1 ဇဝ်ဖြာ ဝီ ကာလာင် ဂြုဝ်း ဒီ အာယေရေမီ ဒေါ ဟဲ့ အိုပ် ခုန်ဒီခမ် အာဇေဒေကီ မိူင် ယူဒါ အာဒါ ဂိုဝ် ဆီနမ်။ ခုန်ဒီခမ် အာနေဘူခတ်နေစာ မိူဝ် ဟဲ့ အိုပ် မိူင် ဘာဘဲ အာဒါ ဂိုဝ် ဒီ ဒါ ဆီနမ်။ 2 ဒေါ အန် တီ ဂေ ဒါ အီ အိုပ် ဒါ ဆိုက် ခုန်ဒီခမ် မိူင် ဘာဘဲ၊ ဂေ ဟဲ့ တး ဝဲင် ရူပ် မိူင် ယေရူဆာလဲမ်။ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ၊ ဂေ ဟဲ့ မှေတ့် ခြွင့် အန် ခဲင် ကာပိုမ် ဒူင် ကွယ် ဟုဝ် ခုန်ဒီခမ် မိူင် ယူဒါ တွိုန်။

3 ခုန်ဒီခမ် အာဇေဒေကီ အီ အိုပ် မိူင် ယူဒါ ဟဲ့ မှေတ့် ခြွင့် အာယေရေမီ ခဲင် ကာပိုမ် ဘော ကာလာင် ဒီ အန် တဝ်း၊ “မဲ မုး ဒူအီ ဘျာန် ဂြုဝ်း ဇဝ်ဖြာ။ မဲ ဟဲ့ တဝ်း၊ ဇဝ်ဖြာ ဟဲ့ ကာလာင် ဒီ မဲ ပါယ် နီ၊ ‘အုဝ် ဒီ ဒိုဝ်း မိူင် နီ၊ ဝီ အာပ် ဒီ ခုန်ဒီခမ် အီ အိုပ် မိူင် ဘာဘဲ။ အန် ဒီ ဘော တး အိုပ် မိူင် နီ။ 4 ခုန်ဒီခမ် အာဇေဒေကီ အီ အိုပ် မိူင် ယူဒါ အန် တူ ပဲ ဒီ လွတ် ဒေါ မှဝ်။ ခုန်ဒီခမ် အီ အိုပ် မိူင် ဘာဘဲ မိူဝ် ဒီ ဘော အိုပ် အန် အာခါခ်ု။ ခုန်ဒီခမ် ဂါယ် အာ ကာဒင် တီ ဂါယ် ဒီ ဘော လာယ် ဂြုဝ်း မူတ့် ဒုဝ် မူတ့်၊ နာ ဒုဝ် နာ။ 5 ဟဲ့ ဟွတ့်၊ အန် ဒီ ဘော ဒိုဝ်း ဟာဝ် ခုန်ဒီခမ် အာဇေဒေကီ ခဲင် မိူင် ဘာဘဲ။ ခုန်ဒီခမ် အာဇေဒေကီ ဒီ ဘော ကွယ် ဒီ တီ၊ တဲး န့ ကော ဝီ ဇမ် ပန် ဒီ ဝီ တး ယွတ် တး ငွိုပ် အုဝ် ဒီ အန်။ ဘေ ပီ ဘော ကာဂုဝ်း ဒီ ဂေ ဒူအီ ဘာဘဲ မိူဝ်၊ ဘေ တူ နပ် ဒီ ပဲ ဂေ ဒေါ မှဝ်။’ မှဝ် န့ ပါယ် ပီ တဝ်း မဲ ပါယ် တီ။း”

6 အာယေရေမီ မိူဝ် ဝီ တဝ်း၊ “ဇဝ်ဖြာ ဟဲ့ ကာလာင် ဒီ အုဝ် ပါယ် နီ။ 7 ‘အာဟာနာမီလာ အီ မုး ဂွန် အာဆာလူမ် အီ မုး ဂွန် ဂုန့် တဲ့ မဲ၊ အန် ဒီ ဘော တး ဒူင် ကွယ် မဲ ဘော ကာလာင် ဒီ မဲ တဝ်း၊ တဲး မဲ စိုဝ်း ဒူင် နာ အုဝ် အီ ကွယ် ဒီ မိူင် အာနာထူတ်။ ခုဝ်၊ န့ မုး မဲ ဝီ အီ ဟဲ့ ကာအာပ် စိုဝ်း၊ ကာအာပ် ဝီ ထုတ် ဝိဝ်။’”

8 အာဟာနာမီလာ အီ မုး ဂွန် ဂုန့် တဲ့ အုဝ် တီ၊ အန် ဟဲ့ တး ဒူင် ကွယ် အုဝ် ခဲင် ဝဲင် ကာပိုမ်။ န့ ဟဲ့ ဒူပ် ခဲ့ ပီ ကာလာင် အုန် ဇဝ်ဖြာ။ အာဟာနာမီလာ ဟဲ့ ကာလာင် ဒီ အုဝ် တဝ်း၊ ‘မှာန့်၊ တဲး မဲ စိုဝ်း ဒူင် နာ အုဝ် အီ ကွယ် ခဲင် မိူင် ဒူအီ အာဘေန်ယာမ် တွိုန်။ န့ ဟဲ့ မုး မဲ ဝီ အီ ဟဲ့ ကာအာပ် စိုဝ်း၊ ဟဲ့ ကာအာပ် ဝီ ထုတ် ဝိဝ်၊ တဲး န့ ဘဲန် ခါဂုန် ဒီ မဲ။’ ဒေါ အန် တီ အုဝ် မိူဝ် ဟဲ့ နပ် ဂြုဝ်း တီ ဟဲ့ မုး ဂြုဝ်း ဇဝ်ဖြာ။ 9 အုဝ် မိူဝ် စိုဝ်း ဒူင် နာ အာဟာနာမီလာ အီ မုး ဂွန် ဂုန့် တဲ့ အုဝ် အီ ကွယ် ဒီ မိူင် အာနာထူတ် တီ။ အုဝ် မိူဝ် ဆ ဒွါ ရွိုန် ဒီ အန် ဂိုဝ် ဒီ ဘူ ဘူင့်။ 10 အုဝ် ဟဲ့ ဒဲမ် ပဲ့ လွင် လာယ် ကာစိုဝ်း ကာယွင့် တီ။ အုဝ် မိူဝ် ဟဲ့ ဟပ် စိူဝ် အုဝ် ဘော ဒွက် ဇိုမ်၊ ဟဲ့ ဒဲ့ တဲး န့ မိုဝ်း ဘော ဆက်ဆေ အန်။ ဟဲ့ ဟွတ့်၊ အုဝ် ဘော ဝီ ဒိုဝ်း ညွယ်၊ ဆ ရွိုန်၊ ဒွါ ဒီ အန်။ 11 အုဝ် ဝီ ဒိုဝ်း ပဲ့ လွင် လာယ် ကာစိုဝ်း ကာယွင့် အီ ဟဲ့ ပိတ် ကာနူမာ၊ ဟဲ့ ဟွတ့် ဒွက် ဘော ဇိုမ် ဒီ အူ ဖိူန် ဘော ဒဲမ် ပဲ့ အူ ဖိူန် အီ တူ မိုဝ်း ဇိုမ်။ 12 အုဝ် ဝီ ဒိုဝ်း ပဲ့ အာ ဖိူန် တီ၊ ဝီ အာပ် ဒီ အာဘာရုက် အီ မုး ဂွန် အာနေရီ အီ မုး ဂွန် အာမာဟာဆာယာ။ အုဝ် ဒွါ ဘော ဒီ အာဟာနာမီလာ အီ မုး ဂွန် ဂုန့် တဲ့ အုဝ် တွိုန်၊ အုဝ် ဟဲ့ ဘူင် ပါယ် တီ တဲး ဘော ဂေ အီ ဟဲ့ ဘဲန် ဆက်ဆေ ယိုဝ်။ ဂေ မိူဝ် ဟဲ့ ပိတ် ကာနူ ဂေ ခဲင် ပဲ့ လာယ် ကာစိုဝ်း ကာယွင့် တီ။ ဂေ ဒူအီ အာယူဒါ ဘောကာဂ့လျီတ် အီ ကွယ် ခဲင် ဝဲင် ကာပိုမ် တီ ဟဲ့ ဘဲန် ဆက်ဆေ ဒူပ်။

13 အုဝ် မိူဝ် ဟဲ့ ကာလာင် ဒီ အာဘာရုက် တဲး ဒူအီ ဂေ တီ ဘောကာဂ့လျီတ် ထူမ်။ 14 အုဝ် ဟဲ့ တဝ်း၊ “ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ တဝ်း၊ ‘ဒိုဝ်း ပဲ့ လာယ် ကာစိုဝ်း ကာယွင့် ဖိူန် အီ ဟဲ့ ဒွက် ဇိုမ် တွိုန် ဘော ပဲ့ ဖိူန် အီ တူ ဒွက် ဇိုမ် အီ ဟဲ့ ဟွတ့် ဝိုဝ်း၊ ဝီ ဟပ် အုန် ခဲင် ကာလုဝ့် ကာဒါယ်၊ အုန် တဲး န့ ကွယ် လှေန့် လှေန့်။’ 15 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ တဝ်း၊ န့ ဒီ မိုဝ်း ဂေ အီ ဒီ စိုဝ်း ကာင်၊ စိုဝ်း ဒူင် နာ ဂေ မာန် ဘ့လေ မာငုန် ခဲင် မိူင် နီ။”

16 အုဝ် ဟဲ့ ဟွတ့် အာပ် ဒွါ ပဲ့ လာယ် ကာစိုဝ်း ကာယွင့် ဒီ အာဘာရုက် အီ မုး ဂွန် အာနေရီ တီ၊ အုဝ် ဘော ဝီ ဆာခိုဝ် ဒီ ဇဝ်ဖြာ တဝ်း၊

17 “အိုယ် မဲ ဇဝ်ဖြာ၊ မဲ ဘူင် ဆေဆေ ခဲ့ ပီ လဝ့် နဝ်း မဲ။ ပွုန် မဲ ဇဝ် ဟဲ့ ဘူင် တဲး န့ မိုဝ်း ဂါင်ဟြာဝ် ဘော ကာဒါယ်။ န့ တူ မိုဝ်း ခေါ အူ မျုဝ် ပီ တူ ပွိုန် ဘူင် မဲ ဇဝ်။ 18 မဲ ဇဝ်ဖြာ ဟဲ့ ဂေဇူ ဒူအီ ဘဲန် ဟြဲန့် ဘဲန် မှိုန့်။ မာလဲ၊ မဲ ဇဝ် ယီ ဝီ တဲး လှုက်လှာန် ဂေ ခမ် မှာပ် ပီ ဘူင် ဂုန့် မာ ဂေ။ မဲ ဇဝ် ဘော မုး ဇဝ်ဖြာ အီ ဟဲ့ ဘွတ် မျာတ် ကာဆဝ် ဘော မိုဝ်း အာဖုင် ဒင်ခုဝ် အီ ဟဲ့ ဇေ့ဇုင်။ ခုဝ်၊ ဂေ တဲး မဲ စိူဝ် ဇဝ်ဖြာ အီ အိုပ် တူတ့် ဒွန် မျုဝ်။ 19 အာကျာမ် အာငျာန် မဲ ဇဝ် မိူဝ်၊ ဟဲ့ ကိူန် ကာဆဝ် ဘော မွှိုမ် ကာဆဝ်။ ပဲ့ ဟဲ့ ဆုင်ဖျာတ် မဲ ဇဝ် ဘော ပီ ဘူင် မဲ မိူဝ် ဟဲ့ အာရေ တာင် ကာဆဝ်။ မဲ ဇဝ် မိူဝ် ဟဲ့ နပ် ဟဲ့ ယိုဝ် တူတ့် ဒွန် မျုဝ် ပီ ခြာမ် ဒူအီ ဒီ ဘူင်။ မဲ ဇဝ် မိူဝ် ဝီ ဒွါ ရုး အန် ဒီ ဂေ၊ ဒူပ် ပီ ဘူင် ဂေ တီ။ 20 မဲ ဇဝ် မိူဝ် ဟဲ့ ဘူင် ဘျ အီ မွှိုမ် အာမ် ကာဆဝ် ခဲင် မိူင် အဲဂိုပ် ဘော ကာတဲ ဂေ ဒူအီ အီဆာရေလ၊ ဘော ဒီ ဒူအီ ဒွန် မျုဝ် ကော ဇမ် ဒေါ တီ နီ။ လွင် မဲ ဇဝ် မိူဝ် ဟဲ့ လိုဝ်း ဆီချာ ဆေဆေ ပီ ဒေါ တီ နီ နီ။ 21 မဲ ဇဝ် ဟဲ့ ဘူင် အီ မွှိုမ် အာမ် ကာဆဝ်။ န့ ဟဲ့ ပီ မဲ ဇဝ် ဟဲ့ တာ ဒဲ မဲ အီ ဟဲ့ ဟဲန့် ကာဆဝ် အီ ဟဲ့ မွှိုမ် ယုဝ် ကာဆဝ်၊ ဝီ ချွတ် ဂေ ဒူအီ အီဆာရေလ အီ မုး ဒူအီ ပီ အိုပ် မဲ။ မဲ ဟဲ့ တဲး ဂေ လေး ခဲင် မိူင် အဲဂိုပ်။ 22 မဲ ဇဝ် ဟဲ့ ကာဝေ ဂေ၊ ဟဲ့ ဝီ အာပ် ဒွါ မိူင် နီ ဒီ ဂေ။ န့ ဘော မုး မိူင် ပဲ့ ဟဲ့ ဒွါ မဲ ဇဝ် ကာဒိက် ဆတ်ဇာ ဒီ ဂုန့် ဒင် ဂေ။ န့ မုး မိူင် ဘွတ် မိူင် မွှိုမ်၊ မိူင် အီ မိုဝ်း ဟေ ဂေ ဘ့လေ မွှိုမ်။ 23 ဂေ ပီ ဘော ဟဲ့ လိုပ် ကွယ် ခဲင် မိူင် တီ မိူဝ်၊ ဂေ ယီ တူ ထူမ် ဂြုဝ်း မဲ ဇဝ် ဘော တူ ဘူင် ဒူပ် ဒါရာ မဲ ဇဝ် ဘော ပီ ဒမ် အုန် မဲ ဇဝ် ဒေါ မှဝ်။ ခုဝ်၊ မဲ ဇဝ် ဝီ တဲး ဂေ ခမ် အာဖေ အာရေ ပီ ခမ် ဂေ ဒေါ တီ နီ။

24 မှာန့်၊ တဲး မဲ ဇဝ် ဝီ ယွတ် ဘ့လဝ့် န့တဲင် ပဲ့ ဟဲ့ ဘူင် ရန်ဆူ ဂေ။ ရန်ဆူ ဂေ ဟဲ့ တး ကာဂုဝ်း တဲး ဂေ ပွိုန် မိူင် မဲ ဇဝ် တီ။ မိူင် မဲ ဇဝ် တီ၊ န့ ဒီ ဝီ ကာဒုး ဒီ အာပ် ဒွါ ဒီ ဒူအီ အာမျုဝ် ဘာဘဲ အီ ဟဲ့ ဒိုဝ်း တး အာဖေ အာရေ ဒီ မာပွါ့ လာင် ဘော အေတ့် ပီ ဒီ ဟူမ် ဘော ဆဝ် ရောဂါ၊ ဝီ တး ကာဂုဝ်း ဒီ ယေ။ ခဲ့ ပီ ဒွိုမ် ကာလာင် မဲ ဇဝ် မိူဝ်၊ ဟဲ့ ဘဲန် တူတ့် ဒွန် မျုဝ်။ မဲ ဇဝ် မိူဝ် ဟဲ့ ယိုဝ် လွင် အန် တီ။ 25 အိုယ် မဲ ဇဝ်ဖြာ၊ မဲ ဘူင် ဆေဆေ ခဲ့ ပီ လဝ့် နဝ်း မဲ၊ မဲ ဇဝ် မိူဝ် ဟဲ့ ကာလာင် ဒီ အုဝ် တဝ်း၊ ‘ဒိုဝ်း ရွိုန်၊ စိုဝ်း ပြဲ ကာဒါယ်၊ ဟြေတ့် တဲး န့ မိုဝ်း ဘော အီ ဘဲန် ဆက်ဆေ အန်။’ မာလဲ၊ မိူင် ပီ အိုပ် မဲ ဇဝ် နီ၊ ဂေ ဒူအီ ဘာဘဲ ဟဲ့ ဝီ ဟွတ့် တး အိုပ်။”

26 ဒေါ အန် တီ ဇဝ်ဖြာ ဝီ ကာလာင် ဒီ အုဝ် အီ မုး အာယေရေမီ တဝ်း၊ 27 “အုဝ် မုး ဇဝ်ဖြာ အီ အိုပ် တူတ့် ဒူအီ ဒွန် မျုဝ်။ န့ မိူဝ် တူ မိုဝ်း မာဆေ ပီ တူ ပွိုန် ဘူင် အုဝ်။ 28 ခုဝ်၊ အုဝ် တဝ်း၊ အုဝ် ဒီ ဒိုဝ်း မိူင် နီ၊ ဝီ အာပ် ဒွါ ဒီ ဂေ ဒူအီ ဘာဘဲ ဘော ဒီ အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ။ အန် အီ ဒီ တး အိုပ် တူတ့်။ 29 ဂေ ဒါ ဆိုက် အန် အီ ဒီ တး ကာဂုဝ်း ခဲင် မိူင် နီ၊ ဂေ ဒီ လိုပ် ခဲင် မိူင်၊ ဒုဝ့် တဲး န့ ကော ကာဆိုမ် ဘော မိူင်။ ကာင် ပဲ့ ဟဲ့ ဒွိုမ် ဒုဝ့် ဂေ ဆီနမ် အုး ငှုန် ဒီ ဇဝ် ဘာလ ဒဲင် ကာတု ကာင် ဂေ အီ ဂ့လင် ဒီ ကာဆိုမ် တူတ့် ဒွန် ကာင်။ ဂေ မိူဝ် ဟဲ့ လှူ ပီ ဒီ ဒျီင် ဒီ ဇဝ် ဘာလ တီ။ မိူင် ဒီ ဘော ကာဆိုမ် တူတ့် ကူပ် ဟဲ့ လှူ ဂေ ဒီ ဇဝ် ပီ ကြိုပ် အီ ဟဝ်၊ အီ ကာဆုး အုဝ် တဲး အုဝ် ရူ ကာဆဝ်။

30 ဂေ ဟဲ့ တဲး အုဝ် ရူ ကူပ် ဟဲ့ ကြိုပ် ဂေ အာရိုပ် ပဲ့ ဟဲ့ ဘူင် ဂေ တာ ဒဲ ဂေ၊ ဘော တဝ်း န့ မုး ဇဝ်ဖြာ။ ဂေ ဒူအီ အီဆာရေလ ဘော ဂေ ဒူအီ အာယူဒါ ဘောကာဂ့လျီတ်၊ ဂေ ဟဲ့ ဘူင် အီ တူ မွှိုမ် ဒီ အာတ့် အုဝ် ဆိန့် ဒေါ ဆီ ဒီတဲတ်၊ ဆီ ဒီရွယ် ဂေ။ 31 ဂေ ဒူအီ အီ ကွယ် ခဲင် မိူင် နီ၊ ဂေ ဟဲ့ ဘူင် တဲး အုဝ် ရူ ကာဆဝ်။ ဂေ ဟဲ့ ဘူင် တဲး နဝ်း ရူ အုဝ် ပွိုန် ဒီ လေး ဆိန့် ဒေါ ကာစုး ဂေ ဒီ ဒဲ မိူင် နီ၊ န့ ကော ဝီ ဇမ် အာတိုဝ် နီ။ ကူပ် န့ ပါယ် တီ အုဝ် လုဝ် ပျာတ့် ဝဲန် တဲး န့ လိုဝ် တူတ့်။ 32 ခုဝ်၊ ဂေ ဒူအီ အီဆာရေလ ဘော ဂေ ဒူအီ အာယူဒါ အီ ဟဲ့ ဘူင် အီ တူ မွှိုမ် တီ ဟဲ့ ဘူင် တဲး အုဝ် ရူ ဆေဆေ။ န့ ဘော မုး ဂေ၊ ခုန်ဒီခမ် ဂေ၊ ဒါ အီ လှူ ဒီ ဇဝ်ဖြာ ဂေ ဘော ဒါ အီ ဘျာန် ဂြုဝ်း ဇဝ်ဖြာ ဂေ အီ ကွယ် ခဲင် မိူင် ယူဒါ ဘော ခဲင် မိူင် ယေရူဆာလဲမ်။ ဂေ ဘောကာဂ့လျီတ် ဟဲ့ ဘူင် တဲး န့ ကာဆုး နဝ်း အုဝ်၊ တဲး အုဝ် ရူ ကာဆဝ်။ 33 ဂေ အာဝ် ဟူ ဝီ ဘိုင် အုဝ်။ ဂေ ဘော ဝီ ဟာဝ် ဘိုင် မျုဝ် ဟဝ်။ အုဝ် ပီ ဘော ဟဲ့ မာနုဝ် ဂေ ဆေဆေ မိူဝ်၊ ဂေ ယီ တူ မိုဝ်း နဝ်း ဆီ ထူမ်၊ တဲး ဂေ နပ် ပီ မာနုဝ် အုဝ် ဒီ ဂေ။ 34 ဂေ ဘော ဝီ ဒိုဝ်း အာရိုပ် ရာင် အီ မွှိုမ် ကာအိး၊ ဝီ တး အုန် ခဲင် ကာင် အုဝ်၊ တဲး န့ ကာဒါတ့်။ 35 ဂေ ဘော ဝီ ဘူင် ကာစှူင့် စာ၊ တဲး ဂေ လှူ ဒီ ဇဝ် ဘာလ ဒူပ် ဒီလယ့် ဘေန်ဟီနုမ်။ ဂေ ဘော ဒိုဝ်း လှူ ဂွန် အီဘိုန့် ဘော ဂွန် အီမာယ် ဂေ ဒီ ဇဝ် မူလွက့် အီ မုး ပီ တူ ဒွိုမ် စ်ု အုဝ် ဂေ ဘူင်။ အုဝ် မိူဝ် တူ ထာင် ဂေ ဒီ ဘော ခမ် ဒီ ဘူင် အီ မွှိုမ် ကာအိး ပါယ် မွက် တီ၊ တဲး န့ ကော ဝီ ဘဲန် မှာပ် ဒီ ဂေ ဒူအီ အာယူဒါ။” ဇဝ်ဖြာ ဟဲ့ ကာလာင် ပါယ် တီ။

36 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ အန် ဝီ ကာလာင် လွင် ပီ ဒီ ပါယ် မိူင် ယေရူဆာလဲမ်။ အန် တဝ်း၊ “မဲ နပ်၊ မိူင် နီ အုဝ် ဟဲ့ အာပ် ဒီ ခုန်ဒီခမ် ခဲင် မိူင် ဘာဘဲ။ န့ ဒီ မိုဝ်း အာဖေ အာရေ အီ တး ဒီ မာပွါ့ လာင် ဘော အေတ့် ပီ ဒီ ဟူမ် ဘော ဆဝ် ရောဂါ။” 37 ဘ်ု ဘေ ယွတ်၊ အုဝ် ပီ ဒီ ဝီ ဟာဝ် ဒိုဝ်း တး ဂေ ခဲင် ရဝ် ခဲင် မိူင် ဒူင် ဟဲ့ ဟုဝ် တဝ် အုဝ် ဒီ ဂေ၊ တဲး ဂေ ကွယ်။ ဒေါ တီ နီ အုဝ် ဟဲ့ ရူ ကာဆဝ် ဒီ ဂေ။ အုဝ် ဒီ ဝီ ဒိုဝ်း တး ဂေ၊ တဲး ဂေ ပွိုန် ဒီ ဝီ ကွယ် နှိမ် နှိမ်၊ ကွယ် ဒါခိုယ် ဒါခိုယ် ခဲင် မိူင် နီ။ 38 ဂေ ဒီ ဘဲန် ဒူအီ ပီ အိုပ် အုဝ်၊ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဂေ။ 39 အုဝ် ဒီ ဘူင် တဲး ဂေ မိုဝ်း နဝ်း ဆိူဝ်၊ တဲး ဂေ ရုဝ်ဆေ မီ အုဝ် ဆေဆေ၊ တဲး န့ ဘဲန် အာဂျိုဝ် ဒီ ဂေ ဘော ဒီ လှုက်လှာန် ဂေ အီ ဒီ ဂွိုတ် တး ဝါယ် နီ။ 40 အုဝ် ဒီ ဒွါ ကာဒိက် ဆတ်ဇာ အီ တူ ပွိုန် ပျာတ့် ဒေါ မှဝ်။ အုဝ် ဒီ ဘူင် နာ မွှိုမ် ဒီ ဂေ၊ တဲး န့ ဘဲန် ဂေဇူ ဒီ ဂေ ဆေဆေ။ ဂေ တူ ဝီ ဝး အုဝ်၊ ဝီ ဝဲန် အုဝ် ဒေါ မှဝ်။ အုဝ် ဒီ တဲး ဂေ မိုဝ်း နဝ်း အီ ယုဝ် အုဝ် ဆေဆေ။ 41 နဝ်း အုဝ် ဒီ ဘော ဘျုဝ် ဒါခိုယ် ဒီ ဂေဇူ ဂေ။ အုဝ် ဒီ ဟပ် ဘော နဝ်း ဘော ဖွိုမ် အုဝ်၊ တဲး ဂေ ကွယ် ခဲင် မိူင် နီ အာခါခ်ု မှာန်။”

42 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “အုဝ် ဟဲ့ တဲး ဒူအီ ဂေ နီ ခမ် အာဖေ အာရေ အီ တာင် ကာဆဝ်။ အုဝ် ပီ ဒီ ဝီ ဒိုဝ်း နာ မွှိုမ် ပဲ့ ဟဲ့ ဒွိုမ် ကာဆဲန့် အုဝ် ဒီ ဂေ ဘော ဒွန် မျုဝ်၊ ပီ ဝီ ဒွါ ဒီ ဂေ။ 43 န့ ဒီ ဘော ဝီ မိုဝ်း အာခြာဝ် ဒီ စိုဝ်း မာန် ဂေ ဒူင် နာ ခဲင် မိူင် နီ။ လွင် မိူင် နီ ဘေ ဟဲ့ ဒွိုမ် တဝ်း၊ “န့ ဟဲ့ ဘဲန် တူတ့် ဒူင် ရာမ်။ န့ မိူဝ် တူ မိုဝ်း ဒူအီ ဂေ ဒုဝ် ဆတ်ဒါဝါ အီ ကွယ်။ ဒူအီ ဘာဘဲ ဟဲ့ ဟွတ့် အိုပ် တူတ့်။” 44 “ဂေ ဒူအီ ကိူန် ဒီ ဘော ဒိုဝ်း ရွိုန်၊ ဝီ စိုဝ်း မာန် ဂေ ဒူင် နာ။ ဂေ ဒီ ဘော ဝီ ဘူင် ပဲ့ လာယ် ကာစိုဝ်း ကာယွင့်၊ ပိတ် ဘော ကာနူမာ၊ ဒွက် ဘော ဇိုမ်။ ဂေ ဒီ ပိတ် အုန် ကာနူမာ ဂေ၊ တဲး န့ ဘဲန် ဆက်ဆေ ဒီ ဂေ။ လွင် အန် တီ၊ ဂေ ဒီ ဘော ဘူင် ခဲင် မိူင် အာဘေန်ယာမ် ဘော ခဲင် ရဝ် အီ ကွယ် ရူပ် မိူင် ယေရူဆာလဲမ်။ ဂေ ဒီ ဘူင် ဘော ခဲင် မိူင် အီ ကွယ် ခဲင် ကာဒါယ် မိူင် ယူဒါ ဘော မိူင် အီ ကွယ် ဒဲင် နွန် ဘော ခဲင် မိူင် အီ ကွယ် အီ ခြိုမ် ဒူင် ဂ့လင် ဘော ခဲင် မိူင် အီ ကွယ် ဘ့လာက် နာ တေတ့် ဂေ တွိုန်။ ခုဝ် န့ ပါယ် တီ အုဝ် ဒီ ဝီ ဒိုဝ်း တး ဂေ ဒူအီ ပဲ့ ဟဲ့ မှေတ့် ဟာဝ် အီ။” ဇဝ်ဖြာ ဟဲ့ ကာလာင် အုန် ပါယ် တီ။