1 ဇဝ်ဖြာ ပီ ဝီ ကာလာင် တဝ်း၊ “အာခြာဝ် ဒေါ အန် တီ အုဝ် ဒီ ဘော ဘဲန် ဇဝ်ဖြာ ပီ ကြိုပ် ဂေ ဒူအီ အီဆာရေလ ဒွန် ဇိုဝ် ဒွန် ခြိုဝ်။ ဂေ ဒီ ဘော ဘဲန် ဒူအီ ပီ အိုပ် အုဝ်။”

2 ဇဝ်ဖြာ ပီ ဝီ တဝ်း၊ “ဂေ ဒူအီ အီဆာရေလ အီ ဟဲ့ လွတ် ခမ် အာဖေ အာရေ ဒီ မာပွါ့ လာင်၊ ဂေ ဒီ ပွိုန် ပီ ဂေဇူ အုဝ် ခဲင် ပြဲ ကာဟဝ်း။ အုဝ် ဒီ တဲး ဂေ ကွယ် ဒါခိုယ်၊ ကွယ် ဂတ် ဂျီတ်။”

3 ဇဝ်ဖြာ အီ ဟဲ့ ဒွိုမ် ကာပ့လုး ဒီ အေ အန် ဟဲ့ တဝ်း၊ “အုဝ် ဒီ ရွက့် ကာဝေ ဘေ ဆေဆေ။ ခုဝ် အန် တီ၊ အုဝ် မိူဝ် ဟဲ့ ကာဝေ ဘေ ဆိန့် ဒေါ မွိုန် ဟဲ့ လှေန့် ကာဆဝ်။

4 အိုယ် ဘေ ဒီဘျာ အီဆာရေလ၊ အုဝ် ဒီ ဝီ စွယ် ဘေ။ ဘေ မိူဝ် ဒီ ဝီ ခမ် ပီ စွယ် အုဝ်။ ဘေ ဒီ ပွိုန် ဒီ ဒိုဝ်း ဂြိုင် ဘေ၊ ဝီ က်ု ဂါ ဒူပ် ဂေ အီ ဟဲ့ ဘျုဝ် ဒါခိုယ်။

5 ဘေ ဒီ ပွိုန် ဒီ ဝီ ဘူင် ကာပိုမ် ဘေ ဘော ဝီ ပွိုန် ဒီ ဝီ ဆမ် ဟေ မာငုန် ဘေ ဒဲင် နွန် ဆာမာရီ ပေါ အူ ဇေန့်။ ဂေ အီ ရန့် ကာပိုမ် တီ၊ ဂေ အီ ဟဲ့ ဟွတ့် ဆမ်၊ ဂေ ဒီ ဘော ခူယ် ကာဆဝ် ကူပ် ဟဲ့ ပွိုန် ဂေ ဘ့လေ အန်။

6 န့ ဒီ ဘော ဇမ် ဆီငဲ ဒေါ ဒီ ဒတ် ဂေ ဒူအီ အီ ဘ်ု မိူင် ဒီ နွန် အာအေဖာရိမ် တဝ်း၊ ‘တဲး အေ ဟုဝ့် ဒီ နွန် ဇီအူန် အီ မုး ဒူင် ကွယ် ဇဝ်ဖြာ။’”

7 ဇဝ်ဖြာ ပီ ဝီ တဝ်း၊ “တဲး ဘေ ခူယ် ဒါခိုယ် ကူပ် ဒူအီ အာမျုဝ် အာကူပ်။ တဲး ဘေ ဘုတ် ဝဝ်၊ ဒတ် အိူပ် ဒါ တာင် အီ ဟဲ့ တာင် လွှိုမ် ဂေ ဒူအီ ဒွန် မျုဝ်။ တဲး ဘေ ဘော အိူပ် မျုက် ဇဝ်ဖြာ တဝ်း၊ ‘အိုယ် မဲ ဇဝ်ဖြာ၊ ယေ မှာန့်၊ တဲး မဲ ချွတ် ဂေ ဒူအီ ပီ အိုပ် မဲ၊ အီ မုး ဒူအီ အီဆာရေလ အီ ဆီ ဂိတ် ဆီ ကွယ်။’

8 အုဝ် ဒီ ဒိုဝ်း တး ဂေ ခဲင် မိူင် နာ ကွာ။ အုဝ် ဒီ ဒိုဝ်း တး ဂေ ဒူင် ဆိူတ် ကာဒါယ်။ ဂေ အီ ငါယ် အပ် ဘော ဂေ အီ ပ့လဝ် ဂုဝ့် ဘော ဂေ အီဘိုန့် အီ တူ အး၊ အီဘိုန့် အီ ကာတတ် ဒီ ဂွိုတ် ဂွန်၊ ဂေ ဒီ ဘော ဝီ တး ရိုမ် ဒူပ် ဒူအီ အုဝ်။ ဂေ ဒီ ဘော ဘဲန် ဖိုင် တာင်၊ ဖိုင် အီ ကိူန် ကာဆဝ်။

9 ဒေါ ဝီ ယဲတ့် တး အုဝ် ဒီ ဂေ တီ၊ ဂေ ဒီ ဘော ဝီ ယာမ် ဘော ဝီ ကာပြာ တဲး အုဝ် ဝီ လှဝ် နဝ်း ဂေ။ အုဝ် မိူဝ် ဒီ ယဲတ့် ဟာဝ် ဂေ ခူပ် အိုမ် ဘ့လဲင် ဂျီတ် ဘော ဟာဝ် ဒူပ် န့တေန့် ဆိူဝ်။ တူ တဲး ဂေ ဒီပ့လာတ် ကေး။ ခုဝ်၊ အုဝ် မုး ဂုန့် ဂေ ဒူအီ အီဆာရေလ။ ဂေ ဒူအီ အာအေဖာရိမ် မိူဝ်၊ ဂေ ပီ ဂွန် အုဝ် အီ မုး ဂွန် ဂိန့်။

10 အိုယ် ဘေ ဒူအီ ဒွန် မျုဝ် ဒွန် ခြိုဝ်၊ တဲး ဘေ ထူမ် ဂြုဝ်း ဇဝ်ဖြာ ဘော ဒဲ့ ဒီ ကာလာင် ဒီ ဂေ အီ ကွယ် နာ ကာတူင့် အီ ကွယ် ခူပ် အိုမ် နမ်မုက်ဆာရာ တဝ်း၊ ‘ဇဝ်ဖြာ အီ ဟဲ့ ဝဲန် ဂေ ဒူအီ အီဆာရေလ၊ အန် ပီ ဒီ ဝီ ဒဲ့ ကာဇု ဂေ ဘော ဝီ ဘ်ု လိုမ်လာ ဂေ၊ တဲး န့ ကော ပီ ဒါ အီ ဟျီင် မာဘူ၊ ဘ်ု မာဘူ အန်။’

11 ခုဝ်၊ ဇဝ်ဖြာ ဒီ ထုတ် လေး ဂေ ဒူအီ အာမျုဝ် အာကူပ်။ အန် ဟဲ့ ချွတ် တဲး ဂေ လွတ် ဒီ ဒါ အီ မိုဝ်း ပ့လူမ် ဂေ ဟဲန့် လွှိုမ် ဂေ။

12 ဂေ ဒီ ဝီ ပွိုန် ဒီ တဝ်း မှုဝ် ဒဲင် နွန် စာ အီ မုး နွန် ဇီအူန်။ ဂေ ဒီ ဘော ခူယ် ကာဆဝ် ကူပ် ဟဲ့ ဂေဇူ ဇဝ်ဖြာ ဒီ ဂေ။ ဂေ ဒီ ဘော ပွိုန် ငှုဝ် ဒီဂါဝ် ဘော အိုမ် မာငုန် ဘော နာမန် ဘော ဂွန် မာဘူ ဂေ ဂွန် မာမက်။ အာဆာက် ဂေ ဒီ ဘော ဒါခိုယ် ပီ ကာပိုမ် အီ ဟဲ့ မိုဝ်း အိုမ် ဒီ ရိုက် ဆေဆေ၊ အာဝ် ဟူ ဟျီ့ ကာဟဝ်း။

13 ပန် အန် တီ ဂေ ဂွန် ဒီဘျာ ဒီ ဘော ခူယ် ဘော ဂါ။ ဘော ဂေ ဂွန် ကာညူမ် ဘော ဂေ ဒူအီ ကတ် ဒူအီ ဂဲ၊ ဂေ ဒီ ဘော ခူယ် ဒါခိုယ် ဒွန် အီ။ အုဝ် ဒီ ဘူင် တဲး ဂေ မိုဝ်း နဝ်း ဂျာမ်ဆာ။ ပဲ့ ဟဲ့ က့လိုဝ် ဟဲ့ ငှဝ် ဂေ၊ န့ ဒီ ဝီ ဘဲန် အီ ဘျုဝ် ဒါခိုယ် ဒီ ဂေ။

14 အုဝ် ဒီ ဘော ဒိုဝ်း နာ ဘွတ် နာ မွှိုမ်၊ ဟျီင် ဂေ ဒါ အီ လှူ ဒီ ဇဝ်ဖြာ။ ဂေ ဒူအီ ပီ အိုပ် အုဝ် မိူဝ်၊ ဂေ ဒီ ဘော ပွိုန် ပီ ဂေဇူ အုဝ် ဒီ ဂေ အီ ဟဲ့ ကိူန် ကာဆဝ်။” ဇဝ်ဖြာ ဟဲ့ ကာလာင် ပါယ် တီ။

15 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ခဲင် မိူင် ရာမာ ဒီ ဘော မိုဝ်း မီ ဂေ အီ ငှုန် အီ ယာမ် ကူပ် ဟဲ့ ဆွင့် ကာဆဝ် ဒီ နဝ်း ဂေ။ နာင် ရာအေန် ဒီ ဘော ယာမ် ကူပ် ဂွန် အန်။ အန် အာဝ် ဟူ မိုဝ်း ပ့လူမ် ဂေ ဟဲန့် ကူပ် ဟဲ့ ယမ် ဂွန် အန်။”

16 ဇဝ်ဖြာ ဟဲ့ ကာလာင်၊ “တဲး မဲ ယိူန် ယာမ် မဲ တီ။ ယိူန် ကွဲ့ တဲး အိုမ် ငါယ် မဲ လေး။ ခုဝ်၊ ခဲ့ ပီ ဘူင် မဲ၊ န့ ဒီ ဝီ ဘဲန် တူတ့် အာဂျိုဝ် ဒီ မဲ။ ဒူအီ ဂေ တီ ဒီ ဘော ဝီ တး ခဲင် မိူင် ရန်ဆူ မဲ။

17 ပါယ် တီ တဲး ဘေ နှဝ့် န့ဒဝ့် ဆီငဲ အီ ဒီ ဇမ် နာ အာတ့် ဟာဝ်။ လှုက်လှာန် ဘေ၊ ဂေ ဒီ ဘော ဝီ ဝေန့် ခဲင် မိူင် ဒူင် ကွယ် ဘြိမ် ဂေ။” ဇဝ်ဖြာ ဟဲ့ ကာလာင် ပါယ် တီ။

18 အုဝ် ဟဲ့ ယိုဝ် ပီ ငှုန် ဂေ ဒူအီ အာအေဖာရိမ်၊ ဂေ ဟဲ့ တဝ်း၊ “မဲ ဇဝ် မိူဝ် ဟဲ့ မာနုဝ် ယေ။ ယေ မိူဝ် ဟဲ့ ခမ် ပီ မာနုဝ် မဲ ဇဝ်။ န့ ဟဲ့ ပီ အီ မာနုဝ် ဂွန် မာမက် အီ ဟဲ့ ဟာယ် ကာဆဝ်။ ယေ မှာန့်၊ တဲး မဲ ဇဝ် ဝီ ဒိုဝ်း တး ယေ။ ယေ မိူဝ် ဟဲ့ ဖြူမ် ဒီ ဝီ တး။ မဲ ဇဝ်ဖြာ ဘော မုး ဇဝ်ဖြာ ပီ ကြိုပ် ယေ။

19 ဝါယ် တူ ဝီ ဘိုင် ယေ ဒီ မဲ ဇဝ် တီ၊ ယေ ဘော ဝီ လှုဝ်း မှာပ် ယေ။ ဝါယ် ဟဲ့ ဟွတ့် ခမ် ယေ ပီ မာနုဝ် မဲ ဒီ ယေ၊ န့ ဘော ဝီ ဘဲန် ကာထ ဂိုမ် ဒုဝ် ဘြိမ် ယေ။ န့ ဘဲန် မွှိုမ် ဆာယ်၊ ဘဲန် ရိုဝ် ဘော တဲး ယေ စှိုမ် ဆာရေ ကူပ် မှာပ် ပဲ့ ဟဲ့ ဘူင် ယေ ဆိန့် ဒေါ ဒီတဲတ် ယေ တီ။”

20 ဇဝ်ဖြာ တဝ်း၊ “အာအေဖာရိမ် မုး ဂွန် ပီ ရွက့် အုဝ်။ အန် ဟဲ့ လဝ့် ကာဆဝ် နဝ်း အုဝ်။ အုဝ် ကာလာင် ဂြုဝ်း အီ ဒမ် မှာပ် ဒီ အန် ခဲ့ မှဝ်၊ အုဝ် ယီ လှုဝ်း အန် ဆေဆေ။ ပါယ် တီ အုဝ် ဘော မိုဝ်း နဝ်း ရွက့် ကာဝေ ကာဆဝ် အန်။ နဝ်း ရွက့် ကာဝေ အုဝ် ဒီ အန် တီ၊ န့ ဒီ ဘော ကွယ် ရိုမ် ဒူပ် အန် ဆေဆေ။” ဇဝ်ဖြာ ဟဲ့ ကာလာင် ပါယ် တီ။

21 တဲး ဘေ ဆမ် ရွင့် ဒူပ် န့တေန့် ဘေ၊ တဲး ဘေ နုဝ်။ တဲး ဘေ ဆမ် လွှက့်၊ တဲး ဘေ နုဝ် ဆီချာ န့တေန့် တာင် ပီ လုဝ် ဟာဝ် ဘေ။ အိုယ် ဘေ ဂွန် ဒီဘျာ ဒူအီ အီဆာရေလ၊ တဲး ဘေ ဝီ တး။ တဲး ဘေ ဝီ တး ကွယ် ခဲင် မိူင် ဒူင် ကွယ် ဘြိမ် ဘေ။

22 အိုယ် ဘေ ဂွန် ဒီဘျာ အီ တူ မိုဝ်း နဝ်း ဆိူဝ် နဝ်း မှာန်၊ ဘေ ဒီ ဘော ဟာဝ် ဝိဝ် ဟာဝ် ဝေန့် လှေန့် ခဲ့ မှဝ်။း ဇဝ်ဖြာ ဒီ ဘူင် မျုဝ် အီ ကာမာယ် ဒဲင် ကာဒါယ် နီ၊ န့ ပီ အီဘိုန့် ဒီ ဟာဝ် ဝဲင် ရူပ် အီမာယ်။

23 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ “ပန် ဒီ ဝီ ဒိုဝ်း တး တိုယ် အုဝ် ဒူအီ ဂေ နီ ခဲင် မိူင် ဂေ၊ ဂေ ဒူအီ အီ ကွယ် ခဲင် ရဝ် ခဲင် မိူင် ယူဒါ၊ ဂေ ဒီ ဘော ဝီ ကာလာင် ပေါ န့ ပွါ တဝ်း၊ ‘အိုယ် မဲ အီ မုး ဒူင် ဒီ ကွယ် နာ ဆိူဝ် နာ မှာန်၊ အိုယ် မဲ နွန် အီ ဆီငါ ဘွတ်၊ ယေ မှာန့်၊ တဲး ဇဝ်ဖြာ မွင့်ကာရာ ဒွါ ဒီ မဲ။’ 24 ဒူအီ ဂေ တီ၊ ဂေ ဒီ ဘော ဝီ တး ကွယ် ရိုမ် ခဲင် မိူင် ယူဒါ၊ ကွယ် ခဲင် ရဝ် ခဲင် မိူင် အန် တီ။ ဂေ အီ ဘူင် မာန် ဂေ၊ ဒူင် နာ ဂေ ဘော ဂေ အီ ဟျီင် မာဘူ မိူဝ်၊ ဂေ ဒီ ဝီ မိုဝ်း။ 25 ဂေ အီ ဟဲ့ ဒီလှး အီ ဟဲ့ နုန်၊ အုဝ် ဒီ တဲး ဂေ ဝီ ဒါခိုယ် ဂျာမ်ဆာ။ ဂေ အီ ဟဲ့ ကာပြာန့် အီ ဟဲ့ ဒီလှး တိူက်၊ ဂေ ဒီ ဝီ ပွိုန် ဒီ ဟူမ် ဖဲ။”

26 ပါယ် တီ ဂေ ဒူအီ ကိူန် ဒီ ဘော ဝီ တဝ်း၊ “အုဝ် ဘော ဟာဝ် အိတ်၊ အုဝ် ဘော ဝီ န့ဆိုဝ်း၊ န့ ဘော ဝီ ဘဲန် နဝ်း ဒါခိုယ် နဝ်း ဆာဘ့လာင် ဒီ အုဝ်။” 27 ဇဝ်ဖြာ ပီ ဝီ တဝ်း၊ “န့ ဒီ ဘော ဇမ် အာခြာဝ် အန်၊ အုဝ် ဒီ ဝီ တဲး ဒူအီ ဂေ ဒုဝ် ဆတ်ဒါဝါ ဝီ နုဝ့် ခဲင် မိူင် အီဆာရေလ ဘော ခဲင် မိူင် ယူဒါ။ 28 အုဝ် ဟဲ့ ဒွိုမ် ဘ်ု ဒီ ယွတ် ဂေ၊ ဟဲ့ ရိုတ့် ဝဲန် ဂေ၊ ဒိုဝ်း ဝဲန် ဂေ ဘော ဆီဂိုပ် ဂေ ဘော ပျာတ့် ဂေ ဘော ခါနှာပ် ဂေ။ အုဝ် ယီ ဒီ ဝီ ယွတ် လိုမ်လာ ဂေ၊ ဝီ မ့ပြာယ် ဂေ၊ တဲး ဂေ ဝီ ဆီချာ။” ဇဝ်ဖြာ ဟဲ့ ကာလာင် ပါယ် တီ။ 29 အာခြာဝ် ဒေါ အန် တီ ဂေ အာဝ် ဟူ ပွိုန် တဝ်း၊ “ဂေ အီ မုး ဂုန့်၊ ဂေ ဟဲ့ ဒျီင် အိုမ် မာငုန် အီ ပြာင်။ ဂေ အီ မုး ဂွန် မိူဝ်၊ လုဝ် ခမ် တဲး ဟြာင် ဂေ ညှမ် ဘော ကာဟိဝ်။”

30 ဂေ ဒွန် အီ လုဝ် ယမ် ကူပ် မှာပ် ပီ ဘူင် ဒုဝ် ဘြိမ် ဂေ။ ဂေ ဒွန် အီ အီ ဒျီင် အိုမ် မာငုန် ပြာင်၊ န့ ဒီ ဘဲန် ဟြာင် ကာဟိဝ်၊ ဟြာင် ညှမ် ဒီ ဂေ။

31 ဇဝ်ဖြာ တဝ်း၊ န့ ဒီ ဘော ဇမ် အာခြာဝ် အန်၊ ဆီငဲ အန်၊ အုဝ် ဒီ ဝီ ဒွါ ကာဒိက် ဆတ်ဇာ ကာမာယ် ဒီ ဂေ ဒူအီ အီဆာရေလ ဘော ဂေ ဒူအီ အာယူဒါ ဘောကာဂ့လျီတ်။

32 ကာဒိက် ဆတ်ဇာ ပီ ဒီ ဒွါ အုဝ် ဒီ ဂေ တီ န့ တူ ပီ ကာဒိက် ဆတ်ဇာ ပဲ့ ဟဲ့ ဒွိုမ် ဒွါ အုဝ် ဒီ ဂေ ဂုန့် ဒင် ဂေ ဒေါ ဒိုဝ်း လေး အုဝ် ဒီ ဂေ ခဲင် မိူင် အဲဂိုပ် တွိုန်။ အုဝ် ပီ ဘော ဟဲ့ ပီ အီမာယ် ဂေ မိူဝ်၊ ဂေ ယီ တူ ဒူပ် ဆီချာ ကာဒိက် ဆတ်ဇာ ပီ ဒွါ အုဝ် ဒီ ဂေ တီ။

33 ဇဝ်ဖြာ တဝ်း၊ “ကာဒိက် ဆတ်ဇာ ပီ ဒီ ဒွါ အုဝ် ဒီ ဂေ ဒူအီ အီဆာရေလ န့ ပါယ် နီ။ အုဝ် ဒီ တဲး ဂေ လှုဝ်း ဒါရာ အုဝ် ဆေဆေ။ န့ ပီ အုဝ် ဒီ ဒဲမ် ဒိုက် ဒါရာ တီ ခဲင် နဝ်း ဂေ။ အုဝ် ဒီ ဘဲန် ဇဝ်ဖြာ ဂေ၊ ဂေ မိူဝ် ဒီ ဘဲန် ဒူအီ ပီ အိုပ် အုဝ်။

34 ကာတဲ ဂေ ဒူအီ အာမျုဝ် တီ၊ ဂေ မိူဝ် အာဝ် ဟူ မိုဝ်း ဒီ လုဝ် ဝီ မာနုဝ် ဘီနွင် ဝေါဝဲ ဂေ တဝ်း၊ ‘တဲး မဲ နပ် ဇဝ်ဖြာ။’ ခုဝ်၊ ခဲ့ ကွယ် ဂေ ဘောကာဂ့လျီတ်၊ စုး ဒီ ဒူအီ အီ တူ အာရေ တာင် ကော ဇမ် ဒီ ဝီ အီ အာရေ တာင် ဆိူတ်၊ ဂေ ဟဲ့ ဟွတ့် နပ် အုဝ်။ အုဝ် မိူဝ် ဒီ ဂဝ်း ဝဲန် တူတ့် မှာပ် ဂေ၊ အာဝ် ဟူ လှုဝ်း ပဲ့ ဟဲ့ ကာလိုပ် ဂေ ဘော ပဲ့ ဟဲ့ လှိုဝ် ဂေ ဂြုဝ်း အုဝ် တွိုန်။”

35 ဇဝ်ဖြာ ပီ ဝီ တဝ်း၊ “အုဝ် ဟဲ့ ဘူင် တဲး ဆီငဲ ဘ့လာင် ဒေါ ကာတဲ ဆီငဲ။ အုဝ် ဟဲ့ ဖာန် ဘ့လေး မာဂျီန် ဘော ဆီမန့်၊ တဲး ဂေ ဘ့လာင် ခဲင် မှိုဝ်။ အန် ဇဝ် မိူဝ် ဟဲ့ ဝ်ု အိုမ် နမ်မုက်ဆာရာ၊ တဲး န့ ကာတုန်၊ တဲး န့ ဆီလွယ် ဆီလွယ် ဘော ဟမ် ဒီငိုန့်။ အန် ဘော စိူဝ် ဇဝ်ဖြာ အီ အိုပ် တူတ့် ဒွန် မျုဝ်။”

36 ဇဝ်ဖြာ ပီ ဝီ တဝ်း၊ “ကာဒါယ် နီ ဟဲ့ ကွယ် လှေန့် ခဲ့ မှဝ်၊ ပီ ကာဆဲန့် အုဝ် ဒီ ဂေ ဒူအီ အီဆာရေလ၊ န့ ဒီ ဘော ကွယ် လှေန့် ခဲ့ တီ။

37 ဆေ န့ ဘော ဟဲ့ ပွိုန် ဂဝ် ဒီ ယွတ် ဘ့လေန့် ဂေ ဂါင်ဟြာဝ်၊ ဘော ဟဲ့ ပွိုန် လဲပ် ဒီ ယွတ် ဘော ပီ ပါယ် ဘိူန် ဒင် ကာဒါယ် နီ၊ အုဝ် မိူဝ် ဟဲ့ ပွိုန် ဝဲန် ဂေ ဒူအီ အီဆာရေလ ကူပ် မှာပ် ပဲ့ ဟဲ့ ဘူင် ဂေ။” ဇဝ်ဖြာ ဟဲ့ ကာလာင် ပါယ် တီ။

38 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “န့ ဒီ ဘော ဇမ် ဆီငဲ ဒီ ဝီ မ့ပြာယ် အုဝ် မိူင် ယေရူဆာလဲမ် အာဒါ အုဝ်။ န့ ဘော စုး ဒီ ဒူင် ချြီင် ဒါ ဆိုက် အီ စိူဝ် ဟာနာနေလာ ကော ဝီ ဟာဝ် ဇမ် ဒီ မာလုဝ်း အီ ကွယ် ဒီ ကာတုဝ့် ရဲင် မိူင်။ 39 ဝန် ပီ ဂဝ် ဂေ၊ ဂေ ဒီ ဘော ဒိူတ် ဟာဝ် ဆိူဝ် ဒီ နွန် ကာရိပ်။ ဟဲ့ ဟွတ့်၊ ဂေ ပီ ဝီ ဝိတ့် ဟာဝ် ဒီ နွန် ကောအာ။ 40 ခဲင် ဒီလယ့် ဒူင် ဒိပ် ဂေ ဒူအီ ယမ် ဘော ဒူင် ဝဲန် ဂေ ကာဝှါင် ဘောကာဂ့လျီတ် ဘော ခဲင် ဂ့လင် ဂေ တွိုန်၊ တဲး န့ ကော ဝီ ဟာဝ် ဇမ် ဒီ ဘ့လဲင် အိုမ် ခီဒါရူန်၊ ဝီ တး ဇမ် ဒီ ကာတုဝ့် မိူင် ဒူင် ကွယ် မာလုဝ်း အီ စိူဝ် မာလုဝ်း မ့ပြွင့် အီ ကွယ် ဘ့လာက် နာ လေး ဆီငဲ တွိုန်၊ န့ ဒီ ဘော ဘဲန် တူတ့် ဒူင် ဆီငါ ဘွတ် အာဒါ ဇဝ်ဖြာ။ ဝါယ် အန် တီ အာဝ် ဟူ မိုဝ်း ဒီ လုဝ် ရိုတ့် ဝဲန် ပျာတ့် ဝဲန်၊ တဲး န့ လိုဝ်၊ တဲး န့ ကာပျာတ့် ဒေါ မှဝ်။”