် ဇဝ်ဖြာ အီ အိုပ် တူတ့် ဒွန် မျုဝ် အန် ဇဝ် ဟဲ့ ဘွတ် မျာတ် ကာဆဝ်၊ ဘော နဝ်း ရွက့် အန် ဇဝ် ဘော ကွယ် ဆေဆေ၊ အာဝ် ဘျွင် ဒေါ မှဝ်။’ န့ ဒီ ဘဲန် ပါယ် တီ ခုဝ်၊ အုဝ် ဒီ ဝီ ဘူင်၊ ဝီ မ့ပြာယ် မိူင် နီ၊ တဲး န့ ဝီ ဆီချာ ဝီ မွှိုမ် ပီ ဘြိမ်။” ဇဝ်ဖြာ ဟဲ့ ကာလာင် ပါယ် တီ။

12 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဒူင် ဟဲ့ ဘ့လဝ် ဟဲ့ ရာမ်၊ ဒူင် တူ မိုဝ်း ဒူအီ ဂေ ဒုဝ် ဆတ်ဒါဝါ ဘော ခဲင် မိူင် ဂေ တီ၊ န့ ဒီ ဝီ မိုဝ်း ဒါ အီ တး ဟျီင် မာဘူ။ န့ ဒီ ဘော ဝီ မိုဝ်း ပေတ့်၊ တဲး ဖိုင် မာဘူ ပွိုန် ဒီ ဟူမ် ဘော အိတ် ဒါခိုယ်။ 13 မိူင် အီ ကွယ် ဒဲင် နွန် ဘော မိူင် အီ ကွယ် ခဲင် ဂ့လင်၊ မိူင် အီ ကွယ် ဘ့လာက် နာ ဂေတ့် ဆီငဲ ဘော မိူင် အာဘေန်ယာမ် အီ ကွယ် ရူပ် မိူင် ယေရူဆာလဲမ် ဘော မိူင် အီ ကွယ် ခဲင် ကာဒါယ် မိူင် ယူဒါ၊ ခဲ့ ကွယ် မာဘူ ဘော ဒွန် ပ့လုဝ့် တီ၊ ဂေ ဝီ လုဝ် တး ကာလုဝ်း ဒါ အီ တိး ဂေ။” ဇဝ်ဖြာ ဟဲ့ ကာလာင် ပါယ် တီ။

14 ဇဝ်ဖြာ ပီ ဝီ တဝ်း၊ “န့ ဒီ ဘော ဇမ် ဆီငဲ ပန် ဒီ ဝီ ဂေဇူ အုဝ် ဒူအီ အီဆာရေလ ဘော ဒူအီ အာယူဒါ၊ တဲး န့ ဘော ဒူပ် ကာဒိက် ဆတ်ဇာ ပဲ့ ဟဲ့ ဒွိုမ် ဒွါ အုဝ် ဒီ ဂုန့် ဒင် ဂေ။

15 အာခြာဝ် ဒေါ အန် တီ အုဝ် ဒီ တဲး ဝီ အီ မိုဝ်း နဝ်း ဆိူဝ် နဝ်း မှာန် ဂွိုတ် တး ခဲင် လှုက်လှာန် ခုန်ဒီခမ် အာဒါဝိတ်။ အန် ဒီ ဘော ဆုင်ဖျာတ် ဒူပ် ဒါရာ ဆိူဝ် ဆိူဝ် မှာန် မှာန် ဒဲင် ကာဒါယ် နီ။

16 အာခြာဝ် ဒေါ အန် တီ န့ ဒီ မိုဝ်း အီ ချွတ် ဂေ ဒူအီ ခဲင် မိူင် ယူဒါ။ မိူင် ယေရူဆာလဲမ် ဒီ ဘော ဝီ ယေန် ဒါခိုယ်။ ပီ စိူဝ် အန် ဇဝ် တီ ဂေ ဘော တဝ်း၊ ‘ဇဝ်ဖြာ အီ တဲး အေ မိုဝ်း နဝ်း ဆိူဝ် နဝ်း မှာန်။’

17 ဇဝ်ဖြာ ဟဲ့ ဟွတ့် ဒွိုမ် ကာလာင်၊ ခဲင် လှုက်လှာန် ခုန်ဒီခမ် အာဒါဝိတ် န့ ဒီ မိုဝ်း ခုန်ဒီခမ် အီ အိုပ် မိူင် အီဆာရေလ ဆေဆေ၊ န့ တူ ကာဒတ် ဒေါ မှဝ်။ 18 ဂေ ဒါ အီ လှူ ဒီ ဇဝ်ဖြာ အီ မုး ခြိုဝ် အာလေဝီ အီ လုဝ် လှူ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ်။ န့ ဒီ မိုဝ်း ဒူအီ အီ လှူ ပါယ် တီ ဆေဆေ။”

19 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ တဝ်း၊ 20 “အုဝ် ဟဲ့ တဝ်း၊ အုဝ် ဟဲ့ ဒွါ ကာဒိက် ဆတ်ဇာ ဒီ ဆီငဲ ဘော ခဲင် မှိုဝ်၊ တဲး န့ ဒူပ် အာခြာဝ် အန်။ ကာဒိက် ဆတ်ဇာ တီ၊ အာဝ် မိုဝ်း အာဆေ အီ ပွိုန် ပျာတ့် ဒေါ မှဝ်။ 21 ကာဒိက် ဆတ်ဇာ ပီ ဒွါ အုဝ် ဒီ ဒဲစေန့် အုဝ် အီ စိူဝ် အာဒါဝိတ် မိူဝ်၊ န့ ဘော ပါယ် တီ။ ဒူအီ ခဲင် ခြိုဝ် အန် ဒီ ဘော ဘဲန် ခုန်ဒီခမ် ဆေဆေ။ ဒီ ဒါ အီ လှူ ဒီ ဇဝ်ဖြာ အီ မုး ခြိုဝ် အာလေဝီ အီ လုဝ် ဘူင် ဂါန် အုဝ် ဆေဆေ မိူဝ်၊ အုဝ် ဟဲ့ ဒွါ ကာဒိက် ဆတ်ဇာ ပါယ် တီ။ အာဝ် မိုဝ်း အာဆေ အီ ပွိုန် ပျာတ့် ဝဲန် ဒေါ မှဝ်။ 22 လှုက်လှာန် အာဒါဝိတ် အီ မုး ဒဲစေန့် အုဝ် ဘော ခြိုဝ် အာမျုဝ် အာလေဝီ အီ ဘူင် ဂါန် အုဝ်၊ အုဝ် ဒီ တဲး ဂေ ကိူန်၊ တဲး န့ ကော ပီ ဆီမန့် အီ ကွယ် ခဲင် ဂါင်ဟြာဝ်၊ ကွဲ့ တဲး ဆီ နပ် ဒီ တိး ဒေါ မှဝ်။ အုဝ် ဒီ ဘော တဲး ဂေ ကိူန်၊ တဲး န့ ကော ပီ ကာဟာတ့် အီ ကွယ် ခူပ် အိုမ် နမ်မုက်ဆာရာ အီ တူ ပွိုန် ဂဝ် ဒီ ယွတ်။”

23 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ တဝ်း၊ 24 “မဲ ပီ တူ ကာဖာ၊ ဒူအီ ဂေ နီ ဂေ ဘော နပ် ဒီ တဝ်း၊ ‘ဒူအီ အာမျုဝ် ပဲ့ ဟဲ့ ရဝ်း ဇဝ်ဖြာ၊ အီ မုး ဒူအီ အီဆာရေလ ဘော ဒူအီ အာယူဒါ၊ အန် ဇဝ် ဟဲ့ ဟွတ့် ဝဲန်။’ ဒူအီ ဂေ တီ ဟဲ့ လုက်တာယ် ဒူအီ ပီ အိုပ် အုဝ်။ ဂေ တူ မာတ် ဂေ မုး ဒူအီ ပီ အိုပ် အုဝ်။ 25 ဇဝ်ဖြာ ဟဲ့ ဟွတ့် ကာလာင်၊ ဆေ ကာဒိက် ဆတ်ဇာ ပီ ဒွါ အုဝ် ဒီ ဆီငဲ ဂါယ် ခဲင် မှိုဝ် တီ အာဝ် ဟူ မိုဝ်း၊ ဆေ အုဝ် မိူဝ် အာဝ် ဟူ တဲး ဂါင်ဟြာဝ် ဂေ ကာဒါယ် ဒူပ် ဒါရာ အုဝ် ဆေဆေ၊ 26 အုဝ် မိူဝ် ကော ဒီ ဝဲန် ဒူအီ အာမျုဝ် ခြိုဝ် အာကူပ် ဘော လှုက်လှာန် ဒဲစေန့် အုဝ် အီ စိူဝ် အာဒါဝိတ်။ အုဝ် မိူဝ် တူ ရဝ်း တဲး န့ မိုဝ်း ခုန်ဒီခမ် ခဲင် လှုက်လှာန် အာဒါဝိတ်၊ တဲး အန် အိုပ် လှုက်လှာန် အာဘြာဟမ်၊ လှုက်လှာန် အာဆဲက် ဘော လှုက်လှာန် အာကူပ်။ ကူပ် န့ ပါယ် တီ အုဝ် ဒီ ဝီ ဒိုဝ်း တး ဂေ ဒူအီ ပဲ့ ဟဲ့ မှေတ့် ဟာဝ် အီ ဟဝ်။ အုဝ် ဒီ ဝီ ကာဝေ ဂေ ဘော ဂေဇူ ဂေ။”