အာဇေဒေကီ အီ မုး ဂွန် ခုန်ဒီခမ် အာယုဝ်ဆီယာ အီ အိုပ် ဂေ ဒူအီ အာယူဒါ ကာစုး ဒီ ဘဲန် ခုန်ဒီခမ်။ ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အာယေရေမီ။ 2 ဇဝ်ဖြာ တဝ်း၊ “တဲး မဲ ဘူင် ဝန် ဘော ကန်ဒါင်၊ ဝီ စှိုပ် ဒီ မဲင် မဲ။ 3 တဲး မဲ ဝီ ကာလာင် ဟာဝ် ဂြုဝ်း နီ ဒီ ဂေ ခုန်ဒီခမ် အီ အိုပ် မိူင် အေဒူမ်၊ ခုန်ဒီခမ် မုဝ်အာပ်၊ ခုန်ဒီခမ် အမ်မူန် ဘော ခုန်ဒီခမ် အီ အိုပ် မိူင် ထူရုဝ် အီ ဟဲ့ တး ဇမ် ခဲင် မိူင် ယေရူဆာလဲမ်။ တဲး မဲ ကာလာင် ဘော ဒီ ဂေ ခုန်ဒီခမ် အီ အိုပ် မိူင်။” 4 အီ မုး ဒါ ကာညာ အီ အိုပ် မိူင် ဂေ တွိုန်၊ တဲး မဲ ကာလာင် ဒီ ဂေ တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ကာလာင် ဒီ ဘေ ပါယ် နီ။” 5 အန် ဟဲ့ တဝ်း၊ “အုဝ် ဟဲ့ တာ ပွုန် အုဝ်၊ ဘူင် ကာဒါယ် ဘော ဒူအီ ဘော ဒုဝ် ဆတ်ဒါဝါ အီ ကွယ် ဒဲင် ကာဒါယ် နီ။ အုဝ် မိူဝ် ဒီ ဝီ ဒွါ ဂေ ဒီ ဒူအီ ဝီ ပီ ဆီ ဒွါ အုဝ်။ 6 ဒေါ တီ နီ၊ အုဝ် ဒီ အာပ် မိူင် ဘေ နီ ဒီ ဒဲစေန့် အုဝ် အီ မုး ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ။ ဂေ မာဒုဝ် ပြဲ ဟာယ် မိူဝ်၊ အုဝ် ဟဲ့ အာပ် ဒီ အန်၊ တဲး အန် အိုပ် ဂေ။ 7 ခဲ့ ကွယ် ဒူအီ ဒွန် မျုဝ်၊ ဂေ လုဝ် ဘူင် ဂါန် အန် ဘော ဂါန် ဂေ လှုက်လှာန် အန်၊ တဲး န့ ကော ဇမ် ပန် ဒီ လိုဝ် တူတ့် မာန် မိူင် အန်။ ပန် အန် တီ န့ ဒီ ဝီ မိုဝ်း ဒူအီ ကိူန် ကာဆဝ်။ ဘော ခုန်ဒီခမ် အီ မိုဝ်း အာဖုင် ဒင်ခုဝ် တာင် ဒီ ဝီ တး ဒမ် အန်၊ တဲး အန် ဝီ ဘဲန် မှာယ် ဂေ။”

8 ဇဝ်ဖြာ ဘော တဝ်း၊ “ဒူအီ မျုဝ် မှဝ် အာဝ် တဝ်း၊ ဘော ဒူအီ မိူင် မှဝ် အာဝ် တဝ်း၊ ဆေ န့ မိုဝ်း အီ တူ ဘူင် ပီ ဆုတ့် ပီ စ်ု အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ၊ အုဝ် ဒီ တဲး ဂေ ဝီ ခမ် ဒုက် ဒီ မာပွါ့ လာင် အန် ဘော တဲး ဂေ အေတ့် ပီ ဒီ ဟူမ် ဘော တဲး ဂေ မိုဝ်း ဆဝ် ရောဂါ။ အုဝ် ဒီ ဒမ် မှာပ် ဒီ ဂေ၊ တဲး န့ ကော ဇမ် ပန် ဒီ ပျာတ့် အန် တဲး န့ လိုဝ် တူတ့် ဒွန် မျုဝ်။ 9 ခုဝ် အန် တီ ကွဲ့ တဲး ဘေ ထူမ် ဂြုဝ်း ဂေ ဒါ ဆာရာ အီ ဘျာန် ဂြုဝ်း ဇဝ်ဖြာ၊ ဘော ဂေ ဒါ ဆာရာ အီ မာနုဝ် ဒါရာ ဘော ဒါ ဆာရာ အီ နပ် ဒီ အိတ် မ့ဘာဝ်၊ ဒါ ဆာရာ အီ မိုဝ်း ဖီခူ။ ကွဲ့ တဲး ဘေ ထူမ် ဒီ ဒူအီ ဘောကာဂ့လျီတ် အီ နပ် ဒီ ဘူင် ဘော ကာလာင် ဒီ ဘေ တဝ်း၊ ‘ဘေ တူ လုဝ် ခမ် ဒီ ဘဲန် မှာယ် ခုန်ဒီခမ် အီ အိုပ် မိူင် ဘာဘဲ တီ။’ 10 ဒူအီ ဂေ တီ၊ ဂေ နပ် ဒီ ကာလာင် အီ တူ မှာန် အီ တဲး ဘေ ဟာဝ် ခဲင် မိူင် တူင့်။ ပါယ် တီ အုဝ် ဒီ ဟုဝ် တဝ် ဘေ၊ တဲး ဘေ လိုဝ် စှိုမ်။ 11 န့ ယီ မုး ဂေ အီ ဟဲ့ ခမ် ဒီ ဘဲန် ပီ ဆုတ့် ပီ စ်ု ခုန်ဒီခမ် အီ အိုပ် မိူင် ဘာဘဲ တီ၊ အုဝ် ဒီ တဲး ဂေ ကွယ် ခဲင် မိူင် ဂေ၊ တဲး ဂေ ဘ်ု မာန် ဂေ ဘော ဒူင် နာ ဂေ ခဲင် မာန် မိူင် ဂေ။”

12 အုဝ် မိူဝ် ဟဲ့ ကာလာင် ဂြုဝ်း တီ ဒီ ခုန်ဒီခမ် အာဇေဒေကီ တဝ်း၊ “တဲး မဲ ခမ် ဒီ ဘူင် ဂါန် ခုန်ဒီခမ် မိူင် ဘာဘဲ၊ တဲး န့ ပီ အီ စှိုပ် အဲ့မဝ် ဒီ မဲင် မဲ။ တဲး ဘေ ခမ် ဘော ဒီ ဘဲန် ပီ ဆုတ့် ပီ စ်ု အန်၊ ကွဲ့ တဲး မဲ လုဝ် ယမ်။ 13 ဆေ မဲ တူ ဘူင် ပါယ် တီ ဂေ ဒါ ကာညာ မဲ ဘော ဂေ ဒူအီ မဲ ဘောကာဂ့လျီတ်၊ ဘေ ဒီ ဘော ယမ် တူတ့် ဒီ မာပွါ့ လာင်။ ဂေ ဒီ ခမ် ဘော အာဖေ အာရေ အေတ့် ပီ ဒီ ဟူမ် ဘော ဆဝ် ရောဂါ။ ဇဝ်ဖြာ ဒီ ဘူင် ဒီ ဂေ ဒူအီ အီ တူ ခမ် ဒီ ဘဲန် ပီ ဆုတ့် ပီ စ်ု ခုန်ဒီခမ် မိူင် ဘာဘဲ ပါယ် တီ။ 14 ကွဲ့ တဲး မဲ ထူမ် ဂြုဝ်း ဂေ ဒါ အီ ဘျာန် ဂြုဝ်း ဇဝ်ဖြာ အီ ကာလာင် ဒီ မဲ တဝ်း၊ ‘မဲ တူ လုဝ် ဘဲန် ပီ ဆုတ့် ပီ စ်ု ခုန်ဒီခမ် ခဲင် မိူင် ဘာဘဲ။’ ဂေ ကာလုဝ် မဲ။ 15 ဇဝ်ဖြာ ယီ ဟဲ့ တဝ်း၊ အုဝ် တူ စ်ု ဂေ။ ဂေ ဘော နပ် ဒီ ဂါဝ် ပွုန် အုဝ်၊ ညိုင်ရာင် ဒီ ဘျာန် ဂြုဝ်း ဇဝ်ဖြာ။ န့ ဘော တဲး အုဝ် လုဝ် ဝီ ဟုဝ် တဝ် ဘေ ဘော ဂေ ဒါ အီ ဘျာန် ဂြုဝ်း ဇဝ်ဖြာ တီ ဒီ ဘေ။ န့ တဲး ဘေ လိုဝ် စှိုမ် တူတ့်။”

16 ဝါယ် အန် တီ၊ အုဝ် ကာလာင် ဒီ ဂေ ဒါ အီ လှူ ဒီ ဇဝ်ဖြာ ဘော ဒီ ဂေ ဒူအီ ကိူန် တဝ်း၊ “ဇဝ်ဖြာ ဟဲ့ တဝ်း၊ ကွဲ့ တဲး ဘေ ထူမ် ဂြုဝ်း ဂေ ဒါ အီ ဘျာန် ဂြုဝ်း ဇဝ်ဖြာ အီ တဝ်း ဒီ ဘေ၊ ‘အာဝ် ဘော လှေန့် အေ ဒီ ဝီ ဒိုဝ်း တး တူတ့် ကြုဝ်ကြာမ် ခဲင် ဟုဝ် ဇဝ်ဖြာ အီ ဟဲ့ ဝီ ဟာဝ် ကွယ် ခဲင် မိူင် ဘာဘဲ တီ။’ ဒူအီ ဂေ တီ၊ ဂေ နပ် ဒီ ကာလာင် ဂြုဝ်း ကာလုဝ် ဒီ ဘေ။ 17 ကွဲ့ တဲး ဘေ ထူမ် ဂြုဝ်း ဂေ တီ၊ တဲး ဘေ ခမ် ဒီ ဘဲန် ပီ ဆုတ့် ပီ စ်ု ခုန်ဒီခမ် အီ အိုပ် မိူင် ဘာဘဲ တီ၊ ကွဲ့ တဲး ဘေ လုဝ် ယမ်။ ကွဲ့ တဲး ဘေ ဘူင် တဲး မိူင် နီ ဘဲန် ဒူင် ယေန် ဒူင် ငွင့် ဒူအီ။ 18 ဆေ ဒူအီ ဂေ တီ ဟဲ့ မုး ဒူအီ အီ ဘျာန် ဂြုဝ်း ဇဝ်ဖြာ မှာန် အာခါခ်ု၊ တဲး ဂေ ဝီ ဆာခိုဝ် မှာန့် ဒီ ဇဝ်ဖြာ အီ အိုပ် တူတ့် ဒွန် မျုဝ် လွင် ကြုဝ်ကြာမ် အီ ဆီ ဂိတ် ခဲင် ဟုဝ် ဇဝ်ဖြာ ဘော ခဲင် ဟုဝ် ခုန်ဒီခမ် အီ အိုပ် မိူင် ယူဒါ ဘော ကွယ် ခဲင် မိူင် ယေရူဆာလဲမ်၊ ကွဲ့ တဲး ဂေ ပွိုန် ဒီ ဒိုဝ်း ဟာဝ် ခဲင် မိူင် ဘာဘဲ။ 19 အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ တီ၊ 20 ဒေါ မှေတ့် ဟာဝ် အန် အာယေခေါနီ အီ မုး ဂွန် ခုန်ဒီခမ် အာယောယာခိမ် အီ အိုပ် မိူင် ယူဒါ ဘော ဂေ အာမူ အာမာတ် အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ၊ တဲး ဂေ ဟာဝ် ခဲင် မိူင် ဘာဘဲ တွိုန်။ အန် ဆီ အုန် ရွင့် ဘွင့် ဒေန့်၊ မ့ပါန် ဘွင့် ဒေန့် ဘော ကာလေန့် လဝ် အီ ဘိုမ် မ့ပါန် အိုမ် တီ ဘော ကြုဝ်ကြာမ် ခဲင် ဟုဝ် ဇဝ်ဖြာ မင် ကာလဝ့်။” 21 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ကာလာင် ပါယ် နီ လွင် ကြုဝ်ကြာမ် အီ ဆီ ဂိတ်၊ ဆီ ကွယ် ခဲင် ဟုဝ် ဇဝ်ဖြာ ဘော ခဲင် ဟုဝ် ခုန်ဒီခမ် မိူင် ယူဒါ ဘော ခဲင် မိူင် ယေရူဆာလဲမ်။ အန် တဝ်း၊ 22 “ကြုဝ်ကြာမ် ဂေ တီ၊ ဂေ ဒီ ဒိုဝ်း ဟာဝ် တူတ့် ခဲင် မိူင် ဘာဘဲ။ န့ ဒီ ဘော ကွယ် ဒီ တီ၊ တဲး န့ ကော ဇမ် ဆီငဲ ပန် ဒီ ဝီ တး ဒိုဝ်း အုဝ် တူတ့် ဒွန် မျုဝ်၊ ဝီ ဟာဝ် တိုယ် ဒူင် ကွယ် ဘြိမ် အန်။” ဇဝ်ဖြာ ဟဲ့ ကာလာင် ပါယ် တီ။