1 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ လွင် ဂေ ဒူအီ အာယူဒါ။ ဒေါ အန် တီ အာယောယာခိမ် အီ မုး ဂွန် ခုန်ဒီခမ် အာယုဝ်ဆီယာ ဟဲ့ ဘဲန် ခုန်ဒီခမ် ဂေ ဒူအီ အာယူဒါ ဟဲ့ နုဝ့် ဖွုန် ဆီနမ်။ ခုန်ဒီခမ် ခဲင် မိူင် ဘာဘဲ အီ စိူဝ် အာနေဘူခတ်နေစာ မိူဝ် ဟဲ့ ဘဲန် ခုန်ဒီခမ် အာဒါ အူ ဆီနမ်။ 2 အာယေရေမီ ဝီ ကာလာင် ဒီ ဂေ ဒူအီ အာယူဒါ ဘော ဂေ ဒူအီ ခဲင် မိူင် ယေရူဆာလဲမ် ဘောကာဂ့လျီတ်။ 3 အန် တဝ်း၊ “စုး ဆိန့် ဒေါ ဘဲန် အာယုဝ်ဆီယာ အီ မုး ဂွန် အာမူန် ခုန်ဒီခမ် အီ အိုပ် ဒူအီ အာယူဒါ အာဒါ ဂိုဝ် ဒီ အူယ် ဆီနမ် ကော ဇမ် အာတိုဝ် နီ၊ ဟဲ့ ဝီ ပွိုန် အာ ဂိုဝ် ဒီ အူယ် ဆီနမ်။ ဒေါ အန် တီ ဇဝ်ဖြာ ဟဲ့ ကာလာင် ဂြုဝ်း ဒီ အုဝ်။ အုဝ် မိူဝ် ဟဲ့ ဝီ ကာလာင် ဒီ ဘေ ဆေဆေ။ မာလဲ၊ ဘေ ယီ တူ ထူမ်။

4 ဇဝ်ဖြာ မိူဝ် ဟဲ့ စ်ု ဂေ ဒါ အီ ဘျာန် ဂြုဝ်း ဇဝ်ဖြာ အီ မုး ဒဲစေန့် အန်၊ တဲး ဂေ တး ဒူင် ကွယ် ဘေ ဘဲန် ဇေန့် ဘဲန် ဇေန့်။ မာလဲ၊ ဘေ ယီ တူ ထူမ်၊ တူ တဲး န့ လိုပ် ဟျုဝ့် ဘေ။ 5 ဂေ ဟဲ့ တဝ်း၊ ‘တဲး ဘေ ဝဲန် နာ ဟာယ် နာ မိူက် ပီ ဘူင် ဘေ ရာင် အာဆေ ရာင် အန်။ တဲး ဘေ ဒွန် အီ ဝဲန် ပဲ့ ဟဲ့ ဘူင် ဘေ အီ ဟဲ့ ကာလိုပ်၊ အီ တူ မွှိုမ်။ ဆေ ဘေ ဘူင် ပါယ် တီ ဘေ ဒီ ဘော ပွိုန် ဒီ ကွယ် ဆေဆေ ခဲင် မိူင် ပဲ့ ဟဲ့ ဒွါ ဇဝ်ဖြာ ဒီ ဘေ ဘော ဒီ ဂုန့် ဒင် ဘေ ဆိန့် အာတ့် နီ။ 6 ကွဲ့ တဲး ဘေ ဝီ ဘိုင် ဝီ ကြိုပ် ဇဝ် ပီ ကြိုပ် အီ ဟဝ်။ ကွဲ့ တဲး အာရိုပ် ရာင် ပီ ဘူင် ဘေ ဝီ ဘူင် တဲး အုဝ် ရူ စာဝ် ဒီ ဘေ။ ဆေ ဘေ ထူမ် ဂြုဝ်း အုဝ်၊ အုဝ် မိူဝ် တူ ဒမ် မှာပ် ဒီ ဘေ။’”

7 ဇဝ်ဖြာ ပီ ဝီ တဝ်း၊ “အုဝ် ပီ ဘော ဟဲ့ တဝ်း ပါယ် တီ မိူဝ်၊ ဘေ တူ ထူမ် ဂြုဝ်း အုဝ်။ ဘေ ဝီ ဘူင် နာ မိူက်၊ တဲး အုဝ် ရူ ဒီ ဘေ၊ တဲး အုဝ် လုဝ် ဒမ် မှာပ် ဒီ ဘေ။”

8 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ကူပ် တူ ထူမ် ဘေ ဂြုဝ်း အုဝ် တီ၊ 9 အုဝ် ဒီ ဘူင် တဲး ဂေ ဒူအီ ဒွန် မျုဝ် အီ ကွယ် ခဲင် မိူင် နာ ကွာ တး ကာဂုဝ်း ဒီ ဘေ။ အုဝ် ဒီ ဘူင် တဲး အာနေဘူခတ်နေစာ အီ မုး ခုန်ဒီခမ် မိူင် ဘာဘဲ တး ကာဂုဝ်း ခဲင် မိူင် ဘေ။ အုဝ် ဒီ တဲး ဂေ ကာဂုဝ်း ဘော ဒီ ဒူအီ ခဲင် ရဝ် ခဲင် မိူင် ဘော ဒီ ဂေ ဒူအီ ဒွန် မျုဝ် အီ ကွယ် ရူပ် မိူင် နီ။ အုဝ် ဒီ ပျာတ့် တဲး ဂေ ကော ဟြာယ် ဘောကာဂ့လျီတ်၊ တဲး ဂေ ဘဲန် ပီ ဇွင့် အီ ဟဝ်၊ ဘဲန် ဘော ပီ နဲန အီ ဟဝ်။ တဲး ဒူင် ကွယ် ဂေ ဘဲန် ဒူင် ဘ့လဝ် ဒူင် ရာမ် ဆေဆေ။ 10 အုဝ် ဒီ ဘူင် တဲး ဂြုဝ်း ဂေ အီ ခူယ် ဒါခိုယ် ဟြာယ်၊ ဂြုဝ်း ဂေ အီ ဘျုဝ် ဘျုဝ် ကျဝ် ကျဝ် ဘော ဂြုဝ်း ဂေ အီမာယ် အီဘိုန့် အီ မွင့်ကာရာ ခတ် ဘော ဟမ် မာဝ် ပီ ကြိတ် အီ ဒီ ငှုဝ်၊ ဘော ဘ့လာင် ငဝ် အွမ်၊ ကွဲ့ တဲး န့ ဆီ မိုဝ်း ကာတဲ ဒူအီ ဂေ တီ။ 11 ခဲင် မိူင် တီ ဘော မိူင် န့ ဒီ ဘော ဘဲန် တူတ့် အီ ကာပျာတ့် လိုဝ်။ န့ ဒီ ဘော ဘဲန် ဒူင် ယေန် ဒူင် ငွင့် ဒူအီ။ ဒူအီ ဂေ တီ ဘော ဒွန် မျုဝ်၊ ဂေ ဒီ ဘဲန် တူတ့် ပီ ဆုတ့် ပီ စ်ု ခုန်ဒီခမ် ခဲင် မိူင် ဘာဘဲ။ ဂေ လုဝ် ကွယ် ဒီ တီ အာဒါ ဘူ ဂိုဝ် ဆီနမ်။”

12 ဇဝ်ဖြာ ပီ ဝီ တဝ်း၊ ဆေ ဟဲ့ နုဝ့် ဘူ ဂိုဝ် ဆီနမ် တီ၊ အုဝ် ဒီ ဝီ ဒမ် မှာပ် ဒီ ခုန်ဒီခမ် အီ အိုပ် မိူင် ဘာဘဲ ဘော ဒီ ဂေ ဒူအီ အီ ကွယ် ခဲင် မိူင် ပီ အိုပ် အန်။ အုဝ် ဒီ ဘူင် တဲး မိူင် ဂေ ဘဲန် ဒူင် ငွင့် ဒူင် ယေန် ဒူအီ။ 13 အုဝ် ဒီ ဘူင် ဒီ ဒူအီ ခဲင် မိူင် တီ၊ တဲး န့ ဒူပ် ပဲ့ ဟဲ့ စ်ု အုဝ် အာယေရေမီ ကာလာင်။ အန် ဟဲ့ ကာလာင် တဲး န့ ကာဘး ဒီ ဒူအီ ဘောကာဂ့လျီတ် ခဲင် မာန် မိူင် တီ။ အုဝ် ဇဝ်ဖြာ ဒီ ဘူင် တဲး န့ ဒူပ် ခဲ့ ပီ ဒဲမ် အုန် ခဲင် ဘပ် အုဝ် နီ။ 14 ခဲ့ ကွယ် ဂေ ဒူအီ ကိူန် ဘောကာဂ့လျီတ်၊ ဘော ဂေ အီ မုး ခုန်ဒီခမ် တာင်၊ ဂေ ဒီ တဲး ဒူအီ ဘာဘဲ ဝီ ဘဲန် တူတ့် မှာယ် ဂေ။ အုဝ် ဒီ ဝီ ဘူင် ဝျီ့ ဒီ ဂေ၊ တဲး ဂေ ဝီ ခမ် မှာပ် ပဲ့ ဟဲ့ ဘူင် ဂေ။

15 ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ကာလာင် ဒီ အုဝ် တဝ်း၊ “တဲး မဲ ဒိုဝ်း ဆီလယ့် အိုမ် မာငုန် ပီ ဂူင့် အုဝ် အီ ဟဲ့ ပီ နဝ်း ရူ အုဝ်။ အုဝ် ဒီ တိုယ် မဲ ဒီ ဒူအီ ဒွန် မျုဝ် ဒွန် ခြိုဝ်။ တဲး ဂေ ဘောကာဂ့လျီတ် ဒျီင် ခဲင် ဆီလယ့် နီ။ 16 ဂေ ဟီ ဟွတ့် ဒျီင်၊ ဂေ ဒီ ယိုတ့် ဘော ဟာဝ် ကာကျီင် ကာကေး ကာကျီင် ကာကေး။ ခုဝ်၊ အုဝ် ဒီ ဝီ တဲး ဂေ ဒူအီ အီ ဂူင့် မာပွါ့ လာင် တး ကာဂုဝ်း ဒီ ဂေ။” 17 ဝါယ် အန် တီ အုဝ် ဒိုဝ်း ဆီလယ့် ပီ ဂူင့် ဇဝ်ဖြာ တီ၊ ဟာဝ် ဒွါ ဒီ ဂေ ဒူအီ ပီ စ်ု ဇဝ်ဖြာ အုဝ် ဟာဝ်။ 18 ဒူအီ ဂေ တီ ဘော မုး ဒူအီ မိူင် ယေရူဆာလဲမ်၊ ဒူအီ မိူင် ယူဒါ ဘော ခုန်ဒီခမ် မိူင် ယူဒါ ဘော ဂေ အာမူ အာမာတ် အန်။ ဂေ ဒီ ဘော ဒျီင် အိုမ် မာငုန် တီ၊ တဲး မိူင် ဂေ တီ ကော ဘဲန် ဒူင် ယေန် ဒူင် ငွင့် ဒူအီ၊ ဘဲန် ဘော ပီ ဖျာက် ပီ နဲန အီ ဟဝ် ပီ ဒေါ တီ နီ နီ။ 19 ဒူအီ ဂေ တီ ဘော မုး ခုန်ဒီခမ် ခဲင် မိူင် အဲဂိုပ် ဘော ဂေ ဒဲစေန့် အန် ဘော ဂေ အာမူ အာမာတ် အန်။ ဘော ဂေ ဒူအီ ဘောကာဂ့လျီတ် ခဲင် မိူင် အန်။ 20 န့ မုး ဘော ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဂေ ဘော ဒါ တာင် ခဲင် မိူင် မာအုတ် ဘော ဒါ တာင် ခဲင် မိူင် ဖီလီထီ ဘော ဒူအီ ခဲင် မိူင် အာစာဆာခေလူန်၊ ဒူအီ ခဲင် မိူင် ဂါဆာ၊ ဒူအီ ခဲင် မိူင် အေခြူန် ဘော ဒူအီ ခဲင် မိူင် အာစုတ် အီ ဆီ ဂိတ် ဆီ ကွယ်။ 21 န့ မုး ဘော ဒူအီ မိူင် အေဒူမ်၊ ဒူအီ ခဲင် မိူင် မုဝ်အာပ် ဘော ဒူအီ ခဲင် မိူင် အမ်မူန်။ 22 န့ မုး ဘော ဒါ တာင် ခဲင် မိူင် ထူရုဝ် ဘော ဒါ တာင် ခဲင် မိူင် ဆီဒူန် ဘော ဂေ ဒါ တာင် အီ အိုပ် မိူင် အီ ကွယ် နာ ဒွယ် အိုမ် နမ်မုက်ဆာရာ။ 23 န့ မုး ဘော ဒူအီ အီ ကွယ် ခဲင် မိူင် ဒေဒါန်၊ ဒူအီ ခဲင် မိူင် ထေမာ ဘော ဒူအီ ခဲင် မိူင် ဘုတ် အီ နပ် ဒီ ဂါ့ ဒီမုဝ်း ဒီ ကုင်ကာပ် ဂေ ဘော ဟိုက် ဒီ ကာလာ ဂေ။ 24 န့ မုး ဘော ဂေ ဒါ တာင် ဒူအီ အာမျုဝ် အာရေဘီယာ ဘော ဒါ တာင် ဂေ ဒူအီ ဒွန် မျုဝ် အီ ကွယ် ခဲင် ပြဲ ကာဟဝ်း။ 25 န့ မုး ဘော ခုန်ဒီခမ် ခဲင် မိူင် ဇီမာရီ၊ ခုန်ဒီခမ် ခဲင် မိူင် အေလမ် ဘော ခုန်ဒီခမ် ဘောကာဂ့လျီတ် အီ အိုပ် ခဲင် မိူင် နာ ကွာ။ 26 န့ မုး ခုန်ဒီခမ် ဂေ အီ ကွယ် ခဲင် မိူင် ဘ့လာက် နာ ကွာ ဒွန် ကာဒင် ဘော ဂေ အီ ကွယ် တူင့် ကွယ် ကာတတ်။ ဒီ ကာဒဲ့ ဆိူတ် ဘော ခုန်ဒီခမ် အီ အိုပ် မိူင် ဘာဘဲ လုဝ် ခမ် မှာပ် အန်။

27 ဇဝ်ဖြာ ပီ ဝီ တဝ်း ဒီ အုဝ်၊ မဲ လုဝ် ကာလာင် ဒီ ဒူအီ ဂေ တီ တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ ‘ကူပ် ဒီ တး ဇမ် ဂေ အီ ဂူင့် မာပွါ့ လာင် ဂေ ဘ့လာ လျီး၊ တဲး န့ ပီ ဘေ လုဝ် ဒျီင်၊ တဲး ဘေ ကော ယိုတ့် ကော ဟိုဝ် ဘော ကေး တူတ့်။ ကွဲ့ တဲး ဘေ ဆီ ဝီ ယိတ့် ဒေါ မှဝ်။’

28 ဆေ ဂေ ယီ ဆီ ဒျီင် ဆီလယ့် တီ၊ တဲး မဲ ဝီ ကာလာင် ဒီ ဂေ၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း၊ ဘေ လုဝ် ဒျီင် အာခါခ်ု မှာန်။ 29 တဲး ဘေ ယွတ်၊ အုဝ် ဟဲ့ ကာစုး ဒီ ဒမ် မှာပ် ဒီ ဂေ ဒူအီ အီ ကွယ် ခဲင် မိူင် အီ စိူဝ် ဒူပ် ပီ စိူဝ် အုဝ်။ ဘေ မိူဝ် တူ လွတ် ခမ် မှာပ် တီ ဒေါ မှဝ်။ ခုဝ်၊ အုဝ် ဟဲ့ စ်ု ဂေ အီ ဂူင့် မာပွါ့ လာင်၊ ဟာဝ် ဒူင် ကွယ် ဒူအီ ဒဲင် ကာဒါယ် နီ ဒွန် ပ့လုဝ့်။’” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

30 ဂြုဝ်း ဇဝ်ဖြာ ပီ ဒီ လုဝ် ကာလာင် မဲ ဒီ ဂေ၊ န့ ပါယ် နီ၊ ‘ဇဝ်ဖြာ အီ ကွယ် ဒဲင် နွန် စာ အန် ဘော ဒတ် ကာလာင်။ အန် ဇဝ် အီ ကွယ် ခဲင် ကာင် ဇဝ်ဖြာ၊ အန် ဒတ် ရျီင်။ အန် ဇဝ် ဒီ ဝီ ဘူင် ကာဘး ဒီ ဂေ ဒူအီ အီ ဟဲ့ ပီ မာဘူ၊ အီ ကွယ် ခဲင် ကာပိုမ် အန် ဇဝ်။ အန် ဇဝ် ဘော ဒတ် ရျီင် ကာဆဝ် ဘော ဒတ် ကာခဲန့် ဒီ ဂေ ဒူအီ အီ ကွယ် ဒဲင် ကာဒါယ် နီ ဒွန် ပ့လုဝ့်။ အန် တဲး န့ ကော ပီ ဂေ အီ ကြိတ် ဘ့လေ မာငုန် နပ် ဒီ ဒတ် ရျီင်။

31 ပီ ရျီင် ဆီနန် ဆီနိူင် ဂေ၊ န့ ဒီ ဘော လိုဝ်း ကာလတ့် ကော ဇမ် ဒူင် ဆိူတ် ကာဒါယ်။ ဇဝ်ဖြာ ဒီ ဘော ဆုင်ဖျာတ် အာမူ ဒူအီ ဒွန် မျုဝ်။ ဂေ ဒူအီ အီ တူ မိုဝ်း နဝ်း ဆိူဝ် နဝ်း မှာန်၊ အန် ဇဝ် ဒီ ဘော အာပ် ဂေ ဒီ ဒူအီ အီ ဂူင့် မာပွါ့ လာင် တီ။’”

32 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “တဲး ဘေ ယွတ်၊ အာဖေ အာရေ ဒီ ဘော တး အူ မိူင် ပီ ဝီ ဟာဝ် ပေါ အူ မိူင်။ န့ ပီ ခုန် လာင် အီ ဟဲန့် ကာဆဝ် ဒီ တး နာ ကာတူင့်၊ တး ဒီ ဒူင် ဆိူတ် ကာဒါယ်။”

33 ဒေါ အန် တီ ဂေ ဒူအီ ပဲ့ ဟဲ့ တဲး ဇဝ်ဖြာ ဂေ ယမ်၊ ဂေ ဒီ ဘော ကွယ် ဒွန် ပ့လုဝ့် ဒဲင် ကာဒါယ် နီ၊ စုး အူ ဘ့လာက် ကော ဝီ ဇမ် ပေါ ဘ့လာက်။ န့ ယီ တူ မိုဝ်း အာဆေ အီ က့လိုဝ် အီ ငှဝ် အာဒါ ဂေ ဘော အာဝ် မိုဝ်း အာဆေ အီ ဒိုဝ်း ကာဇု ဂေ၊ ဝီ ဒိပ် ဂေ။ ဂေ ဒီ ပီ အျီင် မာဒုဝ် ပြဲ ဒဲင် ကာဒါယ် နီ။

34 အိုယ် ဘေ အီ ဟျီင် မာဘူ၊ တဲး ဘေ ဒတ် ယာမ်။ အိုယ် ဘေ အီ ယွတ် မဲန် မာဘူ ဂေ မာပဲ၊ တဲး ဘေ အိတ် ဂ့လိူက် ခဲင် ကာဝှါင်။ ဆီငဲ လုဝ် ယမ် ဘေ ဟဲ့ ဟွတ့် တး ဇမ်။ အုဝ် ဒီ ဟုဝ် တဝ် ဘေ ဟာဝ် ဒွန် နာ ဒွန် ပ့လုဝ့်။ ဘေ ဒီ ဘော ခမ် အီ ဟဝ် ငဝ်း ယမ် ဘေ ပီ အီ ငဝ်း ယမ် မာဘူ အာလူင့်။

35 ဂေ ဒူအီ အီ ပီ ဒါ အီ ဟျီင် မာဘူ တွိုန်၊ ဂေ ယီ တူ မိုဝ်း န့တေန့် ဒီ ပွိုန် တဝ် ဂေ။ ဂေ အီ ပီ ဒါ ကာညာ မာဘူ တီ မိူဝ်၊ ဂေ တူ ပွိုန် တဝ် တဲး ဂေ လွတ်။

36 တဲး ဘေ ထူမ် ပီ ယာမ် ဂေ ဒူအီ အီ ဟျီင် မာဘူ ဘော ပီ ငှုန် ဂေ ဒါ ကာညာ မာဘူ ဂေ မာပဲ တီ။ ခုဝ်၊ ဇဝ်ဖြာ ဟဲ့ ပျာတ့် ဝဲန် ဒူင် ဒွိုမ် ဟူမ် ဒွိုမ် ကွယ် ဂေ။

37 ကာပိုမ် မာဘူ အီ ဟဲ့ ဒွိုမ် ကွယ် ဒါခိုယ် ဟဲ့ ဟွတ့် လိုဝ် တူတ့် ကူပ် ဟဲ့ ရူ ကာဆဝ် ဇဝ်ဖြာ။

38 ဇဝ်ဖြာ ဟဲ့ ဝဲန် ဂေ ဒူအီ ပီ အိုပ် အန်၊ ဟဲ့ ပီ မာခြင်ဆီ ဟဲ့ ဝဲန် ကာဒဝ် မာဝ် ဒူင် ဒွိုမ် ကွယ် အန်။ မိူင် ဒူင် ကွယ် ဂေ တီ၊ န့ ဒီ ဝီ ဘဲန် ဒူင် ယေန် ဒူင် ငွင့် ဒူအီ ကူပ် ဟဲ့ တး ဂေ ဒါ ဆိုက် အီ မွှိုမ် ယုဝ် ဘော ကူပ် ဟဲ့ ရူ ကာဆဝ် ဇဝ်ဖြာ ဒီ ဂေ။