1 ခုန်ဒီခမ် အာဇေဒေကီ ဟဲ့ အိုပ် မိူင် ယူဒါ အာဒါ ဖွုန် ဆီနမ် ဒီ ဖန် မာဂျီန်။ ဒေါ အန် တီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာနာနီယာ အီ မုး ဂွန် အာစူရာ အီ ကွယ် ဒီ မိူင် ကီပွင်၊ အန် ဝီ ကာလာင် ဒီ အုဝ် ခဲင် ဟုဝ် ဇဝ်ဖြာ တဲး ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ကိူန် ထူမ်။ အန် တဝ်း၊ 2 “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ ‘အုဝ် ဒီ ဒိုဝ်း ဝဲန် ဒုက် ပဲ့ ဟဲ့ ဒွါ ခုန်ဒီခမ် ခဲင် မိူင် ဘာဘဲ ဒီ ဘေ။ န့ ပီ အုဝ် ဒီ ကာဘက် ဝဲန် အဲ့မဝ် ပဲ့ ဟဲ့ စှိုပ် အန် ဒီ ဘေ။ 3 ကာန်ု အာ ဆီနမ်၊ အုဝ် ဒီ ဝီ ဒိုဝ်း တး ကြုဝ်ကြာမ် အီ ဟဲ့ ဒွိုမ် ကွယ် ခဲင် ဟုဝ် ဇဝ်ဖြာ၊ ပဲ့ ဟဲ့ ဒိုဝ်း ဟာဝ် ခုန်ဒီခမ် အာနေဘူခတ်နေစာ။’ 4 ဇဝ်ဖြာ မိူဝ် တဝ်း၊ ‘အုဝ် ဒီ ဝီ ဒိုဝ်း တး ခုန်ဒီခမ် အာယေခေါနီ အီ မုး ဂွန် ခုန်ဒီခမ် အာယောယာခိမ် အီ ဟဲ့ အိုပ် မိူင် ယူဒါ ဘော ဒူအီ အာယူဒါ ဘောကာဂ့လျီတ် ပဲ့ ဟဲ့ မှေတ့် ဟာဝ် ဂေ ဒီ မိူင် ဘာဘဲ။ အုဝ် ဒီ တဲး ဂေ ဘောကာဂ့လျီတ် ဝီ တး ဒီ နီ။ ခုဝ်၊ အုဝ် ဒီ ကာဘက် ဝဲန် အဲ့မဝ် ပီ စှိုပ် ခုန်ဒီခမ် မိူင် ဘာဘဲ ဒီ ဘေ။’”

5 ဒေါ အန် တီ ဒါ အီ ဘျာန် ဂြုဝ်း ဇဝ်ဖြာ အာယေရေမီ ဝီ ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ အာဟာနာနီယာ၊ တဲး ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ကိူန် အီ ကွယ် ခဲင် ဟုဝ် ဇဝ်ဖြာ ပွိုန် ဒီ ထူမ်။ 6 ဒါ အီ ဘျာန် ဂြုဝ်း ဇဝ်ဖြာ အာယေရေမီ ဝီ တဝ်း၊ “တဲး န့ ဘဲန် ပါယ် တီ တဲး ဇဝ်ဖြာ ဘူင် ဒူပ် ဂြုဝ်း ပီ ကာလာင် မဲ တီ၊ တဲး အန် ဝီ ဒိုဝ်း တး ကြုဝ်ကြာမ် အီ ဟဲ့ ဒွိုမ် ကွယ် ခဲင် ဟုဝ် ဇဝ်ဖြာ ဘော ဂေ ဒူအီ ပဲ့ ဟဲ့ မှေတ့် ဟာဝ် အီ ခဲင် မိူင် ဘာဘဲ တွိုန်။ 7 ပီ ဘော ဟဲ့ တဝ်း ပါယ် တီ မိူဝ်၊ တဲး မဲ ယီ ထူမ် ပီ ဒီ ကာလာင် အုဝ် ဒီ မဲ ဘော ဒီ ဂေ ဒူအီ ဘောကာဂ့လျီတ် အီ ထူမ် ဂြုဝ်း အုဝ်။ 8 ဂေ ဒူအီ အီ ဘျာန် ဂြုဝ်း ဇဝ်ဖြာ အီ ဟဲ့ ကွယ် ဒီ အာတ့် အုဝ် ဘော ဒီ အာတ့် မဲ၊ ဂေ ဟဲ့ ဒွိုမ် ကာလာင် လွင် ဒါ ဆိုက် အီ ဒီ တး ကာဂုဝ်း၊ လွင် ဒူအီ ဒီ အေတ့် ပီ ဒီ ဟူမ်၊ လွင် ဆဝ် ရောဂါ အီ ဟဲန့် ကာဆဝ် ဒီ မိုဝ်း ဒွန် မာန် ဒွန် မိူင်၊ ဒွန် အိူင် ဒွန် ပ့လုဝ့်။ 9 ဆေ ယီ မိုဝ်း ဒူအီ အီ ဘျာန် ဂြုဝ်း ဇဝ်ဖြာ လွင် အီ ဒီ ဘဲန် နဝ်း နှိမ် နဝ်း ယေန်၊ ဆေ န့ ဟဲ့ ဘဲန် ဒူပ် ပီ ကာလာင် အန် တီ၊ ဟဲ့ နပ် ဒါ အီ ဘျာန် ဂြုဝ်း ဇဝ်ဖြာ ဝီ တီ၊ ဟဲ့ မုး ဒူအီ ပီ စ်ု ဇဝ်ဖြာ။”

10 ဝါယ် အန် တီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာနာနီယာ ဝီ ဘ့လွာ့ လေး ဘော ကာဘက် ဝဲန် အဲ့မဝ် အီ ဟဲ့ ကွယ် ဒဲင် ယ အာယေရေမီ။ 11 အန် ပီ ဝီ ကာလာင် တဲး ဒူအီ ကိူန် ထူမ်။ အန် တဝ်း၊ “ဇဝ်ဖြာ ဟဲ့ ကာလာင် တဝ်း ပါယ် တီ၊ ‘အုဝ် ဒီ ကာဘက် ဝဲန် အဲ့မဝ် ပီ စှိုပ် အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ ဒီ ဒူအီ ဒွန် ဇိုဝ် ဒွန် ခြိုဝ်၊ တဲး န့ ဟွတ့် တူတ့် ကာန်ု အာ ဆီနမ်။’” ဝါယ် အန် တီ အာယေရေမီ မိူဝ် လေး ဟာဝ် ပေါ ပ့လုဝ့်။

12 ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာနာနီယာ ဟဲ့ ဟွတ့် ကာဘက် ဝဲန် အဲ့မဝ် ဒီ ယ အာယေရေမီ၊ ဇဝ်ဖြာ ဝီ ကာလာင် ဂြုဝ်း ဒီ အာယေရေမီ အူ ဇေန့်။ အန် တဝ်း၊ 13 “တဲး မဲ ဝီ ကာလာင် ဒီ အာဟာနာနီယာ တဝ်း၊ ‘မဲ ပီ ဘော ဟဲ့ ကာဘက် ဝဲန် အဲ့မဝ် အီ မုး ဟေ၊ အန် ဇဝ် ယီ ဒီ ဝီ ဘူင် အဲ့မဝ် အီ မုး ဟိန်။’” 14 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ဒွိုမ် တဝ်း၊ “အုဝ် ဒီ ဒိုဝ်း အဲ့မဝ် ဟိန် စှိုပ် ဒီ မဲင် ဒူအီ ဒွန် ဇိုဝ် ဒွန် ခြိုဝ်၊ တဲး ဂေ ဘဲန် ပီ ဆုတ့် ပီ စ်ု အာနေဘူခတ်နေစာ အီ မုး ခုန်ဒီခမ် ခဲင် မိူင် ဘာဘဲ။ ဂေ လုဝ် ဘဲန် ပီ ဆုတ့် ပီ စ်ု ခုန်ဒီခမ် တီ အာခ်ု မှာန်။ ခဲ့ ကွယ် ဂေ မာဒုဝ် ပြဲ မိူဝ်၊ အုဝ် ဟဲ့ အာပ် ဒီ ခုန်ဒီခမ် တီ။”

15 ဝါယ် အန် တီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ ပီ ဝီ ကာလာင် ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာနာနီယာ။ အန် တဝ်း၊ “အိုယ် အာဟာနာနီယာ၊ တဲး မဲ ထူမ်။ အာဝ် မုး ဇဝ်ဖြာ အီ စ်ု မဲ။ မဲ ဘူင် တဲး ဒူအီ ဂေ တီ ဘိုင် ဂြုဝ်း ကာလုဝ်။ 16 ပါယ် တီ ဇဝ်ဖြာ ဟဲ့ ဝီ တဝ်း၊ ‘ဘ်ု မဲ ယွတ်၊ အုဝ် တူ တဲး မဲ ကွယ် ဒဲင် ကာဒါယ် နီ။ မဲ ဒီ ကာဒုး ဒီ ယမ် နမ် နီ ကူပ် ဟဲ့ မာနုဝ် မဲ တဲး ဒူအီ လာယ် ကာဘး ဒီ ဇဝ်ဖြာ။’”

17 ဆီနမ် တီ ဒါ အီ ဘျာန် ဂြုဝ်း ဇဝ်ဖြာ အာဟာနာနီယာ ဘော ယမ် ဒေါ မုး မာဂျီန် မ့ဘူ။