1 အာနီ မုး ပဲ့ ပီ ဒဲမ် အာယေရေမီ အီ မုး ဒါ အီ ဘျာန် ဂြုဝ်း ဇဝ်ဖြာ။ ဒေါ ကွယ် အန် ခဲင် မိူင် ယေရူဆာလဲမ် အန် ဝီ ဒဲမ် ပဲ့ နီ တိုယ် ဒီ ဂေ ဒါ တာင် အီ အိုပ် အီ ယဲတ့် ဂေ ဒူအီ ပဲ့ ဟဲ့ မှေတ့် ဟာဝ် အာနေဘူခတ်နေစာ ခဲင် မိူင် ဘာဘဲ။ အန် ဘော တိုယ် ပဲ့ တီ ဒီ ဂေ ဒါ အီ လှူ ဒီ ဇဝ်ဖြာ ဘော ဒီ ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ ဘောကာဂ့လျီတ် ပဲ့ ဟဲ့ တး မှေတ့် အာနေဘူခတ်နေစာ ခဲင် မိူင် ယေရူဆာလဲမ်၊ ဝီ ဒိုဝ်း ဟာဝ် ခဲင် မိူင် ဘာဘဲ။ 2 ပဲ့ နီ၊ အန် ဘော ဒဲမ် ဝါယ် ဟဲ့ ဟွတ့် တး အာနေဘူခတ်နေစာ မှေတ့် ဟာဝ် ဂေ ဒူအီ ခဲင် မိူင် ယေရူဆာလဲမ်။ ဒူအီ ပဲ့ ဟဲ့ မှေတ့် ဂေ တီ၊ န့ ဘော မုး ခုန်ဒီခမ် အာယေခေါနီ ဘော မာ အန် အီ ဘူင် ဂါန် ခဲင် ဟုဝ် အန် ဘော ဂေ အာမူ အာမာတ် အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ။ န့ မုး ဘော ဂေ ဒါ အီ နပ် ဒီ လိုဝ် ဟေ ဘော ဂေ ဒါ အီ နပ် ဒီ စိုမ် ဟိန်။ 3 ပဲ့ တီ၊ အန် ဘော တိုယ် ဒွါ ဒီ အာအေလာဆာ အီ မုး ဂွန် အာဆာဖာန် ဘော အာဂေမာရီ အီ မုး ဂွန် အာဟီလာခီ။ ဒူအီ ဂါယ် တီ အာဇေဒေကီ အီ မုး ခုန်ဒီခမ် ခဲင် မိူင် ယူဒါ ဟဲ့ စ်ု တဲး ဂါယ် ဟာဝ် ဒီ မိူင် ဘာဘဲ ဒူင် ကွယ် ခုန်ဒီခမ် အာနေဘူခတ်နေစာ။ ခဲင် ပဲ့ ပီ ဒဲမ် အန် တီ၊ န့ ဘော တဝ်း ပါယ် နီ။

4 “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဝီ ကာလာင် ဒီ ဂေ ဒူအီ ပဲ့ ဟဲ့ ခ့ဝါင် အန် တဲး အီ ဟဝ် တး မှေတ့် ဂေ ခဲင် မိူင် ယေရူဆာလဲမ်၊ ဝီ ဒိုဝ်း ဟာဝ် ဂေ ခဲင် မိူင် ဘာဘဲ။ အန် တဝ်း၊ 5 ‘တဲး ဘေ ဝီ ဘူင် ကာင်၊ ဆမ် ကာင် ဒူင် ကွယ် ဘေ။ တဲး ဘေ ဝီ ဘူင် ကာပိုမ် ဟေ ဘ့လေ၊ တဲး ဘေ ပွိုန် ဒီ ဟူမ် ဘ့လေ အန်။ 6 တဲး ဘေ ဝီ ခတ်၊ ဒိုဝ်း အီဘိုန့်၊ တဲး ဘေ ဝီ မိုဝ်း ဂွန် အီဘိုန့် ဂေ ဂွန် အီမာယ်။ ဂွန် အီဘိုန့် ဂွန် အီမာယ် ဘေ ဂေ တီ မိူဝ်၊ တဲး ဘေ ဝီ ဟြေတ့် အီဘိုန့် ဟြေတ့် အီမာယ် ဒွါ ဒီ ဂေ။ တဲး ဘေ ဝီ မိုဝ်း ဒီ ဟျီင် ဂွန်၊ တဲး ဘေ ဝီ ဘြဲ ကိူန် ဒေါ ကွယ် ဘေ ဒီ တီ။ ကွဲ့ တဲး ဘေ ကြဲ ဒီ ပြေတ့်၊ ကြဲ ဒီ ယူမ်။ 7 တဲး ဘေ ဘူင်၊ တဲး န့ ဒါခိုယ် ခဲင် မိူင် ပဲ့ ဟဲ့ တဲး အုဝ် ဘေ ဟာဝ် ကွယ် တီ။ တဲး ဘေ ဝီ ဆာခိုဝ် ဒီ ဇဝ်ဖြာ အာဒါ မိူင် ဒူင် ကွယ် ဘေ တီ။ ဆေ ခဲင် မိူင် တီ ဟဲ့ မွှိုမ်၊ ဟဲ့ ဒါခိုယ် ဂတ် ဂျီတ်၊ ဘေ မိူဝ် ဒီ ဘော ပွိုန် နာ မွှိုမ် ဘော ကွယ် ဒါခိုယ်။ 8 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ။ ကွဲ့ တဲး ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒါ ဘေဒါင် အီ ကွယ် ကာတဲ ဘေ ပွိုန် ဒီ ကာလုဝ် ဘေ။ ကွဲ့ တဲး ဘေ ထူမ် လွင် ပီ မ့ဘာဝ် ဂေ။ 9 ခုဝ်၊ ဂေ ဘော တူတ့် ဒီ ဘိုင် ပွုန် အုဝ်၊ ယီ ဝီ ကာလာင် ဂြုဝ်း ကာလုဝ်။ အုဝ် မိူဝ် တူ မိုဝ်း ဒီ စ်ု ဂေ။’” ဇဝ်ဖြာ ဟဲ့ ကာလာင် ပါယ် တီ။

10 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ဆေ ဘေ ဟဲ့ ကွယ် ခဲင် မိူင် ဘာဘဲ အာဒါ ဘူ ဂိုဝ် ဆီနမ်၊ အုဝ် ဒီ ဝီ တး ယွတ် တး စ်ု ဘေ၊ တဲး အုဝ် ဘူင် ဒူပ် ခဲ့ ပဲ့ ဟဲ့ ဒွါ အုဝ် ကာဒိက် ဆတ်ဇာ ဒီ ဘေ။ အုဝ် ဒီ ဝီ တဲး ဘေ တး ခဲင် မိူင် ဘြိမ် ဘေ။ 11 အုဝ် ဟဲ့ နပ် ပီ ဆီ ဘူင် အုဝ် အာဒါ ဘေ။ အုဝ် တူ ခြာမ် ဒီ ဘူင် နာ ဟာယ် နာ မိူက် ဒီ ဘေ။ အုဝ် ခြာမ် ဒီ ဘူင် နာ မွှိုမ် နာ ဒါခိုယ် ဒီလူယ် ဒီ ဘေ။ အုဝ် ဒီ တဲး ဘေ မိုဝ်း ပီ နှဝ့် န့ဒဝ့် နာ အာတ့် ဟာဝ်။ 12 ဒေါ အန် တီ ဘေ ဒီ ဘော ဝီ ဟြေတ့် အုဝ်၊ ဝီ တး ဆာခိုဝ် ဒီ အုဝ်။ အုဝ် မိူဝ် ဒီ ဝီ ထူမ် ဂြုဝ်း ဘေ။ 13 ဆေ ဘေ ခတ် ဘော နဝ်း ဘော ဖွိုမ် ဘေ ဒီ ဟြေတ့် အုဝ်၊ ဘေ ဒီ ဘော ကာတုန့် အုဝ်။ 14 ဘေ ဒီ ဘော ကာတုန့် အုဝ် အာခ်ု မှာန်။” ဟဲ့ ဟွတ့် ဇဝ်ဖြာ ပီ ဝီ တဝ်း၊ “အုဝ် ဒီ ဝီ တိုယ် ဘေ ခဲင် မိူင် ဘြိမ် ဘေ။ အုဝ် ဒီ ဝီ ဟာဝ် ဒိုဝ်း တး ဘေ ဒူင် ဟဲ့ တဲး အုဝ် ဘေ ကွယ် ဒွန် နာ ဒွန် ပ့လုဝ့် ကာတဲ ဂေ ဒူအီ ဒွန် မျုဝ်။ အာနီ ဘော မုး ဂြုဝ်း ပီ ကာလာင် အုဝ် အီ မုး ဇဝ်ဖြာ။” ဇဝ်ဖြာ ဟဲ့ ဟွတ့် ကာလာင် ပါယ် တီ။

15 ဘေ နပ် ဒီ တဝ်း၊ “ဇဝ်ဖြာ ဒီ တိုယ် ဒါ အီ ဘျာန် ဂြုဝ်း ဇဝ်ဖြာ တး ခဲင် မိူင် ဘာဘဲ ဟာဝ် ဇမ် ဒူင် ကွယ် ယေ နီ။” 16 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် လွင် ခုန်ဒီခမ် အီ အိုပ် မိူင် ပဲ့ ဟဲ့ ဒွိုမ် အိုပ် ခုန်ဒီခမ် အာဒါဝိတ်။ အန် ဘော ကာလာင် ဒီ ဂေ ဒူအီ ဘောကာဂ့လျီတ် အီ ကွယ် ခဲင် မိူင် တီ။ န့ ဘော မုး အီကတ် ဘေ ဘော ဝါ ဘေ၊ ဂေ ပီ တူ မှေတ့် ဟာဝ် အီ ဟဝ် ဒီ ဂေ ဒူပ် ဘေ တွိုန်။ ဇဝ်ဖြာ တဝ်း၊ 17 “အုဝ် ဒီ ဘော တဲး ဂေ ခမ် ဒုက် ခမ် အာဖေ အာရေ ဒီ မာပွါ့ လာင် ဘော ဒီ ဆဝ် ရောဂါ ဘော ဒီ အေတ့် ပီ ဒီ ဟူမ်။ အုဝ် ဒီ ဘူင် တဲး ဂေ ကော ပီ ဘ့လေ ဒီပူ အီ ဟဲ့ အမ် လာတ့်၊ ကွဲ့ တဲး န့ ဆီ ပွိုန် ဟူမ်။ 18 ပါယ် တီ အုဝ် ဒီ ဒိုဝ်း ဒုက် ဒီ မာပွါ့ လာင် ဘော ဒုက် အေတ့် ပီ ဒီ ဟူမ် ဘော ဒုက် ဒီ ဆဝ် ရောဂါ တီ၊ ဝီ ခါနှာပ် ဂေ။ ဒေါ ဝီ ယိုဝ် ဒူအီ အာမျုဝ် ဟဝ် ဒီ ဂေ၊ ဒူအီ အာမျုဝ် ဟဝ် တီ ဒီ ဘော ဝီ ကာစွာ ဝီ ယုဝ် ကူပ် ဒုက် ပီ လုဝ် ခမ် ဂေ တီ။ ခုဝ်၊ အုဝ် ဟဲ့ တဲး ဂေ ကာယဝ်း ဟာဝ် ဒွန် နာ ဒွန် ပ့လုဝ့်၊ တဲး ဂေ ဒူအီ ကိူန် ယိုဝ် ခဲ့ ဟဲ့ ဒုက် ကာဆဝ် ဂေ။ န့ ဘော တဲး ဂေ ဝီ ကာစွာ ဘော ယုဝ် ဒီယုး ဒီယေန့်။ ဂေ ဒီ ဘော ဘဲန် ပီ နဲန အီ ဟဝ်။ ဂေ အီ ဟဝ် ဒီ ဘော ဒိုဝ်း စိူဝ် ဂေ၊ တဲး န့ ဘဲန် ပီ လာယ် အေး လာယ် ဒိူင် ဂေ။ 19 အုဝ် ဘူင် ပါယ် တီ ခုဝ်၊ အုဝ် ပီ ဘော ဟဲ့ စ်ု ဒဲစေန့် အုဝ် အီ မုး ဒါ အီ ဘျာန် ဂြုဝ်း ဇဝ်ဖြာ၊ တဲး ဂေ ဟာဝ် ကာလာင် ဒီ ဂေ ဘဲန် ဇေန့် ဘဲန် ဇေန့် မိူဝ်၊ ဂေ ယီ တူ ထူမ် ဂြုဝ်း အုဝ်။ ကူပ် န့ ပါယ် တီ ဘေ ကာဒုး ဒီ ခမ် ဒုက် ဇိုဝ် တီ။ ဘေ မိူဝ် တူ ထူမ် ဂြုဝ်း အုဝ် ဒေါ မှဝ်။”

20 ဇဝ်ဖြာ ပီ ဝီ တဝ်း၊ “အိုယ် ဘေ အီ ဟဲ့ ခမ် ဒီ ဘဲန် ပီ မှေတ့် ဟာဝ် အီ ဟဝ်၊ အုဝ် ဟဲ့ တဲး ဘေ လေး ခဲင် မိူင် ယေရူဆာလဲမ်၊ ဝီ ဟာဝ် ကွယ် ခဲင် မိူင် ဘာဘဲ၊ တဲး ဘေ ဘောကာဂ့လျီတ် ထူမ် ဂြုဝ်း ဇဝ်ဖြာ။ 21 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ဝီ ကာလာင် လွင် အာဟပ် အီ မုး ဂွန် အာကောလာယာ ဘော လွင် အာစေတာကီ အီ မုး ဂွန် အာမာအာဆေယာ။ ဂါယ် ဟဲ့ ညိုင်ရာင် ဒီ ဘျာန် ဂြုဝ်း ဇဝ်ဖြာ ဘော ကာလာင် ဂြုဝ်း ကာလုဝ် ဒီ ဘေ။ အန် ဇဝ် တဝ်း၊ အုဝ် ဒီ အာပ် ဂါယ် ဒီ ခုန်ဒီခမ် အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ။ ခုန်ဒီခမ် တီ ဒီ ဘော ငဝ်း ယမ် ဂါယ် ဒီ အာတ့် ဘေ။ 22 ဂေ ဒူအီ အာယူဒါ ဘောကာဂ့လျီတ် ပဲ့ ဟဲ့ မှေတ့် ဟာဝ် ဂေ ခဲင် မိူင် ဘာဘဲ တီ၊ ဂေ ဒီ ဘော ဒိုဝ်း ပီ စိူဝ် ဂါယ် တီ ဘော ဒိူင် တဝ်း၊ ‘တဲး ဇဝ်ဖြာ ဘူင် ဒီ မဲ၊ တဲး န့ ပီ ပီ ဘူင် ခုန်ဒီခမ် အီ အိုပ် မိူင် ဘာဘဲ ဒီ အာဇေဒေကီ ဂါယ် အာဟပ် ပဲ့ ဟဲ့ ဒုဝ့် ကာဆိုမ် အန် ခဲင် ငဝ်။ 23 ခုဝ်၊ ဒူအီ ဂါယ် တီ ဟဲ့ ဘူင် အီ တူ မွှိုမ် ကာတဲ ဂေ ဒူအီ အီဆာရေလ။ ဂါယ် ဟဲ့ ဝိန် ဒီ လုတ့် အီဘိုန့် အီ ဟဝ်။ အုဝ် မိူဝ် တူ မိုဝ်း ဒီ စ်ု ဂါယ်၊ တူ မိုဝ်း ဒီ ကာလာင် ဒီ ဂါယ်။ ဂါယ် ဘော ကာလုဝ် ဒီ ဘျာန် ဂြုဝ်း ဇဝ်ဖြာ။ အုဝ် ဟဲ့ နပ်၊ ဟဲ့ ယိုဝ် လွင် အန် တီ။’” ဇဝ်ဖြာ ဟဲ့ ကာလာင် ပါယ် တီ။

24 တဲး မဲ ကာလာင် လွင် ဂြုဝ်း ဒီ ဒူအီ ဘာဘဲ ဒီ အာဆေမာယာ အီ တး ဒူင် စိူဝ် နာဟေလမ်။ တဲး မဲ တဝ်း၊ 25 “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ။ ‘မဲ ဟဲ့ ဘိုင် ပွုန် ဒုဝ် ဘြိမ် မဲ၊ ဝီ တိုယ် ပဲ့ ဒီ ဒါ အီ လှူ ဒီ ဇဝ်ဖြာ အီ စိူဝ် အာစေဖာနီ အီ မုး ဂွန် အာမာအာဆေယာ ဘော ဒီ ဒါ အီ လှူ ဒီ ဇဝ်ဖြာ ဘော ဒီ ဂေ ဒူအီ အီ ကွယ် ခဲင် မိူင် ယေရူဆာလဲမ် ဘောကာဂ့လျီတ်။’ မဲ ဟဲ့ တဝ်း၊ 26 ‘ဇဝ်ဖြာ ဟဲ့ အာပ် တဲး မဲ ဘဲန် ဒါ အီ လှူ ဒီ ဇဝ်ဖြာ ကာဒါင် ဒါ အီ လှူ ဒီ ဇဝ်ဖြာ အီ စိူဝ် အာယုဝ်ယာတ။ ဒေါ တီ နီ၊ မဲ ဟဲ့ ဘဲန် ဒါ တာင် အီ အိုပ် ခဲင် ကာင် ဇဝ်ဖြာ။ မဲ လုဝ် မှေတ့် ဂေ ဒူအီ အီ ဟဲ့ ဝှိုန့် အီ ဟဲ့ ယွင် ဒီ ဘဲန် ဒါ အီ ဘျာန် ဂြုဝ်း ဇဝ်ဖြာ၊ ဝီ ခြွင့် ဂေ ခဲင် ကာပိုမ်၊ ဝီ စှိုပ် ထာင် ဒီ ပ့လဝ် ဂေ ဘော ဝန် ဟိန် ဒီ မဲင် ဂေ။ 27 မှဝ် န့ ပါယ် ပီ တူ မာနုဝ် မဲ အာယေရေမီ အီ မုး ဒူအီ ရဝ် အာနာထူတ်၊ အီ ဟဲ့ ဘျာန် ဂြုဝ်း ဇဝ်ဖြာ ကာတဲ ဘေ တီ။း 28 အန် ဟဲ့ ကာလာင် ဒီ ယေ အီ ကွယ် ခဲင် မိူင် ဘာဘဲ တဝ်း၊ ဘေ ဒီ ကွယ် ရာမ် လှေန့်။ တဲး ဘေ ဝီ ဆမ် ကာင် ဒူင် ဒီ ကွယ် ဘေ၊ တဲး ဘေ ဝီ ဆမ် ဘော ဟေ ဘ့လေ၊ တဲး ဘေ ဝီ ပွိုန် ဒီ ဟူမ် ဘ့လေ အန်။’”

29 ဒါ အီ လှူ ဒီ ဇဝ်ဖြာ အီ စိူဝ် အာစေဖာနီ ဘော တိး ပဲ့ တီ၊ တဲး အာယေရေမီ ထူမ်။ 30 ဝါယ် အန် တီ၊ ဇဝ်ဖြာ ဝီ ကာလာင် ဂြုဝ်း ဒီ အာယေရေမီ တဝ်း၊ 31 “တဲး မဲ ဒဲမ် ပဲ့ တိုယ် ဒီ ဂေ ဒူအီ အီဆာရေလ ဘောကာဂ့လျီတ် အီ ကွယ် ခဲင် မိူင် ဘာဘဲ။ တဲး မဲ တဝ်း၊ ‘ဇဝ်ဖြာ ဟဲ့ ကာလာင် လွင် အာဆေမာယာ အီ မုး ဒူအီ ရဝ် နာဟေလမ်။ အန် ဇဝ် တူ စ်ု အာဆေမာယာ။ အာဆေမာယာ ဟဲ့ ညိုင်ရာင် ဒီ ဘျာန် ဂြုဝ်း ဇဝ်ဖြာ ဘော ကာလာင် ဂြုဝ်း ကာလုဝ်၊ ဘူင် တဲး ဘေ ညှိုမ် ကာလိုပ်။’” 32 ဇဝ်ဖြာ တဝ်း၊ “အုဝ် ဒီ ဒမ် မှာပ် ဒီ အာဆေမာယာ ဘော ဒီ လှုက်လှာန် အန်။ ဂေ ဒူအီ အာမျုဝ် အန် အာဝ် မိုဝ်း ခေါ အူ ဝီ အီ ဒီ ပွိုန် ကွယ် ကာတဲ ဂေ ဒူအီ အီဆာရေလ နီ။ ဇဝ်ဖြာ ဟဲ့ ကာလာင် ပါယ် တီ။ အာဆေမာယာ မိူဝ် တူ ပွိုန် ဒီ ယိုဝ် ပီ ဂေဇူ အုဝ် ဒီ ဂေ ဒူအီ ပီ အိုပ် အုဝ်။ ခုဝ်၊ အန် ဟဲ့ မာနုဝ် အီ လာယ် ကာဘး ဒီ အုဝ် ဘော ဝီ ကာခဲန့် ဒီ အုဝ် အီ မုး ဇဝ်ဖြာ။”