1 ဇဝ်ဖြာ ပီ ဝီ ကာလာင် ဂြုဝ်း နီ ဒီ အာယေရေမီ။ 2 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ အန် တဝ်း၊ “တဲး မဲ ဒဲမ် အုန် တူတ့် ဂြုဝ်း ပီ ကာလာင် အုဝ် ဒီ မဲ နီ ခဲင် ဘပ်။ 3 ဇဝ်ဖြာ တဝ်း၊ ‘ဟဲ့ ဟွတ့် ဇမ် အာခြာဝ် ဒီ ဝီ ဒိုဝ်း တး အုဝ် ဂေ ဒူအီ အီဆာရေလ ဘော ဂေ ဒူအီ အာယူဒါ၊ အီ မုး ဒူအီ ပဲ့ ဟဲ့ မှေတ့် ဟာဝ် အီ ဟဝ် တွိုန်။ အုဝ် ဒီ ဝီ ဒိုဝ်း တး ဂေ၊ တဲး ဂေ ဝီ တး ကွယ် ခဲင် မိူင် ပဲ့ ဟဲ့ အာပ် အုဝ် ဒီ ဂုန့် ဒင် ဂေ။ ဂေ ဒီ ဘော ဝီ တး ကွယ် တး ဘိုင် မိူင် တီ။’” ဇဝ်ဖြာ ဟဲ့ ကာလာင် ပါယ် တီ။

4 ဟဲ့ ဟွတ့် ဇဝ်ဖြာ ပီ ဝီ ကာလာင် လွင် ဂေ ဒူအီ အီဆာရေလ ဘော ဂေ ဒူအီ အာယူဒါ တဝ်း၊

5 “အုဝ် ဟဲ့ ယိုဝ် မီ ဂြုဝ်း ပီ ဒတ် ဂေ အီ ဟဲ့ ကာစွာ၊ ဂေ အီ ဟဲ့ ကာပိုန့်၊ အာဝ် ဟူ မိုဝ်း နာ ဒါခိုယ်။ ဟဲ့ မုး အီ မွှိုမ် ယုဝ် ဒီလူယ်။

6 တဲး ဘေ ထေဝ် ဒီ ဒီမွှတ် ဘော ယွတ်၊ န့ မိုဝ်း အီမာယ် အီ နပ် ဒီ မိုဝ်း ဂွန်။း မာလဲ၊ အုဝ် ဟဲ့ ဝီ ယိုဝ် ဂေ အီမာယ် ဒွန် အီ၊ ဂေ ဟဲ့ ဝီ ဇာန် ဒဲ ဂေ ဒီ ညွယ် ဂေ ပီ အီဘိုန့် အီ ဟဲ့ ဆဝ် ဒီ မိုဝ်း ဂွန်။ ယွတ်၊ နာ ဂေ မိူဝ် ဟဲ့ ဒီလှး။

7 အာလိုဝ်၊ ဆီငဲ တီ န့ ဒီ ဘော ဘဲန် ဆီငဲ အီ အာရေ တာင် ကာဆဝ်၊ ကွဲ့ တဲး န့ ဆီ မိုဝ်း ဒူင် ပွိုန် ကာဂဝ်။ န့ ဟဲ့ မုး ဆီငဲ ဒီ တး ဇမ် အာဖေ အာရေ ဒီ ဒူအီ အာမျုဝ် အာကူပ်။ အုဝ် ပီ ဘော ဟဲ့ ဘူင် ပါယ် တီ မိူဝ်၊ အုဝ် ယီ ဒီ ဝီ ချွတ် ဂေ ဆီငဲ တီ။”

8 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင်။ အန် တဝ်း၊ “ဆီငဲ တီ၊ န့ ပီ အုဝ် ဒီ ကာဘက် ဝဲန် အဲ့မဝ် ပီ စှိုပ် အီ ဒီ မဲင် ဂေ။ အုဝ် ဒီ ဒဲပ် ဝဲန် ဘော ဝန် အီ ဟဲ့ ပက် ဒီ ဂေ။ ဝါယ် တီ ဂေ ဒူအီ အာမျုဝ် ဟဝ်၊ ဂေ မိူဝ် အာဝ် ဟူ ပွိုန် ဒီ ဝီ ဒိုဝ်း ဂေ ဘဲန် မှာယ် ဂေ ပေါ အူ ဇေန့်။

9 ဂေ ဒီ ဝီ ပွိုန် ဒီ ဘူင် ဂါန် ဇဝ်ဖြာ ပီ ကြိုပ် ဂေ ဘော ဂါန် ခုန်ဒီခမ် အီ ပီ အာဒါဝိတ် ဝီ ပီ ဒီ တဲး အုဝ် ဘုဝ် ဘဲန် အာဒါ ဂေ။”

10 ဇဝ်ဖြာ တဝ်း၊ “အိုယ် ဒဲစေန့် အုဝ် အီ စိူဝ် အာကူပ်၊ ကွဲ့ တဲး မဲ ယုဝ်။ အိုယ် ဘေ ဒူအီ အီဆာရေလ၊ ကွဲ့ တဲး နဝ်း ဘေ လိုဝ်။ အုဝ် ဒီ ဝီ ဒိုဝ်း တး ဘေ ခဲင် မိူင် အီ ကာတူင့် ဘော ခဲင် မိူင် ဒူင် ဟဲ့ မှေတ့် ဟာဝ် အီ ဟဝ် ဒီ ဘေ။ ဂေ ဒူအီ အာမျုဝ် အာကူပ် ဒီ ဘော ပွိုန် ဒီ ဝီ တး။ အာဝ် မိုဝ်း အာဆေ အီ ပွိုန် ကာဘျုဝ် ဂေ။ ဂေ ဒီ ပွိုန် ဒီ ဝီ တး ကွယ် နှိမ်၊ ကွယ် ဒါခိုယ် ဂျာမ်ဆာ။”

11 ဇဝ်ဖြာ မိူဝ် တဝ်း၊ “အုဝ် ဒီ ကွယ် ရိုမ် ဒူပ် မဲ ဘော ဘ်ု ဒီ ချွတ် မဲ။ အုဝ် ပီ ဘော ဟဲ့ တဲး ဂေ ဒူအီ အီ ကွယ် ဒူင် ဟာဝ် ကာယဝ်း ဘေ ကာတဲ ဂေ တီ စှိုမ် တူတ့် ဒွန် မျုဝ် မိူဝ်၊ အုဝ် ယီ တူ တဲး ဘေ စှိုမ်။ ပီ ဘော ဟဲ့ ပါယ် တီ မိူဝ်၊ အုဝ် ယီ တူ ပျာတ့် တူတ့် ဘေ။ အုဝ် ဒီ မာနုဝ် ဘေ၊ တဲး န့ ဒူပ် ဒါရာ။”

12 ဇဝ်ဖြာ တဝ်း၊ “န့ ပီ ဆဝ် ဒိမ် မဲ၊ န့ တူ ကဲန်။ ဒိမ် ပဲ့ ဟဲ့ ခမ် မဲ တီ၊ အာဝ် ပွိုန် ပီကဲန်။

13 န့ တူ မိုဝ်း အာဆေ အီ ဒီ စွယ် မဲ။ အာဝ် မိုဝ်း အာဆေ အီ ဒီ ပက် အီ ဒီ ကာဘန် ဒိမ် မဲ တီ။ မဲ မိူဝ် တူ မိုဝ်း ဆီနမ် မာဆေ အီ ဒီ ပွိုန် တဲး ဒိမ် မဲ တီ ဟြာယ်။

14 ခဲ့ ကွယ် ဂေ အီ ဒူပ် မဲ၊ ဂေ ဟဲ့ ဝီ ပိဝ် မဲ၊ အာဝ် မိုဝ်း အာဆေ အီ ဝီ နမ်လှုဝ်း မဲ၊ ဝီ ဒီမွှတ် မဲ။ ခုဝ်၊ မှာပ် မဲ တီ ဟဲ့ တာင် ကာဆဝ်။ နာ တူ မွှိုမ် ပဲ့ ဟဲ့ ဘူင် မဲ မိူဝ် ဟဲ့ ကိူန် ကာဆဝ်။ အုဝ် ဒီ ဝီ ဘူင် တဲး န့ ဆဝ် ဒီ မဲ၊ တဲး န့ ပီ ပီ ဘူင် ဂေ ရန်ဆူ မဲ။ အုဝ် ဒီ ဝီ ဒမ် မှာပ် ဒီ မဲ၊ တဲး န့ ပီ ပီ ဘူင် ဂေ ဒူအီ ဟာယ်၊ တဲး န့ ကော ဆဝ် ကာဆဝ် ဒီ မဲ။

15 မှဝ် န့ ပါယ် ပီ ယာမ် မဲ ကူပ် ဆဝ် ဒိမ် မဲ တီ။း ဆဝ် ပီ လုဝ် ခမ် မဲ၊ န့ တူ နပ် ဒီ ဟြာယ်။ မှာပ် မဲ ဟဲ့ တာင် ကာဆဝ်။ နာ တူ မွှိုမ် ပဲ့ ဟဲ့ ဘူင် မဲ မိူဝ် ဟဲ့ ကိူန် ကာဆဝ်။ ခုဝ်၊ အုဝ် လုဝ် မာနုဝ် မဲ ပါယ် တီ။

16 ပီ ဘော ဟဲ့ ပါယ် တီ မိူဝ်၊ ဂေ အီ ဆီ ပျာတ့် မဲ၊ ဂေ ဒီ ဝီ လုဝ် ခမ် အီ ဟဝ် ပျာတ့် ဂေ။ ခဲ့ ကွယ် ဂေ ရန်ဆူ မဲ၊ ဂေ ဘောကာဂ့လျီတ် ဒီ လုဝ် ဝီ ခမ် အီ ဟဝ် မှေတ့် ဟာဝ် ဂေ ပေါ ပ့လုဝ့်။ ဂေ အီ ဆီ ဖာတ် ဒိုဝ်း ကြုဝ်ကြာမ် မဲ၊ ဂေ ဒီ ဝီ လုဝ် ခမ် အီ ဟဝ် ဖာတ် ဒိုဝ်း ကြုဝ်ကြာမ် ဂေ။ ဂေ အီ ဘူင် တဲး မဲ လိုဝ် စှိုမ်၊ အုဝ် ဒီ ဝီ အာပ် ဂေ ဒီ အီ ဟဝ်၊ တဲး ဘော ဂေ လိုဝ် စှိုမ်။”

17 ဇဝ်ဖြာ ဝီ တဝ်း၊ “အုဝ် ယီ ဒီ ဝီ တဲး မဲ ကွယ် ဒါခိုယ် ပီ ဘြိမ်။ အုဝ် ဒီ တဲး ဆဝ် မဲ ဂေ ဒိမ် မဲ တီ ဝီ ကဲန်။ ဂေ ရန်ဆူ မဲ ယီ ဟဲ့ တဝ်း၊ ‘မဲ ဟဲ့ ဘဲန် ပီ ဝဲန် အီ။’ ဂေ မိူဝ် ဟဲ့ တဝ်း၊ ‘အန် နီ ဟဲ့ ပီ မိူင် ဇီအူန်၊ အာဝ် မိုဝ်း အာဆေ အီ ယွတ် လိုမ်လာ ဂေ။’”

18 ဇဝ်ဖြာ ပီ ဝီ တဝ်း၊ “ဘေ ယွတ်၊ အုဝ် ဒီ ဒိုဝ်း တး ထိုပ် ဘိက် ဂေ ဒူအီ အာမျုဝ် အာကူပ် ပဲ့ ဟဲ့ မှေတ့် ဟာဝ် အီ ဟဝ် တွိုန်။ အုဝ် ဟဲ့ ဝီ ကာဝေ ဂေ၊ ဝီ တဲး ဂေ မိုဝ်း ဒူင် ဒီ ကွယ်။ မိူင် မိူဝ်၊ ဂေ ဒီ ဝီ မ့ပြာယ်၊ ဝီ ဘူင် ဒဲင် နွန် ဒူင် ဘြိမ် တွိုန်။ ဟုဝ် ခုန်ဒီခမ် မိူဝ် ဂေ ဒီ ဝီ ဘူင် တဲး န့ ပီ ဘြိမ်။

19 ဂေ အီ တဝ်း မှုဝ် အီ ဒါင် ဂုင် ဂေဇူ ဒီ ဇဝ်ဖြာ။ ဘော ဂေ အီ ဟဲ့ ဘျုဝ် ဒါခိုယ် ဒီ ဘော ဝီ တး ကွယ် ရိုမ် ဒူပ် ဂေ တီ။ အုဝ် ဒီ ဝီ တဲး ဂေ ဘြဲ ကိူန်၊ တူ တဲး ဂေ ပြေတ့် ဒေါ မှဝ်။ အုဝ် ဒီ ဝီ တဲး ဂေ မိုဝ်း ဆာရေ၊ တူ တဲး ဂေ ချဝ့် ဒေါ မှဝ်။

20 ဂွန် ဂေ ဘော လှာန် ဂေ ဒီ ဘော ဝီ ပီ ဘြိမ်။ ဖိုင် ဂေ ဘောကာဂ့လျီတ် ဒီ ဘော ဝီ လှုဝ်း အုဝ်။ အုဝ် ဒီ ဝီ ဒမ် မှာပ် ဒီ ဒူအီ အီ ခါနှာပ် ဂေ။

21 ဒါ ကာညာ အီ အိုပ် ဂေ၊ အန် ဒီ ဘော မုး ဒူအီ အာမျုဝ် ဂေ။ အန် ဒီ ဘော ဂွိုတ် တး ကာန်ု ဂေ။ အုဝ် ဒီ ဘော ဒဲ့ အန် တး ကွယ် ကာတတ် အုဝ်။ အန် မိူဝ် ဒီ ဘော ကာဒိုက် ကာဒဝ့် ဒီ အုဝ်။ ဒဲင် ဝီ ပီ ဒဲ့ အုဝ် တီ၊ အာဝ် မိုဝ်း အာဆေ ဒီ ဘော ယ တး ကာတတ် အုဝ်။

22 ပန် အန် တီ ဂေ မိူဝ် ဒီ ဘဲန် ဒူအီ ပီ အိုပ် အုဝ်။ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဂေ။”

23 ဘေ ယွတ်၊ ကူပ် ဟဲ့ ရူ ကာဆဝ် ဇဝ်ဖြာ၊ ဟဲ့ မိုဝ်း ခုန် လာင် တး ဘုတ် ဘန် ကာဆဝ်။ န့ ဒီ ဘော ဘုတ် ဟဲန့် ကာဆဝ် ဒဲင် ဂိန့် ဂေ ဒူအီ အီ ဟဲ့ ဟာယ် ကာဆဝ်။

24 နဝ်း ရူ ဇဝ်ဖြာ တီ မိူဝ် တူ ဟြာယ် အာတ့် အန် ဇဝ် တူ ဘူင် တဲး န့ ဇေ့ဇုင်၊ တဲး န့ ဟွတ့် တူတ့် ခဲ့ ပီ ခြာမ် အန် ဒီ ဘူင်။ ဝါယ် အန် တီ ဘေ ဒီ ဘော ဝီ နပ် ဆီချာ လွင် အန် တီ။