1 အာယောယာခိမ် အီ မုး ဂွန် အာယုဝ်ဆီယာ ဟဲ့ ကာစုး ဒီ ဘဲန် ခုန်ဒီခမ် အီ အိုပ် မိူင် ယူဒါ။ ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အုဝ်။ 2 အန် တဝ်း၊ “တဲး မဲ ဟာဝ် ကွယ် ခဲင် ဝဲင် ဟုဝ် ဇဝ်ဖြာ၊ ဝီ ကာလာင် ဂြုဝ်း နီ ပဲ့ ဟဲ့ ကာလာင် အုဝ် ဒီ မဲ။ တဲး မဲ ကာလာင် ဘော ဒွန် မျုဝ် ဒီ ဂေ ဒူအီ အီ ကွယ် ခဲင် မိူင် ယူဒါ အီ တး ကြိုပ် ဇဝ်ဖြာ။ ကွဲ့ တဲး မဲ ချြီင် ဒီ ဂေ ခေါ အူ ဒဲ။ 3 ယုဝ် ဂေ ဆော မိုဝ်း နဝ်း ဆီ ထူမ် ဘော ဝီ ဝဲန် နာ ဟာယ် နာ မိူက် ပီ ဘူင် ဂေ ဝီ မှဝ် ဝီ အန်။ ယုဝ် အုဝ် မိူဝ် ဆော ဝီ ကာပ့လု နဝ်း အုဝ်၊ တူ ဝီ ဘူင် ပဲ့ ဟဲ့ တဝ်း အုဝ် ဒီ ဒမ် မှာပ် ဒီ ဂေ ကူပ် ဟဲ့ ဘူင် ဂေ အီ တူ မွှိုမ်။ 4 တဲး မဲ ကာလာင် ဒီ ဂေ ပါယ် နီ။ ‘ဇဝ်ဖြာ ဟဲ့ တဝ်း၊ တဲး ဘေ ထူမ် ဂြုဝ်း အုဝ် ပီ ဒမ် အုန် အုဝ် ဒီ ဘေ။ 5 တဲး ဘေ ထူမ် ဂြုဝ်း ဒဲစေန့် အုဝ် အီ မုး ဒါ အီ ဘျာန် ဂြုဝ်း ဇဝ်ဖြာ ပဲ့ ဟဲ့ စ်ု အုဝ် ဟာဝ် ကာလာင် ဒီ ဘေ ဆေဆေ။ ဆေ ဘေ ယီ တူ ထူမ်၊ 6 အုဝ် ဒီ ဘူင် တဲး ဟုဝ် ဇဝ်ဖြာ နီ ပီ မိူင် ဆီလုဝ်။ အုဝ် တဲး မိူင် နီ ဘဲန် ပီ အေး ပီ ဒိူင် ဒူအီ ဒွန် မျုဝ် ဒဲင် ကာဒါယ် နီ။’”

7 ဂေ ဒါ အီ လှူ ဒီ ဇဝ်ဖြာ ဘော ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ ဘောကာဂ့လျီတ် ထူမ် ဂြုဝ်း ပီ ကာလာင် အာယေရေမီ ခဲင် ဟုဝ် ဇဝ်ဖြာ တီ။ 8 အာယေရေမီ မိူဝ် ဟဲ့ ဟွတ့် ကာလာင် ဂြုဝ်း ပီ စ်ု ဇဝ်ဖြာ အန် ကာလာင်၊ တဲး ဂေ ဒူအီ ဘောကာဂ့လျီတ် ထူမ်။ ခဲ့ ကွယ် ဂေ ဒါ အီ လှူ ဒီ ဇဝ်ဖြာ ဘော ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ ကိူန်။ ဂေ မိူဝ် တဝ်း ဒီ အန်၊ “ဟဲ့ လုဝ် ငဝ်း ယမ် မဲ အာခါခ်ု။ 9 မှဝ် န့ ပါယ် ပီ ဘိုင် မဲ ပွုန် ဇဝ်ဖြာ ဘော ကာလာင် တဝ်း၊ ဟုဝ် ဇဝ်ဖြာ နီ ဒီ ပီ မိူင် ဆီလုဝ်။း မှဝ် န့ ပါယ် ပီ တဝ်း မဲ၊ မိူင် နီ ဒီ ဘဲန် ဒူင် ယေန် ဒူင် ငွင့် ဒူအီ။း” ခဲ့ ကွယ် ဂေ ဒူအီ ဘောကာဂ့လျီတ် ဘော တး ကာဇု ဝဲင် ရူပ် အာယေရေမီ ခဲင် ဝဲင် ဟုဝ် ဇဝ်ဖြာ တီ။ 10 ဒေါ ဝီ ယိုဝ် ဂေ အာမူ အာမာတ် အီ ကွယ် ခဲင် မိူင် ယူဒါ လွင် အန် တီ၊ ဂေ ဘော လေး ခဲင် ဟုဝ် ခုန်ဒီခမ်၊ ဝီ ဟာဝ် ဒီ ဟုဝ် ဇဝ်ဖြာ။ ဂေ ဘော တး ကွယ် ဒီ ဘာင် မာလုဝ်း ဟုဝ် ဇဝ်ဖြာ အီ စိူဝ် မာလုဝ်း ကာမာယ်။ 11 ဒေါ အန် တီ ဂေ ဒါ အီ လှူ ဒီ ဇဝ်ဖြာ ဘော ဂေ ဒါ အီ ဘျာန် ဂြုဝ်း ဇဝ်ဖြာ၊ ဂေ ဝီ ကာလာင် ဒီ အာမူ အာမာတ် ဂေ တွိုန် ဘော ဒီ ဂေ ဒူအီ ကိူန် တဝ်း၊ “ဒူအီ ဝီ နီ ဟဲ့ ကာအာပ် ဒမ် မှာပ် ဒီ အန်၊ တဲး အန် ကော ယမ်။ ခုဝ်၊ အန် ဟဲ့ ဘျာန် ဂြုဝ်း ဇဝ်ဖြာ ဘော ကာလာင် နာ တူ မွှိုမ် လွင် မိူင် နီ။ ပဲ့ ဟဲ့ ကာလာင် အန် ဘေ မိူဝ် ဟဲ့ ထူမ် ရာင် ဘေ။”

12 အာယေရေမီ ဝီ ကာလာင် ဒီ ဂေ အာမူ အာမာတ် ဘော ဒီ ဂေ ဒူအီ ဘောကာဂ့လျီတ် တဝ်း၊ “ဇဝ်ဖြာ ဟဲ့ စ်ု အုဝ်၊ တဲး အုဝ် ကာလာင် လွင် ဟုဝ် ဇဝ်ဖြာ ဘော လွင် မိူင် နီ ခဲ့ ပဲ့ ဟဲ့ ထူမ် ဘေ။ 13 ဒေါ တီ နီ တဲး ဘေ ဝဲန် ပဲ့ ဟဲ့ ဒွိုမ် ဘူင် ဘေ၊ ဝီ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဆေ ဘေ ဘူင် ပါယ် တီ၊ အန် ဇဝ် ဒီ ဝီ ကာပ့လု နဝ်း အန်၊ တူ ဝီ ဘူင် ပဲ့ ဟဲ့ တဝ်း အန်၊ တူ ဝီ တဲး အာဖေ အာရေ တး ဒူင် ကွယ် ဘေ။ 14 န့ ယီ မုး အုဝ်၊ ဘေ ဟဲ့ အိုပ် အုဝ်၊ ဘေ ပွိုန် ဘူင် ဒီ အုဝ် ခဲ့ ပီ ဆီ ဘူင် ဘေ။ 15 ပါယ် တီ ဆေ ဘေ ငဝ်း ယမ် အုဝ် အီ မုး ဒူအီ တူ မိုဝ်း မှာပ်၊ န့ မုး ဘေ ဘော ဒူအီ ဘောကာဂ့လျီတ် ခဲင် မိူင် နီ၊ ဘေ ဒီ ခမ် မှာပ် တီ။ တဲး ဘေ နပ်၊ ဇဝ်ဖြာ ဟဲ့ စ်ု အုဝ်၊ တဲး အုဝ် တး ဒူင် ကွယ် ဘေ ဘော ကာလာင် ဂြုဝ်း နီ ဒွန် မျုဝ် ဒီ ဘေ။”

16 ဟဲ့ ဟွတ့် ပါယ် တီ၊ ဂေ အာမူ အာမာတ် ဘော ဂေ ဒူအီ ကိူန် ဘောကာဂ့လျီတ် ဘော ဝီ ကာလာင် ဒီ ဒါ အီ လှူ ဒီ ဇဝ်ဖြာ ဘော ဒီ ဂေ ဒါ အီ ဘျာန် ဂြုဝ်း ဇဝ်ဖြာ။ ဂေ တဝ်း၊ “ဒူအီ ဝီ တီ တူ ကာအာပ် ယမ်။ အန် ဟဲ့ ဘိုင် ပွုန် ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ ဝီ ကာလာင် ဒီ အေ။”

17 ဂေ အီ မုး ဒါ တာင် ခဲင် မိူင် မင် အီ၊ ဂေ ဘော ယိတ့် ကာလာင် ဒီ ဂေ ဒူအီ ကိူန် ဘောကာဂ့လျီတ်။ ဂေ တဝ်း၊ 18 “ဒေါ မုး စုဝ် ဘာန် ခုန်ဒီခမ် အာဟေစကီ အီ အိုပ် မိူင် ယူဒါ၊ ဟဲ့ မိုဝ်း အာမီခါ အီ မုး ဒူအီ အီ ကွယ် ဒူင် စိူဝ် မောရာဆာ။ အန် ဟဲ့ တး ဘျာန် ဂြုဝ်း ဇဝ်ဖြာ။ အန် ဟဲ့ ကာလာင် ဒီ ဒူအီ ဘောကာဂ့လျီတ် တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ မိူင် ဇီအူန် အီ ဟဝ် ဒီ ထဲ ပီ ဂေ ထဲ ဒူင် နာ။ မိူင် ယေရူဆာလဲမ် ဒီ ဘဲန် မ့ပိုမ် ကာဒါယ် ဂေ ကာပုး။ နွန် ဒူင် ကွယ် ဟုဝ် ဇဝ်ဖြာ မိူဝ် ဒီ ဘဲန် နင် ဟေ ဘော နင် ပြဲ။’

19 ဒေါ အန် တီ အာဟေစကီ အီ မုး ခုန်ဒီခမ် အီ အိုပ် ဒူအီ အာယူဒါ ဘော ဂေ ဒူအီ အာယူဒါ ဘောကာဂ့လျီတ်၊ ဂေ တူ ငဝ်း ယမ် အာမီခါ။ ခုန်ဒီခမ် တီ ဘော ဝီ ရုဝ်ဆေ ဇဝ်ဖြာ၊ ဝီ မှာန့် ဒီ ဇဝ်ဖြာ၊ တဲး အန် ကာဝေ ဂေ။ ဇဝ်ဖြာ ဘော ဝီ ဘျွင် နဝ်း အန်၊ တူ ဝီ ဘူင် အာဖေ အာရေ ပဲ့ ဟဲ့ တဝ်း အန် ဒီ ဘူင်။ န့ ယီ မုး ယေ၊ ယေ ဒီ ဘူင် တဲး ဇဝ်ဖြာ ဒမ် မှာပ် ဒီ ယေ။”

20 န့ ဘော မိုဝ်း ပေါ အူ ဝီ အီ ဟဲ့ ဘိုင် ပွုန် ဇဝ်ဖြာ ဘော ဘျာန် ဂြုဝ်း ဇဝ်ဖြာ။ ဝီ တီ ဘော မုး အာအူရီယာ အီ မုး ဂွန် အာဆေမာယာ အီ တး ခဲင် မိူင် ကီရီယာတ်ယာရိမ်။ အန် မိူဝ် ဟဲ့ ကာလာင် အီ တူ မွှိုမ် လွင် မိူင် နီ ဘော လွင် ကာဒါယ် ခဲင် မိူင် နီ။ ဂြုဝ်း ပီ ကာလာင် အန် န့ ဘော ပီ ပီ ကာလာင် အာယေရေမီ ဒေါ တီ နီ။ 21 ဒေါ ယိုဝ် ခုန်ဒီခမ် အာယောယာခိမ် ဘော ဂေ ဒါ ဆိုက် အန် ဘော ဂေ အာမူ အာမာတ် အန် ဂြုဝ်း ပီ ကာလာင် အာအူရီယာ တီ၊ ခုန်ဒီခမ် ဘော ဆီ ငဝ်း ဝဲန် ဘော အာအူရီယာ။ အာအူရီယာ ဘော နပ် လွင် အန် တီ၊ အန် ဘော ယုဝ် ဘော ဝီ တဝ် ဟာဝ် ခဲင် မိူင် အဲဂိုပ်၊ တဲး အန် လွတ်။ 22 ခုန်ဒီခမ် အာယောယာခိမ် ဘော ဝီ စ်ု အာအေလာနာထာန် အီ မုး ဂွန် အာဆာဘူတ် ဘော ဂေ အီ ဟဝ် မင် အီ၊ တဲး ဂေ ဟာဝ် ဒီ မိူင် အဲဂိုပ်။ 23 ဂေ မိူဝ် ဟာဝ် မှေတ့် အာအူရီယာ ခဲင် မိူင် အဲဂိုပ်၊ ဝီ တး တိုယ် အန် ဒီ ခုန်ဒီခမ် အာယောယာခိမ်။ ဟဲ့ ဟွတ့်၊ ခုန်ဒီခမ် ဘော စ်ု အီ ငဝ်း ယမ် အာအူရီယာ။ ဟဲ့ ဟွတ့်၊ ဂေ ဘော ဝီ ဒိပ် အန် ခဲင် ဘာရေဝ် အီ ဟဝ်။ 24 ဒဲင် တီ အာဟီကမ် အီ မုး ဂွန် အာဆာဖာန် စွယ် ကာလာင် အီ မွှိုမ် လွင် အာယေရေမီ။ ပါယ် တီ ဂေ တူ အာပ် အန် ဒီ ဒူအီ ကိူန်၊ တူ တဲး ဂေ ပွိုန် ဒီ ငဝ်း ယမ် အန်။